Taofi Mau i le Afioga a le Atua
Mataupu 3
Taofi Mau i le Afioga a le Atua
1. (a) Sa faapefea ona iloa e Isaraelu anamua le faamaoni o le Afioga a le Atua? (e) Aisea tatou te naunau ai i lena mea?
“UA OUTOU iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou.” O le toe faamanatu atu lenei a Iosua i toeaina o Isaraelu ina ua latou nofoia le Nuu Folafolaina. Ae i tausaga mulimuli ane ai latou te leʻi faaauau pea ona ave i fale le Afioga a le Atua ma faatinoina. O le ā na iu i ai? Ua faamanino mai e le Tusi Paia faapea e pei ona mau faatuatuaina le faamaoni o folafolaga o faamanuiaga a Ieova, o lea foi, sa ia faataunuuina ai mea sa ia fetalai i ai e faatatau i āuga o le lē usiusitai. (Iosua 23:14-16) O lena faamaumauga, ma isi uma tala o i le Tusi Paia, sa faasaosaoina mai mo le aʻoaʻoina o i tatou—ina ia “tatou maua le faamoemoe” ma tatou lē faia ai se mea tatou te ono meleina ai lena faamoemoe.—Roma 15:4.
2. (a) O le ā le uiga faapea o le Tusi Paia e “mai le Agaga o le Atua”? (e) I le iloaina o lenei manatu, o le ā la le avega tauave ua ia i tatou?
2 E ui e tusa ma le 40 “failautusi” faaletagata na faaaogā e tusia le Tusi Paia, ae o Ieova lava ia o lona Tusitala lea. Po o lona uiga sa ia matuā gaoioi e faatonutonu le tusia o mea uma ua iai i totonu? Ioe. E pei ona taʻua ma le faamaoni e le aposetolo o Paulo, “O Tusi Paia uma lava e mai le Agaga o le Atua ia.” I le mautinoa o lena, tatou te uunaia ai tagata i so o se mea ina ia utagia ma atiina aʻe o latou olaga i mea ua tusia ai, e pei lava foi ona tatou taumafai e fai.—2 Timo. 3:16; 1 Tesa. 2:13.
O LE Ā E FESOASOANI I ISI E TALISAPAIAINA?
3. O le ā le auala e sili ona lelei e fesoasoani ai i le toatele o i latou o ē e lē talitonu faapea o le Tusi Paia o le Afioga a le Atua?
3 E moni, o le toatele o ē tatou te talanoa, e lē auai i lo tatou talitonuga faapea o le Tusi Paia o le Afioga moni a le Atua. E mafai faapefea ona tatou fesoasoani ia i latou? E masani lava, o le auala e sili ona lelei o le tatala lea o le Tusi Paia ma faaalia ia i latou mea o loo iai. “O loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu . . . o loo faamasino foi i manatu ma filifiliga o le loto.” (Epe. 4:12) O “le afioga a le Atua” o ana fetalaiga ia o folafolaga, ua faamauina i le Tusi Paia. E lē o se talafaasolopito mate ae o loo ola ma ua agaʻi atu ma le lē mataofia i le faataunuuga. A o ia faia faapea, ua folasia ai uunaiga moni i loto o tagata o ē ua aumaia e fesootai ma ia i le ausiaina o tuutuuga. E sili atu ona malolosi ona aafiaga i lo so o se mea atonu tatou te faaupuina totino.
4. O ā faamalamalamaga faigofie o upu moni o le Tusi Paia ua suia ai lagona o nisi tagata i le Tusi Paia? Aisea?
4 Ua o se tai liliu i le toatele o tagata le tau ā ina vaai i le suafa o le Atua i totonu o le Tusi Paia. O isi ua filifili e suesue le Tusi Paia ina ua faaalia i ai le mea ua ia taʻua e uiga i le fuafuaga o le olaga, le pogai ua faataga ai e le Atua le amioleaga, le uiga o taualumaga o iai nei po o le faamoemoe moni ua faaautu i le Malo o le Atua. I atunuu ua tatalaina ai e gaoioiga a lotu le mau faasoesa a agaga leaga i tagata, o le faamalamalamaga a le Tusi Paia i lona mafuaaga ma le faapefea ona maua mai ai se mapusaga ua faaosofia ai le naunau. Aisea ua mataina ai nei manatu ia i latou? Auā o le Tusi Paia ua na o lea le puna o faamatalaga faatuatuaina i nei mataupu matuā tāua.—Sala. 119:130.
5. Pe a fai mai se tagata o ia e lē talitonu i le Tusi Paia, atonu o le ā le mafuaaga? E ono mafai faapefea ona tatou fesoasoani ia te ia?
5 Ae peitai, e faapefea pe a taʻu saʻo mai e se tagata ia i tatou faapea o ia e lē talitonu i le Tusi Paia? Pe tatau i lea itu ona faamuta ai le talanoaga? E leai pe afai e loto malie o ia e talanoa. E ao ona tatou lagona o se avega tauave le tautala atu ma le mautinoa e fai ma sui o le Afioga a le Atua. Atonu ua ia manatu faapea o le Tusi Paia o le tusi a Kerisinetoma. O le talaaga o le faagutugutulua o Kerisinetoma ma le aiā i faiga faapolotiki, atoa ma le suʻe tupe soo, atonu o le mafuaaga lea o lona uiga musuā i le Tusi Paia. Aisea e lē fesili atu ai po o le mafuaaga lena? O le tausalaina e le Tusi Paia o ala faalelalolagi o Kerisinetoma, ma manatu e tuufaafeagai i le va o Kerisinetoma ma le Faa-Kerisiano moni, atonu o le a faaosofia ai lona naunau.—Faatusatusa i le Mataio 15:7-9; Iakopo 4:4; Mika 3:11, 12.
6. (a) O le ā ua faatalitonuina totino oe faapea o le Tusi Paia o le Afioga a le Atua? (e) O ā isi faamatalaga e mafai ona faaaogā e fesoasoani ai i tagata e talisapaia faapea o le Tusi Paia e moni e mai le Atua?
6 Mo isi, e aogā i ai se talanoaga tuusao o faamaoniga o le faagaeeina o le Tusi Paia. O le ā ua faamaonia manino ai ia te oe faapea o le Tusi Paia e mai le Atua? Pe ona o mea ea ua taʻua e le Tusi Paia lava ia e faatatau i lona amataga? (2 Timo. 3:16, 17; Faaa. 1:1) Po ona o le mea moni faapea e anoanoai valoaga ua i le Tusi Paia e atagia ai le malamalamaga loloto e uiga i le lumanai, ua tatau ai la i nei valoaga ona aumaia mai se puna maoae na i lo le tagata? (2 Pete. 1:20, 21; Isa. 42:9) Pe e lē atonu ona o le autasi i totonu o le Tusi Paia lava ia, e ui ina sa tusia e le toatele o tane i se vaitaimi e 1,610 tausaga? Po o lona saʻo aʻiaʻi ea faasaienisi i le faaeseesega ma isi tusitusiga mai na taimi? Po o le tautala saʻo o ona tusitala? Po ona o lona faasaoina mai taumafaiga matuitui e faatamaia? So o se mea ua mataina ia te oe e mafai foi ona faaaogā lea e fesoasoani ai i isi tagata.
LA TATOU FAITAUGA TOTINO O LE TUSI PAIA
7, 8. (a) O le ā e ao ia i tatou taitoatasi ona faia i le Tusi Paia? (e) O le ā tatou te manaomia e faaopoopo i le faitauina totino o le Tusi Paia, ma ua faapefea ona faaalia lea e le Tusi Paia lava ia? (i) Ua faapefea ona e mauaina totino le malamalama i fuafuaga a Ieova?
7 E faaopoopo i le fesoasoani i isi ia talitonu i le Tusi Paia, e manaomia e i tatou foi ona faaavanoaina se taimi mo lona faitauina e lē aunoa. O e faia lena mea? I tusi uma lava ua saunia, e sili atu lava ona tāua lenei tusi. O le mea moni, ua lē uiga ai faapea afai tatou te faitauina o le a tatou lē toe manaomia ai se isi lava mea. Ua lapatai mai le Tusi Paia i le faaesea o i tatou lava, i le manatu faapea e mafai ona tatou fuafuaina mea uma i se sailiiliga tutoatasi. Afai e fia avea i tatou ma Kerisiano paleni e manaomia la le suesue totino ma auai e lē aunoa i sauniga.—Faata. 18:1; Epe. 10:24, 25.
8 Mo lo tatou lelei, ua tautala ai le Tusi Paia e uiga i se ofisa Aitiope o lē na tatai i ai e le agelu le faievagelia Kerisiano o Filipo a o faitauina e le ofisa le valoaga a Isaia. Na fesili Filipo i le tamaloa: “Po ua e lagona ea i mea ua e faitauina?” Na tali mai le Aitiope ma le loto maulalo: “Ou te mafaia faapefea, pe a le faasino mai se tasi ia te au?” Na ia uunaia Filipo e faamatala lea vaega o le Tusi Paia. Sa leʻi avea la Filipo o sē e tutoatasi i le faitauina o le Tusi Paia ina ia avatu ai loa sona taofi e faatatau i le Tusi Paia. E leai; ua faaalia e le tala e faapea na ia tausisia se sootaga vavalalata ma le au aposetolo i le faapotopotoga i Ierusalema ma o ia o se sui o le faalapotopotoga vaaia a Ieova. O lea sa mafai ai ona ia fesoasoani i le Aitiope e maua aogā mai le faatonuga na aumaia e Ieova e ala i lena faalapotopotoga. (Galu. 6:5, 6; 8:5, 14, 15, 26-35) I le talitutusa ma aso nei, o ai o i tatou ua iai se malamalamaga manino ma le saʻo o fuafuaga a Ieova i lana lava taumafaiga? Na i lo o lea, sa tatou manaomia, ma o loo tatou manaomia pea, le fesoasoani ua saunia ma le alofa e Ieova e ala i lana faalapotopotoga vaaia.
9. O ā polokalama o le faitau Tusi Paia e mafai ona aogā mo i tatou uma?
9 Ina ia fesoasoani ia i tatou e faaaogā ma malamalama i le Tusi Paia, ua faasoasoa mai ai pea e le faalapotopotoga a Ieova faamatalaga aupito sili ona lelei faale-Tusi Paia i Le Olomatamata ma lomiga faapena. E faaopoopo i ai, o se faasologa faifai pea o le faitau Tusi Paia ua faatulagaina mo i tatou i le Aʻoga o le Faiva Faatiokarate i faapotopotoga o Molimau a Ieova. O nisi o Molimau a Ieova latou te faia se faitau Tusi Paia faalausosoo e faaopoopo i lenei fuafuaga. E mafai ona tele se aogā e maua mai le taimi ua faaaluina i le iloiloina o le Tusi Paia. (Sala. 1:1-3; 19:7, 8) Po ua e faitauina totino le Tusi Paia atoa? Afai e leai, fai se taumafaiga faapitoa e faia ai faapea. E tusa lava pe e te lē malamalama atoatoa i mea uma, ae o lou mauaina o lona vaaiga aoao o le a tele sona aogā. Afai e te faitauina e tau o le fa i le lima itulau i le aso, o le a e mafai ona faitauina atoa ai le Tusi Paia i le pe tusa o le tausaga.
10. (a) O le ā le taimi e fai ai lau faitau Tusi Paia? (e) Aisea e tāua ai le faia e lē aunoa?
10 O afea e mafai ai ona e fuafua totino e faia lenei faitau Tusi Paia? Afai e mafai ona e faataatia ese e tusa lava pe na o le 10 po o le 15 minute i le aso, maeu le aogā o le a iai! Afai e leai, e ā pe a tau ina fai se faasologa e lē aunoa o taimi mo vaiaso taitasi, ma tausisi i lena faasologa. E ao ona avea le faitau Tusi Paia o se masani i le olaga atoa, e pei o le taumafaina o meaai faaletino. Ua e silafia, afai e faalemanuia le taumafa masani a le tagata, o le a afaina lona soifua maloloina. E faapena foi la lo tatou tulaga faaleagaga. E faalagolago lo tatou ola i le fafagaina e lē aunoa i “afioga uma e tulei mai i le fofoga o le Atua.”—Mata. 4:4.
11. O le ā e tatau ona tatou tulimataia i le faitauina o le Tusi Paia?
11 O le ā e tatau ona tatou tulimataia i le faitauina o le Tusi Paia? O se mea sese pe afai o lo tatou sini le tau ina faitau o se vaega patino o itulau pe tau lava foi ina tatou maua ai le ola e faavavau. Ina ia maua aogā e lē uma, e tatau ona ia i tatou ni uunaiga sili—le alofa mo le Atua, se faanaunauga ia iloa lelei o ia, ia malamalama i lona finagalo ma tapuai ia te ia i se tulaga talileleia. (Ioa. 5:39-42) E tatau i o tatou uiga ona pei o la le tusitala o le Tusi Paia o lē na faapea mai: “Ieova e, ia e faailoa mai ia te au ou ala; ia e aʻoaʻo mai ia te au i ou magāala.”—Sala. 25:4.
12. (a) Aisea e tatau ai ona maua le “poto saʻo,” ma o le ā le taumafaiga atonu e manaomia ia maua ai a o faitauina? (e) E pei ona faaalia i le itulau e 27, mai ā vala e mafai ona tatou auiliiliina ai ma le aogā mea ua tatou faitauina i le Tusi Paia? (i) Faataitai taitasi nei vala e lima, i le taliina o fesili ua saunia i le faaiuga o lenei palakalafa. Ia mautinoa ia faaaogā lau Tusi Paia.
12 A o tatou mauaina lena aʻoaʻoga, e tatau ona avea ma o tatou faanaunauga le maua o le “poto saʻo.” A aunoa ma lea, e mafai la faapefea ona tatou faatatauina tonu le Afioga a le Atua i o tatou lava olaga pe faamatalaina saʻo i isi? (Kolo. 3:10, NW; 2 Timo. 2:15) O le mauaina o le poto saʻo e manaomia ai ona tatou faitau ma le faaeteete, ma afai e loloto le uiga o se vaega, atonu e manaomia ona tatou faitauina e sili atu na i lo le faatasi ina ia tatou maua ai lona uiga. O le a aogā foi mo i tatou pe afai tatou te faaalu se taimi e mafaufau loloto ai i faamatalaga, manatunatu i ai mai itu eseese. Ua faamatilatila i le itulau e 27 o lenei tusi vala tāua e lima o manatu e sailiili i ai. E tele vaega o le Tusi Paia e mafai ona auiliiliina ma le aogā i le faaaogāina o se vala e tasi po o le sili atu foi. A o e taliina fesili o loo mulimuli mai, o le a e vaaia ai lea tulaga.
(1) E masani ā o le vaega o le Tusi Paia o loo e faitauina ua aumaia ai sina faasinoga e faatatau i le ituaiga o peresona e iai Ieova.
Pe a tatou manatunatu loloto ma le talisapaia i mea ua taʻu mai e le Tusi Paia ia i tatou e uiga i galuega o le foafoaga a Ieova, e faapefea i lena mea ona aafia ai o tatou uiga ia te ia? (Sala. 139:13, 14; mai le Iopu mataupu 38-42 matau faapitoa le 38:1, 2 ma le 40:2, 8, ona sii lea i le 42:1-6.)
Ona o le mea na fetalai i ai Iesu i le Ioane 14:9, 10, o le ā e ono avea ma a tatou faaiuga e uiga ia Ieova mai mea tutupu e pei o lea e faamauina i le Luka 5:12, 13?
(2) Iloilo pe faapefea ona saosaolaumea nei manatu i le fafauina aʻe o le matua o le Tusi Paia, lea ua taʻua o le faapaiaina o le suafa o Ieova e ala i le Malo o Iesu Keriso le Fanau Folafolaina.
E faapefea ona fesootai mala na oo ia Aikupito i lenei matua? (Tagai i le Esoto 5:2; 9:16; 12:12.)
Ae ā le tala faamafanafana loto ia Ruta le Moapi? (Ruta 4:13-17; Mata. 1:1, 5)
E faapefea ona fetaui le folafolaga a Kaperielu ia Maria e uiga i le fanau mai o Iesu? (Luka 1:26-33)
Aisea ua tāua ai le faauuina o soʻo o Iesu i le agaga paia i le Penetekoso? (Galu. 2:1-4; 1 Pete. 2:4, 5, 9; 2 Pete. 1:10, 11)
(3) E fesootai faamatalaga ua siomia ai i le uiga o fuaiupu o taʻua.
O ai na faasino i ai faamatalaga i le Roma 5:1 ma le 8:16? (Tagai i le Roma 1:7.)
Po ua faaalia e faamatalaga ua siomia ai faapea o le 1 Korinito 2:9 o loo tautala e faatatau i le ola i le lalolagi i le Faiga Fou a le Atua? E pei ona faaalia i fuaiupu e 6-8, o mata ma taliga o ai sa lē malamalama i mea na tusi i ai Paulo?
(4) Fesili ane ia te oe lava pe mafai faapefea ona e faia se faatatauga totino o mea o loo e faitauina.
O le faamaumauga e uiga i le fasiotia e Kaino o Apelu, po ua na o se talafaasolopito, pe o iai se fautuaga mo i tatou? (Kene. 4:3-12; 1 Ioa. 3:10-15; Epe. 11:4)
A tatou faitau (i le Esoto e oo i le Teuteronome) e uiga i mea na oo i ai Isaraelu i le vao, o le ā se faatatauga totino e ao ona tatou faia? (1 Kori. 10:6-11)
Faamata o fautuaga tau amio ia na tusia mo Kerisiano faauuina, e faatatau i tagata o ē ua iai le faamoemoe mo le ola e faavavau i le lalolagi? (Faatusatusa i le Numera 15:16; Ioane 10:16.)
E ui ina o loo lelei lo tatou tulaga ma le faapotopotoga Kerisiano, o iai ea se manaoga ia iloiloina auala tatou te faatatauina atili ai fautuaga a le Tusi Paia ua uma ona tatou iloa? (2 Kori. 13:5; 1 Tesa. 4:1)
(5) Seʻi manatu pe ono mafai faapefea ona e faaaogā mea o loo e faitauina e fesoasoani ai i isi.
O ai e mafai ona fesoasoani i ai le tala i le toetu o le afafine o Iairo? (Luka 8:41, 42, 49-56)
13. O ā iuga e mafai ona tatou faatalitalia mai se polokalama faifai pea o le faitauina ma le suesueina o le Tusi Paia faatasi ma le faalapotopotoga a Ieova?
13 Maeu se taui faatamaoaigaina o le a ausia e le faitau Tusi Paia pe a faia i lenei auala! Ia mautinoa, o le faitau Tusi Paia o se luitau—o se taumafaiga e mafai ona tatou galueaiina ma le aogā i le olaga atoa. Peitai a o tatou faatinoina, o le a tatou tutupu ai i le malosi faaleagaga. O le a na taaʻina vavalalata ai i tatou i lo tatou Tamā alofa, o Ieova, ma o tatou uso Kerisiano. O le a fesoasoani ai ia i tatou e utagia le fautuaga ia tausisi e “taofia . . . le upu o le ola.”—Fili. 2:16.
Talanoaga Autalu
● Aisea na tusia ai le Tusi Paia ma faasaosaoina e oo mai i o tatou aso?
● E mafai faapefea ona tatou fesoasoani i isi e talisapaia?
● Aisea e aogā ai le faitau Tusi Paia totino e lē aunoa? Mai ā vala e lima e mafai ona tatou auiliiliina ai ma le aogā mea tatou te faitauina?
[Fesili mo le Suʻesuʻega]
[Pusa i le itulau 27]
PE A E FAITAUINA LE TUSI PAIA ILOILO—
Le mea ua taʻu ane e vaega taitasi ia te oe e uiga ia Ieova o se peresona
Pe fesootai faapefea i le matua atoa o le Tusi Paia
Pe faapefea ona aafia le uiga i faamatalaga ua siomia ai
Pe tatau faapefea ona aafia ai lou lava olaga
Pe mafai faapefea ona e faaaogā e fesoasoani ai i isi
