Mataupu 13

Le Motu o Tagata e Toatele i Luma o le Nofoalii o Ieova

1. (a) A o leʻi maua e auauna a le Atua i tua atu o le Faa-Kerisiano po o le 144,000 lo latou taui, o le ā e tatau ona oo ia i latou? (e) Peitai o le ā o le a taulau mo se motu o tagata e toatele o ē ola pe a oo mai le “puapuaga tele”?

E UI ina faamuamuaina e auauna faamaoni a le Atua mai ia Apelu e oo ia Ioane le Papatiso le faia o le finagalo o le Atua i o latou olaga, ae sa tatau lava ona latou maliliu uma ma faatalitali mo le toetu. O le 144,000 o ē o le a iai faatasi ma Keriso i lona Malo faalelagi e tatau foi ona maliliu a o leʻi mafai ona maua lo latou taui. I le eseesega, na faailoa i le aposetolo o Ioane i le faaaliga e faapea o le a iai se motu o tagata e toatele e faasaoina moni lava i le “puapuaga tele” ma, o le a maua le faamoemoe o le ola e faavavau e aunoa ma le oti.—Faaa. 7:9-17.

MATAULIAINA LE “MOTU O TAGATA E TOATELE”

2. O le ā na taʻitaʻia i se malamalamaga manino po o ai le “motu o tagata e toatele” o le Faaaliga 7:9?

² Sa lē malamalama po o ai lenei “motu o tagata e toatele” mo le faitau senituri. Peitai o le malamalamaga faasolosolo o valoaga e fesootai i ai ua na saunia ai le auala. I le 1923 na utagia ai faapea o “mamoe” o le faataoto a Iesu i le Mataio 25:31-46 ma “isi mamoe” na sa ia faasino i ai i le Ioane 10:16, o tagata ia o loo ola nei o ē o le a maua le avanoa e mau ai e faavavau i inei i le lalolagi. I le 1931 o ē ua faamatalaina i le Esekielu 9:1-11 o loo faailogaina o latou muaulu e le tagata o loo iai le fagu vaitusi a le tusiupu, ua matauina faapea  o “mamoe” ia o le Mataio mataupu e 25. Mulimuli ane, i le 1935, na iloaina ai le “motu o tagata e toatele” o le Faaaliga 7:9-17, e tutusa ma “mamoe” o le faataoto a Iesu i mamoe ma ʻoti. E ui i tuā i le 1923 na iloaina ai faapea ua maeʻa ona faailoa mai nisi o na tagata e pei ni mamoe, ae faatoʻā amata ona faatupulaia vave lo latou faitau aofai i le 1935. I aso nei o loo iai moni lava se faitau miliona o ē o loo saili ina ia matauina o se vaega o lena “motu o tagata e toatele” o “isi mamoe” ua aloaia e le Atua.

3. Aisea e lē uiga ai lo latou ‘tutū i luma o le nofoalii’ faapea o i latou o se vasega faalelagi?

³ Ua faaeseeseina i latou o le “motu o tagata e toatele” mai le 144,000 o sui o le Isaraelu faaleagaga, na e faasino i ai i le amataga o le mataupu lava lea o le Faaaliga. I lana faaaliga sa leʻi vaaia e Ioane lenei “motu o tagata e toatele” o iai i le lagi. O le “tutū [o] i latou i luma o le nofoālii” (Eleni: e·no΄pi·on tou thro΄nou, “i le mea e mafai ona iloa mai ai mai le nofoalii”) o le Atua e lē tau manaomia ai ona latou iai i le lagi. E manino o lo latou tulaga “i le mea e silafia ai i latou” e le Atua, o lē ua na faailoa mai ia i tatou faapea o loo ia silasila mai le lagi i tagata. (Faaa. 7:9; Sala. 11:4; faatusatusa i le Salamo 100:1, 2, faapea foi le Luka 1:74, 75 ma le Galuega 10:33, Kingdom Interlinear.) E faapena foi i “nuu uma” ona lē tau manaomia ona iai i le lagi ina ia latou tutū i luma o le nofoalii o Keriso (iai tino, “i ona luma”), e pei ona faamatalaina i le Mataio 25:31, 32. O le mea moni o le ‘motu o tagata e toatele e lē mafaitaulia e se tasi,’ e lē o se vasega faalelagi e pei ona folasia i le faatusatusaga o le Faaaliga 7:4-8 ma le 14:1-4, lea o loo faaalia ai le fuainumera patino o i latou e aveina aʻe mai le lalolagi i le lagi.

4. (a) O le ā le “puapuaga tele” e faasaoina ai i latou? (e) E pei ona taʻua i le Faaaliga 7:11, 12, o ai o loo matauina le “motu o tagata e toatele” ma auai ma i latou i le tapuaiga?

⁴ I le matauliaina o le “motu o tagata e toatele,” na  tusia ai e Ioane: “O i latou ia o e o mai nai le puapuaga tele.” Ioe, o le mea o le a faasaoina ai i latou, o le puapuaga tele sa leʻi faapea ona tupu muamua i le lalolagi. (Faaa. 7:13, 14; Mata. 24:21) O le a lē masalomia e ē faasaoina i lena aso sili ma le matautia o Ieova po o ai sa tu mo lo latou faasaoina. Ina ua latou faailoa atu ma le loto faafetai lo latou faaolataga i le Atua ma le Tamai Mamoe, o lea, e pei ona vaaia e Ioane i le faaaliga, ona aufaatasi atu lea ia i latou leo o meafaiola faamaoni uma i le lagi i le tapuaiga i le Atua moni e toatasi, i le faapea atu: “Amene; Ia i lo tatou Atua le faamanū, ma le viiga, ma le poto, ma le faafetai, ma le mamalu, ma le mana, ma le malosi e faavavau faavavau lava. Amene.”—Faaa. 7:11, 12.

TOFOTOFOINA PE E TATAU ONA FAASAOINA

5. (a) E mafai faapefea ona tatou mautinoa le mea e manaomia ina ia avea ai ma vaega o le “motu o tagata e toatele” o le a faasaoina? (e) I le taliina o fesili i le faaiuga o lenei palakalafa, faamatala po o le ā e manaomia e faasaoina ai i le “puapuaga tele.”

⁵ O le faasaoina o le “motu o tagata e toatele” e faatinoina i le ogatasi ma tapulaa amiotonu a Ieova lava ia. O faasinoga manino o uiga e matauliaina ai i latou o ē o le a faasaoina ua ta aofaia lea i faamatalaga faavaloaga a le Tusi Paia ia i latou. O lea ua mafai ai e ē alolofa i le amiotonu ona gaoioi nei ma le faamoemoe e faasaoina. Ua maeʻa ona tatou talanoa i mau o loo mulimuli mai. Ae i le taimi nei ia auiliili i ia mau ma le faaeteete, faatasi ma le fesoasoani a nei mau faaopoopo, ma iloilo po o le ā e tatau ona e faia e faafetaui ai i nei faamatalaga faavaloaga.

“Isi mamoe” ua faasino i ai i le Ioane 10:16

O le ā le uiga mo se tagata ia faalogo moni i le siufofoga o Iesu? (Ioa. 10:27; Mata. 9:9; Efe. 4:17-24)

E mafai faapefea ona tatou faaalia lo tatou talia aloaia o Keriso e fai ma o tatou “leoleo mamoe e toatasi”? (Mata. 23:10, 11)

 “Mamoe” i le faataoto a Iesu o mamoe ma ʻoti (Mata. 25:31-46)

O ai “uso” o Keriso ia sa faia lelei e i latou nei? (Epe. 2:10, 11; 3:1)

I lalo o ā tulaga faigata ua taloina ai i latou ina ia matauliaina i latou faatasi ma uso o Keriso i le lalolagi? Ma o le ā le galuega ua latou avatu i ai le lagolagosua faamaoni? (Faaa. 12:12, 17; Mata. 24:14; 28:19, 20)

O tagata ua faailogaina mo le faaolataga e le tagata o loo iai le fagu vaitusi a le tusiupu (Eseki. 9:1-11)

Ua latou faaalia faapefea latou te lē o ō faatasi ma mea inosia ua faia i Ierusalema faafaatusa, po o Kerisinetoma? (Faaa. 18:4, 5)

O le ā e aofia i le “faailoga” lea e faaesea ai i latou mai Kerisiano faatagafai ma saunia ai i latou mo le faasaoina? (1 Pete. 3:21; Mata. 7:21-27; Ioa. 13:35)

6. E faapefea i le faamatalaga a Ioane e uiga i le “motu o tagata e toatele” ona fesoasoani ia i tatou ina ia malamalama i le mafuaaga ua faasaoina ai i latou?

⁶ O le faamatalaina o le “motu o tagata e toatele” e pei ona maua i le Faaaliga 7:9-15 ua faaopoopo mai ai nisi auiliiliga tāua. I le taʻuina mai ia i tatou o le auala e aliali aʻe ai i latou o le “motu o tagata e toatele” pe a mavae le “puapuaga tele,” ua tatai atu foi e le Tusi Paia manatu i itu e oo ai i lo latou faasaoina.

7. O le ā na latou faia a o lumanai le “puapuaga tele,” ma ua faapefea ona faasino mai lenei mea?

⁷ E ui ina latou ō mai i atunuu uma, ituaiga, tagata ma gagana, ae ua faaalia o loo latou aufaatasi e ‘tutū i luma o le nofoalii,’ ma avatu le faamanū ia Ieova, o Lē tietie i le nofoalii, o le Pule Silisiliese Aoao. Ua latou faamaonia i auala o o latou olaga faapea o i latou o ē lagolagoina ma le faamaoni lana nofoaiga. O le mea moni faapea ua “ta foi o latou ofu, ma ua faasinasinaina o latou ofu i le toto o le Tamai mamoe,” e faaalia ai latou te amanaia lo latou manaomia o le aogā o le taulaga togisala a Iesu le Tamai Mamoe a le Atua. (Ioa. 1:29; 1 Ioa. 2:2) I le faatuatua, ua latou tuuina atu ai i latou i le Atua e faavae i lena taulaga, ua  faailogaina lea i le faatofuina i le vai ma olioli ai nei i se tulaga mamā i luma o le Atua, e pei ona faaataina e o latou ofu sisina. Ua lē taofiofia i latou mai le faailoa atu i lumamea o lo latou faatuatua i le Alo o le Atua. (Mata. 10:32, 33) I le ogatasi ma nei mea uma, ua faaalia o loo latou iai i le malumalu o le Atua, po o le maota faalevateatea o le tapuaiga, o ni ē tapuai o loo avatua i le Atua le ‘auaunaga paia i le ao ma le po.’ O lea ua latou faatuina ai se tala tusitusia o ni tagata lagolagosua faamaoni o le tapuaiga moni ma o ni ē faalauiloaina lona Malo.—Isa. 2:2, 3.

8. Ina ia aogā lenei faamatalaga ia i tatou, o le ā e tatau ona tatou faia?

⁸ Po o fetaui auiliiliga o nei ata faavaloaga ia te oe? O iai ea ni auala e manaomia ai ona e matuā aumaia atoa lou olaga ia ogatasi ma le mea ua faamatalaina i inei?  Afai o lea, o le taimi lenei e fai ai!

OLAGA I SE PARATAISO FAALEAGAGA

9. Ua faamatala faapefea e Ioane faamanuiaga faaleagaga ua olioli ai le “motu o tagata e toatele” e oo lava i le taimi lenei?

⁹ Po o oe ea o se tasi o faamoemoe e faasaoina o se vaega o le “motu o tagata e toatele”? Afai ua e piiama i ala amiotonu o Ieova, e lē masalomia la ua amata nei ona e olioli i tulaga na folafola mai lea ua talafeagai ona taʻua o le parataiso faaleagaga. Sa faailoa atu i le aposetolo o Ioane e faapea: “Latou te le toe fia aai, e le toe fia inu foi, e le ogotia i latou i le la, po o se tasi vevela; auā o le Tamai mamoe o loo i luma o le nofoālii na te fafaga ia i latou, ma taʻitaʻi ia te i latou i puna o vai ola; e sōloieseina foi e le Atua o loimata uma nai o latou mata.” (Faaa. 7:16, 17) Ua faamaonia faapefea le moni o lenei mea i lou tulaga?

10. (a) I se uiga faaleagaga, ua moni faapefea e “le toe fia aai, e le toe fia inu foi” le “motu o tagata e toatele”? (e) Pe ua oo lenei mea ia te oe?

¹⁰ A o leʻi ulu atu i le tausiga alofa a le Leoleo Mamoe Lelei, o Iesu Keriso, pe sa e matelaina ea ma galala mo le amiotonu? (Faatusatusa i le Mataio 5:6.) Afai o lea, o le mea sa e moomoo i ai o se mea ua na o Ieova lava e mafai ona ia saunia e ala i lona Alo. Ina ua e aʻoaʻoina ala amiotonu o Ieova—lana fuafuaga e faaumatia ē amioleaga, ae o lona alofa tunoa ua mafai ai le faaolataga mo le fanau a Atamu—o lea, e lē taumatea, ua e lagonaina le faamalieina moni mo le uluai taimi i lou olaga. O vai ma mea taumafa faaleagaga mai le Afioga a le Atua, e pei ona laulauina e ala i lana faalapotopotoga, ua faaauau ona aumaia ai ia te oe le faamalie loto. (Isa. 65:13, 14) Ma afai ua e tuuina atu oe i le Atua e ala ia Keriso ua iai nei la ia te oe se fuafuaga moni i le olaga. (Faatusatusa i le Ioane 4:32-34.) Ua i ou luma le faamoemoe olioli o le ola e faavavau i se lalolagi Parataiso, auā o le a ‘taʻitaʻi e le Tamai mamoe le motu o tagata e toatele i puna o vai ola.’

11. (a) I le ā le auala e moni ai faapea ‘e lē toe ogotia i latou i le la po o so o se tasi lava vevela’? (e) E tāua faapefea lena itu ia te oe?

¹¹ Ona o ni “mamoe” faatuatua, ua puipuia ai foi ma taitaia saogalemu le “motu o tagata e toatele” e le Leoleo Mamoe Lelei. O le pogai lea, pe a tautala faafaatusa, ‘e lē toe ogotia i latou i le la po o so o se tasi lava vevela.’ E lē o lona uiga faapea, ona o oe o se tasi o le “motu o tagata e toatele,” o le a e lē mafatia ai la i sauaga mai le lalolagi. Na i lo lea, e faaata mai ai ua e malu puipuia mai le mumū aasa o le toasa o le Atua lava ia. Ma pe a ia faatoto ifo le faaumatiaga tauatua i ē amioleaga, o le a lē faatamaia ai oe. O lenei faiā faapelepele e mafai ona faaauau pea e faavavau.—Eseki. 38:22, 23; faatusatusa i le Salamo 11:6; 85:3, 4.

12. E faapefea ona soloiesea loimata i ou mata e oo lava i le taimi nei?

¹² Maeu ni mafuaaga matagofie mo le olioli e fai mo oe pe afai o oe moni lava o se tasi o lena “motu o tagata e toatele”! Ua ia te oe le faamoemoe ofoofogia o le vaai  atu ua tafiesea atoatoa ē amioleaga ma mulimuli ane tuusaoloto moni ai lou lava mafaufau ma le tino i āuga uma o le agasala. Ae e oo foi i le taimi nei ua e lē aafia i faanoanoaga ua oo i ai tagata ona o lo latou lē iloaina o le Atua. Ua amata ona e iloa le olioli lea e fai mo na o tagata lava e avea Ieova mo latou Atua. (Sala. 144:15e) I lenei auala ua amata ai ona e tofo i le faataunuuga o le folafolaga: “E sōloiesea foi e le Atua loimata uma i o latou mata.”

13. O le ā o le a faaopoopo atu i le olioli i le parataiso faaleagaga a o faagasolo le pulega o le meleniuma a Keriso?

¹³ E pei ona o le a faasaoina le “motu o tagata e toatele” i le iuga o lenei faiga o mea, e faapea foi la le parataiso faaleagaga. Afai o oe o se tasi o i latou, o le a faaauau pea la ona e olioli i se tausamiga faaleagaga o mea lololo a o faagasolo le pulega o le meleniuma a Keriso. O le a loloto atili lou iloa o le Atua lava ia a o e maimoaina le oo atu o lana fuafuaga lē mafaatoilaloina i lona taunuuga mamalu. A o e auai i le faafeiloaia o se vaega tele e faatupulaia o tagata ua toe faafoisia mai le oti ina ia aufaatasi ma oe i le tapuaiga moni, o le a faateleina ai lou olioli. Ma o faamanuiaga faaletino o le a saunia i lea taimi e faapitoa lava ona tautele i auauna faamaoni uma a le Atua ona e manatu i ai o le faaalia mai o le alofa o Ieova lava ia.—Isa. 25:6-9; Iako. 1:17.

Talanoaga Autalu

● Faatasi ma le ā le mea uigaese e tupu ua faatasia i ai e le Tusi Paia le “motu o tagata e toatele,” ma e faapefea?

● Afai tatou te mananao moni e aofia i lena “motu o tagata e toatele” ua aloaia e le Atua, o le ā e tatau ona tatou faia nei?

● E tāua faapefea ia te oe faamanuiaga o le parataiso faaleagaga?

[Fesili mo le Suʻesuʻega]