O Le Agaga i Tua o le Faiga Tuai o i Ai Nei
Mataupu 3
O Le Agaga i Tua o le Faiga Tuai o i Ai Nei
1. O le ā le fesili e mapuna aʻe e faatatau i le agaga o loo pulea le faiga tuai ua i ai nei, ma o le ā la tatou faaiʻuga tatau?
O LE faiga ua i ai nei ua loa—e faitau afe tausaga talu ona i ai. I le faasologa o meleniuma o taimi e tasi lava le agaga ua uunaia le faiga o mea a tagata. Pe o le agaga paia ea? E leai se tasi e tautala faasaga tau i mea moni o tala tuufaasolo e faapea mai o le agaga paia mai i a Ieova le Atua o le malosi galue le vaaia lea o i tua o le sosaiete a tagata i ana tauiviga, po o ana faiga o le olaga. Ana fai o le agaga paia lea sa uunaia i luma ma taulamua i lenei faiga tuai o mea, se manū e matua ese le taunuuga i lo le tulaga ua i ai nei le lalolagi ma ona uiga.
2. (a) O a ituaiga o tulafono e tatau ona i ai ma pulea tagata o loo faifai mea faatasi ma lenei faiga tuai? (e) O a “galuega a le tino,” ma o a ua aofia i “fua o le agaga”?
2 O le agaga paia mai i a Ieova le Atua, pe a galue i olaga o tagata, e fuaina mai ai ni fua iloga. Pe a faamasinoina i fua ua lava ma totoe le taimi e faaalia ai, o lenei faiga tuai ua le taʻitaʻia e le agaga paia o le Atua. O le toatele o le fanau a tagata o loo soo tauau ma lenei faiga tuai ua faaalia e i latou o ni tagata e manaomia ona taofiofia e ni tulafono ua faatatauina mo tagata e mafaufauina mea leaga, tulafono e faatonuina ai i latou ma taofia mai le faia o ituaiga uma o mea leaga. I le afe iva selau o tausaga ua mavae sa i ai se tagata na alu ese mai i lalo o sea tino o tulafono. Sa ia tusia se tusi e faaalia ai tatou te manaomia se taʻitaʻiga lelei, se malosi e sili atu ia galue i o tatou olaga, pe afai tatou te ese mai i le faiga tuai ua i ai nei. Tatou te manaomia le agaga, le malosi galue le vaaia e sau mai se Tasi ua sili atu ona amio lelei na i lo lenei lalolagi tuai o mea, e silisili atu i soo se fai tulafono o le sosaiete o tagata. I le malosi paia e mafaia ona uunaia i tatou i ala saʻo sa faasino e le tusi tala o le tusi, ua faapea mai:
“Ia outou savavali i la le Agaga, ona le faia lea e outou o le tuʻinanau o le tino. Auā o le tino ua tuʻinanau lea e tetee atu i le Agaga, ua tuʻinanau foi le Agaga e tetee atu i le tino; ua feteeinai foi ia mea, o le mea lea tou te le fai ai mea tou te loto i ai. A e afai e taʻitaʻiina outou e le Agaga, ua le nonofo outou i le tulafono.
“Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula, ma mea faapena; ou te muai taʻu atu nei ia te outou, pei ona ou fai atu muamua, o e faia mea faapena, e le fai le malo o le Atua mo latou tofi.
“A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.”—Kalatia 5:16-23; ia tagaʻi foi i le 1 Timoteo 1:8-11.
3. O i latou ua tulimatai e fai mo i latou faamanuiaga o le malo o le Atua, o ā galuega latou te lē faia?
3 O se faasologa o mea e matuā ese mai, a ea? E mautinoa ai o i latou e fuaina mai fua o le agaga o le Atua ua le faia mea ua taʻua o “galuega a le tino.” Ua latou tulimataia le malo o le Atua ma le naunautai faamaoni ia latou maua ana faamanuiaga.
4. Ai se ā tatou te le manaomia ona faasino atu ai mea leaga o lenei faiga tuai, ma ai se ā e le fesoasoani ai le faiga tuai i tagata e fai mo latou tofi le malo o le Atua?
4 Ae faapefea, la, le faiga tuai ua i ai nei? Tatou te le tau faasino i ona leaga. Ua faia mo i tatou e ana ripoti o nusipepa, o tala tusia o ana mekesini, o faamaumauga a ana leoleo, o le lē toa filemu ona o le faateleina o le tupu aʻe o le amio leaga, o le totogi maualuga o falemaʻi mo maʻi faalemafaufau ma maʻi e masani ai e mataʻutia, o le feitagai faalemalo atoa foi ma le tupu tele o le faamataʻu ona o se taua faaniukelea i le kelope. E tele lava nisi foi mea e mafai ona faamalauina e saga tuuaia ai le faiga tuai ua faatumulia i “galuega a le tino.” E le taitai ona fesoasoani lenei faiga tuai ia maua e tagata le “malo o le Atua mo latou tofi.” E leai sona fesootaiga ma le malo o le Atua. Ua le pulea, uunaia pe lagolagoina e le agaga paia o le Atua. Ua leai lava sona paia, e oo i lona vaega ua taʻua o Atunuu Kerisiano.
5, 6. Ai se ā e le suea ai i le Atua le tuʻinanau faanatura o le tino i le faia o mea e faasagatau i le agaga o Le na Foafoaina mea?
5 E faapefea ona lē lagolagoina e le agaga o le Atua se vaega lava o lenei faiga tuai? E faapefea foi ona oo tagata fai tino i se tulaga ua avea ai o se mea masani le faia o mea e faasaga tau i le agaga o le Atua? Sa lei faapea le amataga o le tagata. I lena taimi sa uunaia o ia e le agaga o Le na Foafoaina o ia. E le taitai ona avatua e le Atua i mea fai tino faatoa faia se mea leaga e faasaga tau i a te ia. E le o ia o le Puna o mea leaga. Faapei o se toa mo le auala saʻo, sa taʻumamāina e le perofeta o Mose Ieova le Atua i soo se tuuaiga mo tuinanau leaga i tagata fai tino. Sa faapea mai Mose: “E sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio saʻo lava ia. Ua leaga i latou, e le o lana fanau, a o lo latou ila; o le tupulaga faapiopio ma le faaʻoleʻole.”—Teuteronome 32:4, 5.
6 O le ila i le fanau a tagata e le faasinoina i le Atua. Na faia e ia le uluai tagata e atoatoa ona lelei, o se faamalo i Lona tomai faalefoafoaga. E leai lava se ila i le Atua. Faatasi ai ma le lagolagoina e lona Atalii e toatasi, sa faia e le Atua le uluai tagata “i lo tatou faatusa, ia foliga ia i tatou.” O le uluai tagata, o Atamu, o se faatusa tau atua e atoatoa ona lelei, ma lea foi, ina ia avea o se foliga moni, e tatau ona atoatoa ona lelei o ia.—Kenese 1:26-28; 2:7, 8.
7. I le taimi na i ai Atamu i Etena, o le ā le tulaga sa i le va o le lagi ma le lalolagi na faafiafia ai le Atua?
7 I le Faatoaga parataiso o Etena na savali le uluai tagata e tusa ma le agaga paia o le Atua. Sa i ai foi avanoa e talanoa ai o ia ma le Atua. I se tulaga e le vaaia e mata o le tagata ae peitai sa mautinoa e le tagata o Atamu, na savalivali le Atua i lena Faatoaga matagofie o Etena. Sa i ai le aufaatasi i le va o le Atua ma le tagata. Ma i lena foi taimi sa i ai le aufaatasi i mea tau le lagi ma le lalolagi. Ai se ā? Auā o le agaga o le Atua sa i ai i mea uma. O nei mea uma sa faafiafiaina ai Ieova le Atua. O ia o “le Atua manuia.”—1 Timoteo 1:11.
8. Ona o le ā le ituaiga o agasala ua tatou lē mauaina ai i le lalolagi i aso nei se faiga e atoatoa ona lelei, ma o ai foi na faia lena agasala?
8 O lenei la, sa i ai le faavae mo le fausia aʻe o se faiga e atoatoa ona lelei o le a lē oo ina matua ma faasolo ai ina mou atu. Peitai, i aso nei ua tatou lē o i ai i se faiga o mea e mamā, amiotonu ma atoatoa ona lelei. Ai se ā ua faapenei ai? Auā o le pogai ona ua mapuna aʻe se agasala agaʻi i le agaga paia. O ai na faia? Na faia e lē na faasino mai e Iesu Keriso a o tautala atu i ni tagata sa mananao tele e fasioti i a te ia ona o lona tautala i le upu moni a le Atua. I a i latou o le a avea ma fasioti tagata, sa faapea atu Iesu: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala aʻi, auā o le pepelo ia, ma le tamā o le pepelo.—Ioane 8:44.
9. O ai le tamā faaleagaga o lē faia pea le agasala, ma ai se ā?
9 O lē na uluai agasala i le agaga paia ua faasino mai foi e le soo o Iesu e igoa i a Ioane, ua tusi mai: “O lē fai le agasala, mai le tiapolo lava ia; auā ua agasala le tiapolo talu le amataga.” (1 Ioane 3:8) O lē faia pea lava pea le agasala ua leai lava se isi ona tamā faaleagaga na i lo lē na amataina o ia i le agasala.
10. Sa faapefea ona faia e le uluai pepelo ia lava ma Tiapolo?
10 O lenei taʻuina o le uluai pepelo i le foafoaga atoa uma o se tiapolo ua faailoa mai ai o lana pepelo e faasaga i le Atua, auā o le igoa Tiapolo o lona uiga o se Taufaaleaga. Sa tuua e ia le upu moni ma faatupu aʻe i a te ia lava le uiga pepelo. I lona taufaaleaga e ese mai i le mea na fetalaia e le Atua i a Atamu, sa taʻu atu e le Tiapolo i le avā a Atamu, o Eva, o le taui mo le ai mai le laau faasaina e lē o le oti: “Lua te le oti lava; auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.” (Kenese 3:1-5) Sa faia e le pepelo ia lava ma Tiapolo, ae maise lava e faatatau i le Atua.
11. Atonu sa mafai faapefea ona faufau le Tiapolo e taofia le Atua mai le faatinoina o lana afioga pe a agasala Atamu ma Eva?
11 Sa le mafai ona faamautinoaina e le Taufaaleaga i le Atua i a Atamu ma Eva o le a le oti pe afai e aai i le fua o le laau faasaina e iloa ai le lelei ma le leaga. O lana upu ua le sili ona malosi na i lo lea o le Atua. (Eperu 4:12; Kenese 2:16, 17) Peitai, atonu sa mafaufauina e le Tiapolo na te mafai ona taʻitaʻia Ieova le Atua i se tulaga e ona faamaina ai o ia ua le talafeagai ai ona faauma e le Atua Atamu ma Eva i le oti, ae maise lava pe a mafai ona taʻitaʻia e le Tiapolo le ulugalii agasala e aai i le “laau o le ola” a o lei faalauina le sala tau atua i luga o i laua.—Kenese 2:9; 3:22, 23.
12. Na faapefea ona avea le Tiapolo ma fasioti tagata, ma o le ā ua faatalitalia nei mo ia?
12 E ui la i nei taumafaiga faaʻoleʻole uma, na avea lava le Tiapolo ma pepelo. O e na faalogo i a te ia sa oti o ni tagata oti, (solu), auā na faasalaina i laua e Ieova le Atua le Faamasino i le oti ma taofia i laua mai le tago atu i le “laau o le ola” i le tutulia lea o i laua i fafo mai le Faatoaga o Etena. (Kenese 3:17-24) Ona o lona faatupuina ma le lē alofa o le oti i le uluai tane ma lana avā, sa avea ai le Tiapolo ma sē “fasioti tagata.” Ona o lea sa tatau ai ona faaoo le oti i a te ia ina ia talafeagai ma le tulafono sa taʻua e Le na Faavaeina le Faa-Kerisiano: “Ai se na te faatausuaiina se tasi o i latou nei e faatauvaa o e faatuatua mai ia te au, e lelei ia te ia pe ana noatia se maaolo i lona ua, ma lafoina o ia i le moana.” (Mareko 9:42) E saʻo lava, o le faaumatiaga e le uma ua faatalitalia mo le fasioti tagata, le Tiapolo.
13. O le ā na faatusa i ai e le Atua le Tiapolo, ma a o lei faaumatia o ia i le oti o le ā ua faatagaina o ia na te aumaia?
13 O lena iʻuga mo le Tiapolo sa faaalia ina o faatatau i a te ia e le Faamasino o mea uma, o Ieova, le gata sa faaaoga e faasese le fafine o Eva e ai le fua faasaina e feteenai ma le poloaiga a le Atua. I le faatatauina o upu i le Gata faafaatusa, sa fetalai Ieova: “E sili lou malaia i manu vaefa fanua uma, ma manu vaefa uma lava o le vao, ina ua e faia lena mea; e te sosolo i lou manava, o le efuefu e te ʻai ai i aso uma o lou ola; ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:14, 15) Ua faapea ona avea ai le Tiapolo o se tasi ua faamalaiaina e le Atua. O lea o le Atua lava na te tau aaoina le oti o le ua faamalaiaina. Ae peitai e le oo lenei mea seia uma ona maua e le Gata faamalaiaina le avanoa e fai ai sana “fanau,” o le fanauga i le itu faafaatusa po o i le auala faaleagaga. Ona o ia o se agaga, e lē i ai i le Tiapolo le malosi tuufaasolo faafanau tama e pei o i le tagata.
14. Po o le ā na uiga i ai le sosolo faafaatusa i le manava mo le Tiapolo o le Gata Tele, ma o ai sa mulimuli ane ai ona faatasia atu ma ia i lona faamaulaloina?
14 Sa faatusaina e Ieova le Tiapolo i se gata e sosolo i lona manava ma ai mea e ʻai ua pefua i fasi palapala. Ua faapea ona ia faailoa mai ai le loloto ua lafoina i ai i lalo le Tiapolo faamalaiaina. Ona o le tulaga aupito maulalo lea o le olaga, ua faatusaina i se nofoaga ua oo ina taʻua o Tatara (Tartarus). Mulimuli ane ua oo ina i ai faatasi i ina ma le Tiapolo nisi foi agaga, o ni agelu ua latou fulitua i le Taʻu Tamāina o le Atua ae talia le taʻu tamāina o le Tiapolo. Ua avea la nei agaga o lana “fanau.”
15. O le ā fa Peteru ma Iuta e faatatau i agelu na au atu i le Gata Tele i le agasala?
15 A o faatatauina i lenei fanau faaleagaga a le uluai Gata, sa tusia e le aposetolo Kerisiano o Peteru: “Na le faasaoina e le Atua le au agelu o e na agasala, a ua tuuina atu i latou i maea uamea o le pogisa i seoli (Tartarus), ina ia taofia i latou e oo i le faamasinoga.” (2 Peteru 2:4) Ua toe faatatauina foi e le soo Kerisiano o Iuta i lenei lava “fanau” agelu a le Gata, i lona tusi mai: “O agelu foi o e na le taofi i lo latou mamalu, a ua tuua e i latou le mea sa latou nonofo ai, ua taofia e ia i noanoataga e faavavau i lalo o le pogisa, seia oo i le faamasinoga o le aso tele.”—Iuta 6.
16. Ai se ā na galue toatasi ai le Tiapolo i le maileia o Eva e agasala, ma ai se ā ua manatu ai ni isi sa avea o ia ma kerupi?
16 I le taimi na togafiti pepelo ai e le Tiapolo le avā a Atamu, o Eva, e tetee atu i le Atua lona Tamā faalelagi, sa leai se “fanau” a le Gata Tele. Sa gaoioi le Tiapolo na o ia lava. E lei manao o ia i se aumea agelu o se e mafai ona faatavā i a te ia i le avea o le pule i luga o le fanau a Atamu ma Eva. Ua manao lava na te pulea le fanau uma a tagata na o ia. O le ā lava lona tulaga sa i ai i le uluai faalapotopotoga a le Atua tatou te le iloa maoti. E toatele tagata suesue o le Tusi Paia, latou te manatu faapea, o le valoaga i le Esekielu 28:11-19 e uiga i le tupu anamua o Turo, e faatatauina foi lea i a Satani le Tiapolo, ma ona o lea ua latou manatu ai o le Tiapolo na fai lava ia o se “kerupi” i le amataga faatasi ai ma “atalii o le Atua” i le lagi. Afai o lea, o le maulalo o lona lafoina i lalo o se Gata Tele ua matuai sili atu.
17. O le ā le auala ua faatasia ai agelu fouvale ma le Tiapolo i le pogisa i Seoli (Tartarus)?
17 O isi foi agelu tetee i le Atua, o e ua avea ma “fanau” a le Gata, ua faatasia ai i le pogisa (Tartarean) ma ia, ma ua pei o ni gata faamalaiaina. Ua latou le o toe mauaina le malamalama o le tali leleia e le Atua ma ana fautuaga. I la latou fouvalega sa aveesea ai e le Atua lona agaga paia mai i a i latou.
18. (a) Ai se ā ua uliuli patō ai le lumanai mo le Tiapolo ma ana agelu? (e) O le ā le fesili faamisiterio po o tau mea lilo ua lagaina nei?
18 O le lumanai e matuā pogisa mo le Gata Tele ma lana “fanau” agelu. Ua faatalitalia i latou e le aso faamasino o le Atua, ma le vaaiga mo i latou e ‘tuimomomoina i o latou ulu.’ O le a faaaogaina e le Atua le “fanau” a lona “fafine” e faia le tuimomomoina. (Kenese 3:15) O le tuimomomoina e faia e le na o sina mafoe o le paʻu o le ulu. Ae o le nutipalaina o le ulu, e iʻu ai i le oti mo le Gata Tele ma lana “fanau.” E leai lava se avanoa e lē malamalama ai i lenei mea, auā i le Roma 16:20, ua tusia ai mo soo o Keriso: “E le pine foi ona solia o Satani i lalo o outou vae e le Atua e ona le manuia.” O se pogai tatau lenei e i ai le feitagai i le va o Satani ma lana “fanau” ma le “fanau” a le “fafine” o le Atua. Ina ua taʻua e le Atua le “fanau” a lona “fafine,” sa i ai se mea lilo ua fesagai ai i le lagi ma le lalolagi. O le misiterio po o le mea lilo paia lea ua faatupuina le fia iloa i le vateatea e faapea, O ai lenei fanau a le fafine?
O LE “FANAU” FAALELALOLAGI A LE GATA
19. Ai se ā ua latapaia ai Kerisiano ia lē pei o Kaino, le ulumatua o le fanau uma a tagata?
19 O le “fanau” faalemealilo a le “fafine” a le Atua e lei faamaonia o le tama ulumatua a Eva, na ia faaigoa i a Kaino. E ui lava ina ua avea Kaino ma tama ulumatua a le fanau uma a tagata, e lei tuuina atu ai i a te ia le āiā e tu ai o le “fanau” o le folafolaga. I le ma lenei foi, e lei tuimomomoina lava e le Gata Tele, o Satani le Tiapolo le mulivae o Kaino. Ae i le tuimomomoina o se tasi i le ulu, na fasiotia e Kaino lona uso mataʻu i le Atua o Apelu, e le taumate i le faamalepeina o lona ulu i se ta. Na i lo le mauaina o se faamanuiaga mai le Atua po o le agaga paia o le Atua, ae sa avea Kaino o le tagata lona lua i le Tusi Paia ua taʻu “malaia,” o le Gata faafaatusa po o le Tiapolo o le na muamua. (Kenese 3:14; 4:11) I lenei la auala na faia ai e Kaino ia lava ma vaega o le “fanau” faalelalolagi a le Gata Tele, le Tiapolo, o lē na ia faataʻitaʻi i ai i le pepelo ma le faia o le fasioti tagata. E lei alofa o ia i lona uso, o lē sa ia vaaia, faapea foi le Atua, o lē na ia le vaaia. Ua fautuaina e mulimuli i a Keriso ia ese mai i a Kaino, i upu nei:
“Ia tatou fealofani. E le pei o Kaino na i loo leaga, na fasioti foi i lona lava uso; se a foi le mea na ia fasioti ai ia te ia? Ona o lana amio ina leaga, a o le amio a lona uso ua tonu.” (1 Ioane 3:11, 12) “Oi talofa ia te i latou! auā ua latou savavali i le ala o Kaino.”—Iuta 11.
20, 21. Sa faataʻitaʻi Kaino i le Tiapolo i le faia o le ā le ituaiga o agasala, ma i le vaai atu i le faaalia o le ā na mafai ai e Kaino ona agasala i le agaga paia?
20 Sa faataʻitaʻi Kaino i le Tiapolo, o lona tamā faaleagaga o le o “loo leaga,” i le agasala faasaga i le agaga paia o le Atua. E le faapea la o le uiga o lenei mea, na i ai i a Kaino le tama muamua a Atamu ma Eva i soo se taimi, le agaga paia. Na aveesea mai i ona mātua faalelalolagi le agaga paia ona ua la solia ma le loto i ai le poloaiga a le Atua. Ae peitai, na vaaia e Kaino gaoioiga a le agaga paia. Ana fea ma e faapefea?
21 I le taimi lea na tuuina atu ai e Kaino i le Atua se taulaga mai lana faatoaga, ae o lona uso laitiiti o Apelu na ia tuuina atu se taulaga i le Atua i manu ua fasia mai lana lafu mamoe. Pe na taliaina e le Atua nei faiga taulaga mai uso e toalua? Ua taʻu mai e le Kenese 4:4-7 mo i tatou: “Ua silasila mai Ieova ia Apelu, atoa ma lana taulaga; a e peitai o Kaino ma lana taulaga, ua ia le silasila i ai. Ona ita tele ai lea o Kaino, ua faaūū lava ona mata. Ona fetalai atu lea o Ieova ia Kaino, Se a le mea ua e ita ai? Se a foi ua faaūū ai ou mata? Pe afai e te amio lelei e te le maua ea le fiafia? a e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia.”
22. O le ā na faaalia e le agaga paia sa vaaia e Kaino?
22 E moni lava, e lei faapea la na faaali le Atua i a Kaino ma Apelu i lena taimi. Pe na faapefea ona tali leleia e ia le taulaga a Apelu, ua le faailoa mai i a i tatou. Ae peitai sa tatau lava ona i ai se faailoga vaaia o lenei mea. O se gaoioiga a le agaga paia o le Atua. Sa vaaia e Kaino lenei mea, ma e aunoa ma se upu mai le Atua. Ua oo loa ina ita tele ma mata faaūū o ia. Sa lei faaalia e ia le loto maulalo ma le salamo i le gaoioiga vaaia a le agaga paia mai le Atua o lē na ia ofoina atu i ai se taulaga e lei talileleia.
23. O le agasala a Kaino faasaga i le agaga paia sa faatino i le ā le auala, ma ai se ā?
23 I se tulaga manino, e lei sao gaoioiga a Kaino. O le siufofoga o le Atua mai se nofoaga le vaaia na faamanino i a te ia lea tulaga. Ona o le faamaualuga ma le lē fia faaalia o le loto maulalo, e lei salamo ai Kaino, ma liliu i le faia o le lelei, e ui lava ina taoto ane le agasala e pei ua i le faitotoa o lona fale e manao foi i a te ia o se ua na maileia. E lei manao o ia e manumalo mai ai, e ui lava ina sa faaalia i a te ia e le agaga paia o le Atua. I lona le manao i le fiafia mai le faaūū, na fuafuaina e ia faasaga i lē na talia e le Atua e fasioti i a te ia. O lea na agasala o ia faasaga i le agaga paia.
24. O le a atonu e mafai ona talanoaina, pe sa i ai i a te ia lē ua avea nei ma Tiapolo le agaga paia, ma na ia vaaia gaoioiga a le agaga paia?
24 O lenei ua oo i a te ia le toasa o le Atua ma faamalaiaina e ia Kaino. Ae peitai sa fiafia le Gata Tele, le Tiapolo, auā ua ia vaaia nei sona atalii faalelaueleele e uiga moni lava e pei o lona tamā faaleagaga. O le Tiapolo foi na agasala faasaga i le agaga paia. Auā e le gata ina sa vaaia e ia le Atua, ae o le ua avea nei ma Tiapolo na vaaia foi gaoioiga uma a le agaga paia e faatatau i le nofoaga i le lagi ma le foafoaga o le lalolagi ma le tagata lelei atoatoa i ina. (Iopu 38:7) I le taimi a o saoloto o ia mai ona lava tuinanau, sa i ai lava i a te ia se vaega o le agaga o lona Tamā faalelagi. O mea na mafai ona ia faia ona o lenei agaga paia, sa iloa lava e ia. Na ia vaaia foi le “agaga o le alofa tunoa” sa faatino e le Atua i a Atamu ma Eva i lona faia lea mo i laua e olioli i le ola lelei atoatoa faaletagata i se lalolagi parataiso. A e ui i lea, o le ā na faia e le ‘atalii o le Atua’ faalelagi?—Eperu 10:29.
25. Sa faapefea ona agaʻi atu lea ‘atalii o le Atua’ e gaoioi i le agasala faasaga i le agaga paia ma o lea na faia ai o ia e ia lava ma ā?
25 Sa ia faauiga sese le “agaga o le alofa tunoa” i lona fai atu lea i a Eva ua uunaia e le manatu faapito i le vaega a le Atua. A e le gata i lea, o le faasaina na tuu e le Atua e aua le aia le laau e iloa ai le lelei ma le leaga ua faapogai mai le fefe o le Atua ina neʻi mafai e ana mea fai ola ona agavaa e fai faaiʻuga e aunoa ma se faalagolago i a te ia, faaiʻuga ia o le lelei ma le leaga, o le saʻo ma le sese. O lea, ina ua faia ma le loto i ai e le ‘atalii agaga o le Atua’ le faaiʻuga eseina o mea moni ma pepelo i a Eva e faavalea ai ia agasala, na agasala faasaga ai i le agaga paia, o se agasala e le ma faamagaloina. Ua tuua e ia ia lava e faatosina e le manatu faapito na te mafai ona pulea aoao le lalolagi ma tagata e nonofo ai ma gaoioi ai loa e fao le pule aoao. Ona o lea na le iloa ai e ia le agaga paia o le Atua. O fua o le agaga o le Atua i lona olaga ua oo ina magumagu ma mate. Ua faia e ia ia lava ma Tiapolo, ua tatau i ai le faaumatiaga.—Eperu 12:29; 6:7, 8.
26. Sa faapefea ona avea le Tiapolo ma “alii o temoni,” ma ai se ā o le a leai ai se vaega a i latou o faia le faataulaitu i le malo o le Atua?
26 O lenei uluai fai agasala faasaga i le agaga paia ua faia e ia ia lava ma temoni. Ma o agelu o “atalii o le Atua” sa faatasia atu mulimuli ane i a te ia e tetee faasaga i le Atua, ua avea foi i latou ma temoni e pei o le Tiapolo. O nei temoni sa avea i latou ma “fanau” a le Gata Tele, ma ua avea ai le Tiapolo ma “alii o temoni” po o la latou pule, ua faaigoaina o ia i a Pelesepulo. (Mataio 12:24-27) O i latou nei ua sapasapaia le faatemoni, ina ia liliu ese tagata mai le tapuai atu i le Atua soifua moni e toatasi, o Ieova. Ua faavasegaina i latou o ni “agaga leaga” po o agaga le mamā. (Mataio 10:1, 8; 12:43-45) O le faia o le faataulaitu i lalo o le taʻitaʻiga a nei temoni e iʻu ai i le le mamā faaleagaga i le na te faia ma ua le mamā ai o ia i le silafaga a le Atua. O le faia o le faataulaitu o se gaoioiga o le tino le atoatoa ona lelei ma e taofia ai le tagata mai i le i ai o sana vaega i le malo o le Atua ma ana faamanuiaga. O agaga leaga e faasaga tau i le agaga paia o le Atua, ma na te taʻusalaina le tagata e au atu i soo se mea a agaga leaga.—Teuteronome 18:9-14; Kalatia 5:19, 20; Faaaliga 9:20, 21; 21:8.
O LE ITUAIGA O “AGAGA” E I AI O IA
27. Ai se ā ua tatau ai nei ona mafai ona tatou fuafua le ituaiga o agaga o loo i tua o le faiga tuai o i ai nei?
27 Ua o se mea e sili ona tāua mo i tatou ia iloa mea o i luga. O lo tatou iloaina o nei mea, e mafai ai ona tatou malamalama i le pogai mo le tulaga o i ai nei le fanau a tagata. O lea ua tatou i ai i aso nei, i la tatou luasefulu o senituri, o le senituri na amataina e aliali mai e manuia mai le vaaiga faaletagata. I le faitauina o le taimi faale-Tusi Paia, ua tatou laasia le ono afe tausaga mai le taimi na tetee ai le ‘atalii o le Atua’ manatu faapito faasaga i le pule silisili ese aoao o Ieova ma tosoeseina ai Atamu ma Eva i le laina lava e tasi o le lē usiusitai i le Atua. Ina ua mavae le tulieseina o nei tagata fouvale e toalua i fafo o le parataiso o Etena, sa faatu ai loa se faiga fou faaletagata i le lalolagi, e ese mai i lea na fuafuaina e le Atua Le na Foafoaina i laua, mo la tatou paneta o le lalolagi. Ma o lea ua tatau ona tatou mafai ona fuafuaina po o le fea le ituaiga o agaga ua i ai nei i tua o le faiga tuai o mea.
28. Pe a tatou tautala faatatau i le agaga o i tua o le faiga tuai, o le ā le uiga ua tatou tuu i le upu “agaga”?
28 I le faaupuga “agaga” o lona uiga o se malosi galue lē vaaia, o se malosi e faagaoioia, faaolaina, o se malosi na te uunaia le sosaiete o le toatele o le fanau a tagata. Na te aumaia ni aafiaga i tulaga o latou olaga. Na te uunaia i latou i se faasinoga e tasi e masani ai. E iʻu ai ina faatasia tagata lautele e gaoioi i se auala uiga faatasi e iʻu ina latou faia ma le lē mafaufauina, e aunoa ma le manatu i ai. O mea latou te faia ua toetoe lava faia o se mea e masani ai, ua uunaia e se faalogona mai totonu e mulimuli i se faiga masani ai i uiga faaleolaga. Atonu e i ai ni nai eseesega laiti e tusa ai ma uiga totino, a e ui i lea o le ola ma manaoga e autasi lava ma e faapea ona faailogaina ai uiga tau le sosaiete faaletagata ua i ai nei i lalo o lenei faiga o mea.
29, 30. (a) O ai le pule le vaaia o lenei faiga tuai, ma pe ua na o ia i lena pule? (e) O auga mai na pulega e mo le ā le ituaiga?
29 O lea agaga ua i tua o le faiga tuai o aso nei ua matuā afaina lava ona o peresona mamana le vaaia o loo pulea lenei faiga o mea ma ua latou taulimaina lona pulega. E le tau faafesilia po o ai ua pulea malosi ma faafoea le faiga atoa. Mai luma lava seia oo mai i le meleniuma lona lima o le faiga tuai, na alagaina e Iesu Keriso o Satani le Tiapolo o le “alii o lenei lalolagi,” ma e lei i ai ni ana feuiaiga faaleuo ma ia. I le toe po o lona ola faaletagata i le lalolagi, sa fetalai Iesu Keriso i ona aposetolo: “O le a sau le alii o lenei lalolagi, a e le maua e ia se mea ia te au.” (Ioane 12:31; 14:30; 16:11) Ma i le pulega le vaaia o le fanau a tagata, ua le na o Satani le Tiapolo. Ua faatasi ma ia agelu temoni o ana aumea ma o ia o lo latou tupu po o pule. O nei temoni ma o latou malosi ua latou taulimaina aiaiga o lenei faiga tuai o le sosaiete faaletagata.
30 O aafiaga o a latou pulega mamana ua afaina ai mo le leaga. I se tautinoga mo lenei mea, o loo i ai se valoaga na tusia i lalo e le aposetolo o Ioane e faatatau i le tulia mai o temoni mai le lagi paia. O lenei valoaga, e pei ona maua i le Faaaliga 12:7-12, e faapea:
“Ua tau foi le taua i le lagi; o Mekaeli ma ana agelu ua latou tau ma le tarako, ua ʻau foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia. . . . O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.”
31. E tusa ai ma le Faaaliga 13:4, o le ā le tapuaiga ua taʻitaʻiseseina i ai e Satani le “tarako” i latou uma o nonofo i le lalolagi?
31 O se tasi o mea ua taʻitaʻiseseina i ai e le Taufaasese, o Satani le Tiapolo, le lalolagi ainā uma, o le tapuaiga lea i a te ia lava. Atonu e teʻi tagata faamaoni ma faaseseina i lena faaaliga, ae peitai ua faapea mai le Faaaliga 13:4 faatatau i tagata o e ulu atu i faiga faalemalo a le lalolagi: “Ua latou ifo foi i le tarako o le na tuuina atu le pule i le manu feai, ua latou ifo foi i le manu feai.”
32. Po o ai le ‘atua o lenei faiga o mea’ ua matua manino mai i ā gaoioiga a ia faasaga i le malamalama o le tala lelei?
32 Ua i a i tatou foi upu a le aposetolo o Paulo e faatatau i ai, e faapea ua tapuaia e le lalolagi o le fanau a tagata le Tiapolo o le sili, ma le iloa po le lē iloa foi. Fai mai a Paulo: “Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le talitonu e le atua o le lalolagi nei, ina neʻi pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.” (2 Korinito 4:3,4) E i ai se “atua” o lenei faiga o mea. O lona tulaga tau atua ma lana pulega o le lalolagi ua tatau ai lava ona aafia ai le agaga o loo i tua o le faiga tuai o i ai nei.
33. Ua faapefea ona afaina i tatou faanatura i mea na faia e ‘le atua o lenei faiga o mea’ e latalata i le amataga o le tala faasolopito o tagata?
33 I le tauamataga o le tala faasolopito o tagata, na olegia ai e lē ua avea ma ‘atua o lenei faiga o mea,’ le paū o o tatou uluai matua. Sa uunaia malosi Atamu ma Eva ia le usiusitai i Le na Foafoaina i laua. Na tupu lenei mea ae tatou te lei fananau mai. Ma ua faapea ona tatou faalogoina le faalogona faamaʻia mai i lenei mea. Ua tautala ma le saʻo i mea moni le aposetolo o Paulo i le Roma 5:12 i lona tusi mai: “Faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.“ Ua tatou oo i ai i lalo o le faasalaga tau atua o le oti auā ua tatou mauaina le tuufaasolo mai o le lē lelei atoatoa, le agasala ma le amio leaga. Sa tusa lava ua oti i tatou. I le Atua sa tatou lē ola.
34, 35. Ai se ā sa tusa ai lava ua oti i tatou i lena taimi i la le Atua, ma o le ā ua faapea o loo galue i totonu o i tatou?
34 I se tulaga faanatura, o i tatou o ni suli o le finagalo lē malie o le Atua, o “fanau o le toasa.” Sa tatou ‘taumamao ma le ola o i le Atua.’ (Efeso 4:18) E pei foi ona fai mai le Kolose 1:21: “O outou foi sa tagata ese anamua, sa fai o ia mo outou fili i o outou loto i le amio leaga.” Ona o le tulaga lena sa i ai ma i lena taimi, sa le galue Ieova le Atua i a i tatou. O lea la, o ai ma o le ā foi sa galue i a i tatou?
35 I le taliina o lena fesili, o upu i le Efeso 2:1-5, sa tusia i Kerisiano faaliliuina, ua faapea mai mo i tatou: “O outou foi lava o e na oti i amio leaga ma agasala, na outou savavali ai anamua, e tusa ma le tu a lenei lalolagi, e tusa ma le taʻitaʻi o loo pule le ea, o le agaga lea o loo matuā galue nei i e ua faalogogata. O i tatou foi, na amio faatasi i tatou uma lava ma i latou anamua, ina ua tatou nonofo i tuʻinanau o tatou tino, na faia foi e i tatou o mea na loto i ai le tino atoa ma le mafaufau, na fanau mai foi i tatou o le fanauga a le toasa, faapei o isi o le lalolagi. A o le Atua, ua i ai le faulai o le alofa, ona o lona lava alofa tele na ia alofa mai ai i a i tatou, a o oti lava i tatou i amio leaga.”—The Jerusalem Bible; An American Translation.
36. E tusa ai ma le manatu o nisi o e faaliliu le Tusi Paia, o le “agaga” ua taʻua i le Efeso 2:2 o le ā lona uiga, ma o loo i lalo foi o le pulega a ai?
36 O ai la le “agaga lea o loo matuā galue nei i e ua faalogogata”? O ia lava o le uluai fouvale o tetee uma faasaga i a Ieova le Atua, ua faaigoaina, o le Tiapolo, “le gata tuai.” Ae peitai i inei e tatau lava ona faamanino atu faapea, e le Efeso 2:2, o le upu “agaga” ua vaaia e nisi o ē faaliliu Tusi Paia faapea e le o se peresona patino. Ua latou vaaia faapea o se malosi galue le vaaia o loo i lalo o le pule a le “taʻitaʻi o loo pule le ea” ma o loo galue nei i e ua faalogogata i a Ieova le Atua. Mo se faataʻitaʻiga, o le faaliliuga a Young o le Efeso 2:2 e faitau faapea: “e tusa ma le masani sa tatou savavali ai faapei ona ola lenei lalolagi faapei o le taʻitaʻi o le pule o le ea, le agaga o loo galue nei i fanauga faalogogata.” (Ia vaaia foi i le faaliliuga a Rotherham’s.) O sea “agaga,” e lē o se peresona patino, ua i lalo o le pulega a lē amio leaga o loo faaaogaina le “ea.” Na te faamalosia i latou, o e o loo gaoioi i latou lava “e tusa ma le faiga o mea a lenei lalolagi,” i le lē usiusitai i le Atua.
37, 38. E faapefea ona faaalia e le 1 Ioane 2:15-17 le auala o loo faalauiloa ai e le agaga o loo i tua o le faiga tuai ia lava?
37 Po o fea tatou te mauaina ai se iloa patino e tusa ai ma le agaga lea o loo i tua o le faiga tuai o loo i ai nei ma e faapefea foi ona faaalia mai o ia lava? Ia, sei o tatou vaai po o le ā ua tusia e le aposetolo o Ioane. I lona lapataia o Kerisiano faasaga i le agaga o le lalolagi, na ia tusi mai: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā. Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi. O le a mavae atu foi le lalolagi, atoa ma lona tuʻinanau.”—1 Ioane 2:15-17.
38 Ona o lea e uunaia e le agaga o le faiga tuai tagata o le lalolagi e tuʻinanau i mea faatosina i o latou mata ma tuʻinanau i mea e lelei i faalogona o le tino, ma o le taunuuga la o ia tuʻinanau o le faia o gaoioiga manatu faapito. Ona o le tele o faanaunauga i tuʻinanau e malie ai mata ma le tino augavale, ua faapea ona faupue ai e tagata o le lalolagi mea e tausi ai o latou ola, e olioli ai i o latou olaga. I le fiasili ona o mea ua latou maua, latou te mananao e faalialia a latou mea o le olaga e mimita ai i luma o isi. Ua avea lea ma mea e uunaia ai ē e leai ni a latou mea e tuʻinanau ia maua foi e i latou na mea mo i latou lava.
39. I le ā le auala sa le talia ai e tagata Iutaia o le uluai senituri le agaga o le Atua, ma, e tusa ai ma le Roma 1:26-32, o le ā le taunuuga mo i latou ona ua faataga e o atu i o latou lava ala?
39 I tua i le senituri muamua o Tatou Aso Taatele sa i ai tagata Iutaia o ē na filifili e faagaoioia i latou e le agaga ua i tua o le faiga tuai lautele. Sa i ai pea le malumalu na faia e le Tupu o Herota i lo latou laumua i Ierusalema, ma sa latou iloa foi le Tulafono tusia na aumaia e ala mai i le perofeta o Mose. Latou te lei mananao e talia le agaga o le Atua sa faaalia i le Faa-Kerisiano moni ma faasalalauina i le lalolagi ainā atoa. O lea na tuua ai i latou e Ieova le Atua e o pea i o latou ala, e pei lava o Isaraelu faaoleole anamua. O le ā la le taunuuga mo i latou? I le Roma 1:26-32, ua taʻu mai e le aposetolo o Paulo mo i tatou i lona faapea mai:
“O le mea lea na tuuina atu ai i latou e le Atua i manao e masiasi ai; auā o latou fafine foi, ua latou fesuiai le tu e tatau ma le tu e le tatau; e faapea foi tane, ua tuua e i latou le tu e tatau i le fafine, ina ua mu i lo latou femanaoai; o tane ua fefaiai i latou i mea e masiasi ai; ua tauia foi i latou i o latou lava tino e tusa ma lo latou sese. Ua latou le loto foi e taofi i le mataupu i le Atua, o lea ua tuuina atu ai i latou e le Atua i le loto leaga, latou te fai ai mea e le tusa; o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ʻoleʻolega, ma le faatāutala; o tuaupua i latou, o e fai tala leaga, o e ʻinoʻino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i matua, o e valelea, o e tuumavaega, o e le lotoaiga, o e le faamolemoleina, ma ē faalealofa; o i latou ia ua iloa le tonu mai le Atua, e tatau ai ona oti o e fai mea faapena, e le gata ona latou faia o ia mea, a e fiafia lava i latou i e ua faia.”
40, 41. A o tuputupu pea le Faa-Kerisiano, pe na suia ai ea le agaga ua i tua o le faiga tuai, ma o le a sa valoia mai e Paulo i le 2 Timoteo 3:1-12?
40 I tausaga faaaposetolo o le uluai senituri T.A. sa faalauiloaina ai le faatuatua Kerisiano moni, ma pe le suia ai ea e le agaga paia o le Atua le agaga ua i tua o le faiga tuai a o salalau atu le Faa-Kerisiano? Ma pe sa lei faia ea faapea ae maise lava ina ua faavaeina Atunuu Kerisiano e le emperoa Roma, o Konesetanitino le Sili, i le senituri lona fa T.A.? Pe sa lei i ai i lena taimi se tulaga mamā tau amioga, tapuaiga paia, se agaga fou ua faaosofia i totonu o le sosaiete o tagata agaigai i luma? E leai, e le o lea pe a faatatau atu i le mea na tusia e le aposetolo o Paulo a o faafalepuipuiina, e tusa o le tausaga e 65 T.A. pe a. I lana tusi, sa faatuatusia i lana aumea mo se taimi umi, o Timoteo, sa ia vavalo:
41 “O ona aso e gata ai e oo mai ai aso faigata; auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; . . . O i latou uma foi o e loto ina nonofo ma le amio Atua ia Keriso Iesu, e sauaina i latou.”—2 Timoteo 3:1-5, 12.
42. Ai se ā tatou te le mananao ai ia maua le agaga o loo i tua o ē latou te sapasapaia le faiga tuai?
42 O le gaogaosa o uiga eseese ua mavae atu ona taʻua ua faamatalaina ai le agaga ua uunaia le fanau a tagata lautele a o latou lagolagoina le faiga tuai. Po o lena ea le ituaiga o agaga tatou te faanaunau e na te taʻitaʻia o tatou olaga? E leai; e le o lea pe a tatou faamasinoina e tusa ma fua o la latou agaga i e o loo lagolagoina lenei faiga tuai ma mea ua latou seleseleina mai ai i aso nei! Tatou te manaomia ma le faamaoni se agaga e ese mai, se agaga e gaoioi mo se faiga o mea e sili atu ona lelei. O le uiga o lenei mea e tatau ona tatou maua le isi agaga ua i ai ma na o lea—o le agaga paia.
[Fesili mo le Suʻesuʻega]
