O Satani ma ana temoni o le a latou lē toe faasese mai i tagata. Ua uma ona tulieseina e Ieova i latou mai le lagi. (Faaaliga 12:9) O le a toe gaoioi foi le Atua faasaga ia Satani ma ana temoni i le lumanai ua lata mai. I se vaaiga mai le Atua, na faapea mai ai le aposetolo o Ioane: “Na aʻu iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tarako, o le gata tuai, o le tiapolo lea ma Satani, ua ia fusifusi foi ia te ia i tausaga e afe. Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga, ina ia le toe faaseseina e ia o nuu, seia atoa ia tausaga e afe.” (Faaaliga 20:1-3) Mulimuli ane, o le a faaumatia le Tiapolo ma ana temoni e faavavau.​—Faaaliga 20:10.

O le a aveesea foi tagata leaga o i luga o le lalolagi.​—Salamo 37:9, 10; Luka 13:5.

A maeʻa loa ona aveeseina o Satani ma temoni, ona aumaia loa lea e Ieova le anoanoai o faamanuiaga mo tagata. Atonu e te manatua ai, o ē o maliliu e lē o toe ola, e lē o toe iai lava. Na faatusaina e Iesu le oti i le moe​—o se moe ua gapepe e aunoa ma ni miti. (Ioane 11:11-14) Sa faia faapea e Iesu, auā na Ia silafia lelei o le a oo mai le taimi e toe alafai mai ai i le ola i latou o momoe i le oti. Sa ia fetalai e faapea: “Auā e oo mai le aso e faalogo ai i lona leo o i latou uma ua i tuugamau, ma latou o mai ai.”​—Ioane 5:28, 29; faatusatusa i le Galuega 24:15.

O le a toe faafoisiaina mai i latou i le ola i inei i luga o lenei lalolagi. Na i lo o le faasilasilaina atu e faapea ua maliliu tagata, ae o le a suia i ni tala fiafia o i latou o ē ua toe faafoisia mai i le ola! Maeu se fiafiaga o le a iai, i le toe faafeiloai atu ia i latou o ē pele sa i tuugamau!