Mataupu 19

Le Faamaufaailogaina o le Isaraelu a le Atua

Vaaiga 4​—Faaaliga 7:1-17

Mataupu: Ua faamaufaailogaina le 144,000, ma ua mātauina se motu o tagata e toʻatele o loo tutū i luma o le nofoālii o Ieova ma luma o le Tamaʻi Mamoe

Taimi o le faataunuuga: Mai le taimi na avea ai Keriso Iesu ma Tupu i le 1914 seʻia oo atu i totonu o lana Pulega Faa-Meleniuma

1. ʻO ai sē na te mafaia ona tū atu’ i le aso tele o le toʻasā o le Atua?

“O AI foʻi sē na te mafaia ona tū atu?” (Faaaliga 6:17) Ioe, o ai na te mafaia? Pe a faatafunaina i le aso tele o le toʻasā o le Atua le lalolagi a Satani, atonu o le fesili lenā o le a fesili ai taʻitaʻi ma tagata o le lalolagi. I lo latou manatu e foliga o le mala o loo faaloloʻi mai o le a faaumatia uma ai tagata ola. Ae pe o le tulaga lenā o le a iai? E fiafia ona ua faamautinoa mai iā i tatou e le perofeta a le Atua: “E iʻu foʻi ina faaolaina o i latou uma lava o ē valaau atu i le suafa o Ieova.” (Ioelu 2:32) Ua faamautinoa mai e aposetolo o Peteru ma Paulo lenā mea moni. (Galuega 2:19-21; Roma 10:13) Ioe, o i latou uma e valaau i le suafa o Ieova o le a faasaoina. O ai i latou ia? O le a tatou iloa, a o faamatalaina le vaaiga e sosoo mai ai.

2. Aiseā ua mataʻina ai le manatu faapea o le a iai nisi e sao mai le aso o le faasalaga a Ieova?

² E mataʻina le sao mai o se tasi i le aso o le faasalaga a Ieova, auā ua faamatalaina e le isi perofeta a le Atua lea aso i upu nei: “Faauta, ua alu atu le afā mai iā Ieova i le toʻasā, o le afā fulifaō; e pesi tetele mai i luga o ulu o ē amio leaga. E lē toe liliu le toʻasā tele o Ieova, seʻia faia e ia, seʻia faataunuuina foʻi e ia manatu o lona finagalo.” (Ieremia 30:23, 24) Ua tatau nei loa ona tatou faia ni laasaga e sao ai mai lenā afā!​—Faataoto 2:22; Isaia 55:6, 7; Sefanaia 2:2, 3.

O Matagi e Fā

3. (a) O le ā le auaunaga faapitoa ua faia e agelu ua vaaia e Ioane? (e) O le ā ua faaata mai e “matagi e fā”?

³ E faia e agelu se auaunaga faapitoa a o leʻi faaoo mai e Ieova lenei toʻatamaʻi. O le mea lenei ua iloa atu e Ioane i le vaaiga: “Ua mavae atu ia mea, ona aʻu iloa ai lea o agelu e toʻafā o tutū mai i itu e fā o le lalolagi, o taofi i matagi e fā o le lalolagi, ina ia lē agi atu le matagi i le fanua, po o le sami, po o se laau e tasi.” (Faaaliga 7:1) O le ā le uiga o lenei mea mo i tatou i aso nei? O nei “matagi e fā” o se faailoga o le faafaamasinoga mataʻutia lea ua toe o se aga ona faataunuu loa lea i tagata amioleaga uma i le lalolagi, faapea foʻi ma le “sami” sousou o ē solitulafono, ma taʻitaʻi e pei ni laau maualuluga ia e mauaina le lagolagosua ma mea e tausi ai le olaga mai tagata o le lalolagi.​—Isaia 57:20; Salamo 37:35, 36.

4. (a) O le ā ua faaata mai e agelu e toʻafā? (e) O le ā le aafiaga o le a iai i le faalapotopotoga i le lalolagi a Satani pe a tatalaina mai matagi e fā?

 ⁴ E mautinoa, o nei agelu e toʻafā e faaata mai ai vaega e fā ua vaevaeina i ai agelu. O agelu nei ua faaaogāina e Ieova e taofiofia le faaooina mai o le faasalaga seʻia oo i lana taimi atofaina. O le a telē le faatamaʻiaga pe a tatalaina mai e agelu na matagi o le toʻasā o le Atua ina ia taavivili i le taimi e tasi mai mātū, saute, sasaʻe ma sisifo. O le a pei o le faaaogāina e Ieova o matagi e fā e faataapeape ai tagata Elama anamua, i le nutililiiina ma le faaumatiaina ai o i latou, ae o le a sili atu ona mataʻutia le taimi lenei. (Ieremia 49:36-38) O le a avea o se afā telē tele e sili atu ona faatamaʻia ai na i lo le “afā” lea na faatamaʻia ai e Ieova le nuu o Amoni. (Amosa 1:13-15) E leai se vaega o le faalapotopotoga a Satani i le lalolagi o le a mafai ona tū i le aso o le toʻasā o Ieova, pe a ia faamaonia le tonu o lana pule silisili ese e oo i le faavavau.​—Salamo 83:15, 18; Isaia 29:5, 6.

5. E fesoasoani faapefea le valoaga a Ieremia iā i tatou ia malamalama ai, o le a aafia le lalolagi atoa i sala faafaamasinoga a le Atua?

⁵ Pe mafai ea ona tatou mautinoa o le a faaumatia i sala faafaamasinoga a le Atua le lalolagi atoa? Seʻi toe faalogo foʻi i lana perofeta o Ieremia: “Faauta, e alu atu le malaia e afua i le tasi nuu e oo atu i le tasi nuu, e tupu mai le afā tele mai tuluʻiga o le lalolagi. O le fasi a Ieova i lea aso e afua mai i le tasi pito lalolagi e oo atu i le tasi pito lalolagi.” (Ieremia 25:32, 33) O le a ufitia lenei lalolagi e le pogisa i le taimi o lenei afā malosi tele. O le a lūlūina vaega o loo pulea lenei lalolagi seʻia oo ina lē toe iai. (Faaaliga 6:12-14) Peitaʻi o le a lē pogisa le lumanaʻi mo tagata uma. Mo ai la lea e māfua ai ona taofiofia matagi e fā?

Le Faamaufaailogaina o Auauna a le Atua

6. O ai o fai atu i agelu e taofi matagi e fā, ma ua maua ai le taimi e fai ai le ā?

⁶ Ua faamatala mai nei e Ioane pe faapefea ona faailogaina nisi mo le faasaoina: “Ua aʻu iloa foʻi le tasi agelu ua ui aʻe i le mea e alu aʻe ai le lā, ua iā te ia le faamaufaailoga a le Atua soifua; ua alaga ia ma le leo tele i agelu e toʻafā na tuuina atu iā i latou ia faaleaga i le fanua ma le sami, ua faapea atu, ʻAua tou te faaleaga i le fanua, po o le sami, po o laau, seʻia matou faamaufaailogaina auauna a lo tatou Atua i o latou muaulu.’”​—Faaaliga 7:2, 3.

7. O ai moni le agelu lona lima, ma o ā faamaoniga ua fesoasoani iā i tatou e faamautinoa ai o ia?

⁷ E ui ina e leʻi taʻua mai le igoa o lenei agelu lona lima, ae ua faaalia i faamaoniga uma o ia moni lenei o Iesu, le Alii ua faamamaluina. Ina ia ōgatasi ma le mea moni o Iesu o le Agelu Sili, o loo faaalia ai i inei le iai o lana pule i luga o isi agelu. (1 Tesalonia 4:16; Iuta 9) E afio aʻe o ia mai sasaʻe, e pei o “tupu mai nuu e alu aʻe ai le lā”​—o Ieova ma lana Keriso​—o ē afifio mai e faaoo mai sala faafaamasinoga, e pei ona sa faia e tupu o Tariu ma Kuresa ina ua la faatoʻilaloina Papelonia anamua. (Faaaliga 16:12; Isaia 45:1; Ieremia 51:11; Tanielu 5:31) E ala foʻi ona fai atu o le agelu lenei o Iesu, auā ua tuuina atu iā te ia e faamaufaailogaina Kerisiano faauuina. (Efeso 1:13, 14) E lē gata i lea, pe a tatala mai matagi, o Iesu na te taʻitaʻiina ʻau faalelagi i le faaooina o le sala faafaamasinoga i luga o nuu. (Faaaliga 19:11-16) E talafeagai lava la le faapea atu, o Iesu lea e poloaʻi atu ina ia taofia le faaumatiaga o le faalapotopotoga i le lalolagi a Satani seʻia faamaufaailogaina auauna a le Atua.

8. O le ā le faamaufaailogaina, ma na amata anafea?

⁸ O le ā lea faamaufaailogaina, ma o ai nei auauna a le Atua? Na amata le faamaufaailogaina i le Penetekoso 33 T.A. ina ua faauuina uluaʻi Kerisiano Iutaia i le agaga paia. Mulimuli ane, na agaʻi atu le Atua e valaaulia ma faauuina tagata o “nuu ese.” (Roma 3:29; Galuega 2:1-4, 14, 32, 33; 15:14) Sa tusi le aposetolo o Paulo e faatatau i le faatumauina o Kerisiano faauuina “iā Keriso,” ma faaopoopo mai ai e faapea, “ua faamaufaailogaina mai i tatou [e le Atua], ma ua foaʻiina mai le faamaoni [po o le faailo o le mea o le a aumai] o le Agaga i o tatou loto.” (2 Korinito 1:​21, 22; faatusatusa i le Faaaliga 14:1.) O lea, ina ua vaetamaina nei auauna e avea o ni atalii faaleagaga o le Atua, ua latou mauaina ai se faailo e muamua i lo latou tofi faalelagi​—o se faamaufaailoga, po o se  taʻutinoga. (2 Korinito 5:1, 5; Efeso 1:​10, 11) E mafai la ona latou faapea mai: “O loo molimau mai lea lava Agaga i o tatou agaga, o fanau i tatou a le Atua. Afai foʻi o fanau i tatou, o suli foʻi, o suli lava o le Atua, o suli faatasi ma Keriso; pe afai tatou te tigā faatasi ma ia, ina ia faamanuiaina foʻi i tatou faatasi ma ia.”​—Roma 8:15-17.

9. (a) O le ā le tutumau ua manaʻomia e le vaega o loo totoe o atalii o le Atua ua faauuina e lona agaga? (e) E mo le ā le umi o le a tofotofoina ai pea ē faauuina?

⁹ “Pe afai tatou te tigā faatasi ma ia”​—o le ā le uiga o lenā mea? E ao i Kerisiano faauuina ona tutumau faamaoni e oo lava i le oti, ina ia maua ai le pale o le ola. (Faaaliga 2:10) E lē o le faapea a ʻfaaolaina loa, ona faaolaina ai lava lea.’ (Mataio 10:22; Luka 13:24) Na i lo lenā, ua faatonuina i latou: “Ia atili ai ona faamalolosi outou ia faamauina lo outou valaauina ma lo outou filifilia.” I le pei o le aposetolo o Paulo, e ao ona mafai ona latou faapea mai: “Ua ou tau le taua lelei, ua iʻu iā te aʻu le tausinioga, ua ou taofi i le faatuatua.” (2 Peteru 1:10, 11; 2 Timoteo 4:7, 8) O lea la, e ao ona faia pea le tofotofoina ma le faamamāina o ē o totoe o atalii o le Atua i inei i le lalolagi, o ē ua fanauina e lona agaga, seʻia matuā lolomi mau e Iesu ma ana agelu o loo aufaatasi ma ia le faamaufaailoga ʻi muāulu’ o i latou uma nei, e faailoa ai i latou i se auala mautū, e lē toe masuia, e avea o “auauna a lo tatou Atua” ua tofotofoina ma faamaoni. Ona avea loa lea o lenā faamaufaailoga ma faailoga tumau. E foliga mai, e oo atu i le taimi e tatala mai ai matagi e fā o le puapuaga, ua māeʻa le faamaufaailogaina o le Isaraelu faaleagaga uma, e ui o loo ola pea se toʻaitiiti i le tino i lea taimi. (Mataio 24:13; Faaaliga 19:7) Ua atoa le aofaʻi uma o tagata o le vasega!​—Roma 11:25, 26.

E Toʻafia ua Faamaufaailogaina?

10. (a) O ā mau ua iloa ai e tapulaa le numera o ē ua faamaufaailogaina? (e) E toʻafia ē ua faamaufaailogaina, ma ua faapefea ona lisi mai i latou?

¹⁰ Na fetalai atu Iesu ia i latou sa faatalitali mo lenei faamaufaailogaina: “Aua e te fefe oe le lafu mamoe itiiti e; auā ua finagalo lo outou Tamā e foaʻi mai le malo iā te outou.” (Luka 12:32) Ua faasino mai e isi mau, e pei o le Faaaliga 6:11 ma le Roma 11:25 e faapea, o le numera o lenei lafu mamoe itiiti e muta mai, ma o le mea moni, e filifilia muamua. Ua faamautinoa e upu o sosoo mai a Ioane lenei mea: “Na ou faalogo foʻi i le faitau aofaʻi o ē na faamaufaailogaina; e selau afe ma afe e fāgafulu ma afe e fā o ē ua faamaufaailogaina i itu aiga uma o le fanauga a Isaraelu; e sefulu afe ma afe e lua o ē ua faamaufaailogaina i le itu aiga o Iuta; e sefulu afe ma afe e lua mai le itu aiga o  Reupena; e sefulu afe ma afe e lua mai le itu aiga o Kato; e sefulu afe ma afe e lua mai le itu aiga o Asera; e sefulu afe ma afe e lua mai le itu aiga o Nafatali; e sefulu afe ma afe e lua mai le itu aiga o Manase; e sefulu afe ma afe e lua mai le itu aiga o Simeona; e sefulu afe ma afe e lua mai le itu aiga o Levi; e sefulu afe ma afe e lua mai le itu aiga o Isakara; e sefulu afe ma afe e lua mai le itu aiga o Sepulona; e sefulu afe ma afe e lua mai le itu aiga o Iosefa; e sefulu afe ma afe e lua o ē ua faamaufaailogaina i le itu aiga o Peniamina.”​—Faaaliga 7:4-8.

11. (a) Aiseā e lē faatatauina ai ituaiga e 12 i le atunuu o Isaraelu? (e) Aiseā ua lisiina ai e le Faaaliga ituaiga e 12? (i) Aiseā o le a leai ai se ituaiga o le Isaraelu a le Atua e faapitoa i le tulaga tautupu po o le avea ma faitaulaga?

¹¹ Faamata e lē o le atunuu moni o Isaraelu, lea e faatatau i ai le manatu? E leai, auā e ese le Faaaliga 7:4-8 mai le lisi masani o ituaiga o Isaraelu. (Numera 1:17, 47) E manino lava, e lē o le fuafuaga o le lisi lenei ia mātaulia ai tagata Iutaia faaletino i o latou ituaiga ae o loo faailoa ai se fausaga faalefaalapotopotoga talitutusa mo Isaraelu faaleagaga. E fetaui lelei lenei mea. O le a iai tagata e 144,000 o lenei nuu fou​—12,000 mai ituaiga taʻitasi e 12. E leai se ituaiga patino i totonu o le Isaraelu lenei a le Atua o le a faapitoa e fai ma tupu pe faitaulaga. O le a pule le nuu atoa o ni tupu, ma e auauna le nuu atoa o ni faitaulaga.​—Kalatia 6:16; Faaaliga 20:4, 6.

12. Aiseā e talafeagai ai le peseina e toeaina e 24 i luma o le Tamaʻi Mamoe, o upu o le Faaaliga 5:9, 10?

¹² E ui lava na tuuina atu le avanoa muamua i tagata Iutaia faaletino ma tagata ua liliu i le lotu Iutaia e filifilia ai mo le Isaraelu faaleagaga, ae toʻaitiiti lava na tali atu o lenā nuu. O le mea lea na faasalafa atu ai e Ieova le valaaulia i Nuu Ese. (Ioane 1:10-13; Galuega 2:4, 7-11; Roma 11:7) E pei o le tulaga na iai Kerisiano Efeso, muamua na “tagata ese . . . [i] le malo o Isaraelu,” ae ua mafai nei ona faamaufaailogaina i le agaga o le Atua tagata e lē ni Iutaia ma avea ai ma vaega o le faapotopotoga o Kerisiano faauuina. (Efeso 2:11-13; 3:5, 6; Galuega 15:14) Ua talafeagai ai la, ona pepese toeaina e 24 i luma o le Tamaʻi Mamoe: “Ua e faatauina foʻi i matou i lou lava toto mo le Atua, mai itu aiga uma, ma gagana eseese, ma nuu, atoa ma atu nuu; ua faia foʻi e oe i matou ma tupu ma faitaulaga i lo matou Atua; e fai foʻi i matou ma tupu i le lalolagi.”​—Faaaliga 5:9, 10.

13. Aiseā sa talafeagai ai i le ʻafa uso o Iesu o Iakopo ona tusi atu lana tusi “i itu aiga e sefulu ma le lua ua faasalalauina”?

¹³ O le faapotopotoga Kerisiano o le “tupulaga ua filifilia . . . , o tupu ma ositaulaga, o le nuu paia.” (1 Peteru 2:9) I le avea ma nuu o le  Atua e suitulaga iā Isaraelu anamuā, ua avea ai o se Isaraelu fou, o lona uiga ua avea ma “Isaraelu” moni. (Roma 9:6-8; Mataio 21:43) * Ona o lenei māfuaaga, sa talafeagai ai i le ʻafa uso o Iesu o Iakopo ona tusi atu lana tusi i lona tulaga o sē e vaaia le lafu “i itu aiga e sefulu ma le lua ua faasalalauina,” o lona uiga, i le faapotopotoga i le lalolagi aoao o Kerisiano faauuina, lea e iai se taimi e oo ai i le 144,000 lo latou aofaʻi.​—Iakopo 1:1.

Le Isaraelu a le Atua i Aso Nei

14. O le ā ua faaalia ai e taofi Molimau a Ieova, o le 144,000 o le numera moni lea o i latou e faia aʻe ai Isaraelu faaleagaga?

¹⁴ Mai lava i le amataga, sa manatu ai Charles T. Russell i le 144,000, o se numera moni o tagata taʻitoʻatasi o loo faia aʻe ai le Isaraelu faaleagaga. Sa ia tusia i le tusi The New Creation, Tusi VI o ana tusi o le Studies in the Scriptures, na lomia i le 1904, e faapea: “Ua iā i tatou māfuaaga uma e talitonu ai o le numera maʻoti ma le mautū o ē tofia [o ē faauuina ua filifilia] lea ua taʻua i nisi o taimi i le Faaaliga (7:4; 14:1); o lona uiga, o le 144,000 ʻua togiolaina nai tagata.’” I le Light, le Tusi Muamua, na lomia i le 1930 e Tagata Aʻoga, sa faapena foʻi ona taʻua ai: “O tagata e 144,000 o le tino o Keriso o loo faapea ona iai i le tuufaatasiga ua faaalia ua tofiaina ma faauuina, pe ua faamaufaailogaina.” Ua maumauaʻi pea Molimau a Ieova i le manatu o le 144,000 o Kerisiano faauuina na e faia aʻe ai le Isaraelu faaleagaga, o se fuainumera moni.

15. A o lumanaʻi ai le aso o le Alii, o le ā sa manatu tagata aʻoga faamaoni o le Tusi Paia o le a olioli ai Iutaia faaletino pe a mavae le iʻuga o Taimi o Nuu Ese?

¹⁵ Ae ui i lea, pe ua lē talafeagai ea ona maua e Isaraelu faaletino i aso nei sina uaʻi atu faapitoa i ai? I le vaitaimi a o lumanaʻi ai le aso o le Alii, ina ua iloa atili e tagata aʻoga faamaoni o le Tusi Paia le tele o upu moni faavae o le Afioga a le Atua, sa manatu ai faapea i le iʻuga o Taimi o Nuu Ese o le a toe olioli ai tagata Iutaia i se tulaga faaeaina i luma o le Atua. I le tusi a C. T. Russell, o le The Time Is at Hand (Tusi II o Studies in the Scriptures), na tusia i le 1889, na faatatauina ai le Ieremia 31:29-34 i Iutaia faaletino, ma taʻua faapea: “Ua molimau le lalolagi i le mea moni faapea ua faaauau pea le faasalaina o Isaraelu i lalo o le pulega a Nuu Ese talu mai le [607] T.L.M., lea o loo faaauau pea. Ma e leai se māfuaaga e faatalitalia ai lo latou toe faamaopoopoina faaleatunuu a o lumanaʻi ai i le 1914 T.A., le taimi e muta ai o latou ʻtaimi e fitu’​—o le 2520 tausaga.” E foliga mai la o le a toe faamaopoopoina faaleatunuu Iutaia, ma na manino mai lenei faamoemoe i le 1917, ina ua folafolaina e le Balfour Declaration le lagolagosua a Peretania mo le avea o Palesitina ma nofoaga o tagata Iutaia.

16. O ā taumafaiga sa fai e Molimau a Ieova ina ia oo atu le feʻau faa-Kerisiano i Iutaia faaletino, ma o le ā le iʻuga?

¹⁶ Ina ua uma le Taua Muamua a le Lalolagi, na avea ai Palesitina ma oganuu e pule ai Peretania, ma na tatala ai le avanoa mo le toʻatele o Iutaia e toe foʻi atu ai i lenā nuu. I le 1948 na aliaʻi mai ai le Setete faapolotiki o Isaraelu. Pe sa lē o se faamaoniga ea lea faapea o le a oo atu i Iutaia faamanuiaga mai le Atua? Mo le tele o tausaga, sa talitonu Molimau a Ieova o le tulaga lea sa iai. O lea, na latou lomia ai i le 1925 se tusi e 128 ona itulau, o le Comfort for the Jews. Na latou faalauiloa aloaʻia i le 1929 se tusi manaia e 360 ona itulau, o le Life, na fuafuaina e tosina i ai Iutaia ma e talanoaina ai foʻi le tusi o le Tusi Paia o Iopu. Sa faia ni taumafaiga sili, aemaise lava i le aai o Niu Ioka, ina ia oo atu i Iutaia lenei feʻau e uiga i le Mesia. Ma le fiafia lava, sa tali ane i ai ni nai tagata toʻaitiiti, e ui sa teena e le toʻatele o Iutaia faamaoniga o le faatasi mai o le Mesia, e pei lava o o latou augātamā o le uluaʻi senituri.

17, 18. O le ā na oo ina malamalama i ai auauna a le Atua i le lalolagi e faatatau i le feagaiga fou ma valoaga a le Tusi Paia i le toe faafoʻisiaina?

¹⁷ Sa faasolo ina manino mai o tagata Iutaia ia po o le atunuu foʻi, e lē o le Isaraelu lea o loo faamatalaina i le Faaaliga 7:4-8 po o isi valoaga a le Tusi Paia e fesootaʻi ma le aso o le Alii. Sa ʻalofia pea e Iutaia le faaaogāina o le suafa o le Atua, ona o le mulimuli i uputuu. (Mataio 15:1-3, 7-9) I le talanoaina o le Ieremia 31:31-34 i  le tusi Jehovah, na lomia e Molimau a Ieova i le 1934, na taʻua ai ma le mautinoa e faapea: “E lē fesootaʻi le feagaiga fou ma tupuaga faaletino o Isaraelu ma tagata lautele, ae . . . e gata ai lava iā Isaraelu faaleagaga.” E lē fesootaʻi foʻi valoaga a le Tusi Paia i le toe faafoʻisiaina i Iutaia faaletino po o Isaraelu faapolotiki, lea e avea ma se tasi o atunuu o le Malo Aufaatasi ma o se vaega o le lalolagi lea na fetalai i ai Iesu i le Ioane 14:19, 30 ma le 18:36.

¹⁸ Na talia ma le olioli tele e auauna a le Atua i le lalolagi i le 1931 le igoa Molimau a Ieova. Sa mafai ona latou lagolagoina ma le loto atoa upu o le Salamo 97:11: “Ua lūlūina le malamalama mo lē amiotonu, ua lūlūina foʻi le olioli mo ē ua loto faamaoni.” Na oo ina latou malamalama lelei, e na o Isaraelu faaleagaga lava ua aumaia i totonu o le feagaiga fou. (Eperu 9:15; 12:22, 24) E lē aofia ai Isaraelu faaletino, o ē e leʻi fia tali atu, e faapea foʻi ma tagata lautele. Na faaavanoaina e lenei malamalamaaga le auala mo le susulu mai o le malamalama o le Atua, e matilatila i faamaumauga o le talafaasolopito o gaoioiga faale-Atua. O le a faaalia ai e lenei mea le telē o loo faasalafa atu ai e Ieova lona alofa mutimutivale, lona alofa agalelei, ma le upu moni i tagata uma o ē faalatalata atu iā te ia. (Esoto 34:6; Iakopo 4:8) Ioe, o le a maua aogā e isi e ese mai ai i le Isaraelu a le Atua, i le taofia e agelu o matagi e fā o le faaumatiaga. O ai i latou nei? E mafai ea ona avea oe ma se tasi o i latou? Seʻi o tatou vaai nei i ai.

[Faaopoopoga i lalo]

[Fesili mo le Suʻesuʻega]

 [Ata atoa i le itulau 114]

[Ata i le itulau 116, 117]

O le filifiliina faalauaʻitele o le Isaraelu moni a le Atua na faasolo mai le aso Penetekoso 33 T.A. e oo mai i le 1935 ina ua faia se tauaofiaga taʻutaʻua a Molimau a Ieova i Washington, D.C., i le Iunaite Setete, lea na tuu atu ai le faamamafaga i le aoaoina mai o se motu o tagata e toʻatele, o ē faamoemoe e ola i le lalolagi (Faaaliga 7:9)