Mataupu 7

Mea Tatou te Aʻoaʻoina Mai le Faatagaina e le Atua o le Amioleaga

1. (a) Ana fai e vave faasalaina e Ieova le au fouvale i Etena, o le a faapefea i lena mea ona aafia ai i tatou? (e) Na i lo lena, o ā sauniuniga alofa ua faaavanoa e Ieova ia i tatou?

E TUSA lava po o ā faafitauli e ono agaʻi mai i lo tatou olaga, ae o lo tatou fananau mai ua lē o se faiga amioletonu lea a le Atua. Na ia faaofuina uluai tagata i le lelei atoatoa ma avatu ia i laua le Parataiso o so la aiga. Ana fai na ia faasalaotiina loa i laua ina ua mavae le la fouvalega, semanu la e leai ni tagata faamaia, matelaina ma le solitulafono, e pei ona tatou iloaina. Peitai, ma le alofa mutimutivale na faataga ai e Ieova ia Atamu ma Eva e aumaia se aiga a o la leʻi feoti, e ui o le a tuufaasolo mai ia i latou nei le lē lelei atoatoa. E ala ia Keriso na ia faia ai le sauniuniga mo i latou o le fanau a Atamu o ē faaalia le faatuatua ina ia maua le mea na melea e Atamu—o le ola e faavavau i tulaga o le a mafai ai ona maua le fiafiaga sili o le olaga.—Teu. 32:4, 5; Ioa. 10:10.

2. Pe na faia nei mea uma mo na o lo tatou faaolataga?

² E lē mafuafuaina aogā totino o lenei mea ia i tatou. Peitai ua tatou aʻoaʻoina mai faamaumauga a le Tusi Paia e iai se mea e sili atu ona iloga sa aafia ai na i lo o lo tatou lava faaolataga totino.

MO LE LELEI O LONA SUAFA SILISILI

3. O le ā na aafia i le sootaga ma le faataunuuga o le fuafuaga a Ieova mo le lalolagi ma tagata?

³ O le suafa o Ieova, lona talaaga o le Pule  Silisiliese Aoao ma le Atua o le upu moni, sa aofia i le faataunuuga o lana fuafuaga e uiga i le lalolagi ma tagata. Ona o le tulaga o Ieova, le filemu ma le sologa lelei o le vateatea aoao ua manaomia ai ona avatu le faaaloalo atoatoa e tatau ai i lona suafa ma ia usiusitai uma ia te ia.

4. O le ā tonu lava ua aofia ai i lena fuafuaga?

⁴ Ina ua uma ona foafoaina Atamu ma Eva, sa ia avatu ia i laua se tofiga e faataunuu. Na ia faamaninoina faapea o lana fuafuaga e lē gata ia faatoilalo i le lalolagi uma, o lona uiga ia faalautele tuaoi o le Parataiso, ae ia nofoia e fanau a le uluai tane ma le fafine, o Atamu ma Eva. (Kene. 1:28) Pe o le a solofua ea lenei fuafuaga ona o le la agasala, ma iu ina faalumaina ai le suafa o le Atua?

5. (a) E tusa ai ma le Kenese 2:17, o afea e oti ai se tasi e ʻai mai le laau e iloa ai le lelei ma le leaga? (e) Na faapefea ona faataunuu e Ieova lena mea, ae o loo aloaia foi lana fuafuaga e faatatau i le nofoia o le lalolagi?

⁵ Na lapataia e Ieova Atamu faapea afai e ʻai o ia ma le lē usitai mai le laau e iloa ai le lelei ma le leaga e mautinoa “o le aso” na te ʻaia ai e oti ai lava. (Kene. 2:17) E moni e tusa ma le afioga a le Atua, o le aso lava na agasala ai Atamu na taloina ai e Ieova nei tagata solitulafono ma fofogaina i ai lo la faasalaga o le oti. Sa lē maalofia le faasalaga. Mai le silafaga faafaamasinoga a le Atua, na feoti ai lava Atamu ma Eva i lea aso. (Faatusatusa i le Luka 20:37, 38.) Ae ina ia faataulau lana lava fuafuaga na faataatia e uiga i le nofoia o le lalolagi, na faataga ai i laua e Ieova ia iai so la aiga a o leʻi o la feoti moni. E ui i lea, e tusa ma le silafaga a le Atua i le 1,000 tausaga o se aso e tasi, ina ua uma le ola o Atamu i le 930 tausaga, sa aofia lenei i totonu o se “aso” e tasi. (Kene. 5:3-5; faatusatusa i le Salamo 90:4; 2 Peteru 3:8.) O lea na siitia ai le moni aʻiaʻi o Ieova e tusa ma le taimi e faaoo mai ai lana faasalaga, ma sa lē seua  lana fuafuaga ia nofoia le lalolagi i ē tupuga mai ia Atamu. Ae o lona uiga e faapea, ua faatagaina tagata agasala e ola mo sina taimi.

6, 7. (a) O le ā ua faaalia i le Esoto 9:15, 16 i le pogai ua faataga ai e Ieova ē amioleaga e faaauau mo sina taimi? (e) I le tulaga o Farao, sa faapefea ona faaalia ai le malosi o Ieova ma na faapefea ona faalauiloa ai Lona suafa? (i) O le ā o le a avea ma taualuga i le gataaga o lenei faiga amioleaga o mea?

⁶ Ua faaalia atili i le mea na fetalai ai Ieova i le pule o Aikupito i aso o Mose, le pogai na faatagaina ai e le Atua ē amioleaga e faaauau mo sina taimi. Ina ua faasa e Farao le tuua e le fanauga a Isaraelu Aikupito, sa leʻi taia loa o ia e Ieova. E sefulu mala na faatoto ifo i le laueleele, e faaalia ai le malosi o Ieova i auala eseese ma le ofoofogia. Ina ua lapataia i le mala lona fitu, na taʻu atu e Ieova ia Farao faapea o le meanoa ia te ia le tafiesea o Farao ma ona tagata mai le laueleele. Peitai, na fetalai atu Ieova: “E moni lava o le mea lava lea ua ou faatuina ai oe, ina ia ou faaali ai loʻu mana ia te oe, ma ia taʻua loʻu igoa i le lalolagi uma lava.”—Eso. 9:15, 16.

⁷ Ina ua faasaoina e Ieova Isaraelu, e moni lava sa lauiloa ai lona suafa i le lautele. I aso nei, ua toetoe 3,500 tausaga mulimuli ane ai, ae e lē mafai ona galo le mea na ia faia. E lē gata ina faalauiloaina ai le suafa totino o Ieova ae faapea foi le upu moni e uiga i Lē ou lea suafa. O lea na faamautuina ai le talaaga o Ieova o le Atua o lē tausi i ana feagaiga ma gaoioi mo ana auauna. Na faaalia ai faapea ona o le silisiliese o lona mana ua leai ai se mea e mafai ona taofiaina lana fuafuaga. O le a sili atu foi ona mataina le oo mai o le faaumatiaga o le faiga amioleaga uma o mea vaaia ma lē vaaia. O lena faaaliga o le silisiliese o le mana ma le mamalu ua aumaia i le suafa o Ieova, o le a lē faagaloina i le talafaasolopito aoao. E lē muta mai ona aogā!—Eseki. 38:23; Faaa. 19:1, 2.

 ‘AUĒ LE LOLOTO O LE POTO O LE ATUA!’

8. O ā vala faaopoopo ua uunaia i tatou e Paulo e iloiloina?

⁸ I lana tusi i tagata Roma, na laga ai e le aposetolo o Paulo le fesili: “O i le Atua ea le amioletonu?” Ona ia tali lea i le faamamafaina o le alofa mutimutivale o le Atua ma i le faasino atu i le mea na fetalai ai Ieova ia Farao. Na ia toe fafagu mai foi le mea moni faapea o i tatou e pei o le omea i lima o le fai ipu omea. Pe faitio atu ea le omea i le auala e faaaogāina ai o ia? Na faaopoopo mai Paulo: “Afai ua onosai le Atua, ma ua matuā faapalepale i ipu o le toasa ua faatatauina i le malaia, ina ua finagalo o ia e faaali mai ai lona toasa, ma faailoa mai ai lona mana; e faailoa mai ai foi le faulai o lona viiga i ipu o le alofa, na ia muai saunia e oo i le manuia; o i tatou foi na valaauina e ia, e le gata i Iutaia, a e atoa foi ma nuu ese.”—Roma 9:14-24.

9. (a) O ai “ipu o le toasa ua faatatauina i le malaia”? (e) Aisea ua faaalia ai le faapalepale o Ieova a o fesagai ma le aasa o a latou sauaga, ma e faapefea ona avea le taualuga faaiu o se lelei mo i latou o ē alolofa ia te ia?

⁹ Talu mai lava ona fofogaina e Ieova le faamatalaga faavaloaga ua faamauina i le Kenese 3:15, ua avea ai Satani ma lana fanau o “ipu o le toasa ua faatatauina i le malaia.” I lena taimi atoa ua faaalia ai pea e Ieova le onosai. Ua amusia e tagata amioleaga ona ala; ua latou sauaina ana auauna, e oo lava i le fasiotia o lona Alo. Peitai ua faaalia pea e Ieova le matuā faapalepale, faatasi ma aogā tumau i ana auauna. Ua iai i le foafoaga uma le avanoa e maimoa ai i āuga faamalaiaina o le fouvale i le Atua. I le taimi lava e tasi, ua saunia e le maliu o Iesu le auala mo le faasaoina o tagata usiusitai ma mo le ‘faaumatiaina o galuega a le Tiapolo.’—1 Ioa. 3:8; Epe. 2:14, 15.

10. Aisea ua faaauau ai ona faapalepale Ieova i ē amioleaga i le 1,900 tausaga ua tuanai?

¹⁰ E sili atu i le 1,900 tausaga talu le toetu o Iesu ua faapalepale ai pea Ieova i “ipu o le toasa,” i le  taofiofia o lo latou faaumatiaga. Aisea? Auā ua ia saunia le vaega lona lua o le fanau a le fafine, i latou ia o le a aufaatasi ma Iesu Keriso i lona Malo faalelagi. (Kala. 3:29) O i latou nei, e 144,000 le aofai, o “ipu o le alofa” e pei ona tautalagia e le aposetolo o Paulo. Muamua, sa valaaulia tagata taitoatasi mai le lotolotoi o tagata Iutaia e faia aʻe ai lenei vasega. Ona faaopoopo lea i ai o tagata peritomeina o Samaria ae faaiu i tagata o Nuu Ese. Ona o le lava onosai na galueaiina ai e Ieova lana fuafuaga, e aunoa ma le faamalosia o se tasi e auauna ia te ia, ae faatotoina ifo faamanuiaga sili ia i latou o ē ua tali atu ma le sapaitalia i ana sauniuniga alofa. E lē o toe mamao nei ona maeʻa lea o le sauniuniga o lena vasega faalelagi.

11. O le ā le isi vaega ua aogā nei i ai le lava onosai o Ieova?

¹¹ Ae faapefea i latou e ʻainaina ai le laueleele? I le taimi atofaina a le Atua e faitau piliona o le a toe faatutuina o ni tagatanuu faalelalolagi o le Malo. Ae maise foi, talu mai le 1935 T.A. o le lava onosai o Ieova ua mafai ai ona aoaoina faatasi se “motu o tagata e toatele” mai atunuu uma ina ia faaolaina i latou.—Faaa. 7:9, 10; Ioa. 10:16.

12. (a) O le iuga, o le ā ua tatou aʻoaʻoina e faatatau ia Ieova lava ia? (e) E faapefea ona e tali atu i le auala ua taulimaina ai e Ieova nei mataupu?

¹² Po ua iai ea se amioletonu i nei mea uma? E mautinoa e leai! Afai ua taofiofia pea e le Atua le faaumatiaga o ē amioleaga, o “ipu o le toasa,” ina ia mafai ai ona faaalia lona tigaalofa i isi i le ogatasi ma lana fuafuaga, e saʻo faapefea la ona faitio se tasi? Na i lo lea, a o tatou mātauina lana fuafuaga ua folasia, ua tatou aʻoaʻoina ai le anoanoai e uiga ia Ieova lava ia. Tatou te maofa i vala o lona peresona ua faapupulaina mai—lona faamasinotonu, lona alofa mutimutivale, lona onosai, le uigaese o lona atamai. O le atamai ona taulimaina e Ieova o le finauga o le a tumau e faavavau o se faamaoniga lea  i le mea moni faapea e sili ona lelei lana auala o loo pule ai. Tatou te faapea atu faatasi ma le aposetolo o Paulo: “Aue! le loloto o le tamaoaiga o le poto atoa ma le silafaga a le Atua. E le masuesueina ana faamasinoga; e le mafai foi ona iloa ona ala.”—Roma 11:33.

AVANOA E FAAALIA AI LO TATOU TUUTOINA

13. (a) Pe a tatou uia mafatiaga totino, o ā avanoa ua aumaia ai ia i tatou? (e) O le ā o le a fesoasoani ia i tatou e tali atu ai ma le atamai?

¹³ O loo iai tulaga e aofia ai mafatiaga moni totino ona e leʻi faaumatiaina lava e le Atua le amioleaga ma toe aumaia le toe fuataiina o tagata sa valoia. O le ā la tatou tali atu i ai? Pe o tatou vaaia i na mea ni avanoa e saosaolaumea ai i le faamamāina o le suafa o Ieova mai tuuaiga ma faamaonia ai le pepelo o le Tiapolo? E mafai ona matuā faamalosia i tatou e faia faapea i le mafaufau pea i fautuaga e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faata. 27:11) Na taʻua e Satani o lē o loo faalumaina Ieova faapea, afai e mafatia tagata i le toesea o mea faitino pe pagatia faaletino o le a latou tuuaia loa le Atua, e oo foi ina fetuu ai ia te ia. (Iopu 1:9-11; 2:4, 5) Tatou te aumaia le olioli i le finagalo o Ieova, e ala i lo tatou faamaoni i le Atua i mea faigata, ma tatou te faaalia e lē saʻo lea mea i lo tatou tulaga. Ua ia i tatou le mautinoa atoatoa faapea e alofa faapelepele Ieova mo ana auauna, ma i se taimi tuupoina o le a tauia ai ma le agalelei i tatou e Ieova pe afai tatou te faamaoni e pei ona iai i le tulaga o Iopu.—Iako. 5:11; Iopu 42:10-16.

14. Afai tatou te faalagolago ia Ieova pe a tatou uia tofotofoga, o ā isi aogā e mafai ona tatou maua?

¹⁴ Afai tatou te talitonu ma faalagolago ia Ieova pe a tatou uia tofotofoga matuitui, e mafai ona tatou atiina aʻe ai uiga tautele. O le iuga o mea na mafatia ai Iesu, na ia ‘aʻoaʻoina ai ia usiusitai’ i se auala na te  leʻi silafia muamua. E mafai foi ona tatou aʻoaʻo—i le atiina aʻe o le onosai, le tumau ma se talisapaia loloto o ala amiotonu o Ieova. Pe o le a tatou talia ea ma le onosai lena toleniga?—Epe. 5:8, 9; 12:11; Iako. 1:2-4.

15. A o tatou tumau ma le onosai i faigata, e mafai faapefea ona maua ai e isi aogā?

¹⁵ O le a matauina e isi mea tatou te faia. Ona o mea ua tatou uia i lo tatou alofa mo le amiotonu, atonu i se taimi o le a talisapaia ai e nisi o i latou po o ai moni lava “uso” o Keriso i aso nei, ma i le autasi ma ona “uso” i le tapuaiga e ono maua ai e i latou faamanuiaga o le ola e faavavau. (Mata. 25:34-36, 40, 46) E finagalo Ieova ma lona Alo ia latou maua lena avanoa. Pe faapena lo tatou manatu? O tatou loto malilie ea e fesagai ma faigata ina ia maua ai?

16. E faapefea i la tatou vaaiga totino i ia faigata ona fesootai i le mataupu o le autasi?

¹⁶ Maeu le matagofie pe afai, e tusa lava po o ā tulaga faigata i le olaga, ae tatou te vaai atu i ai, o ni avanoa ia e faaalia ai lo tatou tuutoina ia Ieova ma saosaolaumea ai i le faataunuuga o lona finagalo! O lo tatou faia faapea e mafai ona avatu ai faamaoniga o lo tatou agaʻi moni atu i le autasi ma le Atua ma Keriso lea na tatalo ai Iesu mo Kerisiano moni uma.—Ioa. 17:20, 21.

Talanoaga Autalu

● A o faatagaina le amioleaga, ua faapefea ona faaalia e Ieova ma le talafeagai le faaaloalo sili mo lona lava suafa?

● E faapefea i le faapalepale o le Atua i “ipu o le toasa” ona mafai ai e lona alofa mutimutivale ona oo mai ia i tatou?

● O le ā e ao ona tatou taumafai e matauina i tulaga e aafia ai mafatiaga ua tatou tofo totino i ai?

[Fesili mo le Suʻesuʻega]