Mataupu 22

Le Auē Muamua​—Sē Akerise

1. O ai e mulimuli mai ai pe a uma le iliga e agelu o pu, ma o le ā e faasilasilaina e le iliga o le pu lona lima?

UA SAUNI le agelu lona lima e ili lana pu. Ua uma ona ili i le lagi pu e fā, ma e fā mala ua uma ona taulaʻi atu i lona tolu o vaega o le lalolagi lea e finagalo Ieova ua sili ona tuuaʻia​—o lotu ua liliu ese mai le Faa-Kerisiano moni. Ua faaalialia lona tulaga leaga ua tatau ai le oti. A o faaleoina e agelu iliga o pu, e mulimuli mai ai faalauiloaga a tagata i le lalolagi. O lea o le a faasilasila mai e le pu a le agelu lona lima le uluaʻi auē, ma e sili atu ona mataʻu ai na i lo mea na tutupu muamua atu. E fesootaʻi ma se mala o sē akerise e gatete tele ai. Peitaʻi, muamua, seʻi o tatou iloiloina isi mau ia o le a fesoasoani ia i tatou e malamalama lelei ai i lenei mala.

2. O le ā le tusi o le Tusi Paia ua faamatalaina ai se mala o sē akerise e talitutusa ma sē akerise ua vaaia e Ioane, ma o ā aafiaga o lenā mea sa iai i Isaraelu anamua?

² Ua faamatalaina e le tusi o Ioelu, na tusia i le senituri lona iva T.L.M., se mala o meaola laiti, e aofia ai sē akerise, e talitutusa ma sē akerise ua vaaia e Ioane. (Ioelu 2:1-11, 25) * Sa faapogaia ai le matuā lē nofo lelei mo Isaraelu na fulitua i le tapuaʻiga moni ae na iʻu ai foʻi i le salamō o tagata Iutaia ma toe finagalo malie i ai Ieova. (Ioelu 2:6, 12-14) Pe a oo mai lea taimi, o le a liligi ifo e Ieova lona agaga i luga o “tagata uma,” ae o le a muamua atu faailoga e mataʻu ai ma mea ofoofogia e atuatuvale ai a o leʻi ʻoo i le aso tele ma le silisili o Ieova.’​—Ioelu 2:11, 28-32.

Se Mala i le Uluaʻi Senituri

3, 4. (a) O anafea na iai se faataunuuga o le Ioelu mataupu e 2, ma sa faapefea ona faataunuu? (e) Sa faapefea ona iai se mala e pei o le lolofi ane o sē akerise i le uluaʻi senituri T.A., ma o le ā le umi sa faaauau ai le faamalaiaina?

³ Sa iai se faataunuuga o le Ioelu mataupu e 2 i le uluaʻi senituri. I le Penetekoso 33 T.A., na liligi ifo ai le agaga paia, e faauuina ai uluaʻi Kerisiano ma faamalosia ai i latou ina ia tautatala i “vavega o le Atua” i gagana e tele. O le iʻuga, sa faapotopoto ai se motu o tagata e toʻatele. Sa talanoa atu le aposetolo o Peteru i na tagata na matamata ane ma le maofa tele, ma sii atu le Ioelu 2:28, 29 ma faamalamalama atu o lea ua latou molimauina lona faataunuuga. (Galuega 2:1-21) Ae e leʻi iai se tala faamaumau o se mala o ni meaola laiti na tupu moni i lea taimi, lea na pogai ai le lē nofo lelei o nisi ma taʻitaʻiina ai isi e salamō.

⁴ Pe sa iai ea se mala faafaatusa i na aso? Ioe, sa iai! Na tupu ona o le talaʻiga lē mataofia a Kerisiano ia na faatoʻā uma lava ona faauuina. * E ala iā i latou, na valaaulia ai e Ieova tagata Iutaia o ē na faalogo, ina ia salamō ma olioli i faamanuiaga mai iā te ia. (Galuega 2:38-40; 3:19) Sa maua e tagata o ē na tali mai lona finagalo malie i se tulaga matuā mataʻina lava. Ae iā i latou o ē na teena le valaaulia, sa pei Kerisiano i le uluaʻi senituri o le lolofi ane o sē akerise e faatamaʻia ai. E amata atu i Ierusalema, sa latou oo i Iutaia uma ma Samaria. E leʻi umi ae ua latou oo atu i vaipanoa uma, sa latou faapuapuagatia tagata Iutaia lē talitonu, e ala i le faalauiloaina faalauaʻitele  o le toetū o Iesu, ma mea uma o loo aofia ai. (Galuega 1:8; 4:18-20; 5:17-21, 28, 29, 40-42; 17:5, 6; 21:27-30) Sa faaauau lea faamalaiaina seʻia oo i le “aso tele ma le silisili” i le 70 T.A., ina ua aumaia e Ieova ʻautau a Roma e faaumatia Ierusalema. Sa faasaoina na o Kerisiano o ē na valaau i le suafa o Ieova ona o le faatuatua.​—Ioelu 2:32; Galuega 2:20, 21; Faataoto 18:10.

Le Mala o Sē Akerise i Aso Nei

5. Ua faapefea ona iai se faataunuuga o le valoaga a Ioelu talu mai le 1919?

⁵ E matuā talafeagai lava ona tatou faatalitalia le valoaga a Ioelu ia iai sona faataunuuga faaiʻu i le taimi o le iʻuga. Ma ua faamaonia le moni o lenei mea! I le tauaofiaga a Tagata Aʻoga o le Tusi Paia i Cedar Point, Ohio, i le Iunaite Setete o Amerika, iā Setema 1-8, 1919, sa matilatila le liligiina ifo o le agaga o Ieova ma faagaoioia ai ona tagata ina ia faamaopoopoina se talaʻiga i le lalolagi aoao. Mai ē uma na fai mai o latou o Kerisiano, na o Tagata Aʻoga lava o le Tusi Paia na latou iloa ua afio Iesu o se Tupu i le lagi, sa latou faia mea uma e faalauiloa atu ai i tagata uma lenā tala lelei. Sa avea la latou molimau atu ma le lē mataofia, o se mala e faapuapuagatia ai lotu ua liliu ese mai le Faa-Kerisiano moni i le faataunuuina ai o le valoaga.​—Mataio 24:3-8, 14; Galuega 1:8.

6. (a) O le ā na vaaia e Ioane ina ua ili e le agelu lona lima lana pu? (e) O ai ua faaatagia mai e lenei “fetu,” ma aiseā?

⁶ O loo faamatala mai foʻi lenā mala i le Faaaliga, lea na tusia i le 26 tausaga ina ua mavae le faaumatiaga o Ierusalema. O le ā ua ia faaopoopoina atu i le faamatalaga a Ioelu? Seʻi o tatou tilofaʻia le tala faamaumau e pei ona sa lipotia mai e Ioane: “Ua ili foʻi e lona toʻalima o agelu le pu, ona ou iloa ai lea o le fetu na paʻū nai le lagi i le lalolagi; ua tuuina atu foʻi iā te ia le ki o le to e lē gata.” (Faaaliga 9:1) O le “fetu” lenei e ese mai le fetu i le Faaaliga 8:10, lea na vaaia e Ioane ina ua paʻū. O loo ia vaaia se “fetu ua paʻū nai le lagi” ma ua iai nei se tofiga mo ia agaʻi mai i lenei lalolagi. Pe o se agaga ea lenei po o se tagata? O lē o loo uuina lenei “ki o le to e lē gata” ua faamatalaina mulimuli mai faapea o loo ia lafoina Satani i le “to e lē gata.” (Faaaliga 20:1-3) E foliga mai la o ia o se agaga e malosi tele. I le Faaaliga 9:11, ua taʻu mai ai e Ioane iā i tatou e faapea, o sē akerise e iai so latou “tupu, o le agelu lea o le to e lē gata.” E ao ona toʻatasi lē o loo faasino atu i ai nei fuaitau uma e lua, talu ai o le agelu o loo uuina le ki o le to e lē gata, o le mea moni lava, o le agelu foʻi lea o le to e lē gata. Ma e ao i le fetu ona faaatagia ai le Tupu tofia a Ieova, talu ai ua faailoaina e Kerisiano faauuina, e na o le toʻatasi le agelu e avea ma Tupu, o Iesu Keriso lea.​—Kolose 1:13; 1 Korinito 15:25.

7. (a) O le ā e tupu pe a tatalaina le “to e lē gata”? (e) O le ā le “to e lē gata,” ma o ai na faaaluina ai sina taimi puupuu i inā?

⁷ Ua faaauau le tala: “Ua tatala foʻi e ia le to e lē gata; ona alu aʻe ai lea o le asu ai le to e pei o le asu o se umu tele, ua faapouliuligia ai le lā ma le lagi ona o le asu o le to. Ua ō atu foʻi sē akerise nai le asu i luga o le laueleele; ua tuuina atu iā te i latou le malosi e pei o le malosi o akarava o le vao.” (Faaaliga 9:2, 3) E tusa ai o le Tusi Paia, o le “to e lē gata” o se nofoaga e leai ni gaoioiga e fai ai, e tusa ua oti. (Faatusatusa i le Roma 10:7; Faaaliga 17:8; 20:1, 3.) Sa faaaluina e le vaega toʻaitiiti o uso o Iesu se taimi puupuu i se “to e lē gata,” o le toetoe lava a lē gaoioi, i le iʻuga o le Taua Muamua a le Lalolagi (1918-1919). Ae ina ua liligiina ifo e Ieova lona agaga i luga o ana auauna ua salamō i le 1919, sa latou lolofi atu loa e faafetaui le luʻi o le galuega lea ua taatia mai i luma.

8. E faapefea i le tatalaina o sē akerise ona ō mai faatasi ma se “asu” tele?

⁸ Ua mātau atu e Ioane, e ō mai faatasi le tatalaina o sē akerise ma se asu tele, e pei “o le asu  o se umu tele.” * Na faamaonia le faia faapena i le 1919. Sa atili faapouliuliina le tulaga mo lotu ua liliu ese mai le Faa-Kerisiano moni ma le lalolagi lautele. (Faatusatusa i le Ioelu 2:30, 31.) O le tatalaina o na sē akerise, le vasega e pei o Ioane, sa avea moni o se toʻilalo mo taʻitaʻi o lotu ua liliu ese mai le upu moni, o ē na faatogafitia ma fuafua e taofia le galuega o le Malo ma ua latou teena nei foʻi le Malo o le Atua. Sa amata ona tulaʻi mai tulaga e pei o se asu i luga o lotu ua liliu ese mai le upu moni, ina ua tuuina atu i le ʻau o sē akerise le pule mai le Atua ma amata ona faatinoina lea pule i le faalauiloaina mai o feʻau malolosi o sala faafaamasinoga. Sa faapouliuligia le “lā” a lotu ua liliu ese mai le Faa-Kerisiano moni​—po o lona foliga mai ua faamalamalamaina​—​ua lē susulu mai, ma na oo ina mafiafia le “va nimonimo” i faalauiloaga o le faamasinoga a le Atua a o faaalia “le taʻitaʻi o le ʻau faipule i le va nimonimo” o lenei lalolagi o le atua lea o lotu ua liliu ese mai le Faa-Kerisiano moni.​—Efeso 2:2; Ioane 12:31; 1 Ioane 5:19.

Na Sē Akerise e Faapuapuagatia Ai!

9. O ā faatonuga o le taua na avatu i sē akerise?

⁹ O ā faatonuga o le taua sa avatu i na sē akerise? Ua lipotia mai e Ioane: “Ua fai atu foʻi iā te i latou, aua neʻi latou faaleaga i vao iti o le fanua, po o se mea lauolaola e tasi, po o se laau e tasi; tau lava o tagata ua lē i ai i o latou muaulu le faamaufaailoga a le Atua. Ua tuuina atu iā te i latou aua neʻi fasiotia i latou, tau lava ina faatigāina i masina e lima; o latou tigā foʻi e pei o le tigā o le tagata pe a tuia e le akarava. O ona pō ia e saʻili ai e tagata le oti, a e latou te lē maua; e naunau foʻi i latou ina ia oti, a e sola ese le oti iā te i latou.”​—Faaaliga 9:4-6.

10. (a) O ai ua taulaʻi muamua lava i ai le mala, ma o ā āuga na iai iā i latou? (e) O le ā le ituaiga o faatigāina po o le faapuapuagatiaina ua aafia ai? (Tagaʻi foʻi i le faamatalaga faaopoopo i le pito i lalo.)

¹⁰ Mātau e lē o taulaʻi atu muamua lenei mala i tagata po o ē taualoa i totonu o i latou lava​—ʻvao iti ma laau o le lalolagi.’ (Faatusatusa i le Faaaliga 8:7.) E faaleagaina e sē akerise na o tagata e lē o iai le faamaufaailoga a le Atua i o latou muaulu. O i latou o i lotu ua liliu ese mai le upu moni o ē faapea mai ua faamaufaailogaina, ae ua taʻu pepeloina e lo latou talaaga lenā manatu. (Efeso 1:13, 14) O le mea lea, o faamatalaga  e faapuapuagatiaina ai a nei sē akerise i ona pō nei sa taulaʻi muamua atu lava i faifeʻau o lotu ua liliu ese mai le upu moni. Sa matuā faapuapuagatia ai lava nei tagata talitonu iā i latou lava i le faalogo atu ua faasilasila mai faalauaʻitele, e lē gata ua latou lē taulau ona taʻitaʻia a latou lafu i le lagi, ae latou te lē oo atu foʻi i latou lava i inā! * O le mea tonu lea e taʻu ʻua taʻitaʻi e le tauaso le isi tauaso’!​—Mataio 15:14.

11. (a) O le ā le umi ua faatagaina sē akerise e faapuapuagaina ai fili o le Atua, ma aiseā e lē o se taimi puupuu moni ai lenā taimi? (e) O le ā le ogaoga o le faapuapuagaina?

¹¹ E lima masina le umi o le faapuapuagaina. Pe o se taimi puupuu ea lea? E leai, pe a fua i le tulaga o sē akerise moni. O le lima masina e tusa lenā o le umi o le olaga masani o se tasi o nei iniseti laiti. O lona uiga, o le umi lava latou te ola ai, o le a tui ai pea e sē akerise i ona pō nei fili o le Atua. E lē gata i lea, e matuā ogaoga le faapuapuagaina, o le pogai lea ua sili ai i tagata pe a feoti. E moni, e leai ni faamaumauga faapea sa taumafai moni se tasi o i latou na tui e sē akerise ina ia fasiotia i latou lava. Ae ua fesoasoani le faaupuga e faaata ai i o tatou manatu le ogaoga o le faapuapuagaina​—e pei lava ua osofaʻia pea lava pea e akarava. Ua pei o le pagatia na valoia e Ieremia mo na Isaraelu lē faamaoni o ē na faataapeapeina e ʻaumanumalo a Papelonia ma o ē na manatu e sili ai le oti na i lo le ola.​—Ieremia 8:3; tagaʻi foʻi i le Failauga 4:2, 3.

12. Aiseā ua tuuina atu ai i sē akerise e faapuapuagatia taʻitaʻi o lotu ua liliu ese mai le upu moni i se uiga faaleagaga, ae e lē fasiotia i latou?

¹² Aiseā ua tuuina atu ai e faapuapuagatia i latou nei i se uiga faaleagaga, ae lē fasiotia i latou? O lenei mea o se auē amata i le faaalialiaina o pepelo a lotu sesē ma ona lē taulau, ae mulimuli ane, a o faagasolo le aso o le Alii, o le a faatoʻā faalauiloa atoatoa ai lona tulaga faaleagaga e pei ua oti. O le a fasiotia se tasi vae tolu o tagata i le vaitaimi o le auē lona lua.​—Faaaliga 1:10; 9:12, 18; 11:14.

Ua Faaauupegaina Sē Akerise mo le Taua

13. O ā foliga o sē akerise?

¹³ E mataʻina foliga o na sē akerise! Ua faamatala mai e Ioane e faapea: “O sē akerise foʻi ua tino mai e pei o solofanua ua saunia i le taua; o latou ulu foʻi ua peiseaʻī ua i ai palealii e pei o auro, ma o latou mata e pei o mata o tagata; ua iā te i latou foʻi lauulu e pei o lauulu o fafine, ma o latou nifo e pei o nifo o leona; ua iā te i latou foʻi ufifatafata e pei o ufifatafata uʻamea; ua palalū foʻi o latou apaʻau e pei o le taalili o kariota ma solofanua e tele pe a taufetuli e tau.”​—Faaaliga 9:7-9.

14. Aiseā sa fetaui lelei ai le faamatalaga a Ioane e uiga i sē akerise ma le vaega o Kerisiano na toe faaolaolaina i le 1919?

¹⁴ Ua faataʻitaʻia lelei mai e lenei mea le vaega  faamaoni o Kerisiano sa toe faaolaolaina i le 1919. I le pei o ni solofanua, sa latou sauni mo le taua, ua naunau e tau mo le upu moni i le auala e pei ona faamatala mai e le aposetolo o Paulo. (Efeso 6:11-13; 2 Korinito 10:4) Ua vaaia e Ioane i luga o o latou ulu mea e foliga mai o ni palealii auro. E lē tatau ona iai ni o latou palealii moni auā e lē amataina la latou pulega a o iai pea i le lalolagi. (1 Korinito 4:8; Faaaliga 20:4) Ae i le 1919 na latou oo ai i se tulaga tautupu. Ua avea i latou o uso o le Tupu, ma afai e faaauau ona faamaoni seʻia oo i le iʻuga, ua teuina o latou palealii i le lagi mo i latou.​—2 Timoteo 4:8; 1 Peteru 5:4.

15. O le ā ua faaatagiaina mai e le (a) ufifatafata uʻamea? (e) o mata e pei o mata o le tagata? (i) o lauulu e pei o lauulu o se fafine? (o) o nifo e pei o nifo o se leona? (u) le faatupuina o se pisapisaō tele?

¹⁵ I le vaaiga, e iai ufifatafata uʻamea o sē akerise, ua faaatagia ai le amiotonu lē motusia. (Efeso 6:14-18) Ua iā i latou foʻi mata e pei o mata o le tagata, o lenei vala e faasino i le uiga o le alofa, talu ai sa faia le tagata i le faatusa o le Atua, o lē e alofa. (Kenese 1:26; 1 Ioane 4:16) E uumi o latou lauulu e pei o lauulu o se fafine, ua faaataina mai ai le gauaʻi atu i lo latou Tupu, le agelu o le to e lē gata. Ma ua pei o latou nifo o nifo o se leona. E faaaogā e se leona ona nifo e saeia ai aano o manu. Mai le 1919 ma faasolo mai ai, ua toe mafai ai e le vasega e pei o Ioane ona taumafa mea aano faaleagaga, aemaise lava upu moni e uiga i le puleaina o le Malo o le Atua e le “Leona o le itu aiga o Iuta,” o Iesu Keriso. E pei lava ona faaatagia mai e le leona le lototele, o lea ua manaʻomia ai le matuā lototele ina ia taliaina ai lenei feʻau malosi, ina ia aumaia ai i lumāmea i lomiga, ma ina ia tufatufaina ai atili i le lalolagi atoa. Ua faatupuina e na sē akerise faafaatusa se pisapisaō tele, e pei “o le taalili o kariota ma solofanua e tele pe a taufetuli e tau.” Latou te lē o mafaufau e fifilemu, ae ua mulimuli atu i le faaaʻoaʻoga a Kerisiano i le uluaʻi senituri.​—1 Korinito 11:7-15; Faaaliga 5:5.

16. O le ā le uiga tāua i le iai i sē akerise o ʻiʻu ma tui e pei o akarava’?

¹⁶ O lenei talaʻiga e sili atu mea e aofia ai na i lo upu e tautala atu! “Ua iā te i latou o iʻu e pei o iʻu o akarava, ua i ai foʻi tui i o latou iʻu; ma ua iā te i latou le malosi e faaleaga ai tagata i masina e lima.” (Faaaliga 9:10) O le ā e mafai ona uiga i ai lenei mea? A o auai Molimau a Ieova i le galuega o le Malo, latou te talanoa atu ma faaaogā lomiga e taʻu atu ai faamatalaga maufaatuatuaina e faavae mai le Afioga a le Atua. O la latou feʻau e pei o tui o le akarava auā latou te lapataʻi atu le aso o le taui ma sui a Ieova ua taulata mai. (Isaia 61:2) A o leʻi faaiʻuina le soifuaga o sē akerise faaleagaga i le taimi e māeʻa ai, o le a faaumaina la latou galuega na tofia mai e le Atua o le faalauiloaina lea o sala faafaamasinoga a Ieova​—o le a matuā tigā ai tagata upuvale uma o ē faaua maaa.

17. (a) O le ā sa faasilasilaina i le tauaofiaga a Tagata Aʻoga o le Tusi Paia i le 1919 lea na matuā ogaoga ai le tui o la latou molimau atu? (e) Ua faapuapuagatia faapefea taʻitaʻi lotu, ma sa latou gaoioi faapefea e tali atu ai?

¹⁷ Sa matuā faafiafiaina na sē akerise ina ua faasilasilaina i la latou tauaofiaga i le 1919 se mekasini fou, The Golden Age. O se mekasini sa taʻilua vaiaso ma maua, na fuafua ia matuā ogaoga ai le tui o la latou molimau atu. * Sa faaalialia e lona lomiga Nu. 27, o Setema 29, i le 1920,  le faagutugutulua o taʻitaʻi lotu i le sauāina o Tagata Aʻoga o le Tusi Paia i le Iunaite Setete i le vaitaimi o le 1918 e oo i le 1919. I tausaga e amata mai le 1920 ma le 1930 ma faasolo mai ai, sa faapuapuagatia atili ai e le Golden Age taʻitaʻi lotu i ni mataupu matuitui ma ni ata na faaalialia ai a latou gaoioiga faagutugutulua faatogafiti i faiga faapolotiki, aemaise lava maliega a faifeʻau Katoliko na faia ma taʻitaʻi tautalatasi a le Fasi (Fascist) ma le Nasi. I le tali atu, sa faia e taʻitaʻi lotu ni ʻfaufauga leaga e ala i le tulafono,’ ma na faamaopoopoina ai sauāga i tagata o le Atua.​—Salamo 94:20, King James Version.

Faailoa Atu i Taʻitaʻi o le Lalolagi

18. O le ā le galuega sa tatau ona faia e sē akerise, ma o le ā sa tupu e tali atu ai i le iliga o le pu lona lima?

¹⁸ Sa iai se galuega a sē akerise i ona pō nei e ao ona faia. Sa tatau ona talaʻia le tala lelei o le Malo. Sa tatau ona faaalialia i lumāmea mea sesē. Sa tatau ona saʻilia mamoe ua leiloloa. A o faia e sē akerise nei galuega, sa oo ina amata ai ona uaʻi mai le lalolagi. I le usiusitai i le iliga e le agelu o le pu, ua faaauau ona faaalialia i lumāmea e le vasega e pei o Ioane le tatau ona avatu i lotu sesē sala faafaamasinoga a Ieova. I le tali atu i le pu lona lima, sa faamamafaina ai se vala faapitoa o nei sala faafaamasinoga i se tauaofiaga a Tagata Aʻoga o le Tusi Paia i Lonetona, i Egelani, iā Me 25-31, 1926. Sa faamatilatila ai i lenei tauaofiaga se iʻugāfono e faapea, “O se Mau i Pule o le Lalolagi,” ma se lauga i le lautele i le Royal Albert Hall e faapea “Le Pogai ua Tautevateva ai Malo Malolosi o le Lalolagi​—Le Vaifofō,” sa lomiaina le faamatalaga atoa o nei mea uma i se nusipepa taʻutaʻua a Lonetona i le aso na sosoo ai. Mulimuli ane, sa tufatufa ai e le ʻau o sē akerise i le lalolagi aoao e ala i se sāvali, kopi e 50 miliona o lenā iʻugāfono​—sa matuā faapuapuagatia ai taʻitaʻi lotu! I tausaga mulimuli ane, sa tautatala pea tagata o Egelani e uiga i lenei faaalialia matuitui.

19. O le ā le isi auupega e tau ai sa maua e sē akerise faafaatusa, ma o le ā sa taʻua ai e uiga i manatu tusitusia i Lonetona?

¹⁹ Sa mauaina e sē akerise faafaatusa i lenei tauaofiaga se isi auupega e tau ai, ua mātauina o se tusi fou na faaulutalaina Deliverance. Sa aofia ai se talanoaga e faavae i le Tusi Paia o le faailoga e faamaonia ai o le faiga malo lea na faaata mai i se “tama tane,” le Malo o Keriso i le lagi, na fanau mai i le 1914. (Mataio 24:3-14; Faaaliga 12:1-10) Na sosoo ai ma le sii mai o manatu tusitusia na lomia i Lonetona i le 1917 ma sainia e taʻitaʻi lotu e toʻavalu, o ē na taʻua faapea “e aofia i faifeʻau e sili ona lauiloa i le lalolagi.” Sa fai i latou ma sui o lotu Porotesano o loo taʻimua​—o le lotu Papatiso, Faapotopotoga Kerisiano, Perepereane, Episcopalian, ma le Metotisi. Na faalauiloaina e lenei manatu tusitusia e faapea “ua faasino puapuaga o loo iai nei i le latalata mai o le iʻuga o taimi o Nuu Ese” ma e faapea, “e mafai ona faatalitalia le faaalia mai o le Alii i so o se taimi lava.” Ioe, na mātaulia e na taʻitaʻi lotu le faailoga o le faatasi mai o Iesu! Ae pe sa latou mananaʻo ea e gaoioi e tusa ai? Ua logoina mai e le tusi Deliverance iā i tatou e faapea: “O le vaega pito sili ona iloga o le  mataupu, ona o tagata lava ia na sainia manatu tusitusia, o i latou foʻi na sa mumusu ma latou teena le faamaoniga e faamaonia ai, o loo tatou iai i le iʻuga o le lalolagi ma i le aso o le faatasi faalua mai o le Alii.”

20. (a) O le ā le filifiliga ua faia e taʻitaʻi lotu e tusa ai ma le ʻau o sē akerise ma lo latou Tupu? (e) O ai ua fai mai Ioane o loo pule i le ʻau o sē akerise, ma o ai lona suafa?

²⁰ Na i lo le faasilasilaina atu o le Malo o le Atua o loo agaʻi mai, ae ua filifili taʻitaʻi o lotu ua liliu ese mai le upu moni ina ia latou tutumau i le lalolagi a Satani. Latou te lē o mananaʻo e fai sa latou vaega i le ʻau o sē akerise ma lo latou Tupu, i latou ia ua iloa atu nei e Ioane e faapea: “Ua iā te i latou foʻi le tupu, o le agelu lea o le to e lē gata; o lona igoa i le gagana Eperu o Avatonu [o lona uiga “Faaumatiaga”], a o lona igoa i le gagana Eleni o Apoluonu [o lona uiga o “Lē e Faaumatiaina”].” (Faaaliga 9:11) I le avea ai ma “agelu o le to e lē gata” ma o “Lē e Faaumatiaina,” ua tatala moni ai e Iesu se auē faamalaiaina i luga o lotu sesē. Ae peitaʻi e iai ma nisi mea o loo mulimuli mai!

[Faaopoopoga i lalo]

[Fesili mo le Suʻesuʻega]

[Ata i le itulau 143]

Ua faailoa mai e le iliina o le pu lona lima le uluaʻi auē o auē e tolu

[Ata i le itulau 146]

E maamaʻai ū fanafana i loto o fili o le Tupu. (Salamo 45:5) I le aliali faatasi mai ma lenei faamatalaga, o le ata i luga e faapena uma le tele o ata komi sa faasalalauina i tausaga e amata mai i le 1930 faasolo mai ai, ia na tuiina ai na “tagata ua lē i ai i o latou muaulu le faamaufaailoga a le Atua”

[Ata i le itulau 147]

Le Royal Albert Hall, sa tatalaina ai le tusi Deliverance ma sa taliaina ai le iʻugāfono “O se Mau i Pule o le Lalolagi”