Ae aisea ua matuā galulue ai Satani ma ana temoni ina ia faavaleaina tagata? Talu ai latou te mananao ina ia tatou faatasi atu i la latou fouvalega. Latou te mananao ina ia tatou tapuai atu ia i latou. Latou te mananao ina ia tatou talitonu i a latou pepelo ma faia mea e lē fiafia i ai Ieova. O le tele o nei faiga o loo aofia ai aganuu e faatatau i ē ua maliliu.

O le maliu o sē e pele ia i tatou, o se mea sili lea ona tiga ai o tatou lagona, ma ua o se mea e masani ai ma tonu le faaalia o le faanoanoa. Ina ua mavae le oti o lana uo o Lasalo, ona “tagi” ai lea o Iesu.​—Ioane 11:35.

E tele ni aganuu e fesootai atu i tulaga ma ē ua maliliu, ma e matuā eseese lava i lea itu ma lea itu o le lalolagi. O le tele lava o na aganuu e lē feteenai ma mataupu silisili o le Tusi Paia. Peitai ane, o nisi aganuu e faavae aʻe i le manatu e faapea o loo ola ē ua maliliu ma o loo mafai ona latou vaai mai i ē o ola. O leo, lauaitu lē pulea, ma falelauasiga tetele ma le taugata e pogai uma mai lava i le matatau ina neʻi lē fiafia mai agaga o ē ua feoti. Ae talu ai o ē ua feoti ua “le iloa se mea,” o i latou la o faia mea faapena ua latou faalauteleina atu le pepelo a Satani.​—Failauga 9:5.

 O isi aganuu ma tu e mapuna mai i talitonuga faapea, o ē ua feoti o loo manaomia le fesoasoani mai i ē o ola, ma o le a latou faasaua mai i ē o soifua pe a lē fiafia i latou. I nisi atunuu, ua faia ai pea lava ni faigaai ma ni osigataulaga mo le 40 aso po o le tausaga atoa foi talu ona oti le tagata. O lenei mea ua faia ma le manatu e fesoasoani atu ai i lē ua oti ina ia ʻsao atu ai’ i le nofoaga o agaga. O se tasi o faiga masani o le avatu lea o meaai ma meainu mo ē ua feoti.

O nei mea e sese ona ua latou faasalalau atili atu ai pepelo a Satani e uiga i ē ua feoti. Pe faamata e fiafia mai Ieova ia i tatou pe a faia sa tatou vaega i aganuu e faavae aʻe i aʻoaʻoga a temoni? E matuā leai lava.​—2 Korinito 6:14-18.

O auauna a le Atua moni, e matuā leai lava sa latou vaega i so o se faiga e lagolagoina ai pepelo a Satani. Na i lo lea, latou te uai atu ma le alolofa i le fesoasoani atu i ē o ola ma faamafanafana ia i latou. Ua latou iloa lelei pe a maliu se tasi, ua na o Ieova lava e mafai ona toe fesoasoani i lea tagata.​—Iopu 14:14, 15.

O nisi tagata ua latou matuā faafesootai tuusao atu lava ma temoni, po o lo latou faafesootai atu foi e faaauala atu i se tagata faataulaitu. Ua faamatalaina lenei mea e faapea, o faiga faataulaitu. O voodoo, o taulasea, o faiga mamana, o valovaloga, ma le sailiili atu i ē ua feoti, o na ituaiga uma o faiga e faataulaitu.

O loo ua matuā faasaina mai lava e le Tusi Paia le faia o nei mea, e ala i lona faapea mai: “Aua neʻi iloa ia te oe se tasi . . . fai togafiti faataulāitu, o se iite i ao o le lagi, po o se saili faailoga, po o se taulāitu, po o se ʻapele, po o se fesili atu i aitu, po o se ua i ai le aitu vavalo, po o se saili atu i e ua oti. Auā e inosia e Ieova o i latou uma o e faia na mea.”​—Teuteronome 18:10-12.

Aisea ua matuā malosi ai le lapataiga a Ieova ia i tatou ina ia tetee atu i nei faiga?

 Ua lapataia i tatou e Ieova e faasaga i faiga uma faataulaitu ona e mo lo tatou lava lelei. E alofa ma e manatu mai o ia i tagata, ma ua ia silafia o i latou e aafia ma temoni e oo i ai mafatiaga.

O se tasi o nei tagata o Nilda, o lē sa avea ma faataulaitu i Pasili (Brazil). Na faataugaina e temoni lona olaga. Ua ia faamatala mai: “Na pulea aʻu e agaga . . . sa faatonu mai aʻu i mea uma. Sa ou matapogia ma ou toe ala mai, ma na faataotolia aʻu i faafitauli o le mafaufau. Na mamafa le faataugaina o aʻu e temoni o lea na aafia ai oʻu neura. Sa ou faaaogā ni fualaau ina ia pulea ai ma amata ai ona ou inu ʻava ma ulaula mamafa. Sa faaauau lenei faiga mo ni tausaga.”

Faatasi ai ma le fesoasoani mai ia Ieova, ma ana Molimau i le lalolagi, na oo ai loa ina saoloto Nilda mai i taaʻiga a temoni, ma ua ola nei o ia i se olaga manuia ma mamā. Ua faapea mai o ia: “Ou te faalaeiau atu i tagata uma ina ia aua, aua lava, neʻi o latou aafia i so o se taimi ma agaga [leaga].”