Mataupu 17

Ia “Maua e Outou le Alofa Naunau o le Tasi i le Tasi”

1, 2. (a) O le ā ua masani ona matuā maofa ai tagata fou i sauniga a Molimau a Ieova? (e) O ā isi faamaoniga o lenei uiga ua latou matauina i a tatou tauaofiaga?

PE A faatoʻā ō mai tagata i sauniga faalefaapotopotoga a Molimau a Ieova e masani ona latou matuā maofa i le alofa o loo faaalia ai i inā. Latou te mātauina lea i le mafutaga mafana ma i faafeiloaiga ua faasalafa totino atu ia i latou.

² Ua matauina foi e tagata asiasi i a tatou tauaofiaga le pulea lelei o amio a le toatele o i latou o loo auai. Na tusia e se tusitala e faatatau i se tauaofiaga e faapea: ‘E leai se tasi e aafia i vailaau oona po o le ava malosi. Leai se taumanuo ma se feei. Leai se tautulei. Leai se fetineiai. Leai se tasi e palauvale ma tautala lē mafaufau. Leai ni tausuaga lē mamā po o se gagana masoā. Leai ni tapaa e tumu ai le ea i le asu. Leai se gaoi. Leai se tasi e tauaia solo atigi apa i le laufanua. Sa matuā uigaese.’ O nei mea uma o se faamaoniga o le alofa, le ituaiga o alofa lea ‘e lē amio matagā ma e lē sailia e ia lava ona lelei.’—1 Kori. 13:4-8.

3. (a) A o faagasolo le taimi, o le ā e tatau ona faaalia i lo tatou folasia o le alofa? (e) I le faataitai ia Keriso, o le ā le ituaiga o alofa e manaomia ona tatou atiina aʻe?

³ O le alofa o se uiga e iloga ai Kerisiano moni uma. (Ioa. 13:35) A o tatou tutupu aʻe faaleagaga, e tatau ona tatou saga faaalia atoatoa lea uiga. Na tatalo le aposetolo o Paulo ina “ia faatuputeleina pea” le alofa o ona uso. (Fili. 1:9; 1 Tesa. 3:12) Sa uunaia foi e Peteru uso Kerisiano ina ia faatagaina lo latou alofa e  fusia ai le “au uso” atoa. (1 Pete. 2:17) E ao ona uunaia i tatou e lo tatou alofa ina ia faia ni mea e sili atu i lo le tau ina auai i sauniga ma tagata o ē itiiti sina taumafaiga o loo tatou faia ina ia iloa totino i latou. E tatau ona aofia ai le sili atu na i lo se faaupuga agalelei “Talofa” i lea taimi ma lea taimi. Na folasia e le aposetolo o Ioane faapea e ao ona faia ni faataulagaina totino ona o lea alofa. Sa ia tusi mai e faapea: “O le mea lava lenei ua tatou iloa ai le alofa, ina ua tuuina atu e [le Alo o le Atua] o lona lava soifua e sui aʻi i tatou; e tatau foi ona tatou tuuina atu lo tatou ola e sui aʻi le au uso.” (1 Ioa. 3:16; Ioa. 15:12, 13) Tatou te leʻi oo i le faia o lena mea. Peitai faamata tatou te avatua moni lo tatou ola mo o tatou uso? Ia, o le ā le tele ua tatou faamatuu atu ai i tatou e fesoasoani ia i latou i le taimi nei, e tusa lava pe atonu e lē fetaui ma a tatou fuafuaga?

4. (a) O le ā le isi auala ua tatou iloa e mafai ona faaalia atili ai le alofa? (e) Aisea e matuā tāua ai le iai o le alofa naunau o le tasi i le isi?

⁴ Faatasi ma gaoioiga e atagia ai le agaga faataulagaina totino, e tāua foi ona iai se faalogona mafana moni mo o tatou uso. Ua uunaia i tatou e le Afioga a le Atua e faapea: “Ia fefaapelepeleai i le fealofani o uso.” (Roma 12:10) E ia i tatou uma lava lena faalogona mo nisi tagata. Pe mafai ona tatou faaaofia ai nisi e toatele i le vaega o loo tatou misi alofa i ai? A o lalata mai le iuga o lenei faiga tuai o mea, e tāua tele mo i tatou ona matuā mafana vavalalata atu i o tatou uso Kerisiano. Ua lapataia i tatou e le Tusi Paia e faatatau i ai e faapea: “A ua lata mai le gataaga o mea uma lava; . . . Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele.”—1 Pete. 4:7, 8.

5. Aisea e sese ai le faatalitalia faapea o le a leai ni faafitauli e mapuna aʻe i le va o sui o le faapotopotoga?

⁵ Ioe, a o tatou lē lelei atoatoa pea, o le a iai taimi tatou te faia ai mea e faatiga ai i isi. E faapena foi ona  latou agasala mai ia i tatou i auala eseese. (1 Ioa. 1:8) Afai e te oo i ai i lena tulaga, o le ā e tatau ona e faia?

MEA E FAI PE A TULAI MAI FAAFITAULI

6. (a) Aisea atonu o le a lē tutusa ai pea fautuaga a le Tusi Paia ma o tatou faanaunauga? (e) Ae o le ā le iuga pe afai tatou te faatatauina?

⁶ Ua saunia e le Tusi Paia le faasinoga manaomia. Ae atonu e lē tusa le mea ua fautuaina ma le mea o loo faanaunau i ai ō tatou tagata lē lelei atoatoa e fai. (Roma 7:21-23) E ui i lea, o lo tatou galulue ma le filigā i ai o le a na aumaia ai faamaoniga o lo tatou naunau moni e faafiafia le finagalo o Ieova, ma o le a faaleleia ai foi lo tatou alofa mo isi.

7. (a) Afai e faatiga se tasi ia i tatou, aisea e lē ao ai ona tatou taui ma sui? (e) Aisea e lē tatau ai ona tatou alofia se uso o sē e faatiga ia i tatou?

⁷ I nisi taimi pe a tiga loto o tagata, latou te sailia auala e taui ma sui ai i lē na faatiga mai. Peitai ua na ona leaga tele ai o le tulaga i lena mea. Afai e manaomia se taui ma sui, e tatau ona tatou lafo atu lea i le Atua. (Faata. 24:29; Roma 12:17-21) O isi atonu e taumafai e alofia i o latou olaga lē na faatiga mai, alofia le toe fesootai ma ia. Peitai e lē mafai ona tatou faia lena mea i uso tapuai. E faalagolago le talia o la tatou tapuaiga i nisi itu, i lo tatou alofa mo o tatou uso. (1 Ioa. 4:20) Pe mafai ona tatou fai atu ma le faamaoni tatou te alolofa i se isi tatou te lē o talanoa i ai pe tatou te lē fiafia i lona auai mai? E manaomia ona tatou faafoeina le faafitauli ma foia. E faapefea?

8, 9. (a) Afai e ia i tatou ni mafuaaga mo le faitioina o se uso, o le ā le mea tonu e fai? (e) Ae ā pe a agasala soo ia i tatou? (i) Aisea e ao ai ona tatou taulimaina le mataupu i lenei auala, ma o le ā o le a fesoasoani ia i tatou e faia faapea?

⁸ Na tusi mai le aposetolo o Paulo e uiga i lenei mataupu: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai [“Ieova,” NW] ia te outou, ia faapea foi outou.” (Kolo. 3:13) Pe mafai ona e faia lena mea? Ae ā pe afai e faifai pea ona agasala se tagata ia te oe i ni auala eseese?

 ⁹ Na iai i le aposetolo o Peteru le fesili lava lea e tasi, ma na ia fautuaina faapea atonu e tatau ona ia taumafai e faamagalo se uso e oo i le faafitu ona faia faapea. Na tali atu faapenei Iesu: “Ou te le fai atu ia te oe, seia atu fitu, a ia fitugafulu ni fitu.” Ae aisea? Na faamalamalamaina e Iesu i se faataoto sa faapea ona faamatilatila ai le matuia o lo tatou nofosala i le Atua pe a faatusatusa ma se mea o loo nofoaitalafu ai so o se tagata ia i tatou. (Mata. 18:21-35) E anoanoai auala tatou te agasala ai i le Atua i aso faisoo—i nisi taimi o se gaoioiga manatu faapito, e masani lava o mea tatou te tautatala ai pe mafaufau i ai, atoa ma le lē taulau ona fai o le mea e tatau ona tatou faia. I lo tatou faatalale e oo ai ina tatou lē iloa o nisi o mea ua tatou faia e sese, po ona o le faatopelau o le olaga atonu tatou te lē matuā manatu mamafa ai i le mataupu. E ono poloaiina e le Atua o tatou ola e totogi ai a tatou agasala. (Roma 6:23) Peitai ua faaauau pea ona ia alofa mutimutivale ia i tatou. (Sala. 103:10-14) O le mea lea, e lē faapea ai ua lē talafeagai lona manaomia o i tatou ina ia feagai ma o tatou uso i lea lava auala. (Mata. 6:14, 15; Efe. 4:1-3) Pe a tatou faia faapea, na i lo le ita faamoemoe, e faamaonia ai ua tatou ausia le ituaiga o alofa lea “e le tuuina atu i nisi le leaga.”—1 Kori. 13:4, 5; 1 Pete. 3:8, 9.

10. O le ā e tatau ona tatou faia pe afai o iai i se uso se mea e lē malie ai ia i tatou?

¹⁰ E iai taimi atonu tatou te matauina ai lena uiga, e ui ina e leai ni o tatou lagona tiga i o tatou uso, ae e iai se mea o loo ia lē malie ai ia i tatou. O le ā e tatau ona tatou faia? Ma le lē faatuai e ao ona tatou talanoa ia te ia ma taumafai e faafoisia se faiā filemu. Ua uunaia i tatou e le Tusi Paia ia tatou tausolomua. (Mata. 5:23, 24) Atonu e lē faigofie le faia faapea. E manaomia ai le alofa e ō lua ma le loto maulalo. Po ua lava le malosi o na uiga ia te oe ina ia faatino ai le mea ua faatonuina e le Tusi Paia? O se sini tāua lenei e galue i ai.

11. Afai e faia e se uso ni mea e faaʻonoʻono ai ia i tatou, o le ā e tatau ona faia i ai?

 ¹¹ I le isi itu, atonu o loo faia e se tasi ni mea e faaʻonoʻono ai ia te oe—ma atonu e faapena foi i isi. Pe lē lelei ea mo se tasi ona talanoa ia te ia? Atonu. Afai o le a e faamalamalama totino ia te ia le faafitauli i se auala agalelei, e ono aumai ai e lenei mea ni iuga lelei. Ae muamua e ao ona e fesili ifo ia te oe lava: ‘Po o mea o ia faia e matuā lē faale-Tusi Paia? Pe ona e lē tutusa o ma talaaga ma toleniga, ua telē ai le faafitauli?’ Afai o lea, ia e faaeteete la, aua le faatuina ou lava tapulaa ma faamasinoina ai e tusa ma ia mea. (Iako. 4:11, 12) Ua talia ma le lē faailogaina e Ieova tagata mai ituaiga uma o talaaga ma ua onosai ia i latou a o latou tutupu aʻe faaleagaga.

12. (a) Afai e faia se mea sese matuia i le faapotopotoga, o ai e faafoeina? (e) Ae i lalo o ā tulaga e avea ai o se avega tauave a lē ua agasala faasaga i ai ina ia muai gaoioi? Faatasi ma le ā le fuafuaga?

¹² Ae peitai, afai e aafia se tasi o le faapotopotoga i le faia o se sese matuia, e manaomia ona uai atu faanatinati i lenei mea. Ae mai ia te ai? E masani lava o toeaina. Peitai, afai e aafia ai se mataupu faapisinisi i le va o uso, po o le faaaogaseseina o le laulaufaiva i se auala ua matuā faamanuaina ai se tasi, ona tatau lea i lē ua agasala faasaga i ai ona taumafai muamua e fesoasoani i lē ua agasala na o i laua. Atonu e foliga faafaigata i isi lena tulaga. Peitai o le mea lea ua fautuaina e Iesu i le Mataio 18:15-17. O le alofa mo lou uso ma le naunau faamaoni e avea pea o ia o se uso o le a fesoasoani ai ia te oe e faia i se auala o le a pāʻia ai i le loto o lē ua sese, pe afai e mafai.—Faata. 16:23.

13. Afai e tulai mai se faafitauli i le va o i tatou ma se isi uso, o le ā o le a fesoasoani ia i tatou ia saʻo le vaai i le mataupu?

¹³ A mapuna aʻe se faafitauli, pe telē pe laitiiti, tatou te maua se fesoasoani pe afai tatou te taumafai e malamalama i le silafaga a Ieova e faatatau i ai. Na te lē faamaonia so o se agasala, peitai ua ia silafia lea i totonu o i tatou uma. I lana taimi atofaina o le a  faamamā ese ai ē agasala faifai pea ma le lē salamō mai lana faalapotopotoga. Ae faapefea isi o i tatou? O i tatou uma lava o tagata o lona faapalepale ma le alofa mutimutivale. Ua ia faataatia le faaaoaoga e ao ona tatou faataitai i ai. Pe afai tatou te faia faapea, ua tatou faaatagia ai lona alofa.—Efe. 5:1, 2.

SAILI AUALA E “FAATELEINA” AI

14. (a) Aisea na faalaeiau ai e Paulo tagata Korinito ia “faateleina” atu? (e) Ua faaalia faapefea i nei mau le tatau ia i tatou uma ona mafaufau i lenei mea?

¹⁴ Na faaalu e le aposetolo o Paulo le tele o masina i le atiina aʻe o le faapotopotoga i Korinito, i Eleni. Sa galue punouai o ia e fesoasoani i uso i inā ma na ia alofa ia i latou. Peitai sa aunoa nisi o i latou ma ni faalogona mafana mo ia. Sa tele naua lo latou faitio. Na ia uunaia i latou ia “faateleina” le faaalia o le alofa. (2 Kori. 6:11-13; 12:15) E lelei mo i tatou uma ona iloiloina le tele ua tatou faaalia ai le alofa i isi ma ia sailia auala e “faateleina” ai.—1 Ioa. 3:14; 1 Kori. 13:3.

15. O le ā e fesoasoani ia i tatou ia tuputupu aʻe i le alofa mo so o se tasi atonu e lē mafana i ai o tatou lagona totino?

¹⁵ Po o iai nisi i le faapotopotoga o ē ua faigata ona tatou aumea vavalalata i ai? Afai tatou te taumafai e ufiufi so o se sese itiiti latou te faia, e pei ona tatou mananao ia i latou e faia mo i tatou, e mafai ona fesoasoani lena i le mafana o le faiā i lo tatou va. (Faata. 17:9; 19:11) E mafai foi ona faaleleia o tatou lagona ia i latou pe afai tatou te sailia o latou uiga lelei ma manatunatu i ai. Po ua tatou matauina moni ea auala o loo faaaogāina ai e Ieova nei uso? E mautinoa o le a faapogaia e lenei mea le tuputupu aʻe o lo tatou alofa mo i latou.—Luka 6:32, 33, 36.

16. I se vaaiga moni, e mafai faapefea ona tatou “faateleina” atu le faaalia o le alofa ia i latou i la tatou faapotopotoga?

¹⁶ O le mea moni, e iai mutaaga o mea e mafai ona tatou faia mo isi. Atonu e lē mafai ona tatou faafeiloaia tagata uma i sauniga taitasi. Atonu e lē mafai foi ona taloina uma uo pe a tatou valaaulia ni uo mo se  taumafataga. E tofu uma lava i tatou ma aumea vavalalata o ē tatou te faaaluina ai le taimi tele na i lo isi. Peitai pe mafai ona tatou “faateleina” atu? Pe mafai ona tatou faaaluina ni nai minute i vaiaso taitasi e faamasani lelei ai ma se tasi i la tatou faapotopotoga o sē e lē o sa tatou uo vavalalata? Faamata tatou te valaaulia se tasi o i latou nei tatou te galulue faatasi i lea taimi ma lea taimi i le auaunaga i le fanua? Afai e ia i tatou le fealofani moni, tatou te mautinoa o le a maua auala e folasia ai.

17. Pe a tatou miomio ma uso tatou te leʻi feiloai muamua, o le ā o le a faaalia ai po ua ia i tatou le alofa naunau mo i latou foi?

¹⁷ Ua gafatia e tauaofiaga faa-Kerisiano avanoa lelei e “faateleina” ai lo tatou alofa. E faitau afe atonu e auai. E lē mafai ona tatou faafeiloaia i latou uma. Peitai e mafai ona amioai i se auala e faaalia ai tatou te faamuamuaina o latou lelei na i lo i tatou, e tusa lava pe tatou te leʻi fetapai muamua ma i latou. Ma e mafai ona tatou faaalia le naunau totino, i taimi o malologa o le polokalama, i le tausolomua lea e faafeiloaia isi o i o tatou autafa. E sau se aso o le a avea ai ē uma o ē ola i le lalolagi o ni uso ma tuafāfine, e autasi i le tapuaiga i le Atua, ma o le Tamā o tagata uma. Maeu le olioli o le a iai i le iloaina o i latou uma, ma o latou uiga e tele ma le matalasi! O le alofa naunau mo i latou o le a uunaia ai i tatou e mananao ia faia faapea. Aisea e lē amata ai nei?

Talanoaga Autalu

● Pe a mapuna aʻe faafitauli i le va o uso po o tuafāfine, e ao faapefea ona foia? Aisea?

● A o tatou tuputupu aʻe faaleagaga, o ā auala e ao ona tupu aʻe ai foi lo tatou alofa?

● E mafai faapefea ona faaalia le alofa naunau mo le toatele na i lo le lio o a tatou uo mamae?

[Fesili mo le Suʻesuʻega]