Mataupu 15

Ia Avea Ma se Tagatanuu o le Pulega a le Atua

1, 2. O le ā e manaomia ina ia avea ma tagatanuu o le malo o le Atua?

PE E TE MANAO e ola e faavavau i le lalolagi i le pulega a le Atua? O soo se tagata o saʻo lona mafaufau o le a tali mai, Ioe! O le a olioli i faamanuiaga ofoofogia. Ae ina ia maua, e lē lava le sii o lou lima ma faapea mai: ‘E fia avea au ma tagatanuu o le pulega a le Atua.’ E tele se vaega o manaomia.

² Mo se faataʻitaʻiga, sei faapea ua fia avea oe ma tagatanuu o se isi atunuu. Ina ia mafai, e tatau ona e ausia agavaa ua faatulaga e pule o le malo o lena atunuu. Peitai, a o lei e faia faapea, e manaomia ona e aʻoaʻoina po o ā nei agavaa. O se auala foi la faapea, e manaomia ona e aʻoaʻoina po o ā e finagalo i ai le Atua mai i a i latou o ē e mananao e avea ma tagatanuu o lana pulega. Ma e ao la ona e ausia ia agavaa.

MANAOMIA LE POTO

3. O le ā le tasi o mea moomia ina ia avea ma se tagatanuu o le malo o le Atua?

³ O se agavaa tāua i le avea ma tagatanuu o le pulega a le Atua o le maua lea o le poto i lana “gagana.” Ua alaga tatau lenei mea. O isi pulega faaletagata ua manaomia foi e o latou tagatanuu fou ona tatau ona tautala i gagana a lo latou atunuu. O le ā la le “gagana” e ao ona aʻoaʻoina e i latou o le a ola i le pulega a le Atua?

4. O le ā le “gagana lelei” e tatau i tagata o le Atua ona aʻoaʻoina?

⁴ Matau le mea ua tulei i ai Ieova i lana Afioga, le Tusi Paia: “Auā o ona po ia ou te liliu atu ai i nuu o le gagana lelei, ina ia latou valaau uma lava i le suafa o Ieova, ma auauna ia te ia ma le loto gatasi.” (Sefanaia 3:9) O lenei “gagana lelei” o le upu moni a le Atua ua maua i le Tusi Paia. Ia faga tonu le malama, o le upu moni e uiga i le pulega o le Malo o le Atua. O lea, ia avea ma tagatanuu o le pulega a le Atua, e tatau ona  e aʻoaʻo i lenei “gagana” e ala i le aveina i totonu o le poto e uiga i a Ieova ma lana fuafuaga o le Malo.—Kolose 1:9, 10; Faataoto 2:1-5.

5. (a) O le ā e tatau ona tatou iloa e tusa ma le malo o le Atua? (e) O le ā le poto tatou te manomia ina ia maua ai le ola e faavavau?

⁵ I aso nei, ua manomia e isi malo faaletagata le tatau i ē mauaina le tagatanuu ona iloa le talafaasolopito o la latou pulega, e faapena foi ma le galueaiina. E faapea foi ona tatou ona e iloa ni mea i le pulega a le Atua pe afai o le a avea oe ma se e pule mai i ai. O lenei poto e taʻitaʻia atu ai i le ola e faavavau. I le tatalo i lona Tamā, sa tulei Iesu: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.

6. (a) O ā ni isi o fesili e ao e tagatanuu o le malo o le Atua ona taliina? (e) Pe e mafai ea ona e talia ia fesili?

⁶ Afai ua e suesue i mataupu muamua o lenei tusi, ua ao na e mauaina le tele o lenei poto e silisili ona tāua. Pe ua e mauaina? Pe e mafai ona faamaonia i lou taliina o fesili nei: O anafea na uluai taʻua ai e le Atua lana fuafuaga mo le pulega mo se Malo? O ai isi o auauna a le Atua sa vaavaai atu i le lumanai i le avea ma ona tagatanuu i le lalolagi? E toafia tupu o le a i ai i le pulega a le Atua? O fea e pule mai ia nei tupu? O ai na muai filifilia e avea ma tupu i le pulega a le Atua? Na faamaonia faapefea e Iesu o le a avea o ia ma se tupu lelei? Peitai, ia avea  ma tagatanuu o le pulega a le Atua, e tele e manaomia na i lo le maua o le poto e uiga i ai.

E MANAOMIA LE AMIOTONU

7. E tusa ai ma malo faaletagata, e faapefea ona eseese agavaa mo le avea ma tagatanuu?

⁷ Ua manaomia e pulega i aso nei le ausia e ona tagatanuu fou amio faapitoa ua faatulaga. Atonu e fai mai e na o le tasi le avā a le tane, e tasi foi le tane a le fafine. O isi pulega e ese foi a latou tulafono. E faataga o latou tagatanuu ia sili i le tasi le paaga faaipoipo. O ā amioga tatau mo tagata o ē e mananao e avea ma tagatanuu o le pulega a le Atua? O le ā ua tulei i ai le Atua ua tonu e tusa ma faaipoipoga?

8. (a) O le ā le tulaga a le Atua mo faaipoipoga? (e) O le ā le mulilua, ma o le ā ua tulei faatatau i ai le Atua e uiga i lea tulaga?

⁸ Na faataatia e Ieova tulaga tau i faaipoipoga ina ua na tuuina atu i a Atamu ma le avā e tasi. Ua tulei le Atua: “O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o laua ma tino e tasi.” (Kenese 2:21-24) Ona ua avea paaga faaipoipo ma “tino e tasi,” o le a lē faamamaluina e i laua le faaipoipoga pe afai o le a la faia ni feusuaiga faaleituaiga ma se isi tagata. Ua taʻua lea o le mulilua, ma ua tulei le Atua o le a faasalaina ē mulilulua.—Eperu 13:4; Malaki 3:5.

9. (a) O le ā le silasila a le Atua i tagata o ē faia feusuaiga faaleituaiga ae e lei faaipoipo? (e) O le ā le faitaaga?

⁹ I le isi itu, e toatele ulugalii ua faatasia ma faia ni feusuaiga faaleituaiga, a e lei faaipoipoina. Sa lei faauigaina e le Atua lenei faiā mafana i le va o le tamaloa ma le fafine e avea o ni faiga faataʻitaʻi sei iloa pe lelei. O lea o le nonofo faatasi e aunoa ma le faaipoipoina o se agasala faasaga i le Atua, o lē na faavaeina le faaipoipoga. Ua taʻua lea mea o le faitaaga. O le faitaaga o le faia lea o ni faiga faaleituaiga ma soo se tagata e te lei faaipoipo i ai. Ma ua fai mai le Tusi Paia: “O le finagalo foi lenei o le Atua, . . . ina ia faamamao outou ma le faitaaga.” (1 Tesalonia 4:3-5) O lea la, ua sese pe a faia e se tagata nofo fua se feusuaiga ma soo se tasi lava.

10. O ā isi feusuaiga faaleituaiga e le tusa ma le tulafono a le Atua?

¹⁰ E toatele tane ma fafine ua faia nei ni faiga tau feusuaiga  ma tagata o lo latou lava ituaiga—tane i tane fafine i fafine. Ua taʻua i latou o tauatane. Ua taʻua o fafine faapea o tauafafine. Fai mai le Afioga a le Atua o mea ua latou faia e sese, ma “e masiasi ai.” (Roma 1:26, 27) Ua lē tusa ma le tulafono a le Atua le faia e se tagata o se feusuaiga ma se manu. (Levitiko 18:23) O ē mananao e ola i lalo o le pulega a le Atua e manaomia ona alo ese mai i faiga faaleituaiga e lē mamā.

11. (a) O le ā le finagalo o le Atua e tusa ma le faaaogaina o ava malosi? (e) O i latou o ē mananao e avea ma tagatanuu o le pulega a le Atua e tatau ona alo ese mai i ā faiga e faaleagaina ai le soifua maloloina?

¹¹ E lē tetee le tulafono a le Atua i le inu fuafua tatau o le uaina, pia po o le ava. Ua faaalia e le Tusi Paia sina uaina e mafai ona aogā mo le soifua maloloina o se tagata. (Salamo 104:15; 1 Timoteo 5:23) O le onā, po o le auai i faatasitasiga lē pulea o faia ai ni faiga faaleituaiga lē mama ua solia ai tulafono a le Atua. (Efeso 5:18; 1 Peteru 4:3) E faaopoopo atu i le faaaogaina o ava malolosi ina ia onā pe “lele” ai, ua toatele tagata i aso nei ua faaaoga fualaau eseese faasaina mo lenei lava tulaga. E lē gata i lea, atonu latou te ulaina le mariuana po o le tapaa mo lo latou fiafiaga, a o isi atonu latou te lamuina fua (betel nut) po o lau o isi laau oona e pei o le coca. Ae o mea nei e faaleagaina ai o latou tino ma lo latou soifua. O lea afai e te fia avea ma tagatanuu o le pulega a le Atua, e tatau ona e alo ese mai nei faiga.—2 Korinito 7:1.

12. (a) O ā ni isi o faiga lē tonu e faasaga tau i tulafono a le Atua? (e) E mafai faapefea e se tagata o auai i ia faiga, ona maua le finagalo lelei o le Atua?

¹² Ua manino lava e lē mananao pulega a tagata i ē solitulafono e avea ma o latou tagatanuu fou. Ma o Ieova e sili atu ona maualuga ona tulaga. Ua manaomia e ia ona tatou “amio lelei i mea uma.” (Eperu 13:18) Afai e lē tausia e tagata tulafono a le Atua, o le a lē faatagaina i latou e ola i lalo o lona malo. I aso nei, ua masani ona faafoliga mai tagata e faamaoni, ae ua latou solia le tele o tulafono. Ae ua mafai e le Atua ona silafia mea uma lava. E leai se tagata e mafai ona faavaleaina o ia. (Eperu 4:13; Faataoto 15:3; Kalatia 6:7, 8) O lea o le a faamautinoa lelei e Ieova, o i latou e solia ana tulafono, e pei o le gaoi ma le pepelo, o le a lē avea ma tagatanuu o lana pulega. (Efeso 4:25.28; Faaaliga 21:8) E ui i lea e onosai le Atua ma toe loto faamagalo. Afai e tuu ese tagata fai mea sese ana faiga  leaga ae fai le lelei, o le a talia o ia e le Atua.—Isaia 55:7.

13. O le ā le vaaiga e tatau i auauna a le Atua ona maua e tusa ma tulafono o malo faaletagata?

¹³ A e faapefea le tausia o tulafono o pulega a tagata? A o i ai pea ia pulega, ua manaomia e le Atua ana auauna ia usiusitai i nei “faipule silisili.” E ao ona totogi lafoga e ui ina maualuluga ma atonu foi e lē ioe se tasi i ala o faaaogā i ai ia tupe. E ao foi ona usiusitai i tulafono a le malo. (Roma 13:1, 7; Tito 3:1) Ua na o le pau lava le tulaga ese i lea mea pe afai o le usiusitai i le tulafono o le a faapogaia ai ona lē usiusitai se tagata i le tulafono a le Atua. I lea la tulaga, e pei o fa a Peteru ma isi aposetolo, “E tusa ona sili o lo matou anaana i le Atua i lo matou anaana i tagata.”—Galuega 5:29.

14. E mafai faapefea ona tatou faaalia o loo auai i tatou e tusa ma le silasila a le Atua i le tāua o le ola?

¹⁴ Ua tāua i le Atua le ola. O ē fia ola i lana pulega e ao ona malamalama i lea. O le fasioti tagata ua lē tusa ma le tulafono  a le Atua. Ae o le ita e masani ona iu i le fasioti tagata, ma pe a ita pea se tasi i lona uso a tagata, e lē avea la lē o ita ma tagatanuu o le pulega a le Atua. (1 Ioane 3:15) Ua ao la, ona fai le mea o taʻua i le Tusi Paia i le Isaia 2:4 e uiga i le lē faaaoga o auupega e fasiotia o tatou tuaoi. I le Tusi Paia o le ola o se pepe i le manava o le tinā e tāua i a Ieova. (Esoto 21:22, 23; Salamo 127:3) Peitai e faitau miliona faapaʻūga tama ua faia i tausaga taitasi O lea faatamaia o ola ua le tusa ma tulafono a le Atua, ona o le tagata i totonu o lona tinā o se tagata ola ma e lē tatau ona faaumatia.

15. O ā faatonuga o le Tupu a le Atua e tatau i tagatanuu uma o le Malo ona usiusitai i ai?

¹⁵ O ē e avea ma tagatanuu o le pulega a le Atua, e tele mea e manaomia na i lo le lē faia o mea sese po o amioga lē mamā. E ao ona taumafai moni ia faia le agalelei ma mea lē manatu faapito mo isi. E ao ona ola e tusa ma le tulafono faaleatua a le Tupu o Iesu Keriso: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.” (Mataio 7:12) Na faia e Keriso le faaaʻoaʻoga i le faaaliga o le alofa mo isi. Na oo foi ina tuu atu lona ola mo le fanau a tagata, ma fai i ona soo: “Ia outou fealofani; faapei ona ou alofa atu i a te outou.” (Ioane 13:34; 1 Ioane 3:16) O le alofa lea lē faapito ma le naunau mo isi e avea ai le olaga ma fiafiaga moni i lalo o le malo o le Atua.—Iakopo 2:8.

16, 17. (a) O ā mafuaaga lelei ua i ai mo le faia o suiga i o tatou olaga ina ia ausia agavaa a le Atua? (e) Ai se ā e mafai ai ona tatou mautinoa e mafai ona tatou faia soo se suiga ua manaomia?

¹⁶ Ua faaalia e le Tusi Paia e tatau i tagata ona suia o latou olaga ina ia mafai ona ausia agavaa mo le avea ma tagatanuu o le pulega a le Atua. (Efeso 4:20-24) Pe o e galue ia faia nei suiga? Ma le mautinoa lava ua aoga soo se taumafaiga mo le faia faapea! Ai se ā? E lē faapea o le a na ona e maua ai se olaga lelei i ni nai tausaga i se pulega faaletagata. E leai, ae o le a e mauaina le ola e faavavau ma le malosi atoatoa i se lalolagi parataiso i se malo e pulea e le Atua!

¹⁷ I lenei taimi foi, o le ausia o agavaa a le Atua, o le a e olioli ai i se fiafia. Ae atonu e manaomia ona e faia ni suiga. E toatele tagata sa feita po o le matapeapea ua suia. O ē foi e faitaaga, mulilua, tauatane, onā, fasioti tagata, gaoi, pulea e fualaau faasaina ma ulaula tapaa ua suia o latou ala. Ua mafaia  ona o taumafaiga moni faatasi ma le fesoasoani a le Atua. (1 Korinito 6:9-11; Kolose 3:5-9) Afai la e i ai ni suiga faigata e ao ona fai ia ausia mea ua moomia e le Atua, aua e te faavaivai. E mafai ona e faia!

FAAMAONI I LE MALO O LE ATUA

18. O le ā le ala faapitoa ua faatalitalia e le Atua mai i a i tatou ina ia faaalia lo tatou lagolago faamaoni mo lona malo?

¹⁸ Ua manaomia e Ieova le Atua ona tagatanuu ia lagolago ma le faamaoni foi e pulega faaletagata lea mea mai i o latou tagatanuu. Ae o le ā le auala faapitoa ua faatalitalia e le Atua ona tagata faamaoni e avatu? E ala i le aveina e ona tagata o auupega e tau ai mo lona malo? E leai. Na i lo lena, ia pei o Iesu Keriso ma ona uluai soo, e ao na avea ma ni fofoga fetalai faamaoni po o ē folafola le malo o le Atua. (Mataio 4:17; 10:5-7; 24:14) O le finagalo o Ieova ia iloa e tagata uma po o le ā lona malo ma pe faapefea foi ona faaleleia e ia faafitauli o le fanau a tagata. Pe ua e tufaina atu ea mea ua e aʻoaʻoina mai i le Afioga a le Atua i ou aiga, i uo ma isi? O le finagalo lea o le Atua ia e faia.—Roma 10:10; 1 Peteru 3:15.

19. (a) Ai se ā tatou te faatalitalia ai teteega pe a tatou tautala atu i isi e uiga i le malo o le Atua? (e) O ā fesili e tatau ona e taliina?

¹⁹ Na manaomia e Keriso ma ona uluai soo le loto tele e tautala atu ai i isi e uiga i le Malo, auā sa masani ona fetaiai ma teteega. (Galuega 5:41; 42) Ua faapea foi i aso nei. O lenei lalolagi pulea e le Tiapolo, e lē manao e talaʻia atu le tala lelei o le Malo. O lea, o fesili la nei: O fea e te tu ai? Pe o le a e lagolagoina faamaoni ea le malo o le Atua? O lona finagalo e tatau ona talaʻia le Malo a o lei oo mai le iʻuga. Pe o le a faia ea sau vaega i le tuuina atu o lea?

[Fesili mo le Suʻesuʻega]

[Ata i le itulau 128]

O i latou e avea ma tagatanuu o le pulega a le Atua e ao ona maua le poto e faatatau i lea

[Ata i le itulau 131)

O tagatanuu o le malo o le Atua e ao ona alo ese mai i amioga e taʻusalaina e le Atua.

[Ata i le itulau 133]

O tagatanuu o le malo o le Atua e ao ona latou tala atu i isi e uiga i lea.