Mataupu 13

Faatau Mai Auro ua Faamamāina i le Afi

LAOTIKAIA

1, 2. O gafea e iai le faapotopotoga mulimuli o faapotopotoga e fitu na mauaina se feʻau mai iā Iesu lē ua faamamaluina, ma o ā nisi o vala o le aai?

O LAOTIKAIA le faapotopotoga mulimuli o faapotopotoga e fitu na mauaina se feʻau mai iā Iesu lē ua toe faatūina. Ma e maʻeu ni faamatalaga matagofie ma le faagaeeloto ua faailoa mai!

² I aso nei, e te maua faatafunaga o Laotikaia e latalata ane i Denizli, pe ā ma le 55 maila (90 kilomita) i saute sasaʻe o Alasehir. I le uluaʻi senituri, sa avea Laotikaia ma aai tamaoaiga. Ona o le fetaulaʻiga lea o le tele o alatetele, sa avea ai lea aai ma nofoaga autū mo teugātupe ma fefaatauaʻiga. O le faatauina atu o se vaimata lauiloa sa atili ai ona tamaoaiga, ma na taʻutaʻua foʻi lea aai i ana laʻei sili ona lelei e faia ai lava i inā mai se fulufulu mamoe uliuli lelei. Sa faaleleia le faafitauli o le utiuti o le suāvai, e ala i le faatafe mai o le suāvai i le aai i ni alāvai na taʻi mai i vaipuna vevela i fafo atu o le aai. O le ala lea o le māfanafana o le suāvai i le taimi e oo atu ai i le aai.

3. Na faapefea ona amata e Iesu lana feʻau i le faapotopotoga i Laotikaia?

³ E latalata Laotikaia i Kolose. Ina ua tusi atu le aposetolo o Paulo i uso i Kolose, na ia taʻua ai se tusi sa ia auina atu i le ʻauuso i Laotikaia. (Kolose 4:15, 16) Tatou te lē iloa le mea na tusia e Paulo i lenā tusi, ae o le feʻau lea ua auina atu nei e Iesu i Laotikaia ua faaalia ai lo latou paʻuʻū atu i se tulaga mataʻutia faaleagaga e faanoanoa ai. E pei ona masani ai, na muamua taʻu atu e Iesu ona lava agavaa, i le fetalai atu: “Ia e tusi foʻi i le agelu a le ekalesia o i Laotikaia: O mea nei ua fai mai ai le Amene, o le molimau moni ma le faamaoni, o le amataga o mea na faia e le Atua.”​—Faaaliga 3:14.

4. Ua faapefea ona avea Iesu ma “Amene”?

⁴ Aiseā ua taʻua ai e Iesu ia lava o “le Amene”? Ua faaopoopo atu e lenei taʻu le tāua faalefaamasinoga i lana feʻau. O le “Amene” o le faaliliuga o se upu Eperu o lona uiga o le “moni,” “ia faapea ona faia,” ma ua faaaogā i faaiʻuga o tatalo e ioeina ai manatu ua faaalia. (1 Korinito 14:16) O Iesu o “le Amene” auā ua faamautinoa ma faamaonia e lona faamaoni lē ponā, ma lona maliu faataulagaina, le faataunuuga o folafolaga tāua uma a Ieova. (2 Korinito 1:20) Talu mai lenā taimi, ua talafeagai ona taulaʻi atu tatalo uma iā Ieova e ala iā Iesu.​—Ioane 15:16; 16:23, 24.

5. I le ā le auala e avea ai Iesu “o le molimau moni ma le faamaoni”?

⁵ O Iesu foʻi “o le molimau moni ma le faamaoni.” I totonu o valoaga, e masani ona faafesootaʻi atu Iesu i le faamaoni, le moni, ma le amiotonu, auā ua maufaatuatuaina atoatoa o ia e avea o se auauna a Ieova le Atua. (Salamo 45:4; Isaia 11:4, 5; Faaaliga 1:5; 19:11) O ia o le Molimau silisili mo Ieova. O le mea moni, ona o ia “o le amataga o mea na faia e le Atua,” ua faalauiloa ai e Iesu le mamalu o le Atua mai lava i le amataga. (Faataoto 8:22-30) Sa ia molimau i le upu moni, a o avea o se tagata i le lalolagi. (Ioane 18:36, 37; 1 Timoteo 6:13) Ina ua mavae lona toetū, sa ia folafola atu i ona soo lo latou mauaina o le agaga paia, ma taʻu atu iā i  latou: “E fai foʻi outou ma molimau iā te aʻu i Ierusalema ma Iutaia uma lava, ma Samaria, e oo lava i le tuluʻiga o le lalolagi.” E amata mai le Penetekoso 33 T.A. ma faasolo mai ai, sa faatonutonuina e Iesu nei Kerisiano faauuina i le talaʻia o le tala lelei “i tagata uma lava i le lalolagi.” (Galuega 1:6-8; Kolose 1:23) Ua matuā ono ma tatau la ona taʻua Iesu o le molimau moni ma le faamaoni. O le a maua e Kerisiano faauuina i Laotikaia aogā e ala i le faalogo i ana fetalaiga.

6. (a) O le ā le faamatalaga a Iesu i le tulaga faaleagaga o le faapotopotoga i Laotikaia? (e) O le ā le faaaʻoaʻoga lelei a Iesu ua lē taulau i Kerisiano i Laotikaia ona mulimuli ai?

⁶ O le ā le feʻau a Iesu mo le faapotopotoga i Laotikaia? E leai sana upu faamālō. Na ia fana saʻo le malama i lona fetalai atu: “Ua ou iloa au galuega, e te lē maalili, e te lē vevela foʻi. Ou te loto ina ia e maalili, pe vevela! O lenei, ua e faaleogalua, e te lē maalili, e te lē vevela foʻi, o le mea lea ou te luai atu ai iā te oe i loʻu gutu.” (Faaaliga 3:15, 16) O le a faapefea ona e tali atu i se feʻau faapea mai le Alii o Iesu Keriso? Pe o le a e lē mataalia ai ea ma suʻesuʻe ifo oe lava iā te oe? O le mea moni, sa tatau i na Laotikaia ona toe gaoioi, auā ua latou paiē faaleagaga, ua manino mai lo latou manatu māmā i mea e tele. (Faatusatusa i le 2 Korinito 6:1.) O Iesu lea sa ao iā i latou o ni Kerisiano ona faaaʻoaʻo i ai, e na te faaalia i taimi uma se maelega aasa mo Ieova ma lana auaunaga. (Ioane 2:17) E lē gata i lea, ua iloa e ē agamalu lona loto maulalo ma ana amio tauagafau i taimi uma, e pei o se ipu vai mālū e faafouina ai i se aso matuā vevela. (Mataio 11:28, 29) Peitaʻi o Kerisiano i Laotikaia e lē vevela, e lē maalili foʻi pe mālūlū. Ua pei o vai ia e tafe atu i lo latou aai, ua latou māfanafana, ma faaleogalua. Ua talafeagai le teena atoatoa o i latou e Iesu, ʻua luai mai i lona fofoga’! Tau ina ia tatou tauivi pea ma le maelega, e pei ona sa faia e Iesu, ina ia saunia le faafouina faaleagaga mo isi.​—Mataio 9:35-38.

“Ua E Fai Mai, Ou te se Mauʻoa”

7. (a) Ua faailoa mai faapefea e Iesu le pogai o le faafitauli o Kerisiano Laotikaia? (e) Aiseā ua fetalai ai Iesu o Kerisiano Laotikaia e “tauaso, ma le lē lavalavā”?

⁷ O le ā tonu lava le pogai o le faafitauli o Kerisiano Laotikaia? Tatou te maua se manatu i  fetalaiga a Iesu ua sosoo ai: “Auā ua e fai mai, Ou te se mauʻoa, ua faatamaoaigaina aʻu, ou te lē mativa foʻi i se mea e tasi; a ua e lē iloa o oe o le malaia, ma le pagatia, ma le mativa, ma le tauaso, ma le lē lavalavā.” (Faaaliga 3:17; faatusatusa i le Luka 12:16-21.) Ona o loo latou ola i se aai tamaoaiga, ua iā i latou ai lagona mautinoa ona o a latou ʻoa. E foliga mai na aafia o latou olaga i le malae taalo, fale tetele o faafiafiaga ma fale taalo, ma iʻu ina avea ai i latou ma “ē ua tele le manaʻo i mea faafiafia a e leai se manaʻo i le Atua.” * (2 Timoteo 3:4) Peitaʻi e ui sa mauʻoa faaletino tagata Laotikaia, ae sa matuā matitiva lava i le itu faaleagaga. Afai na iai, e itiiti lava ni a latou ʻʻoa ua teuina i le lagi.’ (Mataio 6:19-21) E leʻi faafaigofieina la latou vaai, i le faamuamua lea o le Malo o le Atua i o latou olaga. O loo iai moni i latou i le pogisa, le tauaso, ma le leai o se vaaiga faaleagaga. (Mataio 6:22, 23, 33) Ae e lē gata i lea, e ui lava i laʻei matagofie ua mafai ona faatau e lo latou tamaoaiga faaletino, ae i le silasila a Iesu e latou te lē o lavalavā. E leai ni o latou laʻei faaleagaga e mātaulia ai o i latou o ni Kerisiano.​—Faatusatusa i le Faaaliga 16:15.

8. (a) E faapefea ona iai foʻi se tulaga faapena i aso nei e pei ona iai i Laotikaia? (e) Ua faasesēina faapefea e nisi o Kerisiano i latou lava i lenei lalolagi matapeʻapeʻa?

⁸ Pagā se tulaga matagā! Ae po ua lē masani ea ona tatou vaaia se tulaga faapena i aso nei? O le ā le pogai autū? O le uiga soona mautinoa o le tagata iā te ia lava, e mapuna aʻe mai le faalagolago i mea faitino ma punāʻoa a tagata. I le pei o tagata lotu ua vavae ese mai le upu moni, ua faasesēina e nisi tagata o Ieova i latou lava i le manatu faapea e mafai ona latou faafiafiaina le Atua i le tau ina auai i sauniga mai lea taimi i lea taimi. Ua latou taumafai e faafoliga atu o ni “ē anaana i le upu.” (Iakopo 1:22) E ui i lapataʻiga faifai pea mai le vasega e pei o Ioane, ae latou te faatāua le matagofie o lavalava, taavale, ma fale, ma se olaga e faaautū i tafaoga ma faafiafiaga. (1 Timoteo 6:9, 10; 1 Ioane 2:15-17) O mea uma nei e iʻu ai ina puaoa le tofā mamao faaleagaga. (Eperu 5:11, 12) Na i lo le faaleogalua lava la ma nofonofo ai pea, e manaʻomia ona latou toe faaolaola ʻle afi o le agaga’ ma faaalia le tinoū e “talaʻi atu le upu.”​—1 Tesalonia 5:19; 2 Timoteo 4:2, 5.

9. (a) O ā fetalaiga a Iesu e tatau ona faateʻia ai Kerisiano faaleogalua, ma aiseā? (e) E mafai faapefea ona fesoasoani le faapotopotoga i “mamoe” ua taasē?

⁹ O le ā le finagalo o Iesu i Kerisiano faaleogalua? E tatau ona faateʻia i latou i ana fetalaiga tuusaʻo: “A ua e lē iloa o oe o le malaia, ma le pagatia, ma le mativa, ma le tauaso, ma le lē lavalavā.” Ua lē galue o latou loto fuatia ifo, ua latou lē iloatino lo latou tulaga inosia. (Faatusatusa i le Faataoto 16:2; 21:2.) E lē tatau ona manatu māmā i lenei tulaga mataʻutia i le faapotopotoga. E mafai e toeaina ma isi ua latou tofia ona toe faamalosiʻau nei “mamoe” ua taasē, ina ia toe maua lo latou fiafia na iai muamua i le auaunaga ma le loto atoa, e ala i le faataatia o se faaaʻoaʻoga lelei o le maelega, ma se tausiga alofa faaleoleo mamoe.​—Luka 15:3-7.

Fautuaga i le ʻAvea ma Mauʻoa’

10. O le ā le “auro” na taʻu atu e Iesu i Kerisiano i Laotikaia ina ia faatau mai iā te ia?

¹⁰ Pe iai ea se vaifofō mo le tulaga faanoanoa i Laotikaia? E iai, pe afai e mulimuli na Kerisiano i le fautuaga a Iesu: “Ou te fai atu ai iā te oe, ia e faatau atu iā te aʻu le auro ua faamamāina i le afi, ina ia e tamaoaiga ai.” (Faaaliga 3:18a) O le “auro” moni faa-Kerisiano, ua faamamāina i le afi ma ua aveesea otaota leaga uma, o le a latou ʻmauʻoa ai i le Atua.’ (Luka 12:21) O fea e mafai ona latou faatau mai ai auro faapena? E lē mai i le ʻauteutupe a le nuu, ae mai iā Iesu! Sa faamatala e le aposetolo o Paulo le ituaiga auro lenā ina ua ia faatonu Timoteo e avatu faatonuga i Kerisiano tamaoaiga “ina ia latou agalelei atu, ia tamaoaiga i galuega lelei, ia mataalofa, ia latou avatu fua a latou mea, ia latou teua oloa mo i latou lava, o le faavae lelei mo aso atalī.” Seʻi vaganā ua gaoioi e pei ona taʻua i inei, faatoʻā mafai ai lea ona latou “fetagofi atu i le ola e faavavau.” (1 Timoteo 6:17-19) Sa tatau i Laotikaia tamaoaiga faaletino ona mulimuli i le apoapoaʻiga a Paulo ma avea ai ma mauʻoa faaleagaga.​—Tagaʻi foʻi i le Faataoto 3:13-18.

11. O ā faaaʻoaʻoga faaonapōnei o i latou o loo faatauina mai le “auro ua faamamāina i le afi”?

 ¹¹ Pe o iai ea ni faaaʻoaʻoga faaonapōnei o i latou o loo faatauina mai “auro ua faamamāina i le afi”? Ioe, e iai! A o lumanaʻi le oo mai o le aso o le Alii, sa iai se vaega itiiti o tagata aʻoga o le Tusi Paia sa mataala i le pepelo o le tele o aʻoaʻoga faa-Papelonia a lotu ua vavae ese mai le upu moni. O aʻoaʻoga e pei o le Tasitolu, le lē mafai ona oti o le agaga, le faapuapuagatia i le afi i seoli, papatisoga o pepe, ma le tapuaʻi i faatusa (e aofia ai le koluse ma faatusa o Maria). Ae sa faasilisiliina e nei Kerisiano le upu moni o le Tusi Paia, e ala i lo latou faalauiloa atu o le Malo o Ieova, ua na o lea le faamoemoe o tagata, ma le taulaga togiola a Iesu o le faavae mo le faaolataga. I le toetoe 40 tausaga muamua atu, na latou faasino mai ai i le 1914 o le tausaga faailogaina lea i le valoaga a le Tusi Paia, e iʻu ai taimi o Nuu Ese, lea e oo mai faatasi ma suiga mataʻina i le lalolagi.​—Faaaliga 1:10.

12. O ai se tasi o i latou na taʻimua i Kerisiano ua toe ala mai, ma sa ia faataatia faapefea se faaaʻoaʻoga mataʻina o le teuina o ʻoa i le lagi?

¹² O lē sa taʻimua i nei Kerisiano ua toe ala mai, o Charles Taze Russell, lē na faavaeina se vasega suʻesuʻe o le Tusi Paia i Allegheny (lea ua avea nei ma vaega o Pittsburgh), i Pennsylvania, i le Iunaite Setete o Amerika, i le amatamataga mai o le 1870. Ina ua amata ana saʻiliʻiliga i le upu moni, o le taimi lea o galulue Russell ma lona tamā i le la pisinisi, ma ua laalaa atu lava i le tulaga e ono avea ai ma milionea. Peitaʻi sa ia faatau ese ana lava pisinisi o faleoloa ma faaaogā ana tupe e tele e faatupe ai le faalauiloaina o le Malo o le Atua i le lalolagi uma. I le 1884 sa avea ai Russell ma uluaʻi peresitene o le faalapotopotoga lea ua lauiloa nei o le Sosaiete o le Olo Matamata Tusi Paia ma Sāvali o Pennsylvania. Na maliu o ia i le 1916 e latalata ane i Pampa, i Texas, a o faimalaga i se nofoaafi agaʻi atu i Niu Ioka, ua lē lavā lava i lana malaga faataamilo mulimuli sa talaʻi atu ai i le itu i sisifo o le Iunaite Setete. Sa ia faataatia se faaaʻoaʻoga mataʻina o le teuina lea o ʻoa faaleagaga i le lagi. Ma o se faaaʻoaʻoga ua mulimuli i ai le faitau selau afe o faifeʻau paeonia ua faataulagaina i latou lava i aso nei.​—Eperu 13:7; Luka 12:33, 34; faatusatusa i le 1 Korinito 9:16; 11:1.

Faaaogāina o le Vaimata Faaleagaga

13. (a) O le a faaleleia faapefea e le vaimata faaleagaga le tulaga o le ʻauuso i Laotikaia? (e) O le ā le ituaiga o laʻei ua fautuaina e Iesu e ao ona maua, ma aiseā?

¹³ Sa fautua malosi atu foʻi Iesu i na tagata  Laotikaia: “Ia e faatau . . . ofu sisina ina ia e ofu ai, ina neʻi iloa le mā o lou lē lavalavā; ma le vaimata e nini aʻi ou mata, ina ia e pupula ai.” (Faaaliga 3:18e) E ao ona latou saʻilia se vaifofō o lo latou tauaso faaleagaga i le faatauina o se vaimata e aogā, e lē o vaimata a taulasea o le nuu, ae o le ituaiga lea e na o Iesu e mafaia ona saunia. O le a fesoasoani lea ia i latou e maua ai le faautautaga faaleagaga, e mafai ai ona latou savavali i “le ala o ē amiotonu” ma o latou mata o loo susulu atu, ua taulaʻi i le faia o le finagalo o le Atua. (Faataoto 4:18, 25-27) O lea la, ua latou lē ofuina laʻei o fulufulu mamoe uliuli taugatā ua faia i Laotikaia, ae o “ofu sisina” matagofie o loo faalauiloa atu ai lo latou faaeaga e mātaulia ai, o soo o Iesu Keriso.​—Faatusatusa i le 1 Timoteo 2:9, 10; 1 Peteru 3:3-5.

14. (a) O le ā le vaimata faaleagaga ua mafai ona maua talu mai le 1879? (e) O ai e faalagolago atoa i ai le lagolagoina tautupe o le galuega a Molimau a Ieova? (i) E faapefea ona ese Molimau a Ieova mai isi, i le faaaogāina o foaʻi?

¹⁴ Pe o maua ea ni vaimata faaleagaga i ona pō nei? E mautinoa lava o loo maua! I le 1879 sa amata ai e Pastor Russell, e pei ona sa valaau ai o ia, ona lomiaina ma faalauiloa le mekasini ua lauiloa i le lalolagi atoa i aso nei o Le Olomatamata Faasilasilaina le Malo o Ieova e puipuia ai le upu moni. Sa ia faalauiloa i lana lomiga lona lua: “Matou te talitonu, o [lenei mekasini], ua lagolagoina e IEOVA, ma ona o lenei tulaga, o le a lē taitai ona ʻaisi pe faatalosaga atu foʻi i tagata mo se fesoasoani. Afai o le a lē faaauau ona saunia mai le fesoasoani tau tupe e Lē na fetalai: ʻO auro ma ario uma o i atumauga e ā aʻu ia,’ ona tatou iloa lea ua oo i le taimi e taofia ai le lomiaina o se mea.” Ua faaputuina e nisi o le ʻaufaievagelia o televise le tele o tupe ma ua ola i ni olaga ua leai se mā e faaaluvale le tele o na tupe (i nisi taimi i amioga lē mamā). (Faaaliga 18:3) I le faaeseesega, ua faaaogāina uma e Tagata Aʻoga o le Tusi Paia, lea ua lauiloa i aso nei o Molimau a Ieova, foaʻi ua mauaina ma le lē faatauanauina, e faamaopoopo ma faaauiluma ai le talaʻiga i le lalolagi atoa o le Malo o Ieova lea o loo agaʻi mai. Ua faatonutonuina e le vasega e pei o Ioane i  aso nei le lomiaina o Le Olomatamata ma le Ala Mai! Pe a tuufaatasi le aofaʻiga o nei mekasini na tufatufaina atu i le 2006, e silia ma le 59 miliona kopi. Ua maua Le Olomatamata i le sili atu i le 150 gagana. O se mekasini aloaʻia a se faapotopotoga o ni Kerisiano e sili atu i le ono miliona o ē ua faaaogāina lea vaimata faaleagaga, e faapupula ai o latou mata i lotu sesē, ma le faanatinati o le talaʻiga o le tala lelei i atunuu uma.​—Mareko 13:10.

Maua Aogā Mai Faasaʻoga ma Aʻoaʻiga

15. Aiseā ua malolosi ai fautuaga ua avatu e Iesu i Kerisiano Laotikaia, ma e tatau faapefea i le faapotopotoga ona tali atu i ai?

¹⁵ Seʻi tatou toe foʻi atu i Laotikaia. O le a faapeʻī la latou tali atu i fautuaga malolosi mai iā Iesu? Pe tatau ea ona latou lotovaivai ma lagona faapea ua lē toe finagalo Iesu e avea i latou ma ona soo? Leai, e lē o le tulaga lenā. Ua faaauau ona faapea mai le feʻau: “Ou te aʻoaʻi atu ma sasa iā i latou uma ou te alofa i ai; o lenei, ia e vilivilitaʻi, ma ia e salamō.” (Faaaliga 3:19) E pei lava o aʻoaʻiga mai iā Ieova, ua faapena foʻi ona avea aʻoaʻiga a Iesu o se faailoga o lona alofa. (Eperu 12:4-7) E tatau i le faapotopotoga i Laotikaia ona faaaogā lelei le manatu mamafa alofa ma faatatauina fautuaga a Iesu. E tatau ona latou salamō, ia iloa o lo latou faaleogalua e tutusa lea ma le agasala. (Eperu 3:12, 13; Iakopo 4:17) Ia tuu ese e o latou toeaina o latou ala manaʻo tele i mea faitino ma “toe faamumū” le meaalofa ua latou maua mai le Atua. Pe afai ua aogā le vaimata faaleagaga, tau ina ia maua uma e tagata i le faapotopotoga le faafouina e pei ona maua mai se inumaga mālū o vai o le vaipuna mālūlū.​—2 Timoteo 1:6; Faataoto 3:5-8; Luka 21:34.

16. (a) Ua faaalia faapefea le alofa ma faalogona māfana o Iesu i aso nei? (e) Afai tatou te maua ni fautuaga malolosi, e tatau faapefea ona tatou tali atu i ai?

¹⁶ Ae ā i tatou i aso nei? E faaauau e Iesu ona ʻalofa i ona lava tagata o loo i le lalolagi.’ O le a ia faia lenei mea “i aso uma lava, e oo lava i le gataaga o le lalolagi.” (Ioane 13:1; Mataio 28:20) Ua faaalia lona alofa ma faalogona māfana e auala i le vasega e pei o Ioane i ona pō nei, ma fetu po o toeaina, i le faapotopotoga Kerisiano. (Faaaliga 1:20) Ua matuā naunau toeaina e fia fesoasoani iā i tatou uma lava i nei taimi o tofotofoga, ina ia tatou tumau i totonu o le lotoā mamoe a le Atua, i le teena o le agaga fia tutoʻatasi, le matapeʻapeʻa i mea faitino, ma amioga lē mamā a le lalolagi. Afai tatou te maua ni fautuaga po o aʻoaʻiga malolosi i nisi o taimi, ia manatua “o aʻoaʻiga foʻi e aʻoaʻoina ai, o le ala o le ola lea.” (Faataoto 6:23) O i tatou uma lava e lē lelei atoatoa ma e tatau ona maelega ina ia salamō e pei ona manaʻomia ina ia tatou toe suia ma tumau ai i le alofa o le Atua.​—2 Korinito 13:11.

17. E mafai faapefea ona avea le tamaoaiga ma lamatiaga faaleagaga iā i tatou?

¹⁷ E lē tatau ona tatou faatagaina le manaʻo tele i mea faitino, le ʻoa po o le leai o ni ʻoa e faapogaia ai lo tatou faaleogalua. E ui ina mafai ona fesoasoani le tamaoaiga i le faia o ni mea fou e manaʻomia mo le auaunaga, ae mafai foʻi ona iai lamatiaga. (Mataio 19:24) E ono manatu se tagata maumea e lē manaʻomia fua ona ia maelega i le galuega talaʻi e pei o isi, tau lava o lona faia o ni meaalofa tetele mai lea taimi i lea taimi. Pe atonu na te lagona faapea ona o lona tamaoaiga, e ao ona ia maua ai ni faaeaga. E lē gata i lea, e tele atu fiafiaga ma mea e faaalu i ai le taimi o se tagata tamaoaiga lea e lē mafai ona gafatia e isi. Ae o na mea e taasē ai, e alu ai le taimi, ma e mafai ona tataʻi ese ai le tagata e lē mataala mai le faiva faa-Kerisiano, ma iʻu ai ina avea lea tagata lē faautauta ma tagata faaleogalua. Tau ina ia tatou ʻalofia nei mailei uma ae ia ʻgalulue pea ma finafinau’ ma le loto atoa, a o tatou tulimataʻi atu i le ola e faavavau.​—1 Timoteo 4:8-10; 6:9-12.

‘Auai i le Talisuaga Afiafi’

18. O le ā le avanoa na faatulaga atu e Iesu i Kerisiano Laotikaia?

¹⁸ Ua faaauau ona fetalai Iesu: “Faauta, ou te tū atu i le puipui ma tuʻituʻi atu; ai se tasi e faalogo mai i loʻu leo, ma tatala mai le puipui, ou te ulufale atu iā te ia, ma te tali sua foʻi ma ia, o ia foʻi ma aʻu. (Faaaliga 3:20) Pe afai e taliaina e Kerisiano Laotikaia Iesu i totonu o la latou faapotopotoga, o le a ia  fesoasoani iā i latou e manumalo mai i lo latou faaleogalua!​—Mataio 18:20.

19. O le ā ua faauiga i ai upu a Iesu ina ua ia folafola e talisua afiafi faatasi ma le faapotopotoga i Laotikaia?

¹⁹ O le taʻua e Iesu o le talisuaga afiafi sa ono faamanatu atu ai iā Laotikaia taimi na sa taumamafa faatasi ai o ia ma ona soo. (Ioane 12:1-8) O taimi faapea e masani ona maua ai faamanuiaga faaleagaga e i latou e faatasi ai. Sa iai foʻi taimi mataʻina faapena ina ua toetū aʻe Iesu sa faatasi ai o ia i se taumafataga faatasi ma ona soo, o ia aso faapitoa sa faamalosia tele ai i latou. (Luka 24:28-32; Ioane 21:9-19) O le mea lea, o lana folafolaga e afio mai i le faapotopotoga i Laotikaia ma talisua afiafi faatasi ma i latou, o se folafolaga e aumaia ai iā i latou aogā faaʻoaina pe afai latou te taliaina o ia.

20. (a) I le amataga o le aso o le Alii, o le ā na iʻu i ai uiga faaleogalua o lotu ua vavae ese mai le Faa-Kerisiano moni? (e) Ua faapefea ona aafia nei lotu i le faamasinoga a Iesu?

²⁰ E tāua tele mo Kerisiano faauuina o loo totoe i aso nei, apoapoaʻiga alofa a Iesu iā Laotikaia. E manatua e nisi o i latou, a o amata le aso o le Alii, sa oo ina matuā leaga le tulaga faaleogalua o tagata o lotu ua vavae ese mai le Faa-Kerisiano moni. Sa leʻi faafeiloaʻia e ona taʻitaʻi lotu le toe afio mai o lo tatou Alii i le 1914, ae na mua ona vevesi i fasiotiga tagata i le Taua Muamua a le Lalolagi, lea sa fetauaʻi ai atunuu e 28. Ma o le 24 o na atunuu na faapea mai o Kerisiano. Pagā le tele o lo latou nofosala i le toto! Sa toe “paʻi atu agasala [a lotu sesē] i le lagi,” i le vaitaimi o le Taua Lona Lua a le Lalolagi, lea sa tele ina tau i totonu o atunuu lotu ua vavae ese mai le Faa-Kerisiano moni. (Faaaliga 18:5) Ae lē gata i lea, ua fulitua taʻitaʻi lotu i le Malo o Ieova lea o loo agaʻi mai, e ala i le lagolagoina o Malo Sosoo, Malo Aufaatasi, ma gaoioiga faalotonuu ma le fouvale, lea e leai se mea o mafaia ona foʻiaina faafitauli o tagata. Ua leva ona teena e Iesu taʻitaʻi lotu, i le matuā faamasinoina ma lafoaʻi ese i latou, e pei lava o se faifaiva ua lafoaʻi i iʻa lē lelei na maua i lana upega fagota. O tulaga puapuagatia o lotu sesē i aso nei, ua matuā faamaonia ai lava le tatau i ai o lona faamasinoga. Tau ina ia avea lona taunuuga ua iʻu i ai, e fai ma lapataʻiga mo i tatou!​—Mataio 13:47-50.

21. Mai le 1919 ma faasolo mai ai, ua faapefea ona tali atu Kerisiano o loo i le faapotopotoga moni i fetalaiga a Iesu i Kerisiano i Laotikaia?

²¹ E oo lava i totonu o le faapotopotoga moni, ua iai nisi tagata ua faaleogalua, ua pei o se vaitaumafa ua lē vevela ina ia faagaee ai, ae lē mālūlū foʻi ina ia faafouina ai. Peitaʻi e alofa māfana pea Iesu i lana faapotopotoga. E faalatalata mai o ia i Kerisiano o ē talia lelei o ia, ma e toʻatele ua latou taliaina o ia, e peiseaʻī ina ia talisua faatasi. O le iʻuga, ua latou malamalama ai i uiga o valoaga o le Tusi Paia mai le 1919 ma faasolo mai ai. Ua latou olioli i se vaitaimi o le malamalamaga tele.​—Salamo 97:11; 2 Peteru 1:19.

22. O le ā le talisuaga afiafi i le lumanaʻi atonu sa i le finagalo o Iesu, ma o ai o le a auai atu i ai?

²² I le talanoa atu i Laotikaia, atonu sa i le finagalo foʻi o Iesu se isi talisuaga afiafi. Mulimuli ane i le Faaaliga tatou te faitau ai e faapea: ʻAmuia ē ua talaʻiina i le tausamaaga a le Tamaʻi Mamoe.’ O le tausamaaga tele lenei o le manumalo, e viiviia ai Ieova ina ua uma ona ia faaooina le sala faafaamasinoga i lotu sesē​—o se tausamaaga e auai ai i le lagi, Keriso ma lana faatoanofotane ua atoa lo latou aofaʻi e 144,000. (Faaaliga 19:​1-9) O tagata faamaoni o le faapotopotoga i Laotikaia anamua, ma uso faamaoni o Keriso i aso nei, o loo laʻei mamā e mātaulia ai o ni Kerisiano moni faauuina, o le a talisua uma ma la latou Faatoʻāfaiavā i lenā talisuaga afiafi. (Mataio 22:2-13) Maʻeu se uunaʻiga malosi e ao ai ona maelega ma salamō!

Se Nofoālii mo le ʻAumanumalo

23, 24. (a) O le ā le isi taui ua fetalai i ai Iesu? (e) O anafea sa afio ai Iesu i lona nofoālii o se Mesia, ma o anafea na amata ai le faamasinoga o tagata na faapea mai o Kerisiano? (i) O le ā le folafolaga matagofie a Iesu i ona soo a o ia faavaeina le Faamanatuga o lona maliu?

²³ Ua fetalai Iesu i se isi taui, i le faapea mai: “O lē manumalo ou te avatua iā te ia ma te nonofo faatasi ma aʻu i loʻu nofoālii, e pei o aʻu foʻi ona ou manumalo, ua ma nonofo foʻi faatasi ma loʻu Tamā i lona nofoālii.” (Faaaliga 3:21) I le faataunuuina o upu a Tavita i le Salamo 110:1, 2, na toe faatūina  ai Iesu i le 33 T.A., o lē na tumau lona faamaoni ma manumalo i le lalolagi, ona faaeaina ai lea e afifio ma lona Tamā i Lona nofoālii faalelagi. (Galuega 2:​32, 33) O se tasi o tausaga tāua tele o le 1914, lea na afio ai Iesu i lona lava nofoālii faa-Mesia e avea o se Tupu ma Faamasino. E foliga mai na amata le faamasinoga i le 1918 i tagata na faapea mai o Kerisiano. O le ʻaumanumalo faauuina o ē na maliliu a o leʻi oo i lenā taimi, na toe faatutūina aʻe e faatasi ma Iesu i lona Malo. (1 Peteru 4:17) Sa ia folafola le mea lenei iā i latou ina ua ia faavaeina le Faamanatuga o lona maliu, i le fetalai atu i ona soo: “E faapei ona tofia mai e loʻu Tamā o le malo iā te aʻu, e faapea foʻi ona ou tofia outou, ina ia outou aai ma inu i laʻu laoai i loʻu malo, ma ia nonofo i nofoālii, ma faamasino atu i itu aiga o Isaraelu e sefulu ma le lua.”​—Luka 22:28-30.

²⁴ Maʻeu se tofiga matagofie​—o le nonofo faatasi ma le Tupu i le vaitaimi “o le toe faatulagaga” ma galulue faatasi ma ia, e faavae i lana taulaga lelei atoatoa, i le toe faafoʻisia o le lelei atoatoa i tagata usiusitai e pei ona sa iai i Etena! (Mataio 19:28; 20:28) E pei ona logo mai i tatou e Ioane, e faia e Iesu i latou o ē manumalo e avea ma “tupu ma faitaulaga i le Atua o lona lava Tamā,” e nofoia nofoālii faataamilo i le nofoālii faalelagi matagofie o Ieova lava ia. (Faaaliga 1:6; 4:4) Po o oe o se tasi e faauuina po o se tasi mo le lalolagi fou lea e faamoemoe e auai i le toe faafoʻisiaina o le Parataiso, ae ao ona tatou teuloto fetalaiga a Iesu i le faapotopotoga i Laotikaia!​—2 Peteru 3:13; Galuega 3:19-21.

25. (a) E pei lava o feʻau na muamua atu, na faapefea ona faaiʻu e Iesu lana feʻau i Laotikaia? (e) E tatau faapefea i Kerisiano taʻitoʻatasi i aso nei ona tali atu i fetalaiga a Iesu i le faapotopotoga i Laotikaia?

²⁵ Na faaiʻu e Iesu le feʻau lenei i fetalaiga apoapoaʻi, e pei lava o feʻau na muamua atu: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia.” (Faaaliga 3:22) Ua tatou ola nei i le faatausiʻusiʻuga o le taimi o le iʻuga. Ua iā i tatou faamaoniga uma e iloa ai ua maalili le alofa o lotu ua vavae ese mai le Faa-Kerisiano moni. Peitaʻi, o tatou o Kerisiano moni, e ao ona tatou tali atu ma le naunau i le feʻau a Iesu i le faapotopotoga i Laotikaia; ioe, i feʻau uma e fitu a lo tatou Alii i faapotopotoga. E mafai pe a tatou maumauaʻi e faia se sao tele i le faataunuuga o le valoaga sili a Iesu mo o tatou aso: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”​—Mataio 24:12-14.

26. O afea e toe fetalai tuusaʻo mai ai Iesu iā Ioane, ae o ā mea o le a faia ai sona sao?

²⁶ Ua faaiʻuina fautuaga a Iesu i faapotopotoga e fitu. O le a lē toe fetalai Iesu iā Ioane seʻia oo i le mataupu mulimuli. Ae iai sona [Iesu] sao e fai i le tele o vaaiga, mo se faaaʻoaʻoga, i le faaooina mai o faamasinoga a Ieova. Seʻi o tatou auai nei loa ma le vasega e pei o Ioane i le iloiloina o le vaaiga mataʻina lona lua ua faaalia mai e le Alii o Iesu Keriso.

[Faaopoopoga i lalo]

[Fesili mo le Suʻesuʻega]

[Pusa i le itulau 73]

Eseesega o le Manaʻo i Mea Faitino ma le Poto

I le 1956, sa faapea mai se tasi nusipepa: “I le senituri ua mavae, sa iai se fua faatatau e faapea, o le tagata lautele e 72 ona manaʻoga, o le 16 o ia manaʻoga sa manatu i ai o ni mea e manaʻomia moni. I aso nei, i se fua faatatau, o le tagata lautele e 474 ona manaʻoga, o le 94 o ia manaʻoga e manatu i ai o ni mea e manaʻomia moni. I le senituri ua mavae, sa 200 ni oloa e ono tauanau e se tagata faatauoloa le tagata lautele e faatau. Ae i aso nei ua iai le 32,000 oloa ia e manaʻomia ona fia faatau atu. E itiiti mea e manaʻomia moni e le tagata​—o ona manaʻonaʻoga, e lē gata mai.” I aso nei, ua lutia tagata i le manatu faapea o le tamaoaiga i mea faitino ma mea totino o mea autū ia o le olaga. O le māfuaaga lea o le lē amanaʻiaina e le toʻatele o le fautuaga atamai a le Failauga 7:12: “Ua fai le poto ma mamalu, ua fai foʻi tupe ma mamalu; a o le aogā lenei o le poto ua maua, e ola ai ē ua i ai.”

[Ata i le itulau 67]

E oo atu i Laotikaia le suāvai ua lē lelei i se taumafa auā ua lē maalili lē vevela ae faaleogalua. Sa iai i Kerisiano Laotikaia se agaga lē lelei o le faaleogalua