Mataupu 1

O le Ola e Faavavau ua Le Na o Se Miti

1, 2. Ai se ā ua faigata ai ona talitonu e mafai ona ola e faavavau tagata i le fiafiaga i le lalolagi?

FIAFIAGA i le lalolagi—e foliga mai ua tau lē mafai ona olioli i ai. Maʻi, tino matua, fia ai, solitulafono—e taʻua na o ni nai faafitauli—ua masani ona puapuagatia ai le olaga. Atonu e te faapea mai, o le taʻua o le ola e faavavau i parataiso i le lalolagi o lea punitia ai ou mata i le mea moni. Atonu e te lagona e maimau fua le taimi e talanoa i ai, auā e na o se miti.

² E lē taumatea, e toatele tagata o le a ioe faatasi ma oe. O lea la, ai se ā e mautinoa ai e mafai ona e ola e faavavau i parataiso i le lalolagi? Ai se ā tatou te talitonu ai ua lē na o se miti?

AI SE Ā E MAFAI AI ONA TATOU TALITONU

3. O le ā ua faaalia ai e finagalo le Atua i tagata ina ia fiafia i le lalolagi?

³ E mafai ona tatou talitonu ona o se Mana Silisili ese, le Atua e ona le malosi uma, na saunia le lalolagi ma mea e manaomia e faamalieina ai o tatou manaoga uma. Na ia faia le lalolagi e lelei atoatoa mo i tatou! Ma na ia faia le tane ma le fafine, lava saunia e olioli ai i le atoaga o le ola i le lalolagi—e faavavau.—Salamo 115:16.

4. O ā ua aʻoaʻoina e saienitisi e tusa ai ma le tino o le tagata e faaalia ai sa faia ia ola e faavavau?

⁴ Ua leva ona iloa e saienitisi e tusa ai ma malosi o le tino o le tagata e toe aifoi ai. O auala ofoofogia ua suia po o le toe faafouina ai o sela o le tino, pe a oo ina manaomia. Ma e foliga mai o lenei toe faafouina e ia o ia lava e ao ona faaauau e faavavau. Ae e leai, ma o se mea lenei ua iso ai saienitisi. Ua faaauau pea ona lē atoatoa lo latou iloa pe ai se ā e ola matutua ai tagata. Ua latou faapea mai, i lalo o tulaga fetaui, e tatau ona ola e faavavau tagata.—Salamo 139:14.

5. O le ā ua fai mai ai le Tusi Paia e tusi ai ma le fuafuaga a le Atua mo le lalolagi?

 ⁵ Ae peitai, pe o le fuafuaga moni lava a le Atua ia ola fiafia tagata i le lalolagi e faavavau? Afai o lea, o le ola e faavavau ua le na o se moomooga po o se miti—ua mautinoa lava lona oo mai! O le ā fa a le Tusi Paia, le tusi o loo taʻu mai ai le fuafuaga a le Atua e tusa ai ma mataupu? Ua taʻua ai le Atua “o le Tufuga o le na faia le lalolagi,” ma ua faaopoopo mai: “O ia na faatumauina; na ia le faia fua, na ia faia ina ia āina.”—Isaia 45:18.

6. (a) O faapei tulaga o i le lalolagi i aso nei? (e) Po o le auala ea lenei e finagalo i ai le Atua ia i ai?

⁶ Pe o foliga mai ea i a te oe o le lalolagi i le taimi nei o āinaina i le auala na finagalo i ai le Atua? E moni, o loo ola tagata i tuluiga uma o le lalolagi. Ae pe o ola fiafia faatasi ea i latou o aiga autasi, i le auala lelei na finagalo i ai Le na Foafoaina i latou? Ua fevaevaeai le lalolagi i aso nei. Ua i ai le feainai, solitulafono, ma taua. E faitau miliona tagata o loo matelaina ma mamaʻi. O isi ua i ai le popole i aso uma i fale, galuega ma tupe faaalu. Ma e lē viia le Atua i se tasi o nei mea. E mautinoa lava la, ua lē o āinaina le lalolagi i le ala na finagalo i ai le Atua e ona le malosi uma lava.

7. O le ā le fuafuaga a le Atua mo le lalolagi ina ua ia foafoaina le uluai ulugalii faaletagata.?

⁷ Ina ua mavae le faia o le uluai ulugalii, ona tuuina lea o i laua e le Atua i se parataiso faalelalolagi. Sa Ia finagalo ia olioli e faavavau i laua i le ola i le lalolagi. O lana fuafuaga ia faalauaitele atu lo la parataiso i le lalolagi uma. Ua faaalia i lana faatonuga i a i laua: “Ia fanafanau ia, ma ia uluola, ma ia tumu ai le lalolagi, ia faatoilalo i ai.” (Kenese 1:28) Ioe, o le fuafuaga a le Atua, i se vaitaimi, ona aumaia lea o le lalolagi aoao i lalo o le pulega a se aiga amiotonu faaletagata ua ola autasi i le manuia ma le fiafia.

8. E ui lava ina sa lē usiusitai le uluai ulugalii i le Atua, ai se ā e mafai ai ona tatou mautinoa sa lei suia le fuafuaga a le Atua mo le lalolagi?

 ⁸ E ui lava sa le usitai le uluai ulugalii i le Atua, ua faamaonia ua lē agavaa e ola e faavavau, sa lē liua le uluai fuafuaga a le Atua. E tatau ona faataunuuina! (Isaia 55:11) Ua fai mai le Tusi Paia: “E fai lava le nuu mo tagata amiotonu, e nonofo ai pea i latou.” (Salamo 37:29) Ua taʻuina soo mai e le Tusi Paia o fuafuaga a le Atua e avatu i tagata o ē auauna i a te ia le ola e faavavau.—Ioane 3:14-16, 36; Isaia 25:8; Faaaliga 21:3, 4.

 O LE NAUNAU E OLA—I FEA?

9. (a) O le ā le faanaunauga e masani lava ona i ai i le tagata? (e) O le ā ua uiga i ai le Tusi Paia pe a faapea mai ‘⁠ua tuu foi e le Atua le faavavau i o latou mafaufau’?

⁹ E mafai ona tatou fiafia moni o le fuafuaga a le Atua ia tatou ola e faavavau. Ia mafaufau: Pe ana fai o sau filifiliga, o le ā le aso e te filifili e oti ai? E te le mafai ona filifilia se aso, a ea? E te le manao e oti, ma e faapena foi i soo se tagata soifua maloloina. Na faia e le Atua i tatou e naunau ia ola ae ia lē fia oti. Ua fai mai le Tusi Paia i le ala na faia e le Atua le tagata: “Ua ia tuua foi le faavavau i o latou mafaufau.” (Failauga 3:11, Byington) O le ā lona uiga? O lona uiga o tagata soifua e naunau e ola pea, e aunoa ma le oti. Ona o lenei faanaunauga mo se lumanai e le gata mai, ua loa ona sailia e tagata se auala e tumau ai i le talavou e faavavau.

10. (a) O fea o masani ona faanaunau le tagata e ola ai e faavavau? (e) Ai se ā e mafai ai ona tatou mautinoa o lea faia e le Atua ina ia mafai e i tatou ona ola e faavavau i le lalolagi?

¹⁰ O fea o masani ona mananao tagata e ola ai e faavavau? O le mea ua masani ona ola ai i latou, o i inei i luga o le lalolagi. Na faia le tagata mo le lalolagi, ma o le lalolagi e mo le tagata. (Kenese 2:8, 9, 15) Ua faapea mai le Tusi Paia: “O [le Atua] na faavaeina le lalolagi i luga o ona lava faavae, ina ia le gaee e faavavau faavavau lava.” (Salamo 104:5) Talu ai na faia le lalolagi ia tumau e faavavau, o lea la e tatau foi ona ola e faavavau le tagata. Ma le mautinoa lava la, o se Atua alofa o lē na faia tagata ma le faanaunauga e ola e faavavau, o le a ia lē faia foi i latou ia lē mafai ona faataunuuina lea faanaunauga!—1 Ioane 4:8; Salamo 133:3.

LE ITUAIGA O OLAGA E TE NAUNAU I AI

11. O le ā o fai mai ai le Tusi Paia e faaalia ai e mafai e tagata ona ola e faavavau i le malosi atoatoa?

¹¹ Tagai i le itulau e sosoo ai. O le ā le ituaiga o olaga o olioli ai nei tagata? Pe e te fia pei o se tasi o i laua? Ioe, o lau tala lea! Faauta i lo laua foliga malolosi ma le talavou! Pe afai e faapea atu o nei tagata ua ola i le afe ma afe o tausaga, pe e te talitonu i ai? Ua taʻu mai e le Tusi Paia o ē matutua o le a toe talavou, o ē mamaʻi, pipili, tauaso, tutuli ma gugu o le a faamaloloina o latou gasegase. A o i ai i le lalolagi, sa faia e Iesu le tele o vavega o le faamaloloina o tagata mamaʻi. I le faia o lenei mea  sa ia faaalia ai pe faapefea, i lenei taimi matagofie e lē o toe mamao, o tagata uma o soifua o le a toe faafoisia i le malosi atoatoa.—Iopu 33:25; Isaia 33:24; 35:5, 6; Mataio 15:30, 31.

12. O ā tulaga tatou te vaaia i nei ata?

¹² Tagai i ai, maeu le matagofie o lenei aiga faalefaatoaga. E pei ona folafola mai e Keriso, o se parataiso moni lava, e pei o lea na le iloa e ala i le lē usitai o le uluai tamaloa ma le fafine. (Luka 23:43) Ma matau le saogalemu ma le maopoopo o loo i ai. O tagata mai ituaiga uma—le uliuli, le paepae, le enaena  o loo ola o se aiga e tasi. E oo foi i mea ola o loo filemu. Tagai atu i le tama itiiti o loo taalo ma le leona. Ae e leai se pogai e fefe ai. Ua folafola mai e Le na Foafoaina mea: “E taoto foi le nameri faatasi ma le tamai ʻoti; e faatasi foi le tamai povi ma le leona taanoa atoa ma le manu peti, e taʻitaʻiina foi i latou e le tama itiiti . . . e ʻai foi e le leona ʻau o saito pei o le povi. E taalo foi le tama e lei teʻa ma le susu i le lua o le asipi.”—Isaia 11:6-9.

13. O ā o le a mavae atu mai i le lalolagi pe a faataunuuina fuafuaga a le Atua?

¹³ I le parataiso ua fuafuaina e le Atua mo tagata, o le  a i ai pea mafuaaga e olioli ai. O le a fuaina mai e le lalolagi le faulai o mea ʻai. E leai lava se tasi e toe matelaina. (Salamo 72:16; 67:6) O taua, solitulafono, sauaga, feainai, ma le manatu faapito, o le a mavae. Ioe, o le a mou atu i latou e faavavau! (Salamo 46:8, 9; 37:9-11) Pe e te talitonu o nei mea uma o le a mafaia?

14. O le ā o le a mafua ai ona e talitonu o le a aumaia e le Atua se iuga i puapuaga?

¹⁴ Ia, manatunatu: Ana fai e i a te oe le mana, pe o le a e faaiuina ea mea uma e faapogaia ai le puapuaga o tagata? Ma pe o le a e aumaia tulaga ua leva ona momoo i ai tagata? O le mea moni o lea e faia faapea. O le a faia e lo tatou Tamā alofa faalelagi. O le a ia faamalieina o tatou manaoga ma faanaunauga, auā ua faapea mai le Salamo 145:16 e uiga i le Atua: “O loo e faamafola lou aao, ma faamaoona le manao o mea ola uma lava.” Ae, o afea o le a taunuu ai lenei mea?

TOE O SE AGA FAAMANUIAGA SILI

15. (a) O le ā o le a uiga i ai le iuga o le lalolagi mo le fogāeleele? (e) O le ā o le a uiga i ai mo tagata leaga? (i) O le ā o le a uiga mo i latou o ē faia le finagalo o le Atua?

¹⁵ Ina ia maua nei faamanuiaga sili i le lalolagi, ua folafola mai e le Atua o le ai faaiua le amio leaga ma i latou o mafua ai. I le taimi lava lea, o le a ia puipuia i latou o ē auauna atu i a te ia, auā ua fai mai le Tusi Paia: “O le a mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:17) Maeu se suiga! O le iuga e lē faapea o le iuga o lo tatou fogāeleele. Ae e pei ona sa tupu i le lolo i ona po o Noa i le lalolagi aoao, o le a uiga foi la e na o tagata leaga o le a iu ma o latou ala. Ae o ē o auauna i le Atua o le a faasaoina i le iuga. Ma i se lalolagi ua faamamāina, o le a olioli ai i latou i le saolotoga mai tagata e faatiga ma saua.—Mataio 24:3, 37-39; Faataoto 2:21, 22.

16. O ā mea e tutupu na valoia mo “aso e gata ai”?

¹⁶ Ae atonu e faapea mai se tasi: ‘⁠Ua agaʻi ina leaga tele tulaga, e lē o lelei. E mafai faapefea ona tatou mautinoa o lenei suiga sili ua toe o se aga?’ Sa valoia e Iesu Keriso le tele o mea e tatau ona mataina e ona soo i le lumanai ina ia latou iloa ai o le taimi lea e aumaia ai e le Atua le iuga i le lalolagi. Sa taʻua e Iesu o aso e gata ai o lenei faiga o mea o le a faailogaina e mea e pei o taua tetele, oge, mafuie, tetele, faatuputeleina o le  amio leaga ma le maalili o le alofa. (Mataio 24:3-12) Sa ia taʻua foi “le atuatuvale o nuu i le fememeai.” (Luka 21:25) E le gata i lea, ua faapea atili mai le Tusi Paia: “O ona aso e gata ai e oo mai ai aso faigata.” (2 Timoteo 3:1-5) Pe e lē o tulaga ea nei o loo ua oo mai i a i tatou?

17. O ā ua taʻua e tagata mafaufau e tusa ai ma tulaga i aso nei?

¹⁷ O le toatele o ē suesue i mea tutupu o le lalolagi ua fai mai o se suiga tele ua faia nei. Mo se faaaʻoaʻoga, sa tusia e se faatonu o le nusipepa Herald i Miami, U.S.A. e faapea: “Soo se tasi lava e i ai se mafaufau fetuutuunai e mafai ona ia tuua faatasi mala o mea tutupu i tausaga ua mavae ma iloa ua i ai nei le lalolagi i se taimi o suiga faasolopito . . . O le a suia ai e faavavau le auala o soifua ai tagata.” Sa faapea mai foi le tusitala Amerika o Lewis Mumford: “Ua paʻū maulalo le fanau a tagata. Ma le mautinoa lava . . . I taimi ua mavae pe ā paʻū maulalo se vaega o le fanau a tagata, sa patino lea mala i lena o lea vaifanua. I le taimi nei, ua filia ma fusia faatasi le lalolagi i ala tau fesootaiga faaonapo nei, ma pe ā paʻū maulalo le fanau a tagata, e magoto ifo ai foi le paneta atoa.”

18. (a) O le ā ua faaalia e tulaga o le lalolagi e tusa ai ma le lumanai? (e) O le ā o le a suia malo o i ai nei?

¹⁸ O tulaga o le lalolagi o i ai i aso nei ua faaalia ai ua tatou ola nei i le taimi o le a oo mai ai le faaumatiaga o lenei faiga aoao o mea. Ioe, ua toe nei o se aga ona faamamāina lea e le Atua le lalolagi mai i a i latou ua fano ai. (Faaaliga 11:18) O le a ia aveesea malo o aso nei ina ia faaava le ala mo lona malo amiotonu e pulea le lalolagi atoa. O le pulega lenei o le Malo sa aʻoaʻoina e Iesu ona soo e tatalo i ai.—Tanielu 2:44; Mataio 6:9, 10.

19. Pe afai tatou te mananao e ola e faavavau, o le ā e tatau ona tatou fai?

¹⁹ Afai e te fia ola ma ia ola e faavavau i le lalolagi i le pulega a le Atua, ua ao nei ona faanatinati ona e aveina i fale le poto saʻo i le Atua, ana fuafuaga ma mea ua ia manaomia. Sa faapea Iesu Keriso i se tatalo i le Atua: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) Maeu se fiafiaga i le iloaina e mafai ona tatou ola e faavavau—ua lē na o se miti! Ae ina ia olioli i lenei faamanuiaga mai le Atua, e tatau ona tatou iloaina se fili o lē o taumafai e taofia i tatou i le mauaina o lenei faamanuiaga.

[Fesili mo le Suʻesuʻega]

[Ata i le itulau 8, 9]

Pe na finagalo le Atua e faapenei le lalolagi?

 [Ata atoa i le itulau 11]