Mataupu 8

‘Tau Faasaga i ʻAu a Agaga Leaga’

1. Aisea tatou te naunau patino ai e fia iloa gaioioiga a agaga leaga?

ATONU e faaamuamu tagata o ē pupū mafaufau i meafaitino i le manatu i agaga leaga. Peitai e lē o se mataupu e taliē i ai. Pe latou te talitonu i ai pe leai, ae ua aumaia e gaoioiga faatemoni omiga i tagata uma. Ua lē faaesea ai tagata tapuai o Ieova. O le mea moni, o i latou o se taulaiga autū. Ua lapataia i tatou e le aposetolo o Paulo i lenei feteenaiga e faapea: “Tatou te le tau ma tagata, a o alii sili [e lē o i le nofoaga o tagata], ma faipule, ma alii o le pouliuli o lenei lalolagi, atoa ma agaga leaga i mea o i le lagi.” (Efe. 6:12) Ua oo atu omiga i se tulaga e sili ona malosi i taimi uma i o tatou aso ona ua lafoina ifo Satani mai le lagi ma ua ita tele, i le iloa ua saasaa ona po.—Faaa. 12:12.

2. Tatou te mafaia faapefea ona manumalo i le tauiviga faasaga i agaga e sili ona malolosi i lo tagata?

² E mafai faapefea e so o se tasi o i tatou ona manumalo aʻiaʻi i le tauiviga faasaga i ʻau a agaga e sili i lo tagata? I le na o le faalagolago atoatoa lava ia Ieova. E tatau ona tatou faalogo ia te ia ma usiusitai i lana Afioga. O le faia faapea, e mafai ai ona faasaoina i tatou i le faaleagaina faaletino, tau amio, tau faalogona ootia ma faalemafaufau lea ua tofo i ai i latou o loo i lalo o le taitaiga faa-Satani.—Efe. 6:11; Iako. 4:7.

 ALII O LE LALOLAGI I NOFOAGA FAALELAGI

3. I le ā ma ia te ai ua matuā tetee sauā i ai Satani?

³ Ua faamatala auiliili e Ieova mo i tatou le tulaga o le lalolagi e pei ona ia silasila i ai mai i lona afioaga i le lagi. Na ia avatu i le aposetolo o Ioane se faaaliga sa faaataina ai Satani i se “tarako tele e mūmū” ua fuafua e faatamaia, pe a mafai ai, le Malo faa-Mesia o le Atua i le taimi lava e fanau ai i le lagi i le 1914 T.A. Ina ua lē taulau i lena faufauga, sa faasasao atu loa e Satani se lologa o teteega sauā, i sui vaaia o lena Malo, le vaega lona lua o le fanau a le “fafine” a le Atua.—Faaa. 12:3, 4, 13, 17.

4. (a) O le ā le mea moni e uiga i le puna o le malosi o pulega faaletagata ua lapataia ai i tatou e le Tusi Paia? (e) I le ā ua faapotopoto nei i ai taʻitaʻi faapolotiki uma, e faapotopoto e ai?

⁴ Sa folasia ai foi i lena faaaliga ia Ioane le puna o le malosi ma le pule o malo faaletagata. Na faaalia ia te ia se manu feai tuufaatasi, e 7 ona ulu ma ona nifo e 10, o se manu feai ua iai le pule “i itu aiga uma, ma gagana eseese, ma nuu.” E lē na o se pulega e tasi ua suitulaga ai lenei manu feai, ae o le faiga faapolotiki i le lalolagi atoa. Na faailoa ia Ioane faapea “ua tuuina atu foi ia te ia [le manu feai] e le tarako [o Satani le Tiapolo] lona malosi, ma lona nofoālii, ma le pule tele.” (Faaa. 13:1, 2, 7; faatusatusa i le Luka 4:5, 6.) E ui lava ina taofi taʻitaʻi faapolotiki o i latou o ni tagata lotu, ae e aunoa ma se sui o malo o le “manu feai” e gauai i le pule silisiliese a Ieova ma lana Tupu tofia, o Iesu Keriso. O loo latou tauivi uma e taofimau i a latou lava pulega. I aso nei, e pei ona faaalia e le Faaaliga, ua faapotopotoina e ‘agaga o temoni’ i latou uma i “le taua i le aso tele o le Atua e ona le malosi uma lava” ia Amaketo. (Faaa. 16:13, 14, 16) Ioe, e pei ona tusia e le aposetolo o Paulo, ‘o alii o lenei lalolagi’ e lē o ni tagata ae o “agaga leaga i mea o i le lagi.” (Efe. 6:12) O ē uma e faamaonia i latou lava o ni tagata tapuai moni o Ieova e manaomia ona malamalama i le uiga atoa o lena mea.

5. Aisea e manaomia ai le faaeteete ina ia alofia ai le taitaiina atu e lagolago le faiga o mea faasatani?

 ⁵ Ua pāʻia o tatou olaga i aso fai soo e feteenaiga ua malepe ai le aiga faaletagata. O se mea masani le faaituau o tagata, a lē i faaupuga po o isi auala, ma le atunuu, le ituaiga, le vaega o gagana po o le vasega faavafealoai o avea ai i latou ma vaega. E tusa lava pe lē o aafia tonu ai la latou vaega i nisi o feteenaiga o loo faia, ae atonu latou te iloa ane o loo latou faaʻauʻau i le isi itu na i lo le isi. Peitai po o le ā lava le faitioga, le tagata po o le mafuaaga ua latou fai ai lo latou sapasapaia, ae o le ā moni lava o loo latou lagolagoina? Ua taʻua manino e le Tusi Paia faapea “o le lalolagi uma o loo nofo toilalo i loo leaga.” (1 Ioa. 5:19) E mafai la faapefea e se tagata ona alofia le taitaiseseina faatasi ma isi uma tagata? I le na o le tuuina atu o lana lagolagosua atoatoa i le Malo o le Atua ma tausia le solitu aʻiaʻi i feteenaiga i le va o vaega eseese o le lalolagi.—Ioa. 17:15, 16.

TOGAFITI FAAʻOLEʻOLE A LĒ O LEAGA

6. O ā ua aofia i mea ua faaaogā e Satani e faaliliu ese ai tagata mai le tapuaiga moni?

⁶ I vaitaimi uma o le talafaasolopito ua faaaogāina ai e Satani sauaga faaletino ma faaupuga e liliu ese ai tagata mai le tapuaiga moni. Peitai ua ia faatino foi nisi mailei e sili atu ona lē mailoa—o gaoioiga faapiopio ma togafiti faaʻoleʻole.

7. Ua faaalia faapefea le poto o Satani i lona faaaogāina o lotu sese?

⁷ Ua ia taofia ma le poto se vaega tele o tagata i le pouliuli e ala i lotu sese, pe afai latou te naunau i ai, i le faapogaia o i latou e manatu faapea, o loo latou auauna i le Atua. O le aunoa o se alofa moni mo le upu moni, atonu o le a tosina atu ai i latou i sauniga lotu faalilolilo ma tau i faalogona ootia po o le maofa i galuega mamana. (2 Tesa. 2:9, 10) Ae ua lapataia i tatou faapea, e oo lava ia i latou o ē o loo auai i le tapuaiga moni, “e o ese nisi . . . latou te faalogo i  agaga e faasese ma mataupu a temoni.” (1 Timo. 4:1) E mafai faapefea ona tupu o lena mea?

8. Ua faapefea ona maileia e Satani agaʻi i lotu sese e oo lava i nisi o ē sa masani ona tapuai ia Ieova?

⁸ E taulai atu ma le faaʻoleʻole le Tiapolo i vaivaiga o se tagata. Po o fefe pea o ia i tagata? Afai o lea, atonu o le a lolo atu o ia i omiga mai aiga po o tuaoi e auai i gaoioiga e pogai mai lotu sese. Pe e faamaualuga lea tagata? Atonu la o le a ia faatautee pe a fautuaina po o le lē talia e isi o manatu na te faaalia. (Faata. 29:25; 15:10; 1 Timo. 6:3, 4) E faapefea pe afai e lē o uunaia e le alofa lona auai i le faiva i le fanua? Na i lo le fetuutuunai o lana vaaiga ia ogatusa ma le faaaoaoga a Keriso, atonu o le a ia gauai atu ia i latou o ē ‘utia ona taliga’ i le faapea ua lava ma totoe le na o le faitauina o le Tusi Paia ma ola i se “olaga lelei.” (2 Timo. 4:3) E lē tāua ia Satani pe auai moni se tasi i se isi vaega faalelotu pe fai lana lava ituaiga o tapuaiga, ae tau lava ia aua le tapuai ia Ieova i le auala o loo faatonutonuina ai e le Atua e ala i lana Afioga ma lana faalapotopotoga.

9. Ua faapefea ona faaaogāina faapiopio e Satani feusuaiga faaleituaiga e faataunuuina ai ona sini?

⁹ Ua maileia foi ma le taufaaʻoleʻole e Satani tagata e faamalieina o latou faanaunauga masani i auala sese. Ua ia faia lea e ala i faanaunauga mo faiga faaleituaiga. I le teena o amioga tatau faale-Tusi Paia, o le toatele i le lalolagi ua latou manatu i feusuaiga faaleituaiga i le va o tagata e leʻi faaipoipo o se fiafiaga talafeagai po o se auala e faamaonia ai i latou o ni tagata matutua. Ae faapefea tagata ua uma ona faaipoipo? Ua lē o se mea ese mo tagata faalelalolagi ua oo i faafitauli tau faaipoipoga ona faia se tatalagā faaipoipoga ma toe faaipoipo pe na ona teteʻa ma nonofo ma se isi paaga. Pe a tatou matauina lenei auala o le olaga, pe tatou te lagona ea ua tatou misia se mea, e faapea ua faasāsā naua le auala faa-Kerisiano? O le auala taufaasee a Satani e fafau ai i se tagata le manatu faapea o loo taofia e Ieova se mea  lelei. Ua uunaia e Satani i tatou e mafaufau i le fiafiaga e mafai ona tatou maua nei—ae lē o aafiaga uumi ia i tatou ma isi, ae maise la tatou faiā ma Ieova ma lona Alo.—Kala. 6:7, 8; 1 Kori. 6:9, 10.

10. O ā meafaigaluega ua taumafai Satani e faaliliuina ai o tatou uiga i faiga sauā?

¹⁰ O le isi faanaunauga masani e mo faafiafiaga. Afai e mamā, e mafai ona faafouina ai le tino, le mafaufau ma faalogona ootia. Peitai o le ā sa tatou tali atu pe a faaaogāina ma le tomai e Satani taimi o evaevaga e taumafai ai e faaesea o tatou mafaufau mai le finagalo o le Atua? Mo se faaaoaoga, ua tatou iloa e inosia e Ieova i latou o ē fiafia i le faasaua. (Sala. 11:5) Ae afai e faaalialia ia mea i ata i televise po o le fale tifaga, pe tatou te saofafai ai lava ma matamata ai pea? Pe afai e faaui mai faiga sauā i taaloga, pe tatou te taliaina ma ono oo ai ina feei e faamalosi i le ʻau taaalo?—Faatusatusa i le Kenese 6:13.

11. I ā auala e ono maileia ai se tagata, e tusa lava pe na te iloa le upu moni e uiga i faiga faaagaga, pe afai e lē mataala?

¹¹ Ua tatou utagia foi faapea o i latou e auai i so o se ituaiga o faiga faaagaga—faatinoina o valovaloga, faiga faataulaitu po o le taumafai e talanoa ma ē ua oti—e “inosia e Ieova.” Tatou te lē manatu e faafesootaia ni taulaitu ma e mautinoa tatou te lē talileleia i latou i o tatou aiga e faatino ai a latou faiga faatemoni. Ae pe tatou te faalologo ea ia i latou ma pulatoa ma le naunautai pe a latou aliali mai i a tatou televise? E ui e lē taitai ona tatou taliaina ni togafitiga mai se fomai faataulaitu, pe tatou te ono nonoaina ea se manoa i le tapulima o sa tatou pepe faatoʻā fanau mai ona o le manatu atonu e puipuia ai le tamaitiiti mai le afaina? Po o le tigā ona iloa e tausalaina e le Tusi Paia le ‘faalauatauina o isi,’ pe tatou te faatagaina ea se tagata faataulaitu e pulea o tatou mafaufau, e tusa pe na o sina taimi lē tumau?—Teu. 18:10-12; Kala. 5:19-21.

12. (a) Ua faaaogāina faapefea musika ina ia tatou iloiloina ai manatu ua tatou iloa e sese? (e) Atonu e faapefea i laei o se tagata, le teuina o le lauulu po o le ituaiga o tautala ona faaalia ai na te faatauaina i latou o ē e lē faamaonia e Ieova ala o o latou olaga? (i) O le ā e manaomia i la tatou vaega pe afai tatou te alofia le puea faamanu i ofaga i togafiti faaʻoleʻole faasatani?

 ¹² Ua tatou faitau i le Tusi Paia e faapea o le ‘faitaaga ma mea lē mamā uma, aua lava neʻi tou soona talanoa ai.’ (Efe. 5:3-5, NW) Ae faapefea pe afai e faatogafiti ona ō mai faatasi na mataupu ma se musika leo malie, se solo faagau loto po o se pao faatopetope? Faamata e oo ina tatou faataitaia ai ma le lē iloa fātuga o loo viiviia ai feusuaiga a o leʻi faaipoipoina, le tagofia o vailaau faasaina mo le fiafiaga ma isi mea e tele? Pe e tiga lava ona tatou iloa e lē tatau ona tatou faaaoao i ala o olaga o tagata o ē auai i na mea, pe tatou te mafuli ea e matauliaina faatasi i tatou ma i latou i le faaaoao i le faiga o o latou laei, le teuina o o latou ulu po o le auala o latou tautatala ai? Pagā le faitogafiti o Satani! Pagā le taufaasee o auala o loo ia faaaogā e tosina ai tagata ia liliu atu i lona lava mafaufau iʻuvale! (2 Kori. 4:3, 4) Ina ia taofia mai le puea faamanu i ofaga i ana togafiti faaʻoleʻole, e ao ona tatou alofia le tafetafea ese faatasi ma le lalolagi. E manaomia ona teu i o tatou mafaufau ē o fai ma “alii o le pouliuli o lenei lalolagi” ma pulunaunau e tau faasaga i a latou taaiga.—Efe. 6:12; 1 Pete. 5:8.

FAAAUUPEGAINA INA IA MANUMALO

13. E mafaia faapefea e so o se tasi o i tatou, ma o tatou lē lelei atoatoa, ona manumalo ai i le lalolagi o loo pulea e Satani?

¹³ A o lumanai le maliu o Iesu sa ia fetalai atu i ona aposetolo e faapea: “Ia outou loto tetele, ua ou manumalo i le lalolagi.” O lea foi, latou te ono manumalo ai; ma na tusia e le aposetolo o Ioane i le silia i le 60 tausaga mulimuli ane: “O ai se na te manumalo i le lalolagi, pe afai e le o lē talitonu o Iesu o le Alo lava ia o le Atua?” (Ioa. 16:33; 1 Ioa. 5:5) E faaalia lea talitonu i lo tatou usiusitai i poloaiga a  Iesu ma faalagolago i le Afioga a le Atua, e pei ona sa ia faia. O ā isi mea e manaomia? Ia tatou pipii mau i le faapotopotoga lea ua avea ai o ia ma ao. Pe a tatou agasala, e tatau ona tatou salamō aʻiaʻi ma saili le faamagaloga a le Atua i le faavae o le taulaga a Iesu. I lenei auala, e ui ina tatou lē lelei atoatoa, ae e mafai foi ona tatou manumalo.

14. (a) Faitau le Efeso 6:13-18. (e) Faaaogā fesili ma mau ua saunia o se faavae mo le talanoaina o aogā mai vaega taitasi o le ofutau faaleagaga.

¹⁴ Ina ia taulau, e manaomia ona tatou oofuina le “ofutau atoatoa mai le Atua,” e aunoa ma le faatalale i so o se vaega. Faamolemole suʻe lau Tusi Paia i le Efeso 6:13-18 ma faitau i lana faamatalaga o lena ofutau. Ma, i le taliina o fesili o loo i lalo, iloilo pe mafai faapefea ona e maua aogā mai le puipuiga ua faia e vaega taitasi o le ofutau.

‘Fusia sulugatiti i le upu moni’

E ui ina atonu ua tatou iloa le upu moni, e faapefea i suesuega faifai pea, mafaufau loloto i upu moni o le Tusi Paia, ma le auai i sauniga ona puipuia i tatou? (Fili. 3:1; 4:8, 9; 1 Kori. 10:12, 13; 2 Kori. 13:5; 1 Pete. 1:13, Kingdom Interlinear)

“Le ufifatafata o le amiotonu”

O ai e ana lenei faatulagaga o le amiotonu? (Faaa. 15:3)

Faataitai pe faapefea i le lē usiusitai i poloaiga a Ieova, ona o le lē taulau ona atiina aʻe le alofa mo ona ala, ona tuua ai se tasi i le matuā faaleagaina faaleagaga. (Tagai i le 1 Samuelu 15:22, 23; Teuteronome 7:3, 4.)

‘Faaseevaeina vae i le sauniga o le tala lelei o le filemu’

Ua avea faapefea o se puipuiga mo i tatou le savavali pea o o tatou vae ina ia tatou oo atu ai e talanoa ma tagata e uiga i sauniuniga a le Atua mo le filemu? (Roma 10:15; Sala. 73:2, 3; 1 Timo. 5:13)

“Le talipupuni o le faatuatua”

Afai e ia i tatou le faatuatua ua mausali ona faavaeina, o le a faapefea ona tatou gaoioi i lalo o taumafaiga ua fuafua e  faapogaia ai i tatou ia masalosalo pe mataʻu? (Faatusatusa i le 2 Timoteo 1:12; 2 Tupu 6:15-17.)

“Le puloutau o le olataga”

E faapefea ona fesoasoani le faamoemoe o le olataga i se tasi e alofia le maileia i le soona pupū i oloa faitino? (1 Timo. 6:7-10, 19)

“Le pelu a le Agaga”

I le ā e tatau ona tatou faalagolago pea i ai pe a tau faasaga i osofaiga i lo tatou tulaga faaleagaga, ma tulaga faaleagaga o isi? (Sala. 119:98; Faata. 3:5, 6; faatusatusa i le Mataio 4:3, 4.)

I le ogatasi ma lea, i le Efeso 6:18, 19, o le ā le isi mea ua faaalia e matuā tāua ina ia manumalo ai i le taua faaleagaga? O le ā le tele e faaaogāina ai? Mo ai?

15. (a) Po ua na o se taua totino faaleagaga ea o loo tatou tauina uma? (e) E mafai faapefea ona tatou tutū atu e tetee i le taua?

¹⁵ Ona o ni fitafita Kerisiano, o i tatou o se vaega o le autau tele o loo auai i le taua faaleagaga. Afai tatou te mataala pea ma faaaogā tatau le ofutau atoatoa mai le Atua, o le a tatou lē lavevea fua la i lenei taua. Na i lo lea, o le a avea i tatou o se fesoasoani faamalosiau i uso ā auauna i le Atua. O le a tatou nofo sauni ma naunau e tu atu, e faasalalauina le tala lelei o le Malo faa-Mesia o le Atua, le pulega lea ua matuā tetee inaina i ai Satani.

Talanoaga Autalu

● Aisea e taumafai ai tagata tapuai o Ieova e tausia le solitu atoatoa i feteenaiga i le va o vaega o le lalolagi?

● O ā nisi o togafiti faaʻoleʻole ua faaaogā e Satani e aumaia ai le faaleagaina faaleagaga i Kerisiano?

● E faapefea ona puipuia i tatou i le ofutau ua saunia e le Atua i auala e matuā tāua i lenei taua faaleagaga?

[Fesili mo le Suʻesuʻega]