Ua faapea mai le Tusi Paia o Satani o loo “faasese i le lalolagi uma.” (Faaaliga 12:9) E lē mananao Satani ma ana temoni tatou te talitonu i le Afioga a le Atua, le Tusi Paia. Latou te taumafai ina ia faatalitonu tagata faapea o ē ua maliliu o loo ola i se vaimea o nofoaga o agaga. Seʻi tatou tagai nei i ai pe faapefea ona latou faia faapea.

O le tele o lotu latou te aʻoaʻoina faapea e tofu uma lava tagata ma se solu e ulufale atu i le nofoaga o agaga pe a mavae ona oti le tino faaletino. Ua latou faapea mai e oti le tino ae e lē oti le solu. E faaopoopo atu i lena, ua latou finau mai foi e lē mafai ona oti le solu, o lona uiga e lē oti lava.

Ae ua lē aʻoaʻoina e le Afioga a le Atua lena mea. Ua faaalia e le Tusi Paia faapea o le solu o le tagata lava ia, ua lē o se mea e i totonu o se tagata. Mo se faaaoaoga, ina ua faamatalaina le foafoaina o Atamu, ua faapea mai le Tusi Paia: “Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola; ona avea ai lea o le tagata ma tagata [solu] ola.” (Kenese 2:7) O lea sa leʻi tuuina atu ia Atamu se solu; sa o ia o se solu.

 Ua taʻua foi meaola o solu.​—Kenese 1:20, 21, 24, 30.

Talu ai o le upu “solu” i le Tusi Paia o lona uiga o le tagata lava ia, ua lē ao ai la ona faateia i tatou i le iloaina faapea e mafai ona oti le solu. Ua faapea mai le Tusi Paia:

• “O le tagata [solu] e agasala e oti ia.”​—Esekielu 18:4.

• “Ua fai mai Samasoni, Ia ou oti [“ia oti loʻu solu,” NW] faatasi ma Filisitia.”​—Faamasino 16:30.

• “Pe sa ea le agalelei i le sapati, po o le agaleaga; o le faaola, po o le fasioti [“i le solu,” NW]?”​—Mareko 3:4.

O isi nei o mau e faaalia ai e mafai ona faaumatia le solu (Kenese 17:4), fasia i le pelu (Iosua 10:37), mole (Iopu 7:15), ma malemo (Iona 2:5). O lea la, e oti le solu.

Afai e te faitauina le Tusi Paia e amata mai lava i lona amataga seia oo i lona faaiuga, e lē taitai lava ona e maua ai le faaupuga lenei, “e lē oti le solu.” O le solu faaletagata ua lē o se agaga. O le aʻoaʻoga o le lē oti o le solu, e lē o se aʻoaʻoga a le Tusi Paia. O se aʻoaʻoga lea a Satani ma ana temoni. E inosia e Ieova pepelo uma faalelotu.​—Faataoto 6:16-19; 1 Timoteo 4:1, 2.

O se tasi o ala e taitaiseseina ai e Satani tagata, o le faaauala mai lea i ē o fesootai atu i agaga. O sē e fesootai atu i agaga, o le tagata lea o loo ia mauaina mai ni feau tuusao e ala mai i agaga. O le toatele o tagata e aofia ai foi ma i latou o fesootai atu i agaga, ua talitonu faapea o nei feau o loo aumaia lea e agaga o ē ua maliliu. Ae peitai e pei lava ona tatou silafia mai i le Tusi Paia, e lē mafai ona faia o lenei mea.​—Failauga 9:5, 6, 10.

O lea la, o ai e ala mai ai nei feau? O temoni! Ua mafaia e temoni ona mātauina se tagata a o soifua o ia; ua latou iloa lelei le auala e tautala ai le tagata, o ā ana mea sa fai, ma po o ā foi mea na ia silafiaina. O lea e faigofie tele mo i latou ona faataitai i tagata ua maliliu.​—1 Samuelu 28:3-19.

O se tasi o ala e faatupu atili ai e Satani le pepelo e uiga i ē ua maliliu e faaauala mai lea i tala sese. O tala faapea ua masani lava ona faaliliueseina ai tagata mai le mea moni ua i le Tusi Paia.​—2 Timoteo 4:4.

Ua tele tala o le vavau i Aferika e faatatau i tagata faapea na toe vaaia i latou o ola ina ua mavae ona feoti. E masani o na vaaiga sa tutupu e matuā mamao ese lava mai le mea na nofo ai le tagata. Ae seʻi fesili ifo nei ia te oe: ʻPe afai ua i le tagata le mana e toe foi mai ai mai le oti, pe ua ono ma talafeagai ona toe foi mai o ia i se nofoaga e mamao lava ma lona aiga ma ana uo?’

E lē gata i lena, ae pe ua lē o le tagata ea lea e manatu atu i ai e tali tutusa lelei lava o ia ma lē ua maliu? Seʻi fai ma faataitaiga, sa matauina e ni faifeau se toalua sa talaʻi i se vaega pito i uta o le nuu, se tamaloa matua o loo taumulimuli atu pea ia te i laua mo ni itula. Ina ua la fesiligia o ia, na la iloaina ai na sese le tamaloa, ona sa faapea lava ia, o le tasi o faifeau sa o lona uso lea, o lē na maliu i ni tausaga ua mavae. O le mea moni na sese o ia, ae peitai na lē fia talitonu o ia e faapea o ia e sese. Seʻi mafaufau la i ai i le tala na taʻu atu e lenei tamaloa matua i ana uo ma tuaoi mulimuli ane!

E aunoa ma se taumasalosalo ua e iloaina ni mea uigaese sa vaai i ai tagata, faalogo foi i ai, po o ni a latou miti. O ia mea na tutupu e ala mai i ni malosi mamana e masani lava ona faamataʻuina ai i latou o oo i ai nei mea. O Marein, o lē sa nofo i Aferika i Sisifo, sa masani ona ia lagonaina le leo o le tinā o lona tinā o taufonō atu ia te ia i le po. Sa tuualaga Marein ona o le mataʻu, ma fafagu ai i luga lona aiga atoa. Mulimuli ane ai lava ua oo ina valea ai ma lona ulu.

O lea, ana fai o ola moni lava ē ua maliliu, pe ua o se tulaga talafeagai ea la ona latou faamataʻuina mai i latou o ē latou te alolofa i ai? Ma le mautinoa lava e leai. O le puna o na feau faatiga o temoni.

E faapefea feau e foliga e aogā ma faamafanafanaloto? Fai ma faataitaiga le maʻi o Gbassay, i Sierra Leone. Na fai lana miti, na ia vaaia ai le tamā o lona tamā o faaali atu ia te ia. Sa ia faatonu atu e alu ma tau mai se laulaau mai i se tasi o laau faapitoa, ona palu lea i ni vai ma inu ai. Sa faatonuina o ia e aua le tautala atu i so o se tagata a o leʻi faia lana vai. Sa faia faapea e lenei fafine ma sa malosi ai lona maʻi.

O se tasi o fafine sa fai mai na faaali atu lana tane ia te ia i se tasi po ina ua mavae lona maliu. Fai mai o ia sa aulelei tele lana tane ma mananaia ona ofu.

O feau ma vaaiga faapea e faafoliga mai e lelei ma aogā. Pe faamata e mai le Atua? E leai. O Ieova o le “Atua faamaoni.” (Salamo 31:5) E matuā lē taitai lava ona faaseseina pe ooleina i tatou. Na o temoni latou te faia faapea.

 Ae pe e iai ea ni temoni lelei? E leai. E ui lava ina foliga mai e maua mai ai se fesoasoani i nisi o taimi, ae e leaga uma lava i latou. Ina ua talanoa atu le Tiapolo ia Eva, sa ia foliga atu o se uo. (Kenese 3:1) Peitai o le ā le mea na tupu ia Eva ina ua faalogo atu i ai ma fai le mea na ia fai atu ai? Sa oti o ia.

Ua e iloaina o se mea ua masani ona tupu mo se tagata leaga, le faaleuo atu ia i latou o ē e manao o ia ina ia ooleina ma faavalea. “E papaʻe manaia nifo ae eleelea le loto” o le muagagana lea i Aferika. Ma ua faapea mai le Afioga a le Atua: “O Satani lava, ua liua o ia e ia ma agelu o le malamalama.”​—2 Korinito 11:14.

Ua lē o toe fesootai mai le Atua ma tagata o loo i le lalolagi e ala mai i ni miti, ni faaaliga, po o ni leo mai i le nofoaga o agaga. Na te taitaiina ma faatonutonuina i latou e ala mai i le Tusi Paia, lea na te mafaia ona faia se tagata ina “ia saunia lava ia i galuega lelei uma lava.”​—2 Timoteo 3:17.

O lea la, pe afai e lapataia i tatou e Ieova ina ia aloese mai i togafiti a le Tiapolo, ua mafua ona ia faia faapea ona e alofa o Ia ia i tatou. Ua ia silafia lelei o temoni o ni fili e matautia tele.