Mataupu 20

Le Ola ma le Toto—Pe E te Tausia ia Mea e Paia?

1. (a) E faapefea ona silasila le Atua i le ola? (e) E mafai faapefea ona tatou faaalia lo tatou sapaitalia o le meaalofa a le Atua o le ola?

E LĒ tatau ona tatou maofa ona o le ese mamao o le silafaga a le Atua i le ola, mai le vaaiga a le lalolagi. E paia i le Atua le ola o le tagata. Po o lou manatu foi lena? Tatou te faalagolago atoatoa i le Atua, o lē “foai mai e ia le ola, ma le mānava, ma mea uma lava.” (Galu. 17:25-28; Sala. 36:9) Pe afai e ia i tatou le silafaga a le Atua, o le a tatou puipuia la o tatou ola. Peitai o le a tatou lē solia le tulafono a le Atua i se taumafaiga e faasaoina lo tatou ola o loo iai nei. Tatou te teulotoina le folafolaga a le Atua o le ola e faavavau mo i latou o ē faatuatua moni i lona Alo.—Mata. 16:25, 26; Ioa. 6:40; Iuta 21.

2. O le manatu o ai i le ola ua faaatagia e le lalolagi, ma i nisi taimi o le ā le ituaiga o mafaufauga ua taitaia i ai e lea uiga?

² I le tuufaafeagai, na fetalai Iesu e faapea o Satani le Tiapolo, le pule o lenei lalolagi, “o le fasioti tagata ia talu le amataga.” (Ioa. 8:44; 12:31) Mai lava i le amataga o lona ala fouvale na ia aumaia ai le oti i tagata. Ua atagia lona agaga i le talafaasolopito sauā o le lalolagi. Peitai e mafai foi e Satani ona fesuisuiai mai ona foliga. O lea ua finau mai ai tagata o ē ua taaʻina i ona mafaufauga e faapea, atonu e lelei le mapolotu, ae a oo ina lamatia tulaga o le olaga, o le a aogā mo oe ona utagia a latou fautuaga “atamai” na i lo le sii mai  o le Tusi Paia. (Faatusatusa i 2 Korinito 11:14, 15.) Pe a fesagai ma se tulaga e foliga mai e iu ai i le ola po o le oti, o lē fea le ala o le a malolo i ai lou loto? O le mea moni, e ao ona avea ma o tatou faanaunauga le faafiafiaina o Ieova.

3. (a) Aisea e tatau ai ona tatou naunau faapitoa i le mea o fai mai ai le Tusi Paia e faatatau i le toto? (e) Faitau le Kenese 9:3-6 ma le Galuega 15:28, 29, ona tali lea o fesili ua lisiina i luga faatasi ma nei mau.

³ Ua faaalia e le Afioga a le Atua le faiā vavalalata i le va o le ola ma le toto, e faapea: “Auā o i le toto le ola o le tino.” E pei lava ona paia le ola, ua faapena foi ona faia e le Atua le toto e paia. O se mea e tau ia te ia, e faaaogā tau lava o le auala ua ia faamaonia. (Levi. 17:3, 4, 11; Teu. 12:23) E lelei ai la ona tatou iloiloina ma le faaeteete le mea ua ia manaomia mai ia i tatou e faatatau i le toto.

Faitau le Kenese 9:3-6

O ā faiga i lou vaipanoa e manaomia ona e mataala i ai ina ia lē tagofia le toto o manu?

Ona o le mea ua taʻua i le Ke 9 fuaiupu e 4 e faatatau i toto o manu, o le ā la lou manatu i le inumia o le toto o le tagata (lea na faia i taaloga tauivi a Roma)?

E pei ona faaalia i le Ke 9 fuaiupu e 5 ma le 6, ia te ai e tatau ona muai tali atu i ai se tasi mo le faamasaaina o le toto o le tagata?

Faitau le Galuega 15:28, 29

Po ua taʻua ea i lenei mau faapea e faatatauina mea manaomia mo na o sina taimi faatapulaa? Pe faatatauina ea ia i tatou?

Pe e lē aofia ai le toto o le tagata i nei faaupuga?

Po o faaalia i le mau faapea e lē tatau ona usitai i ai pe a tutupu faalavelave faafuasei?

4. E pei ona talanoaina i inei, o ā gaoioiga ua folasia e le Tusi Paia atonu e manaomia ona faia e se tagata ina ia alo ese ai i le nofosala i le toto?

⁴ E tusa ai ma le toto o le tagata, e lē mafai ona tatou  faapea o le tau lava ina taumamao mai le fasioti tagata o le a tatou lē agasala ai. Ua faaalia e le Tusi Paia e faapea afai o i tatou o se vaega o so o se faalapotopotoga o loo nofosala i le toto i luma o le Atua, e ao la ona tatou vavae ese mai ai pe a tatou lē mananao e auai i ana agasala. (Faaa. 18:4, 24; Mika 4:3) O sea gaoioiga e tatau ona manatu vave i ai.

5. E faapefea ona fesootai le filigā i le faiva i le fanua ma le saoloto mai le nofosala i le toto?

⁵ Mo auauna a le Atua o ē na ia faatonuina e lapataia le fotuai mai o le faaumatiaga i le puapuaga tele, o lo latou tumau ona saoloto mai le nofosala i le toto e manaomia ai ona latou folafola faamaoni lena feau. (Faatusatusa i le Esekielu 3:17-21.) Sa manatu le aposetolo o Paulo ia te ia lava o sē nofo aitalafu i ituaiga uma o tagata ona o le faiva na tofia atu ia te ia. Faatoʻā ia lagona lava le saoloto mai le avega tauave mo o latou toto ina ua uma ona ia molimau maeaea atu ia i latou e uiga i le sauniuniga a le Atua mo le faaolataga. (Roma 1:14, 15; Galu. 18:5, 6; 20:26, 27) Po o atagia ea i lou filigā i le faiva i le fanua se utaga faapena i le avega tauave ua paʻū atu i Molimau uma a Ieova?

6. O le ā le sootaga ua iai i le va o le puipuia mai faalavelave ma le faaaloalo mo le paia o le ola?

⁶ E ao foi ona tatou manatu mamafa i faalavelave matautia e oo ai i le oti. I le Tulafono Faa-Mose o tagata o ē na faapogaia faafuasei ai le oti o se uso a tagata e aunoa ma le fuafuaina, sa lē manatu i ai ua lē agasala. Ae sa faaee i ai ni faasalaga. (Eso. 21:29, 30; Teu. 22:8; Nu. 35:22-25) Afai tatou te faatāua le mataupu silisili o loo aafia ai, o le a tatou faaeteete la e alofia le faapogaia o so o se faalavelave matautia e oo ai i le oti, i le auala tatou te aveina ai se taavale, i le soona fai o ni gaoioiga faavalevalea po o le iai o ni tulaga lē saogalemu i o tatou aiga po o nofoaga o a tatou pisinisi. Pe o atagia i ou uiga i nei mea le sapaitalia atoatoa mo le paia o le ola?

 FAAPEFEA LE FAAAOGĀINA FAAFOMAI O LE TOTO?

7. (a) Faamata e ogatasi le tuiina o le toto o le tasi tagata i le isi ma le paia o le toto? (e) Aisea e lē talafeagai ai le faamutaina o le faatonuga ina ia ‘taumamao mai le toto’ i gaoioiga sa taatele i le uluai senituri?

⁷ E ui ina e lē o se gaoioiga fou, ae ua taatele le faaaogāina o le toto mo le tuiina i le isi tagata, ona o le manatu ina ia faatumauina ai le ola, ae maise lava i le 20 senituri. Ua faaaogā uma ai i lenei auala le toto ma ona vaega autū. E mautinoa, o na gaoioiga faafomai e lē mafai ona faamaonia ai faapea o le a lē oti le maʻi. O le mea moni, i nisi taimi e ala ona oti le maʻi ona o se iuga tuusao o sea faaaogāina o le toto. Ae o le mea e sili atu ona manatu mamafa i ai—Pe faatatau le manaoga o le Tusi Paia ia tatou ‘taumamao mai le toto’ i lenei gaoioiga faafomai? Ioe! O le tuiina o le toto i le tino o se tasi mai so o se isi lava meaola, po o se tagata po o se manu, e solia ai le tulafono a le Atua. Ua faaalia ai le lē faaaloalo mo le paia o le toto. (Galu. 15:19, 20) E leai se faavae mo le faatapulaaina o le poloaiga ia ‘taumamao mai le toto’ i faiga sa iai i le uluai senituri ae lē aofia ai togafitiga faafomai i ona po nei. Seʻi manatunatu i ai: O ai e fai mai o le poloaiga a le Tusi Paia i le fasioti tagata sa leʻi aofia ai le fasiotia lē faatulafonoina o le ola o le tagata e ala i se fana, talu ai faatoʻā faia fana i le 10 senituri? Ma po o le a talafeagai ea ona finau mai faapea o le faasaina o le onā sa faatatau i na o meainu sa maua i le uluai senituri ae lē faatatauina i ʻava malolosi faaonaponei? Mo tagata e mananao moni e faafiafia le Atua, ua manino le feau ua aumaia i le poloaiga ina ia ‘taumamao mai le toto.’

8. (a) E mafai faapefea ona e iloa po ua talafeagai se gaoioiga faafomai mo se Kerisiano? (e) Afai e manao le fomai e tuiese se vaega o lou toto, e teu ma toe faafoi i lou tino a o faagasolo se taotoga, o ā mataupu silisili faale-Tusi Paia e mafai ona fesoasoani ia te oe ina ia faia ai se faaiuga lelei? (i) Atonu e manatu faapefea se tagata i togafitiga e manaomia ai le faataamilo o le toto e ala i masini o loo i fafo atu o le tino?

⁸ Ae ui i lea, o le lavelave o nisi gaoioiga faafomai  atonu e lāgā ai ni fesili. Pe mafai faapefea ona foia ia fesili? Muamua, fesili i lau fomai mo se faamalamalamaga manino o le gaoioiga ua fuafuaina. Ona auiliili lea faatasi ma le tatalo i le manatunatu i mataupu silisili a le Tusi Paia. Atonu e manao le fomai e tui ese se vaega o lou toto ma teu mo le faaaogāina pe a manaomia, i se taotoga mulimuli ane. Faamata e te ioe i ai? Ia manatua, e tusa ai ma le Tulafono a le Atua na aumaia e ala ia Mose, o se toto e aveesea mai se meaola e tatau ona sasaa i le eleele. (Teu. 12:24) Tatou te lē o i lalo la o le tusi o Tulafono i aso nei, peitai o le manatu faavae i inei e paia le toto ma, pe a faamasaa mai le tino o se meaola, e ao ona toe faafoi atu i le Atua e ala i le sasaaina i lona tulaga aao, le lalolagi. (Faatusatusa i le Mataio 5:34, 35.) E talafeagai la faapefea ona teu lou toto (tusa lava pe mo sina taimi puupuu) ona toe tui atu lea i totonu o lou tino? Ae ā pe a faapea mai le fomai, a o faagasolo le taotoga pe i le faia o nisi togafitiga, o le a faaalu atu ai lou toto i ni masini i fafo atu o lou tino, ona toe faafoi mai lea i totonu i lena lava taimi? Po o le a e malie ea i ai? Ua manatu faapea nisi, i le loto fuatiaifo mamā, e mafai ona latou faatagaina lea faiga, pe afai sa muai faatumuina le masini i se suavai e aunoa ma se toto. Ua latou manatu i le masini i fafo o se faaopoopoga o le faataamilosaga o lo latou toto. O le mea moni, e eseese tulaga, ma o oe lava e ao ona filifili. Peitai e tatau i lau faaiuga ona tuua ai oe ma se loto fuatiaifo mamā i luma o le Atua.—1 Pete. 3:16; 1 Timo. 1:19.

9. (a) Ina ia mautinoa le faaaloalo mo lau faaiuga e ‘taumamao mai le toto,’ o ā laasaga e tatau ona faia? (e) E tusa lava po o se mea e tupu faafuasei, e mafai faapefea i nisi taimi ona alofia ni fefinauaiga lē fiafia? (i) O le ā o le a e faia pe a taumafai se fomai po o se faamasinoga e faamalosia se tuigā toto?

⁹ Ina ia mautinoa o le a faaaloalogia e lau fomai lau faaiuga ina ia ‘taumamao mai le toto,’ ia e talanoa ia te ia a o leʻi tulai mai so o se faalavelave faafuasei faafomai. Afai e tatau ona taofia i le falemai mo se togafitiga, o le laasaga e uia o le tusi talosaga lea i ai  faapea e lē faaaogāina se toto, ma talanoa totino foi e faatatau i ai, i le fomai o le a faia ou togafitiga. Ae ā pe afai o se faalavelave faafuasei e leʻi faatalitalia? E mafai ona alofia fefinauaiga lē fiafia i le faia o se talanoaga faaaloalogia, ma talafeagai ma le fomai, ia talosagaina o ia e faaaogā ona tomai e fesoasoani ai, ae ia faia ma le faaaloalo i lou loto fuatiaifo faa-Kerisiano. (Faata. 15:1; 16:21, 23) Peitai, afai e tautū fomai i o latou manatu mo lou lelei, faapea o le teena o le toto o le a lamatia ai lou ola ma taumafai ai e faamalosia i tatou ia lolo atu, ona ā lea? O le faatuatua i le tonu o ala o Ieova e tatau ona faamausaliina ai i tatou. O le faamaoni ia Ieova e ao ona faapogaia ai i tatou e maumauai e tetee atu, auā ua tatou filifili e usiusitai i le Atua na i lo tagata.—Galu. 5:29; faatusatusa i le Iopu 2:4; Faataoto 27:11.

O LE Ā LE MATUIA O LE MATAUPU?

10. Aisea o le a lē suia ai lo tatou manatu i le mataupu ona o se finauga faapea e manaomia se tuigā toto e faasaoina ai le ola?

¹⁰ I tagata latou te leʻi iloa Ieova, o finauga e talia se tuigā toto atonu i nisi taimi e foliga mai e faaalia ai le manatu maualuga i le paia o le ola. Peitai tatou te lē faagaloina o le toatele o ē finau mai faapena ua talia foi le faaumatiaina o le ola e ala i le faapautama. E sili atu le silafia o Ieova i le ola ma le toto na i lo so o sē “tomai” faafomai. Ua faamaonia o Ana poloaiga uma e mo lo tatou lelei, e leoleo maluina ai lo tatou ola i le taimi nei ma lo tatou faamoemoe i le lumanai. (Isa. 48:17; 1 Timo. 4:8) Po ua ese ai la le poloaiga ina ia ‘taumamao mai le toto’?

11. (a) Ua na o le ā le faaaogāina o le toto na faatagaina e Ieova ia Isaraelu? (e) Aisea e tāua tele ai lenei mea ia i tatou o Kerisiano?

¹¹ O le tāua o le faaaloalo i le paia o le toto ua faamamafaina i le mea na fetalai i ai Ieova e faatatau i le auala e tasi e mafai ona faaaogāina i ai le toto. “O i le toto le ola o le tino; ua ou tuuina atu foi ia te outou e fai aʻi le togiola mo outou i luga o le fata faitaulaga;  auā o le toto o le mea lava lea e fai aʻi le togiola mo le tagata. O le mea lava lea na ou fai atu ai i le fanauga a Isaraelu, Aua le ʻaina ni toto e so outou.” (Levi. 17:11, 12) O toto uma lava o manu sa sasaaina i le fata faitaulaga a Ieova, ina ia ogatasi ma lena mea manaomia sa faaataina ai le toto tautele o Iesu Keriso. (Epe. 9:11, 12; 1 Pete. 1:18, 19) O lea o le paia o le toto o Iesu ua faamamafaina i le tulafono a le Atua, ua faasaina ai so o se isi lava faaaogāina o le toto. E mafai ona matauina mai i lenei itu e faapea so o se faaaogaseseina o le toto ua faaalia ai le augapiu ma se faaaloalo i le sauniuniga a Ieova mo le faaolataga e ala i lona Alo.

12. Pe a fesagai ma le oti, aisea o le a lē liliu atu ai se Kerisiano moni i so o se faaaogaseseina o le toto i se taumafaiga ina ia faaauau ai ona ola?

¹² Pe a fesagai ma se tulaga e iu ai i le ola po o le oti, pagā se lē vaai mamao o le a iai pe a fulitua se tasi i le Atua! E ui ina tatou talisapaia auaunaga a fomai loto faamaoni, ae tatou te lē taumafai maumauai ai e tuu i tatou po o ē pele ia i tatou e ola mo ni nai aso po o ni tausaga e ala i le solia o le tulafono a le Atua, e peiseai na pau lenei o le olaga. Tatou te faatuatua i le tāua o le toto masaa o Iesu ma le ola e faavavau ua faataulauina ai. Faatasi ma o tatou loto atoa, tatou te talitonu ai faapea o auauna faamaoni a le Atua—e oo lava i ē ua feoti—o le a tauia i le ola e faavavau.—Ioa. 11:25; 1 Timo. 4:10.

Talanoaga Autalu

● Aisea ua paia ai le ola ma le toto? Aisea ua finau mai ai le lalolagi i se manatu e ese?

● E faatatau i manu, tatou te faaalia faapefea le faaaloalo mo le paia o o latou toto?

● I ā auala eseese e ao ia i tatou uma ona faaalia ai faapea tatou te tausia le ola faaletagata o se mea e paia? O le ā le tāua o le faia faapea?

[Fesili mo le Suʻesuʻega]