Mataupu 16

Faalogo i Fautuaga, Talia Aoaiga

1. (a) Pe iai nisi o i tatou e lē manaomia fautuaga ma aoaiga? (e) Peitai o ā fesili e lelei ona tatou iloiloina?

O LE toatele o i tatou e ioe faatasi ma le mau lea e faapea mai: “O mea e tele e sese ai i tatou uma.” (Iako. 3:2) E lē faigata ona mafaufau i mea tatou te masepu ai i le avea ma ituaiga o tagata lea ua uunaia i tatou e le Tusi Paia ia iai ma tatou mananao i ai. O lea tatou te aloaia ai le saʻo o le Tusi Paia ina ua taʻu mai ia i tatou e faapea: “Ia faalogo i fautuaga ma talia aoaiga, ina ia e poto ai i lou lumanai.” (Faata. 19:20, NW) Ua tatou iloa tatou te manaomia sea fesoasoani. E lē taumatea ua tatou faia fetuunaiga i o tatou olaga ina ia ogatasi ai ma le mea ua tatou aʻoaʻoina mai le Tusi Paia. Peitai e faapefea ona tatou tali atu pe afai e fautuaina totino i tatou e se uso Kerisiano i se mataupu patino na tatou gaoioi ai ma le leai o se atamai? Ae ā pe afai e na ona ia ofoina mai o se manatu faatū i le auala tatou te faaleleia ai le faia o se mea?

2. (a) Aisea e tatau ai ona tatou faaalia le talisapaia mo fautuaga totino? (e) E lē tatau faapefea ona tatou tali atu?

² E ui i lo tatou vave faalogoina o uiga i totonu ona o se natura faaletagata lē lelei atoatoa, ae e ao ona tatou loto faamaoni e faaalia le talisapaia mo le fautuaga ma galue e faatatauina. O āuga o lo tatou faia faapea e mafai ona aogā. (Epe. 12:11) Peitai, atonu ina ua fautuaina, sa tatou taumafai e tauamiotonuina i tatou, faaitiitia le matuia o le tulaga, pe tuuaia foi se tasi. Pe na e tali atu ea i sea auala? A  tatou toe manatu i tua i le mea na tupu, pe tatou te lagona ea le lē fiafia i lē na avatua le fautuaga? Pe tatou te taumafai ea e tusitusi lima i masei o lē na fautuaina i tatou po o le auala na ia fautua mai ai, e pei e foliga e fai ma alofaga i o tatou lava vaivaiga? Pe mafai ona fesoasoani le Tusi Paia i se tagata ina ia manumalo i ia faanaunauga?

FAAAOAOGA UA FAAMAUINA MO LO TATOU LAPATAIGA

3. (a) O le ā ua iai i le Tusi Paia e mafai ona fesoasoani ia i tatou e atiina aʻe ai se vaaiga saʻo i fautuaga ma aoaiga? (e) Faaaogā fesili ua saunia i luga e auiliili ai tali a Saulo ma Usia i fautuaga.

³ E faaopoopo i le saunia o le anoanoai o faatonuga tuusao i lenei mataupu, ua iai foi i le Afioga a le Atua mea tutupu moni i le olaga e faatatau ia i latou taitoatasi o ē sa fautuaina. E masani lava o le fautuaga o le aoaiga foi lea, e manaomia ai e lē na te mauaina ona suia lona uiga po o lana amio. A o e faaaogā fesili o loo i lalo e iloiloina ai nisi o nei faaaoaoga, o le a e iloa ai e tele naua mea e mafai ona aogā ia i tatou uma:

SAULO, LE ATALII O KISO: Na lē taulau ona ia usiusitai atoatoa ia Ieova, ina ua ia siitaua faasaga ia Amaleka, talu ai sa ia faasaoina le tupu ma manu e sili ona lelei. (1 Samu. 15:1-11)

Ina ua tali Saulo i le fautuaga aoai na avatu e Samuelu, o le ā e faaalia ai sa ia taumafai e faaitiitia le sese? (1Sa 15 Fuai. 20) O ai na ia taumafai e tuuaia? (1Sa 15 Fuai. 21) Ina ua iu lava ina tautino lona sese, o le ā le faamolemolega na ia avatu? (1Sa 15 Fuai. 24) O le ā e foliga mai sa sili ona ia manatu mamafa i ai e oo lava i lea tulaga? (1Sa 15 Fuai. 25, 30)

USIA: Na alu o ia i totonu o le malumalu o Ieova e faamu mea manogi, e ui lava ina sa na o faitaulaga na iai le aiā e faia ai lenei auaunaga. (2 No. 26:16-20)

Ina ua taumafai le faitaulaga sili e taofia le Tupu o Usia, aisea na oso ai le toatamai o le tupu? (Faatusatusa i le 2No 26 fuaiupu e 16.) O le ā le iuga? (2No 26 Fuai. 19-21)

4. (a) Aisea na faafaigata ai ona talia e Saulo ma Usia le fautuaga? (e) Aisea o se faafitauli matuia ai foi lea i aso nei?

⁴ I nei tulaga taitasi, aisea na faafaigata ai i le  tagata ona fesagai ma lona manaoga mo le fautuaga? O le faafitauli autū o le faamaualuga, ua manatu maualuga tele ia te ia lava. E toatele tagata i aso nei ua aumaia ia i latou lava le tele o faigata ona o lenei uiga. I le ausia o le mea ua latou manatu i ai o se tofiga maualuga, pe ona o tausaga po o le tulaga, ua latou lē fia talia ai se fautuaga totino. E foliga mai ua latou lagona e faapea e ono faaletaualoa ai i latou pe faaleagaina ai lo latou talaaga. Ae o le mea moni lava ua ia faaaliaina ai le vaivaiga o le faamaualuga. E lē o se mea lenei e alofaga i ai se tasi ona e faapea o se sese taatele. O se mailei lea ua faaaogā e Satani e faapogisaina ai mafaufauga o se tagata ina ia teena ai le fesoasoani alofa ua saunia e Ieova i lana Afioga ma lana faalapotopotoga vaaia. Ua lapatai mai Ieova: “E muamua le faamaualuga i le malaia; e muamua foi le loto faasiasia i le paū.”—Faata. 16:18; tagai foi i le Roma 12:3; Faataoto 16:5.

5. Faaaogā fesili ua fai ma vaega o lenei palakalafa e iloilo ai po o ā lesona e mafai ona aʻoaʻoina mai tala ia Mose ma Tavita.

⁵ I le isi itu, ua iai i le Tusi Paia faaaoaoga lelei o i latou o ē na talia fautuaga. E mafai foi ona aʻoaʻoina mai ai ni lesona tāua. Manatunatu i nei mea:

MOSE: Na avatu e le tamā o lana avā ia te ia ni timaiga aogā i le auala e faafoe ai le galuega avegata e aunoa ma le faatamaia ai o lona soifua maloloina. Sa faalogo Mose ma ia vave faatatauina loa. (Eso. 18:13-24)

E ui ina telē le pule sa ia Mose, ae aisea na ia matuā gauai ai i le fautuaga aogā? (Faatusatusa i le Numera 12:3.) E faapefea le tāua o lena uiga ia i tatou? (Sefa. 2:3)

TAVITA: Na agasala o ia i le faia o le mulilua, ona toe fuafua lea e fasioti le tane a le fafine ina ia mafai e Tavita ona la faaipoipo ma ufiufi ai le mulilua. Na mavae ni nai masina ona faatoʻā auina atu lea e Ieova Natano e aoaia Tavita. (2 Samu. 11:2–12:12)

Pe na ita Tavita i le aoaiga, faaitiitia le sese pe taumafai e tuuaia se tasi? (2 Samu. 12:13; Sala. 51: le ulutala ma fuaiupu 1-3) Po ona o le mea moni na talia e le Atua le salamō o  Tavita, e faapea ai ua saoloto Tavita ma lona auaiga i aafiaga leaga mai lana amio sese? (2 Samu. 12:10, 11, 14; Eso. 34:6, 7)

6. (a) O le ā le lagona o Tavita e faatatau ia i latou na avatua ia te ia fautuaga maufaatuatuaina? (e) E mafai faapefea ona tatou maua aogā pe afai tatou te nofo sauni e talia sea fautuaga? (i) O le ā e lē tatau ona tatou faagaloina pe afai e mamafa ona aoaia i tatou?

⁶ Sa silafia lelei e le Tupu o Tavita le aogā o le faalogo i le fautuaga aogā, ma i nisi taimi na ia faafetai ai i le Atua mo lē na auala mai ai. (1 Samu. 25:32-35; tagai foi i le Faataoto 9:8.) Po o faapena ea i tatou? Afai o lea, o le a malupuipuia la i tatou mai le tautala ma le faia o le tele o mea e ono faapogaia ai le faanoanoa. Peitai afai tatou te oo atu i tulaga e taitaia ai i tatou i se aoaiga mamafa, e pei ona oo ia Tavita ona o le la agasala ma Patesepa, talosia ia lē punitia ai la tatou vaai i le mea moni e faapea o le aoaiga o se faamaoniga lea o le alofa o Ieova, ma le fuafuaga i lo tatou lelei e faavavau.—Faata. 3:11, 12; 4:13.

IA ATIINA AʻE UIGA E LĒ MAFAATUSALIA

7. O le ā le uiga na folasia e Iesu faapea e tatau ona iai i tagata ina ia sao ai i le Malo?

⁷ Ina ia iai se faiā lelei ma Ieova atoa ma o tatou  uso Kerisiano, e manaomia ai ona tatou fafauina aʻe nisi o uiga totino. Na faamatilatila e Iesu se tasi o nei uiga ina ua ia faatuina se tamaitiiti i le lotolotoi o ona soʻo ma fetalai ai e faapea: “A le liua outou, ma avea ia pei o tama iti, tou te le sao lava i le malo o le lagi. O lenei o sē faamaulalo o ia ia te ia e pei o le tama itiiti nei, e sili lea i le malo o le lagi.” (Mata. 18:3, 4) Sa manaomia ona faia e na soʻo ni suiga. Na ao ia i latou ona liaieseina lo latou faamaualuga ma ia atiina aʻe le loto maulalo.

8. (a) O ai e manaomia ona tatou faamaulalo i ai, ma aisea? (e) Afai o tatou faapea, e ao faapefea ona tatou tali atu i fautuaga?

⁸ Na tusi atu le aposetolo o Peteru mulimuli ane i uso Kerisiano e faapea: “Ia oofu outou i le loto maulalo; auā, E tetee atu  le Atua i e faamaualuga, a e foaiina mai le alofa tunoa i e faamaulalo.” (1 Pete. 5:5) Ua tatou iloa e manaomia ona tatou faamaulalo i luma o le Atua, peitai ua taʻua i lenei mau e manaomia foi ona tatou lotomaulalo, pe faamaulalo i le mafaufau, i a tatou faiā ma uso talitonu. Afai o loo tatou faia faapea, o le a tatou lē teena faavalevalea ai la fautuaga atonu latou te ofoina mai ia i tatou. O le a tatou lotomalie ai e aʻoaʻoina le tasi mai i le isi. (Faata. 12:15) Ma afai e iloa e o tatou uso e tatau ona aumai se fautuaga ina ia faasaʻo ai i tatou, o le a tatou lē teena la pe a tatou amanaia e faapea, ua faaaogā ma le alofa e Ieova lenei auala e fuataiina ai i tatou.—Sala. 141:5.

9. (a) O le ā le uiga tāua e fesootai vavalalata ma le loto maulalo? (e) Aisea e tatau ai ona tatou manatu mamafa i le aafiaga o isi ona o a tatou amio?

⁹ O le tasi uiga, e fesootai vavalalata i le loto maulalo, o le manatu mamafa moni lea mo le lelei o isi. E lē mafai ona tatou alo ese mai le mea moni faapea o mea tatou te faia e aafia ai isi tagata. Na fautuaina e le aposetolo o Paulo uluai Kerisiano i Korinito ma Roma ina ia manatu mamafa i loto fuatiaifo o isi. Na te leʻi taʻua faapea e tatau ona latou faataatia ese uma faanaunauga totino, ae na ia uunaia i latou ia aua neʻi faia se mea e faamaite ai se isi tagata e faia se mea ua taʻu atu e lona loto fuatiaifo e sese, ma taitaia ai i lona faatamaiaga faaleagaga. I le faamatalaga manino o le tulaga atoa o le mataupu silisili, na tusi atu ai Paulo e faapea: “Aua le saili se tasi i lona lava lelei, a ia taitasi ma saili i le lelei o le isi. . . . O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua. Aua le avea outou ma mea e tautevateva ai Iutaia, po o Eleni, po o le ekalesia a le Atua.”—1 Kori. 10:24-33; 8:4-13; Roma 14:13-23.

10. O le ā e ono faaalia pe o fai ma a tatou masani le faatatauina o lena fautuaga faale-Tusi Paia?

¹⁰ Po o oe ea o se tagata o lē fai ma masani le tuu faamuamua o lelei o isi tagata i lo o ou lava faanaunauga totino? E tele auala e mafai ai ona faatino lenei itu, ae manatu i se faaaoaoga: I le tulaga masani, o laei ma teuga o ni mataupu e tuufaitalia i le tagata, ae tau lava ina ia tatou onomea, teuteu lelei ma mamā. Peitai afai e te aʻoaʻoina faapea, ona o le talaaga o tagata i lou pitonuu, ua taofia ai nisi mai le faalogo i le feau o le Malo ona o le faiga o ou laei po o teuga, po o le a e faia ea ni fetuutuunaiga? Faamata e sili ona tāua ia te oe le ola o se isi tagata na i lo le faafiafiaina o oe lava?

11. O le ā e faaalia ai e tāua le atiina aʻe o nei uiga pe afai tatou te mananao moni e avea ma Kerisiano?

¹¹ Pe a avea uiga ua talanoaina i luga o se vaega o o tatou uiga totino, e faamaonia ai ua amata ona ia i tatou le mafaufau o Keriso. I le faaalia o le loto maulalo, na faataatia ai e Iesu le faaaoaoga lelei atoatoa. (Ioa. 13:12-15; Fili. 2:5-8) I le faaalia o le manatu mamafa mo isi, na i lo le faafiafiaina o ia lava, na ia faataatia ai le ata mo i tatou e mulimuli ai.—Roma 15:2, 3.

AUA LE TEENA AOAIGA A IEOVA

12. (a) O ā suiga e manaomia uma ona tatou faia e maua ai uiga totino na e finagalo malie i ai le Atua? (e) O le ā o le a fesoasoani ia i tatou?

¹² Talu ai ona tatou te agasala uma lava, e manaomia ai suiga i o tatou manatu, la tatou tautala ma a tatou amio ina ia tatou faaatagia uiga totino o lo tatou Atua. E manaomia ona tatou oofu i le “tagata fou.” (Kolo. 3:5-14; Tito 2:11-14) Ua fesoasoani fautuaga ma aoaiga ia i tatou e iloatino ai po o fea vaega e manaomia ai fetuunaiga ona vaai lea o se auala e fai ai.

13. (a) O ā auala ua saunia mai ai e Ieova fautuaga ma aoaiga mo i tatou uma lava? (e) O le ā e ao ona tatou faia i ai?

 ¹³ O le puna faavae o lena faatonuga o le Tusi Paia. (2 Timo. 3:16, 17) Ma e ala i lomiga faale-Tusi Paia ma sauniga ua saunia e le faalapotopotoga vaaia a Ieova, ua ia fesoasoani ai e faamalamalama ia i tatou le auala e faatatauina ai. Po o le a tatou amanaia ea ma le loto maulalo lo tatou manaomia totino o lea—e tusa lava pe na tatou faalogo muamua i ai—ma faifai pea ona saili e fai se faaleleiga?

14. O ā fesoasoani atili ua saunia e Ieova mo i tatou taitoatasi?

¹⁴ Ua lē tuulafoaia i tatou e Ieova e tauivi toatasi ma mataupu atonu o se faafitauli faapitoa mo i tatou. Faatasi ma le manatu alofa, ua ia faia ai se sauniuniga mo le fesoasoani totino. E faitau miliona tagata ua maua aogā mai lea fesoasoani e ala i suesuega faale-Tusi Paia i aiga. Ua iai i mātua le avega tauave faapitoa e aoai ai a latou fanau ina ia malupuipuia i latou mai amioga e ono faapogaia ai le loto momomo mulimuli ane i le olaga. (Faata. 6:20-35; 15:5) I totonu foi o le faapotopotoga, o i latou ua iai agavaa faaleagaga ua paʻū i ai le avega tauave ina ia faaaogā le Tusi Paia e toe fetuunai ai isi pe a latou utagia se manaoga, peitai ia faia ai ma le loto agamalu. (Kala. 6:1, 2) I nei auala ua fautuaina ma aoaia ai i tatou e Ieova ina ia tatou tapuai ia te ia o ni tagata autasi.

Talanoaga Autalu

● Ua faapefea ona fesoasoani ma le alofa Ieova ia i tatou e tagai po o fea o tatou manaomia totino ai le faia o fetuunaiga?

● Aisea e faafaigata ai ona talia fautuaga e le toatele o tagata? O le ā le matuia o lenei mea?

● O ā uiga lē mafaatusalia o le a fesoasoani ia i tatou e gauai ai i fautuaga? Na faataatia faapefea e Iesu le faaaoaoga i nei uiga?

[Fesili mo le Suʻesuʻega]