Mataupu 41

Le Aso o le Faamasinoga a le Atua—Lona Iʻuga Olioli!

Vaaiga 15—Faaaliga 20:11–21:8

Mataupu: Le toetū lautele, Aso Faamasino, ma faamanuiaga o le lagi fou ma le lalolagi fou

Taimi o le faataunuuga: Le Pulega i le Afe Tausaga

1. (a) O le ā na lē toe iai i tagata ina ua agasala Atamu ma Eva? (e) O le ā le fuafuaga a le Atua sa leʻi suia, ma e faapefea ona tatou iloa?

O I TATOU o tagata, sa foafoaina i tatou ina ia ola e faavavau. Ana usiusitai Atamu ma Eva i poloaʻiga a le Atua, semanū e lē feoti. (Kenese 1:28; 2:8, 16, 17; Failauga 3:10, 11) Ae ina ua la agasala, na aveesea ai foʻi mai iā i laʻua le ola ma le lelei atoatoa. E lē gata iā i laʻua ae atoa ai ma a la fanau; ona pule ai lea o le oti i tagata e pei o se fili lē mataofia. (Roma 5:12, 14; 1 Korinito 15:26) Ae ui i lea, e leʻi suia ai le fuafuaga a le Atua ina ia ola e faavavau tagata lelei atoatoa i se lalolagi parataiso. Ona o lona alofa tele mo tagata, na ia auina mai ai i le lalolagi lona Alo pele e toʻatasi, o Iesu, o lē na foaʻi mai lona soifua faaletagata lelei atoatoa e fai ma togiola mo le “toʻatele” o le fanau a Atamu. (Mataio 20:28; Ioane 3:16) Ua mafai nei e Iesu ona faaaogā lenei aogā faaletulafono o lana taulaga ina ia toe faafoʻisia ai tagata talitonu i le ola lelei atoatoa i se lalolagi parataiso. (1 Peteru 3:18; 1 Ioane 2:2) Maʻeu se māfuaaga matagofie mo tagata e ʻfiafia ai ma olioli’!​—Isaia 25:8, 9.

2. O le ā ua lipotia mai e Ioane i le Faaaliga 20:11, ma o le ā le “nofoālii telē e sinasina”?

² E amata le Pulega mamalu a Iesu i le Afe Tausaga a o fusifusia Satani i le to e lē gata. Ua  oo nei i le “aso” ua fuafuaina e le Atua e “faamasinoina ai le lalolagi ma le tonu, e le tagata ua tofia e ia.” (Galuega 17:31; 2 Peteru 3:8) Ua faalauiloa mai e Ioane: “Na aʻu iloa foʻi le nofoālii tele e sinasina, ma lē o tiʻetiʻe ai, ua sosola ese le lalolagi ma le lagi i ona luma, e lē iloa foʻi se mea e tū ai i laʻua.” (Faaaliga 20:11) O le ā lea “nofoālii telē e sinasina”? E mautinoa o le nofoa faamasino o le “Atua o le faamasino aoao.” (Eperu 12:23) O le a ia faamasinoina tagata po o ai o le a aogā i ai le taulaga togiola a Iesu.​—Mareko 10:45.

3. (a) O le ā ua faaalia mai e le mea moni faapea o le nofoālii o le Atua e “telē” ma “sinasina”? (e) O ai o le a faia le faamasinoga i le Aso Faamasino, ma o le ā e fai ma faavae?

³ E “telē” le nofoālii o le Atua, ua faamamafaina ai le malualii o Ieova i le avea o le Alii Pule Silisili Ese, ma o lona “sinasina,” ua taulaʻi atu ai manatu i lana amiotonu lē ponā. O ia o le Faamasino silisili o tagata. (Salamo 19:7-11; Isaia 33:22; 51:5, 8) Ae peitaʻi, ua ia tuuina iā Iesu Keriso le galuega o le faamasino: “Auā e lē faamasino e le Tamā i se tasi, a ua ia tuu mai i le Atalii.” (Ioane 5:22) O le a galulue faatasi Iesu ma le 144,000, o ē na “tuuina atu foʻi [i ai] le faamasinoga . . . i tausaga e afe.” (Faaaliga 20:4) E ui lava i lea, ae o faatulagaga a Ieova e fua i ai le mea o le a tupu i tagata taʻitoʻatasi i le vaitaimi o le Aso Faamasino.

4. O le ā le uiga o le ʻsosola ese o le lalolagi ma le lagi i ona luma’?

⁴ E faapefea ona “sosola ese le lalolagi ma le lagi”? O le lagi lava lea e tasi na mavae atu e pei o se tusi tāʻai i le tatalaina o le faamaufaailoga lona ono​—o pulega o malo faaletagata ua “taofia mo le afi i le aso e faamasino ai ma fano ai tagata faalēmataʻu.” (Faaaliga 6:14; 2 Peteru 3:7) O le lalolagi, e faasino atu i faatulagaga o meafai i lalo o nei pulega. (Faaaliga 8:7) O le faaumatiaga o le manu feʻai ma tupu o le lalolagi ma a latou vaegaʻau, faatasi ma i latou e mauaina le faailoga o le manu feʻai, ma ē o loo tuuina atu le tapuaʻiga i lona faatagata, ua faailogaina ai le sosola ese o lenei lagi ma le lalolagi. (Faaaliga 19:19-21) Pe a uma ona faaoo mai le sala faafaamasinoga i luga o le lalolagi ma le lagi a Satani, ona poloaʻia loa lea e le Faamasino Sili le isi Aso Faamasino.

Le Aso Faamasino e Afe Tausaga

5. Pe a mavae ona sosola ese le lalolagi tuai ma le lagi tuai, o ai ē o totoe e ao ona faamasinoina?

⁵ O ai o totoe e ao ona faamasinoina pe a mavae ona sosola ese le lalolagi ma le lagi tuai? E lē o le vaega totoe faauuina o le 144, 000, auā ua uma ona faamasinoina i latou nei ma faamaufaailogaina. Afai e mavae Amaketo a o ola pea i le lalolagi nisi o le ʻaufaauuina, e tatau la ona lē umi se taimi e iai ona maliliu loa lea ma faatutūina aʻe ina ia maua lo latou taui faalelagi. (1 Peteru 4:17; Faaaliga 7:2-4) Ae peitaʻi, ua tutū matilatila “i luma o le nofoālii” le faitau miliona o le motu o tagata e toʻatele o ē ua ō mai nei nai le puapuaga tele. Ua uma ona taʻuamiotonuina i latou nei mo le faasaoina ona o lo latou faatuatua i le toto maligi o Iesu. Peitaʻi e tatau ona faaauau atu lo latou faamasinoina i totonu o le afe tausaga a o taʻitaʻia pea e Iesu i latou i “puna o vai ola.” Pe a toe faafoʻisia la i le lelei atoatoa faaletagata ma tofotofoina ai mulimuli ane, ona taʻuamiotonuina ai lea o i latou i se uiga atoatoa. (Faaaliga 7:9, 10, 14, 17) O fanau o ē faasaoina i le puapuaga tele, ma so o se tasi e fanauina e le motu o tagata e toʻatele i le vaitaimi o le Meleniuma, o le a manaʻomia ona faamasinoina i le vaitaimi o le afe tausaga.​—Faatusatusa i le Kenese 1:28; 9:7; 1 Korinito 7:14.

6. (a) O ai le vao tagata ua vaaia e Ioane, ma o le ā ua faaalia mai e upu “o tagatānuu atoa ma alii”? (e) E lē taumatea o le a faapefea ona aumaia le lē mafaitaulia o le faitau miliona o ē o loo manatua e le Atua?

⁶ Ae peitaʻi, ua mātauina e Ioane se vao tagata e sili mamao atu ona toʻatele na i lo le motu o tagata e toʻatele o loo faasaoina. E faitau afe miliona lo latou aofaʻi! “Na aʻu iloa foʻi o ē na oti, o tagatānuu atoa ma alii, o tutū i luma o le Atua, ona fofola lea o tusi.” (Faaaliga 20:12a) “O tagatānuu atoa ma alii” ua aofia ai ē lauiloa faapea ma ē e lē lauiloa tele, o tagata sa soifua ma maliliu i lenei lalolagi i le vaitaimi o le 6,000 tausaga ua mavae. I le Evagelia na tusia e le aposetolo o Ioane ina ua faatoʻā uma ona tusia le Faaaliga, sa fetalai ai Iesu e uiga i le Tamā: “Ua foaʻi mai foʻi iā te ia [Iesu] le pule, ina ia fai e ia le faamasinoga, auā o ia o le Atalii o le tagata.  Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou ō mai ai.” (Ioane 5:27-28) Maʻeu se galuega sili ona mataʻina o le a faia​—le toe faafeiloaʻia o le fia miliona o tagata sa maliliu! E mautinoa o le a auauaʻi mālie ona faatutūina aʻe lenā faitau miliona o loo manatua e le Atua. O le faia faapea e mafai ai e le motu o tagata e toʻatele​—lea e matuā toʻaitiiti lava​—ona taulima ni faafitauli e ono mapuna aʻe, a o mātele ina faaalia e le ʻau toe tutū, olaga tuai na ola ai, faapea ma vaivaiga ma uiga faaalia o le tino lē lelei atoatoa.

O Ai ua Faatutūina ma Faamasinoina?

7, 8. (a) O le ā le tusi tāʻai ua tatalaina, ma o le ā o le a tupu ai mulimuli ane? (e) O ai o le a lē mauaina se toetū?

⁷ Ua faaopoopo mai Ioane: “Ua fofola foʻi ma le tasi tusi, o le tusi lea o le ola; ona faamasinoina ai lea o ē na oti i mea ua tusia i tusi, e tusa ma a latou amio. Ua avaʻe foʻi e le sami ē na oti sa i ai, ua avaʻe foʻi e le oti ma seoli ē na oti sa i ai; e taʻitasi foʻi o i latou ma faamasinoina e tusa ma a latou amio.” (Faaaliga 20:12e, 13) O se vaaiga e matuā faateʻia ai! E taʻitasi le ʻsami, le oti, ma Seoli,’ ma faia se vaega, ae mātau o nei faaupuga e lē o matuā faatatau atu i tagata uma. * A o iai Iona i le manava o le iʻa, ma oo ai ina iai i le loloto o le sami, sa ia tautala faapea ua iai o ia i Seoli. (Iona 2:2) Afai e ono aafia se tagata i le oti mai iā Atamu, ona faapea foʻi lea ona iai o ia i Seoli. Ua aumaia e nei upu faavaloaga le faamautinoaga malosi faapea e leai se tasi o le a faagaloina.

⁸ E mautinoa la, o loo iai se numera e lē mailoa o ē o le a lē toe tutū. O le a iai faatasi ma i latou nei tusiupu ma Faresaio lē salamō o ē na teena Iesu ma le ʻauaposetolo, le “tagata o le agasala” faalotu, ma Kerisiano faauuina o ē “ua paʻuʻū” ese. (2 Tesalonia 2:3; Eperu 6:4-6; Mataio 23:29-33) Sa fetalai foʻi Iesu e uiga i tagata e pei ni ʻoti i le iʻuga o le lalolagi o ē ō atu “i le afi e faavavau, ua saunia mo le tiapolo ma ana agelu,” o lona uiga, “i le sala e faavavau.” (Mataio 25:41, 46) E leai se toetū mo i latou nei!

9. Ua faailoa mai faapefea e le aposetolo o Paulo o le a iai nisi o le a faaalia faapitoa i ai le finagalo malie i le toetū, ma o ai e aofia ai iā i latou nei?

⁹ I le isi itu, o le a iai nisi e faaalia faapitoa i ai le finagalo malie i le toetū. Sa faailoa mai e le aposetolo o Paulo lenei mea ina ua ia faapea mai: “O loo iā te aʻu le faamoemoe i le Atua . . . o le a toe tutū mai ē ua oti, o ē ua amiotonu atoa ma ē ua amiolētonu.” (Galuega 24:15) E tusa ai ma le toetū faalelalolagi, o le a aofia ai i “ē ua amiotonu” tane ma fafine faatuatua o aso anamua​—o Aperaamo, Raava, ma le toʻatele o isi​—o ē na taʻuamiotonuina i sa latou faauōga ma le Atua. (Iakopo 2:21, 23, 25) O le a iai i lea lava vaega e tasi tagata amiotonu o isi mamoe o ē na maliliu ma le faamaoni iā Ieova i ona pō nei. E foliga mai, o le a vave ona toe tutū aʻe i le Pulega Faa-Meleniuma a Iesu tagata uma faapena o ē na tausi i le faamaoni. (Iopu 14:13-15; 27:5; Tanielu 12:13; Eperu 11:35, 39, 40) E mautinoa o le toʻatele o nei tagata faamaoni e toe tutū, o le a tofia i ai ni faaeaga faapitoa i le vaavaaia o le galuega sili ona telē o le toe faafoʻisiaina o le Parataiso.​—Salamo 45:16; faatusatusa i le Isaia 32:1, 16-18; 61:5; 65:21-23.

10. E tusa ai o i latou ia e toe tutū, o ai “ē ua amiolētonu”?

¹⁰ Peitaʻi, o ai “ē ua amiolētonu” ua taʻua i le Galuega 24:15? O le a aofia ai iā i latou nei le anoanoaʻi o tagata ua maliliu i le gasologa mai o talafaasolopito, aemaise i latou na ola i ʻtaimi o le valea.’ (Galuega 17:30) O i latou nei ona o le mea na fananau mai ai po o le vaitaimi na ola ai, sa leai se avanoa latou te aʻoaʻoina ai ina ia usitai i le finagalo o Ieova. E faaopoopo atu i ai, atonu e iai nisi na faalogo i le feʻau o le faaolataga ae e leʻi tali atoatoa mai i lenā taimi pe na maliliu a o latou leʻi agaʻigaʻi i luma i le tuuina atu ma le papatisoga. I le taimi la o le toetū, o le a tatau ai iā i latou ia ona faia ni fetuutuunaʻiga atili i o latou mafaufauga ma gasologa o o latou olaga pe afai latou te fia maua aogā mai lenei avanoa mo le mauaina o le ola e faavavau.

 Le Tusi Tāʻai o le Ola

11. (a) O le ā le ʻtusi o le ola,’ ma o igoa o ai ua faamauina i lenei tusi tāʻai? (e) Aiseā o le a tatalaina ai le tusi tāʻai o le ola i le vaitaimi o le Pulega i le Afe Tausaga?

¹¹ Ua tautala Ioane e uiga i le ʻtusi o le ola.’ O se faamaumauga lenei o i latou o le a mauaina le ola e faavavau mai iā Ieova. Ua uma ona faamauina i lenei tusi tāʻai suafa o uso faauuina o Iesu, le motu o tagata e toʻatele, ma tane faatuatua o aso anamua, e pei o Mose. (Esoto 32:32, 33; Tanielu 12:1; Faaaliga 3:5) E leʻi iai se tasi o “ē ua amiolētonu” ua toe tutū ua iai o latou igoa i le tusi tāʻai o le ola. O le a tatala ai la le tusi tāʻai o le ola i le vaitaimi o le Pulega i le Afe Tausaga ina ia faatagaina ai le tusia o igoa o isi o le a agavaa. O i latou o le a lē tusiaina o latou igoa i le tusi tāʻai, po o le tusi o le ola, e “lafoina lea i le lepa afi.”​—Faaaliga 20:15; faatusatusa i le Eperu 3:19.

12. E faapefea ona filifilia pe tusia le igoa o se tagata i le tusi tāʻai o le ola o le a tatala, ma ua faataatia faapefea e le Faamasino tofia a Ieova le faaaʻoaʻoga?

¹² O le ā la e fua iai le filifilia pe tusia le igoa o se tagata i le tusi tāʻai o le ola o loo tatala i lea taimi? O le vala autū e tutusa lava e pei ona iai i aso o Atamu ma Eva: le usiusitai iā Ieova. E pei ona sa tusi atu le aposetolo o Ioane i uso pele Kerisiano: “O le a mavae atu foʻi le lalolagi, atoa ma ona tuʻinanau, a o lē fai le finagalo o le Atua, e tumau lea e faavavau.” (1 Ioane 2:4-7, 17) E tusa ai ma le mataupu o le usiusitai, ua faataatia ai e le Faamasino tofia a Ieova le faaaʻoaʻoga: “E ui lava o [Iesu] o le Alo, a o mea sa tigā ai o ia na aʻoaʻoina ai o ia ia usiusitai, ua faaatoatoaina foʻi o ia, ona avea ai lea o ia ma tupuga o le ola e faavavau iā i latou uma o ē usiusitai iā te ia.”​—Eperu 5:8, 9.

Le Tatalaina o Isi Tusi Tāʻai

13. E ao faapefea ona faaalia e i latou o ē ua toe tutū lo latou usiusitai, ma o ā taʻiala e ao ona mulimuli ai?

¹³ E ao faapefea ona faaalia e i latou nei ua toe tutū lo latou usiusitai? O Iesu lava na ia faasino atu i poloaʻiga sili e lua, i le fetalai: “E sili lenei, Faalogo mai ia Isaraelu e; o le Alii lo tatou Atua, o le Alii e toʻatasi ia. Ia e alofa foʻi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa. O lona lua o lenei, Ia e alofa atu i lē lua te tuaoi ia pei o oe lava iā te oe.” (Mareko 12:29-31) Ua iai foʻi mataupu silisili po o taʻiala a Ieova ua lelei ona faavaeina, e ao ona latou mulimuli ai, e pei o le teena o le gaoi, le pepelo, le fasioti tagata, ma amioga lē mamā faaleituaiga.​—1 Timoteo 1:8-11; Faaaliga 21:8.

14. O ā isi tusi tāʻai o le a tatalaina, ma o ā mea o loo iai?

¹⁴ Ae peitaʻi, ua faatoʻā uma lava ona taʻua e Ioane isi tusi tāʻai ia o le a tatalaina i le vaitaimi o le Pulega Faa-Meleniuma. (Faaaliga 20:12) O ā ia tusi? E iai taimi ua tuuina mai ai e Ieova faatonuga patino mo ni tulaga faapitoa. Mo se faaaʻoaʻoga, i aso o Mose sa ia saunia ai se faasologa auʻiliʻili o tulafono e faaolaina ai tagata Isaraelu pe afai latou te usiusitai i ai. (Teuteronome 4:40; 32:45-47) I le uluaʻi senituri, sa aumaia ai ni faatonuga fou ina ia fesoasoani ai i ē faatuatua e mulimuli i mataupu silisili a Ieova i le faiga o mea Faa-Kerisiano. (Mataio 28:19, 20; Ioane 13:34; 15:9, 10) Ua lipotia mai nei e Ioane e faapea ua tatau i ē na oti ona “faamasinoina . . . i mea ua tusia i tusi, e tusa ma a latou amio.” Ma le  mautinoa lava la, o le tatalaina o nei tusi tāʻai o le a faasalalauina ai mea manaʻomia a Ieova ua auʻiliʻili mai, mo tagata i le vaitaimi o le afe tausaga. E ala i le faatatauina i o latou olaga o tulafono ma poloaʻiga o loo iai i ia tusi tāʻai, o le a mafai ai e tagata usiusitai ona faafualoaina o latou aso, ma iʻu ina mauaina ai le ola e faavavau.

15. O le ā le ituaiga o galuega tau aʻoaʻoga o le a manaʻomia i le vaitaimi o le toetū, ma e foliga mai o le a faapefea ona faagasolo le toetū?

¹⁵ Maʻeu le telē o se galuega tau aʻoaʻoga faale-Atua o le a manaʻomia ona faia! I le 2005 sa faia ai e Molimau a Ieova i le lalolagi aoao se faatatauga o suʻesuʻega faale-Tusi Paia e silia ma le 6,061,534 i nofoaga eseese. Ae i le  vaitaimi o le toetū, e lē masalomia o le a faia ai ni suʻesuʻega e lē mafaitaulia le faitau miliona, e faavae aʻe i le Tusi Paia ma tusi tāʻai fou! O le a manaʻomia e tagata uma o le Atua ona avea ma faiaʻoga ma ia latou faamalolosi. A o agaʻigaʻi i luma i latou ua toe tutū, e lē taumatea o le a latou auai i lenei polokalame tau aʻoaʻoga e sili ona telē. E foliga mai o le a faagasolo le toetū i se auala ina ia mafai ai e i latou o loo ola ona olioli i le faafeiloaʻia ma le aʻoaʻoina o tagata o aiga ma ē masani na iai muamua, o ē atonu o le a oo mai foʻi lo latou taimi e faafeiloaʻi atu ai ma aʻoaʻoina isi. (Faatusatusa i le 1 Korinito 15:19-28, 58.) O Molimau a Ieova e sili atu i le ono miliona o ē o loo maelega i le faasalalauina o le upu moni i aso nei, ua latou faataatiaina se faavae lelei mo faaeaga o loo latou faamoemoe ia maua i le vaitaimi o le toetū.​—Isaia 50:4; 54:13.

16. (a) O igoa o ai o le a lē tusiaina i le tusi tāʻai, po o le tusi o le ola? (e) O ai i latou o le a faamaonia lo latou toetū “i le ola”?

¹⁶ E tusa ai ma le toetū faalelalolagi, sa fetalai Iesu faapea “o ē na amio lelei, e toe tutū i le ola; a o ē na amio leaga, e toe tutū i le faasala.” I inei, e eseese le “ola” ma le “faasala,” o loo faaalia ai faapea o i latou e toe tutū o ē “na amio leaga” pe afai ua uma ona aʻoaʻoina i le Tusi Paia faagaeeina ma tusi tāʻai, e faamasinoina ua lē tatau i ai le ola. O le a lē tusiaina o latou igoa i le tusi tāʻai, po o le tusi o le ola. (Ioane 5:29) O le a moni foʻi lenei mea mo so o se tasi sa mulimuli atu muamua i se ala faamaoni ae ona o nisi o māfuaaga ua toe liliu ese ai i le vaitaimi o le Pulega i le Afe Tausaga. E mafai ona toe soloiesea igoa. (Esoto 32:32, 33) Ae i le isi itu, o i latou o ē mulimuli ma le usiusitai i mea o tusia i tusi tāʻai o le a mau o latou igoa i le faamaumauga tusitusia, le tusi tāʻai o le ola, ma faaauau ai ona ola. O le a faamaonia mo i latou na le toetū “i le ola.”

Le Iʻuga o le Oti ma Seoli

17. (a) O le ā le gaoioiga ofoofogia ua faamatalaina e Ioane? (e) O afea e faagaogaoina ai Seoli? (i) O afea o le a ʻlafo ai i le lepa afi’ le oti na tuufaasolo mai iā Atamu?

¹⁷ Ua sosoo ai ma le faamatalaina e Ioane o se mea e ofoofogia moni lava! “Ua lafoina foʻi le oti ma seoli i le lepa afi; o le oti faalua lea, o le lepa afi lea. Ai se tasi ua iloa ua lē tusia i le tusi o le ola, ua lafoina lea i le lepa afi.” (Faaaliga 20:14, 15) E oo atu i le iʻuga o le Aso Faamasino i le meleniuma, ua matuā aveesea atoatoa lava “le oti ma seoli.” Aiseā ua aofia ai i lenei mea se afe tausaga? E faagaogaoina Seoli, le tuugamau o tagata uma, pe a toe faatūina le tagata mulimuli lava o loo manatua e le Atua. Peitaʻi, afai o loo iai pea se tagata o loo pisipisia i le agasala tuufaasolo, lona uiga o loo iai pea iā i latou le oti tuufaasolo mai iā Atamu. O i latou uma e toe tutū aʻe i le lalolagi, faapea le motu o tagata e toʻatele e faasaoolaina iā Amaketo, o le a manaʻomia ona latou usiusitai i mea o loo tusia i tusi tāʻai, seʻia oo ina faaaogā atoatoa aogā o le togiola a Iesu, i le aveesea o maʻi, le tagata matua, ma isi maʻi o le tino na tuufaasolo mai. Ona ʻlafo loa lea i le lepa afi’ le oti na tuufaasolo mai iā Atamu, faapea foʻi ma Seoli. O le a mou atu e faavavau!

18. (a) Ua faapefea ona faamatala e Paulo le taulau o le pule a Iesu i le avea o se Tupu? (e) O le ā e faia e Iesu i le aiga o tagata ua lelei atoatoa? (i) O ā isi mea e tutupu i le iʻuga o le afe tausaga?

¹⁸ O inei o le a faaiʻuina ai le polokalame ua faamatalaina e le aposetolo o Paulo i lana tusi i Korinito e faapea: “Auā e tatau ona pule [Iesu], seʻia tuuina e ia ona fili uma lava i lalo o ona vae. O le toe fili e faaumatia, o le oti [tuufaasolo mai iā Atamu] lea.” O le ā e sosoo mai ai? “Pe a uma foʻi ona tuuina i lalo iā te ia o mea uma, ona tuuina i lalo foʻi lea o le Alo lava i lē na tuuina i lalo iā te ia o mea uma.” I se isi faaupuga, e “tuuina atu ai e [Iesu] le malo i le Atua, o le Tamā lea.” (1 Korinito 15:24-28) Ioe, i le manumalo o Iesu i le oti na tuufaasolo mai iā Atamu, e ala i le aogā o lana taulaga togiola, o le a ia tuuina atu ai le aiga faaletagata ua lelei atoatoa i lona Tamā, o Ieova. E aliali mai o le taimi lea, i le iʻuga o le afe tausaga, e tatalaina mai ai Satani ma faataunuuina le tofotofoga faaiʻu, ina ia iloa ai po o ai igoa o le a tumau ai pea ona faamauina i le tusi tāʻai o le ola. “Ia outou finafinau” ina ia mafai ona iai o outou igoa faatasi ma i latou!​—Luka 13:24; Faaaliga 20:5.

[Faaopoopoga i lalo]

[Fesili mo le Suʻesuʻega]

[Ata i le itulau 298]

E mafai foʻi ona tusia i le tusi tāʻai o le ola igoa o “ē ua amiolētonu” ua toe tutū, o ē usiusitai i tusi tāʻai e tatalaina i le taimi o le Pulega o le Afe Tausaga