Mataupu 14

‘Ou te Osia se Feagaiga ma Outou mo se Malo’

1. I le po a o lumanai le maliu o Iesu o le ā le faamoemoe na ia faataatia mo ona aposetolo?

I LE po a o lumanai le maliu o Iesu na ia fetalai atu ai i ona aposetolo faamaoni e faapea: ‘E tele mea e nonofo ai i le maota o loʻu Tamā. Ou te alu e sauni se nofoaga mo outou, ina ia iai foi outou i le mea ou te iai aʻu.’ Na ia fetalai atu atili ia i latou: “Ou te osia se feagaiga ma outou, e pei ona osia e loʻu Tamā se feagaiga ma aʻu, mo se malo.” (Ioa. 14:2, 3; Luka 22:29, NW) Maeu se faamoemoe ofoofogia ua tuu atu mo i latou!

2. E toafia o le a auai faatasi ma Keriso i lona Malo faalelagi?

² Peitai, sa leʻi faauigaina e Iesu faapea e na o aposetolo nā o le a pule faatasi ma ia i lona Malo faalelagi. Mulimuli ane sa faalauiloaina faapea e 144,000 ē ua faatauina nai le lalolagi o le a maua lena faaeaga sili. (Faaa. 5:9, 10; 14:1, 4) Po o iai ea nisi o aapa atu ina ia maua lea taui i aso nei?

AOAOINA SULI O LE MALO

3. I lana faiva i le lautele, o le ā le avanoa na tatai atu i ai manatu e Iesu?

³ Ina ua mavae le faafalepuipuiina o Ioane le Papatiso e Herota Anetipa, ona faatino ai lea e Iesu se tauiviga malosi o le talaʻiga i le lautele lea na ia taulai atu ai manatu i “le malo o le lagi.” (Mata. 4:12, 17) Na ia faaali atu i tagata e faapea o le a iai le avanoa mo i latou e ulu atu ai i lena Malo, ma sa aapa atu ma le filigā ona soʻo mo lena taui.—Mata. 5:3, 10, 20; 7:21; 11:12.

4. (a) O anafea na faauuina ai uluai soʻo o Iesu i le agaga paia? (e) O le ā e faaalia ai na amata mai i inā ona taulai atu le faautaga i le aoaoina o suli o le Malo?

 ⁴ I le Penetekoso o le 33 T.A. na faauuina ai le uluai vaega o i latou na i le agaga paia. (Galu. 2:1-4; 2 Kori. 1:21, 22) Ua folasia ai le sauniuniga a le Atua mo le faaolataga e taitaia i le ola faalelagi e lē toe mafai ona oti. Sa faaaogā e Peteru “ki o le malo o le lagi” e tatalaina ai lenei malamalamaga—muamua i tagata Iutaia, sosoo ai i tagata Samaria, ma mulimuli ane i tagata o Nuu Ese. (Mata. 16:19) Sa tuuina atu le faautaga faapitoa i le faatuina aʻe o le pulega lea o le a puleaina tagata mo tausaga e 1,000, ma toetoe lava o tusi faagaeeina uma i Tusitusiga Kerisiano Eleni o loo faaautu ona taulai atu i lenei vaega o suli o le Malo—“le au paia,” o “e ua tofutofusia i le valaau mai le lagi.” *

5. Pe na valaauina i latou i le ola faalelagi ona o i latou o ni auauna a le Atua ua sili atu ona lelei i lo ē na soifua muamua?

⁵ O lo latou valaauina i le ola faalelagi ua lē faapea ai ua sili atu ona lelei i latou na i lo o isi auauna uma a le Atua o ē na maliliu a o lumanai le Penetekoso o le 33 T.A. (Mata. 11:11) Na i lo lena, sa amata i lena taimi ona filifilia e Ieova i latou o ē o le a avea ma pule lagolago faatasi ma Iesu Keriso. Pe tusa ma le 19 senituri ina ua mavae lenei mea, ae sa na o le tasi lava le valaau, o le valaau lea mo le lagi. O le alofa tunoa lea o le Atua na faatoto ifo i se numera  faatapulaa i le faalauteleina o ana lava fuafuaga atamai ma le alofa.—Efe. 2:8-10.

6. (a) Aisea e tatau ai ona oo mai le taimi e tapunia ai le valaau faalelagi? (e) O ai na te faatautaia mataupu ina ia faataunuuina foi le valoaga e faatatau i le “motu o tagata e toatele,” ma o le ā moni le mea ua tupu?

⁶ A o faagasolo le taimi sa atoa ai le numera faatapulaa faamaumauina o le 144,000. Ua lamalama faaiu nei le faamaufaailogaina mulimuli o nei Isaraelu faaleagaga o ē ua faamaonia. (Faaa. 7:1-8) Ona faatautaia loa lea e Ieova le tulaga o mea, e ala i lona agaga ma le malamalamaga o lana Afioga ua ia faaavanoa mai mo lana faalapotopotoga vaaia, ina ia faataunuuina le isi vaega o lana fuafuaga, e pei ona faamatala i le Faaaliga 7:9-17. O le a aoaoina se “motu o tagata e toatele” mai atunuu uma, faatasi ma le faamoemoe faamaniti tino o le faasaoina i le puapuaga tele ma ola e faavavau i se tulaga lelei atoatoa i totonu o se Parataiso faalelalolagi. Pe a tatou iloiloina le mea moni ua tupu, e foliga mai e faamaonia ai faapea o le valaau faalelagi i le lautele na faaatoaina e tusa o le tausaga e 1935 T.A., ina ua iloa manino le faamoemoe faalelalolagi o le “motu o tagata e toatele.” Talu mai lena taimi sa aumai ai i le aufaatasiga o nai afe o ē totoe o le vasega faalelagi, le faitau miliona o tagata tapuai o Ieova o ē faamoemoe ma le naunautai e ola e faavavau i inei lava i le lalolagi.

7. Pe e mafai e oo lava i aso nei ona maua e nisi le valaau faalelagi, ma aisea ua e tali mai ai faapea?

⁷ Po o lona uiga la ua lē o toe valaauina nei se tasi e le Atua mo le ola faalelagi? Seia oo atu ina maeʻa le faamaufaailogaina mulimuli, e mafai lava ona lē faamaoni sina toaitiiti o ē ua iai lea faamoemoe, ma o le a manaomia ai loa ona filifilia isi e suia lo latou tulaga. Peitai e aliali mai e tatau ona seāseā tupu lenei mea.

ATALII FAALEAGAGA —E FAAPEFEA ONA LATOU ILOA?

8. O le ā le faamalamalamaga ua avatu e Paulo e faaalia ai pe faapefea ia i latou ua faauuagagaina ona nofouta i lena mea moni?

⁸ E avatu e le agaga o le Atua le faamautinoaga maumaututu o le avea ma tamafai faaleagaga i  Kerisiano papatisoina o ē ua maua le valaau faalelagi. Sa faailoa atu lea e le aposetolo o Paulo ina ua ia tusi atu i le “au paia” i Roma, e faamatalaina i ai le tulaga sa iai Kerisiano moni uma i lena taimi. Na ia taʻua e faapea: “O i latou uma ua taʻitaʻiina e le Agaga o le Atua, o atalii i latou o le Atua. Auā ua outou le maua le agaga o le pologa, e toe fefefe ai; a ua outou maua le Agaga o tamafai, tou te valaau atu ai, ‘Ava, le Tamā e!’ O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.”—Roma 1:7; 8:14-17, LF.

9. E faapefea ona ‘molimau lea lava Agaga’ i agaga o i latou o atalii moni o le Atua?

⁹ E lua faaaogāina o le upu “agaga” ua faamanatu mai ia i tatou i inei: o “lea lava Agaga” ma “o tatou agaga.” O le agaga muamua o le malosi galue lē vaaia lea o le Atua. Ua ia faagaeeina i totonu o ana fanau faaleagaga se faamautinoaga o le fai ma tamafai ina ia avea ma fanau saoloto a le Atua. Ua molimau foi lena agaga e ala i le Afioga faagaeeina a le Atua, le Tusi Paia, lea e pei o se tusi totino i lana fanau faaleagaga. (1 Pete. 1:10-12) A faitau i latou o ē ua faauuagagaina i le mea ua fai mai ai le Tusi Paia ia i latou o atalii faaleagaga o le Atua, latou te tali atu ma le tonu: ‘E faatatau lena ia te aʻu.’ O lea ua molimau ai le malosi galue o le Atua lava ia i auala eseese i o latou agaga, le malosi e uunaia ai o latou mafaufau ma loto, faapea o i latou o fanau a le Atua. I le ogatasi ma le mea ua faaalia faapena e le agaga o le Atua, ua mausali ai o latou mafaufau ma loto i le faamoemoe o le fai ma suli faatasi ma Keriso, ma ua latou talia ai avega tauave o fanau faaleagaga a le Atua.—Fili. 3:13, 14.

10. (a) O ā vala e lē faalagolago i ai le faailogaina o se tasi o se Kerisiano faauuina? (e) O le ā le vaaiga ua iai i “isi mamoe” e faatatau i lo latou tulaga i le fuafuaga a le Atua?

 ¹⁰ Pe moni ea lena mea ia te oe? Afai o lea, ua ia te oe la se faaeaga matagofie. Peitai, o se mea sese ona faaiua e so o se tasi faapea ona o loo iai i se tagata le talisapaia naunau mo mea loloto faaleagaga po o loo maelega i le faiva i le fanua pe naunau foi lona alofa mo ona uso, ona tatau ai lea ona avea o ia ma Kerisiano faauuagagaina. O na mea ua iloga ai le toatele o “isi mamoe.” Ua ootia foi o latou loto i mea ua latou faitau ai i le Tusi Paia e faatatau i suli faatasi ma Keriso, ae latou te lē tagisā e talosagaina mo i latou lava se mea ua lē o taofia e le Atua mo i latou. (Faatusatusa i le Numera 16:1-40.) Latou te amanaia le uluai fuafuaga a le Atua mo le lalolagi ma galulue ma le talisapaia ina ia auai i lena fuafuaga.

TAGOFIA TATAU

11. O ai e auai i le faamanatuina faaletausaga o le maliu o Iesu, ma aisea?

¹¹ I tausaga taitasi, ia Nisani 14, pe a goto le la, e faamanatu ai e soʻo faauuina o Iesu Keriso i vaega uma o le lalolagi lona maliu, ina ia ogatasi ma faatonuga na ia avatua i ona aposetolo. (Luka 22:19, 20) E auai foi “isi mamoe,” e lē o ni ē tagofia le areto ma le uaina, ae o ē maimoa ma le faaaloalo.

12. Sa lē taulau faapefea nisi uluai Kerisiano i Korinito i le faaalia o le talisapaia tatau mo le Talisuaga Afiafi a le Alii?

¹² E lē o se aganuu faalelotu e lē aogā lenei faiga, ae peitai e faatumulia i uiga malolosi. I Kerisiano o le uluai senituri i le aai o Korinito, i Eleni, na tusi atu ai e le aposetolo o Paulo se fautuaga malosi i nisi sa lē taulau ona faaalia le talisapaia tatau mo lenei faatasiga e faapea: “Ai sē ʻai i lenei areto, pe inu i le ipu a le Alii ma le faaletatau, e nofo sala o ia i le tino ma le toto o le Alii.” O le ā ua avea ai i latou ma ē tagofia  ‘faaletatau’? Sa latou leʻi saunia lelei i latou i le loto ma le mafaufau. Na iai fevaevaeaiga i le faapotopotoga. O nisi foi sa soona aai ma feinu a o leʻi faia le sauniga. Sa lē amanaia e i latou le Talisuaga Afiafi a le Alii. Latou te leʻi ausia le tulaga e mafai ona utagia ai le uiga tāua o le areto ma le uaina.—1 Kori. 11:17-34.

13. O le ā le uiga o le areto ma le uaina ua laulauina i le Faamanatuga?

¹³ O le ā lena uiga? Ua lē faauiga lea i suiga faavavega o le areto ma le uaina. E lē faapea e toe faataulagaina Keriso i so o se uiga i Faamanatuga taitasi. Ua taʻua i le Tusi Paia e faapea o “Keriso, ua tasi lava ona avatua o ia ma taulaga, ina ia aveina ai agasala a le toatele.” (Epe. 9:28; 10:10; Roma 6:9) O le areto lē faafefeteina ma le uaina mūmū ua na o ni faatusa ia e suitulaga i le tino faaletino na faataulagaina o Iesu ma lona toto moni na ia sasaa atu. Peitai maeu le tautele o nei mea moni! Na foai atu le tino lē agasala o Iesu ina ia mafai ai e le lalolagi o tagata ona maua le avanoa e ola ai e faavavau. (Ioa. 6:51) Ma o lona toto masaa ua faataunuuina ai se fuafuaga valalua—ina ia faamamāina mai le agasala tagata o ē faatuatua i ai, atoa ma le faagaoioia o le feagaiga fou i le va o le Atua ma le faapotopotoga o le Isaraelu faaleagaga, lea ua faia aʻe i Kerisiano faauuagagaina. (1 Ioa. 1:7; 1 Kori. 11:25; Kala. 6:14-16) O sauniuniga tautele la ia ua mafai ona tauamiotonuina ai e le Atua sui o le “lafu mamoe itiiti,” ma tauia i latou i le lelei atoatoa faaletagata. (Luka 12:32) Ua faia lenei mea ina ia mafai ai ona faauuagagaina i latou o ni atalii o le Atua, ina ia latou auai ma Keriso i lona Malo faalelagi. A o latou tagofia faatusa o le Faamanatuga i tausaga taitasi, ua fai lea ma molimau i lo latou faamoemoe faalelagi, ua faafouina ai ma faalolotoina atili ai lo latou sapaitalia o le iai i le  “feagaiga fou” ua puluvagaina e Keriso.—Epe. 8:6-12.

“TATOU TE O MA OUTOU”

14. (a) Aisea e lē tagofia ai e “isi mamoe” faatusa o le Faamanatuga, ae o le ā ua latou faatalitalia ma le naunautai? (e) E faapefea ona latou manatu i la latou mafutaga ma le vaega totoe o suli o le Malo?

¹⁴ Ua utagia e “isi mamoe” le auala o loo feagai ai Ieova ma lana au faauuina, ona latou faatasi atu lea ma i latou, i le faapea atu: “Tatou te o ma outou; auā ua matou faalogo, o loo ia te outou le Atua.” (Saka. 8:20-23) E lē gata ina latou potopoto faatasi ae ua latou fegalegaleai faatasi i le faalauiloaina o le tala lelei o le Malo i le atu laulau uma. Peitai, e lē auai “isi mamoe” i le “feagaiga fou” ma le Isaraelu faaleagaga ma latou te lē aofia foi i le “feagaiga . . . mo se malo” lea na osia e Iesu ma ē ua filifilia e auai ma ia i le ola faalelagi, o lea la, ua talafeagai ai ona latou lē tagofia faatusa o le Faamanatuga. (Luka 22:20, 29) Peitai a o ausia e le “feagaiga fou” lana fuafuaga, o le aoaoina lea o sui mulimuli o le “lafu mamoe itiiti” i le Malo faalelagi, ua iloatino e “isi mamoe” faapea e faaalia ai i lenei itu ua lalata mai faamanuiaga o le a latou maua i le lalolagi e ala i lena Malo. Latou te manatu, o se faaeaga le auauna autasi ma le vaega totoe faamaoni o suli o le Malo i nei “aso e gata ai.”

[Faaopoopoga i lalo]

Talanoaga Autalu

● Aisea ua taulai atu ai le tele o manatu o Tusitusiga Kerisiano Eleni i le faamoemoe faalelagi?

● E faapefea ona iloa lena mea e i latou ua faauuagagaina o atalii o le Atua? O le ā le uiga o faatusa o le Faamanatuga ia o loo latou tagofia?

● E faapefea ona faaalia e “isi mamoe” latou te aufaatasi moni lava ma le “lafu mamoe itiiti”?

[Fesili mo le Suʻesuʻega]