Mataupu 22

Ia Tautala Pea i le Afioga a le Atua ma le Faamalosi

1. (a) O le ā le tala lelei na folafola e soʻo o Iesu e amata mai i le Penetekoso 33 T.A., ae o le ā le tali mai a taʻitaʻi ma toeaina o Iutaia? (e) O ā fesili tatou te ono fesiligia ai i tatou lava e faatatau i lenei mea?

NA TUTUPU ni mea e sili ona tāua i le silia i le 4,000 tausaga i le talafaasolopito o le tagata. Sa faauuina ai le Alo o le Atua lava ia, o Iesu Keriso, o le Tupu i le lumanai i le lalolagi uma. E ui ina sa faasalaina i le oti Iesu ona o fili faalotu, ae na toe faatuina e Ieova lona Alo mai le oti. E ala ia te ia ua mafai ai le faaolataga ma le faamoemoe i le ola e faavavau. Peitai ina ua folafola atu e soʻo faamaoni o Iesu lenei tala lelei i lumamea, na sasao aʻe ai ni teteega matuitui. Muamua, e toalua aposetolo na lafo i le falepuipui, mulimuli ane o i latou uma. Na sasaina i latou ma faatonuina e aua neʻi toe tautatala i le suafa o Iesu. (Galu. 4:1-3, 17; 5:17, 18, 40) O le ā e ao ona latou fai? Faamata o le ā semanu e te faia? Pe o le a faaauau ea ona e molimau atu ma le faamalosi?

2. (a) O le ā le tala e sili atu ona ofoofogia e manaomia ona folafola i o tatou aso? (e) O ai ua iai le avega tauave e faia?

² I le tausaga e 1914 T.A. sa tupu ai se mea e sili atu ona ofoofogia i le vateatea aoao. Na faavae moni ai le Malo o le Atua i aao o Iesu Keriso i le lagi. O le mea na sosoo ai, o le lafoina ifo lea o Satani ma ana temoni i le lalolagi. (Faaa. 12:1-5, 7-12) Ma na amata mai ai i inā aso mulimuli o le faiga o mea amioleaga o loo iai nei. A o leʻi oo ina maliliu uma le tupulaga  na molimauina mea na tutupu i le 1914, o le a nutililiia e le Atua le faiga aoao o mea faa-Satani. (Mata. 24:34) O le a folasia i ē faasaoina le faamoemoe o le ola e faavavau. I le faataunuuga o le uluai fuafuaga a le Atua, o le a avea ai le lalolagi atoa ma Parataiso. Afai ua e talia lenei tala lelei, ua ia te oe la le avega tauave e fetufaai ai ma isi. (Mata. 24:14) Ae o le ā le tali e te ono faatalitalia?

3. (a) E faapefea ona tali mai tagata i le feau o le Malo? (e) O lea, o le ā le fesili e ao ona tatou fesagai?

³ Atonu e talileleia ma le mafana e nisi oe o sē folafola le Malo, ae i le toatele o le a na o se meanoa. (Mata. 24:37-39) O isi atonu e aamu pe teena ma le inaina oe. Na lapatai mai Iesu o nisi teteega e ono mapuna mai i lou lava aiga. (Luka 21:16-19) Atonu foi e faafetaiaia i lou fale faigaluega po o le aʻoga. I le tele o vaega o le lalolagi ua oo ina faasa ai fua Molimau a Ieova e malo. Pe a fetaiai ma so o se tulaga faapena po o na tulaga uma, faamata o le a faaauau pea ona e tautala i le Afioga a le Atua ma le faamalosi?

4. Faamata ua lava o tatou lagona maumaututu e faamautinoa ai e faapea o le a tatou auauna pea ma le faamaoni i le Atua?

⁴ E lē masalomia, e te manao e avea oe o se auauna lototele a le Atua. E ui i lea, o nisi o ē na manatu e aunoa ma se mea e mafai ona toe fulituaina i latou, ua pauu ese mai le vaega o ē folafola le Malo. I le tuufaafeagai, o isi, e aofia ai tagata o ē atonu e masani ona mata mumuli, ua lē mapu i le avea ma auauna maelega a le Atua. E mafai faapefea ona faamaonia oe o sē “tumau i le faatuatua”?—1 Kori. 16:13.

AUA LE FAALAGOLAGO I LO TATOU LAVA MALOSI

5. (a) Ina ia faamaonia i tatou o ni auauna faamaoni a le Atua, o le ā se manaoga autū? (e) Aisea e tāua tele ai sauniga?

⁵ E mautinoa, e tele vala e aafia ai i le avea o se  auauna faamaoni a le Atua. Ae o le autū o na mea uma o le faalagolago lea ia Ieova ma ana sauniuniga. E faapefea ona tatou faaalia lea faalagolago? O se tasi o auala o le auai i sauniga a le faapotopotoga. Ua uunaia i tatou e le Tusi Paia ina ia aua neʻi faatalale i ai. (Epe. 10:23-25) O i latou ua faaauau pea ona avea ma molimau faamaoni a Ieova, pe e fetaiai ma le lē manatu mamafa o le lautele po o sauaga, ua pulunaunau i latou lava e auai e lē aunoa i sauniga ma uso tapuai. O nei sauniga e faateleina ai lo tatou iloa o le Tusi Paia, peitai ua lē na o le tosina i mea fou ua taaʻina ai i tatou e auai. (Faatusatusa i le Galuega 17:21.) Ua tuputupu aʻe ai lo tatou sapaitalia o upu moni ua masani ai, ma faamaaiina ai lo tatou nofouta i auala e faaaogāina ai ia upu moni. O le a tamauina ai i o tatou mafaufau ma loto le faaaoaoga na faataatia e Iesu mo i tatou. (Efe. 4:20-24) E vavalalata ai lo tatou tosina atu i o tatou uso Kerisiano i le tapuaiga autasi ma faamalosia totino ai i tatou e faaauau i le faia o le finagalo o le Atua. Ua saunia e le agaga o Ieova faasinoga e ala i le faapotopotoga, ma e ala i lena agaga, ua faatasi ai Iesu i lo tatou lotolotoi pe a tatou faapotopoto i lona suafa.—Faaa. 3:6; Mata. 18:20.

6. I nofoaga o faasaina ai Molimau a Ieova, o le ā ua faia e faatatau i sauniga?

⁶ Pe e te auai e lē aunoa i sauniga uma ma e faaaogaina mea ua e faalogo i ai? I nisi taimi, ona ua faasaina, e tatau ai ona faia sauniga i ni vaega laiti i fale o aiga. Atonu e fesuisuiai le nofoaga ma le taimi e fai ai sauniga, ma e lē talafeagai pea, e faia nisi sauniga i le leva o le po. Peitai, e ui ina e lē talafeagai pe lamatia ai i latou, ae ua taumafai malosi uso ma tuafāfine faamaoni e auai i sauniga taitasi.

7. (a) O ā nisi auala tatou te faaalia ai lo tatou faalagolago ia Ieova? (e) E mafai faapefea ona fesoasoani lenei mea ia i tatou e faaauau ai ona tautatala pea ma le faamalosi?

⁷ E faaalia foi le faalagolago ia Ieova e ala i le  tatalo atu pea ia te ia—e lē tau o se faiga e masani ai, ae ona o le iloatino i le loto e faapea tatou te manaomia le fesoasoani a le Atua. Pe e te faia ea lena mea? Sa faalausosoo ona tatalo Iesu i le taimi o lana faiva i le lalolagi. (Luka 3:21; 6:12, 13; 9:18, 28; 11:1; 22:39-44) Ma na ia uunaia ona soʻo i le po a o lumanai lona faasatauroina: “Ina mataala ia, ma tatalo, neʻi oo mai le faaosoosoga ia te outou.” (Mare. 14:38) Afai tatou te fetaiai ma le toatele e lē fia manatu i le feau o le Malo, e ono aumaia ai se faaosoosoga ina ia faifai lemu i la tatou faiva. Afai e amusia i tatou e tagata pe oo foi i ni sauaga e sili ona matautia, atonu e faaosoosoina i tatou e aua le toe tautala ina ia alofia ai. Ae afai tatou te tatalo faatauanau mo le agaga o le Atua e fesoasoani ia i tatou e tautatala pea ma le faamalosi, o le a puipuia ai la i tatou mai le toilalo i lena faaosoosoga.—Luka 11:13; Efe. 6:18-20.

SE FAAMAUMAUGA O LE MOLIMAU FAAMALOSI

8. (a) Aisea tatou te naunau faapitoa ai i le faamaumauga o loo i le tusi o Galuega? (e) Tali fesili ua saunia i le faaiuga o lenei palakalafa, e faamamafa ai le auala e mafai ona aogā ai ia i tatou faamatalaga.

⁸ E faapitoa lava ona tatou naunau uma i le faamaumauga ua iai i le tusi o Galuega. O loo taʻua ai le auala na mafai ai e aposetolo ma isi uluai soʻo, o tagata sa iai faalogona e pei o i tatou, ona foia toatuga ma faamaonia ai o i latou o ni molimau faamalosi ma le faamaoni a Ieova. Seʻi o tatou auiliilia se vaega o lena faamaumauga faatasi ma le fesoasoani a fesili ma mau ua faasino i ai o loo mulimuli mai. A o tatou faia faapea, ia iloilo le auala e mafai ai ona e maua aogā totino mai mea ua e faitauina.

Po o aposetolo o ni tane na maualuluga ni aʻoaʻoga? Faamata o i latou o ni tagata e masani ona lē fefefe, e tusa lava po o le ā e tupu? (Galu. 4:13; Ioa. 18:17, 25-27; 20:19)

O le ā na mafai ai e Peteru ona faamalosi e tautala atu i luma o le fono faafaamasinoga a Iutaia lea na faasalaina ai le Alo o le Atua i ni nai vaiaso sa leʻi mamao atu? (Galu. 4:8; Mata. 10:19, 20)

 O le ā na faia e le au aposetolo i vaiaso a o leʻi amia i latou i luma o le au Saniterini? (Galu. 1:14; 2:1, 42)

Ina ua faatonuina i latou e taʻitaʻi e taofia le talaʻiga i le suafa o Iesu, o le ā na tali atu ai Peteru ma Ioane? (Galu. 4:19, 20)

Mulimuli ane i lo latou faasaolotoina, o ai na latou toe tagai atu i ai mo le fesoasoani? Pe na latou talosagaina o ia e taofia sauaga, pe ā? (Galu. 4:24-31)

O le ā le auala na saunia ai e Ieova le fesoasoani ina ua taumafai tagata tetee e taofia le galuega talaʻi? (Galu. 5:17-20, 33-40)

Na faaalia faapefea e le au aposetolo lo latou malamalama i le pogai na laveaiina ai i latou? (Galu. 5:21, 41, 42)

E ui ina toatele le au soʻo na faataapeapeina ona o le aasa o sauaga, ae o le ā sa faaauau ona latou faia? (Galu. 8:3, 4; 11:19-21)

9. (a) O ā iuga faamaniti tino ua maua mai le faiva a na uluai soʻo? (e) Ua faapefea ona tatou aafia ai?

⁹ Sa leʻi maimau la latou galuega mo le tala lelei. I le Penetekoso 33 T.A. e tusa ma le 3,000 soʻo na papatisoina. “Ua atili ai ona faaopoopoina i le Alii e ua faatuatua, [o le motu] o tane atoa ma fafine.” (Galu. 2:41; 4:4; 5:14) A o faagasolo le taimi na lipotia mai ai faapea e oo lava i se tasi sa silimusa i le faasaua, o Saulo o Taso, ua avea o se Kerisiano ma na molimau foi o ia ma le faamalosi i le upu moni. Sa oo ina lauiloa o ia o le aposetolo o Paulo. (Kala. 1:22-24) E leʻi muta le galuega sa muai amataina i le uluai senituri. Ua matuā uluola lava i nei “aso e gata ai” ma ua oo atu i itu uma lava o le lalolagi. Ua ia i tatou le faaeaga e saosaolaumea ai, ma a o tatou faia faapea e mafai ona aʻoaʻoina i tatou mai le faaaoaoga a molimau faamaoni o ē na auauna e muamua atu ia i tatou.

10. (a) O ā avanoa sa faaaogā e Paulo e molimau atu ai? (e) I ā auala o e faasalalauina ai le feau o le Malo i isi?

¹⁰ Ina ua aʻoaʻoina e Paulo le upu moni e faatatau  ia Iesu Keriso, na te leʻi toe faatalatu mai ai. “Ona talaʻi loa lea e ia . . . o le Keriso, o ia lava o le Alo o le Atua.” (Galu. 9:20) Sa ia talisapaia le alofa tunoa o le Atua ia te ia ma na ia iloa le manaomia e tagata uma o le tala lelei ua ia mauaina. E tusa ma le tu i na aso, ona o ia o se tagata Iutaia na ia alu atu i sunako, o nofoaga mo fonotaga faalauaitele a Iutaia, e tuuina atu ai se molimau. Na ia talaʻi foi i lea fale ma lea fale ma felafolafoai ma tagata i maketi. Ma na loto foi o ia e siitia i oganuu fou e faalauiloa ai le tala lelei.—Galu. 17:17; 20:20; Roma 15:23, 24.

11. (a) Na faaalia faapefea e Paulo faapea, a o faamalosi o ia, sa ia faautauta foi i le auala na ia molimau atu ai? (e) E mafai faapefea ona tatou faaatagia lea uiga pe a molimau atu i tauaiga, uo i galuega, po o uo i aʻoga?

¹¹ Sa faamalosi Paulo, ae na faautauta foi, e pei ona tatau ia i tatou. Na ia talosaga atu i tagata Iutaia e faavae i folafolaga a le Atua i o latou augatama. I tagata Eleni na ia tautala atu e faavae i mea sa latou masani ai. O nisi taimi na ia faaaogā ai mea na tutupu ia te ia lava a o ia aʻoaʻoina le upu moni e avea o se auala e avatuina ai se molimau. E pei ona ia faamatala: “Ou te faia foi le mea nei ona o le tala lelei, ina ia tatou tofutofusia faatasi ma aʻu.”—1 Kori. 9:20-23; Galu. 22:3-21.

12. (a) E ui ina faamalosi Paulo, ae o le ā na ia faia e alofia ai le faatupuina pea o feteenaiga ma ē tetee? (e) O afea atonu tatou te faataitaia ai ma le atamai lena faaaoaoga, ma e faapefea? (i) O fea e aumai ai le malosi e faaauau ai ona tautala atu ma le faamalosi?

¹² Ina ua foliga mai e sili ona lelei le talaʻi i se isi mea po o le see i se isi oganuu mo sina taimi ona o teteega i le tala lelei, sa faia faapena e Paulo na i lo le faatupuina pea o feteenaiga ma fili o le upu moni. (Galu. 14:5-7; 18:5-7; Roma 12:18) Peitai sa lē taitai mā o ia i le tala lelei. (Roma 1:16) E ui ina sa lē logolelei ia Paulo le faasea, e oo lava i faiga sauā mai  ē tetee, ae sa ia “faamalosi ona o lo tatou Atua” ina ia faaauau ai pea ona talaʻi. E ui i tulaga faigata na ia asā, ae na ia faapea mai: “Sa ia te au le Alii, ma na faamalosi mai ia te au; ina ia faaatoatoaina e aʻu le talaʻiga.” (1 Tesa. 2:2; 2 Timo. 4:17) Ua faaauau ona saunia e le ulu o le faapotopotoga Kerisiano, le Alii o Iesu, le malosi manaomia e faia ai le galuega na ia valoia mo o tatou aso.—Mare. 13:10.

13. O le ā e faamaonia ai le faamalosi faa-Kerisiano, ma o le ā lona faavae?

¹³ Ua ia i tatou mafuaaga uma e faaauau ai ona tautala i le Afioga a le Atua ma le faamalosi, e pei ona sa faia e Iesu Keriso ma isi auauna faamaoni a le Atua i le uluai senituri. E lē o le uiga o lea mea ia tatou soona inainā pe lē faaaloalo i o tatou uiga. E lē tatau ona tatou lē magafagafa pe faamalosi atu le feau ia i latou o ē e lē mananao i ai. Peitai tatou te lē faavaivai ona o le lē manatu mamafa mai o tagata, e lē taofia foi lo tatou tautatala atu ona o le fefefe i teteega. E pei o Iesu, tatou te faasino atu i le Malo o le Atua, o le pulega tonu lea mo le lalolagi uma. Tatou te tautatala ma le mautinoa ona o loo fai i tatou ma sui o Ieova, le Pule Silisiliese Aoao, ma o le feau o loo tatou folafolaina e lē mai ia i tatou ae mai ia te ia.—Fili. 1:27, 28; 1 Tesa. 2:13.

Talanoaga Autalu

● Aisea e tāua ai ona fetufaai le feau o le Malo ma le toatele o tagata e mafai ona maua? Ae o ā tali e ao ona tatou faatalitalia?

● E mafai faapefea ona tatou faaalia tatou te lē o taumafai e faalagolago i lo tatou lava malosi e auauna ai ia Ieova?

● O ā lesona tāua ua tatou aʻoaʻoina mai le tusi o Galuega?

[Fesili mo le Suʻesuʻega]