Mataupu 24

Ua Oo le Fuafuaga a Ieova i le Manuia Faamamaluina

1, 2. (a) O le ā le fuafuaga a Ieova mo ana meafaiola atamamai? (e) O ai na aofia i le aiga autasi o ē tapuai i le Atua? (i) E faatatau i lenei mea, o le ā le fesili totino e tatau ona iloiloina?

UA AUTASIA foafoaga atamamai uma i le tapuaiga moni ma ua latou olioli uma i le saolotoga mamalu o fanau a le Atua—o lena le fuafuaga atamai ma le alofa a Ieova. O le mea foi lea o loo faanaunau moni i ai ē uma e alolofa i le amiotonu.

² Na amata ona faataunuuina e Ieova lenei fuafuaga matagofie ina ua ia asā ana galuega o le foafoaga. O lana uluai foafoaga o se Atalii, o lē na avea o “le pupula o lona mamalu ma ua matuā tusa lava ma ia.” (Epe. 1:1-3) E tutasi ia lenei, ona e na o le Atua na foafoaina. E ala ia te ia na aumai ai isi atalii—muamua, o agelu i le lagi, sosoo lea ma tagata i le lalolagi. (Iopu 38:7; Luka 3:38) Na faia aʻe e nei atalii uma se aiga faalevateatea e tasi. Sa avea Ieova ma Atua o i latou uma, o lē toatasi e ao ona tapuaia. O ia o le Pule Silisiliese Aoao. O ia foi o lo latou Tamā alofa. Faamata o faapena ona avea o ia ma ou Tamā, ma pe o oe ea o se tasi o lana fanau? Maeu se faiā faapelepele e mafai ona iai i lena mea!

3. (a) Aisea ua leai ai se tasi o i tatou e avea ma atalii o le Atua i le taimi e fanau mai ai? (e) Peitai o le ā le sauniuniga alofa na faia e Ieova mo le fanau a Atamu?

³ Ae ui i lea, e ao ona tatou fesagai ma le mea moni faapea ina ua faasalaina o tatou uluai mātua faaletagata i le oti o ni ē agasala ma le loto i ai, sa tuliesea  i laua mai i Etena ma na faatoina e le Atua. Sa lē taulau ona avea pea i laua o se vaega o le aiga faalevateatea o Ieova. (Kene. 3:22-24; faatusatusa i le Teuteronome 32:4, 5.) O i tatou uma lava, ua fananau mai faatasi ma faanaunauga agasala, ona tatou te tupuga mai ia Atamu agasala. Talu ai o i tatou o fanau a mātua ua tuliesea mai le aiga o le Atua, e lē mafai la ona taʻua i tatou o atalii o le Atua i le faalagolago i lo tatou fananau mai faaletagata. Peitai na silafia e Ieova faapea o le a alolofa nisi e tupuga mai ia Atamu i le amiotonu, ma na Ia faia ai se sauniuniga alofa ina ia mafai e i latou nei ona oo atu i le saolotoga mamalu o fanau a le Atua.—Roma 8:20, 21.

LE TULAGA ALOAIA O ISARAELU

4. (a) O le ā le faavae na avea ai Isaraelu ma “fanau” a le Atua? (e) O le ā sa lē uiga i ai lenei mea?

⁴ Ina ua mavae tausaga e 2,500 mai le foafoaina o Atamu, sa toe faasalafa atu ai e Ieova i nisi o tagata le faaeaga o le mauaina o se faiā ma ia o ni ona atalii. I le ogatasi ma lana feagaiga ma Aperaamo, na filifilia ai e Ieova Isaraelu e fai ma ona tagata. O lea, na ia fetalai ai ia Farao o Aikupito, o “loʻu atalii” Isaraelu. (Eso. 4:22, 23; Kene. 12:1, 2) Mulimuli ane na ia avatu ia Isaraelu lana Tulafono i le Mauga o Sinai, na ia faatulagaina na tagata i se nuu, ma faaaogāina i latou mo lana fuafuaga. Mai se vaaiga faaleatunuu, ona o i latou o se “oloa tāua” ia Ieova, na taʻua ai i latou o “fanau” a le Atua. (Teu. 14:1, 2; Isa. 43:1) E lē gata i lea, ona o ana feutagaiga faapitoa ma ni tagata patino taitoatasi i totonu o lena nuu, sa faasino ai e Ieova ia i latou o ni atalii. (1 No. 22:9, 10) O lenei tulaga sa faavae i se faiā faalefeagaiga ma le Atua. Ae peitai, e lē o lona uiga faapea, na latou olioli i le saolotoga mamalu lea na ia Atamu o se atalii o le Atua. Sa noatia pea i latou i le agasala ma le oti.

5. Na leiloa faapefea e Isaraelu lona tulaga faapitoa ma le Atua?

 ⁵ Ae ui i lea, sa ia i latou se tulaga aloaia ona o ni atalii o le Atua. Na ia i latou foi le avega tauave ia faaaloalogia lo latou Tamā ma ia galulue e ogatasi ma lana fuafuaga. Sa faamamafa e Iesu le tāua o lo latou faataunuuina o lena matafaioi—e lē tau ina taʻua le Atua o lo latou Tamā, ae ia ‘faamaonia i latou’ o ni ona atalii. (Mata. 5:43-48; Mala. 1:6) Peitai, sa lē taulau i lenei mea Iutaia o se nuu. O lea, i le tausaga faaiu o le faiva faalelalolagi a Iesu, ina ua folafola e tagata Iutaia o ē na saili e fasiotia Iesu, “E tasi lo matou Tamā, o le Atua lea,” sa maumauai ona faasino atu e Iesu faapea o a latou gaoioiga ma le agaga na latou faaalia e lē faamaonia ai sea tautinoga. (Ioa. 8:41, 44, 47) I le 33 T.A. na faamutaina ai e le Atua le feagaiga o le Tulafono, ma faaiua ai le faavae mo le faiā faapitoa sa olioli ai Isaraelu. E ui i lea, sa leʻi taofia e Ieova le aumaia mai tagata, o i latou sa ia taliaina o ni atalii.

UA TUUFAATASIA E IEOVA ONA TAGATA

6. O le ā le ‘pulega’ na faamatala e Paulo i le Efeso 1:9, 10, ma o le ā lona fuafuaga?

⁶ Na tusi atu le aposetolo o Paulo i Kerisiano i Efeso e faatatau i le polokalama a Ieova mo le autasia o ona tagata—le faatatauga a le Atua e mafai ai e i latou o ē faatuatua ona avea ma sui faapelepele o Lona auaiga, e faapea: “Ina ua faailoa mai [e le Atua] ia te i tatou le mea lilo sa i lona finagalo, e tusa ma lana pule tunoa [pulega faaleaiga], na ia tuu ai i lona lava finagalo; ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi.” (Efe. 1:9, 10) O lenei “pulega” e faaautu lea ia Iesu Keriso. E ala ia te ia, ua aumaia ai tagata i se tulaga faamaonia i luma o le Atua—o  nisi ma le faamoemoe e iai i le lagi; a o isi, i le lalolagi—e auauna autasi ma atalii faaagelu o le Atua o ē ua faamaoni i le Atua.

7. O ai ‘i latou i le lagi,’ ma o le ā na uiga i ai mo i latou le aoaoina faatasi?

⁷ Muamua, e amata mai i le Penetekoso o le 33 T.A., na taulai atu ai manatu ia ‘i latou i le lagi,’ o lona uiga o i latou ia o ē o le a suli faatasi ma Keriso i le Malo faalelagi. Ona o lo latou faatuatua i le tāua o le taulaga a Iesu, sa tauamiotonuina ai i latou e le Atua. (Roma 5:1, 2) Ona toe ‘fanau fouina’ lea o i latou, po o le avea ma atalii o le Atua faatasi ma le faamoemoe o le ola faalelagi. (Ioa. 3:3; 1:12, 13) Na osia ai e le Atua le feagaiga fou ma i latou nei o se nuu faaleagaga. I le gasologa o taimi, sa aofia uma ai tagata Iutaia ma Nuu Ese, ma o le aofai o i latou nei e 144,000.—Kala. 3:26-29; Faaa. 14:1.

8. E faapefea i le faiā a suli o le Malo ma le Tamā ona faatusatusa i le faiā a tagata Iutaia i lalo o le Tulafono Faa-Mose?

⁸ E ui ina lē lelei atoatoa pea i le tino, ae o loo olioli le vaega totoe o na suli o le Malo faalelagi i se faiā tautele ma le vavalalata ma le Tamā. Na tusi Paulo e uiga i lenei mea e faapea: “O atalii outou, o le mea lea ua auina mai ai e le Atua le Agaga o lona Alo i o outou loto, o valaau, Ava! [“Abba,” NW] Le Tamā e. O lea ua le toe fai oe ma pologa, a o le atalii; a e afai o le atalii, o le suli foi, ona o le Atua.” (Kala. 4:6, 7, LF) O le faaupuga faa-Aramaika “Abba” o lona uiga “tamā,” peitai o se faaupuga alofa e faalagi ai—le ituaiga o faaupuga ua faaaogā e se tamaitiiti mo lona tamā. Ona o le maoae o le taulaga a Iesu ma le alofa tunoa o le Atua lava ia, ua olioli ai nei Kerisiano faauuagagaina i se faiā e sili ona vavalalata ma le Atua na i lo so o se faiā na mafaia mo tagata lē lelei atoatoa i lalo o le Tulafono. Peitai, e sili atu ai ona matagofie le mea o loo taatia mai i o latou luma.

9. O le ā le uiga o le faataunuuga atoatoa o lo latou tulaga o ni atalii?

 ⁹ Afai latou te faamaoni e oo i le oti, latou te maua le faataunuuga atoatoa o le avea o i latou o atalii e ala i le faatutuina i le olaga e lē toe mafai ona oti i le lagi. O i inā o le a faaeaina ai i latou e auauna autasi i luma o fofoga o Ieova le Atua. E na o se vaega toaitiiti o nei atalii o le Atua o loo iai pea i le lalolagi.—Roma 8:14, 23; 1 Ioa. 3:1, 2.

AOAOINA O ‘I LATOU O I LE LALOLAGI’

10. (a) O ai ‘i latou o i le lalolagi,’ ma talu mai anafea na aoaoina ai i latou i le tapuaiga autasi? (e) O le ā la latou faiā ma Ieova?

¹⁰ O le ‘pulega’ lava lea na mafai ai ona aoaoina tagata i le auaiga o le Atua faatasi ma le faamoemoe i le ola faalelagi, lea foi ua taulai atu ia i ‘latou o i le lalolagi.’ Ae maise lava talu mai le 1935 T.A. ua aoaoina ai tagata e faatuatua i le taulaga a Keriso faatasi ma le faamoemoe o le ola e faavavau i le lalolagi. I le soosoo tauʻau ma ē o totoe o le vasega faauuina, ua latou faapaiaina ai le suafa o Ieova ma faasilisilia lana tapuaiga. (Sefa. 3:9; Isa. 2:2, 3) Ma le faaaloalo loloto, ua faalagi ai foi e i latou nei Ieova o le “Tamā,” i le iloaina o ia o le Puna o le ola, ma ua latou taumafai ai ma le naunautai e faaatagia ona uiga e pei ona ia faatalitalia e faia e ona atalii. Ua latou olioli i se tulaga faamaonia i ona luma e faavae i lo latou faatuatua i le toto masaa o Iesu. (Mata. 6:9; Faaa. 7:9, 14) Peitai ua latou iloa o le olioli i le aloaia atoatoa e le Atua o ni ana fanau o loo i le lumanai mo i latou.

11. (a) O le ā le folafolaga ua faalālā mai e le Roma 8:19-21 mo tagata? (e) O le ā le “faaalia mai o atalii o le Atua” o loo latou faatalitalia ma le naunautai?

¹¹ E pei ona folasia i le Roma 8:19-21, o loo latou faatalitali ma le naunau mo le “faaalia mai o atalii o le Atua,” auā o le a oo mai le taimi mo i latou ia o le foafoaga faaletagata e ‘tuusaunoa ia le faapologaina e le iʻuvale.’ O lena “faaalia mai” o le a  faataunuuina pe a vaaia e tagata i inei i le lalolagi faamaoniga e faapea, o atalii o ē ua faauuagagaina e le Atua o ē ua maua lo latou taui faalelagi, ua gaoioi o ni sui lagolago a lo latou Alii faamamaluina, o Iesu Keriso. O le a faaalia lenei i le faaumatiaga o le faiga aoao o mea amioleaga, sosoo ai ma faamanuiaga o le Pulega a Keriso i le Afe Tausaga lea o le a auai faatasi ai ma ia nei “atalii o le Atua” o ni tupu ma faitaulaga.—Faaa. 2:26, 27; 20:6.

12. Mulimuli ane i le puapuaga tele, o le ā le pese o viiga o le a auai i ai atalii faauuagagaina manumalo a le Atua, ma o le ā lona uiga?

¹² Maeu se faamaniti tino o le a iai pe a mavae le puapuaga tele ae faatasi atu leo o na atalii o le Atua o ē ua autasia ma Keriso i le viiga i le Atua, e alalaga fiafia ai ma faapea atu: “Le Alii e [“Ieova e,” NW], le Atua e ou le malosi uma lava, ua tetele au galuega e ofo ai; e tonu ma faamaoni ou ala, le Tupu o le au paia e. Le Alii [“Ieova”] e, o ai se le mataʻu ia te oe, ma vivii atu i lou suafa? auā ua na o oe e lelei; auā e o mai nuu uma lava, ma latou ifo i ou luma; auā ua faaalia au faamasinoga tonu”! (Faaa. 15:3, 4) Ioe, o le a aufaatasi uma tagata ua faia aʻe i tagata o atunuu uma sa iai, i le tapuaiga i le Atua moni. E oo ia i latou o i tuugamau o le a toe faatutuina ma avatu i ai le avanoa e faatasia ai o latou leo i viiga ia Ieova.

13. O le ā le saolotoga ofoofogia o le a olioli ai loa ē faasaoina i le puapuaga tele?

¹³ O le a lē toe avea Satani le Tiapolo ma “atua o le lalolagi nei.” O le a lē toe tauivi tagata tapuai o Ieova i inei i le lalolagi i ana taaʻiga e sili ona leaga. (2 Kori. 4:4; Faaa. 20:1-3) O le a lē toe suiseseina e lotu pepelo lo tatou Atua alofa ma avea o se taaʻiga fevaevaeai i le sosaiete o tagata. E lē toe oo i auauna a le Atua moni le faamasinogalētonu ma le faataumaoia i lima o tagata i ofisa faalemalo. Maeu se saolotoga ofoofogia o le a folasia mo ē faasaoina i le puapuaga tele!

14. O le ā le auala o le a saoloto ai i latou mai le agasala ma ona aafiaga uma?

 ¹⁴ Ona o ia o le “Tamai mamoe a le Atua na te aveesea le agasala a le lalolagi,” o le a faia ai e Iesu Keriso se faatatauga o le tāua o lana taulaga e soloiesea ai agasala uma ua tuanai a tagata. (Ioa. 1:29) I le lalolagi, ina ua fetalai Iesu ua faamagaloina agasala a se tasi, na ia faamaloloina foi lē ua faamagaloina e faamaonia ai. (Mata. 9:1-7) I se auala talitutusa, o le a ia faamaloloina ai faavavega mai le lagi o ē tauaso, o ē tutuli, o ē gūgū, o ē lē atoatoa faaletino, o ē faaletonu le mafaufau, ma i latou e iai so o se gasegase. A o faasolosolo, e ala i le faafetauia ma le faamaoni o i latou i ala amiotonu a le Atua, o i latou uma e malilie ma usiusitai o le a aveesea atoatoa mai ia i latou le “tulafono a le agasala” ina ia mafai ai e a latou gaoioiga uma, o latou manatunatuga uma, ma faanaunauga uma o o latou loto ona faafiafiaina i latou atoa ma le Atua. (Roma 7:21-23; faatusatusa i le Isaia 25:7, 8 ma le Faaaliga 21:3, 4.) A o leʻi oo i le iuga o le Meleniuma, o le a fesoasoania i latou ina ia matuā lelei atoatoa ai faaletagata. O le a latou saoloto atoatoa mai le agasala ma ona aafiaga uma e faavauvau. O le a talafeagai ona latou faaatagia le ‘faatusa ma foliga o le Atua’ i le lotolotoi o le Parataiso faalelalolagi ua faapea ona fusia ai le lalolagi atoa.—Kene. 1:26.

15. I le faaiuga o le Meleniuma, o le ā le gaoioiga o le a faia e Keriso, faatasi ma le ā le fuafuaga?

¹⁵ Pe a maeʻa ona aumaia e Iesu tagata i le lelei atoatoa, ona ia toe faafoi atu lea i le Tamā o le pule sa tuuina mai ia te ia mo lenei galuega. E pei ona valoia i le 1 Korinito 15:28: “Pe a uma foi ona tuuina i lalo ia te ia [le Alo] o mea uma, ona tuuina i lalo foi lea o le Alo lava i le na tuuina i lalo ia te ia o mea uma, ina ia pule aoao le Atua i le aoao o mea.”

16. O le ā o le a tuuina atu i ai tagata lelei atoatoa uma i lena taimi, ma aisea?

¹⁶ O le taimi lena o le a tuuina atu ai i tagata lelei  atoatoa le avanoa e faaalia ai faapea o la latou filifiliga lē masuia, ia auauna atu e faavavau e tau lava o le Atua moni e toatasi o loo soifua. O lea, a o leʻi avea ma tamafai i latou o ni ona atalii e ala ia Iesu Keriso, o le a tuuina atu e Ieova na tagata lelei atoatoa uma i se tofotofoga maeaea mulimuli. O le a toe tatalaina Satani ma ana temoni mai le to e lē gata. Ia i latou o ē alolofa moni ia Ieova o le a lē iu lenei mea i se faaleagaina e faavavau. Peitai o ē e faatagaina ma le lē faamaoni i latou lava e taitaia ia lē usiusitai ia Ieova, o le a faaumatia e faavavau faatasi ma le uluai fouvale ma ana temoni.—Faaa. 20:7-10.

17. I le faataunuuga o le fuafuaga a Ieova, o le ā le tulaga o le a toe iai i le lotolotoi o ana foafoaga atamamai uma?

¹⁷ Ona vaetamaina loa lea ma le alofa e Ieova e fai ma ona atalii e ala ia Keriso, tagata uma lelei atoatoa o ē na sao mai lena toe tofotofoga mulimuli. Ona sosoo lea ma lo latou auai i le atoaga o le “saolotoga mamalu o le fanau a le Atua.” (Roma 8:21, NW) Mulimuli ane o le a avea i latou o se vaega o le aiga autasi faalevateatea a le Atua, i latou uma ia o le a avea ai Ieova ma Atua e toatasi e faavavau, o le Pule Silisiliese Aoao, ma o lo latou Tamā alofa. Ona toe autasia ai lea o foafoaga atamamai uma a Ieova, i le lagi ma le lalolagi, i le tapuaiga i le Atua moni e toatasi.

Talanoaga Autalu

● A o leʻi tupu le fouvalega i Etena, o le ā le faiā sa ia Ieova ma ē uma na tapuai ia te ia?

● O le ā le avega tauave ua paʻū atu ia i latou o atalii o le Atua?

● O ai atalii o le Atua i aso nei? O ai o le a avea ma fanau a le Atua, ma e faapefea ona fesootai lenei ma le fuafuaga a Ieova i le tapuaiga autasi?

[Fesili mo le Suʻesuʻega]