O le Tusi Paia, Pe e Moni ea ua Mai le Atua?
Mataupu 5
O le Tusi Paia, Pe e Moni ea ua Mai le Atua?
1. Ai se ā ua ala tatau ai ona talitonu o e a aumaia e le Atua i a i tatou ni faamatalaga e uiga i a te ia lava?
PE UA aumaia e Ieova le Atua mo i tatou ni faamatalaga e uiga i a te ia? Pe ua na taʻu mai ea mea ua ia faia ma mea ua ia fuafua e fai? O se tamā e alofa i lana fanau e taʻu i a i latou le tele o mea. Ma i mea o vaaia, ua faamaonia o Ieova o se tamā alofa.
2. (a) O le ā se auala lelei mo Ieova e taʻuina mai ai i a i tatou e uiga ia te ia lava? (e) O le ā le fesili ua lagā e lenei mea?
2 E mafai faapefea e Ieova ona avatu ni faamatalaga i tagata o loo ola i vaega e tele o le lalolagi ma i vaitaimi eseese? O se auala sili mo ia o le tusia lea o se tusi ma ia faamautinoa ua saunia mo tagata uma. Pe o le Tusi Paia ea o se Tusi mai le Atua? E faapefea ona tatou iloa pe o lea?
E LEAI SE ISI TUSI E PEI O LE TUSI PAIA
3. O le ā se tasi o auala ua avea ai le Tusi Paia ma tusi tulaga ese?
3 Afai o le Tusi Paia e moni e mai le Atua, e ao ona tatou faatalitalia ua sili i lo tusi uma ua tusia. Pe ua faapea? Ioe, ma mo le tele o mafuaaga. Muamua, o se tusi ua leva; o le a e lē manatu o le Afioga a le Atua mo tagata uma, na tusia i se taimi lata mai, a ea? Na amata ona tusia e tusa ua 3,500 tausaga ua tea i le gagana Eperu. Ma, e sili i le 2,200 tausaga ua mavae, sa amata ona faaliliu i isi gagana. Ua toe lava o soo se tagata e mafai ona faitau le Tusi Paia i lana lava gagana.
4. E faapefea i le aofaiga o Tusi Paia ua faia ona faatusatusa atu i isi tusi?
4 E le gata i lea, e leai lava se isi tusi e sōsō atu i le Tusi Paia i le faitau aofai kopi ua lomia. Atonu e mafai ona taʻua se tusi o se “tusi silisili le alumia” pe a oo ina na o le faitau afe kopi ua saunia. I tausaga uma, e faitau miliona le aofai o Tusi Paia ua lomia. Ma i le tele o senituri e faitau afe miliona tusi ua saunia! Ai loga e i ai se nofoaga i le lalolagi, e tusa lava po o le a le tu ese mai o le a e le maua ai se Tusi Paia. Pe e lē o le mea ea lea o e faatalitalia i se tusi e aumaia moni mai le Atua?
5. O ā ni taumafaiga ua faia ina ia faaumatia ai le Tusi Paia?
5 Ua sili foi ona maofa lenei tufatufaina tele o le Tusi Paia auā ua taumafai fili e faaleagaina. Ae pe tatou te lē faatalitalia ea se tusi e mai le Atua o le a osofaia e sui o le Tiapolo? Ua tupu lenei mea. Sa masani ona tutupu le susunuina o Tusi Paia, ma o i latou sa maua o faitauina le Tusi Paia sa masani ona faasalaina i le oti.
6. (a) O ā fesili tāua ua taliina e le Tusi Paia? (e) Mai i fea ua faalauiloa mai e le au tusitala o le Tusi Paia o maua mai ia a latou faamatalaga?
6 Ua ao foi ona talanoaina mataupu tāua i se tusi mai le Atua ua tatau ona tatou iloa. ‘O fea na puna mai ai le ola?’ ‘Ai se ā ua tatou i ai i inei?’ ‘O ā o le a aumaia e le lumanai?’ O fesili nei ua ia taliina. Ua manino o upu o i ai e mai i a Ieova. Ua fai mai se tusitala o le Tusi Paia: “O aʻu na fetalai ane ai le Agaga o Ieova; o lana afioga foi sa i loʻu laulaufaiva.” (2 Samuelu 23:2) O le isi: “O Tusi Paia uma lava e mai le Agaga o le Atua ia.” (2 Timoteo 3:16) Ona ua fai mai le Tusi Paia o ia moni lava o le Afioga a le Atua, pe ua le poto ona suesue pe e moni?
PE NA FAAPFEA ONA TUSIA LE TUSI PAIA
7. (a) O ai na tusia le Tusi Paia? (e) E faapefea la ona mafai ona faapea atu o le Afioga a le Atua?
7 ‘E faapefea ona mai le Atua le Tusi Paia pe afai sa tusia e tagata?’ Atonu o lau fesili lea. E moni, e tusa ma le 40 tane sa tusia le Tusi Paia. Sa tusia moni e nei tane sei vagana ai Tulafono e Sefulu, sa tusia lava e le Atua i papa maa i gaoioiga tuusaʻo a lona agaga paia. (Esoto 31:18) E lē faapea la ua faatauvaa ai le Afioga a le Atua ona o mea na latou tusia. Ua faamatala mai e le Tusi Paia: “O tagata paia o le Atua na talatalaina mai ina ua osofia e le Agaga Paia.” (2 Peteru 1:21) Ioe, e pei lava ona sa faaaoga e le Atua lona agaga paia mamana e faia ai le lagi, le lalolagi ma mea ola uma, sa ia faaaoga foi la e faatonutonu ai le tusia o le Tusi Paia.
8, 9. O ā faataʻitaʻiga o aso nei e mafai ona fesoasoani i a i tatou ia malamalama i le auala na tusia ai e le Atua le Tusi Paia?
8 O le uiga o lenei mea e na o le toatasi lava le tusitala o le Tusi Paia, o Ieova le Atua. Sa ia faaaoga tane ia tusia faamatalaga i lalo e pei foi ona faaaoga e se tagata faipisinisi se failautusi e tusia se tusi. E tusia e le failautusi le tusi, ae o manatu ma auala e faia ai o mea ia a le tagata faipisinisi. O lea o lana tusi, e lē o se tusi a le failautusi, e pei foi ona avea le Tusi Paia o le Tusi a le Atua, e lē o se tusi a tane na faaaoga e tusia.
9 Talu ai ona o le Atua na foafoaina le mafaufau, ma le mautinoa e lei faigata mo ia ona fesootai ma mafaufau o ana auauna ina ia saunia ai i latou mo faamatalaga e tusia ai. E oo foi lava i aso nei, e mafai e se tagata ona nofo i lona fale ma mauaina feau mai i se nofoaga mamao e ala mai i se reitio po o se televise. E malaga mamao leo po o ata e faaaoga ai tulafono faitino a le Atua na ia faia. O lea la, ua faigofie i a Ieova mai i lona afioga mamao i le lagi ona faatonutonuina tane ina ia tusia i lalo faamatalaga sa ia finagalo i ai ia iloa e le fanau a tagata.
10. (a) E fia le aofai o tusi o faia aʻe ai le Tusi Paia, ma e sili aʻe i le ā le vaitaimi na tusia ai? (e) O le ā le matua autu o loo i le faagasologa atoa o le Tusi Paia?
10 O le iuga ua fai ma tusi ofoofogia. O le mea moni ua faia le Tusi Paia i tamai tusi e 66. O upu Eleni biblia ua fai ai upu “Tusi Paia” o lona uiga “tamai tusi.” O nei tusi sa tusia e silia i le 1,600 tausaga, mai i le 1513 T.L.M. e oo i le 98 T.A. Ona e na o le tasi le tusitala, o nei tusi uma o le Tusi Paia e autasi. O le matua e tasi o aumaia atoa i totonu, e faapea, o le a toe aumaia e Ieova le Atua tulaga amiotonu e ala i lona malo. Ua taʻu mai e le tusi o le Kenese pe na faapefea ona lē iloa se aiga parataiso ona o le fouvale i le Atua, ma i le tusi o le Faaaliga, ua faamatala ai pe faapefea ona toe faia e le pulega a le Atua le lalolagi ma parataiso.—Kenese 3:19, 23; Faaaliga 12:10; 21:3, 4.
11. (a) O ā gagana na faaaogaina e tusia ai le Tusi Paia? (e) O ā vaega autu e lua ua vaevae i ai le Tusi Paia, ae o le ā ua faaalia ai lo la autasi?
11 O uluai tusi 39 o le Tusi Paia sa tusia i le gagana Eperu, ma ni ona vaega iti na tusia i le Aramaika. O tusi mulimuli e 27 sa tusia i le gagana Eleni, o le gagana taatele a tagata i le taimi a o i ai Iesu ma ona soo Kerisiano i le lalolagi. O nei vaega autu e lua o le Tusi Paia ua fetaui lelei ona faaigoa o “Tusitusiga Eperu” ma “Tusitusiga Eleni.” E faaalia ai lo latou autasi, ua sii mai e Tusitusiga Eleni le sili i le 365 mau mai i Tusitusiga Eperu, ma ua faia ni faasinoga faaopoopo i ai e tusa ma le 375 taimi.
FAIA O LE TUSI PAIA IA MAUA E TAGATA UMA
12. Ai se ā na faia ai e Ieova ni kopi mai i le Tusi Paia?
12 Pe ana fai e na o uluai tusitusiga o loo maua, e mafai faapefea ona faitau e tagata uma le Afioga a le Atua? Latou te le mafai. O lea na fuafuaina ai e Ieova le faia o kopi o uluai tusitusiga Faa-Eperu. (Teuteronome 17:18) Mo se faataʻitaʻiga ua taʻua Esera, “o le tusiupu poto foi o ia i le tulafono a Mose, na tuuina mai e Ieova le Atua o Isaraelu.” (Esera 7:6) E le gata i lea, e faitau afe kopi o Tusitusiga Eleni sa saunia.
13. (a) O le ā sa manaomia ina ia mafai e le toatele o tagata ona faitauina le Tusi Paia? (e) O anafea na faia ai le faaliliuga muamua o le Tusi Paia?
13 Pe e mafai ona e faitau i le gagana Eperu po o le Eleni? Afai e leai, e lē mafai ona e faitau i uluai kopi na tusilimaina o le Tusi Paia, e ui lava o loo maua pea nisi. O lea, ina ia e faitau le Tusi Paia e ao ona faaliliu i se gagana e te iloa. O lenei faaliliuina i isi gagana ua mafai ai e le toatele ona faitauina le Afioga a le Atua. Mo se faataʻitaʻiga, pe tusa e 300 tausaga a o lei soifua Iesu i le lalolagi, o le toatele sa amata ona tautala i le gagana Eleni. Ma sa faaliliu atu Tusitusiga Eperu i le Faa-Eleni amata mai i le 280 T.L.M. O lea uluai faaliliuga sa taʻua o le “Septuagint.”
14. (a) Ai se ā na tau ai isi taʻitaʻi lotu ina ia taofia le Tusi Paia mai i le faaliliuina? (e) O le ā ua faaalia ua faiaina nei tagata i le taua?
14 Mulimuli ane, sa avea le gagana Latina ma gagana taatele a le toatele, o lea sa faaliliuina foi e Tusi Paia i le Faa-Latina. I le mavae o senituri, e toaitiiti sa tautala i le Faa-Latina. o le toatele sa tautala i isi gagana e pei o le Arapi, Farani, Sepania, Potukale, Italia, Siamani ma le Peretania. Mo se taimi sa tau ai taʻitaʻi lotu Katoliko ia taofia le Tusi Paia i le faaliliu i le gagana a tagata lautele. Na oo foi lava ina latou faatautau tagata i laau ma susunu pea maua i ai se Tusi Paia. Ua latou faapea ona ua faaalialia e le Tusi Paia a latou aʻoaʻoga sese ma faiga leaga. Ae na toilalo i latou, ma sa amata ona faaliliu le Tusi Paia i le tele o gagana ma tufatufaina i se aofaiga tele. E faitauina le Tusi Paia i aso nei, a e lē o i lona atoaga, i vaega i le sili atu i le 1,700 gagana!
15. Ai se ā ua lelei ai le mauaina o ni faaliliuga fou o le Tusi Paia?
15 A po mavae tausaga, sa tele faaliliuga o le Tusi Paia na faia mai i le gagana e tasi. Mo se faaaʻoaʻoga, i le gagana Peretania e faitau tasene le aofai o faaliliuga o le Tusi Paia. Ai se ā? Pe ua le lava le tasi? Ia, a o gasolo tausaga, o le a tele se suiga o se gagana. O lea afai e te faatusatusa faaliliuga tuai o le Tusi Paia ma faaliliuga fou, o le a e matauina ai suiga i le gagana. A o aumaia ai le manatu e tasi, o le a e matauina o le faaliliuga ua lomia i nai tausaga ua mavae e masani ona malamalamagofie i ai. O lea, tatou te faafetai ona o faaliliuga fou o le Tusi Paia, ona ua na tuuina le Afioga a le Atua i le gagana taatele o aso nei e faigofie ona malamalama i ai.
PE UA SUIA EA LE TUSI PAIA?
16. Ai se ā ua talitonu ai isi tagata ua suia le Tusi Paia?
16 Ae atonu e te fesili: ‘E mafai faapefea ona tatou mautinoa e tutusa faamatalaga o lo i a tatou Tusi Paia o aso nei ma faamatalaga sa maua e le ua tusitala o le Tusi Paia mai i le Atua?’ Pe ua lē sosolo ane ea i ai ni mea sese i le tasiiina o le Tusi Paia i le tele o tausaga ua mavae? Ioe, peitai o nei mea sese ua maua ma toe faasaʻoina i faaliliuga faaonapo nei o le Tusi Paia. I aso nei ua tutusa lava na faamatalaga ma ia na saunia e le Atua ia i latou o ē na muamua tusia. O ā ni faamaoniga mo lea?
17. O le ā se faamaoniga o i ai e faaalia ai e lei suia le Tusi Paia?
17 Ia, sa mauaina i le va o le 1947 ma le 1955 mea ua taʻua o Tusi Taai Mai le Sami Mate. O nei tusi taai tuai e aofia ai kopi o tusi o Tusitusiga Eperu. Na tusia na tusi pe tusa o le 100 i le 200 tausaga a o lei oo ina fanau mai Iesu. O se tasi o tusi taai o se kopi lea o le tusi a Isaia. A o lei maua lenei tusi, o le kopi aupito maotua na i ai o le tusi a Isaia i le gagana Eperu sa saunia lea pe tusa o le 1,000 tausaga ina ua mavae le fanau mai o Iesu. Ina ua faatusatusa nei kopi e lua o le Isaia, e itiiti lava so la eseesega, o le tele o ia mea o eseesega itiiti i le sipelaina! O lona uiga i le sili aʻe i le 1,000 tausaga o le siiina sa leai lava se suiga moni!
18. (a) Ua faapefea ona faasaʻoina mea sese a ē na siiina maia? (e) O le ā e mafai ona taʻua e tusa ai ma le saʻo o Tusitusiga Eleni?
18 E sili aʻe i le 1,700 kopi tuai o vaega eseese o Tusitusiga Eperu o loo mauaina nei. Afai e faatusatusa ma le faaeteete nei kopi tuai e tele, e mafai ona maua ma toe faasaʻoina nai mea sese na faia e ē na siiina na kopi. E faitau afe foi kopi tuai o Tusitusiga Eleni o loo i ai, o ni isi o nei kopi na tusia toeitiiti lava i le vaitaimi o Iesu ma ona aposetolo. E pei ona faamatalaina e Sir Frederic Kenyon: “Ua aveesea nei le faavae mulimuli mo so o se faalētonu, ua faagasolo mai le Tusi Paia i a i tatou i le uiga tutusa sa uluai tusia ai.”—The Bible and Archaeology, itulau 288, 289.
19. (a) O le ā se faataʻitaʻiga o se taumafaiga ina ia faaopoopo i le Tusi Paia? (e) Ai se ā ua le avea ai le 1 Ioane 5:7 e pei ona aliali mai i nisi o faaliliuga o le Tusi Paia o se vaega o le Tusi Paia?
19 E lē faapea ai la sa leai ni taumafaiga ia suia le Afioga a le Atua. Ua i ai. O se faataʻitaʻiga iloga o le 1 Ioane 5:7. Ua faitauina i le Tusi Paia Faa-Samoa o le 1884 e faapea: “Auā e toatolu o e molimau i le lagi, o le Tamā, ma le Lokou, atoa ma le Agaga Paia; o i latou nei foi e toatolu e toatasi lava ia.” Ae peitai o nei upu e lē o i ai i so o se uluai kopi o le Tusi Paia. Sa faaopoopo atu i ai e se tasi o lē na manao e lagolagoina le aʻoaʻoga o le Tasitolu. Talu ai ua manino le mata o le vai o nei upu e lē o se vaega moni o le Afioga a le Atua, ua faia ai ni faasaʻoga ma e lē o maua nei upu i Tusi Paia fou.
20. Ai se ā e mafai ai ona tatou mautinoa ua tausia pea le Tusi Paia i se tulaga lē filogia?
20 O lea, o se tasi e faapea mai e lē tutusa faamatalaga i le Tusi Paia ma faamatalaga ina ua uluai tusia, e lē o iloa e ia mea moni. Ua faamautinoa ai e Ieova le Atua ua puipuia lana Afioga, e lē gata i mea sese sa faia e le au sii tusi a e faapena foi ma ni taumafaiga e faaopoopo i ai. Ua i le Tusi Paia lava ia le folafolaga a le Atua e faapea o lana Afioga o le a tausia pea lona lē filogia mo i tatou i aso nei.—Salamo 12:6; Tanielu 12:4; 1 Peteru 1:24, 25; Faaaliga 22:18, 19.
PE E MONI EA LE TUSI PAIA
21. Sa faapefea le tagai a Iesu i le Afioga a le Atua?
21 Sa tatalo Iesu Keriso i le Atua: “O lau afioga o le upu moni lea.” (Ioane 17:17) Ae pe e moni ea lenei mea? Pe a suesue ma le faaeteete i le Tusi Paia, pe tatou te iloaina ea o le mea moni lea? O tagata aʻoga o tala faasolopito o ē ua suesueina le Tusi Paia, ua masani ona maofa i lona saʻo. Ua i le Tusi Paia igoa patino ma faamatalaga e mafai ona faamaonia. Sei manatunatu i ni faataʻitaʻiga.
22-25. O ā ni faataʻitaʻiga laiti e faailoaina ai ua i le Tusi Paia le tala faasolopito saʻo?
22 Tagai i ata ma tusitusiga i le pa o lenei malumalu i Karnak, i Aikupito. O loo faamatala ai se manumalo a le Farao o Sesaka i le itumalo o Iuta i le pulega a le atalii o Solomona o Reopoamo ua toetoe lava 3,000 tausaga ua mavae. Ua i le Tusi Paia lea lava mea na tupu.—1 Tupu 14:25, 26.
23 Tagai atu i le Maa Moapi. E mafai ona vaaia le maa moni i le Fale Mataaga o Louvre i Paris i Farani. Ua faamatalaina e tusitusiga le fouvalega a le tupu o Mesa o Moapi faasaga i a Isaraelu. Ua faamauina foi lenei mea na tupu i le Tusi Paia.—2 Tupu 1:1; 3:4-27.
24 O le Taelega i Soloa ma le ala tatala i se ana vai i Ierusalema e 1,749 futu le umi [533 mita] o loo i le taufaasiʻusiʻuga o le itu taumatau. O le toatele o tagata tafafao o ona po nei i Ierusalema ua asaina le vai i lea ana. Ua faamaonia atili ai le moni o le Tusi Paia. E faapefea? Talu ai ua faamatala mai e le Tusi Paia sa fausiaina e le Tupu o Esekielu lenei ana e sili aʻe i le 2,500 tausaga ua mavae ina ia puipuia ona vai ai i osofaiga a autau.—2 Tupu 20:20; 2 Nofoaiga a Tupu 32:2-4, 30.
25 I le Fale Mataaga i Peretania e mafai ona vaaia ai le Tusi o Nofoaiga a Tupu a Naponita, e pei ona vaai atu i se kopi o i lalo. O loo taʻua ai le paʻū o Papelonia anamua, e pei foi ona faia e le Tusi Paia. (Tanielu 5:30, 31) A e tusa ma le Tusi Paia o le taimi lea na tupu ai Pelesara i Papelonia. Ae ua lē taʻua lava e le Tusi o Nofoaiga a Tupu a Naponita ia Pelesara. O lea mea moni, sa i ai se taimi sa faapea mai ai tusitusiga lauiloa anamua o Naponita sa avea o le tupu mulimuli o Papelonia. O lea o ē faapea mai ua le saʻo le Tusi Paia, ua finau faapea, ua sese auā sa lei i ai se Pelesara. Peitai i ni tausaga ua tuanai sa maua ai ni tusitusiga anamua ua taʻu mai ai o Pelesara o le atalii o Naponita ma na pule lagolago i lona tamā i Papelonia i lea taimi! Ioe, ua moni pea le Tusi Paia e pei ona faamaonia i le anoano o faataʻitaʻiga.
26. O ā ni faamaoniga ua i ai, e saʻo ai le Tusi Paia e uiga i mea faasaienisi?
26 Ua le na o tala faasolopito o mea moni na tutupu ua i le Tusi Paia. O mea uma ua tulei i ai e moni. Pe a oo foi ina taʻua mea faasaenisi, ua ofoofogia le moni. Sei aumai na o ni faataʻitaʻiga se lua: I taimi anamua, sa i ai le talitonuga masani o loo i ai se mea vaaia o lagolagoina le lalolagi, o lona uiga i luga o se mea, e pei i luga o se tagata tino ese. Ae ua ripotia mai e le Tusi Paia ua ioe atoatoa ma faamaoniga faasaienitisi ua tautauina e le Atua “le lalolagi, a e leai se tautaulaga.” (Iopu 26:7) Ma i lo le faapea mai e salafa le lalolagi, e pei ona sa talitonu i ai le toatele i taimi ua mavae, ua faapea mai le Tusi Paia o le Atua o loo “tietie i le faataaliolio o le lalolagi.”—Isaia 40:22.
27. (a) O le ā le faamaoniga sili le malosi e iloa ai o le Tusi Paia e mai le Atua? (e) O ā mea sa valoia ma le saʻo i Tusitusiga Eperu e uiga i le Alo o le Atua?
27 Ae o le faamaoniga silisili o le Tusi Paia e aumaia moni e le Atua, o lana faamaumauga lelei atoatoa o mea valoia mo le lumanai. E leai se tusi a tagata ua ripotia mai ma le saʻo tala faasolopito a o lei oo ina tupu; ae ua faia faapea e le Tusi Paia. Ua faatumulia i valoaga saʻo faapea, ioe i tala faasolopito na tusia moni lava a o mamao. O nisi o nei mea ofoofogia o le afio mai i le lalolagi o le Alo o le Atua. Ua valoia mai ma le saʻo e Tusitusiga Eperu o le Tusi Paia le faitau selau o tausaga a o mamao lava lenei Tama o le Folafolaga e fanau i Peteleema i se taupou, e faalataina i tupe ario e 30, e faitaulia foi o ia faatasi ma ē agasala, e lē gausia se ivi o lona tino, e faia le vili i ona ofu, ma le faitau selau o isi faamatalaga.—Mika 5:2; Mataio 2:3-9; Isaia 7:14; Mataio 1:22, 23; Sakaria 11:12, 13; Mataio 27:3-5; Isaia 53:12; Luka 22:37, 52; 23:32, 33; Salamo 34:20; Ioane 19:36; Salamo 22:18; Mataio 27:35.
28. (a) Ai se ā e mafai ai ona tatou mautinoa e oo foi i na valoaga o le Tusi Paia e lei faataunuuina, o le a faataunuu? (e) O le ā o le a faatalitonu oe i ai i le suesueina pea o le Tusi Paia?
28 E pei ona taʻua i le mataupu muamua o lenei tusi, ua valoia foi e le Tusi Paia ua le pine ona faaumatia lea o lenei faiga tuai o mea ma suia e le faiga fou amiotonu. (Mataio 24:3-14; 2 Peteru 3:7, 13) Pe e mafai ona tatou faalagolago i lea valoaga ua toeitiiti taunuu? Afai ua faitau selau ona taʻu atu e se tasi ia te oe le mea moni, pe o le a faafuaseia ea ona e masalosalo i a te ia pe ana taʻuaina atu ia te oe se mea fou? Afai e te lei mauaina lava sana mea sese, pe o le a amata ea nei ona e masalosalo i a te ia? Paga se lē fetaui o lea tulaga! Ua leai foi la se mafuaaga tatou te masalosalo ai i soo se mea ua folafola mai e le Atua i le Tusi Paia. E faatuatuaina lana Afioga! (Tito 1:2) I le suesueina pea o le Tusi Paia, o le a mafai ona faatalitonuina atili ai oe e faamaoniga e aumaia moni lava mai le Atua.
[Fesili mo le Suʻesuʻega]
[Ata i le itulau 49]
Sa faaaoga e le Atua tane e tusia le Tusi Paia e pei lava ona faaaoga e se tane faipisinisi se failautusi e tusia se tusi
[Ata i le itulau 50]
Sa tau isi taʻitaʻi lotu e taofia le Tusi Paia mai i tagata a lautele, e oo foi lava i le faatautauina i le laau ma susunuina ē o latou umia
[Ata i le itulau 52, 53]
O le Tusi Taai a Isaia mai le Sami Mate
[Ata i le itulau 54, 55]
O le pa o le malumalu, i Karnak, i Aikupito
O le Maa Moapi
Le Tusi o Nofoaiga a Tupu a Naponita
Ala tatala i le Ana a Esekia ma le Taelega i Seloa
