Mataupu 9

O Le Faiga Fou ua Lagolagoina e Le Agaga Paia

1. E ui i le Failauga 1:9, ai se ā o le a avea ai le faiga o sau ua lagolagoina e le agaga paia o se mea e matuā fou lava?

PE A tatou tautala e uiga i se faiga o sau ua lagolagoina e le agaga paia, e mafai moni ona tatou faapea atu: “Ina vaai mai ia; o le mea fou lenei.” E oo lava i le Tupu poto o Solomona, o le a le mafai ona ia faatatau i ai lana tulafono ua taʻua: “Ua leai lava se mea fou i lalo o le la.” (Failauga 1:9, 10) Ua faamaonia lava le tonu o upu a Solomona seia oo mai i le taimi nei e tusa ma le olaga o tane ma fafine atoa foi ma le faatutu aʻe ma le toe aveesea o malo faaletagata. Ae peitai o le faiga o mea, ua toeitiiti ona aumaia lea e Le na Faia le lagi ma le lalolagi e matua avea o se mea e fou, o se mea e lei taitai ona oo i ai muamua i le tala faasolopito uma o tagata.

2. Ai se ā ua tatau ai ona faatalitalia o le agaga paia o le a i tua o le faiga fou ua folafolaina?

² O le a i ai le agaga paia i tua o le faiga fou o sau. Ma ai se ā ua tatau ai? Sa i ai i tua i le tusiaina o le Tusi Paia, ma o lenei tusi faagaeeina ua tumu ma silia i le tala lelei e faatatau i le faiga fou filemu mo le fanau a tagata ua puapuagatia i faalavelave. Pe a oo ina aumaia i lenei tupulaga, o i latou uma o le a ulu atu i le oliolisaga o le a i ai, o le a latou faapea ane ma le fiafia: “O se mea fou moni, lenei!” O le a faamaonia e Ieova  le Atua o le vavau e faamaoni i lana folafolaga i le fanau a tagata: “Faauta! Ou te faia ia fou mea uma lava.”—Faaaliga 21:5, NW.

3. (a) O ā mea fou o loo tautala agaʻi i ai le tusi o Faaaliga? (e) Ai se ā o le a le avea ai le faiga fou a le Atua o se galuega fonofono?

³ Ua tautala le Faaaliga, le tusi mulimuli o le Tusi Paia, e uiga i mea fou, o se “igoa fou,” o se “pese fou,” “le lagi fou ma le lalolagi fou,” ma “Ierusalema fou.” (Faaaliga 2:17; 3:12; 5:9; 14:3; 21:1, 2) O ni mea ia e faagaeetia ai pe a mafaufau ma talanoa i ai. Ma afai e talisapaia e se tagata le natura o mea fou ua saunia mo le fanau a tagata, e uunaia o ia e ‘pese i a Ieova i le pese fou.’ (Salamo 96:1; 98:1; 144:9; 149:1) O Lana faiga fou o le a lē avea ma mea ua fonoina, o se toe faafouina o le faiga tuai o le fanau a tagata. O le a lē o se taumafai e faasao le vaega e tele e mafai ai o le faiga tuai, ma na o le faaopoopo i ai o ni nai mea fou, ma faapea ona faaaoga le faiga tuai a tagata e avea ma faavae mo le faiga fou. E le mafai lava ona manuia lea mea. Sa fetalai Iesu Keriso lava ia:

“E leai se tagata na te fonoa le matuā ofu i le fasi ie o le ofu fou; a faapea, ona masae lea i le mea fou, e le tusa foi le fasi ie fou ma le mea pala. E leai foi se tasi na te utufia le uaina fou i fagu paʻu tuai; a faapea, ona pa ai lea o fagu paʻu i le uaina fou, ona masaa ai lea, e māumau foi fagu paʻu. A e peitai e utufia le uaina fou i fagu paʻu fou.”—Luka 5:36-38.

4. Ai se ā o le a leai se vaega a Ierusalema tuai toe fausia e faia i le Faiga Fou?

⁴ E tusa ai ma lena faataoto, o le mea ua muai folafolaina e le Atua mo le fanau a tagata o se mea e fou lava. O le a leai lava se taʻua ai o Ierusalema tuai i Asia Tototonu i lea mea. Ina ua faaooina e le Atua lana faamasinoga faaoosala i le tausaga e 70 T.A., na ia faaumatia le Ierusalema o aso o Iesu. O le Ierusalema ua toe  fausia talu ai lena taimi, na lei toe fausia i Lana poloaiga po o ona tagata faamaonia. (Ioane 4:21) O le mea e tāua, o Ierusalema Fou lea! E le o se aai lea e fausia i inei i le lalolagi, i le tulaga o le Ierusalema tuai. O le Ierusalema fou e faalelagi. E pau lava le mea tatou te manaomia e faia o le iloiloina lea o lana faamatalaga e pei ona aumaia i le Faaaliga 21:9 e oo i le 22:3, ma o le a tatou vaaia, ona o lona fua faatatau ma lona foliga po o ona vaega eseese, e matuā le mafai ona fetaui ma le laufanua o Ierusalema tuai. I le faamatalaga faagaeeina, ua taʻua le Ierusalema Fou o “le faatoanofotane, o le faletua lea o le Tamai mamoe.”

5. O le Ierusalema Fou ua faatusaina i a te ai, ma e faapefea ona faafetauia lena ma le gagana o le Sakaria 9:9?

⁵ “Na ou iloa,” fai mai le aposetolo o Ioane, “le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane.” (Faaaliga 21:2) E pei lava ona faatusaina le Ierusalema Fou i se fafine, se fatoanofotane, se avā po o le faletua, sa faapena foi le Ierusalema tuai ona faatusaina i se fafine. O se faataʻitaʻiga o lea, ina o tietie Iesu i Ierusalema i a Nisani e 9 (Mati 27), 33 T.A., sa faapei o ia o se tupu-tofiaina ua tietie ane i lona faapaleina ma sa faapea ona faataunuu ai le valoaga a Sakaria 9:9: “Ia e matuā fiafia o oe le tama fafine a Siona; ia alaga fiafia o oe le tama fafine a Ierusalema; faauta, o le a alu atu lou Tupu ia te oe; o ia...o loo tietie i le asini, o le tamai asini foi.”—Mataio 21:4,5.

6. E faapefea ona faatusatusa Ierusalema Fou ma le aai tuai i lona lalelei, ma e faapefea ona sau i lalo nei mai le lagi mai le Atua?

⁶ Sa taʻua Ierusalema faalelalolagi anamua “O le aai . . . lenei sa taʻua ua atoatoa ona matagofie.” (Auega 2:15; Salamo 48:1, 2; 50:2) A e ui i lona matagofie ma le mamalu, e le mafai lava ona  faatusatusaina lea i le Ierusalema Fou faalelagi. O lenei aai fou faamamaluina ua alu ifo “mai le Atua i le lagi.” I le a le auala? Ona o lenei pulega fou faalemalo e faapogai mai le Atua ma o lana pule ma le mana ua faalauaiteleina mai le lagi i le lalolagi, mo le lelei tumau o le fanau a tagata.—Faaaliga 21:2.

7. I le ā le auala ua avea ai Ierusalema Fou, le aai paia, ma “faletua lea o le Tamai mamoe”?

⁷ I le ā le auala ua avea ai le aai paia ma “faatoanofotane, o le faletua lea o le tamai mamoe”? Auā ua faia aʻe i le faapotopotoga o soo faauuina o Keriso, o suli faatasi ma ia i le malo faa-Mesia. (Efeso 5:25-27; 2 Korinito 11:2; Faaaliga 19:7, 8; 22:17) E faatatau i a i latou nei taitoatasi sa fetalai Iesu faamamaluina: “Ou te tusi foi i ai le suafa o loʻu Atua, ma le igoa o le aai a loʻu Atua, o Ierusalema fou lea e alu ifo nai le lagi ma loʻu Atua, atoa foi ma loʻu igoa fou.” (Faaaliga 3:12) O i latou o le “faatoanofotane,” o ni Isaraelu faaleagaga, i le feagaiga fou, ma o lo latou fuainumera e 144,000. Ua fausia aʻe i latou e Iesu Keriso i ona lava luga auā o ia o le “papa,” ma o ona aposetolo e toasefulu ma le toalua e faalagolago i a te ia faapei o ni mea faavae lagolago.—Mataio 16:18; Faaaliga 7:4-8; 14:1-5; 21:14.

8. Ai se ā o le a avea ai suli faatasi ma Keriso e 144,000 o se tino po o se vaega pule e matuā fou lava?

⁸ O le 144,000 o suli faatasi ma le Faatoafaiava faalelagi o Iesu Keriso, o le a lē aofia ai tagata faafaiga malo o le lalolagi, e oo lava i tupu faafaiga malo ma faalelotu ua nofo tupu i Atunuu Kerisiano. O i latou o se tino o pule faalelagi e ese mai, o se mea e matuā fou lava. Ona ua le toe i ai le natura faaletagata, ua i a i latou le “amio Atua.” O i latou o ‘se foafoaga fou.’ (2 Peteru 1:4; 2 Korinito 5:17) Ua latou ausia mea e  manaomia mo se soo i le lalolagi e ofi atu ai i le malo faalelagi. Ua “toe fanau” i latou, ua ‘fanau mai i le vai ma le agaga,’ “e le o le toto na fanau ai, e le o le manao foi o le tino e le o le loto foi o tagata, a o le Atua lava.” (Ioane 1:12, 13; 3:3, 5) I le Roma 6:5, 8 ua faitau ai e soo fanauina i le agaga o Keriso: “Auā afai ua faatasia i tatou i le faatusa i lona maliu, e faapea foi i tatou i lona toe tu mai. Afai foi ua oti faatasi i tatou ma Keriso, ua tatou taofi, tatou te ola foi faatasi ma ia.”

9. O le toe tu o Keriso, o le ā lona ituaiga, e faapei o le fea ituaiga o toe tu o le a faatasia ai ona suli e 144,000 faatasi ma ia?

⁹ O le ā le faatusa o “lona toe tu mai”? Ia, sa faapefea ona toe faatu mai Keriso? I le 1 Peteru 3:18 ua taʻu mai i a i tatou:“Auā o Keriso foi na tigaina o ia faatasi mo agasala, o le amiotonu o le sui o le amioletonu, ina ia taʻitaʻiina e ia o i tatou i le Atua; na fasiotia o ia i le tino, a ua faaolaina mai i le Agaga.”

10. (a) O le ā le fuafuaga a le Atua i lona “saunia” ai o se tino aano mo lona Alo o Iesu i le lalolagi? (e) Mo le toe faaolaina mai o Iesu ina ua uma ona fasiotia i le tino mo agasala, e faapefea ona tatau ona ia toe faatuina mai?

¹⁰ I le auina mai o lona lava Alo i le foliga o le tino agasala, na faamaulaloina e le Atua lona Alo, ua “faamaulalo ane teisi o ia i agelu.” (Roma 8:3; Eperu 2:7-9; Salamo 8:5) Peitai e lei finagalo le Atua mo lona Alo e toatasi ina ia tumau o se mea fai ola o aano ma le toto e faavavau, e maulalo na i lo agelu o le lagi. Ua finagalo le Atua e faamamaluina o ia e sili atu ona maualuga na i lo agelu ona o lona faamaoni seia oo i lona oti i le tino. O lea o le tino tagata lelei atoatoa na “saunia” faavavega e le Atua mo Iesu i le lalolagi, o le tino lena na ofo atu e Iesu i le Atua faatasi o se taulaga mo taimi uma. Sa tuuina mai i le fanau a tagata e ʻaai ai faapei o  se areto; e pei lava ona fetalai Iesu: “O le areto foi ou te avatua, o loʻu tino lea, ou te avatua ma ola o le lalolagi.” (Eperu 10:1-10; Ioane 6:51) O lea, ina ua mavae le “fasiotia o ia i le tino,” o Iesu, afai e toe faatuina o ia i le ola, e tatau ona “faaolaina mai i le Agaga,” o se Atalii agaga faalelagi o le Atua.

11. Mo soo faafanauagagaina o Keriso e toe tutu mai e foliga i lona toe tu, i le ā e tatau ona toe “faaolaina mai,” ai ma e faapefea ona tusa ai o lenei ma le 1 Korinito 15:42-54?

¹¹ Faapei o Iesu Keriso, e tatau foi i ona soo ua fanauina e le agaga ona “faamaoni seia oo i le oti” i la le tino. (Faaaliga 2:10) Mo i latou ina ia faatasia ma ia e faapei o “lona toe tu mai,” e tatau foi i a i latou, e pei o ia, ona “faaolaina mai i le Agaga,” o ni mea fai ola agaga. I le 1 Korinito 15:42-54, tatou te faitau ai e uiga i lo latou ituaiga o toe tu:

“E luluina ma le pala, e toe faatuina mai ma le le pala; e luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi; e luluina le tino faaletino, e toe faatuina mai o le tino faaleagaga; e i ai le tino faaletino, e i ai foi le tino faaleagaga. E faapea foi ona tusia, Na faia Atamu le uluai tagata ma tagata ola; a o le Atamu mulimuli, o le Agaga faaola o ia. A e peitai, e le muamua le faaleagaga, a o le faaletino; ona mulimuli ai lea o le faaleagaga. E faaleeleele le uluai tagata, na fua mai i le eleele; a o le tagata mulimuli, o le Alii lea mai le lagi. Pei o lē faaleeleele, e faapea lava o e faaleeleele; pei o lē faalelagi, e faapea lava o e faalelagi. Faapei ona foliga o i tatou i lē faaleeleele, e faapea lava ona foliga o i tatou i lē faalelagi.

“Le au uso e, o laʻu upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale. Faauta mai, ou te taʻu atu ia te outou le mea lilo; e le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou. Auā e tatau ona ofu o lenei tino iu vale i le tino ola pea,  ia ofu foi lenei tino oti i le tino le oti lava. Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia, Ua faaumatia le oti i le manumalo.”

O SE TOE TU FOU

12. (a) Ona o le toe tu mo le 144,000 e foliga i le toe tu o Keriso, ua finau mai lea mea mo le ā le ituaiga o toetu ua i a Keriso? (e) Ai se ā ua avea ai lenei o se toe tu fou, ma ai se ā ua faia ai ma “uluai toetu”?

¹² O lena toe tu i le lē iʻu vale ma le ola pea i se “tino faaleagaga” ua taʻua e le Roma 6:5 o le faatusa o “lona toe tu mai.” O le uiga o lenei mea sa faapena le toe tu o Iesu Keriso, e le o le ola i se tino tagata e iʻu vale ma lē ola pea ma maulalo foi na i lo agelu, ae peitai, i se tino faaleagaga ma o se “Agaga faaola.” (1 Korinito 15:45) O lea ua mafai ai ona tatou malamalama i le mafuaaga, ina ua toe faatuina mai o ia, sa manaomia e Iesu ona liutino tagata ma lavalava fai tino, ina ia mafai ona faaalia e ia ia lava i ona soo i aso e fagafulu seia oo i lona toe afio aʻe i le lagi. O lenei ma le mautinoa o se toe tu fou, e le vaaia e mata faaletagata. Ua taʻimua i le toe tu o le fanau a tagata lautele o sau. Ua avea foi o se mea e vasega muamua i lona tāua. O lea ua taʻua ai o “le uluai toe tu.” O le mea ua taʻua e le aposetolo o Paulo o “le toe tu muamua.” Ua au ai se vaega o suli o Keriso e 144,000 i lena. (Filipi 3:11, NW) O i latou ia o loo taʻua i le Faaaliga 20:4-6:

“Ua latou ola foi, ma ua fai ma tupu faatasi ma Keriso i tausaga e afe. . . . O le uluai toe tu lena. Amuia mona ua paia le ua i ai se tofi i le uluai toe tu; e le oo foi le pule a le oti faalua ia te i latou, a e avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.”

13. O le ā le ituaiga o faalapotopotoga faalemalo o le a aumaia e le uluai toe tu mo le lelei o le fanau a tagata, ma o taʻua faapefea i 2 Peteru 3:13?

¹³ O lea o i latou o le vaega o “le faatoanofotane,  o le faletua lea o le Tamai mamoe,” e oo i a i latou le ituaiga o toe tu e pei ona oo i le Faatoafaiava, o Iesu Keriso. Pe ua ataata mai i lo tatou talisapaia le mea o le a faatino e lena toe tu? E aumaia ai se tino po o se vaega o pule e le iu vale ma e ola pea mo le lelei o le fanau a tagata. E leai lava se pule o le fanau a tagata i le lalolagi ua i ai le ola e le uma. (1 Timoteo 6:15, 16) O le a sili atu Iesu Keriso ma lana 144,000 o tupu ma faitaulaga na i lo pulega uma o le lalolagi ua i luga o le fanau a tagata i le ono afe tausaga o le soifuaga. O le a avea o le malo aupito maualuga ma le sili ona lelei e mafai e le Atua ona tuu i le fanau a tagata. O le a na fatiesea malo uma o tagata o loo taupulea e Satani le Tiapolo ma ana temoni. O le a faaaogaina e le Atua lea malo e faaofi mai ai i le lalolagi lana faiga fou, auā o le a avea lea “lagi fou” ma pulega fou.—2 Peteru 3:13.

14. (a) O le ā e tatau ona tupu i le “lagi” tuai o loo i ai nei i luga o le fanau a tagata? (e) I le ā le auala o le a avea ai le pulega fou o se “lagi” i lona uiga moni?

¹⁴ E tatau ona mavae atu le “lagi” o pulega ua faia e tagata, faatasi ma lo latou pule ma lagolago lē vaaia, o Satani le Tiapolo, “le alii o lenei lalolagi.” (Ioane 12:31) Ua latou latalata atu i lo latou faaumatiaga i le “puapuaga tele” lea o le a oo atu i lona tumutumuga o le malosi e faaumatia ai i a Ha-maketo, pe a aumaia e le “taua i le aso tele o le Atua e ona le malosi uma lava” le manumalo e sili ona iloga o Ieova, le Pule silisili o le lagi ma le lalolagi. (Faaaliga 16:14-16; 19:11-21; Tanielu 2:44) O le pulega fou o le “lagi” e tatau ona sau mai i se pule e le fevaevaeai ma pulea lelei. E tatau ona faalelagi, e le na ona i se auala faafaatusa, ae i se auala moni, i le faia aʻe i pule agaga e i ai le “amio-Atua” ma e ola  pea, e le iuvale. (2 Peteru 1:4) Amuia o tatou mata pe a tatou vaaia i le tino le moni o mea na vaaia e le aposetolo o Ioane i le faaaliga. O lana faamatalaga e matua matagofie:

“Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami. O aʻu foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane. Na ou faalogo foi i le leo tele mai le lagi, ua faapea mai, Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:1-4.

UA LAGOLAGOINA E LE AGAGA LE TUPU O LE GAFA O TAVITA

15, 16. (a) O ai le tupuaga moni o Tavita ma lona gafa o tupu i luga o Isaraelu? (e) Sa faapefea ona avea lea tupuaga moni e peiseai o se tatupu laau ma ona aa, ma o ai na taunuu i ai lena tupuaga moni o le taunuuga o le gafa?

¹⁵ Mulimuli ane i le faaaliga i a Ioane, sa fetalai le Faatoafaiava faalelagi o Iesu Keriso: “O aʻu o le Aa ma le fanau a Tavita o le fetu ao pupula.” (Faaaliga 22:16) O le tamā o le Tupu o Tavita o Iese o Peteleema ma o le ituaiga foi o Iuta. O lea o Iesu e tupuga mai i a Iese e auala mai i a Tavita. A e le gata i lea, o Iese o le tupuaga faaletino o le Tupu o Tavita ma le faasologa o tupu o le gafa o Tavita i luga o Isaraelu.

¹⁶ O le malo o le gafa o Tavita sa pei o se laau e i ai le pogati ma ona aa i le tamā o Tavita o Iese. I le tausaga e 607 T.L.M., i le faatafunaina o Ierusalema ma le toeseina o lana tupu i Papelonia, sa taia i lalo lena laau faalemalo. E lei toe faatuina lava lea malo faa-Tavita i Ierusalema. O le mea na totoe sa faapei o se pogati laau ma ona aa. Ua faaatagia e lenei mea le tamā o Tavita o Iese. Sa tuua Iese e aunoa ma sona suli e faagaoioia  pulega faatupu i luga o Isaraelu. Peitai, sa tumau pea le ola i le pogati laau ma ona aa, auā o le gafa o Iese ma lona tupuaga e auala mai i a Tavita sa tumau pea. Na ausia lona suli autu i le Mesia o Iesu.

17. (a) Sa faapefea ona toe faaolaina mai e Iesu Keriso le malo na tupuga mai i a Iese? (e) O ana fea na tuuina ai i lea malo le mana, ma o le ā foi le malosi sa faagaoioia le Tupu e tupuga mai i a Iese e ala mai i a Tavita?

¹⁷ I le fanau mai i le taupou Iutaia o Maria i Peteleema, sa avea Iesu o se “la laau” mai le pogati o Iese ma e pei o se “tatupu” mai aa o Iese. I lena auala sa mafai ai ona ia toe faaolaina le malo sa faavae i a Iese, le tamā o tupu i luga o Isaraelu. Ina ua faauuina e Ieova le Atua Iesu i le agaga paia, ona avea ai lea o lenei “la laau” po o le “tatupu” ma Tupu-Atofaina mo le malo faa-Tavita. I le faaiʻuga o le Taimi o Nuu ese i le 1914, sa faanofo e le Atua o ia o le Tupu i le lagi. E uiga i lenei gaoioiga a ia ua fai mai le Isaia 11:1-5:

“A e tupu mai le la laau i le pogai o Iese, e tupu ae foi le tatupu i ona aa. E afio mau ia te ia le Agaga o Ieova; o le Agaga o le poto ma le mafaufau; o le Agaga o le faatonuga ma le malosi; o le Agaga o le malamalama ma le mataʻu ia Ieova. E fiafia foi o ia i le mataʻu i a Ieova; e le faamasino o ia e tusa ma le sisila atu o ona fofoga, e le aoai foi o ia e tusa ma le faafofoga o ona taliga. A e faamasino o ia ma le tonu i e matitiva, e aoai foi o ia ma le tonu, ona o e faamaulalo o i le lalolagi; na te taia foi le lalolagi i le sasa o lona fofoga, o le mānava foi o lona fofoga, na te fasioti aʻi lē amioleaga. E fai le amiotonu ma fusi o lona sulugatiti, e fai foi le faamaoni ma fusi o lona tino.”

18. (a) E faapefea ona taia le lalolagi e le “la laau” faafaatusa e le tootoo o lona fofoga? (e) E faapefea ona fasiotia e ia e amioleaga i le agaga o ona laufofoga?

¹⁸ I le “puapuaga tele” o loo sau, o le a “taia foi le lalolagi i le sasa o lona fofoga” e le “la laau i le pogai o Iese.” O faatonuga tau tupu e sau  mai ona fofoga o le a pei o se sasa e nutipalaina ai le taupulega o mea faalelalolagi o le fanau a tagata, o le faiga tuai lea o mea. O ana faatonuga e malolosi e faataalise e uunaia e gaoioi, ma e taavili mai i ona laufofoga ma le malosi e faaumatia ai ona fili faalelalolagi o tetee pea.

19. E faapefea ona laveai e le Tupu, ua lagolagoina e le agaga o le Atua, e agamalu ma e maulalo mai tagata leaga faasaua e faavavau?

¹⁹ O lenei tautala atu ma le pule a se faaoosala i fili amioleaga ua o gatasi ma le “pelu maai” uma ua faaataina mai o loo sau nai le fofoga o le Tupu ina ia “taia aʻi e ia o nuu; e pule foi o ia ia te i latou i le tootoo uamea.” (Faaaliga 19:11-15) I le faia faapea, o le tupu faa-Mesia ua lagolagoina e le agaga o Ieova na te laveaiina e agamalu ma loto maulalo o le lalolagi. Pe a nofo tupu o ia ma lana 144,000 o ni tupu foi, na te le toe faatagaina ē faasaua amioleaga ina ia toe pule i le lalolagi.

20. O le toe aoaoina o ai sa muai taʻua i le Isaia 11:10-12, ma i totonu o le ā ua toe aoaoina i ai ma o a foi tulaga?

²⁰ Talu mai lona faanofo tupu i le lagi ina ua faaiʻuina Taimi o Nuu ese i le 1914, ua faaauauina ona auauna le “tatupu” faafaatusa mai aa o Iese i le faataunuuga o se isi vaega o le valoaga a Isaia, i le mataupu e sefulu tasi. Ua ia faatulagaina le toe aoaoina o le vaega totoe o ona suli faauuina faatasi ma ia mai vaega uma o le lalolagi na faataapeapeina i ai i latou e sauaga talu mai ma ina ua mavae le Taua o Le Lalolagi I. Ua ia aumaia i latou i se parataiso faaleagaga, o i ina ua latou olioli ai i le filemu ma le au faatasi ma le Atua ma faateleina ai “fua o le agaga.” (Kalatia 5:22, 23) Ua taofia i tua amio faamanu a le lalolagi! (Isaia 11:6-9) Sa vaavaai i luma Isaia i le toe aoaoina ma le toe atiina aʻe o Isaraelu faaleagaga, ma faapea mai:

 “O lea aso foi e tu mai ai le Pogai o Iese, e fai ma tagavai o le nuu, e saili ia te ia o nuu ese; e matagofie foi lona malologa. O lea aso foi e toe tuu atu faalua e le Alii lona aao e laveaiina e ua totoe o lona nuu; o e ua totoe i Asuria, ma Aikupito, ma Patoro, ma Kusa, ma Elama, ma Senara, ma Amato, atoa ma nuu tu matafaga. E faatuina foi e ia le tagavai mo nuu ese, ma faapotopotoina e ua tulia o Isaraelu, ma aofai e ua faataapeapeina o Iuta i itu e fa o le lalolagi.”—Isaia 11:10-12.

21. O le “tatupu” faafaatusa mai aa o Iese ua tautalagia i inei o se ā, ma e faapefea ona faia o ia e auauna ma “tagavai” i atunuu?

²¹ O i inei o le “tatupu” faafaatusa mai aa o Iese ua tautalagia faapea o le ‘aa’ po o le “Pogai” lava ia o Iese. I le faaiʻuga o Taimi o Nuu ese i le 1914 sa faatuina ai lenei tupu faa-Mesia i le malosi tau tupu. Ona ua faailoa atu i le lalolagi aoao, ua avea o ia o se “tagavai” o se mea e faapotopoto i ai le vaega totoe o Isaraelu faaleagaga ua salalau solo, talu ai o loo pule pea ia o se Tupu. Ma o nei tagata ua toe faatasia ma faafoisia ua latou faaauauina lo latou tulaga faauuina e faalauiloa ai i le fanau uma a tagata le tupu faa-Mesia ma lona malo.

22. I a te ai ua liliu atu nei i ai tagata taitoatasi mai atunuu ma o ai ua taliina a latou faafesili, o le a foi le taunuuga?

²² E faitau selau afe o tagata taitoatasi mai atunuu uma ua liliu atu nei ma le fia iloa i le tupu faa-Mesia faapei se tagavai. Ua faamautinoaina ai i latou e i latou lava o Iesu Keriso faamamaluina o ia lava o le Mesia folafolaina a Ieova. O le vaega totoe faauuina, ma tali i a latou fesili, ua fesoasoani i a i latou e faia lenei mea. Ma le alaga fiafia ua latou faatasi atu i le itu o le tupu faa-Mesia a Ieova, ma alagaina ona pau lea o le faamoemoe mo le fanau uma a tagata. Ua avea i latou o se “motu o tagata e toatele,” o lona faitau aofai pe a oo atu i le taimi o le “puapuaga tele” tatou te le iloa.—Faaaliga 7:9-17.

 “LE LALOLAGI FOU”

23. O le a le malupuipuia o le ā faataatia ai e Ieova le lagi fou ma le lalolagi fou i lona tulaga, ma o le ā se ituaiga o gaoioiga atonu e manaomia ona faia mo ia ina ia aumaia ona tagata i le Faiga Fou?

²³ O le faiga tuai amioleaga o mea, lea ua loloto ona taatia i le lalolagi, e tatau ona aveesea—i le faaumatiaga! O loo sauniuni nei e Ieova mea uma mo le faiga fou faamamaluina. Ua uma ona ‘totoina’ e ia le “lagi,” le pulega fou faalemalo, ua ia matua faataatiaina i se tulaga mautu i lana faalapotopotoga aoao o le vateatea, e lē mafai ona liaiina i luga e tagata po o temoni. O le “lalolagi fou” na te faatuina o le a ia faatulagaina i se faavae mautu e leai se mea e tasi na te luluina pe faapauina i lalo mo lona talepeina. I lenei faiga fou o le a ia aumaia i ai le vaega totoe o Isaraelu faaleagaga ma le “motu o tagata e toatele” e tusa lava pe o le a ia faia e pei ona sa ia faia anamua i le Sami Ulaula i ona po o Mose, i le faagaepuina o suavai ma sousou ai ona peau ae vaeluaina ai se avanoa mo ona tagata faasaoina e ui atu ai. O lana fetalaiga lenei i le Isaia 51:15, 16:

“O aʻu foi o Ieova lou Atua, o le e laolao ai le sami pe a ū mai ona peau; o Ieova o ʻau o lona igoa lea. Ua ou tuuina atu aʻu upu i lou gutu, ua ou ufiufi foi ia te oe i le paolo o loʻu lima, e faatumau ai le lagi, ma faavaeina le lalolagi, e fai atu foi ia Siona, O loʻu nuu lava oe.”

24. I fofoga o ai ua tuuina i ai e Ieova ana afioga, ma ai se ā ua i ufitia ai i latou i le faapaologa o lona aao?

²⁴ E leai se faalavelave e tuuina i Lona ala e ona fili e faapea e le mafai ona sopoia e Ieova. E pei ona sa i ai i le Mauga o Sinai na Ia tuu ai lana upu i gutu o lona nuu filifilia e auala i le puluvaga o Mose, ma mulimuli ane sa ia taʻitaʻiina i latou i lalo o le faapaologa o lona aao i le Nuu o le Folafolaga, ua faapea foi ona ia faia mo le vaega totoe o Isaraelu faaleagaga. Ua  ia tuu atu lana afioga lana feau o le taimi nei, i gutu o le vaega totoe faaleagaga mo i latou e taʻu atu i luma o le lalolagi uma, mo lo latou faaolataga atoa foi ma e faalogo ma talia. O se “motu o tagata e toatele” o “isi mamoe” ua gaoioi ona o le mea ua latou faalogo i ai ma avea i o latou gutu le afioga a le Atua. Ona o i latou uma nei ua avea ma ana molimau Kerisiano, ua faamalumalu ai i latou i tulaga aao o lona lima mo lo latou puipuiga mai i lenei lalolagi.

25. (a) O le ā le vaega o le a faia e Ieova mo le vaega totoe malupuipuia, ma o le a le tautinoga o le a na faia i a i latou? (e) O le ā o le a faia e le Atua mo le “motu o tagata e toatele,” ma o tagata o ai o le a taʻua ai i latou?

²⁵ E i ai se manatu autu o Ieova i lenei faasologa o gaoioiga. O lona manatu autu ia faia le vaega totoe faamaoni mulimuli ane ai o se vaega o le pulega faalemalo fou i le “lagi,” o suli faatasi ma le Tupu o Iesu Keriso. Ae peitai o le “motu o tagata e toatele” o “isi mamoe,” o le a faia e Ieova i latou o le uluai vaega o le “lalolagi fou,” o le sosaiete fou i le lalolagi i le Faiga Fou. I le faasaoina o le vaega totoe faamaoni o Isaraelu faaleagaga mai le “puapuaga tele” o sau, o le a ia faapea atu i nei Isaraelu faaleagaga o ē ‘o loo o atu i le Mauga o Siona faalelagi ma Ierusalema faalelagi,’ “O loʻu nuu lava oe.” (Eperu 12:22; Isaia 51:16) Ae e le gata i lea, o le a amata ona faatasi ma le “motu o tagata e toatele” faasaoina le “fale fetafai o le Atua,” ma e pei ona taʻua i le Faaaliga 21:3, “e fai foi i latou mona nuu.”

26. O le ā le agaga o le a le toe i ai i le Faiga Fou, ma o le ā ua faatumuina ai nei i latou e ono ulu atu i ai?

²⁶ O le a gaoioi ma tumau pea le agaga paia i le lio faataamilo atoa o le kelope o le faiga fou. Ua tafi mamā eseina e Ieova le leaga mai “le agaga lea o loo matuā galue nei i e ua faalogogata.” O “e ua faalogogata” o le a faaumatia i  le “puapuaga tele” ma Satani le Tiapolo ma ana temoni uma o le a tuuina i le to e le gata. (Efeso 2:2; Faaaliga 20:1-3) I le sauniuniga mo le Faiga Fou, o i latou e ono faasaoina mai le “puapuaga tele” ua faatumuina pea i latou i le “Agaga” mai le Atua.—Efeso 5:18.

27. I le Faiga Fou o le ā o le a faatinoina e oo lava i saienitisi faafomaʻi alualu i luma o ona po nei, latou te lē o mafaia?

²⁷ E na ona tatou taumafai e vaai faalemafaufau i le tulaga o le a i ai le lalolagi pe a mavae le “taua i le aso tele o le Atua e ona le malosi uma lava” i a Ha-Maketo ma pe a mavae le faafalepuipuiina o Satani ma ana temoni i le “to e le gata.” Ona saoloto ai lea o le pule a le agaga paia i le lalolagi aoao. Ua faamanatuina i tatou i le tulaga uiga ese sa gaoioi ai le agaga paia i aso o Iesu Keriso ma ona aposetolo i le lalolagi i le sefulu iva senituri ua mavae. Sa tutupu ni vavega ofoofogia, ma iʻu ai i le oliolisaga lē mafaamatalaina mo tagata na aoga i ai. E leai ni taumafaiga alualu i luma a saienitisi faafomaʻi o aso nei e faafetauia togafitiga ma faamalologa i lea lava taimi i na ona po e le agaga paia. Sa i ai foi le toe faatutuina mai o tagata mai le oti! A e sili atu i lena, sa i ai foi faamalologa faaleagaga e auala i le faalauiloaina ma le aʻoaʻoina o le tala lelei o le malo faa-Mesia o Ieova. Ua o se faasaolotoina o i latou sa saisaitia i noataga o uputuu sese, a lotu e faatupuina ai le oti.

VAVALA MAI O LE FAIGA FOU O MEA!

28. O le ā se vaega a le vaega totoe faasaoina i galuega i le Faiga Fou i le lalolagi, ma seia oo i le taimi mo le ā le mea e tupu?

²⁸ E maeu le matagofie o vavega na tutupu i aso na faavaeina ai le faapotopotoga Kerisiano. Peitai sa avea ia ma na o ni ata e vavala mai ai mea o le a faatinoina e le agaga paia o Ieova i le  faiga fou o mea. E mafai ona tatou faatalitalia le vaega totoe ua faasaoina, e auai i gaoioiga ofoofogia i le amataga o le Faiga Fou. Peitai, po o le ā lona umi, tatou te le ma iloa nei mai Tusitusiga Paia. E i ai sa latou “faaipoipoga” mo i latou e tulimatai i ai—o le faaipoipoga faalelagi a le Tamai Mamoe i lana faapotopotoga faatoanofotane atoa. I le taimi e faataunuuina ai lena mea, e o ese atu i latou mai le vaaiga faalelalolagi ma tauia i se fiafiaga i le “uluai toe tu.” O lea la e manaomia ai ona latou tumau i le faamaoni seia oo i le oti.

29. Pe o le a vaaia e le “motu o tagata e toatele” le toe tutu o le vasega Faatoanofotane, po o le toe tutu o ai?

²⁹ O le toe tu a le vasega Faatoanofotane e le vaaia e mata o le “motu o tagata e toatele” o faasaoina mai le puapuaga, o ē faamoemoe e nonofo e faavavau i le parataiso toe faafoisia mai i le lalolagi. Peitai e i ai toe tu i le lalolagi o le a vaaia e le “motu o tagata e toatele” i le “aso” (po o le “vaitaimi”) mo le Atua, e ala i a Keriso e toe faatutuina ai le fanau a tagata ua oti.

30. I le tulaga o tagata togiolaina ua oti, o le ā ua faalagolago i ai pe o lo latou toe tu e taʻitaʻiina ai i le ola e faavavau po o le faamasinoga i le faasala?

³⁰ O loo faatalitali Iesu Keriso lava ia mo lena taimi. Sa ia valoia mai a o ia talanoaina le aso faamasino o le lalolagi ma faapea mai: “Auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei e toe tutū i le faasala.” (Ioane 5:27-29) Pe a faatatau atu i a i latou uma e toe faatutuina ona o le taulaga togiola a Iesu Keriso, e faalagolago lava lea i o latu laasaga i le lumanai i lalo o le malo o Keriso pe iʻu ai ina avea le toe tu e mo le ola e faavavau i le lalolagi parataiso pe iʻu mulimuli ane ai i le faamasinoga e faasalaina ai i le faaumatiaga e faavavau. O i latou uma e  gauai atu i le agaga paia o le a i ai ma avea o le mana e taʻitaʻia o latou olaga, o le a maua e i latou le ola e faavavau i le Parataiso. O i latou o e tetee i le agaga ua matuā iloga ana gaoioiga i lea taimi, o le a pagatia i le faasalaga ona o le agasala faasaga i le agaga paia, o lona uiga, o le oti e faavavau.

31. O le ā le folafolaga sa faia i le aso o lona maliu e lagona pea e le Tupu o Iesu Keriso e tatau ona faataunuu, ma o fea le “aso” mo lenei mea e faatino ai?

³¹ O le Tupu faalelagi, o Iesu Keriso, e i a te ia pea le faalogona e faaauau lana folafolaga na ia faia i le pagota tiga alofa sa oti i ona tafatafa i Kolokota, i le aso pogisa o Nisani 14, 33 T.A. O le mea moni, o lena pagota sa faatautauina ua oti nei ma e le toe manatua se mea. (Failauga 9:5, 10) Peitai, e manatua pea e Iesu Keriso faamamaluina ana upu i lea tagata na tiga alofa ane: “E moni, ou te fai atu ia te oe i le asō, ta te faatasi ma oe i le Parataiso.”(Luka 23:39-43, NW) Ona o le taʻua o le Parataiso, o le “aso” mo Iesu e faalogo ai le pagota o i le tuugamau i lona leo, o le a lē taunuu sei vagana ua uma ona faafoisia muamua le Parataiso i le lalolagi i se tulaga iloga ina ia iloa ai e le pagota, pe a toe faatuina, se suiga o le lalolagi. I le faafetauia o lona olaga i le agaga paia mai le Atua e auala mai i a Iesu Keriso, o le a mafai ai e le pagota ona faia lona toe tu o le ituaiga e iʻu ai i le ola e faavavau i le Parataiso i le lalolagi aoao.

32. E aofia ai i e toe faafoisia mai nai le oti i le ola faalelalolagi, o le a i ai le ā le “faapotopotoga” ua taʻua i le Tusi Paia?

³² Ona toe maua mai ai lea e i tatou o i le lalolagi mai le oti e le gata i o tatou aiga ma uo ua togiolaina ae peitai o tane ma fafine faatuatua o taimi anamua o e sa fai ma molimau a Ieova ma sa faagaoioia e le agaga paia. O le a aofia ai i a i latou nei ‘le faapotopotoga tele o molimau’  e faasolo atu mai i a Ioane le Papatiso e oo atu lava i tuā i le uluai oti faamaturo mo Ieova, o ia lea, o Apelu. (Eperu 11:2 e oo i le 12:1) E le taumate o i latou nei o le a i ai sa latou vaega iloga i le Faiga Fou.

33. O le ā le tulaga tofia o le a maua e tane mai lea “faapotopotoga” faatasi ai ma isi, ma o a fesootaiga atonu e faia ai i latou ma fautua?

³³ Mai i a i latou nei o le a to mai ai e le Tupu o Iesu Keriso tane na te “tofia i latou e fai ma alii sili i le lalolagi uma.” (Salamo 45:16) O le a i ai foi ni “alii sili” i le lalolagi e muamua i a i latou. O ai? O i tane mai le “motu o tagata e toatele” na faasaoina mai le “puapuaga” o ē ua tofia o ni “alii sili” i le amataga o le Faiga Fou. (Faaaliga 7:9-17; Isaia 32:1,2) Peitai, o “alii sili” uma o le a avea i latou ma sui vaaia faalelalolagi o le “lagi fou,” o le pulega fou lea po o le malo faalelagi o Iesu Keriso ma le 144,000 o suli ia faatasi ma Iesu Keriso. E le taumate o le a avea nei “alii sili” o ni sui po o fautua mo le fesootaiga i le va o le Malo le vaaia ma le sosaiete vaaia o le lalolagi o le fanau a tagata ua togiolaina, le “lalolagi fou.” *

34. I le Faiga Fou e faapefea e Iesu Keriso ona faatino tiute o lona tofi “o le Atua malosi, o le Tamā o le faavavau, o le Alii o le filemu”?

³⁴ O le Faiga Fou o le a avea ma nofoaga o le filemu e le faavevesiina e oo i tulimanu e fa o le lalolagi. O le a i lalo o le pulega tau tupu a lē na tofia e lona Tamā faalelagi mo ia e tauavea le tofi “o le Faipule, o le Atua malosi, o le Tamā o le faavavau, o le Alii o le filemu,” ma “e leai se mea e gata mai ai ona tele o lona malo ma le filemu o lona malo.” (Isaia 9:6, 7) O le a avea o ia ma Tamā o le Faavavau, auā o lana pule o le “Alii o le filemu” o le a avea o se pule faaletamā,  e tuuina atu ai le ola i ona tagata usiusitai uma o lana fanau. E avea o ia ma Atua Malosi, auā o le a fai o ia ma Faamasino Tau Atua, a e le faapea e tapuai ai i a te ia ē ua maua le manuia i le lalolagi o ia o le Atua.—Salamo 82:1-6; Ioane 1:1; 10:33-36.

35. O le a na o ai lava o le a tapuai i ai o le Atua?

³⁵ O le a na o Ieova lava e tapuaia i lea taimi, auā ua tusia e uiga i le Faiga Fou: “Faauta! Ua faatasi ma tagata le fale fetafai o le Atua, e mau foi o ia ma i latu, e fai i latou mona nuu. E i a te i latou le Atua lava o lo latou Atua ia. E sōloiesea foi e le Atua loimata uma i o latou mata.” (Faaaliga 21:3, 4, NW) O Satani le Tiaplo, “le atua o le lalolagi nei,” e le fai o ia ma atua o le Faiga Fou. (2 Korinito 4:4) O le a tafiesea le tapuaiga a le Tiapolo, tapuaiga a temoni. O le a tapuaia Ieova ma na o ia lava e fai ma Atua e ifo i ai.

36. O ā fua o le a faatamaoaiga ai le Faiga Fou, ae o ai o le a faaalia o ia i le iʻuga o le afe o tausaga o le nofo tupu o Keriso?

³⁶ O le a lilofia atoatoa le Faiga Fou e le agaga paia. (Salamo 139:7-10) E faatamaoaigaina le Parataiso o le Lalolagi e “fua” o lena agaga, e pei o le alofa, le olioli, le filemu, le onosai, le mataalofa, le agalelei, le faamaoni, le agamalu ma le lē gaoiā po o le pulea lelei e le tagata o ia lava. (Kalatia 5:22, 23) O le a lauolaola lena ituaiga o fua faaleagaga e oo atu i le faaiʻuga o le afe tausaga o le nofoaiga a le Tupu o Keriso. Peitai ona a lea? Ona toe manu aʻe lea o Satani ma ana temoni mai le to e le gata, ua toe tatalaina i latou mo “nai aso.” I le tau faaoleole, o le a latou taumafai e toe faaaafia le lalolagi uma, i le pule a le “agaga lea o loo matuā galue nei i e ua faalogogata.” Po o le ā le tele latou te  manumalo ai i le tetee atu i le agaga paia o le Atua ua mauaa nei?—Faaaliga 20:3.

37. (a) I le Faiga Fou o ā soliga tuaoi e faia e Satani ma ana temoni i luga i le agaga paia o manumalo pea? (e) E faapefea ona taʻuamiotonuina Ieova e faavavau?

³⁷ I le na o le faaseseina o ni isi o le fanau a tagata ua toe fausia ae e faia le agasala e lē faamagaloina faasaga i le agaga paia. E faapea ona latou vavaeeseina mai ai i latou e i latou lava mai le Puna faalelagi o le agaga o le ola, o Ieova le Atua. O lona uiga o lenei mea o le oti e faavavau mo i latou, “o le oti faalua lea.” Ae peitai e faapefea i le toatele o le fanau a tagata i totonu o lo latou aiga Parataiso matagofie? Ioe, o le a matuā manumalo ma le mamalu le agaga i le tulaga o i latou. I le alofa e faavavau i le agaga paia latou te teteea ai faaosoosoga faaoleole a Satani. E aunoa ma se faaletonu o le a latou tumau i le faamaoni mo le Pule Sili saʻo o le Vateatea aoao, o lo latou Atua o Ieova. Ma o lo latou faamaoni e sao atu ai i le toe tofotofoga o le a galue lea mo le taʻuamiotonuina o Ieova e faavavau. O le a aumaia ai i se faaiʻuga mulimuli e le toe lagaina le finauga tele sa fefinauai ai i tausaga uma ua mavae, e uiga i le faamaoni ma le lē manatu faapito o mea fai ola a Ieova i a te ia o le Pule Sili i le Vateatea aoao. O le a lē faamaonia le tuuaiga pepelo a Satani ma le mautā mautinoa, ae o le a faamaonia Ieova i le tulaga muamua, mulimuli ma i taimi uma lava. (Roma 3:4) Ua uma nei le vaitaimi puupuu e pei o “nai aso” o le tatalaina o Satani. O lea la, ina tuimomomo ia loa o ia faatasi ma lana “fanau” ina ia le toe i ai, ma ina ia faataunuuina ai le folafolaga faa-Etena a Ieova. (Kenese 3:15; Faaaliga 20:7-15) Aleluia!

38. E faapefea ona avea le lumanai o na tane ma fafine ua faatumuina pea i le agaga paia ma mea e tumau ai i le fiafia e faavavau?

 ³⁸ Pe o le a tatou i ai ea i ina e molimau e i tatou lava le faaumatiaga e faavavau o amioleaga uma i le lagi ma le lalolagi ma ola ai pea i se lumanai o i luma o i tatou? Amuia lena lumanai e le mavae mo tane ma fafine o e o le a tumau i le faatumuina i le agaga paia i le auauna atu ma le tuutoina e le mafai ona motusia i le Atua le Tamā o lo tatou Alii o Iesu Keriso! Ona ua taʻuaogaina i latou, e Ia o le Faamasino, ia maua e i latou le mea alofa o le ola e faavavau, latou te olioli ai i le talavou e tumau ai pea i le tagata lelei atoatoa i se Parataiso matagofie e lē mavae, e lē uma foi mea manaomia mo le olaga fiafia. O le a latou mananao e ola pea e talafeagai ma le agaga paia lea ua lagolagoina pea le faiga fou e faapaiaina le Atua. Oi, tau ina ia taʻuaogaina i tatou mo lena faiga fou! Ina ia o gatasi ma lena faalogona, sei fai ma a tatou tatalo e le aunoa e pei o lea a le fai salamo o Tavita ina o ole atu i le Atua i totonu o se lalolagi saua:

“Ieova e, ia e laveaiina mai aʻu i e ita mai: ou te lafi atu ia te oe. Ia e aʻoaʻo mai ia te au e fai lou finagalo; auā o oe lava loʻu Atua; ia taʻitaʻiina atu aʻu e lou Agaga lelei i le laueleele laulelei.”—Salamo 143:9, 10.

39. O le ā sa tatou upu, e faaiʻu ai, i a i latou o loo naunau nei e ola e tusa ma le agaga paia o le Atua?

³⁹ O lea, i le faamaoni lava, e talo atu ai i tagata uma o naunau nei e ola aʻe e tusa ma le faapaiaga a le malosi galue o le Atua, o sa matou toe upu: “Ia ia te outou uma lava le alofa tunoa o le Alii o Iesu Keriso, ma le alofa o le Atua, atoa ma le mafuta faatasi ma le Agaga Paia.”—2 Korinito 13:14.

[Faaopoopoga i lalo]

[Fesili mo le Suʻesuʻega]