O le Pulega o le Filemu a le Atua
Mataupu 13
O le Pulega o le Filemu a le Atua
1. O le ā ua lē taulau ona fai e pulega faaletagata?
PE UA e matauina pulega a tagata o loo i ai ni faanaunauga lelei ua lē taulau ona faamalieina manaoga o tagata? Ua leai se malo ua na faaleleia le solitulafono ma feainaiga i le va o lanu po o le saunia o mea e ʻai tatau ma fale mo ona tagata. Ua lē faasaolotoina foi ona tagatānuu mai faamaʻi. Ua leai foi soo se pulega e mafai ona taofia le agai ina tagata matua po o le oti po o le toe faaola ē ua feoti. Ua augapiu lava ma se pulega ua na aumaia le filemu tumau ma le saogalemu i ona tagata. O pulega a tagata ua le mafai ona foia faafitauli tetele o feagai ma tagata.
2. O le ā le feau autu o le Tusi Paia?
2 Ua silafia e Lē na Faia i tatou le tele o lo tatou manomia o se pulega amiotonu o le a mafai ai e tagata uma ona olioli i se olaga fiafia atoatoa. O le pogai lea ua taʻua ai e le Tusi Paia se pulega i lalo o le taʻitaʻiga a le Atua. O lenei folafolaga a le Atua i se pulega o le feau autu lea o le Tusi Paia.
3. O le ā ua fai mai ai le Isaia 9:6, 7 e uiga i le pulega a le Atua?
3 Ae atonu e te fesili: ‘O fea o taʻua ai e le Tusi Paia le pulega a le Atua?’ Ua faia faapea, mo se faaaʻoaʻoga, i le Isaia 9:6, 7. E tusa ai ma le King James Version: “Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia o le Sili, o le Faipule, o le Atua malosi, o le Tamā o le faavavau, o le Alii o le Filemu. E leai se mea e gata mai ai ona tele o lona malo ma le filemu o lona malo.”
4. O ai le tama o le a avea ma pule o le malo o le Atua?
4 Ua faamatala mai e le Tusi Paia le fanau mai o se tama o se perenise. I le taimi e tatau ai, o le a avea ai lenei ʻalo o se tupu’ ma se pule sili, le “Alii o le Filemu.” O le a pulea ia se malo ofoofogia moni. O lenei pulega o le a na aumaia le filemu i le lalolagi atoa, ma o le a tumau e faavavau lea filemu. O le tama na valoia i le Isaia 9:6, 7 o Iesu. Ina ua folafolaina atu lona fanau mai i le teine taupou o Maria, sa faapea atu le agelu o Kaperielu e faatatau i a Iesu: “E fai o ia ma tupu . . . o lona malo foi e leai sona gataaga.”—Luka 1:30-33.
FAAMAMAFAINA O LE TĀUA O LE MALO
5. (a) O faapefea ona faaalia i le Tusi Paia le tāua o le Malo? (e) O le ā le malo o le Atua, ma o le ā le mea o le a na faia?
5 A o i ai i latou i le lalolagi, o le galuega autu a Iesu Keriso ma ē lagolagoina o ia, o le talaʻi ma aʻoaʻo atu le oo mai o le malo o le Atua. (Luka 4:43; 8:1) Ua sili i le 140 ona latou faasino i lea malo i totonu o le Tusi Paia. Na aʻoaʻo foi e Iesu ona soo ia tatalo i le Atua: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) Pe o lenei malo o tatalo i ai Kerisiano o se pulega moni? Atonu e te lei manatu i ai faapea, a e o se malo moni lava. O le Alo o le Atua o Iesu Keriso o le tupu o lea malo. O le a ia pule i le lalolagi atoa. Maeu le matagofie pe a lē toe vaevaeina tagata i le tele o atunuu feteenai, ae o tagata uma o le a autasi i le filemu i lalo o le Malo o le Atua!
6. A o i ai Iesu i le lalolagi, ai se ā na faapea atu ai ua “latalata” le Malo ma “ua i ai lava ia te outou”?
6 Na amata e Ioane le Papatiso le talaʻiga o lenei pulega, i le fai atu: “Ina salamo ia outou; auā ua latalata mai le malo o le lagi.” (Mataio 3:1, 2) Ai se ā na ia taʻua ai faapea? Ona o Iesu, o lē o le a pule i le malo o le Atua i le lagi, sa toeitiiti ona papatiso lea e ia ma faauu i le agaga paia o le Atua. Ua e malamalama la i le pogai na tulei ai Iesu mulimuli ane i le au Faresaio: “Faauta, ua i ai lava ia te outou le malo o le Atua.” (Luka 17:21) Ona o Iesu o lē ua faauu e le Atua o se tupu, sa faatasi ma i latou i ina. I lea vaitaimi o le tolu ma le afa tausaga o lana talaʻi ma lana aʻoaʻo atu, ma le faamaoni o Iesu i le Atua seia oo i le oti, ua faamaonia ai lana aiā tatau e fai ma tupu.
7. O le ā ua faaalia ai sa avea le Malo ma mataupu tāua ina o i ai Iesu i le lalolagi?
7 Ina ia faaalia o le malo o le Atua sa o se finauga tāua i le taimi o le auaunaga a Keriso, manatu i le mea na tupu i le aso mulimuli a o lei oo i lona maliu. Fai mai le Tusi Paia sa tuuaia e tagata Iesu i le faapea atu: “Na matou iloa lenei tagata ua ia faasese i le nuu, ua vavao foi ona avatu o taulaga ia Kaisara, ua faapea mai, o ia lava o le Tupu, o Keriso.” Ina ua faalogo o ia i nei mea, sa fesili atu loa le kovana Roma o Ponotio Pilato i a Iesu: “O oe ea o le tupu o tagata Iutaia?”—Luka 23:1-3.
8. (a) Sa faapefea ona tali atu Iesu ian ua fesiligia o ia po o se tupu? (e) O le ā na uiga i ai le faamatalaga a Iesu ian ua na faapea atu “e le mai iinei loʻu malo”?
8 Sa lei tali atu Iesu tuusaʻo e tusa ma le fesili a Pilato, ae na ia tulei atu: “E le mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna ina neʻi tuuina atu aʻu ia Iutaia; a o lenei, e le mai i iinei loʻu malo.” Sa tali atu faapea Iesu auā e le faalelalolagi lona malo. Sa tatau ona pule mai o ia mai le lagi, a e lē o se tagata mai se nofoalii i le lalolagi. Talu ai o le finauga sa faapea, pe na i ai i a Iesu le aiā e pule ai o se tupu pe leai, ona toe fesili atu foi lea o Pilato i a Iesu: “O lena foi, e te se tupu ea oe?”
9. (a) O le ā le upu moni ofoofogia sa faaali atu e Iesu? (e) O ā fesili tāua i aso nei?
9 E mautinoa, sa faamasinoina Iesu ma e aafia ai lona ola ona sa talaʻi ma aʻoaʻo e uiga i se pulega fou. O lea sa tali Iesu ia Pilato: “O lea lava, o aʻu o le Tupu. O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni.” (Ioane 18:36, 38) Ioe, sa faaaoga e Iesu lona olaga i le lalolagi e taʻu i tagata le faamoemoe ofoofogia o le upu moni e uiga i le pulega o le Malo o le Atua. Sa fai ma ana feau autu. Ma o loo faia pea le Malo ma mataupu tāua i aso nei. Ae ua tumau pea le fesili: O le fea pulega e sili ona tāua i le olaga o se tagata? Pe o le pulega ea a tagata, po o le malo o le Atua ua fai Keriso ma ona pule?
FUAFUAINA MO LE PULEGA FOU O LE LALOLAGI
10. (a) O anafea na silafia ai e le Atua le manaoga mo se pulega fou? (e) O fea i totonu o le Tusi Paia o taʻua muamua ai lenei pulega? (i) O ai ua faaatagia e le gata?
10 Ina ua uma ona faapogaia e Satani ia Atamu ma Eva e au faatasi i lana fouvalega ona silafia lea e Ieova le manaoga mo se pulega fou mo tagata. Ona tulei lea o le Atua i lana fuafuaga o le faavaeina o se pulega. Ua fai mai o ia i lenei malo ina ua na fofogaina le faasalaga o le gata, i lona fai atu i a Satani le Tiapolo: “Ou te faatupuina le feitagai i a te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.”——Kenese 3:14, 15.
11. I le va o ai o le a feitagai?
11 Ae atonu e te fesili mai: ‘O fea o i iinei o taʻua ai se pulega?’ Sei tatou vaavaai ma le faaeteete i lenei faamatalaga ma o le mafai ai ona tatou iloa. Ua faaalia e le mau o le a i ai le feitagai i le va o Satani ma “le fafine.” E faaopoopo atu atili, o le a i ai foi le feitagai i le “fanau” a Satani ma le “fanau” a le fafine. Muamua lava, e manaomia ona tatou iloiloina po o ai le “fafine.”
12. O le ā o taʻua e uiga i le “fafine” i le Faaaliga mataupu e 12?
12 E le o ia o se fafine faalelalolagi. Sa lei i a Satani se inoino faapitoa faasaga i soo se fafine faaletagata. O ia o se fafine faafaatusa. E i ai se mea e faauiga i ai. Ua faaalia e le tusi faaiu o le Tusi Paia, le tusi o Faaaliga, le mea o loo taʻuina mai ai ni faamatalaga faaopoopo e uiga i lenei fafine. Ua faamatalaina le “fafine ua ofu i le la, o i lalo o ona vae le masina, o i lona ulu foi le palealii fetu e sefulu ma le lua.” Ina ia fesoasoani i a i tatou ia iloa po o ai ua faaatagia e lenei “fafine,” matau le faamatalaga atili a le Faaaliga e uiga i lana tama: “Ua fanau foi e ia o le tama tane, o le na te pule i nuu i le tootoo uamea; ona segia ae lea o lana tama i le Atua i lona nofoālii.”—Faaaliga 12:1-5.
13. O ai pe po o le ā ua faaatagia e le “tama tane” ma le “fafine”?
13 O le iloaina po o ai pe po o le ā le “tama tane,” o le a fesoasoani i a i tatou ina ia sueina po o ai ma o le ā ua faaatagia e lenei “fafine.” O le tama ua lē o se tagata moni e pei foi ona lē avea le fafine o se fafine moni faaletagata. Ua faaalia e le mau o lenei “tama tane” e “pule i nuu uma.” O lea o le “tama” ua faaatagia ai le malo o le Atua ma Iesu Keriso o le tupu o loo pule. “O le fafine,” o le faalapotopotoga a le Atua o agelu faamaoni faalelagi. E pei ona fanaua mai se “tama tane” i se “fafine,” ua faapena foi ona fanaua mai le Tupu, o Iesu Keriso, mai le faalapotopotoga faalelagi, le tino o mea faiola faaleagaga faamaoni i le lagi ua galulue faatasi mo le faataunuuina o le fuafuaga a le Atua. Ua taʻua e le Kalatia 4:26 o le “Ierusalema i lugā.” O lea la, ina ua uluai fouvale Atamu ma Eva faasaga i le pulega a le Atua, sa faia loa e Ieova se fuafuaga mo se pulega o se Malo o le a auauna o se faamoemoe mo e alolofa i le amiotonu.
E MANATUA E IEOVA LANA FOLAFOLAGA
14. (a) Ua faapefea ona faaalia e Ieova na te manatua lana folafolaga e uiga i le “fanau” o le a tuʻimomomoina Satani? (e) O ai le “fanau” folafolaina?
14 Sa lei galo i a Ieova lana folafolaga o le auina mai o se “fanau” o lē fai ma pule o le malo o le Atua. O lenei pule o le a na faaumatiaina Satani i le tuʻimomomoina o lona ulu. (Roma 16:20; Eperu 2:14) Mulimuli ane, sa toe taua e Ieova lea fanau folafolaina o le a ala mai i a Aperaamo faamaoni. Sa tulei atu Ieova i a Aperaamo: “O lau fanau foi e manuia ia atu nuu uma lava o le lalolagi.” (Kenese 22:18) O ai lenei “fanau” sa folafolaina ole a ala mia i le gafa o Aperaamo? Ua tali mai le Tusi Paia mulimuli ane: “Na fetalaia mai folafolaga ia Aperaamo, ma so lana fanau; e lei faapea mai, O le fanau, peiseai e toatele, a e toatasi, O so lau fanau, o Keriso lava lea.” (Kalatia 3:16) Sa taʻu atu foi e Ieova i a Isaako le atalii o Aperaamo ma Iakopo le atalii o lona atalii o le “fanau” a le “fafine” o le Atua o le a ala mai i ē tupuga mai i a i laua.—Kenese 26:1-5; 28:10-14.
15, 16. O le ā e faamaonia ai le “fanau” folafolaina e avea o se tupu e pule?
15 Ina ia faamautinoa o lenei “fanau” o le a avea o se tupu e pule, sa taʻu atu e Iakopo lenei faamatalaga i lona atalii o Iuta: “E le avea le tootoo [po o le aiā e pule] ia Iuta, po o le faipule ai ona vae seia maliu mai Sailo, e usiusitai foi atu nuu ia te ia.” (Kenese 49:10) Sa afio mai Iesu Keriso mai le ituaiga o Iuta. Ua faamaonia le avea o ia ma lenei “Sailo” o lē “e usiusitai foi atu nuu ia te ia.”—Eperu 7:14.
16 Toeitiiti lava 700 tausaga ina ua mavae le faamatalaga i a Iuta, sa toe tulei Ieova e faatatau i a Tavita mai le ituaiga o Iuta: “Ua ou maua Tavita laʻu auauna . . . Ou te tofia lana fanau ia faavavau, o lona nofoālii foi e pei o aso o le lagi.” (Salamo 89:20, 29) Ina ua tulei mai le Atua o le “fanau” a Tavita o le a tofia e “faavavau” ma “o lona nofoālii foi e pei o aso o le lagi,” o le ā le uiga o lana fetalaiga? Ua faasino e Ieova i le mea moni e faapea o le pulega o le Malo i aao o Iesu Keriso, o le a tumau e faavavau. E faapefea ona tatou iloa?
17. E faapefea ona tatou iloa o le pule folafolaina o Iesu Keriso?
17 Manatua le faamatalaga a le agelu a Ieova o Kaperielu i a Maria i le tama o le a fanau mai i a te ia. Sa faapea atu: “E te faaigoa ia te ia o Iesu.” Ae sa le tumau pea Iesu o se pepe, po o se tamaloa foi i le lalolagi. Ua fai atu atili Kaperielu: “E sili o ia, e taʻua o le Alo o le Silisili ese; e foai atu e le Alii o le Atua ia te ia le nofoaiga a Tavita lona tamā; e fai o ia ma tupu i le aiga o Iakopo e faavavau; o lona malo foi e leai sona gataaga.” (Luka 1:31-33) Pe ua le maofa ea le faavaeina e Ieova o fuafuaga mo le faatuina o se pulega amiotonu mo le manuia e faavavau o i latou o ē alolofa ma faalagolago i a te ia?
18. (a) E faapefea ona faamatalaina e le Tusi Paia le uiga o malo faalelalolagi? (e) O le ā o le a faia e le pulega a le Atua mo tagata?
18 Ua lata le taimi e gaoioi ai le pulega a le Malo o le Atua e faaleaga malo uma o le lalolagi. Ona galue loa lea o Iesu Keriso o se Tupu manumalo. Ua tala mai e le Tusi Paia lea taua: “I ona po o ia tupu e faatuina ai e le Atua o le lagi o le malo e le faaumatia e faavavau; . . . na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44; Faaaliga 19:11-16) Pe a oo ina aveesea uma pulega, ona faamalieina loa lea e le pulega a le Atua manaoga moni o tagata. O le a tagai i ai Lē pule, o Iesu Keriso o le a leai lava se tasi faamaoni e toe maʻi, agai ina tino matua pe oti. Solitulafono, fale leaga, fia taumafa ma isi faalavelave uma o le a foia. O le a i ai le filemu moni ma le saogalemu i le lalolagi aoao. (2 Peteru 3:13; Faaaliga 21:3-5) E ui i lea, e manaomia ona tatou aʻoaʻo atili e uiga i a i latou o ē o le a pule i lenei pulega o le Malo o le Atua.
[Fesili mo le Suʻesuʻega]
[Ata i le itulau 112, 113]
Sa aauina atu e Iesu ona soo ina ia faia le galuega tāua o le talaʻia o le malo o le Atua
[Ata i le itulau 114]
Ina ua faamasinoina e iu i lona ola po o lona oti, sa talaʻia pea e Iesu le malo o le Atua
[Ata i le itulau 119]
E faapefea lau tagai i a Iesu—o se tupu manumalo po o se pepe e lē mafesoasoania?
