Vivii atu iā Ieova o le Atua Moni
Mataupu 2
Vivii atu iā Ieova o le Atua Moni
1. (a) O ai le Atua moni? (e) A o tatou aʻoaʻo e uiga ia te ia, e ao faapefea ona aafia ai o tatou lava olaga?
NA TUSI atu le aposetolo o Paulo i aumea Kerisiano e faapea, e ui ina toatele ē ua taʻua o atua, ae “ua ia te i tatou le Atua e toatasi o le Tamā ia, . . . ma le Alii e toatasi o Iesu Keriso.” (1 Kori. 8:5, 6) O le “Atua e toatasi” na taʻua e Paulo o Ieova, o Lē na Foafoaina mea uma. (Teu. 6:4; Faaa. 4:11) Ua iloa e tagata loto talisapaia o ē ua aʻoaʻoina ona uiga atoa ma mea ua ia faia mo tagata, lo latou tosina atu ia te ia ma le lē mataofiofia. Faatasi ma le ā le taunuuga? Ua na ona tatau ai mo i latou ona vivii i Lē ua latou matuā saafiafia, e ala i upu ma gaoioiga. A o tuputupu aʻe lo latou alofa mo le Atua, ua latou lagona ai le uunaiga e taʻutaʻu atu o ia i isi, ma latou te mananao e faaaoao ia te ia i le mamao latou te mafaia ai o ni tagata. Ua faalaeiauina i tatou uma e le Tusi Paia ia faia faapea, i lona taʻua e faapea: “O lenei, ia faaaoao outou i le Atua, faapei o le fanau pele; ma ia savavali i le alofa.” (Efe. 5:1, 2) Ina ia faatatauina lena fautuaga, e manaomia ona tatou iloa Ieova e pei ona iai moni o ia.
LE ITUAIGA O PERESONA E IAI IEOVA
2. O ā nisi o uiga tumatilatila o le Atua ua uunaia ai i tatou e faamanū ia te ia?
2 I le Tusi Paia atoa e anoanoai faamatalaga tuusao o loo maua ai e mataulia ai uiga tumatilatila o le Atua. A e faitauina ia faamatalaga, ia faaalu se taimi e manatunatu ai po o ā moni nei uiga ma e faapefea lo latou tāua ia te oe. Mo se faaaoaoga: “O le Atua, o le alofa lava ia.” (1 Ioa. 4:8) “E tonu ona ala uma lava.” (Teu. 32:4) ‘O loo ia te ia le atamai.’ (Iopu 12:13) E ‘tele lona malosi.’ (Isa. 40:26) A o e manatunatu i nei uiga, pe e lē uunaia ai ea oe, ona o le saafiafiga mo le Atua, e faamanū atu ia te ia?
3. O ā isi vala o le peresona o Ieova ua sili ona tausaafia?
3 Ina ia tatou faamasani atili ma lona peresona tausaafia, ua taʻu mai e le Tusi Paia ia i tatou e faapea o Ieova “o le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” (Eso. 34:6) “Auā le Alii e, o oe e lelei, ma ua e faamagalo sala.” (Sala. 86:5) “Auā o fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.” (2 No. 16:9) “E le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu ua talia i latou e ia.” (Galu. 10:34, 35) O Ieova o “lē foai tele mai” ma o “le Atua fiafia.” (Iako. 1:5; 1 Timo. 1:11, NW) Maeu le faafouina o le auauna i lenei Atua e lē mafaatusatusaina ma maeva ai i lana tausiga alofa!
4. (a) O le ā le ituaiga o tuutoina e manaomia e Ieova, ma o le ā lona tāua? (e) O le ā ua valaaulia i tatou e le Salamo 34:3 e saosaolaumea i ai?
4 E ō faatasi ma ona uiga le mea moni faapea o ia “o le Atua fuā.” (Eso. 20:5) Ina ia talileleia le auaunaga ia te ia e tatau ona tatou avatu ia te ia lo tatou tuutoina atoatoa. I le taimi e tasi e lē mafai ona tatou alolofa i le lalolagi o loo avea ai Satani ma atua. (1 Ioa. 2:15-17; 2 Kori. 4:3, 4) E ati le silafaga a Ieova i so o se faatagā faafiaamiotonu. Ua silafia lelei e lē gata i mea tatou te faia ae faapea foi o tatou faalogona i ai ma le ituaiga o tagata o loo tatou taumafai ia iai. Afai tatou te alolofa moni i le amiotonu, e fesoasoani mai o ia ia te i tatou. (Iere. 17:10; Faata. 15:9) Ona o le ituaiga o peresona ua iai Ieova, e faitau miliona tagata i le lalolagi atoa ua talia ma le fiafia le valaaulia a le faisalamo o le Tusi Paia o lē na tusia: “Ia outou faaneenee atu ia Ieova faatasi ma aʻu; ma ia tatou vivii faatasi i lona suafa.” (Sala. 34:3) Po o oe ea o se tasi o i latou?
5. O le ā e fesoasoani ia i tatou ina ia maua aogā atoatoa mai i lo tatou suesueina o le peresona o Ieova?
5 O le a faalolotoina lou faanaunauga e tautala e uiga i le Atua, ma o le a tele se fesoasoani i au taumafaiga e faaaoao ia te ia pe afai e te iloiloina totoʻa ona uiga matalasi. Saili (1) po o ā tonu lava uiga taitasi, atonu po o le ā e ese ai mai isi uiga, (2) ua faapefea ona faataitaia e Ieova ma ia te ai, faapea foi ma le (3) pe mafai faapefea ona e faatinoina, po o le faapefea ona aafia ai lau vaaiga.
6. I le faaaogāina o le alofa o se faaaoaoga, faailoa mai pe mafai faapefea ona e iloiloina uiga o Ieova. Ia faia faapea i le taliina o fesili ua i le faaiuga o lenei palakalafa, ma ia aofia ai mau i au tali.
6 Seʻi iloiloina i inei na o se faaaoaoga e tasi. Pe a faapea mai le Tusi Paia, “o le Atua, o le alofa lava ia,” o le ā lona uiga? (1 Ioa. 4:8) E mautinoa, ua iai le tele o ituaiga o alofa. O le upu Eleni ua faaaogāina i lenei mau o le a·gaʹpe, lea e faasino i le ituaiga aupito maualuga o le alofa, e pei ona faaaoaoina mai e Ieova le Atua lava ia. O sea alofa o se faatinoga o le matuā lē manatu faapito. I le iai la o lena manatu i lou mafaufau, ia fafau aʻe au lava tali i fesili o loo i lalo, e faaaogā ai nei mau.
Ua faapefea ona faataitaia lenei uiga i galuega o le foafoaga a Ieova? (Galu. 14:16, 17)
O le ā le faaaoaoga aupito iloga o le alofa o Ieova mo tagata? (Ioa. 3:16) Pe ona o le lelei ea o tagata na faia ai faapea e Ieova? (Roma 5:8)
E ao faapefea i le mea na faia e Ieova e ala i lona Alo ona afaina ai le auala o faaaogāina ai o tatou olaga? (2 Kori. 5:14, 15, 18, 19)
Ona o i tatou o ni Kerisiano, o ā auala e mafai ai ona tatou faaalia ua ia i tatou lea lava ituaiga o alofa mo o tatou uso Kerisiano? (1 Kori. 13:4-7; 1 Ioa. 4:10, 11; 3:16-18)
O ai isi e ao ona tatou faaalia i ai le alofa, ma e faapefea? (Mata. 5:43-48; 28:19, 20; Kala. 6:10)
7. I lau suesuega totino, e mafai faapefea ona e maua faamatalaga talitutusa e faatatau i isi uiga o Ieova?
7 Faamata e te fia sailiilia foi isi uiga o Ieova? Ina ia amata, i lau suesuega totino aisea e lē faataitaia ai le “faamasino tonu” ma le “poto (atamai),” ona sosoo ai lea ma le “agalelei” ma le “alofa mutimutivale.” O le faaaogāina o faasino mataupu i lomiga a le Sosaiete ma se faasinoupu o le Tusi Paia, o le a e mauaina ai se tamaoaiga i mataupu e maua ai le malamalama.
FESOASOANI I ISI E AʻOAʻO LE UPU MONI E UIGA I LE ATUA
8. (a) O ā atua ua tapuaia e tagata o le lalolagi? (e) O ai o i tua o lenei fenuminumiai uma, ma aisea ua e fai mai ai faapena?
8 I le faasagatau i le tapuaiga i le Atua moni, e faitau miliona isi atua o loo iai ua tapuaia e tagata. I lona fa o senituri, na talia ai e Kerisinetoma le talitonuga i se “Tolutasi,” po o se “Tasitolu,” sa aʻoaʻoina e tagata Papelonia, Aikupito, Hinitu ma Puta e muamua atu i lena taimi. E faaopoopo atu i lenei manatu i le Atua, ua iai taʻitaʻi malolosi, tagata taaalo ma tagata pepese tautaua o ē ua viiviia e pei ni atua. O tupe, le tagata lava ia, ma feusuaiga faaleituaiga ua avea foi ma atua, ua tuuina atu uma i ai faaneeneega. O ai o loo i tua o nei mea uma? O “le atua o le lalolagi nei,” o Satani le Tiapolo lea. (2 Kori. 4:4; 1 Kori. 10:20) I so o se faufauga faatogafiti, ua ia taumafai ai e faaliliu ese tagata mai ia Ieova, pe a lē o lea, ia tau ā ina vaeluaina lo latou tuutoina atu.
9. O le ā le auala aupito sili ona lelei e fesoasoani ai i so o se tasi e aʻoaʻoina le upu moni e uiga i le Atua?
9 E mafai faapefea ona tatou fesoasoani i tagata faapena, pe fai mai o ni Kerisiano po o isi, ina ia iloa le upu moni e uiga i le Atua? O se tasi o auala e sili ona lelei o le faaalia lea ia i latou i se agaga fia fesoasoani po o ā fa a le Tusi Paia lava ia e uiga i mea e iloa ai le Atua moni ma le ituaiga o peresona e iai o ia. Ona manaomia ai lea ona tatou lagolagoina o lenei mea i a tatou amio e atagia atu ai uiga faaleatua i o tatou lava olaga.—1 Pete. 2:12.
10. Pe a talanoa i sē e talitonu i le Tolutasi, aisea e lē poto ai ona manatu faapea ua tatou iloa lelei lava le mea ua ia talitonu i ai?
10 Ae faapefea pe afai e finau mai nisi o sui o lotu a Kerisinetoma ia te oe faapea, o lo latou talitonuga i le “Tolutasi” e faale-Tusi Paia? Muamua lava ia mautinoa, e ui ina iai faamatalaga tusitusia mo le aʻoaʻoga o le “Tolutasi,” ae toatele tagata e iai o latou lava manatu. Valaaulia i latou e faaleo mai o latou manatu, ona fesoasoani lea i ai ina ia faatusatusa o latou talitonuga ma mea ua tusia i a latou lava Tusi Paia. A o faagasolo le taimi, ia faalaeiau foi i latou e faatusatusa aʻoaʻoga autū a le lotu ma le Afioga a le Atua.
11. I le faaaogāina auauai o manatu autū e lima, faaaogā fesili ma mau ua lisiina i lenei palakalafa e fefulisai ai i le lē faale-Tusi Paia o le aʻoaʻoga o le “Tolutasi.”
11 I le manatuaina o le faanaunauga e fesoasoani i tagata loto faamaoni, iloilo pe faapefea ona e faaaogā mau ua tusia i lalo e fefulisai ai manatu na ua faaalia i mau:
(1) Ua faamamafaina e nisi o ē talitonu i le “Tolutasi” le manatu faapea e tolu Peresona tauatua (Tamā, Alo ma le Agaga Sa) ae na o le tasi le Atua.
Ae pe ua faaalia ea e le Galuega 2:4, 17 faapea o le “Agaga Sa,” po o le “agaga paia,” o se peresona?
Aisea e fesoasoani ai le matauina pe toafia peresona ua taʻua i mau taitasi o loo mulimuli mai? (Ioa. 17:20-22; Galu. 7:56; Faaa. 7:10)
(2) O nisi e talitonu faapea o sui uma o le “Tolutasi” e tau fai tutusa i le mamalu, e leai sē e sili atu pe itiiti ifo i le isi, e tau fai tutusa ma e tau fai faavavau foi.
Pe ioe i ai le Tusi Paia? (Mo le tali, tagai i le Ioane 14:28; Mataio 24:36; Faaaliga 3:14.)
(3) Ua faasino nisi tagata i le Ioane 1:1 o se faamaoniga o le “Tolutasi.” Latou te finau mai faapea o le fuaitau Eleni i inā e leai sona upu “se” (indefinite article) i luma o le upu “Atua” ma o lea e tatau ai ona faitau faapea le mau: “o le Atua foi le Lokou (“Upu,” LF),” na i lo o “se atua.”
Ae peitai e toafia peresona o loo tautalagia i le Ioane 1:1? Toatolu? Pe toalua? E faapefea foi ona fetōaʻi le Ioane 1:18 ma le aʻoaʻoga o le “Tolutasi”?
E moni e leai se upu “se” (indefinite article) i le gagana Eleni, ae ua iai i le tele o isi gagana, ma ua faaaogāina i na gagana ina ia faamatala saʻo ai manatu. Afai e manatu se tasi faapea e sese le faaaogāina o le upu “se” pe a faaliliuina le Ioane 1:1, po o le a ia manao foi la e suia le Galuega 28:6 e tusa ma le Tusi Paia Samoa [lomiga 1884 ma le 1969] ma isi faaliliuga? (O se tasi auala e faaupu ai le Ioane 1:1, e pei ona faaalia i le Tusi Paia faa-Peretania An American Translation, e faapea “sa tauatua le Upu,” o lona uiga, na ia te ia uiga faaleatua lea e iai i le Atua.)
(4) Ua finau mai foi ē talitonu i le “Tolutasi” faapea i le Kenese 1:1, 26 o le upu Eperu ua faaliliuina “Atua” o le “El·o·himʹ” ma o le numera tele lenei i le faa-Eperu o lona uiga moni “o Atua.”
Aisea ua lē lagolagoina ai e lena talitonuga le aʻoaʻoga o Peresona tauatua e toatolu i se “Atua e toatasi”?
Afai ua faaalia se “Tolutasi” i le Kenese 1:1, o le ā ua faaalia i le Faamasino 16:23, lea o loo faaaogā ai le el·o·himʹ mo se “atua,” ma le veape Eperu i le numera tasi, ae lē o le numera tele?
Aisea na faaaogā ai le itu numera tele o le upu “Atua” i ia tusitusiga Eperu? O se tasi lenei o auala e faaalia ai i le faa-Eperu le manatu o le silisiliese po o le malualii. Ana fai e faauigaina mo le sili atu i le peresona e toatasi, semanu e tatau foi ona numera tele soā veape, ae ua lē faapena i faaaoaoga o i luga.
(5) Talu ai le faamamafaina e lotu o Iesu (ma le mea moni e faapea ua aveesea le suafa o Ieova mai le tele o faaliliuga o le Tusi Paia), ua na o Iesu ai lava e manatu i ai nisi tagata pe a taʻua le Atua.
Ae peitai o le ā le faaaoaoga tau tapuaiga na saunia e Iesu mo i tatou e mulimuli ai? (Luka 4:8)
12. Aisea sa talafeagai ai ona faalagi e Iesu lona Tamā o “le Atua moni e toatasi”?
12 E ui lava ua talanoaina e le Tusi Paia Iesu o “se atua,” ua oo foi ina taʻua o le “Atua malosi,” ae na ia viiviia lona Tamā, i le faasino atu ia te ia “o loʻu Atua ma lo outou Atua.” (Ioa. 1:1, NW; 20:17; Isa. 9:6) Sa ia ioe faatasi ma Mose, o lē na uluai taʻua: “O Ieova o ia lava le Atua e leai se tasi na o ia lava.” (Teu. 4:35) E tumatilatila ese Ieova pe a faatusatusa atu i mea ua tapuaia e pei o tupua, tagata ua fai ma atua, ma Satani le Tiapolo. E ese mai i na mea uma, o Ieova, o “le Atua moni e toatasi,” e pei ona faalagi ai o ia e Iesu.—Ioa. 17:3.
“SAVAVALI I LE SUAFA O IEOVA”
13, 14. O le ā ua aafia i le “iloa” ma “savavali i” le suafa o Ieova?
13 Ina ua mavae tausaga e tele o le fenuminumiai i le iloaina o le Atua, e anoanoai tagata ua latou iloa le faamaniti tino ina ua latou uluai vaaia le suafa totino o le Atua, o Ieova, i a latou Tusi Paia. (Eso. 6:3) Peitai latou te faatoʻā maua aogā tumau mai lenei iloa pe afai latou le ‘savavali i le suafa o Ieova e faavavau.’ (Mika 4:5) E sili atu ua aafia ai i lenei mea na i lo o le tau ina iloa le suafa o Ieova po o le faapea mai o i latou o Molimau a Ieova.
14 E faatatau i le tāua o le suafa o le Atua, ua faapea mai ai le Salamo 9:10: “E faatuatua ia te oe o e ua iloa lou suafa; . . . Ieova e.” O le ā ua aofia ai i lena? E aofia ai le sili atu i le na ona iloa o le suafa o Ieova, lea e lē faapea o le talitonu lena ia Ieova. O le “iloa” o le suafa o le Atua i inei o lona uiga o le talisapaia lea o le ituaiga o Atua e iai Ieova, faaaloalo i lana pule, ma usiusitai i ana poloaiga. I se tulaga talitutusa, o le ‘savavali i le suafa o Ieova’ e faatatau lea i le tuuina atu ia te ia ma avea ma ona sui o se tasi o ona tagata tapuai, ua faaaogā moni lona olaga ina ia ogatasi ma le finagalo o le Atua. (Luka 10:27) O e faia ea faapena?
15. Na i lo le tau ina manatu faapea o se tiute, o le ā e manaomia pe afai o le a tatou auauna ia Ieova e faavavau?
15 Afai o le a tatou auauna ia Ieova e faavavau, e tatau la ona matuā uunaia ai i tatou na i lo le tau ina manatu i ai faapea o se tiute. Sa augani atu le aposetolo o Paulo ia Timoteo, o lē sa auauna ia Ieova mo tausaga e tele: “Ia e faamasani i le amio Atua.” (1 Timo. 4:7) O le tuutoina e sau mai le loto; e faagaeeina i le sapaitalia mo le peresona o lē ua taulai atu i ai. O le “amio Atua” o le faaaloalo loloto lea mo Ieova lava ia. E folasia ai le alofa vilivilitai mo ia ona o le talisapaia o ia ma ona ala. E faapogaia ai ona tatou mananao i tagata uma ia sapasapaia lona suafa i se tulaga siitia. E tatau ona tatou atiina aʻe le “amio Atua” o se sini po o se matatia i o tatou olaga pe afai o le a tatou savavali e faavavau i le suafa o Ieova, le Atua moni.—Sala. 37:4; 2 Pete. 3:11.
Talanoaga Autalu
● O le ā le ituaiga o peresona e iai Ieova? E faapefea ona aogā mo i tatou le mauaina o se malamalamaga manino i ona uiga taitasi?
● E mafai faapefea ona tatou fesoasoani i isi tagata ia aʻoaʻoina le upu moni e uiga i le Atua?
● O le ā ua aofia ai i le “iloa” o Ieova ma ‘savavali i lona suafa’?
[Fesili mo le Suʻesuʻega]
