Mataupu 10

Le ʻInoʻino i “Mea Loloto a Satani”

TUATIRA

1. O le ā le mamao o Tuatira mai isi faapotopotoga, ma o le ā le ituaiga o siʻomaga faalotu sa iai?

PE Ā ma le 40 maila (65 kilomita) i saute sasaʻe o Perekama (Perekamo) e iai le laumua uluola o Take o Akhisar. Sa avea lenei laumua ma vaega o Tuatira, i le pe tusa o le 1,900 tausaga ua mavae. E faigofie i se ovasia faimalaga ona oo i Tuatira i se auala e ui atu i laufanua o le nuu mai Perekamo ma agaʻi atu ai i isi faapotopotoga o loo totoe o le Faaaliga mataupu e 3​—o Sarataisa, Filatelefaia, ma Laotikaia. E leʻi tutusa Tuatira ma Perekamo auā e foliga mai sa leʻi avea Tuatira o se nofoaga tāua o tapuaʻiga i le emeperoa, ae sa iai ona nofoaga paia mo tapuaʻiga ma malumalu mo atua faapaupau. Sa lauiloa Tuatira o se taulaʻiga o fefaatauaʻiga faapisinisi.

2, 3. (a) O le ā sa faamaumauina muamua e faatatau i se tagata Tuatira na avea ma Kerisiano? (e) O le ā se tāua i Kerisiano i Tuatira o le faapea atu o Iesu o “le Atalii o le Atua” ma o lē “e pei o le mumū o le afi ona mata”?

² A o talaʻi Paulo i Maketonia, sa feiloaʻi ai i se fafine Tuatira e igoa iā Litia, sa ia faatau atu ʻie pāuli. Na talia lelei e Litia ma lona ʻauaiga le talaʻiga a Paulo ma na mataʻina le agaga talimālō sa latou faaalia. (Galuega 16:14, 15) E tusa ai o faamaumauga, sa avea Litia ma uluaʻi tagata Tuatira na taliaina le Faa-​Kerisiano. A o faagasolo taimi, na iʻu ina iai i lenei aai se faapotopotoga o Kerisiano. O le faapotopotoga lenā na avatu i ai e Iesu lana feʻau lenei e sili ona umi: “Ia e tusi foʻi i le agelu a le ekalesia o i Tuatira: O mea nei ua fai mai ai le Atalii o le Atua, o lē e pei o le mumū o le afi ona mata, o ona vae foʻi e pei o le apa pupula.”​—Faaaliga 2:18.

³ Na pau lava lenei o le taimi ua aliali mai ai le faaupuga “Atalii o le Atua” i le Faaaliga, e ui lava i isi taimi e faasino ai e Iesu iā Ieova o “loʻu Tamā.” (Faaaliga 2:27; 3:5, 21) O le  faaaogāina o le taʻu i inei e foliga mai na faamanatu ai i Kerisiano i Tuatira le faiā māfana a Iesu ma Ieova. O lenei Alo “e pei o le mumū o le afi ona mata”​—o se lapataʻiga i Kerisiano i Tuatira e faapea o lana faamasinoga o le a sasao atu i so o se mea na te silafia e ono faaleagaina ai le faapotopotoga. I le faasino faalua i ona vae pupula e pei o le apamemea, ua ia faamamafaina ai lana lava faaaʻoaʻoga pupula o le faamaoni a o iai i lenei lalolagi. E mautinoa sa utagia e Kerisiano i Tuatira lenei fautuaga, ma e ao foʻi ona tatou faia faapena i aso nei!​—1 Peteru 2:21.

4, 5. (a) Aiseā ua mafai ai e Iesu ona faamālō atu i Kerisiano i Tuatira? (e) Ua faapefea ona pei lava le faapotopotoga i Tuatira o faapotopotoga a Molimau a Ieova i aso nei?

⁴ Ma le fiafia lava, sa mafai e Iesu ona faamālō iā i latou i Tuatira. Na ia fetalai: “Ua ou iloa au galuega ma lou alofa, ma lou faatuatua, ma lou auauna mai, ma lou onosai, ua sili foʻi au galuega mulimuli i lo galuega muamua.” (Faaaliga 2:19) I le lē pei o Kerisiano i Efeso, e leʻi tuua e Kerisiano faauuina i Tuatira lo uluaʻi alofa mo Ieova. E malosi lo latou faatuatua. E lē gata i lea, ua sili atu a latou galuega i le taimi nei na i lo taimi muamua, ma e onosai foʻi ma tutumau Kerisiano i Tuatira e pei o faapotopotoga muamua e tolu. O le tulaga tonu lenā o le toetoe 100,000 faapotopotoga o Molimau a Ieova i le lalolagi atoa i aso nei! E susulu atu le alofa mo Ieova, a o uunaʻia le faalapotopotoga e le agaga o le maelega i le faiva lea ua faagaeeina ai ē laiti ma ē matutua. O loo faatupulaʻia pea le aofaʻi o se vaega ua ofoina atu i latou e avea o ni paeonia, ua faaaogā ai ma le atamai le taimi o loo totoe e faalauiloa ai le faamoemoe pupula o le Malo o le Atua o loo fotuaʻi mai!​—Mataio 24:14; Mareko 13:10.

⁵ Ua fia sefulu tausaga o avea pea le toʻatele o ē faamaoni o le vaega totoe faauuina ma le motu o tagata e toʻatele, o se faaaʻoaʻoga lelei o le tutumau i le auaunaga i le Atua, a o matuā goto atu le lalolagi o loo siʻomia ai i latou i se faanoanoaga tele ua leai se faamoemoe. Ae ia tatou loto tetele! Ua faamautinoa mai e le Faaaliga le molimau a perofeta muamua a le Atua. “O loo latalata mai le aso tele o Ieova, e lata mai lava, o loo matuā tele vave mai lava.”​—Sefanaia 1:14; Ioelu 2:1; Sapakuka 2:3; Faaaliga 7:9; 22:12, 13.

“Le Fafine o Iesepela”

6. (a) E ui lava i ni vala sa taʻuleleia ai le faapotopotoga i Tuatira, ae o le ā le faafitauli ua mātauina e Iesu i le faapotopotoga lea e manaʻomia le uaʻi atu loa i ai? (e) O ai Iesepela, ma pe sa iā te ia ea se aiā e avea ai ma perofeta fafine?

⁶ Ua ati atili atu fofoga pei o le afi o Iesu. Ua ia mātauina se mea e manaʻomia le uaʻi atu loa i ai. Ua ia taʻu atu i Kerisiano i Tuatira: “A ua iā te aʻu ni nai mea ou te lē fiafia ai iā te oe, ona ua e tuu pea le fafine o Iesepela, ua taʻua o ia e ia o le perofeta fafine, e aʻoaʻo ma faasesē i aʻu auauna, ina ia faitaaga, ma aai mea ua fasia mo tupua.” (Faaaliga 2:20) I le senituri lona sefulu T.L.M., sa taʻutaʻua ai Iesepela o lē sa tapuaʻi iā Paala, ma o le masiofo a le tupu o Aapo o Isaraelu, i ona uiga fasioti tagata, mulilua ma le fia pule. Ma o Ieʻu, lē na faauuina e Ieova, na ia faaoo le sala oti i lenei fafine. (1 Tupu 16:31; 18:4; 21:1-16; 2 Tupu 9:1-7, 22, 30, 33) Sa leʻi iai se aiā e avea ai le masiofo ifo i tupua o Iesepela ma perofeta fafine. Sa leʻi pei o Miriama ma Tepora, o ē sa auauna o ni perofeta fafine faamaoni i Isaraelu. (Esoto 15:20, 21; Faamasino 4:4; 5:1-31) Ma e leʻi osofia o ia e le agaga o Ieova e vavalo ai, e pei ona osofia le fafine matua o Ana faapea foʻi afafine e  toʻafā o Filipo le faievagelia.​—Luka 2:36-38; Galuega 21:9.

7. (a) I le taʻua o le “fafine o Iesepela,” o le ā le taaʻiga e manino o loo faasino atu i ai e Iesu? (e) Ua taumafai faapefea nisi fafine sa latou auaufaatasi e taʻusaʻoina a latou amioga manatu faapito?

⁷ Ua manino la, o le “fafine o Iesepela” o lē ua faapea mai o se perofeta fafine i Tuatira o se taufaasesē. E lē o lagolagoina o ia e le agaga o le Atua. O ai o ia? E foliga mai o ia o se fafine po o se vaega o ni fafine, o loo gaoioi ma le lē māsiasi e avea ma taaʻiga leaga i totonu o le faapotopotoga. Atonu ua taaʻina tagata o le faapotopotoga i amioga lē mamā faaleituaiga a nisi fafine sa latou auaufaatasi, a o taumafai ma le lē māsiasi nei fafine e taʻusaʻoina a latou amioga manatu faapito e ala i le faatatau sesē o mau o le Tusi Paia. Pagā se pepelo o mea ua latou vavalo ai! E latou te taaʻina nisi ia paʻuʻū atu i o latou lava ala o le “faitaaga, o le amio leaga, o le faamatāitu, o le tuʻinanau leaga, ma le matapeʻapeʻa, (o le ifo i tupua lava lea).” (Kolose 3:5) Latou te uunaʻia ē o i le faapotopotoga ina ia matuā uaʻi e saʻilia ituaiga o olaga lē mamā, e faamalieina ai le tagata lava ia, o le ituaiga o olaga lea ua faatagaina, po ua lē toe popole tele i ai le tele o tapuaʻiga o loo faapea mai o lotu Kerisiano i aso nei.

8. (a) O le ā le folafolaga ua fai atu e Iesu e faatatau i le “Iesepela” i Tuatira? (e) Ua faapefea ona iai foʻi i ona pō nei le taaʻiga lē tatau a fafine?

⁸ Ua fetalai atu nei Iesu i toeaina i Tuatira: “Ua ou tuu atu foʻi ni ona aso ia salamō ai i lana faitaaga, a ua lē salamō lava o ia. Faauta, ou te lafo iā te ia i le moega o tigā, ou te faaoo foʻi le puapuagā tele i ē ua mulilulua ma ia, pe afai latou te lē salamō i ana galuega.” (Faaaliga 2:21, 22) E pei lava o le Iesepela anamua e foliga na ia puleaina Aapo ma tauluʻiluʻi ane i le faaoosala a le Atua o Ieʻu, ua faapena foʻi ona taumafai lenei taaʻiga a fafine e pulea matafaioi a tane ma toeaina. Ma e foliga mai e lē o faia e le ʻautoeaina i Tuatira se gaoioiga i lenei taaʻiga faualuga faa-Iesepela. O lea la ua faaleo atu nei e Iesu se lapataʻiga malosi mo i latou, atoa ai foʻi ma le faapotopotoga i le lalolagi aoao o tagata o Ieova i aso nei. I ona pō nei, e iai nisi fafine loto malolosi faapena ua latou tauanauina a latou tane e fulitua i le upu moni, ma ua oo lava ina faapogaia ai gaoioiga faafaamasinoga e tetee mai ai i auauna faamaoni a Ieova.​—Faatusatusa i le Iuta 5-8.

9. (a) Aiseā e lē o atagia atu ai se vaaiga lē lelei i fafine uma o le faapotopotoga i fetalaiga a Iesu e faatatau iā Iesepela? (e) O fea le taimi e faatoʻā mapuna aʻe ai le taaʻiga faa-Iesepela?

⁹ E lē o atagia atu ai i lenei mea se vaaiga lē lelei i fafine faamaoni i le faapotopotoga Kerisiano. I aso nei, o le vaega tele o le galuega talaʻi o loo faataunuu e tuafāfine faamaoni; o suʻesuʻega faale-Tusi Paia o loo latou faia i aiga, ua latou aumaia ai tagata e toʻatele i le faapotopotoga. O loo faamanuia e le Atua lenei faatulagaga, e pei ona faailoa mai e le Salamo 68:11: “Na tulei mai le afioga a le Alii; e tele ʻau o [fafine] na talaʻiina.” Atonu e mafai  ona taaʻina tane i le lelei e ala i le amio lē gaoiā ma le faaaloalo a a latou avā, “o le mea tau tele lava lea i luma o le Atua.” (1 Peteru 3:1-4) O loo viiviia e le tupu o Lemuelu le avā amio lelei ma le maelega. (Faataoto 31:10-31) E faatoʻā mapuna aʻe lava le taaʻiga faa-Iesepela, pe a see ese fafine mai tapulaa e tatau ona iai, e ala i le faatosina o tane po o le faatautee foʻi pe lē amanaʻia le tulaga ulu.​—Efeso 5:22, 23; 1 Korinito 11:3.

10. (a) Aiseā o le a faasala ai Iesepela ma lana fanau? (e) O le ā le tulaga lamatia ua iai i latou e avea ma fanau a Iesepela, ma o le ā e tatau ona latou faia?

¹⁰ E faatatau i le “fafine o Iesepela,” ua fetalai atili Iesu: “Ou te fāsia foʻi ana fanau ia oti; e iloa foʻi e ekalesia uma, o aʻu lava o lē suʻesuʻe i manatu ma loto; ou te avatua foʻi iā te outou taʻitoʻatasi e tusa ma a outou galuega.” (Faaaliga 2:23) Ua tuu atu e Iesu le taimi mo Iesepela ma lana fanau e salamō ai, ae o loo tumau pea i a latou amioga lē mamā, o le mea lea ua tatau ai ona faasala i latou. O loo iai se feʻau malosi i inei mo Kerisiano i aso nei. O i latou o ē faataʻitaʻi iā Iesepela, pe o ni tane po o ni fafine, ma avea ai ma ana fanau e ala i le solia o mataupu silisili o le Tusi Paia i le tulaga ulu ma amioga mamā, po o le faaulumalō ma lē amanaʻiaina faatulagaga mai le Atua, ua iai i se tulaga lamatia i le maʻi faaleagaga. O le mea moni, afai e aami e lenā tagata toeaina o le faapotopotoga ina ia tatalo mo ia, o le a mafai e lenā ʻtatalo e faia i le faatuatua ona faaolaina ai le maʻi, ma o le a faatūina foʻi o ia e Ieova’​—e faalagolago i lona gaoioi ma le lotomaulalo ia ōgatusa ma na tatalo. Ae aua lava neʻi mafaufau se tasi e na te mafai ona faavaleaina le Atua po o Keriso, i le taumafai e natia amioga lē tatau pe faatagā faaali mai fafo se uiga maelega i le auaunaga.​—Iakopo 5:14, 15.

11. Ua faapefea ona fesoasoani atu i faapotopotoga i aso nei ina ia mataala i le faaulufale faamalosi mai o taaʻiga leaga a fafine?

¹¹ E fiafia lava ona o le tele o faapotopotoga o Molimau a Ieova i aso nei o loo mataala i lenei lamatiaga. O loo mataalia toeaina i aga ma āʻega e ono taʻitaʻia atu i uiga e lē faale-Tusi Paia ma oo atu ai lava i amioga sesē. Latou te fesoasoani atu i tane ma fafine ua iai i ala e lamatia ai, ina ia mafai ona toe malolosi faaleagaga ma toe faatonutonu o latou ala a o leʻi paʻū atu i le faia o le agasala. (Kalatia 5:16; 6:1) I se auala alofa ma le maumauaʻi, e taumafai ai nei ovasia Kerisiano e taofia so o se taumafaiga a se fafine e faatū ni vaega mo le uunaʻia o ni gaoioiga e tai pei o le faalapotopotoga mo saʻolotoga o fafine. E lē gata i lea, ua aumaia mai lea taimi i lea taimi fautuaga talafeagai e ala i lomiga a Molimau a Ieova. *

12. I le ā le auala ua faataʻitaʻia mai ai e le vasega e pei o Ioane i aso nei le maelega e pei o lea sa iā Ieʻu?

¹² Ae peitaʻi, o le faia o amioga lē mamā matuiā aemaise pe afai ua fai ma masani, ua tatau loa ona faateʻaina na tagata ua agasala ma le lē salamō. Tatou te manatua le maelega o Ieʻu i le aveeseina uma o taaʻiga faa-Iesepela i Isaraelu. E faapena foʻi i aso nei, o loo gaoioi maumauaʻi le vasega e pei o Ioane, i le faia o se faaaʻoaʻoga mo a latou aumea ʻe pei o Ionatapa,’ ma faaalia ai e matuā ese lava i latou mai faifeʻau o lotu sesē, o ē faatagaina amioga lē mamā.​—2 Tupu 9:22, 30-37; 10:12-17.

13. O le ā e tupu iā i latou e lolo atu i taaʻiga sesē a fafine?

¹³ I le avea ma Avefeʻau toe Faamasino a Ieova, ua gaoioi ai ma le tonu le Alo o le Atua i le mātauliaina o le Iesepela faaonapōnei ma lafoina o ia i se moega o tigā, ona o le mea moni o lona maʻi faaleagaga e matuā leaga lava. (Malaki 3:1, 5) O i latou ua gauaʻi atu i lenei taaʻiga sesē a fafine o le a matuā puapuaga lava​—le faanoanoa ina ua faateʻaina, ua motusia le mafutaga ma le faapotopotoga Kerisiano e peiseaʻī ua feoti. Ma afai latou te lē salamō ma liliu mai ina ia toe taliaina ai i le faapotopotoga, lona uiga ua fesagaʻi foʻi ma le oti moʻi e ala i le ʻmala mataʻutia,’ o le puapuaga tele. O le taimi la lenei e mafai ona toe faafoʻisia mai ai i latou pe afai e salamō atoatoa i a latou galuega sesē.​—Mataio 24:21, 22; 2 Korinito 7:10.

14. (a) O faapefea ona faaaogā e Iesu le ʻautoeaina i le taulimaina o nisi o faafitauli, e pei o so o se taaʻiga faa-Iesepela? (e) E tatau faapefea ona lagolagoina e le faapotopotoga le ʻautoeaina o loo taulimaina na faafitauli?

 ¹⁴ E ao i “ekalesia uma” ona iloa e suʻesuʻe e Iesu “manatu,” o faalogona loloto, faapea ma le “loto,” le tagata i totonu, e aofia ai ma uunaʻiga e lagolagoina ai gaoioiga. Ina ia faia lea mea, na te faaaogāina ai fetu maufaatuatuaina, po o toeaina, i le taulimaina o nisi o faafitauli, e pei o so o se taaʻiga faa-Iesepela e aliali mai. (Faaaliga 1:20) Pe a uma ona suʻesuʻeina atoatoa e toeaina se mataupu faapea ma ua fai le iʻuga faafaamasinoga, e lē tatau i tagata taʻitoʻatasi ona tuufesilisili pe aiseā ma o fea na tupu ai le gaoioiga. E ao i tagata uma ona talia ma le loto maulalo le puleaina o mataupu e toeaina ma faaauau ona lagolagoina nei fetu a le faapotopotoga. E tauia le faamaoni iā Ieova ma ana faatulagaga faalefaalapotopotoga. (Salamo 37:27-29; Eperu 13:7, 17) Mo oe lava ia, tau ina ia faamanuiaina oe pe a aumaia e Iesu i tagata taʻitoʻatasi e tusa ai ma ana galuega.​—Kalatia 5:19-24; 6:​7-9.

“O le Mea ua iā te Outou ia Outou Taofi Mau Ai”

15. (a) O le ā sa fetalai ai Iesu iā i latou o ē e leʻi faaleagaina e Iesepela? (e) O le ā ua faaalia ai e lē o tagata uma na fai mai o Kerisiano i tuā i le 1918 sa faaleagaina e lotu ua vavae ese mai le upu moni?

¹⁵ Ua aumaia e fetalaiga e sosoo ai a Iesu le faamāfanafanaga: “A ou te fai atu i nisi o outou o i Tuatira, o ē ua lē i ai lenei aʻoaʻoga, ma ua outou lē iloa mea ua taʻua e i latou o mea loloto a Satani: ou te lē tuuina atu se isi avega iā te outou; a e peitaʻi, o le mea ua iā te outou ia outou taofi mau ai, seʻia ou alu atu.” (Faaaliga 2:24, 25) E iai tagata faamaoni i Tuatira e leʻi taaʻina e Iesepela. O le tulaga foʻi lenā na iai, mo le 40 tausaga a o lumanaʻi le 1918 ma  faasolo mai ai, sa leʻi faaleagaina i latou uma o ē na faapea mai o Kerisiano, i ala lē mamā tau amio ma le iʻuvale lea ua matuā taatele i lotu sesē. O se vaega toʻaitiiti o Tagata Aʻoga o le Tusi Paia, lea ua taʻua nei o Molimau a Ieova, o loo taumafai e fesoasoani i tagata lotu ina ia iloa le mea lē faa-Kerisiano e puna mai ai le tele o aʻoaʻoga a lotu ua taʻua o lotu Kerisiano. Ua latou tauivi foʻi ina ia aveesea mai iā i latou lava talitonuga ma faiga faa-Papelonia na maua mai nei lotu. E aofia ai i lenei mea le aʻoaʻoga tuufau a lenā “fafine o Iesepela.”

16. E ui e leʻi toe faaopoopo mai e Iesu ma le vaega pule o Kerisiano i le uluaʻi senituri nisi avega, ae o ā mea e ao ona ʻalo ese ai?

¹⁶ Ua faalaeiau foʻi e le vasega e pei o Ioane i aso nei a latou aumea, le motu o tagata e toʻatele, ina ia faaeteete i taaʻiga i amioga lē mamā, e pei ona iai i faafiafiaga matuā matagā a le lalolagi. E lē manaʻomia ona matamata pe faatino se mea leaga ona o le isuisu fua, pe ina ia iloa ai le mea e ao ona ʻalofia. O le gaoioiga poto le taumamao ese mai “mea loloto a Satani.” E pei ona fetalai Iesu: “Ou te lē tuuina atu se isi avega iā te outou.” Ua faamanatu mai e lenei mea iā i tatou le poloaʻiga a le vaega pule o Kerisiano i le uluaʻi senituri: “Auā ua lelei i le Agaga Paia ma i matou nei, ia lē faaee atu se tasi avega iā te outou, na o nei mea e tatau; ia faamamao outou i mea e fasia mo tupua, ma le toto, ma mea titina, ma le faitaaga; afai tou te taumamao ma nei mea, e lelei ai outou.” (Galuega 15:28, 29) Ina ia olaola lelei faaleagaga, ia ʻalo ese mai lotu sesē, le faaaogāsesēina o le toto (e pei o tuiga toto), ma amioga lē tatau! E mautinoa o le a puipuia ai foʻi lou soifua mālōlōina i le tino.

17. (a) Ua faapefea ona faaosoosoina e Satani tagata i aso nei i “mea loloto”? (e) O le ā lo tatou manatu e tatau ona iai e faatatau i “mea loloto” a le lalolagi lavelave a Satani?

¹⁷ E iai foʻi isi “mea loloto” a Satani i aso nei, e pei o masalosaloga ma filosofia lavelave lea e viiviia sesē ai le poto o le tagata. E ese mai i manatunatuga lē mamā tau amio lē faatuaoia, e aofia ai foʻi faiga faataulāitu ma manatunatuga faaevolusione. O le ā se finagalo o Lē na Foafoaina Mea e sili ona atamai e faatatau i nei “mea loloto”? Na sii mai e le aposetolo o Paulo le fetalaiga a Ieova e faapea: “Ou te faaumatia le atamai o ē atamamai.” I le tuufaafeagai ai, “o mea loloto foʻi a le Atua” e faigofie, e manino, ma faamāfanafana loto. E teena e Kerisiano atamamai “mea loloto” a le lalolagi lavelave a Satani. Ia manatua, “o le a mavae atu foʻi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Korinito 1:19, Kingdom Interlinear; 2:10; 1 Ioane 2:17.

18. O ā faamanuiaga sa folafola e Iesu i Kerisiano faauuina o ē tutumau faamaoni seʻia oo i le iʻuga, ma o le ā le faaeaga o le a iai i le taimi o Amaketo mo i latou nei ua toe faatutūina aʻe?

¹⁸ Ua fetalai atu nei Iesu i fetalaiga faamāfanafanaloto, i Kerisiano i Tuatira. E faalaeiauina  ai foʻi Kerisiano faauuina i aso nei: “O lē manumalo foʻi, ma tausi i aʻu galuega seʻia oo i le gataaga, ou te avatua iā te ia e pule i nuu ese; e pule foʻi o ia iā te i latou i le tootoo uʻamea; e nutipalaina i latou pei o ipu a lē fai ipu omea, e pei o aʻu foʻi ona ou maua mai i loʻu Tamā.” (Faaaliga 2:26, 27) O se matuā faaeaga matagofie lava! O le pule lea ua maua e ē faauuina ua manumalo pe a latou toe tutū, o le auai lea ma Iesu i le sasauina atu o le “tootoo uʻamea” e faaumatia ai atunuu fouvale iā Amaketo. O meatau faaniukilia aupito lelei a atunuu o loo iai o le a pei o le pā a se fanapepa ua susū, pe a nutililiia e Keriso ona fili e pei ona ia faia i ipu omea.​—Salamo 2:8, 9; Faaaliga 16:14, 16; 19:11-13, 15.

19. (a) O ai le “fetu ao,” ma o le a faapefea ona avatu iā i latou o ē manumalo? (e) O le ā le faalaeiauga ua ofoina atu i le motu o tagata e toʻatele?

¹⁹ Ua faaopoopo mai Iesu: “Ou te avatua foʻi iā te ia le fetu ao.” (Faaaliga 2:28) Mulimuli ane, na faamatalaina ai e Iesu lava ia, po o ai lenei “fetu” i le fetalai mai: “O aʻu o le Aa ma le fanau a Tavita, o le fetuao pupula.” (Faaaliga 22:16) Ioe, o Iesu e faataunuuina le valoaga lea na faamalosia e Ieova Palaamo e vavalo mai ai e ui e leʻi loto i ai, e faapea: “E alu le fetu mai iā Iakopo; e tū mai foʻi le tootoo mai iā Isaraelu.” (Numera 24:17) O le a faapefea ona avatu e Iesu “le fetu ao” iā i latou o ē manumalo? E aliali mai, e ala i le avatu o ia lava iā i latou, i le faaaofia ai lea o i latou i se faiā e sili ona vavalalata ma māfana ma ia. (Ioane 14:2, 3) E mautinoa o se faalaeiauga malosi ina ia tutumau ai! E faagaeetia ai foʻi le motu o tagata e toʻatele i le iloa, o le a lē pine ae faaaogāina e “le fetu ao pupula” lana pule o le Malo e toe faafoʻisia mai ai le Parataiso i inei i le lalolagi!

Ia Tausisia le Faamaoni

20. O ā ni mea ua faia i lotu ua vavae ese mai le Faa-Kerisiano moni, ua faamanatu mai ai iā i tatou nisi o vaivaiga i le faapotopotoga i Tuatira?

²⁰ Sa tatau ona matuā faalaeiauina i lenei feʻau Kerisiano i Tuatira. Seʻi tau ina manatunatu i ai​—o le Alo faamamaluina o le Atua i le lagi lea ua fetalai mai i Kerisiano i Tuatira e faatatau i nisi o o latou faafitauli! Ma le mautinoa sa talia lelei e nisi o le faapotopotoga sea tausiga alofa faaleoleo mamoe. Ua fesoasoani foʻi le feʻau sili ona umi lenei o feʻau e fitu, iā i tatou e mātaulia ai le faapotopotoga Kerisiano moni i aso nei. I le 1918 ina ua afio mai Iesu i le malumalu o Ieova mo le faia o le faamasinoga, o le tele o faalapotopotoga na faapea mai o Kerisiano, sa matuā faaleagaina i ifoga i tupua ma amioga lē mamā faaleagaga. (Iakopo 4:4) O nisi o nei lotu sa faavae a latou talitonuga i aʻoaʻoga a fafine loto malolosi o le senituri lona 19, e pei o Elena Uaita o le Lotu Aso Fitu ma Mary Baker Eddy o le lotu, O Saienitisi Faa-Kerisiano (Christian Scientists), ma e toʻatele fafine ua lauga mai i le pulelaa. (Ua tuufaafeagai ma le 1 Timoteo 2:11, 12.) I le tele o ituaiga eseese i le faa-Katoliko, ua  masani ona muamua ai le faamamaluina o Maria na i lo le Atua ma Keriso. E leʻi faamamaluina faapena Maria e Iesu. (Ioane 2:4; 19:26) Pe mafai ea e ni faalapotopotoga ua faatagaina taaʻiga lē talafeagai mai fafine, ona talia moni e avea o ni Kerisiano?

21. O ā lesona mo tagata taʻitoʻatasi mai le feʻau a Iesu i Tuatira?

²¹ E ao i Kerisiano taʻitoʻatasi pe i le vasega e pei o Ioane po o isi mamoe ona manatunatu i le feʻau lenei. (Ioane 10:16) E ono faigofie ona faaosoosoina nisi e mulimuli i se auala faigofie, e pei ona sa faia e soo o le Iesepela i Tuatira. E mafai foʻi ona faaosoosoina ia lē faamaoni. I aso nei, o loo fesagaʻi pea ma mataupu e pei o le taumafaina o taumafa e fai mai le toto po o le taliaina o tuiga toto. E ono manatu nisi faapea, a maelega i le talaʻiga po o le faia o lauga ona taga ai lea o lo latou faia o isi amioga lē talafeagai, e pei o le matamata i tifaga ma ata vitiō o faiga sauā ma amioga lē mamā faaleituaiga, po o le inutele i le ʻava malosi. Ua taʻu mai iā i tatou e le lapataʻiga a Iesu i Kerisiano i Tuatira e ao ona teena lenei uiga lē finauaʻia. E finagalo Ieova ia tatou mamā, ia auauna ma le loto atoa, ia lē faalotolotolua, e pei o le toʻatele o Kerisiano sa i Tuatira.

22. Ua faapefea ona faamamafa e Iesu le tāua o le iai o se taliga fia faalogo?

²² I le faaiʻuga ua faapea mai Iesu: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia.” (Faaaliga 2:29) O le faafā ai lea ona taʻua e Iesu lenei fuaitau faagaee loto, ma o le a faaiʻuina ai feʻau uma e tolu ia e leʻi oo mai. Po o iā te oe ea lenā taliga fia faalogo? Seʻi uaʻi mai pea la le faalogologo, a o faaaogā e le Atua lona agaga e faaauau ai ona aumai fautuaga e ala mai i lana auala o fesootaʻiga.

[Faaopoopoga i lalo]

[Fesili mo le Suʻesuʻega]

[Ata i le itulau 51]

I aso nei, ua faataunuuina ai se vaega tele o le galuega molimau atu e tuafāfine faamaoni, a o lagolagoina ma le loto maulalo le pule a le Atua