Mataupu 1

Faaaliga​—Lona Tumutumuga Fiafia!

1. E faapefea ona iloa e finagalo le Atua ia tatou fiafia?

O LE FAAALIGA IĀ IOANE​—o le tusi mataʻina lenei o le Tusi Paia ua taaofaʻi uma ai talafaamaumau mai le Atua, i se tumutumuga fiafia. Aiseā tatou te fai atu ai e “fiafia”? Auā foʻi o Lē na faatonutonuina le tusia o le Tusi Paia, o ia o “le Atua manuia [pe fiafia],” o loo ia foaʻi mai ma lona faatuatuaga, “le tala lelei silisili” i ē alolofa iā te ia. O lona finagalo foʻi, ia tatou fiafia. O le ala lea o le muaʻi faamautinoa mai e le Faaaliga: “Amuia lē faitau . . . i upu o lenei valoaga.” I lona mataupu faaiʻu ua taʻu mai ai iā i tatou: “Amuia lē tausi i upu o le valoaga o lenei tusi.”​—1 Timoteo 1:11; Faaaliga 1:3; 22:7.

2. E faapefea ona tatou maua le fiafia e ala i le tusi o Faaaliga?

² E faapefea ona tatou maua le fiafia e ala i le tusi o Faaaliga? E maua pe a tatou saʻilia le uiga o ana faailoga manino, po o faatusa, ma gaoioi e ōgatusa ma na faailoga. Ua toe nei o se aga oo le talafaasolopito fesouaʻiina o tagata i se tumutumuga mataʻutia, a o faaoo mai e le Atua ma Iesu Keriso le sala faafaamasinoga i le lalolagi amioleaga o aso nei, ae suia i “le lagi fou ma le lalolagi fou,” lea o le a oo lava i le oti e lē toe maua ai. (Faaaliga 21:1, 4) Pe lē o tatou uma ea, o loo fia ola i se lalolagi fou faapena, i le filemu moni ma le saogalemu? E mafai pe a faamalosi atili lo tatou faatuatua, e ala i le suʻesuʻeina o le Afioga a le Atua, lea e aofia ai ma le valoaga faagaeeloto a le Faaaliga.

3. O le ā le manatu o le toʻatele o tagata i le uiga o le upu Amaketo?

³ Pe a taʻua le “Faaaliga,” e toʻatele tagata e tau o latou mafaufau i le upu Amaketo. E manatu foʻi isi tagata, o loo faasino atu i le faaumatiaga o le lalolagi e ala mai i taua faaniukilia. I Texas, i le Iunaite Setete o Amerika, o se aai sa gaosi ai le tele o meatau faaniukilia, sa masani ona faapea mai o latou tagata lotu, “O matou lava e muamua faaumatia.” Ua taʻua faapea, o faifeʻau i lenā vaipanoa ua “matuā talitonu, e lē gata e oo faafuaseʻi mai Amaketo, ae ua matuā lalata mai lava. Ma o le fetauaʻiga mulimuli i le va o le lelei ma le leaga, i le va o le Atua ma Satani, o le a oo mai o se faaumatiaga faaniukilia.” *

4. O le ā le uiga faavae o le upu Eleni a·po·kaʹly·psis lea e faaliliu mai ai le upu Faaaliga, ma aiseā ua talafeagai ai le taʻua o le tusi mulimuli o le Tusi Paia, “O le Faaaliga”?

⁴ O le upu Faaaliga, ua faaliliu mai i le upu Eleni a·po·kaʹly·psis, o lona uiga faavae lava, o le “aveesea o le veli” po ua “lē ufiufia” pe “faaaliali.” Ua talafeagai la ona taʻua le tusi mulimuli o le Tusi Paia, “O le Faaaliga.” Ua tatou maua i lenei tusi, e lē na o se feʻau e faatatau i le faaumatiaga o le lalolagi, ae ua faaaliali mai ai upu moni a le Atua, lea e ao ona faatupu aʻe ai i o tatou loto se faamoemoe pupula ma se faatuatua lē maluelue.

5. (a) O ai o le a faaumatia iā Amaketo, a o ai o le a faasaoina? (e) O le ā le lumanaʻi matagofie mo i latou e faasaoina mai iā Amaketo?

⁵ I le tusi mulimuli o le Tusi Paia, o loo faamatalaina ai Amaketo e faapea, o “le taua i le aso tele o le Atua e ona le malosi uma lava.” (Faaaliga 16:14, 16) Peitaʻi e lē taitai tutusa ma se faatamaʻiaga faaniukilia, auā o faatamaʻiaga faapena e matuā faaumatia aʻiaʻi ai ola uma i le lalolagi. Na i lo lea, e manaia le faamautinoaga a le Afioga a le Atua e faapea, e na o tagata amioleaga o ē tetee i le Atua o le a faaumatia​—i ni malosiaga o le a faatonutonuina e le Atua. (Salamo 37:9, 10; 145:20) O le a faasaoina se motu o tagata e toʻatele mai atunuu  uma, i le tumutumuga o le faamasinoga a le Atua iā Amaketo. Ona leoleoina ai lea ma taʻitaʻia e Iesu Keriso i latou nei i le ola e faavavau i se lalolagi parataiso. Pe lē fia avea ea oe o se tasi o i latou na? Ma le fiafia lava, ua faaalia e le Faaaliga, e ono mafai ona e maua!​—Faaaliga 7:9, 14, 17.

Saʻilia o Mealilo a le Atua

6. A o faasolo tausaga, o ā tusi ua lomia e Molimau a Ieova e faamalamalama atili ai le Faaaliga?

⁶ I le amataga lava i le 1917, na lomia ai e Molimau a Ieova le tusi The Finished Mystery. Sa faamatalatala ai fuaiupu taʻitasi o tusi o le Esekielu ma le Faaaliga. A o faaauau ona faailoa mai e mea tutupu i le lalolagi le faataunuuga o valoaga o le Tusi Paia, na fetaui lelei i lenā taimi le saunia ai o se tusi e lua ona vaega, na faaulutalaina Light, lea na tatala i le 1930. O le tusi lenei na toe faamalamalama atili ai le suʻesuʻeina o le Faaaliga. Sa faaauau pea ona ʻsusulu atu le malamalama mo ē amiotonu,’ ma i le 1963 na lomia ai e Molimau a Ieova le tusi e 704 ona itulau, “Babylon the Great Has Fallen!” God’s Kingdom Rules! O le tusi lenā na matuā auʻiliʻili mai ai le talafaasolopito i le tulaʻi mai ma le paʻū ifo o Papelonia le Aai Sili, le tuufaatasiga uma o lotu sesē a le lalolagi, ma sa faatumutumu i le talanoaina o mataupu mulimuli e iva o le Faaaliga. A o ʻtupu pea le malamalama o le ala o tagata amiotonu,’ aemaise lava i galuegafai a le faapotopotoga, na sosoo ai ma le tatalaina i le 1969 o se tusi e 384 ona itulau, “Then Is Finished the Mystery of God,” lea na talanoaina ai uluaʻi mataupu e 13 o le Faaaliga.​—Salamo 97:11; Faataoto 4:18.

7. (a) Aiseā ua saunia ai e Molimau a Ieova lenei tusi mo le Faaaliga? (e) O ā fesoasoani mo le aʻoaʻo atu ua saunia i le tusi e aogā i le ʻaufaitau?

⁷ Aiseā ua toe lomia ai se isi tusi mo le Faaaliga i le taimi nei? Talu ai, sa matuā auʻiliʻili ma loloto le tele o faamatalaga na iai, e leʻi mafai ai la ona faaliliuina ma lomia i ni gagana se tele i le lalolagi aoao. Ona aʻe ai lea o se manatu, e fetaui ona saunia se tusi se tasi e faamalamalama ai le Faaaliga, i se faiga e vave ai ona maua i le tele o gagana. E lē gata i lea, ua maua le avanoa i lenei tusi e saunia ai ni fesoasoani mo le aʻoaʻo atu, e pei o ata faataʻitaʻi, siata ma aotelega. E ao ona fesoasoani nei vala i le ʻaufaitau e malamalama ai i le uiga mataʻina o lenei valoaga ofoofogia.

8. O le ā le māfuaaga e sili ona malosi ua lomia ai lenei tusi?

⁸ Ae o le māfuaaga e sili ona malosi ua lomia ai lenei tusi, talu ai e manaʻomia ona piiama atu pea i le malamalamaga saʻo ua iai nei o le upu moni. O loo faasusulu mai pea e Ieova le malamalama sili i le uiga o lana Afioga, ma e faatalitalia le faaleleia atili o lo tatou malamalamaga i le Faaaliga atoa ai ma isi valoaga, a o tatou tulata atu i le puapuaga tele. (Mataio 24:21; Faaaliga 7:14) E tāua tele pe a lelei ona faamatala mai mea iā i tatou. E pei ona tusi le aposetolo o Peteru e faatatau i valoaga mai le Atua: “E lelei ona outou naunau i ai, e pei o se lamepa e mumū i le mea pogisa, seʻia tafa mai ata, seʻia alu aʻe foʻi le fetu ao i o outou loto.”​—2 Peteru 1:19.

9. (a) O le ā ua faaalia e le Faaaliga, ma isi foʻi valoaga, o le a faia e le Atua? (e) O le ā le lalolagi fou, ma e mafai faapefea ona e sao atu i ai?

⁹ Ua faaopoopo e le Faaaliga lana foʻi molimau i le tele o isi valoaga o le Tusi Paia, o loo faaalia ai e finagalo Ieova e saunia se lagi fou ma se lalolagi fou. (Isaia 65:17; 66:22; 2 Peteru 3:13; Faaaliga 21:1-5) O le feʻau a le Faaaliga o loo taulaʻi faapitoa atu i Kerisiano faauuina, o ē na faatauina e Iesu i lona toto ina ia pule faatasi ma ia i le lagi fou. (Faaaliga 5:9, 10) Peitaʻi, o le a faamalosia foʻi e lenei tala lelei le faatuatua o le faitau miliona o ē o loo tulimataʻi atu i le ola e faavavau i le pulega o le Malo o Keriso. Po o oe o se tasi o i latou nei? O le a faamalosia la e le Faaaliga lou faamoemoe e ola i le Parataiso, e avea o se vaega o le lalolagi fou, ma olioli ai i le tele o le filemu, le soifua mālōlōina, ma le anoanoaʻi o sauniuniga a le Atua, na o le a lē taitai ona gata mai. (Salamo 37:11, 29, 34; 72:1, 7, 8, 16) Afai e te fia sao atu i lenā lalolagi fou, ua tatau nei la, ioe, e manaʻomia vave lava, ona e uaʻi atu i le faamatalaina manino e le Faaaliga o le tumutumuga o se mea e sili ona tāua, lea ua lalata mai.​—Sefanaia 2:3; Ioane 13:17.

[Faaopoopoga i lalo]

[Fesili mo le Suʻesuʻega]

 [Ata atoa i le itulau 7]