Iloaina o le Tapuaiga Moni
Mataupu 22
Iloaina o le Tapuaiga Moni
1. O ai ē na faia le tapuaiga moni i le uluai senituri?
E LE MAFAI ona masalomia po o ai sa faia le tapuaiga moni i le uluai senituri. Sa o soo o Iesu Keriso. O i latou uma sa auai i le faalapotopotoga Kerisiano e tasi. Ae e faapefea i aso nei? E faapefea ona iloa ē o loo faia le tapuaiga moni?
2. E faapefea ona iloaina ē faia le lotu moni?
2 I le faamatala pe e mafai faapefea ona tatou faia lea, sa fetalai Iesu: “Tou te iloa i latou i o latou fua . . . E faapea foi laau lelei taitasi ma fua mai i fua lelei; a o laau leaga e fua mai i fua leaga . . . O lea foi tou te iloa ai i latou i o latou fua.” (Mataio 7:16-20) O ā fua lelei e fuaina mai e ē o tapuai faamaoni i le Atua? O le ā e ao ona latou tautala ma faia nei?
FAAPAIAINA O LE SUAFA O LE ATUA
3, 4. (a) O le ā le talosaga muamua na faia e le Tatalo Faaaʻoaʻo a Iesu? (e) Sa faapefea ona faapaia e Iesu le suafa o le Atua?
3 O ē tapuai faamaoni i le Atua o le a gaoioi e talafeagai ma le Tatalo Faaaʻoaʻo na tuuina na tuuina e Iesu i ona soo. O le mea muamua na taʻua e Iesu o lenei: “Lo matou Tamā e, o i le lagi, ia paia lou suafa.” Ua faaliliu e se tasi o faaliliuga o le Tusi Paia nei upu: “Ia tumau ona taofia lou suafa paia.” (Mataio 6:9,Jerusalem Bible) O le ā le uiga o le faapaiaina, po o le taofia ia paia le suafa o le Atua? Sa faapefea ona faia e Iesu?
4 Sa faaalia e Iesu le auala na ia faia ai ina ua ia tatalo atu i lona Tamā: “Ua ou faaali atu lou suafa i tagata na e foai mai ai te au ai le lalolagi.” (Ioane 17:6) Ioe, na faaalia e Iesu le suafa o le Atua, o Ieova, i isi. Sa ia faaaogaina pea lea suafa. sa silafia e Iesu o le fuafuaga a lona Tamā ia faapaia Lona suafa i le lalolagi uma. O lea na ia faataatia ai le faaaʻoaʻoga i le folafolaina ma le faapaiaina o lea suafa.—Ioane 12:28; Isaia 12:4, 5.
5. (a) E faapefea ona fesootai le faapotopotoga Kerisiano ma le suafa o le Atua? (e) O le ā e tatau ona tatou faia ina ia maua ia le faaolataga?
5 Ua faaalia e le Tusi Paia o le autu o le i ai o le faapotopotoga o Kerisiano moni e fesootai lea ma le suafa o le Atua. Sa faamatala e le aposetolo o Peteru ua liliu atu le Atua “i nuu ese e maua ai se nuu mo lona suafa.” (Galuega 15:14) E ao i tagata moni o le Atua ona tausia lona suafa o se mea paia ma faailoa i le lalolagi atoa. E manaomia le iloa o lea suafa mo le faaolataga, e pei ona fai mai le Tusi Paia: “Auā e faaolaina i latou uma o e valaau i le suafa o Ieova.”—Roma 10:13, 14, NW.
6. (a) Pe o taofia ea e le tele o lotu le suafa o le Atua ia paia? (e) Pe e i ai ea ni isi o e molimau i le suafa o le Atua?
6 O ai o aso nei o tausia le suafa o le Atua e paia ma faailoa i le lalolagi atoa? O le tele o lotu ua alo ese i le faaaoga o le suafa o Ieova. O isi ua oo ina aveesea lea suafa mai i a latou faaliliuga o le Tusi Paia. E ui i lea, afai e te talanoa i ou tuaoi ma e te faaaoga soo le suafa o Ieova, o le ā le faalapotopotoga o le a latou faatasia atu i ai oe? Ua na o le tasi le vaega o tagata o loo mulimuli moni i le faaaʻoaʻoga a Iesu i lenei tulaga. O lo latou sini i le olaga o le auauna lea i le Atua ma molimau i lona suafa e pei ona sa faia e Iesu. O lea ua latou aveina ai le igoa faale-Tusi Paia o “Molimau a Ieova.”—Isaia 43:10-12.
FOLAFOLAINA O LE MALO O LE ATUA
7. Sa faapefea ona faaalia e Iesu le tāua o le malo o le Atua?
7 I le Tatalo Faaaʻoaʻo na tuu mai e Iesu, sa ia faaalia ai le tāua o le malo o le Atua. Sa ia aʻoaʻo tagata ia tatalo: “Ia oo mai lou malo.” (Mataio 6:10) Ua matua faamamafa e Iesu le Malo ua na o lea le vaifofo mo faafitauli o le fanau a tagata. Sa faia e ia ma ona aposetolo lenei mea e ala i le talaʻi i tagata e uiga i lena malo mai ‘i lea nuu ma lea nuu’ ma mai i “lea fale ma lea fale.” (Luka 8:1; Galuega 5:42; 20:20) O le malo o le Atua sa fai ma matua o la latou talaʻiga ma le aʻoaʻo atu.
8. Pe sa faapefea ona faaalia e Iesu po o le ā le feau autu a ona soo faamaoni i nei “aso e gata ai”?
8 A e faapefea i o tatou aso? Po o le ā le ioimata o le aʻoaʻoga o le faalapotopotoga o Kerisiano moni? Sa fetalai Iesu i le valoiaina o nei “aso e gata ai”: “E talaʻiina atu foi lenei tala lelei o le malo i le atu laulau uma, e fai ma molimau e nuu uma; ona oo mai ai lea o le gataaga.” (Mataio 24:14) O lea o le Malo e tatau ona avea ma feau autu a tagata o le Atua i aso nei.
9. O ai tagata i aso nei o loo talaʻia le feau o le Malo?
9 Fesili ifo: Afai e sau se tagata i lou fale ma tautala i le malo o le Atua ua na olea le faamoemoe o le fanau a tagata, o le ā le faalapotopotoga e te faatasia i ai o ia? Pe ua talanoa tagata o isi lotu ia te oe, e ese mai i Molimau a Ieova, i le malo o le Atua? Ioe, e toaitiiti o iloa po o le ā le malo! Latou te lē gagana e uiga i le pulega a le Atua. Peitai, o lea pulega o se tala e gatete ai le lalolagi. Sa valoia e le perofeta o Tanielu o lea malo ‘na te tuʻimomomoina ma faaumatia malo uma, ma ua na o ia o le a pule i le lalolagi.’—Tanielu 2:44.
FAAALOALO MO LE AFIOGA A LE ATUA
10. Sa faapefea ona faaalia e Iesu le faaaloalo mo le Afioga a le Atua?
10 O se tasi ala e iloa ai ē o loo faia le lotu moni o lo latou uiga lea agai i le Tusi Paia. Sa faaalia e Iesu le faaaloalo mo le Tusi Paia i taimi uma. Na te augani atu o lea le pule mulimuli i mataupu. (Mataio 4:4, 7, 10; 19:4-6) Sa faaaloalo foi Iesu i le Tusi Paia i le ola e talafeagai ma ana aʻoaʻoga. Sa lei taitai ona ia taʻufaatauvaaina le Tusi Paia. Na i lo lea, sa ia taʻusalaina i latou o ē na lē taulau ona aʻoaʻo e talafeagai ma le Tusi Paia ma ē na taumafai faavaivaia le malosi o ana aʻoaʻoga i le faamuamuaina o o latou manatu.—Mareko 7:9-13.
11. O le ā le vaaiga agai i le Afioga a le Atua e masani ona faaalia e lotu?
11 O faapefea ona fua lotu a Kerisinetoma e tusa ma le faaaʻoaʻoga a Keriso i lenei tulaga? Pe o latou faaaloalo loloto ea mo le Tusi Paia? E toatele taʻitaʻi lotu o aso nei e lē talitonu i tala a le Tusi Paia i le paʻū o Atamu i le agasala, le lolo o aso o Noa, Iona ma le iʻa lapoa, ma isi. Ua latou fai mai foi ua i inei le tagata e ala i le evolusione, ae e lē o i le faia tuusaʻo e le Atua. Pe o latou uunaia ai i lea se faaaloalo i le Tusi Paia? Ua finau mai foi isi taʻitaʻi lotu o feusuaiga i fafo o le faaipoipoga e lē sese, o le tauatane po o le tele o avā e le afaina. Pe o latou uunaia tagata e faaaoga le Tusi Paia o so latou taʻiala? E le o mulimuli i latou i faaaʻoaʻoga a le Alo o le Atua ma aposetolo.—Mataio 15:18, 19; Roma 1:24-27.
12. (a) Ai se ā e le fiafia ai le Atua i tapuaiga a le toatele o ē e oo foi ina latou faaaogaina le Tusi Paia? (e) Afai o le a faataga pea ē faia ma le loto i ai mea leaga e tumau i se tulaga lelei ma le lotu, o le ā sa tatou faaiuga e tatau ona fai?
12 O loo i ai tagata lotu o loo i ai le Tusi Paia ma e oo foi ina latou suesueina, ae o le auala o ola ai o latou olaga o loo faaalialia latou te le o mulimuli atu i ai. Ua fai mai le Tusi Paia e faatatau i ia tagata: “Ua latou taʻu ane ua latou iloa le Atua, a e faafiti ia te ia i a latou galuega.” (Tito 1:16; 2 Timoteo 3:5) Afai e pelē tupe ma onā pe faia foi isi mea leaga e tagata lotu, a e faataga pea ia i ai i se tulaga lelei ma le lotu, o le ā ua faaalia e lenei mea? Ua faamaonia o la latou faalapotopotoga lotu e lē taliaina e le Atua.—1 Korinito 5:11-13.
13. O le ā le filifiliga tāua e tatau i se tagata ona fai pe afai ua na maua e lē talafeagai aʻoaʻoga uma a lana lotu ma le Tusi Paia?
13 Afai na e manatunatu i mataupu ua mavae o lenei tusi, ma mafaufau i mau o loo i ai, ua oo nei la ina e iloa aʻoaʻoga faavae o le afioga a le Atua. A e faapefea nei pe afai ua le talafeagai aʻoaʻoga a se faalapotopotoga lotu o loo e faatasitasi atu i ai ma ia o i le Afioga a le Atua? Ia, ona i a te oe lea o se faafitauli matuia. O le faafitauli la, o le filifilia o le faamaoni o le Tusi Paia, po o le tetee i ai ae lagolagoina aʻoaʻoga e lē o faamaonia e le Tusi Paia. O lea mea te faia, o le mea moni o lau lava lea filifiliga. E ui i lea e tatau ona e fuaina mataupu ma le faaeteete. O le pogai o lenei mea ona o le faaiuga e te faia o le a aafia ai lou tulaga ma le Atua ma lou faamoemoe o le ola e faavavau i parataiso i le lalolagi.
TAUSIA O LE VAVAE ESE MAI LE LALOLAGI
14. (a) O le ā le isi faailoga e iloa ia le tapuaiga moni? (e) Ai se ā e tāua ai le ausia e ē tapuai ma le faamaoni lenei mea tatau?
14 E ui i lea, o se tasi o faailoga e iloa ai ē o loo faia le tapuaiga moni, o lea e pei ona fetalai i ai Iesu, “e le ni o le lalolagi i latou.” (Ioane 17:14) O le uiga, o ē tapuai faamaoni e tausia lo latou vavae ese mai i le lalolagi malaia ma ana mataupu. Sa teena e Iesu le avea o ia ma pule i mataupu faalemalo o tagata. (Ioane 6:15) Ua mafai la ona e talisapaia le mafuaaga ua tāua ai le tausia o le vavae ese mai le lalolagi pe afai e te manatua ua fai mai le Tusi Paia o Satani le Tiapolo o le pule o le lalolagi. (Ioane 12:31; 2 Korinito 4:4) O le matautia o lenei mataupu ua iloa atili i faamatalaga a le Tusi Paia: “O sē fia uo ma le lalolagi, ua avea ia ma ita i le Atua.”—Iakopo 4:4.
15. (a) Pe o avea ea tapuaiga o e alu i ai ma “le ni o le lalolagi” moni? (e) Pe e te iloa se tapuaiga e ausia lea tulaga manaomia?
15 Pe ua faaalia e mea moni ua avea i loto lenei mataupu e lotu i lou alaalafaga? Pe o avea ea faifeau faapea foi ma le aulotu o ni tagata moni “e le ni o le lalolagi”? Po o le, pe lē o aafia loloto ea i latou i le lotonuu, polotiki ma fevaevaeaiga faaleituaiga a le lalolagi? E le faigata ona tali ia fesili, ona ua lauiloa faiga a lotu. I le isi itu, ua faigofie foi ona suesue galuega a Molimau a Ieova. I le faia faapea, o le a e maua ai o loo mulimuli moni i latou i le faaaʻoaʻoga a Keriso ma ona uluai soo e ala i le tausia o le vavae ese mai le lalolagi, ana faiga faalemalo ma ona ala manatu faapito, amio leaga, ma le saua.—1 Ioane 2:15-17.
LATOU TE FEALOFANI
16. O le ā se ala tāua e mafai ona iloa ai soo moni o Keriso?
16 O le ala e sili ona tāua e mafai ai ona iloa soo moni o Keriso o lo latou fealofani. Sa fetalai Iesu: “O le mea lea e iloa ai e tagata uma lava o ou soo outou, pe afai ua outou fealofani.” (Ioane 13:35) Pe o i ai i le faalapotopotoga o loo e agai atu i ai lenei fealofani? Po o le ā latou te faia, pe a fetauai atunuu o latou auai se isi atunuu, e fai ma faaaʻoaʻoga?
17. E faapefea ona fua aʻe faalapotopotoga lotu ma o latou tagata i lenei manaoga o le faaalia o lo latou fealofani?
17 Ua e iloa le mea e tupu soo. E o atu tagata o lotu eseese i le tafa o le taua ma fasia o latou lava uso i le faatuatuaga tutusa o i isi atunuu, i le poloaiga a tagata faalelalolagi. I lea fasioti e le Katoliko le Katoliko, fasioti e le Porotesano le Porotesano ma fasiotia e le Mosalema le Mosalema. Pe e te manatu e tusa lea ma le Afioga a le Atua ma faaalia ai le agaga moni o le Atua?—1 Ioane 3:10-12.
18. E faapefea ona fua aʻe Molimau a Ieova i lenei tulaga o le faaalia o le alofa o le tasi i le isi?
18 E faapefea Molimau a Ieova i lenei mataupu o le alofa o le tasi i le tasi? Latou te lē mulimuli i ala o lotu a le lalolagi. Latou te lē fasia o latou uso talitonu i tafa o le taua. Ua le nofosala i latou i le ola pepelo i le faapea atu: “Ou te alofa i le Atua”, a e ita i o latou uso mai i le isi atunuu, ituaiga po o le lanu. (1 Ioane 4:20, 21) Latou te faaalia le alofa i isi auala. E faapefea? E ala i a latou feutagaina ma o latou tuaoi mai a latou taumafaiga alofa e fesoasoani ai i isi e aʻoaʻo e uiga i le Atua.—Kalatia 6:10.
TASI LE TAPUAIGA MONI
19. Ai se ā ua talafeagai ma faale-Tusi Paia ai le faapea atu e na o le tasi le tapuaiga moni?
19 Ua tatau ona e na o le tasi pe lava le tapuaiga moni. Ua talafeagai lea ma le mea moni o le Atua moni e le o se Atua “o le lē maopoopo, a o le filemu.”(1 Korinito 14:33, NW) Ua fai mai le Tusi Paia, o le mea moni e na o “le tasi le faatuatuaga.” (Efeso 4:5) Po o ai i latou o ē faia aʻe ai le tino o ē tapuai faamaoni i aso nei?
20. (a) I le pupula mai o faamaoniga, o ai ē o loo faasino i ai lenei tusi o ē tapuai faamaoni i aso nei? (e) Pe o lea ea e te talitonu i ai? (i) O le ā le ala sili e faamasani atu ai i Molimau a Ieova?
20 Matou te lē faatalatu e fai atu o i latou o Molimau a Ieova. Ina ia e talitonu i ai, matou te valaaulia oe ina ia e faauo ia i latou. O le auala sili e faia ai o lou faatasi lea i a latou sauniga i le Maota o le Malo o Molimau a Ieova. Ona ua faaalia mai e le Tusi Paia o le faia o le lotu moni e aumaia ai le loto malie i le taimi nei ma tatala ai lea ala e olioli ai i le ola e faavavau i parataiso i le lalolagi. (Teuteronome 30:19, 20) E valaaulia oe ma le faaaloalo ia e faia faapea. Ai se ā e lē faia ai loa nei?
[Fesili mo le Suʻesuʻega]
[Ata i le itulau 185]
Pe afai e te tautala atu i se tasi e uiga i a Ieova ma lona malo, o le ā le tapuaiga o le a faatasia atu i ai oe e tagata?
[Ata i le itulau 186]
Pe e faaaloalogia ea e se tagata le Afioga a le Atua pe afai e lē taulau ona ia ola e talafeagai ai?
[Ata i le itulau 188, 189]
Sa teena e Iesu le avea o ia ma se pule i polotiki
[Ata i le itulau 190]
Ua taloina ma le mafana oe ina ia e faatasi atu i sauniga a Molimau a Ieova
