Mataupu 10

Le Malo “e Le Faaumatia”

1, 2. (a) O le ā le mea moni ua faamamafa i aso taitasi e mea tutupu i le lalolagi, ma e faapefea? (e) E na o le ā le vaifofo?

O MEA tutupu i le lalolagi i aso taitasi ua faamamafa ai le mea moni faapea ua lē maua e tagata se fiafiaga i le teena o le pule silisiliese a Ieova, ae taumafai e pulea i latou lava. E aunoa ma se faigā pulega faaletagata na te aumaia ni aogā tutusa i tagata. E ui ina atiina aʻe e tagata lo latou iloa faasaienisi i se mamao e lē mailoa, ae sa lē mafai ona latou liaieseina ai le agasala, manumalo i faamaʻi ma faamutaina le oti, e aunoa foi ma se tasi o o latou tagatanuu e mafaia ona fai. I le tuufaafeagai, ua faaauau ona fausia e atunuu auupega fou ma le sili ona matautia. O loo uluuluola faiga sauā solitulafono. O meafaigaluega faaonaponei, le matapeapea, ma le faaleamanaiaina ua faaoonaina faatasi ai le laueleele, le vai, ma le ea. O le oso maualuga o le tau o mea ma le leai o ni galuega ua matuā faafaigata ai mo le toatele ona maua mea manaomia mo le olaga. Ua matuā atuatuvale tagata i se auala e faasaoina ai.—Fai. 8:9.

² O le ā le vaifofo? O le Malo o le Atua, lea na aʻoaʻoina ai e Iesu ona soʻo e tatalo i ai. (Mata. 6:9, 10) Maeu lo tatou faafetai ona ua i faitotoa nei le mapusaga o le a ia aumaia!

3. (a) I le sootaga ma lenei Malo, o le ā na tupu i le lagi i le 1914 T.A.? (e) Aisea e tāua ai lea ia i tatou?

³ Talu mai le 1914 T.A., ua faagaoioia nei le Malo o le Atua i aao o Iesu Keriso. * I lena tausaga na  tutupu moni ai i le lagi mea na maimoaina e Tanielu i le faaaliga faavaloaga. Na faaeeina e “Lē ua mai anamua ona aso,” o Ieova le Atua, i luga o le Atalii o le tagata, o Iesu Keriso, “le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese.” I le lipotia o le faaaliga, sa tusia ai e Tanielu e faapea: “O lana pule o le pule e faavavau lea, e le mavae atu ia, o lona malo foi e le faaumatia.” (Tani. 7:13, 14) E ala i lenei Malo o le a faapogaia ai e le Atua ē alolofa i le amiotonu e olioli i mea lelei e lē mafaitaulia na ia fuafuaina ina ua ia tuua o tatou uluai mātua faaletagata i le Parataiso.

4. O ā auiliiliga e faatatau i le Malo tatou te naunau mataalia i ai, ma aisea?

⁴ E naunau mataalia tagatanuu faamaoni o le Malo i le fausaga ma le faagaoioiga o lenei pulega. Latou te mananao e fia iloa po o le ā o ia faia nei, o le ā o le a ia faataunuuina i le lumanai ma o le ā o ia manaomia mai ia i latou. Latou te iloilo totoʻaina, ma a o latou faia, ua tuputupu aʻe ai lo latou talisapaia, ma faaauupegaina ai i latou lava e taʻu i isi e faatatau i lea Malo.—Sala. 48:12, 13.

SE ILOILOGA FAAGAEE LOTO

5. (a) Ua faaalia faapefea i le Tusi Paia po o le pule silisiliese a ai ua faatinoina e ala i le Malo faa-Mesia? (e) O lea e faapefea ona tatou aafia i mea ua tatou aʻoaʻoina e faatatau i le Malo?

⁵ O se tasi o mea muamua e faaalia e sea iloiloga faapea o lenei Malo faa-Mesia o se faatinoga o le pule silisiliese a Ieova lava ia. O ia o lē na avatua “le pule, ma le viiga, ma le malo” i lona Alo. O lea, mulimuli ane ina ua amata ona pule lenei Malo, sa folafola ai ma le talafeagai e leo i le lagi: “O malo o le lalolagi ua avea mo lo tatou Alii [Ieova le Atua] ma lona Keriso, e fai foi o ia [Ieova] ma tupu e faavavau faavavau lava.” (Faaa. 11:15) O lea o mea uma ua tatou matauina e uiga i lenei Malo ma mea ua ia  faataulauina e tosina vavalalata ai i tatou ia Ieova lava ia. Na te totoina ai ia i tatou se faanaunauga ia gauai atu i lana pule silisiliese e faavavau.

6. Aisea tatou te naunau faapitoa ai i le avea o Iesu Keriso o le pule lagolago a Ieova?

⁶ Maeu le matagofie ona ua faanofoina e Ieova Iesu Keriso i le nofoalii o Lana pule lagolago! Ona o le Matai Tufuga o lē na faaaogā e le Atua e faia le lalolagi ma tagata, ua silafia lelei ai e Iesu o tatou manaoga na i lo o se tasi o i tatou. E faaopoopo atu i ai, mai lava i le amataga o le talafaasolopito faaletagata, sa ia faaalia ai lona ‘olioli i tagata.’ (Faata. 8:30, 31; Kolo. 1:15-17) Ona o le telē o lena alofa na ia afio totino mai ai i le lalolagi ma avatu lona soifua o se togiola e sui ai i latou. I lea na ia faaava ai mo i tatou le auala e tuusaunoa ai mai le agasala ma le oti, atoa ma le avanoa mo le ola e faavavau.—Mata. 20:28.

7. (a) I le eseesega ma nofoaiga a so o se tagata, aisea o le a tumau ai lenei pulega? (e) O le ā le faiā a le “auauna faamaoni ma le mafaufau” i le pulega faalelagi?

⁷ O lenei pulega e mausali, e tumau. O lona tumau ua faamautinoaina lea e le mea moni faapea e lē mafai ona maliu Ieova. (Sapa. 1:12; Sala. 146:3-5, 10) I le eseesega ma tupu faaletagata, o Iesu Keriso, lē ua avatu i ai e le Atua le tulaga tautupu, e lē mafai foi ona maliu o ia. (Roma 6:9; 1 Timo. 6:15, 16) O le a auai faatasi ma Keriso i nofoalii faalelagi isi e 144,000, o auauna faamaoni a le Atua ua aveina aʻe mai “itu aiga uma, ma gagana eseese, ma nuu, atoa ma atu nuu.” Ua foaiina foi ia i latou nei, le ola e lē mafai ona oti. (Faaa. 5:9, 10; 1 Kori. 15:42-44, 53) Ua maeʻa ona iai le vaega tele o i latou na i le lagi, ae o lo latou vaega totoe o loo iai i le lalolagi ua faia aʻe ai le vasega o le “auauna faamaoni ma le mafaufau,” lea o loo faalauteleina ma le faamaoni mea o lena Malo i inei.—Mata. 24:45-47.

8, 9. (a) O ā taaʻiga iuvale, ma le fevaevaeai o le a aveesea e le Malo? (e) O lea, ina ia tatou alofia le avea ma fili o le Malo o le Atua, o ā faalapotopotoga ma gaoioiga e ao ona tatou aloese neʻi lavelavea ai?

 ⁸ Ua toe nei o se aga, i le taimi atofa a Ieova, ona gaoioi lea o ana ʻau faaoosala e faamamāina le laueleele. O le a latou faaumatia e faavavau na tagata o ē lē iloa le Atua ona o a latou lava filifiliga, e mumusu e aloaia lana pule silisiliese, ma o ē e manatu faatauvaa i sauniuniga alofa ua ia faia e ala ia Iesu Keriso. (2 Tesa. 1:6-9) O le aso lenei o Ieova, le taimi ua loa ona faatalitalia mo le faamaonia o le tonu o lana Pule Silisiliese Aoao.

⁹ O lotu sese uma, atoa ma pulega uma faaletagata ma a latou autau, ia ua faatonutonuina e le pule amioleaga lē vaaia o lenei lalolagi, o le a faatamaia e faavavau. O ē uma e faailogaina i latou o se vaega o lenei lalolagi i le sailia o se olaga tau o ia lava, lē faamaoni, ma le lē mamā o le a aveesea i le oti. O le a aveesea Satani ma ana temoni mai le fesootaiga ma ē ʻaināina le lalolagi, ae saisaitia mo tausaga e afe. Maeu se mapusaga o le a iai i lenei mea mo ē uma e alolofa i le amiotonu!—Faaa. 18:21, 24; 19:11-16, 19-21; 20:1, 2.

ONA FAAMOEMOEGA —LE AUALA E FAATAUNUU AI

10. (a) O le a faataunuu faapefea e le Malo faa-Mesia le fuafuaga a Ieova mo le lalolagi lava ia? (e) O le ā la o le a uiga i ai lenei mo tagata o loo ola ai i le lalolagi i lena taimi?

¹⁰ O le a faataunuu atoatoa e lenei Malo faa-Mesia le uluai fuafuaga a le Atua mo le lalolagi. (Kene. 2:8, 9, 15; 1:28) E oo mai i le asō, ua lē taulau ona tauaveina e tagata lena fuafuaga. Peitai, o “le lalolagi ʻainā o loo sau” ua gauai atu i le Atalii o le tagata, o Iesu Keriso. O ē uma e faasaoina i le faaumatiaga faafaamasinoga a Ieova i lenei faiga tuai o mea o le a galulue autasi i lalo o Keriso o le Tupu,  e fiafia e faia so o se mea na te faatonuina ina ia avea ai le lalolagi atoa o se Parataiso. (Epe. 2:5-9, NW) O le a olioli tagata uma i le galuega a o latou lima ma maua aogā atoatoa mai le anoanoai o fua o le laueleele.—Sala. 72:1, 7, 8, 16-19; faatusatusa i le Isaia 65:21, 22.

11. (a) O le a aumaia faapefea le lelei atoatoa i le mafaufau ma le tino mo tagata o le Malo? (e) O le ā o le a aofia i lenei itu?

¹¹ Ina ua foafoaina Atamu ma Eva sa lelei atoatoa i laua, ma o le fuafuaga a le Atua mo le lalolagi ia faatumuina i a la fanau, latou te olioli uma i le mafaufau ma le tino lelei atoatoa. I lalo o le pulega o le Malo, o le a avea lena fuafuaga o se mea moni faamamaluina. E manaomia e lenei mea le aveesea o aafiaga uma o le agasala, ma ina ia faia faapea o le a auauna ai Keriso e lē gata o le Tupu ae faapea foi o le Faitaulaga Sili. Ma le onosai o le a ia fesoasoani ai i ona tagatanuu usiusitai e maua aogā mai le tāua o le taulaga e togiola ai agasala na faia mai i lona lava soifua faaletagata. O le a pupula mata o ē tauaso. E lē toe logonoa taliga tutuli. O tino matagā ona ua matutua pe ona o faamaʻi o le a faafouina e sili na i lo le tamaitiiti. O vaivaiga faifai pea o le a suia i le tauosoosoga o le malosi. O le a oo mai le aso e lē toe iai i se tasi se mafuaaga e faapea mai ai, “Ou te maʻi,” auā o le a mapu tagata matatau i le Atua mai le mamafa o le agasala ma ona āuga faanoanoa.—Faatusatusa i le Isaia 33:22, 24; 35:5, 6; Iopu 33:25; Luka 13:11-13.

12. (a) O le ā le isi mea e manaomia e le lelei atoatoa faaletagata? (e) O le a ausia faapefea lena mea, ma o le ā o le a iu i ai?

¹² Ae peitai, o le ausia o le lelei atoatoa, e sili atu e aofia ai na i lo le na ona mauaina o se tino lelei ma se mafaufau lelei. E aofia ai le faaatagia saʻo o uiga o le peresona o Ieova, auā na faia le tagata i le ‘faatusa o le Atua, e tusa ma ona uiga.’ (Kene. 1:26)  Ina ia oo i lena tulaga, o le a tele se aʻoaʻoga e manaomia. O le Faiga Fou lenei e “mau ai le amiotonu,” o lea, e pei ona valoia e le perofeta o Isaia, “e aʻoaʻoina e o nonofo i le atu laulau [“i le amiotonu,” NW].” (2 Pete. 3:13; Isa. 26:9) E taitaia lenei uiga i le filemu—i le va o tagata o atunuu uma, le lotolotoi o aumea vavalalata, i le aiga o se tasi ma, i luga o mea uma, faatasi ma le Atua lava ia. (Isa. 32:17; Sala. 85:10-13) O i latou e aʻoaʻoina le amiotonu o le a faasolosolo ona aʻoaʻoina i le finagalo o le Atua mo i latou. A o agaʻi ina mauaa i o latou loto le alofa mo ala o Ieova, o le a latou mulimuli ai i matata uma o o latou olaga. Sa mafai e le tagata lelei atoatoa o Iesu ona faapea mai, ‘Ou te faia pea lava mea lelei i loʻu Tamā.’ (Ioa. 8:29) Maeu se olaga olioli o le a iai pe a moni lena i tagata uma!

FAATAUNUUGA UA ILOGA MAI

13. Faaaogā fesili o loo i luga e faamatilatila ai faataunuuga a le Malo ma le mea e ao ona tatou faia.

¹³ Ua uma ona iai faataunuuga ofoofogia o le Malo i tagata o ē e iai mata o le faatuatua. O fesili o loo mulimuli mai ma mau o le Tusi Paia ua faasino i ai, o le a faamanatu ai ia te oe nisi o nei mea, atoa ma mea e mafai ma e tatau ona faia e tagatanuu uma o le Malo i le taimi nei:

 Ia te ai na muai gaoioi i ai le Tupu, ma faatasi ma ā iuga? (Faaa. 12:7-10, 12)

O le aoaoina o sui mulimuli o le ā le vaega na uai atu loa i ai ina ua maeʻa ona faauuina Keriso? (Mata. 24:31; Faaa. 7:1-4)

I le Mataio 25:31-33, o le ā le isi galuega na valoia e Iesu o le a ia faia pe a maeʻa ona afio i lona nofoalii ma a o leʻi faaumatiaina ē amioleaga?

Ua faapefea ona faataunuuina lenei galuega? O ai o loo auai? (Mata. 24:14; Sala. 110:3; Faaa. 14:6, 7)

Aisea e lē mafai ai e tagata tetee faapolotiki ma faalelotu ona taofia lea galuega? (Galu. 5:38, 39; Saka. 4:6)

 O ā suiga ua maeʻa ona faia i olaga o tagata o ē gauai i le pulega o le Malo, ona o le galuega tau aʻoaʻoga ua tauaveina? (Isa. 2:4; 1 Kori. 6:9-11)

LE TULAGA TUMAU O LE MALO

14. (a) O le ā le umi o le a pule ai Keriso? (e) O le ā o le a faataunuuina i lena taimi?

¹⁴ A mavae le lafoina o Satani ma ana temoni i le to e lē gata, ona pule loa lea o Iesu Keriso ma ona suli lagolago e 144,000 mo tausaga e afe. (Faaa. 20:6) I lena taimi o le a aumaia ai tagata i le lelei atoatoa. O pulega uma ma taʻitaʻi ma malo malolosi o ē e tetee ia Ieova o le a aveesea. Pe a faataunuuina lena mea, ona toe faafoi atu lea e Iesu le Malo i lona Tamā, “ina ia pule aoao le Atua i le aoao o mea.”—1 Kori. 15:24, 28.

15. E moni faapefea o lenei Malo o le a ‘lē taitai ona faaumatia’?

¹⁵ O lea la, o le a suia le tulaga o Iesu lava ia i le sootaga ma le lalolagi. E ui i lea, o lana nofoaiga e “faavavau” ma o lona Malo “e le faaumatia.” (Tani. 7:14) I le ā le uiga? Auā o le a lē tuuina atu le aiā e pule ai i lima o isi o ē e ese o latou sini. O faataunuuga a le Malo o le a ‘lē taitai ona faaumatia.’ O le mea e faia e le Malo ina ia faaeaina ai le suafa o Ieova ma lana fuafuaga mo lenei lalolagi o le a tumau e faavavau.

[Faaopoopoga i lalo]

Talanoaga Autalu

● Aisea ua na o le Malo ai o le Atua le vaifofo i faafitauli o tagata? Na amata anafea ona ia pule?

● O le ā ua sili ona e tosina i ai e uiga i le Malo o le Atua ma mea o le a ia faataulauina? Aisea?

● O ā faataunuuga a le Malo ua maeʻa ona tatou vaaia? O le ā la tatou vaega i nei mea?

[Fesili mo le Suʻesuʻega]

 [Ata i le itulau 84, 85]

O le a aʻoaʻoina e tagata le amiotonu