“Sa ou ola aʻe i se nuu laitiiti i le itumalo i matū,” o le tala lea a Dauda mai i Sierra Leone. “A o oʻu tamaitiiti, sa faia ai se finauga e uiga i se fanua i le va o loʻu aiga ma le isi aiga. Sa faapea mai uma nei aiga o i latou e ona le fanua. Ina ia foia le mataupu, sa aami ai loa se tamaloa faataulaitu. Na tuuina atu i le tasi o tamaloa se faata ma faapulou o ia i se ie paʻepaʻe. E leʻi umi lava, ae tete ma afu le tamaloa lea na faapulou i le ie. A o vaai atu lenei tamaloa i le faata, sa alaga mai o ia: ʻUa ou iloa atu se toeaina ua faalatalata mai! O loo ofu mai o ia i laei papaʻe. E umī o ia toe matua, ma e sinā lona ulu toe faanounou lana savali.’

“Sa faamatala mai e ia foliga o le tamā o loʻu tamā! Ona matuā tete lea o ia ma alaga mai: ʻAfai tou te lē talitonu i laʻu tala, ō mai la e tilotilo i ai!’ O le mea moni, sa leai se isi o i matou na lotoa e alu atu i ai. Ona faatoafilemu lea o ia e le tamaloa faataulaitu i lona sausauina atu i ai o ni laulaau faataulaitu ua paluina faatasi ma le vai sa i totonu o lana mea teuvai.

“Sa faapea mai le ʻtāma o loʻu tamā’ e ala mai i le tamaloa sa vaaia i le faata, o lo matou aiga e ona le fanua. Sa ia taʻu mai i le tinā o loʻu tamā e alu e galueina le fanua ae aua le popole. Na talia e le isi aiga lea iuga. Ma na foia ai i inā le finauga.”

 O tala o mea e tutupu faapea ua taatele i Aferika i Sisifo. I inā e pei foi o isi vaega e tele o le lalolagi, e lē mafaitaulia le miliona o tagata e talitonu faapea o tagata ua maliliu, o loo malaga atu i se lalolagi o agaga, o i inā e mafai ai ona latou mātau maia ma taaina olaga o tagata o i le lalolagi. Pe faamata e saʻo lenei talitonuga? Pe o ola moni ē ua maliliu? Afai e leai, o ai la i latou ia o loo faapea mai o i latou o agaga o ē ua maliliu? E tāua le iloaina o tali saʻo i nei fesili. O lenei mataupu e aafia ai le ola ma le oti.