Toe Tutū—Mo Ai, ma I Fea?
Mataupu 20
Toe Tutū—Mo Ai, ma I Fea?
1, 2. E faapefea ona tatou iloa sa talitonu auauna anamua a le Atua i le toe tu?
UA TALITONU pea auauna a le Atua i le toe tu. E uiga i a Aperaamo, na ola i le 2,000 tausaga a o lei fanau mai Iesu o se tagata, ua fai mai le Tusi Paia: “Ua manatu o ia e mafaia e le Atua ona toe faatu mai ia te ia [lona atalii o Isaako] nai e ua oti.” (Eperu 11:17-19) Mulimuli ane sa fesili le auauna a le Atua o Iopu: “Afai e oti le tagata, e toe ola mai ea o ia?” Ia tali lana fesili, sa fai mai Iopu i le Atua: “Ia e valaau mai, ona ou tali atu ai lea ia te oe.” Sa ia faaalia ai ua ia talitonu i le toe tu.—Iopu 14:14, 15.
2 A o i le lalolagi Iesu Keriso, sa ia fai mai: “A o le faatuina o e ua oti, ua faailoa mai lea mea e Mose i laau talatala i lona taʻua o le Alii o le Atua o Aperaamo, o le Atua foi o Isaako, o le Atua foi o Isaako. E le o le Atua ia o e ua oti, a o e ola; auā ua ola uma ia te ia.” (Luka 20:37, 38) I Tusitusiga Paia Kerisiano Eleni ua i ia le upu “toe tu” i le sili ae i le 40 taimi. Ma o le toe faatutuina o ē ua feoti o se aʻoaʻoga faavae a le Tusi Paia.—Eperu 6:1, 2.
3. O le ā le faatuatuaga sa taʻua e Mareta e tusa ma le toe tu?
3 Ina ua oti lona tuagane o Lasalo, sa faaali e le uo a Iesu o Mareta le faatuatua i le toe tu. Ina ua faalogo ua afio ane Iesu, sa tamoe loa Mareta e faafetaui i a te ia. “Le Alii e, e ana iinei, po ua le oti loʻu tuagane.” Sa faamafanafanaga Iesu i a te ia: “E toe tu mai lou tuagane.” Sa tali Mareta: “Ua ou iloa e toe tu mai lava ia i le toe tu i le aso gataaga.”—Ioane 11:17-24.
4-6. O ā mafuaaga sa i a Mareta mo lona talitonuga i le toe tu?
4 Sa i a Mareta ni mafuaaga malolosi o lona faatuatua i le toe tu. Mo se faaaʻoaʻoga, sa ia iloa i le tele o tausaga ua mavae na faatutuina ai e Elia ma Elisaia tamaiti e toalua, tofu laua ma le tama itiiti, e ala i le mana o le Atua. (1 Tupu 17:17-24; 2 Tupu 4:32-37) Sa ia iloaina foi sa toe ola se tasi tagata na lafoina i se lua ma papaʻi atu i ivi o Elisaia ua maliu. (2 Tupu 13:20, 21) Ae na silisili ona faamalosia lona faatuatua i le toe tu i aʻoaʻoga ma mea na faia e Iesu.
5 Atonu sa i ai Mareta i Ierusalema e itiiti i le lua tausaga a o lei taʻua e Iesu le vaega o le ana faia i le toe faatutuina o ē ua feoti. Sa ia fetalai: “Auā faapei ona toe faatutū ma faaola e le Tamā i e ua oti; e faapea foi ona faaola e le Atalii o i latou ua ia loto i ai. Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai.”—Ioane 5:21, 28, 29.
6 E oo mai i le taimi na taʻua ai e Iesu nei upu, e leai se faamaumauga o i le Tusi Paia faapea ua ia faatuina se tasi. E lei umi ae ia faatuina loa se tama talavou, o se tama a le fafine ua oti lana tane i le aai i Naina. Sa aave tala o lenei mea i le itu i saute o Iutaia, ua tatau lava ona faalogo i ai Mareta. (Luka 7:11-17) Mulimuli ane, sa faalogo Mareta i le mea na tupu i tafatafa o le Sami o Kalilaia i le fale o Iairo. Sa maʻi tele lona afafine e 12 tausaga ma ua oti ai. Ma ina ua oo Iesu i le fale o Iairo, sa alu atu i le teine ua oti ma fai atu: “Funa e, ina tulai ai!” Ma sa ia faia faapea!—Luka 8:40-56.
7. O ā faamaoniga na tuuina atu e Iesu i a Mareta e mafai ona ia faatutuina ē ua feoti?
7 Ae sa lei manatu Mareta o le a faatuina e Iesu lona tuagane i lea taimi. O lea na ia fai atu ai: “Ua ou iloa e toe tu mai lava ia i le toe tu i le aso gataaga.” Ina ia faatalitonuina Mareta i le vaega a Iesu i le toe faatuina o ē ua oti, sa ia fetalai: “O aʻu nei o le toetu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e ui lava ina oti, a e ola lava.” Sa taʻitaʻiina loa Iesu i le tuugamau, i le mea na tanu ai Lasalo. Ona alaga lea o ia: “Lasalo e, ina sau ia i fafo.” Sa sau i fafo Lasalo na oti mo aso e fa!—Ioane 11:24-26, 38-44.
8. O ā faamaoniga o loo i ai na toe faatuina Iesu?
8 I ni vaiaso mulimuli ane na fasiotia ai Iesu ma tuu i le tuugamau. Sa i ai o ia i iina i vaega o aso e tolu. Fai mai le aposetolo o Peteru i le pogai: “O Iesu lava lena ua toe faatuina e le Atua; o molimau i matou uma i lena mea.” Sa le mafai e taʻitaʻi lotu ona taofia le Alo o le Atua i le toe tu mai i le tuugamau. (Galuega 2:32; Mataio 27:62-66; 28:1-7) E lē masalomia le toe faatuina o Keriso mai le oti, auā sa faaali i le tele o le au soo, e faatasi ona faaali i le 500 o i latou. (1 Korinito 15:3-8) Sa talitonu malosi soo o Iesu i le toe tu, ma sa le fefefe e fesagai ma sauaga ma e oo foi i le oti ina ia auauna i le Atua.
9. O ā tagata e toaiva ua taʻua e le Tusi Paia na toe faatutuina?
9 O faamaoniga atili e mafai ona toe faatutuina mai ē ua feoti sa mulimuli ala mai i aposetolo o Peteru ma Paulo. Sa muamua faatuina e Peteru ia Tapita, po o Toreka, i le aai o Iopa. (Galuega 9:36-42) Ma sa toe faafoisia foi e Paulo i le ola le taulealea o Eutiko, o lē na paʻū ma oti mai i le faamalama i le fogafale-tolu a o lauga Paulo. (Galuega 20:7-12) E mautinoa lava, o nei toe faatutuina e iva ua faamauina i le Tusi Paia ua faamaonia ai e mafai ona toe faafoisia mai ē ua feoti i le ola!
O AI O LE A TOE FAATUTUINA MAI?
10, 11. (a) Ai se ā na fuafua ai e le Atua se toe tutu? (e) E tusa ai ma le Galuega 24:15, o ā vasega e lua o tagata o le ā toe faatutuina?
10 I le amataga, sa le o se fuafuaga a le Atua ia toe faatuina ma soo se tasi, auā na tumau Atamu ma Eva i le faamaoni, e leai lava se tasi e tatau ona oti. Ae peitai ua aumaia e le agasala a Atamu le lē lelei atoatoa ma le oti i tagata uma. (Roma 5:12) O lea ina ia mafaia e soo se fanau a Atamu ona olioli i le ola e faavavau, sa fuafua ai e Ieova le toe tu. Ae o le ā e fuafua ai pe toe faatuina se tagata pe leai?
11 Ua fai mai le Tusi Paia: “O le a toe tutū mai e ua oti, o e ua amiotonu atoa ma e amioletonu.” Atonu e faateia nisi i lenei mea. ‘Ai se ā e toe faafoisia mai ai e “Amioletonu” i le ola?’ O le mea sa tupu a o faamauina Iesu i le laau faaoosala o le a taliina lea fesili.
12, 13. (a) O le ā le folafolaga na faia e Iesu i le pagota? (e) O fea e i ai le “Parataiso” na taʻua e Iesu?
12 O tane na i itu o Iesu o pagota. O le tasi o i laua sa lafo ni upu faifai i a Iesu faapea: “Afai o oe o le Keriso, ina faaola ia oe ia te oe atoa ma i maua nei.” Sa talitonu le isi pagota i a Iesu. Sa ia fai atu i a te ia: “Ia e manatua mai au, pe a e afio mai i lou malo.” Na folafola atu e Iesu: “E moni ou te fai atu ia te oe i le asō, Ta te faatasi ma oe i Parataiso.”—Luka 23:39-43,NW.
13 Ae o le ā le uiga ina ua fetalai atu Iesu: “Ta te faatasi ai ma oe i Parataiso”? O fea le Parataiso? O fea sa i ai le parataiso sa faia e le Atua i le amataga? Sa i luga o le lalolagi, a ea? Sa tuu e le Atua le ulugalii muamua i se parataiso matagofie ua taʻua o le Faatoaga o Etena. Ina ua tatou faitau atu o lenei pagota o le a i “Parataiso,” e tatau ona i o tatou finagalo, o lenei lalolagi o le a faia o se nofoaga matagofie e soifua ai, auā o le upu “parataiso” e uiga o se “faatoaga” po o se “paka.”—Kenese 2:8, 9.
14. O le ā le ala o le a faatasi ai Iesu ma lenei pagota i Parataiso?
14 O le mea moni, o le a le toe i ai Iesu Keriso i le lalolagi faatasi ma lea pagota. O le a i le lagi Iesu e pule o se tupu i luga o le Parataiso i le lalolagi. O lea, o le a faatasi o ia ma lea tagata i le uiga o Lona toe faatuina o ia mai le oti ma tausia ona manaoga faaletino ma le faaleagaga. Ae ai se ā o le a faataga ai e Iesu sea pagota e ola i le Parataiso?
15. Ai se ā e toe faatutuina ai e “amioletonu”?
15 E moni sa faia e lenei tagata ni mea leaga. Sa “amioletonu” ma faatalale i le finagalo o le Atua. Ae pe e ono avea o ia o se pagota pe a na ia iloa fuafuaga a le Atua? Ina ia taliina, o le a faatuina mai e Iesu lenei tagata amioletonu ma le faitau afe o miliona o ē na feoti a o faatalale. Mo se faataʻitaʻiga, i senituri ua mavae, o le toatele o tagata ua feoti sa le iloa faitau pe vaai i se Tusi Paia. Ae o le a faatutuina mai i Seilo po o Heitisi. O le a aʻoaʻoina le finagalo o le Atua i le lalolagi parataiso ma maua le avanoa e faamaonia lo latou alofa mo le Atua i le faia o lona finagalo.
16. (a) O ai o ē ua feoti e le toe faatutuina mai? (e) Ai se ā e le tatau ai ona tatou taumafai e faamasino i lenei mataupu? (i) O le ā e tatau ona fai ma o tatou faanaunauga autu?
16 E le o le uiga o lenei mea o le a toe faatutuina mai tagata uma. Ua faaalia e le Tusi Paia o le a lē toe faatuina mai Iuta le Sekara, o lē na faalataina Iesu. Ona o lona agasala ma le loto i ai, ua taʻua ai Iuta o le “tagata o le malaia.” (Ioane 17:12) Sa lafoina i Kēna faafaatusa e le toe faatuina mai ai. (Mataio 23:33) O tagata e faia ma le loto i ai le mea leaga ina ua uma ona aʻoaʻoina le finagalo o le Atua atonu o le a latou agasala faasaga i le agaga paia. Ma o le a lē toe faatutuina mai e le Atua i latou e agasala faasaga i lona agaga paia. (Mataio 12:32; Eperu 6:4-6; 10:26, 27) E ui i lea, ona o le Atua o le Faamasino, ua leai la se pogai tatou te taumafai ai e suesue pe o le a toe faatutu mai isi o tagata amioletonu i le taimi ua mavae po ona po nei. Ua silafia e le Atua ē o i Heitisi ma ē o i Kēna. Ae e tatau ona tatou faia mea uma tatou te mafaia ia pei o le ituaiga o tagata e finagalo i ai le Atua mo lana faiga fou o mea.—Luka 13:24, 29.
17. O ā o le a le manaomia ona toe faatutuina ina ia olioli i le ola e faavavau?
17 O i latou uma e maua le ola e faavavau e lē ao ona toe faatutuina mai. O le toatele o auauna a le Atua o ola nei i “aso e gata ai” o lenei faiga o mea, o le a faasaoolaina atu i a Amaketo. Ma i le avea o i latou ma vaega o le “lalolagi fou,” o le a le taitai ona feoti. O le fetalaiga a Iesu i a Mareta o le a mafai ona faatino i se ala moni mo i latou: “O tagata ola uma, o e faatuatua mai ia te au, e le oti e oo i le faavavau.”—Ioane 11:26; 2 Timoteo 3:1.
18. O ai ē “amiotonu” o le a toe faatutuina?
18 O ai e “amiotonu” e toe faatutuina mai? O le a aofia ai auauna faamaoni a le Atua o e na soifua muamua a o lei afio mai Iesu Keriso i le lalolagi. O le toatele ua taʻua igoa i le Eperu mataupu e 11. Sa lei faamoemoe i latou e o i le lagi, ae ua faamoemoe e toe ola i le lalolagi. O ē foi e “amiotonu” e toe faatutuina o auauna faamaoni ia a le Atua ua maliliu i tausaga ua tuanai .O le a tagai i ai le Atua ua tini lo latou faamoemoe o le ola e faavavau i le lalolagi e ala i le faatutuina o i latou mai le oti.
O AFEA MA I FEA E FAATUTUINA AE AI
19. (a) O le ā le uiga sa avea ai Iesu ma lē na uluai toe faatuina? (e) O ai isi o le a sosoo ai lo latou toe faatutuina?
19 Ua taʻua Iesu Keriso o le “muai toe tu mai foi o ia i e ua oti.” (Galuega 26:23) O le uiga sa avea o ia ma lē na muai faatuina o i latou o le a lē toe oti lava. E le gata i lea, avea foi o ia ma le na muai faatuina o se peresona agaga. (1 Peteru 3:18) Ae ua taʻua mai e le Tusi Paia i a i tatou o le a i ai isi, i le faapea mai: “E taitoatasi ma lona lava tofi; o le faapolopolo o Keriso lea, mulimuli ane o e o ia Keriso e toe tutū i lona afio mai.” (1 Korinito 15:20-23) O lea i le toe tu, o le a toe faatutuina ae muamua isi na i lo isi patino.
20. (a) O ai “e o ia Keriso”? (e) O le ā toe tu latou te mauaina?
20 “O e o ia Keriso” o le 144,000 o soo faamaoni ua filifilia e pule ma ia i le Malo. Ua faapea mai le Tusi Paia i lo latou toe faatutuina ae faalelagi: “Amuia mona ua paia le ua i ai se tofi i le uluai toe tu; e le oo foi le pule a le oti faalua ia te i latou, a e avea i latou ma . . . tupu foi faatasi ma ia i tausaga e afe.”—Faaaliga 20:6; 14:1, 3.
21. (a) O afea e amata ai le “uluai toe tu”? (e) O ai ua aunoa ma se masalosalo ua uma ona toe faatutuina ae i le ola faalelagi?
21 O lea a mavae le toe faatuina o Keriso, ona sosoo ai lea ma le toe faatutuina o le 144,000. E i ai sa latou vaega i le “uluai toe tu,” po o le “toe tu muamua.” (Filipi 3:11) O afea e faia ai? I le taimi o ‘lona faatasi mai’ o le tala lea a le Tusi Paia. E pei ona tatou aʻoaʻoina i mataupu ua mavae, na amata ona faatasi mai Keriso i le tausaga 1914. O le “aso” mo le “uluai toe tu” o Kerisiano faamaoni i le lagi ua uma ona oo mai. E leai la ma se masalosalo, o aposetolo ma isi uluai Kerisiano ua uma ona toe faatutuina ae i le ola faalelagi.—2 Timoteo 4:8.
22. (a) O ai isi o le a i ai se vaega i le “uluai toe tu”? (e) O afea e toe faatutuina ai i latou?
22 Ae o loo i ai isi Kerisiano o ola nei i le taimi o le faatasi lē vaaia mai o Keriso, o e o loo i ai i lenei lava faamoemoe e tasi o le pule ma Keriso i le lagi. O i latou ia o se vaega totoe o le 144,000. O afea e faatutuina ai i latou? E le manaomia ona latou momoe pea i le oti, ae faatutuina faafuasei ae i latou pe a oti. Ua faamatala e le Tusi Paia: “E le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea.”—1 Korinito 15:51, 52; 1 Tesalonia 4:15-17.
23. E faapefea ona faamatalaina e le Tusi Paia le suia i le olaga agaga?
23 O lenei “uluai toe tu” i le ola faalelagi e lē vaaia e mata faaletagata. O se toe tu i le ola o ni mea fai ola agaga. Ua taʻua faapenei e le Tusi Paia le suia i le ola agaga: “E luluina ma le pala, e toe faatuina mai le ma le le pala; e luluina ma le matagā, e toe faatuina mai ma le matagofie . . . e luluina le tino faaletino, e toe faatuina mai o le tino faaleagaga.—1 Korinito 15:42-44.
24. (a) O le ā le toe tu e sosoo atu ma le “uluai toe tu”? (e) Ai se ā ua taʻua ai o se “toe tu sili”?
24 E ui i lea, o le faaupuga o le “uluai toe tu” ua faaalia ai e i ai le isi e mulimuli mai. O le toe tu lea i le ola i le lalolagi parataiso o e amiotonu atoa ma e amioletonu. O le a faia pe a mavae Amaketo. O le a avea o se “toe tu sili” atu na i lo tama na faatutuina e Elia ma Elisaia ma isi na toe faatutuina i le lalolagi. Ai se ā? Auā afai e malilie ē o le a toe faatutuina mai pe a mavae Amaketo e auauna i le Atua, e lē manaomia la ona toe oti i latou.—Eperu 11:35.
O SE VAVEGA A LE ATUA
25. (a) Ai se ā e le o le tino lea e oti e toe faatuina? (e) O le ā e toe faatuina, ma o le ā foi e tuuina atu i ai latou o ē toe faatutuina?
25 A oti se tagata, o le ā e toe faatuina mai? E lē o le tino lava lea e tasi na oti ai. Ua faaalia e le Tusi Paia lenei mea ina ua na taʻua le toe tu i le ola faalelagi. (1 Korinito 15:35-44) E oo foi i ē e toe faatutuina i le ola i le lalolagi latou te le toe mauaina le tino lava lea e tasi a o soifua muamua. O lea tino atonu ua pala ma liu efuefu. I se taimi, o le a avea ai elemeni o le tino oti o se vaega o isi mea fai ola. O lea e lē toe faatuina e le Atua le tino lava lea ae o le tagata lava lea ua oti. O le tagata mo le lagi, e tuu atu i a te ia se tino fou faaleagaga. O ē e toe faatutu e ola i le lalolagi, e tuu atu i ai se tino fou faaletino. O lenei tino fou faaletino e mautinoa taitutusa pei lava o lea sa i le tagata a o lei maliu, ina ia mafai ona matau o ia e tagata na latou iloa o ia.
26. (a) Ai se ā e avae ai le toe tu o se vavega ofoofogia? (e) O ā mea ua gaosia e tagata e mafai ona fesoasoani i a i tatou ina ia malamalama i le tomai sili o le Atua, e manatua ai tagata ua maliliu?
26 O le toe tu ua mautinoa o se vavega ofoofogia. O le tagata ua maliu atonu ua i a te ia le poto masani ma le atamai ma le tele o mea e manatua a o soifua. Ua ia ati ae ni uiga faaletagata e faaesea ai o ia mai i isi tagata soifua uma. E ui i lea e manatua pea e Ieova le Atua mea uma taitasi, ma o le a toe faafoisia lea tagata atoa pe a Ia toe faatuina mai o ia. E pei ona fai mai le Tusi Paia i e ua oti o le a toe faatutuina mai: “Auā ua ola uma ia te ia.” (Luka 20:38) E mafai e tagata ona pue leo ma ata o tagata, ma toe faaalia i se taimi ua leva talu ona feoti ia tagata. Ae e mafaia e Ieova ma o le a ia toe aumaia moni i le ola tagata uma o e o loo ola i lona finagalo.
27. O ā fesili e uiga i le toe tu o le a tatou maua ni tali mulimuli ane?
27 Ua tele mea ua taʻu mai e le Tusi Paia i a i tatou e uiga i le olaga i le Parataiso pe a mavae le toe faatutuina o e ua feoti. Mo se faataʻitaʻiga, sa taʻua e Iesu ni tagata o e o le a “toe tutū i le ola” ma isi “e toe tutū i le faasala.” (Ioane 5:29) O le ā sa ia faauiga i ai? Ma pe o le a ese ea se tulaga o le “amiotonu” o le a toe faatutu mai ai na i lo le “amioletonu”? O se talanoaina o le Aso Faamasino o le a taliina ai ia fesili.
[Fesili mo le Suʻesuʻega]
[Ata i le itulau 167]
“Ua ou iloa e toe tu mai lava ia”
Sa toe faatuina mai e Elia le tama a le fafine ua oti lana tane
Sa toe faatuina e Elisaia se tama itiiti
Sa toe ola mai se tamaloa na papaʻi i ivi o Elisaia
[Ata i le itulau 168]
Tagata na toe faatutuina e Iesu:
O le tama a le fafine i Naina ua oti lana tane
Lasalo
Afafine o Iairo
[Ata i le itulau 169]
O isi na toe faatutuina mai:
Toreka
O Iesu lava ia
Eutiko
[Ata i le itulau 170]
O fea le Parataiso sa folafola atu e Iesu i le pagota?
