A Mavae Amaketo, o se Lalolagi Parataiso
Mataupu 19
A Mavae Amaketo, o se Lalolagi Parataiso
1. O le ā le vaaiga taatele e uiga i a Amaketo? (e) O le ā ua taʻua e le Tusi Paia e faatatau i ai?
UA AVEA “Amaketo” o se upu faamataʻu i le toatele. Ua faaaoga soo e taʻitaʻi o le lalolagi e faasino i se Taua Lona Tolu a le Lalolagi e ono tupu. Peitai, ua taʻua e le Tusi Paia Amaketo o se nofoaga o se taua amiotonu ua tauina e le Atua. (Faaaliga 16:14, 16) O le a saunia e lea taua a le Atua se ala mo se lalolagi fou amiotonu.
2. (a) O ai o le a faaumatia i a Amaketo? (e) O lea, o ā faiga e tatau ona tatou alofia ma le atamai?
2 I le lē pei o taua a tagata, ia e fasiotia faatasi ai ē lelei ma ē leaga, o le a faaumatia i a Amaketo na o ē leaga. (Salamo 92:7) O lea a avea Ieova le Atua ma Faamasino, ma o le a tafiesea so o se tasi e tetee ma le loto i ai i ana tulafono amiotonu. I aso nei, e toatele tagata ua latou manatu faapea e lē sese le faitaaga, le onā, pepelo po o le faaoleole. Peitai, o nei mea ua leaga i le Atua. O lea, o le a lē faasaoina i a Amaketo i latou o ē faia pea ia mea. (1 Korinito 6:9, 10; Faaaliga 21:8) I le iloaina o tulafono a le Atua i nei mataupu, e tāua mo tagata o ē atonu o loo faia nei mea leaga ina ia suia o latou ala.
3. (a) O le ā na faatusaina i ai e Iesu le iuga o le lalolagi o i ai nei? (e) O le ā o le a tupu i a Satani ma ana temoni?(i) E tusa ai ma mau o loo i itulau o sosoo mai, o ā ituaiga o tulaga o le a olioli ai le lalolagi parataiso?
3 A uma Amaketo, o le a lē toe totoe se vaega a lenei lalolagi amio leaga. E na o ē auauna i le Atua o le a soifua pea. (1 Ioane 2:17) Sa faatusaina e Iesu Keriso lea tulaga i ona po o Noa. (Mataio 24:37-39; 2 Peteru 3:5-7; 2:5) A tuanai Amaketo, o le a na o le malo o le Atua o le a pule i le lalolagi aoao. O le a mou atu Satani ma ana temoni. (Faaaliga 20:1-3) Mafaufau i itulau o sosoo mai, i nisi o faamanuiaga ua faaalia e le Tusi Paia o le a olioli ai tagata usiusitai.
FILEMU LE FANAU A TAGATA
“Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia . . . o le Alii o le filemu. E leai se mea e gata mai ai ona tele o lona malo ma le filemu o lona malo.”—Isaia 9:6, 7.
“O lana nofoaiga e tupu olaola mai ai le ua amiotonu; e manuia tele ai, seia leai se masina. E pule foi o ia e pau mai i le tasi sami e oo atu i le tasi sami; e pau mai le vaitafe e oo atu i tuluʻiga o le lalolagi.”—Salamo 72:7, 8.
E LĒ TOE I AI NI TAUA
“Ina o mai ia, ina vaavaai i galuega a Ieova, o le ua faia faatafunaga i le lalolagi. Ua faaiua e ia o taua e oo lava i tuluʻiga o le lalolagi.”—Salamo 46:8, 9.
FALE LELEI MA GALUEGA FIAFIA MO TAGATA UMA
“Latou te faia fale, ma latou mau ai: . . . Latou te le fai fale ina ia mau ai nisi; latou te le totō ina ia ʻai ai nisi . . . e uma lava i e ua filifilia e aʻu o mea na faia e o latou lima. Latou te le galulue fua, latou te fananau, a e le tupu ai le atuatuvale; auā o le fanau ua faamanuiaina e Ieova i latou, atoa ma i latou e tutupu mai ia te i latou.”—Isaia 65:21-23.
MOU ATU LE SOLIGATULAFONO, SAUAGA MA LE AMIO LEAGA
“Auā e faaumatia o e fai amio leaga, . . . E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava.”—Salamo 37:9, 10.
“A e vavaeeseina o e amio leaga ai le laueleele, e liaiina ai foi o e amio pepelo.”—Faataoto 2:22.
PARATAISO I LE LALOLAGI AOAO
Sa fetalai Iesu: “Ta te faatasi ma oe i parataiso.”—Luka 23:43.
“E fai lava le nuu (lalolagi) mo tagata amiotonu, e nonofo ai pea i latou.”—Salamo 37:29.
FAATUMULIA I MEA LELEI MO TAGATA UMA E TAUMAMAFA AI
“E faia e Ieova o ʻau . . . mo nuu uma le faigaai o mea lelei, o le tausamiga o uaina ua tuu ai ʻalu; o mea e silisili ona lelei, o uaina ua faamaninoina sa tuu ai ʻalu.”—Isaia 25:6.
“E taumafa o saito i le nuu i tumutumu lava o mauga.” “Ua fua mai e le laueleele ona lava fua; o le Atua, o lo matou Atua lava na te faamanuia mai i matou.”—Salamo 72:16; 67:6.
4, 5. (a) O ā tulaga o le a lē toe i ai i le lalolagi parataiso? (e) O ā o le a mafai ona faia e tagata, i le tele o nofoaga e le mafai ona latou faia ai ia mea i aso nei?
4 E mautinoa lava e te manao e ola i se lalolagi parataiso e pei o le faatoaga sa foafoaina ai le tagata muamua o Atamu. (Kenese 2:8; Luka 23:43) Mafaufau i ai—e lē toe i ai ni taua, solitulafono po o sauaga. O le a mafai ona e savali i soo se mea i soo se taimi o le aso po o le po e aunoa ma le matau i le fasia. O le a le toe i ai ē amio leaga.—Salamo 37:35-38.
5 O le uiga o lenei mea o le a lē toe i ai ni faiga faaupufai lē faamaoni ma taʻitaʻi faapisinisi matapeapea e soona fai i tagata. O le a lē toe saisaitia foi tagata i ni lafoga maualuluga e totogia mo mea tau faafitafita. O le a lē toe i ai foi soo se tasi e aunoa ma ni mea e ʻai lelei ma fale lelei auā e lē toe faapea o le a lē lava le tupe e totogi aʻi. O le a lē toe i ai se taugata o le soifuaga, le paʻū o le aogā o le tupe ma le lē maua o ni galuega. O faafitauli o faapogaia ai puapuaga i aiga i aso nei o le a lē toe i ai. O le a maua e tagata uma galuega faamalie loto latou te faia, ma o le a mafai ona latou vaaia le oliolisaga i fua o a latou galuega.
6. (a) O le ā le galuega o le a faia e e faasaoina atu i a Amaketo? (e) O le ā faapefea ona faamanuia le Atua i galuega ua faia?
6 Muamua lava, o ē faasaoina mai i a Amaketo o le a faia sa latou galuega o le faamamāina o le lalolagi ma aveesea mea leaga o lenei faiga tuai o mea. Ma o le a latou mauaina ai le faaeaga o le teuteuina o le lalolagi mafai ia matagofie o se nofoaga e ola ai i lalo o le taʻitaʻiga a le pule o le Malo. Maeu se fiafiaga o le a i ai i lea galuega! O le a faamanuia le Atua i mea uma e faia. O le a na saunia le ituaiga o tau e fetaui e faaolaina ai mea totō ma tausia ai lafu manu, ma o le a ia tagai foi i ai ua puipuia mai faamaʻi ma le faaleagaina.
7. (a) O le ā le folafolaga a le Atua o le a faataunuuina? (e) O le ā o faatalitalia e Kerisiano e tusa ai ma le folafolaga a le Atua?
7 O le a faataunuuina ai le valoaga a Lē alofa na foafoaina mea, e pei ona aumaia i le Tusi Paia e le fai salamo: “O loo e faamafola lou aao, ma faamaoona le manao o mea ola uma lava.” (Salamo 145:16) Ioe, o manaoga tatau o tagata uma e matatau i le Atua o le a faamalieina atoatoa. E faigata foi ona tatou vaai faalemafaufau i ai i le ofoofogia o le ola o le a i ai i se lalolagi parataiso. Sa tusi le aposetolo o Peteru e faatatau i fuafuaga a le Atua mo le faamanuiaina o ona tagata e faapea: “A e faatalitali i tatou i le lagi fou ma le lalolagi fou, pei o lana na folafola mai [e le Atua], e mau ai le amiotonu.”—2 Peteru 3:13; Isaia 65:17; 66:22.
8. (a) Ai se ā tatou te le manaomia ai se lagi fou faitino? (e) O le ā le “lagi fou”?
8 O ā nei “lagi fou”? Ua le o ni lagi faitino. Ua atoatoa ona lelei le faia e le Atua o lo tatou lagi faitino, ma ua avatua ai sona viiga. (Salamo 8:3; 19:1, 2) O le “lagi” o i ai nei o loo faia ae i malo faia e tagata. O le a mavae atu nei mea i a Amaketo. (2 Peteru 3:7) O le “lagi fou” o le a na suia ia mea, o le malo faalelagi lea o le Atua. O lona tupu o Iesu Keriso. Ae peitai o le a pule foi faatasi ma ia le 144,000 o ona soo faamaoni o se vaega o le “lagi fou.”—Faaaliga 5:9, 10; 14:1, 3.
9. (a) O le ā le “lalolagi fou”? (e) O le ā le lalolagi o le a faaumatia?
9 O le ā le lalolagi fou”? E le o se paneta fou. Ua lelei ona saunia e le Atua lenei Lalolagi paneta mo le fanau a tagata e soifua ai, ma o lona finagalo ia tumau e faavavau. (Salamo 104:5) O le “lalolagi fou” ua faatatau i se sosaiete fou o tagata. Ua faaaoga soo e le Tusi Paia le upu “lalolagi fou” e uiga i ai. Mo se faaaʻoaʻoga, ua fai mai: “Se tasi lava le gagana . . . a le lalolagi [o lona uiga, tagata] uma.” (Kenese 11:1) O le “lalolagi” o le a faaumatia o tagata ian ua ave ma vaega o lenei faiga amio leaga o mea. (2 Peteru 3:7) O le “lalolagi fou” o le a suia i latou o le a faia ae i auauna faamaoni a le Atua o e ua vavae ese mai i lenei lalolagi o tagata amio leaga.—Ioane 17:14; 1 Ioane 2:17.
10. (a) O ai o loo aoaoina nei, ma i totonu o le ā? (e) E tusa ai ma mau o i itulau nei, o le ā o le a faia i le lalolagi parataiso e le o mafaia ona faia e malo faaletagata?
10 I le taimi nei, ua faapotopotoina tagata mai i lanu ma ituaiga eseese i totonu o le faapotopotoga Kerisiano, o e o le a faia ae ai le “lalolagi fou.” O le aufaatasi ma le filemu o loo lotolotoi i ai i latou ua na o sina uluai vaaiga itiiti lea o le mea o le a avea ai le ola i totonu o le lalolagi parataiso o se fiafiaga pe a mavae Amaketo. E moni lava, o le a aveesea e le malo o le Atua le mea e leai se malo faaletagata o faamoemoe na te faia. Sei manatunatu i isi o ia faamanuiaga ua faaataina i itulau mulimuli ane ai.
O SE AU USO FEALOFANI O LE FANAU UMA A TAGATA
“E le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu ua talia i latou e ia.”—Galuega 10:34, 35.
“Faauta foi i le motu o tagata e toatele mai atunuu uma, ma aiga, ma nuu, ma gagana eseese, . . . Latou te le toe fia aai, e le toe fia inu foi.”—Faaaliga 7:9, 16.
SAOGALEMU I LE VA O TAGATA MA MANU
“E nofo faatasi le luko ma le tamai mamoe, e taoto foi le nameri faatasi ma le tamai ʻoti; e faatasi foi le tamai povi ma le leona taanoa atoa ma le manu peti, e taʻitaʻiina foi i latou e le tama itiiti.”—Isaia 11:6; 65:25.
E LĒ TOE I AI LE MAʻI, TINO MATUA MA LE OTI
“Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.”—Isaia 35:5, 6.
“E ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.
O LE A TOE FAAFOISIA MAI E UA FEOTI I LE OLA
“E oo mai lea aso e faalogo ai i lona leo o i latou uma ua i tuugamau, ma latou o mai ai.”—Ioane 5:28, 29.
“Ua avae foi e le sami e na oti sa i ai, ua avae foi e le oti ma seoli e na oti sa i ai.”—Faaaliga 20:13.
11. O le ā e masani ona faaleagaina le ituaiga o parataiso o loo faia nei e tagata?
11 Maeu se lelei o le a i ai i le parataiso i lalo o le malo o le Atua, na i lo soo se mea e mafai ona aumaia e lenei faiga tuai o mea! E moni, o isi i aso nei ua latou faia o latou fanua e foliga mai o se parataiso. Ae o le tagata o ola ai i ia nofoaga atonu e saua pe manatu faapito, ma atonu e oo foi lava ina feainai. Mai se taimi o le a latou mamaʻi, ola matua ma feoti. E ui i lea, a uma Amaketo, o le lalolagi parataiso o le a aofia ai ni mea se tele e sili atu i lo na o fale matagofie, faatoaga ma paka.
12, 13. (a) O ā tulaga o le filemu o le a i ai pe a mavae Amaketo? (e) O le ā o manaomia ina ia faaooina mai ai nei tulaga?
12 Mafaufau i ai. O le a nonofo faatasi tagata o lanu ma ituaiga eseese o se aiga e tasi o uso ma tuafafine. O le a alofa moni le tasi i le tasi. E leai lava se tasi o le a manatu faapito po o le lē alofa. O le a leai se tasi e inoino i le isi ona o lona lanu ituaiga, po o le nuu foi e sau ai. O le a lē toe i ai le manatu faapito. Soo se tagata i le lalolagi o le a avea o se uo moni ma se tuaoi o tagata uma. E moni lava, o le a avea o se parataiso i se ala faaleagaga. Pe e te fia ola i lenei parataiso i lalo o le “lagi fou”?
13 I aso nei, ua tele ina talanoa tagata i le ola faatasi i le filemu ma ua oo foi ina faia se faalapotopotoga o “Malo Aufaatasi.” E ui i lea, ua faateteleina pea ona fevaevaeai tagata ma malo e sili atu na i lo muamua. O le ā o manaomia? E manaomia ona suia loto o tagata. Ae ua le mafaia e malo o lenei lalolagi ona faia faapea. Peitai, o loo faia lea e le feau a le Tusi Paia e uiga i le alofa o le Atua.
14. O le ā o loo tupu nei e faamaonia ai o le a oo mai nei tulaga faaparataiso?
14 I le aʻoaʻoina faatatau i lenei faiga fou amiotonu, ua faagaeetia ai loto o le toatele o tagata e alolofa i le Atua. Ma o lea, ua amata ai ona gaoioi i se auala alofa agai i isi, e pei lava ona faia e le Atua. (1 Ioane 4:9-11, 20) O le uiga o lenei mea o se suiga tele i o latou olaga. O le toatele sa saua ma faameo, pei o mea ola feai, ua avea nei ma e agamalu ma filemu. E pei o mamoe usiusitai, ua faapotopotoina mai i latou i le lafu Kerisiano.
15. (a) O ā vaega e lua o Kerisiano o loo i ai i ina? (e) O ai i latou muamua o le a faia ae ai le “lalolagi fou.”?
15 E sili ae i le 1,900 tausaga, sa aoaoina ai le “lafu mamoe” o le 144,000 o Kerisiano o ē o le a pule ma Keriso. E toa itiiti o totoe i le lalolagi; o le toatele ua pule nei ma Keriso i le lagi. (Luka 12:32; Faaaliga 20:6) S fetalai Iesu e uiga i isi Kerisiano: “Ua ia te au foi isi mamoe e le o i lenei lotoā [o le “lafu mamoe itiiti”]; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.” (Ioane 10:16) O se “motu o tagata e toatele” o “isi mamoe” ua aoaoina nei. O i latou ia faia ae ai le vaega muamua o le “lalolagi fou.” O le a puipuia i latou e Ieova mai le “puapuaga tele” i le iuga o lenei faiga amio leaga o mea ina ia sao i se parataiso faalelalolagi.—Faaaliga 7:9, 10, 13-15.
16. O le ā le vavega o le a avea ai le ola faatasi ma mea ola o se fiafiaga?
16 A mavae Amaketo ona faaopoopo atu lea o se tasi vavega i tulaga faaparataiso. O mea ola e pei o leona, taika, nameri ma urosa o lo o matautia i aso nei, o le a lalata. Faauta i le matagofie o lou savalivali i se togavao mo sina taimi ae faatasi ane i ou tafatafa se leona, ma atonu mulimuli ane o se urosa tele! O le a lē toe matau se tasi i se mea ola.
17, 18. (a) O le ā le pogai mo le lē fiafia o le a lē toe i ai i le lalolagi parataiso? (e) Ai se ā e mafai ai ona tatou mautinoa o le soifua maloloina lelei atoatoa o le a fai ma oliolisaga mo tagata uma?
17 Ae, e tusa pe matagofie fale ma togalaau, po o le ā foi le alolofa ma le agalelei o tagata po o le lalata o mea ola, afai tatou te mamaʻi, matutua ma feoti, o le a i ai pea la le faanoanoa. Ae o ai na te faafoisia mai le soifua tele atoatoa i tagata uma? Ua le taulau i malo o tagata ona tafiesea le kanesa, maʻi fatu ma isi faamaʻi. E ui ina atonu o le a mafai ona latou faia, fai mai fomaʻi o a lē taofia ai tagata mai i le matua. O le a tatou ola matutua pea ma iu ina leaga la tatou vaai, vaivai o tatou maso, maanuminumi paʻu ma leaga o tatou totoga. Sosoo ai ma le oti. Paga se faanoanoa!
18 A mavae Amaketo, o le lalolagi parataiso, o se vavega sili a le Atua o le a suia atoatoa lena tulaga, auā ua fai mai le Tusi Paia: “E le fai mai foi se tasi ua mau ai, ou te maʻi.” (Isaia 33:24) A o i ai Iesu Keriso i le lalolagi, sa faamaonia lona mana e faamalolo ai ituaiga o maʻi uma ma faamaʻi, ua oo mai ona o le agasala tuufaasolo mai i a Atamu ma Eva. (Mareko 2:1-12; Mataio 15:30, 31) O le a taofia foi auga matua i le pule a le Malo. O e matutua o le a toe aifoi. Ioe, ‘o le a sili ona fou le tino o le tagata na i lona talavou.’ (Iopu 33:25) Maeu se faagaeetia o lou maleifua mai i taeao taitasi ua sili atu lona malosi na i lo le aso ua tuanai!
19. O le ā le fili o le a tafieseina, ma e faapefea?
19 E moni, e leai se tasi o ola i lona tulaga talavou, soifua lelei atoatoa i se lalolagi parataiso e manao e oti. Ma e leai se tagata e fia oti. O le mauaina o aoga o le taulaga togiola o lona uiga mulimuli lava o le olioli i le mea alofa sili a le Atua “o le ola e faavavau . . . i lo tatou Alii o Keriso Iesu.” (Roma 6:23) E pei o a fa le Tusi Paia, e ao i a Keriso ona ‘pule o se tupu seia tuuina e le Atua ona fili uma i lalo o ona vae. O le toe fili e faaumatia, o le oti lea.’—1 Korinito 15:25, 26; Isaia 25:8.
20. O ai, e ese mai i tagata o loo soifua nei, o le a fiafia i le lalolagi parataiso, ma pe e mafai faapefea?
20 E oo foi i ē ua maliliu nei o le a olioli i le lalolagi parataiso. O le a toe aumaia i latou i le ola! O lea i lena taimi, na i lo le faasilasilaina o se maliu, o le a i ai se tala fiafia faatatau i e ua toe faatutuina. Maeu le ofoofogia o le toe faafeiloaia mai le tuugamau o tamā ua maliliu, tinā, fanau ma isi o ē pele! E lē toe i ai ni fale mo falelauasiga, fanua tanu, po o tia e totoe e faaleagaina ai le matagofie o le lalolagi parataiso.
21. (a) O ai o le a fesoasoani ina ia iloa ua tauaveina tulafono ma faatonuga o le “lalolagi fou”? (e) E mafai faapefea ona tatou faaalia tatou te manaomia moni lava le “lagi fou” ma le “lalolagi fou”?
21 O ai o le a pulea galuega i le lalolagi parataiso? O faatonuga ma tulafono uma o le a sau mai le “lagi fou” i luga. Ae i le lalolagi o le a i ai tane faamaoni e tofia ina ia tagai i ai ua faataunuuina nei faatonuga ma tulafono. Ma talu ai o nei tane ua fai ma sui o le malo faalelagi i se auala faapitoa, ua taʻua e le Tusi Paia i latou o “alii sili.” (Isaia 32:1, 2; Salamo 45:16) E oo lava i aso nei i le faapotopotoga Kerisiano, ua tofia ni tane e le agaga paia o le Atua ina ia vaaia ma faatonutonuina ana galuega. (Galuega 20:28) A uma Amaketo e mafai ona tatou mautinoa o le a tagai i ai Keriso ua tofia tane agavaa e fai ma sui o le pulega a le Malo, auā o le a ia gaoioi tuusaʻo mai i mataupu o le lalolagi. E mafai faapefea ona e faaalia o loo e faatalitali atu ma le naunau i le “lagi fou” ma le “lalolagi fou” a le Atua? E ala i le fai o mea uma e te mafai e ausia ai agavaa mo le ola i totonu o lena faiga fou amiotonu.—2 Peteru 3:14.
[Fesili mo le Suʻesuʻega]
