Mataupu 23

Le Faalapotopotoga Vaaia a le Atua

1. O le ā ua fai mai ai le Tusi Paia e uiga i le faalapotopotoga lē vaaia a le Atua?

AISEĀ tatou te mautinoa ai e i ai se faalapotopotoga vaaia a le Atua? O se tasi o mafuaaga ona e i ai sana faalapotopotoga lē vaaia. Na foafoaina e Ieova kerupi, serafi ma le tele o isi agelu ia faia lona finagalo i le lagi. (Kenese 3:24; Isaia 6:2, 3; Salamo 103:20) O Iesu Keriso o le Agelu Silisili i luga o i latou uma. (1 Tesalonia 4:16; Iuta 9; Faaaliga 12:7) Ua faamatalaina e le Tusi Paia agelu ua faamaopoopoina i “nofoālii, ma alii, ma alii sili, faipule.” (Kolose 1:16; Efeso 1:21) E auauna i latou uma pe a faatonuina e Ieova, autasi i le faia o le galuega ua ia tofia i ai latou.—Tanielu 7:9, 10; Iopu 1:6; 2:1.

2. E faapefea i le auala ua foafoaina ai e le Atua lo tatou vateatea faitino ona faaalia ai na te tuuina i se tulaga sili ona tāua le faamaopoopoina?

² Tatou te maua foi se manatu tāua ua tuu e le Atua i le faalapotopotoga pe a tatou manatunatu i ana foafoaga faitino. O faaaʻoaʻoga, e faitau afe piliona fetu i le vateatea i ni vaega tetele ua taʻua o aniva. O nei aniva e faagasolo i le lagi i se auala pulea, faapena foi fetu taitasi ma paneta o i totonu o nei aniva. Mo se faataʻitaʻiga, e faatasi i le tausaga ona faataamilo lo tatou Lalolagi paneta i le la, o lo tatou fetu e pito lata mai lea, i se taimi tonu e 365 aso, e itula, 48 minute ma le 45.51 sekone. Ioe o le vateatea faitino ua matuā maopoopo lava!

3. O le ā ua aʻoaʻoina ai i tatou mai i le faamaopoopoina lelei e le Atua o ana foafoaga lē vaaia ma lana vateatea faitino?

³ Pe e i ai se mea e aʻoaʻoina ai i tatou ona o lenei maopoopo ofoofogia o foafoaga lē vaaia a le Atua ma lona vateatea faitino? Ioe, ua aʻoaʻoina i tatou o Ieova o se Atua maopoopo. E mautinoa lava o le a lē tuua e se Atua faapena tagata o ē alolofa moni i a te ia e aunoa ma se taʻitaʻiga ma le faamaopoopoina.

 FAALAPOTOPOTOGA VAAIA A LE ATUA—I ASO UA MAVAE MA I ASO NEI

4, 5. E faapefea ona tatou iloa e taʻitaʻia e le Atua ona tagata i se ala maopoopo i aso o Aperaamo ma i le taimi o le nuu o Isaraelu?

⁴ Ua faaalia e le Tusi Paia e taʻitaʻia pea e Ieova ana auauna i se ala maopoopo. Mo se faaaʻoaʻoga, sa taʻitaʻia e tagata faatuatua e pei o Aperaamo o latou aiga ma auauna i le tapuaiga i a Ieova. Sa faailoa atu e Ieova lona finagalo e ala i le talatalanoa ma Aperaamo. (Kenese 12:1) Ma sa faatonuina o ia e le Atua ina ia taʻuina atu lea faamatalaga i isi, i le tulei atu: “Auā ua ou iloa o ia [Aperaamo] na te poloai atu i ana fanau ma lona aiga pe a mavae atu o ia; latou te tausia le ala o Ieova.” (Kenese 18:19) O se fuafuaga maopoopo lenei sa i se vaega o tagata ina ia tapuai ma le tonu i a Ieova.

⁵ Ina ua toatele tagata Isaraelu ma ua oo atu ina faitau miliona, sa lei tuua e Ieova tagata taitoatasi e tapuai i lana lava auala, e vavae ese mai i soo se fuafuaga maopoopo. E leai, sa fausia aʻe tagata Isaraelu i se atunuu o ē tapuai ma le maopoopo. Sa taʻua le nuu o Isaraelu o le “faapotopotoga a Ieova.” (Numera 20:4; 1 Nofoaiga a Tupu 28:8) Afai o oe o sē sa tapuai faamaoni i a Ieova i tuā i ina, e tatau ona avea oe ma vaega o lena faapotopotoga o tagata tapuai, e lē vavae ese mai i lea.—Salamo 147:19, 20.

6. (a) Sa faapefea ona faaalia e le Atua ua ia tuu atu lona finagalo malie i soo o Keriso? (e) O le ā le faamaoniga o i ina e iloa ai na faamaopoopoina Kerisiano mo le tapuaiga?

⁶ Po o le ā le tulaga sa i ai le uluai senituri? Ua faaalia e le  Tusi Paia sa fiafia le finagalo o Ieova i soo o lona Alo o Iesu Keriso. Sa liligi ifo i ai e Ieova lona agaga paia i o latou luga. Ina ia faaalia ua na faaaogaina nei le faalapotopotoga Kerisiano na i lo le nuu o Isaraelu, sa ia tuuina atu se mana i nisi faapitoa o uluai Kerisiano e faamalolo ai ē mamaʻi, faatutū ē feoti ma fai isi vavega. E mafai ona e faitauina Tusitusiga Paia Eleni ma faagaeetia i le mea moni sa faamaopoopoina Kerisiano mo le tapuaiga. O le mea moni, na faatonuina i latou ia aofia faatasi mo lenei faamoemoe. (Eperu 10:24, 25) Afai o oe o sē tapuai faamaoni i a Ieova i le uluai senituri, e tatau ona avea oe o se vaega o lana faalapotopotoga Kerisiano.

7. E faapefea ona tatou iloa sa lei faaaogaina e Ieova le sili aʻe i le tasi le faalapotopotoga i soo se vaitaimi faapitoa?

⁷ Pe na faaaoga e Ieova se faalapotopotoga e sili aʻe i le tasi i soo se vaitaimi? I ona po o Noa sa na o Noa lava ma ē na i totonu o le vaa sa maua le puipuiga a le Atua ma faasaoina mai le lolo. (1 Peteru 3:20) I le uluai senituri, sa lē lua pe tele ni faalapotopotoga Kerisiano. Sa feagai le Atua ma na o le tasi. Sa na o le “tasi le Alii, e tasi le faatuatuaga, e tasi le papatisoga.” (Efeso 4:5) E pei o o tatou aso, sa valoia e Iesu Keriso o le a na o le tasi lava le puna o faatonuga faaleagaga mo tagata o le Atua.

8. Sa faapefea ona faaalia e Iesu o le a na o le tasi pe le faalapotopotoga vaaia a le Atua i luga o le lalolagi i o tatou aso?

⁸ Ina o faamatala atu lona faatasi mai i le mana o le Malo, sa fetalai Iesu: “O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso? Amuia lea auauna, pe a sau lona alii e maua o ia o loo faapea ona fai. E moni, ou te fai tau ia te outou, e tofia o ia e pule i ana mea uma.” (Mataio 24:45-47) I lona toe afio i le mana o le Malo i le 1914, pe na maua e Keriso se vasega o “auauna faamaoni ma le mafaufau” o avatu “mea e ʻai” faaleagaga? Ioe, sa ia mauaina se “auauna,” sa faia i le vaega totoe o ona “uso” e 144,000 i le lalolagi. (Faaaliga 12:10; 14:1, 3) Talu mai le 1914, e faitau miliona ua talia “mea e ʻai” ua latu saunia, ma faia le tapuaiga moni ma i latou. O lenei faalapotopotoga o auauna a le Atua o Molimau a Ieova.

9. (a) Ai se ā e taʻua ai auauna a le Atua o Molimau a Ieova? (e) Ai se ā ua latou faaigoaina ai o latou nofoaga mo le tapuaiga o le Maota o le Malo?

 ⁹ E vaavaai Molimau a Ieova i le Atua ma lana Afioga mo le taʻitaʻiga i mea uma latou te faia. O lo latou igoa o Molimau a Ieova ua faaalia ai o la latou galuega faapitoa o le molimau lea i le suafa ma le malo o Ieova le Atua, e pei ona faia e Keriso. (Ioane 17:6; Faaaliga 1:5) Latou te faaigoaina foi le nofoaga latou te feiloai ai mo le tapuaiga o le Maota o le Malo talu ai o le malo o le Atua e ala i le Mesia, po o Keriso, o le matua lea o le Tusi Paia atoa. Ona ua manino sa maua e Kerisiano o le uluai senituri le finagalo malie o le Atua, o lea ua mulimuli Molimau a Ieova ma la latou faalapotopotoga i ai. Sei tatou tagai i lena uluai faalapotopotoga Kerisiano ma matau uiga tutusa ma le faalapotopotoga vaaia a le Atua o aso nei

ATA O LE ULAI SENITURI

10. O ā ni isi o matata o le faalapotopotoga Kerisiano o le uluai senituri?

¹⁰ I soo se mea sa i ai Kerisiano i le uluai senituri, latou te potopoto mo le tapuaiga. O nei faapotopotoga e aofia faatasi e le aunoa mo le faamasani ma suesue. (Eperu 10:24, 25) O la latou galuega autu o le talaʻi ma aʻoaʻo le malo o le Atua, e pei ona sa faia e Keriso. (Mataio 4:17; 28:19, 20) Afai e liliu se tasi o le faapotopotoga i se ala leaga, e tuuesea mai le faapotopotoga.—1 Korinito 5:9-13; 2 Ioane 10, 11.

11, 12. (a) O le ā e faamaonia ai sa mauaina e uluai faapotopotoga Kerisiano ni taʻitaʻiga ma faatonuga mai i aposetolo ma “toeaina” mai i Ierusalema? (e) O le ā le uiga o le taʻitaʻiga “faatiokarate”? (i) O le ā sa iu i ai ina ua talia e faapotopotoga lea taʻitaʻiga?

¹¹ Pe sa tutoatasi na faapotopotoga Kerisiano i le uluai senituri, ma fai e le tagata lana faaiuga i mataupu? E leai, ua faaalia e le Tusi Paia, sa autasi i le faatuatua Kerisiano e tasi. Sa maua e faapotopotoga Kerisiano uma taʻitaʻiga ma faatonutonuga mai i le puna e tasi. Ma, ina ua lāgā se finauga i le mataupu o le peritomeina, sa lei filifilia e faapotopotoga po o tagata taitoatasi po o le ā latou te faia. E leai, sa faatonuina le aposetolo o Paulo ma Panapa ma isi “ia o ae i le au aposetolo ma toeaina i Ierusalema i lenei finauga.” Ina ua faia e nei tane taʻumatuaina la latou faaiuga, faatasi ma le fesoasoani o le Afioga a le Atua  ma lona “Agaga Paia,” sa auina loa tane faamaoni e faailoa i faapotopotoga.—Galuega 15:2, 27-29.

¹² O le ā na iu i ai le mauaina e faapotopotoga o lenei taʻitaʻiga faatiokarate, po o le taʻitaʻiga ma le faatonutonuga faale-Atua? Ua fai mai le Tusi Paia: “Ua ui ane i latou [le aposetolo o Paulo ma ana aumea] i aai, ma latou tuuina atu ia te i latou tuugafono, na tuu e le au aposetolo ma toeaina o i Ierusalema, latou te tausia. Ua faamalosia foi ekalesia i le faatuatua, ma ua faatoateleina i lea aso ma lea aso.” (Galuega 16:4, 5) Ioe, sa usiusitai faapotopotoga uma i le mea na filifilia e lena tino o toeaina i Ierusalema, ma na tutupu malolosi i latou i le faatuatua.

TAʻITAʻIGA FAATIOKARATE I ASO NEI

13. (a) Mai i fea le nofoaga o le lalolagi, ma mai i le ā le tino o tane o mauamai ai e le faapotopotoga vaaia a le Atua i aso nei le taʻitaʻiga? (e) O le ā le faiā a le vaega pule ma le “auauna faamaoni ma le mafaufau”?

¹³ Ua maua foi e le faalapotopotoga vaaia a le Atua i aso nei le taʻitaʻiga ma le faatonutonuga faatiokarate. O loo i ai se vaega pule a Molimau a Ieova i Brooklyn, New York, i lo latou ofisa sili, se tino o toeaiina o Kerisiano matutua mai i itu e fa o le lalolagi aoao. O lenei vaega pule ua faia aʻe i tagata o le “auauna faamaoni ma le mafaufau.” E tautua o se fofoga fetalai o lena “auauna” faamaoni.

14. I luga o le ā e faalagolago i ia le vaega pule o tagata o le Atua mo le faia o ana faaiuga?

¹⁴ O tane o lena vaega pule, e pei o aposetolo ma toeaiina i Ierusalema, ua maua le poto masani i le auaunaga a le Atua i le tele o tausaga. Ae e lē faalagolago i le poto faaletagata ma le faia o faaiuga. E leai, ona e pulea faatiokarate, latou te mulimuli i le faataʻitaʻiga a le vaega pule muamua i Ierusalema, o a latou faaiuga sa faavae aʻe i le Afioga a le Atua ma sa faia i lalo o le taʻitaʻiga a le agaga paia.—Galuega 15:13-17, 28, 29.

TAʻITAʻIGA O SE FAALAPOTOPOTOGA I LE LALOLAGI AOAO

15. Ai se ā e fetalaiga a Iesu o i le Mataio 24:14 ona faaalia ai o le a i ai se faalapotopotoga tele a le Atua i le lalolagi i le taimi o le iuga?

¹⁵ Sa aumaia e Iesu Keriso se manatu i le telē o le faalapotopotoga o le a i ia ia le Atua i le lalolagi i le taimi o le iuga: “E talaʻiina atu foi lenei tala lelei o le malo i le atu laulau uma, e  fai ma molimau i nuu uma; ona oo mai ai lea ole gataaga.” (Mataio 24:14) Sei mafaufau i le telē o le galuega e fai o le taʻuina ati l faitau afe miliona o tagata e uiga i le malo faavaeina o le Atua. Pe ua faaauupegaina mo le faia o lenei galuega tele le faalapotopotoga Kerisiano o ona po nei, lea o loo vaai atu i le vaega pule mo le taʻitaʻiga ma faatonuga?

16. (a) Ai se ā ua fausia ai e Molimau a Ieova le tele o falelomitusi tetele? (e) O ā o gaosia i ia falelomitusi?

¹⁶ Ua talaʻia nei e Molimau a Ieova le feau o le Malo e sili aʻe i le 200 atunuu ma atumotu i le lalolagi. Ina ia fesoasoani i le sili aʻe i le 4,000,000 le au talaʻi o le Malo (i le 1991) e faataunuu lenei galuega, sa fausia ai ni falelomitusi tetele i le tele o atunuu. Ua saunia ai Tusi Paia ma lomiga faale-Tusi Paia i se aofaiga tele. I aso faigaluega taitasi, i sona faatusatusaga, e sili i le lua miliona mekasini o Le Olomatamata ma le Awake! ua lomia ma laʻuina mai i nei falelomitusi.

17. (a) Ai se ā ua saunia ai nei lomiga mai le Tusi Paia? (e) O le ā ua valaaulia oe e fai?

¹⁷ O nei lomiga faale-Tusi Paia ua saunia e fesoasoani i tagata ia tutupu ae ai i le poto i a Ieova ma lana fuafuaga sili. O upu “Faasilasilaina le Malo o Ieova” ua avea ma vaega o le matua o le mekasini o Le Olomatamata. Ua valaaulia oe ina ia faia sau vaega i le faasalalauina o nei lomiga faale-Tusi Paia ma faamatala i isi le upu moni o le Tusi Paia o i ai. Mo se faaaʻoaʻoga, pe e i ai se tasi e mafai ona e tufa atu i ai  faamatalaga tāua ua e aʻoaʻoina mai i lenei tusi, E Mafai Ona E Ola e Faavavau i Parataiso i Le Lalolagi?

18. (a) O le ā le ituaiga o faalapotopotoga e i ai le faalapotopotoga a le Atua i aso nei? (e) Ai se ā ua manaomia ai nei e tagata o le Atua le tele o faalaeiauga?

¹⁸ E pei o le uluai senituri, o le faalapotopotoga a le Atua i aso nei, o se au talaʻi o le Malo ua tuuina atu ma papatisoina. Ma ua faavaeina e fesoasoani i ona tagata uma e auai i lenei galuega talaʻi. E manaomia e nei tagata se faalaeiauga tele ma se faamalosiaga faaleagaga, ona o Satani ma i latou ua ia faatosinaina e tetee i le feau o le Malo. Sa fasiotia Iesu e tagata tetee faapea ona o lona talaʻia ma ua lapatai mai le Tusi Paia o le a sauaina foi ona soo.—Ioane 15:19, 20; 2 Timoteo 3:12.

19. (a) O ai ua saunia nei e fesoasoani ma faalaeiau i tagata o le Atua? (e) E faapefea ona puipuia le faapotopotoga mai i faatosinaga leaga e ono faaleagaina ai?

¹⁹ E pei o le uluai senituri, e faapea foi i aso nei, ua tofia ‘toeaina’ e fesoasoani ma faalaeiau i faapotopotoga taitasi. E mafai ona latou fesoasoani i a te oe i ni fautuaga faale-Tusi Paia mo faafitauli eseese. E leoleoina foi e na toeaina le “lafu mamoe a le Atua.” Afai e liliu se tasi o le faapotopotoga i se ala leaga ma musu e sui, o le a tagai lelei i ai “toeaina” ua tuu i tua sea tagata,  ma faateʻaina mai le faapotopotoga. Ma ua taofia ai pea le faapotopotoga ina ia mamā i le itu faaleagaga ma ia solosolo lelei.—Tito 1:5; 1 Peteru 5:1-3; Isaia 32:1, 2; 1 Korinito 5:13

20. (a) O ai i le uluai senituri sa aauina atu e le vaega pule i Ierusalema ma mo le ā le pogai? (e) O ai o loo aauina atu e le vaega pule i aso nei?

²⁰ E pei lava ona sa aauina atu e le vaega pule i Ierusalema ni sui faapitoa, e pei o Paulo ma Sila, e faaoo atu faatonuga ma faalaeiauga i tagata o le Atua, e faapea foi ona faia e le vaega pule i lenei taimi o le iuga. (Galuega 15:24-27, 30-32) Pe a ma le faalua i le tausaga ona faaaluina e se faifeau ua i ai le poto masani, e taʻua o le ovasia o le matagaluega, se vaiaso e tasi ma faapotopotoga taitasi o i lana matagaluega.

21. E faapefea ona fesoasoani le ovasia o le matagaluega i faapotopotoga o tagata o le Atua?

²¹ O loo i ai faapotopotoga e sili aʻe i le 66,000 a Molimau a Ieova i le lalolagi aoao, ma ua vaevaeina i ni matagaluega e faia aʻe i faapotopotoga pe a ma le 20. Pe a asiasi i faapotopotoga o i lana matagaluega, e faatupuina atili e le ovasia o le matagaluega le molimau i le Malo i lona o faatasi ma i latou i le galuega talaʻi ma le aʻoaʻo atu. Ua lē gata ina faalaeiau atu faapea, ae na te ofoina atu foi ni fautuaga e faaleleia ai la latou faiva.—Galuega 20:20, 21.

22. (a) O ā isi fuafuaga atili mo le faalaeiauina o tagata o le Atua ua faia faalua i le tausaga? (e) O le ā le valaauliaga ua faaavanoaina foi mo oe?

²² Ua saunia atili foi ni faalaeiauga ma ni faamalosiaga, e faalua i le tausaga ona aofia faapotopotoga o i matagaluega taitasi mo se fonotaga mo se aso e tasi pe lua. I nei faatasiga, e aofia ai tagata pe a ma le lua i le tolu selau po o le 2,000 ma ona tupu. Ua valaaulia oe e faatasi atu i se isi fonotaga o sosoo ai i lou nofoaga. Matou te mautinoa o le a e mauaina se faafouina faaleagaga ma ni aogā totino mai le fonotaga.

23. (a) O ā isi faatasiga ua faia e faatasi i le tausaga? (e) O le ā le tele o se tasi o ia tauaofiaga?

²³ E i ai se faatasiga tele e faatasi i le tausaga, e taʻua o le tauaofiaga itumalo, atonu e faia mo ni aso. Ai se ā e te lē faatasi atu i ai ma e tagai lava oe i ai i le fiafia ma le tauia faaleagaga e mafai ona maua mai ai? I ni isi tausaga, na i lo le faia o se tauaofiaga itumalo, sa faia ai ni tauaofiaga faalelalolagi aoao, po  o le faalevā o malo. O le tauaofiaga e sili ona tele o lea, sa faia i le aai o Niu Ioka i le Yankee Stadium ma le Polo Grounds mo aso e valu i le 1958. Sa aofia a i tagata e 253,922 mo le lauga lautele “Ua pule le Malo o le Atua—Pe ua Lata le Iuga o le Lalolagi?” Talu mai lea taimi, ua leai se nofoaga e lava lona telē e mafai ona aofia ai se toatele faapea, o lea ua faia ai fuafuaga i le tele o aai mautu mo nofoaga e faaaoga mo faatasiga tetele.

SAUNIGA I TOTONU O FAAPOTOPOTOGA

24. O ā sauniga e lima faalevaiaso ua faia e faalapotopotoga o tagata o le Atua?

²⁴ Ua fuafuaina e le vaega pule o Molimau a Ieova ni polokalama tau tusi o faatonuga faale-Tusi Paia ua faia i faapotopotoga uma o tagata a Ieova. E lima sauniga i vaiaso taitasi. O le Aʻoga mo le Faiva Faatiokarate, o le Sauniga o le Auaunaga, le Sauniga mo le Lautele, le suesuega o le Olomatamata ma le suesuega tau tusi a le faapotopotoga. Talu ai e te lei masani i nei sauniga, o le a matou otootoina atu.

25, 26. O le ā le fuafuaga ua aoga i ai le Aʻoga mo le Faiva Faatiokarate ma le Sauniga o le Auaunaga?

²⁵ O le Aʻoga mo le Faiva Faatiokarate e fesoasoani i ē o auai ia avea o ni failauga lelei i isi e faatatau i le malo o le Atua. Mai i lea taimi i lea taimi, o ē o loo tusia igoa latou te faia mai ni lauga pupuu i mataupu o le Tusi Paia i le aofia atoa. Ona aumaia lea e se toeaina agavaa ni fautuaga mo le faaleleia.

²⁶ E masani, ona faia ai i lea lava afiafi le Sauniga mo le Auaunaga. E tusia le auivi o lea sauniga i le O La Tatou Faiva o Le Malo, o se lomiga ua sauina e le vaega pule, e faatasi i le masina, e lua pe sili atu ona itulau. I lea sauniga, e aumaia ai fautuaga ma faataʻitaʻiga e mafai ona sili ona aogā e talanoa ai i isi i le feau o le Malo. Sa faalaeiau faapea foi e Keriso, i ona soo ma avatu faatonuga i le pe faapefea ona faataunuu la latou faiva.—Ioane 21:15-17; Mataio 10:5-14.

27, 28. O ā ituaiga o sauniga e i ai Sauniga mo le Lautele, suesuega o le Olomatamata ma le suesuega tau tusi a le faapotopotoga?

²⁷ E masani ona faia le Sauniga mo le Lautele ma le suesuega o le Olomatamata i le Aso sa. E fai ni taumafaiga faapito mo le valaaulia o ē fou e loto naunau i le Sauniga mo le Lautele, o se lauga mai le Tusi Paia e faia e se faifeau agavaa. O le suesuega   o le Olomatamata o se talanoaga fesili-ma-tali i se mataupu o le Tusi Paia ua lolomia i le Olomatamata.

²⁸ E ui atonu e faatasi le faapotopotoga atoa i le Maota o le Malo mo sauniga ua taʻua, ae ua faapotopoto foi ni vaega toaitiiti i fale o aiga mo suesuega tautusi faalevaiaso a le faapotopotoga. O se fesoasoani mo le suesueina o le Tusi Paia, e pei o lenei tusi ua faaaoga e talanoaina ai i le Tusi Paia, atonu e faaaluina ai se itula.

29. (a) O le ā faamanatuga e faamanatu e Kerisiano moni e faatasi i le tausaga? (e) O ai e ao ona tagofia ma le tonu le areto ma le uaina?

²⁹ E faaopoopo i na sauniga faifai pea, e faia e Molimau a Ieova se faamanatuina faapitoa faaletausaga o le maliu o Iesu. Ina ua uluai fuafua le faamanatuina o lona maliu, sa fetalai Iesu: “Tou te fia le mea nei e fai ma faamanatuga ia te au.” (Luka 22:19, 20) Sa faaaoga e Iesu le uaina ma le areto lē faafefeteina e fai ma sui o le ola ua toeitiiti ona ia tuuina atu o se taulaga mo le fanau a tagata. I lenei talisuaga o le Faamanatuga faaletausaga, o ē totoe o le 144,000 o soo faauuina o Keriso ua faaalia lo latou faamoemoe faalelagi i lo latou tagofia o le areto ma le uaina.

30. (a) O ai isi e ao ona faatasi atu i le Faamanatuga, ma o le ā lo latou faamoemoe? (e) E faapefea ona faamatalaina e Iesu ia tagata?

 ³⁰ O le faitau miliona o isi o ē faatasi i lenei Faamanatuga i Maota o Malo i le lalolagi aoao ua avea ma ē e matamata. Ua faamanatu atu i a i latou le mea na faia e Ieova le Atua ma Iesu Keriso o le faasaoloto o i latou mai le agasala ma le oti. Na i lo le ola i le lagi, ua latou olioli i le faamoemoe o le ola e faavavau i parataiso i le lalolagi. Ua pei o Ioane le Papatiso, o lē sa fai atu e uiga o ia lava “o le uo a le faatoafaiavā” na i lo le fai ma vaega o le faatoanofotane e 144,000. (Ioane 3:29) O lenei faitau miliona o tagata ua avea ma vaega o “isi mamoe’ o ē na fetalai i ai Iesu. E lē avea i latou ma ni ē o le “lafu mamoe itiiti.” E ui i lea, e pei ona taʻua e Iesu, latou te galulue soosoo tauau ma le “lafu mamoe itiiti,” Ona avea lea o i latou uma ma ‘lafu mamoe e tasi.’—Ioane 10:16; Luka 12:32.

AUAUNA I LE ATUA MA LANA FAALAPOTOPOTOGA

31. O ā ni faamaoniga o i ai i ina e iloa ai e le talia e le Atua i latou e tumau pea o se vaega o tapuaiga sese ma i le taimi foi lea e tasi o loo taumafai e fai ma vaega o lana faalapotopotoga?

³¹ Ua manino la, e pei o taimi ua teʻa, ua i ai se faalapotopotoga vaaia a Ieova le Atua i aso nei! Ua ia faaaoga e aʻoaʻo ai tagata mo le ola i lana faiga fou amiotonu. E ui i lea, e le mafai ona avea i tatou ma vaega o le faalapotopotoga a le Atua, ma toe avea ma vaega o tapuaiga sese. Ua fai mai le Afioga a le Atua: “O lea ia o mai ai outou nai totonu ia te i latou, ma ia outou vavae mai.”—2 Korinito 6:14-17.

32. (a) Afai o le a tatou “o mai nai . . . totonu ia te i latou,” o le ā e ao ona tatou faia? (e) O le ā le faamanuiaga o le a tatou mauaina pe afai tatou te faia ni gaoioiga mautinoa mo le auauna atu i le Atua ma lana faalapotopotoga vaaia faatiokarate?

³² Po o le ā le uiga o le “o mai . . . nai totonu ia te i latou”? Ia, e le mafai ona tatou avea pea ma vaega po o le tuuina atu foi o le lagolagoina i se faalapotopotoga faalelotu na i lo lea o loo faaaoga e Ieova le Atua. O lea afai o loo au atu pea i tatou i ia faalapotopotoga faalelotu, e manaomia ona tatou tuuina atu se faaaliga ua tatou faamavae mai ai. Afai nei ua tatou vavae ese mai ma faia se gaoioiga mautinoa e auauna i le Atua ma lana faalapotopotoga vaaia faatiokarate, o le a avea la i tatou ma i isi o ē ua fetalai faapea i ai le Atua; “Ou te nofo i totonu ia te i latou; e fai aʻu mo latou Atua, e fai foi i latou moʻu tagata.”—2 Korinito 6:16.

[Fesili mo le Suʻesuʻega]

[Ata i le itulau 192]

I le taimi o le Lolo, pe na maua e le Atua e sili atu i le tasi faalapotopotoga?

 [Ata i le itulau 196]

FAAULUULUGA O MOLIMAU A IEOVA I LE LALOLAGI

O OFISA PULE

Faiga faakomepiuta

Mea e Faapipii Faatasi ai Tusi

FALELOMITUSI I BROOKLYN

Masini lomitusi

Auina i fafo

[Ata i le itulau 197]

O NISI O LE TELE O ISI FALELOMITUSI O LE SOSAIETE O LE OLO MATAMATA

Pasili

Egelani

Aferika i Saute

Wallkill, i Niu Ioka

Kanata

[Ata i le itulau 198]

O nisi o le 253,922 i se tauaofiaga a Molimau a Ieova i Niu Ioka

Polo Grounds

Yankee Stadium

[Ata i le itulau 201]

O se polokalama o faatonuga mai i le Tusi Paia ua olioli i ai i sauniga a Molimau a Ieova