Mataupu 7

Ia Toe Faaolaola Lenā Uluaʻi Alofa!

EFESO

1. O ai le faapotopotoga na avatu i ai le uluaʻi feʻau a Iesu, ma o le ā ua ia faamanatu i ovasia?

O LE uluaʻi feʻau a Iesu e mo le faapotopotoga i Efeso, a o avea Efeso i lenā taimi o se aai uluola i le talafatai o Asia Itiiti e latalata i le motu o Patamo. Ua ia faatonuina Ioane: “Ia e tusi i le agelu a le ekalesia o i Efeso: O mea nei ua fai mai ai lē uʻu i fetu e fitu i lona lima taumatau, o lē savali i totonu o tuugāmolī auro e fitu.” (Faaaliga 2:1) E pei ona iai i isi feʻau e ono, o lea e tataʻi e Iesu manatu i se vala e faailoa ai lona tulaga pule. Ua ia faamanatu i ovasia i Efeso e faapea, o toeaina uma lava o loo i lana vaavaaiga malupuipuia, ma o loo ia asiasia faapotopotoga uma. O loo ia faaauau mai lava i o tatou aso le faatinoga o lenei tulaga ulu alofa, i le vaavaaia o toeaina ma leoleoina ma le agalelei i latou uma o iai i faapotopotoga. O nisi taimi na te toe fetuunaʻi ai faatulagaga i faapotopotoga, ina ia atili manino le susulu mai o le malamalama. Ioe, o Iesu le Leoleo Mamoe Sili o le lafu a le Atua.​—Mataio 11:28-30; 1 Peteru 5:2-4.

2. (a) O ā mea lelei na faamālō atu ai Iesu i le faapotopotoga i Efeso? (e) O le ā le fautuaga a le aposetolo o Paulo e foliga sa usitaia e le ʻautoeaina i Efeso?

² Ona faatulaga loa lea e Iesu le auala e momoli atu ai ana feʻau, seʻi vaganā isi feʻau e lua, e ala i le amata i ni upu māfana o le faamālō. O le feʻau lenei mo le faapotopotoga i Efeso: “Ua ou iloa i au galuega, ma lou tigā, ma lou onosai, ina ua e lē lavātia i ē ua leaga; ua e tofotofo foʻi i ē ua fai mai o aposetolo i latou, a e leai lava, ua e iloa foʻi o tagata pepelo i latou; ma ua e lavātia, ua iā te oe foʻi le onosai, ua e tautigā ona o loʻu igoa, e te leʻi faavaivai lava.” (Faaaliga 2:2, 3) I tausaga muamua atu, sa lapataʻia ai e le aposetolo o Paulo le ʻautoeaina i Efeso ina ia nofouta i “luko sauā,” o ē tetee ma faavevesia le lafu. Sa ia taʻu atu foʻi i na toeaina ina ia “mataala,” ina ua faatoʻā mavae lana ia foʻi faaaʻoaʻoga o sē sa leʻi faavaivai. (Galuega 20:29, 31) E foliga sa latou faatatauina lenā fautuaga, auā o lea ua faamālō atu Iesu iā i latou ona o lo latou tautigā ma le onosai, ma le lē faavaivai.

3. (a) Ua taumafai faapefea “aposetolo pepelo” e faasesē tagata faamaoni i o tatou aso? (e) O le ā le lapataʻiga e faatatau i ē sa tetee i le upu moni, na tuuina mai e Peteru?

³ A o faagasolo foʻi aso o le Alii, ua aliali mai “aposetolo pepelo” o ē “tautala mai i mea faapiʻopiʻo, e fetoso ese ai le ʻau soo ia mulimuli iā i latou.” (2 Korinito 11:13; Galuega 20:30; Faaaliga 1:10) O lo latou manatu e lelei uma lava lotu e ui ina feteenaʻi talitonuga. Latou te faapea mai e leai se faalapotopotoga a le Atua, ma latou te lē ioeina le manatu faapea na tauaao atu iā Iesu le mana o le Malo i le 1914. Ua latou faataunuu ai le valoaga i le 2 Peteru 3:3, 4: “E ō mai i ona aso e gata ai o ē tauemu, latou te savavali e tusa ma o latou lava tuʻinanau; e faapea mai, Ofea nei le folafolaga o lona afio mai? auā talu ona momoe o le augātamā, ua tutumau pea o mea uma talu ona faatoʻā faia.”

4. (a) Ua aliali faapefea le faamaualuga ma le fouvale o tagata faatauemu? (e) Ua pei Kerisiano i aso nei o tagata Efeso, e ala i le faia o le ā le gaoioiga i ē tetee tala pepelo?

⁴ E tetee nei tagata faatauemu i le manatu e tatau ona taʻutino i le lautele lo latou faatuatuaga. (Roma 10:10) Ua latou maua le lagolagosua a taʻitaʻi lotu a Kerisiano faatagāfai, ma le fesoasoani a nusipepa ma televise e  faasalalauina faamatalaga pepelo e faatatau i ē sa latou auaumea muamua. E lē pine ona iloa lea e i latou faamaoni, le lē moni o faamatalaga ma amio a nei tagata taufaasesē. I le pei o Kerisiano i Efeso, ua faapena foʻi ona lē mafai e Kerisiano i aso nei ona ʻlavātia ē ua leaga,’ o lea latou te faateʻaeseina ai nei tagata tetee tala pepelo mai a latou faapotopotoga. *

5. (a) O le ā le vaivaiga na fetalai Iesu sa iai i le faapotopotoga i Efeso? (e) O ā fetalaiga sa tatau ona latou manatua?

⁵ Ae o lea la ua faailoa saʻo atu nei e Iesu se faafitauli matuiā, e pei ona ia faia i faapotopotoga e lima mai faapotopotoga e fitu. Ua ia fetalai atu i le faapotopotoga i Efeso: “A ua ou lē fiafia iā te oe, ona ua e tuua o lou uluaʻi alofa.” (Faaaliga 2:4) Sa lē tatau ona latou faalētonu i lenei itu, auā i le 35 tausaga muamua atu, na tusi atu ai Paulo iā i latou e faatatau i le “alofa tele na ia [le Atua] alofa mai ai iā i tatou,” ma na ia ʻaiʻoi atu iā i latou: “Ia faaaʻoaʻo outou i le Atua, faapei o le fanau pele; ma ia savavali i le alofa, faapei o Keriso foʻi na ia alofa mai iā i tatou.” (Efeso 2:4; 5:1, 2) Sa tatau foʻi ona matuā tāmau fetalaiga a Iesu i o latou loto: “O le Alii lo tatou Atua, o le Alii e toʻatasi ia. Ia e alofa foʻi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa.” (Mareko 12:29-31) Sa lafoaʻia e le faapotopotoga i Efeso lenā uluaʻi alofa.

6. (a) E tusa lava po ua leva ona tatou iai i le upu moni pe fou foʻi, ae o le ā le lamatiaga ma faanaunauga e ao ona tatou faaeteete i ai? (e) O le ā e tatau i lo tatou alofa mo le Atua ona uunaʻia i tatou e fai?

⁶ E tusa lava po ua leva ona tatou iai i le upu moni pe fou foʻi, e ao pea ona tatou faaeteete ina neʻi toe mou ese atu lo tatou uluaʻi alofa sa iai mo Ieova. E mafai faapefea ona toe mou ese atu? E oo ina avea ma mea autū i o tatou olaga, le matuā alu uma o le malosi i a tatou galuega faaletino, le faanaunauga e matuā ʻeli ia tele ni tupe, po o le naunau e saʻilia faafiafiaga. O inā e oo ai ina faaletino o tatou manatu na i lo le manatu faaleagaga. (Roma 8:5-8; 1 Timoteo 4:8; 6:9, 10) E ao i lo tatou alofa iā Ieova ona uunaʻia i tatou e toe faasaʻo so o se faanaunauga faapea, ma ia ʻmuaʻi saʻili pea le malo o le Atua ma lana amiotonu,’ ina ia ʻteuina mo i tatou lava ʻoa i le lagi.’​—Mataio 6:19-21, 31-33.

7. (a) O le ā e tatau ona faagaeeina ai la tatou auaunaga iā Ieova? (e) O le ā na fai mai ai Ioane e faatatau i le alofa?

⁷ Ia faagaeeina pea la tatou auaunaga iā Ieova e le alofa loloto moni mo ia. Ia tatou talisapaia moni mea uma ua faia e Ieova ma Keriso mo i tatou. E pei ona tusia e Ioane lava ia mulimuli ane: “O le alofa lava lenei, e lē ona ua tatou alofa i le Atua, a ua alofa mai o ia iā te i tatou, ua na auina mai foʻi lona Alo o le togiola  mo a tatou agasala.” Ua taʻu mai atili e Ioane iā i tatou: “O le Atua, o le alofa lava ia; o lē tumau i le alofa, ua tumau ia i totonu o le Atua, o le Atua foʻi o i totonu iā te ia.” Seʻi aua lava neʻi mou ese atu lo tatou alofa mo Ieova, mo le Alii o Iesu Keriso, ma le Afioga o loo ola a le Atua! E mafai ona tatou faailoaina lea alofa e lē gata i le auaunaga maelega i le Atua, ae faapea foʻi i le “usitai i lenei . . . poloaʻiga ua tatou maua mai iā te ia, o lē alofa i le Atua ia alofa foʻi o ia i lona uso.”​—1 Ioane 4:10, 16, 21; Eperu 4:12; tagaʻi foʻi i le 1 Peteru 4:8; Kolose 3:10-14; Efeso 4:15.

“Faia Au Uluaʻi Galuega”

8. O ā gaoioiga na fetalai Iesu e ao ona faia e Kerisiano i Efeso?

⁸ E ao i na Kerisiano Efeso ona toe faaolaola lo latou uluaʻi alofa pe afai e lē mananaʻo e lafoaʻia i latou. Ona fetalai atu lea o Iesu iā i latou: “O lenei, ia e manatua le mea na e paʻū mai ai, ma ia e salamō, ma e faia au uluaʻi galuega; afai e leai, ona ou vave alu atu lea iā te oe, ou te aveesea lau tuugālamepa i le mea e tuu ai, pe afai e te lē salamō.” (Faaaliga 2:5, “LT”) Sa faapeʻī le tali mai a Kerisiano i le faapotopotoga i Efeso i na fetalaiga? Tatou te lē iloa. Talosia sa latou salamō ma faamanuiaina ai i le toe fafaguina o lo latou alofa mo Ieova. Afai latou te leʻi salamō, lona uiga o le a tapē a latou lamepa ma aveesea a latou tuugālamepa. Lona uiga o le a lē toe iai so latou faaeaga e faasusuluina atu le upu moni.

9. (a) O le ā le fetalaiga faalaeiau a Iesu i Kerisiano i Efeso? (e) Na faapefea i faapotopotoga ina ua mavae aso o Ioane, ona lē taulau e utagia le fautuaga a Iesu i Kerisiano i Efeso?

⁹ E ui lava i lea, o fetalaiga faalaeiau nei a Iesu mo Kerisiano i Efeso: “A ua iā te oe lenei mea, ina ua e ʻinoʻino i galuega a le ʻau Nikalaitai, o aʻu foʻi ou te ʻinoʻino i ai.” (Faaaliga 2:6) O le mea e sili ai, sa latou ʻinoʻino i fevaevaeaʻiga i vaega faalotu, e pei lava ona sa ʻinoʻino i ai le Alii o Iesu Keriso. Peitaʻi, a o faagasolo tausaga, e tele faapotopotoga sa lē taulau ona utagia na fetalaiga a Iesu. Sa leai so latou alofa iā Ieova, i le upu moni, ma isi o latou uso Kerisiano. O le iʻuga, na latou tafetafea ese atu ai i le pogisa faaleagaga. Sa faataapeapeina i latou ma maua ai le tele o vaega faalotu fefinauaʻi. O “Kerisiano pepelo” o ē sa leai so latou alofa mo Ieova, na latou aveesea le suafa o le Atua mai tusitusiga Eleni o le Tusi Paia. O le leai o se alofa na latou faaaogā ai foʻi le igoa o le Faa-Kerisiano e talia ai aʻoaʻoga faa-Papelonia ma faa-Eleni, e pei o le afi i seoli, pulekatolio ma le Tasitolu po o le Tolutasi. Na muta ai foʻi ma le toe talaʻia o le Malo o le Atua e le toʻatele o ē na faapea mai o Kerisiano, ona ua leai so latou alofa mo le Atua ma le upu moni. Na pulea i latou e se vasega o taʻitaʻi lotu manatu faapito lea ua faia lona lava malo i inei i le lalolagi.​—Faatusatusa i le 1 Korinito 4:8.

10. O le ā le tulaga sa iai i lotu na vavae ese mai le upu moni i le 1918?

¹⁰ Ina ua amata le faamasinoga i le ʻauaiga o le Atua i le 1918, sa matilatila le lagolagoina o le Taua Muamua a le Lalolagi, e faifeʻau o lotu na vavae ese mai le Faa-Kerisiano moni, ma uunaʻia ai Katoliko ma Porotesano o itu taua e lua, ina ia fefasiotiaʻi. (1 Peteru 4:17) Sa leʻi pei lotu ua vavae ese mai le upu moni, o le faapotopotoga i Efeso lea na ʻinoʻino i le mea na faia e le lotu a le ʻau Nikalaitai. Na i lo lea, ua leva ona faasesēina nei lotu i aʻoaʻoga fenuminumiaʻi e lē mai le Atua, ma ua auaufaatasi a latou taʻitaʻi lotu ma le lalolagi, lea na fetalai Iesu e lē tatau ona faia ai se vaega a ona soo. (Ioane 15:17-19) Talu ai latou te leʻi amanaʻia le matua o le Tusi Paia, o le Malo lea o le Atua, na lē avea ai a latou faapotopotoga o ni tuugāmolī e faasusuluina atu le upu moni o le Tusi Paia. E leʻi avea foʻi o latou tagata ma vaega o le malumalu faaleagaga o Ieova. E leʻi avea a latou tane (ma fafine) taʻimua o ni fetu ae sa faaalia le avea ma sui “o le tagata o le amio leaga.”​—2 Tesalonia 2:3; Malaki 3:1-3.

11. (a) O ai le vaega o Kerisiano i le lalolagi i le 1918, lea na latou faatinoina fetalaiga a Iesu i Kerisiano i Efeso? (e) O le ā sa faia e le vasega e pei o Ioane mai le 1919 seʻia oo mai i le taimi nei?

¹¹ Peitaʻi, a o vevesi le Taua Muamua a le Lalolagi, ae aliaʻe se vasega e pei o Ioane, o ē na avea lo latou alofa mo Ieova ma le upu moni, na uunaʻia ai i latou e auauna iā te ia ma le maelega aasa. Sa latou teena tagata na taumafai e faaofi mai faiga faavaega e ala i le  toetoe lava ifo i le uluaʻi peresitene o le Sosaiete o le Olo Matamata o Charles T. Russell, ina ua mavae lona maliu i le 1916. O sauāga ma mala na avea o se aʻoaʻiga i lenei vasega o Kerisiano. Sa matuā “lelei” ai le iʻuga o lo latou faamasinoga mai lo latou Matai, ma valaaulia ai loa e ulufale atu i lona fiafia. (Mataio 25:21, 23) O le faagasologa o mea tutupu i le lalolagi, ma mea na oo iā i latou, ua latou mātaulia ai le faataunuuga o le faailoga lea na fetalai Iesu e iloa ai lona faatasi mai lē vaaia i le mana o le Malo. I le 1919 ma faasolo mai ai, sa latou agaʻi e auai i le faataunuuga atili o le valoaga sili a Iesu: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 6:​9, 10; 24:3-14) Afai sa tau mou atu lo latou alofa mo Ieova, na matuā toe faamalosia lava i lenā taimi seʻia oo mai i le taimi nei.

12. (a) O le ā le valaau na alagaina i se tauaofiaga mataʻina i le 1922? (e) O le ā le igoa na taliaina e Kerisiano moni i le 1931, ma o ā mea na latou salamō ai?

¹² I se tauaofiaga mataʻina na auai ai le 18,000 o nei Kerisiano, i Cedar Point, Ohio, U.S.A., iā Setema 5-13, 1922, na alagaina ai lenei valaau: “Foʻi atu i le fanua, outou atalii e, o le Atua silisili ese! . . . E ao ona iloa e le lalolagi o Ieova o le Atua ma o Iesu Keriso o le Tupu o tupu ma le Alii o alii. . . . O le mea lea ia faalauiloa, faalauiloa, faalauiloa, le Tupu ma lona malo.” Sa matuā faasilisilia ai le suafa tāua o Ieova. I le 1931, a o tauaofia nei Kerisiano i le tauaofiaga i Columbus, Ohio, U.S.A., na latou olioli ai e taliaina ma tauave le igoa na faasino mai e le Atua i le valoaga a Isaia​—o Molimau a Ieova. (Isaia 43:10, 12) Sa suia le igoa o le mekasini autū a le faalapotopotoga i Le Olomatamata Faasilasilaina le Malo o Ieova, i lana lomiga o Mati 1, 1939, ua matuā faasilisilia ai le mamalu o Lē na Foafoaina i tatou ma lona Malo. O lea, na toe faafouina e Molimau a Ieova lo latou alofa mo Ieova, ma salamō foʻi i so o se mea na lē taulau ai ona latou faamamaluina ma faapaia lona suafa silisili ma lona Malo.​—Salamo 106:6, 47, 48.   

“O Lē Manumalo”

13. (a) O le ā le faamanuiaga sa iai mo Kerisiano Efeso pe afai latou te “manumalo”? (e) O le a faapefea ona “manumalo” Kerisiano Efeso?

¹³ I le faaiʻuga, e pei ona sa ia faia foʻi i isi feʻau, na faatepa e Iesu manatu i le agaga o le Atua, a o faalauiloaina taui mo le faatuatua e auala iā te ia. Ua fetalai o ia i Kerisiano i Efeso: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia. O lē manumalo, ou te avatua iā te ia e ʻai i le laau o le ola o i totonu o le parataiso [a] le Atua.” (Faaaliga 2:7) O le a naunau i latou o ē fia faalogo e utagia lenā feʻau tāua, i le iloaina e lē o se loto o Iesu lava ia na amata mai ai, ae mai le Alii Pule Silisili Ese o Ieova e ala i Lona agaga paia, po o le malosi galue. O le a faapefea ona latou “manumalo”? I le mulimulituʻi i tulagāaao o Iesu, o lē na faamaoni seʻia oo i lona maliu, ma mafai ai ona faapea mai: “Ia outou loto tetele, ua ou manumalo i le lalolagi.”​—Ioane 8:28; 16:33; tagaʻi foʻi i le 1 Ioane 5:4.

14. I le ā e ao ona faasino i ai “le parataiso a le Atua” lea na taʻua e Iesu?

 ¹⁴ Talu ai e lē faamoemoe i latou e ola i le parataiso i le lalolagi, e faapefea la ona tauia Kerisiano faauuina e pei o Kerisiano Efeso, i le taumafaina o “le laau o le ola o i totonu o le parataiso a le Atua”? E lē o faasino atu lenei taui i le Parataiso o le a toe iai i le lalolagi. Aiseā? Auā o Kerisiano faauuina e 144,000 lea e aofia ai i latou mai le faapotopotoga i Efeso, e faatauina mai tagata o i le lalolagi. Ona aveina aʻe lea e pule faatasi ma le Tamaʻi Mamoe, o Keriso Iesu, i le Mauga o Siona faalelagi o ni atalii agaga. (Efeso 1:5-12; Faaaliga 14:1, 4) Lona uiga la, o le faamatalaga i inei e faatatau atu i le siʻomaga faalelagi e pei se faatoʻaga, o le a fai ma tofi o i latou nei ua manumalo. O inā i “le parataiso a le Atua,” i le mea o afio ai Ieova, o le a soifua ai pea e faavavau i latou nei ua manumalo, o ē ua tuuina atu i ai le ola e lē mafai ona toe oti, e pei ona faaata mai i lo latou taumafaina o le laau o le ola.

15. Aiseā e naunau ai le motu o tagata e toʻatele i aso nei, i le faalaeiauga a Iesu ina ia manumalo?

¹⁵ Ae faapefea tagata i le lalolagi, o ē o loo lagolagosua faamaoni i le 144,000 o ē faauuina? O loo manumalo foʻi se motu o tagata e toʻatele o nei Molimau. Peitaʻi latou te faamoemoe e ulu atu i se parataiso i le lalolagi, lea o le a latou feinu ai mai “le vaitafe manino o le vai o le ola,” ma maua le faamālōlōga mai ʻlau o laau’ ua totōina i tafatafa o lenā vaitafe. (Faaaliga 7:4, 9, 17; 22:1, 2) Pe afai o oe o se tasi o lea vaega, tau ina ia e faaalia foʻi lou alofa māfana mo Ieova ma manumalo ai i le taua o le faatuatua. Ona e maua ai lea o le fiafiaga o le ola e faavavau i le lalolagi Parataiso.​—Faatusatusa i le 1 Ioane 2:13, 14.

[Faaopoopoga i lalo]

[Fesili mo le Suʻesuʻega]

[Pusa i le itulau 36]

Viiga Alofa iā Ieova ma Lona Alo

I totonu o le tusi pese na lomiaina e tagata o Ieova i le 1905, e faaluaina le tele o pese na viia ai Iesu na i lo pese na viia ai Ieova le Atua. I la latou tusi pese i le 1928, sa talitutusa ai le aofaʻiga o pese o loo faaneenee ai Iesu ma le aofaʻiga o loo faaneenee ai Ieova. Ae i le tusi pese lata mai nei o le 1984, ua faafāina le tele o pese e faamamaluina ai Ieova na i lo Iesu. Ua ōgatasi lea ma fetalaiga a Iesu lava ia: “E sili loʻu Tamā iā te aʻu.” (Ioane 14:28) E ao ona matilatila le alofa mo Ieova, faatasi ai ma le alofa loloto mo Iesu ma le talisapaia o lana taulaga tāua ma le tofiga o se Ositaulaga Sili ma le Tupu a le Atua.

[Siata i le itulau 34]

Le Auala sa Faia ai e Iesu Fautuaga

(e faasino atu i mataupu ma fuaiupu o le Faaaliga)

Feʻau i Pule mo Faatomua Faailoa Faasaʻoga Faamanuiaga

le faapo- le avatuina i se manino le ma/po o e iʻu i ai

topotoga o fautuaga faamālō faafitauli faalaeiauga

Efeso 2:1 2:2, 3 2:4 2:5, 6 2:7

Semurana 2:8 2:9 — 2:10 2:11

Perekamo 2:12 2:13 2:14, 15 2:16 2:17

Tuatira 2:18 2:19 2:20, 21 2:24, 25 2:26-28

Sarataisa 3:1 — 3:1, 2 3:3, 4 3:5

Filatelefaia 3:7 3:8 — 3:8-11 3:12

Laotikaia 3:14 — 3:15-17 3:18-20 3:21