Mataupu 4

O Ia Lē na Molimau i ai Perofeta Uma

1. O ā mea moni e faatatau i le olaga o Iesu a o leʻi avea ma tagata e faaalia ai lana faiā ma Ieova?

I LE faamatalaina o lana lava faiā mafana ma Ieova, na fetalai ai Iesu: “O loo alofa le Tamā i le Atalii, ua faaali mai foi ia te ia mea uma lava e faia e ia.” (Ioa. 5:19, 20) O le vavalalata o lena faiā na amata i le taimi o lona foafoaina, i meleniuma e lē mafaitaulia a o leʻi fanau mai o ia o se tagata. O ia o le Alo e toatasi o le Atua, o lē na foafoaina toatasi e Ieova lava ia. O isi mea uma i le lagi ma le lalolagi sa foafoaina e ala i lena Alo pele ulumatua. Sa avea foi o ia o le Upu (Lokou) a le Atua po o le Fofoga Fetalai, o lē na auala atu ai le faafesootaiga o le finagalo o le Atua i isi. O ia lenei, o le Alo sa faapitoa i ai le alofa o le Atua, na avea o le tagata o Iesu Keriso.—Kolo. 1:15, 16; Ioa. 1:14; 12:49, 50.

2. O le ā le tele ua faasino atu ai valoaga o le Tusi Paia ia Iesu?

² A o lumanai lona fanau mai faavavega o se tagata, e anoanoai valoaga faagaeeina sa faamauina e faatatau ia te ia. E pei ona sa tautino e le aposetolo o Peteru ia Konelio, “Ua molitinoina mai o ia e le au perofeta uma.” (Galu. 10:43) Ona o le vaega tele a Iesu i le sootaga ma le tapuaiga mamā ua folasia i le Tusi Paia, sa taʻu atu ai e se agelu i le aposetolo o Ioane: “Ifo i le Atua; auā o le agaga o le valoaga o le mau lea ia Iesu.” (Faaa. 19:10) O na valoaga ua faailoa manino mai ai o ia ma faasino ai i vala o le fuafuaga a le Atua e faatatau ia te ia lea e matuā faagaeetia ai i tatou i aso nei.

 MEA UA FOLASIA E VALOAGA

3. (a) I le valoaga i le Kenese 3:14, 15, o ai ua suitulaga i “le gata”? “Le fafine”? ‘Le fanau a le gata’? (e) Aisea e fiafia tele ai auauna a Ieova i le ‘tuimomomoina o le ulu o le gata’?

³ O le uluai o na valoaga sa tautalagia ina ua mavae le fouvalega i Etena. Sa aofia ai le faasalaga na faaleoina atu e Ieova i le gata. Na fetalai Ieova: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kene. 3:14, 15) O le ā sa uiga i ai? I le taimi atofa a le Atua sa faamanino ma faalauteleina ai e isi valoaga. O le iuga, ua tatou iloa o lē na faaleo i ai, e pei ona suitulaga i le gata, o Satani le Tiapolo. O “le fafine,” o le faalapotopotoga faamaoni faalelagi a Ieova lava ia, lea e peiseai o se faletua faamaoni ia te ia. ‘O le fanau a le gata’ e aofia ai agelu ma tagata o ē ua folasia le agaga o le Tiapolo, i latou o ē faasagatau ia Ieova ma ona tagata. Ona o le auala sa faaaogā ai e le Tiapolo le gata i Etena, ua mafai ai ona malamalama mai le valoaga e faapea, o le ‘tuimomomoina o le ulu o le gata’ sa faasino i le faaumatiaga mulimuli ane o lenei atalii fouvale o le Atua o lē na taufaaleaga ia Ieova ma aumaia ai le mafatiaga tele i tagata. Peitai sa avea le faailoaina mai o le “fanau” na te faatinoina le tuimomomoina, o se mealilo paia mo se vaitaimi umi.—Roma 16:25, 26.

4. Sa faapefea ona fesoasoani le gafa o Iesu i le faailoaina o ia o le Fanau folafolaina?

⁴ Ina ua mavae ni nai tausaga e 2,000 o le talafaasolopito o tagata sa saunia ai e Ieova ni auiliiliga atili. Na ia faaalia faapea o le a ui mai le Fanau i le gafa o le aiga o Aperaamo. (Kene. 22:15-18) Ae peitai, o le gafa e agaʻi atu i le Fanau o le a faalagolago e lē na o se faasologa i le itu faaletino ae i le filifiliga a le Atua. E ui lava i le alofa o Aperaamo mo lona atalii o Isamaeli, lea na fanau mai i le teine pologa o Akara,  ae sa maʻoti le fetalaiga a Ieova: “O laʻu feagaiga ou te faatumauina lea ia Isaako, o le a fanau mai e Sara ia te oe.” (Kene. 17:18-21; 21:8-12) Mulimuli ane sa faamautuina lena feagaiga, e lē i le atalii ulumatua o Isaako o Esau, ae ia Iakopo, lea na tupuga mai ai ituaiga e 12 o Isaraelu. (Kene. 28:10-14) Na faaalia mulimuli ane faapea o le a fanau mai le Fanau i le ituaiga o Iuta, i le aiga o Tavita.—Kene. 49:10; 1 No. 17:3, 4, 11-14.

5. E oo foi i uluai taimi o le faiva faalelalolagi a Iesu, o le ā le isi mea sa faamaonia ai o ia o le Mesia?

⁵ A o lumanai le sili atu i le 700 tausaga, sa taʻua e le Tusi Paia e faapea o Peteleema o le nofoaga lea e fanau mai ai o se tagata le Fanau ae sa faaalia ai foi faapea o ia o se tasi o lē na muai iai “talu mai ona po o le vavau,” talu le taimi na foafoaina ai o ia i le lagi. (Mika 5:2) O le taimi o lona aliai mai i le lalolagi o Lē Faauuina a Ieova, le Mesia, sa valoia e ala i le perofeta o Tanielu. (Tani. 9:24-26) Ma ina ua faauuina o ia i le agaga paia, sa faailogaina o ia e se leo mai le lagi. (Mata. 3:16, 17) O lea, ina ua avea o se soʻo o Iesu, sa mafai ona faapea mai ma le maumauai Filipo: “Ua matou maua o ia le ua tusia e Mose i le tulafono, atoa ma le au perofeta, o Iesu lea, o le atalii [fai] o Iosefa, o le Nasareta.”—Ioa. 1:45.

6. (a) Ina ua mavae le maliu o Iesu, o le a sa faatoʻā iloa e ona soʻo? (e) O ai tonu lava le ‘fanau a le fafine,’ ma o le ā le uiga o lona tuimomomoina o le ulu o le gata?

⁶ Mulimuli ane i lea, sa faatoʻā iloa e soʻo o Iesu faapea e mautinoa e anoanoai faasinoga faavaloaga ia te ia ua felavasai i le Tusi Paia faagaeeina. Ina ua mavae lona maliu ma toetu mai, sa totino ona ia ‘faamatala ia te i latou o mea ua tusia ia te ia i Tusi uma.’ (Luka 24:27) Ua aliai mai nei faapea o Iesu, o le autū lea o le ‘fanau a le fafine,’ o lē na te tuimomomoina le ulu o le “gata” i se tulaga e iu i le nutipalaina ai o Satani e lē toe iai. E ala ia Iesu o le  a faataunuuina ai folafolaga uma a le Atua i tagata, o mea uma ia ua loa ona tatou momoo i ai.—2 Kori. 1:20.

7. E faaopoopo i le faailoaina o lē ua faasino i ai nei valoaga, o le ā le isi mea e aogā ona iloiloina?

⁷ Ina ua e uluai faitauina nisi o nei valoaga atonu sa e tau fesili, e pei ona sa faia e le eunuka Aitiope, “Ua fai mai lenei mea e le perofeta ia te ai?” Peitai e leʻi tuu faapaganoaina ai e le eunuka le mataupu ina ua ia maua le tali. Ina ua maeʻa ona faalogologo ma le faaeteete i le faamalamalamaga na avatu e Filipo, sa lagona e le tamaloa faapea o le sapaitalia o le auala na faataunuu ai e Iesu le valoaga sa manaomia ai sana gaoioiga, e ala i le papatisoina o ia. (Galu. 8:32-38; Isa. 53:3-9) Po o tai faapena la tatou tali atu? I nisi taimi o le auala ua aaoina ai se valoaga e uunaia loloto ai i tatou, pe atonu e pāʻia ai o tatou loto i faaiuga ua oo i ai le Tusi Paia lava ia pe a faasinoina mai le faataunuuga.

8. E fa faaaoaoga faavaloaga e uiga ia Iesu Keriso ua iloiloina i inei. Ia talanoaina fesili ma mau ua saunia e faaalia ai pe faapefea ona aafia i tatou i nei valoaga. Iloilo taitasi.

⁸ Seʻi mātau lenei tulaga i folafolaga faavaloaga ma faaaoaoga o loo mulimuli mai e faatatau ia Iesu Keriso. Ua fuafuaina fesili mo oe e taliina faatasi ma le fesoasoani a nei mau.

(1) E faapefea i le faamaumauga e faatatau i le taumafai o Aperaamo e ofoina atu Isaako ona fesoasoani ia i tatou e sapaitalia le mea na faia e Ieova i le saunia o le togiola e ala i lona Alo? (Ioa. 3:16; Kene. 22:1-18 [matau pe ua faapefea ona faamatalaina Isaako i le Ke 22 fuaiupu e 2.])

O le ā le mautinoa e ao ona aumaia e lenei mea ia i tatou? (Roma 8:32, 38, 39)

Ae o le ā ua manaomia mai ia i tatou? (Kene. 22:18; Ioa. 3:36)

(2) I le mataulia o Iesu o le perofeta e pei o Mose, o le ā le avega tauave matuia ua fafagu mai e le Tusi Paia ia i tatou? (Galu. 3:22, 23; Teu. 18:15-19)

 O ā nisi o mea na saunoa mai ai Iesu ia i tatou, ma aisea ua fetaui lelei ai i le taimi nei? (Mata. 28:18-20; 19:4-9; 18:3-6)

(3) Ina ua faamatalaina le mea sa faaatagia e le faiva faaositaulaga a Arona, o ā uiga faagaee loto o Iesu i le avea o se ositaulaga sili ua tatai i ai manatu e le Tusi Paia? (Epe. 4:15–5:3; 7:26-28)

E ao la faapefea ona tatou lagona e uiga i le faalatalata atu i le Atua i le tatalo e ala ia Keriso mo le fesoasoani ia foia ai o tatou vaivaiga?

(4) A manatu i le maoae o le taulaga a Iesu (na suia ai taulaga uma na ofoina i lalo o le Tulafono faa-Mose), aisea e tatau ai ona tatou matuā faaeteete ia alofia le masani o le faia o so o se mea tatou te iloa e lē fiafia i ai le Atua? (Epe. 10:26, 27)

Afai tatou te sapaitalia moni le faamoemoe mo le ola ua mafaia ona o le taulaga a Iesu, o ā la mea o le a tatou tinou e fai? (Epe. 10:19-25)

E MAFAI FAAPEFEA ONA TATOU FAAALIA LO TATOU FAATUATUA IA KERISO?

9. Aisea ua aunoa ai se faaolataga mo i tatou e ese mai ia Iesu Keriso?

⁹ Ina ua maeʻa ona faasino atu i le faamasinoga sili i Ierusalema le auala na faataunuuina ai valoaga ia Iesu, sa taaofaia ma le malosi e le aposetolo o Peteru i le faapea mai: “E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.” (Galu. 4:11, 12; Sala. 118:22) Ua agasala uma le fanau a Atamu, o lea ua oo mai ai lo latou oti o se faasalaga mo le agasala ma ua aunoa ai ma se mea e fai ma togiola mo so o se tasi. Peitai sa lelei atoatoa Iesu, ma o le tuuina i lalo o lona ola ua iai ni aogā faataulaga. (Sala. 49:6-9; Epe. 2:9) Na ia ofoina atu i le Atua se togiola e feagai tonu lava ma le tāua o le mea na leiloa ia Atamu mo ana fanau. Ua aogā faapefea lenei ia i tatou?—1 Timo. 2:5, 6.

10. Faamatala se tasi o auala ua aogā tele ai le taulaga a Iesu ia i tatou.

¹⁰ Ua mafai ona tatou maua se loto fuatiaifo mamā  ona o le faamagaloina o agasala—o se mea e sili mamao atu e lē taitai ona maua e Isaraelu e ala i taulaga o manu i lalo o le Tulafono faa-Mose. (Galu. 13:38, 39; Epe. 9:13, 14) E moni, o le mauaina o lenei mea, e manaomia ai ona tatou faamaoni ia i tatou lava ma ia ia i tatou le faatuatua moni ia Iesu Keriso. Pe tatou te talisapaia totino le tele tatou te manaomia ai le taulaga a Keriso? “Afai tatou te faapea, E leai sa tatou agasala, ua sese ai i tatou ia i tatou, e le o i totonu ia te i tatou le upu moni; a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.”—1 Ioa. 1:8, 9.

11. Aisea o se itu tāua ai le faatofuina i le vai i le mauaina o se loto fuatiaifo lelei i le Atua?

¹¹ O le mea moni, o nisi o ē faapea mai ua latou iloa o i latou o tagata agasala ma tautino e talitonu ia Keriso, o ē ua talanoa foi i isi e faatatau i le Malo o le Atua e pei ona sa faia e Iesu, ae peitai ua lē atoatoa le faatuatua ia Iesu. I le ā le auala? Ia, e pei ona faailoa mai i le Tusi Paia, ina ua avea moni tagata o le uluai senituri ma ē talitonu, sa faapefea ona latou faaalia i le lautele lea mea? Sa papatisoina i latou. Aisea? Auā sa faatonuina e Iesu faapea e tatau i soʻo ona papatisoina. (Mata. 28:19, 20; Galu. 8:12; 18:8) Pe a matuā uunaia le loto o se tagata e le sauniuniga alofa na faia e Ieova e ala ia Iesu Keriso, o le a lē toe taofiofia o ia. O le a ia faia so o se fetuutuunaiga manaomia i lona olaga, tuuina atu ia lava i le Atua ma faailogaina lenei i le faatofuina i le vai. E pei ona folasia e le Tusi Paia, o le faaalia o le faatuatua i lenei auala ua ia ‘talosaga atu ai i le Atua mo se loto fuatiaifo lelei.’—1 Pete. 3:21.

12. Afai tatou te iloa ua tatou agasala, o le ā e tatau ona tatou faia i ai, ma aisea?

¹² E moni, e mulimuli ane i lena, o le a aliai pea uiga agasala. Ona ā lea? Na taʻua e le aposetolo o  Ioane: “Ou te tusi atu nei mea ia te outou, ina neʻi agasala outou.” O lea e lē tatau ona tatou manatu māmā ia tatou agasala, pe folasia i gaoioiga, i upu e tautatala ai po o uiga. “Pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava.” (1 Ioa. 2:1, 2) Po o lona uiga ea, e tusa lava po o le ā tatou te faia, ae afai tatou te tatalo i le Atua, e ‘Faamagalo mai i a matou agasala,’ o le a sologa lelei ai mea uma? E leai. O le ki i le faamagaloga, o le salamō moni. Atonu e manaomia foi le fesoasoani mai toeaina i le faapotopotoga Kerisiano. E ao ona tatou iloa le sese o le mea na fai, ma lagona moni le faanoanoa ona o lea, ina ia tatou faia ai se taumafaiga naunautai e alofia lona toe faia. (Galu. 3:19; Iako. 5:13-16) E mafai ona tatou mautinoa le fesoasoani a Iesu, pe afai tatou te faia lena mea. I le faavae o lo tatou faatuatua i le tāua o lana taulaga e togiolaina ai agasala, e mafai ai ona toe faafoisia i le finagalo malie o Ieova, ma e matuā tāua lenei ina ia talileleia ai la tatou tapuaiga ia te ia.

13. (a) Faamatala se isi auala ua aogā ai le taulaga a Iesu ia i tatou. (e) Aisea ua lē o se taui ai lenei mea i la tatou auaunaga i le Atua? (i) Peitai afai e ia i tatou moni le faatuatua, o le ā o le a tatou faia?

¹³ Ua tatalaina foi ia i tatou e le taulaga a Iesu le avanoa mo le ola e faavavau—i le lagi mo le “lafu mamoe itiiti,” ma i le lalolagi Parataiso mo le faitau piliona o isi tagata. (Luka 12:32; Faaa. 20:11, 12; 21:3, 4) Ua lē o se taui lenei o a tatou galuega. E tusa lava po o le ā le tele tatou te faia i le auaunaga ia Ieova, ae e lē mafai ona tatou atiina aʻe ai ni aogā e faapea ai ua nofo aitalafu le Atua ia i tatou i le ola. O le ola e faavavau “o le mea foaifuaina mai lea e le Atua, i lo tatou Alii o Keriso Iesu.” (Roma 6:23; Efe. 2:8-10) Ae e lē gata i lea, afai e ia i tatou le faatuatua  i lena meaalofa ma le sapaitalia ona o le auala na faataulauina ai, o le a tatou folasia atu ai lenei mea. I le utagiaina o le auala ofoofogia sa faaaogā ai e Ieova Iesu i le faataunuuina o Lona finagalo ma le matuā tāua ia i tatou uma ona mulimulitui i tulaga aao o Iesu, o le a tatou faatino ai le faiva faa-Kerisiano o se tasi o mea e aupito sili ona tāua i o tatou olaga. O le a faamaonia lo tatou faatuatua mai le malosi o le talitonuga ua tatou taʻu atu ai i isi e faatatau i lenei meaalofa matagofie a le Atua.—Faatusatusa i le Galuega 20:24.

14. E faapefea ona iai ni āuga autasi o sea faatuatua ia Iesu Keriso?

¹⁴ Maeu ni āuga lelei, ma le autasi ua i sea faatuatua! E ala i lea ua tatou tosina vavalalata ai ia Ieova, i lona Alo, ma i isi taitoatasi i totonu o le faapotopotoga Kerisiano. (1 Ioa. 3:23, 24) Ua mafua ona tatou olioli ona ua foaiina atu ma le agalelei e Ieova i lona Alo “le suafa e silisili i suafa uma lava [vagana le suafa o le Atua]; ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi; ma ia taʻutaʻu atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tamā.”—Fili. 2:9-11.

Talanoaga Autalu

● Ina ua aliali mai le Mesia, aisea na manino ai i ē sa talitonu moni i le Afioga a le Atua po o ai o ia?

● E ao faapefea i le faataunuuga o faaaoaoga faavaloaga ia Iesu, e pei ona matauina i le itulau e 34, ona aafia ai i tatou?

● I ā auala ua aogā ai le taulaga a Iesu ia i tatou? E mafai faapefea ona faaalia i ai lo tatou sapaitalia?

[Fesili mo le Suʻesuʻega]

 [Pusa i le itulau 34]

FAAAOAOGA FAAVALOAGA E FAATATAU IA IESU—E Ao Faapefea ona Aafia ai Oe?

Ofoina atu e Aperaamo Isaako

O Mose o se fofoga fetalai a le Atua

O Arona o se ositaulaga sili

Taulaga i manu