Mataupu 14

Le Matagofie o le Nofoālii o Ieova i le Lagi

Vaaiga 2—Faaaliga 4:1–5:14

Mataupu: Mea ofoofogia e tutupu i luma o le nofoālii o le faamasinoga a le Atua

Taimi o le faataunuuga: Ua faamatilatila e lenei vaaiga mea tutupu mai le 1914 seʻia oo i le iʻuga o le Meleniuma ma tala atu, o le a vivii atu foafoaga uma i le lagi ma le lalolagi iā Ieova.​—Faaaliga 5:13

1. Aiseā e tatau ai ona tatou matuā naunau i vaaiga ua faamatala mai e Ioane iā i tatou?

UA AMATA ona faamatala mai e Ioane iā i tatou isi vaaiga faagaee loto. O loo iai pea o ia i le aso o le Alii e ala i le taaʻiga a le agaga. O mea la ia ua ia faamatalaina mai, e iai ni uiga loloto mo i tatou o loo ola ai i lea aso. E ala i nei vaaiga, ua aveesea ai e Ieova le veli o le lē iloa manino o mea moni i le lagi, ma faailoa iā i tatou lona lava finagalo e uiga i ana sala faafaamasinoga e ao ona faaooina i le lalolagi. E lē gata i lea, pe o lo tatou faamoemoe o le lagi pe o le lalolagi, ae ua fesoasoani nei faaaliga ia tatou iloa ai lo tatou tulaga i le fuafuaga a Ieova. O lea la, e ao iā i tatou uma ona matuā naunau atu pea i le faaupuga a Ioane: “Amuia lē faitau, atoa ma ē faalogologo i upu o lenei valoaga, ma tausi i mea ua tusia ai.”​—Faaaliga 1:3.

2. O le ā le mea ua tupu nei iā Ioane?

² Ua tau atu nei le vaai a Ioane i se vaaiga e sili lona matagofie na i lo so o se ata vitiō ua faia e tagata i ona pō nei! Na ia tusia e faapea: “Ua mavae atu ia mea, ona ou iloa atu lea, faauta, o le faitotoʻa ua avanoa i le lagi, o le uluaʻi leo foʻi na ou faalogo ai e pei o le pu ona tautala mai iā te aʻu, ua faapea mai, ‘Inā sau ia i luga nei, ou te faaali atu ai iā te oe mea e tusa ona tutupu amulī.’” (Faaaliga 4:1) E ala i lenei vaaiga ua mafai ai ona iloa atu e Ioane le lagi lē vaaia o le afioaga o Ieova, e matuā silisili lava ma maualuga na i lo le vanimonimo o loo suʻesuʻeina e tagata suʻesuʻe o le vateatea; e sili mamao foʻi i aniva o le vateatea. I le peiseaʻī ua ulu atu i se faitotoʻa ua avanoa, ua valaauina Ioane ina ia silasila totoʻa i se ata faasolo o le lagi agaga atoa lava, le nofoaga ua afio tupu ai Ieova lava ia. (Salamo 11:4; Isaia 66:1) Maʻeu se faaeaga!

3. O le ā ua faamanatu mai i le leo “e pei o le pu” ma e mautinoa lava, o ai e puna mai ai lea leo?

³ E lē o faailoa maia e le Tusi Paia po o ai e ona lenei “uluaʻi leo.” Faapei o le siʻufofoga malosi o Iesu na faalogoina muamua, ua iai se leo e pei o se pu e avatu ai faatonuga. (Faaaliga 1:​10, 11) Ua faamanatu mai ai le taalili o le pu lea na faailoina ai le faatasi ane o Ieova i le Mauga o Sinai. (Esoto 19:18-20) E mautinoa la, o le siʻufofoga o Ieova o loo tulei mai. (Faaaliga 1:1) Ua ia tatalaina le faitotoʻa ina ia mafai ai e Ioane e ala i le vaaiga, ona ulu i le nofoaga e sili ona paia o le pule silisili ese a Ieova.

Le Afioaga Matagofie o Ieova

4. (a) O le ā le uiga ua iai i le vaaiga a Ioane mo Kerisiano faauuina? (e) O le ā le uiga o le vaaiga mo i latou o ē ola e faavavau i le lalolagi?

⁴ O le ā ua vaaia e Ioane? Faafofoga, a o ia faamatala mai iā i tatou le mea matagofie na tupu iā te ia: “Ona aʻu i le Agaga loa lea; faauta foʻi, ua tū mai le nofoālii i le lagi, ua tiʻetiʻe foʻi le tasi  i le nofoālii.” (Faaaliga 4:2) I se taimi faafuaseʻi lava, ua aveina ai faaleagaga Ioane e le malosi galue o le Atua i le nofoālii tonu lava o Ieova. Maʻeu se fiafiaga mo Ioane! Ua tuuina atu ai iā te ia i inei se faaataga segaia o lagi na o le a maua ai e ia ma isi Kerisiano faauuina “le tofi e lē pala, e leai se leaga o i ai.” (1 Peteru 1:3-5; Filipi 3:20) Ua iai foʻi se uiga loloto o le vaaiga a Ioane mo i latou o ē ola e faavavau i le lalolagi. Ua fesoasoani iā i latou e malamalama ai i le mamalu o le afioaga o Ieova ma le pulega faalelagi ua faaaogā e Ieova e faamasinoina ai atunuu, ma mulimuli ane pulea ai tagata i le lalolagi. E moni lava o Ieova o le Atua e sili ma matagofie lona maopoopo!

5. O le ā le mea moni ua vaaia e Ioane lea sa faaata mai e le ufi o le atolaau o le feagaiga?

⁵ O le tele o mea ua mātauina e Ioane i le lagi e foliga tutusa ma vala o le fale fetafaʻi i le vaomatua. Sa fausiaina lenei fale e tusa ma le 1,600 tausaga muamua atu, e avea o se malumalu o le tapuaʻiga moni mo tagata Isaraelu. I le Mea e Silisili ona Paia o lenā fale fetafaʻi sa iai le atolaau o le feagaiga, ma o luga ane o le ufi sausau auro atoa o lenā Atolaau, sa fetalai mai ai Ieova lava ia. (Esoto 25:17-22; Eperu 9:5) O le mea lea, na avea ai le ufi o le Atolaau ma faailoga o le nofoālii o Ieova. O lea ua vaaia nei e Ioane le mea moni lea sa faafaatusa mai muamua: o le Alii Pule Silisili Ese o Ieova lava ia o loo afio ma le matagofie tele i lona nofoālii malualii i le lagi!

6. O le ā le faamatalaga e uiga iā Ieova ua taʻu mai e Ioane iā i tatou, ma aiseā ua fetaui ai lenei faamatalaga?

⁶ E leʻi faamatala auʻiliʻili maia e Ioane Lē Paia o loo afio ai i inā, e pei ona faia e perofeta muamua o ē na maua vaaiga o le nofoālii o Ieova. (Esekielu 1:26, 27; Tanielu 7:9, 10) Ae o le faamatalaga lenei a Ioane e uiga i Lē o loo afio tupu ai i upu nei: “O lē tiʻetiʻe mai foʻi ua pei o le maa iasepi ma le salikea lona tino mai; ua siʻosiʻoina foʻi le nofoālii e le nuanua e pei o le samaraki lona tino mai.” (Faaaliga 4:3) Maʻeu se matagofie lē mafaatusalia! Ua vaaia e Ioane se matagofie susulu, feemoaʻi e pei o se maa tāua e feemoemoaʻi ma pupula. E matuā talafeagai lelei lenei mea ma le faamatalaga a le soo o Iakopo e uiga iā Ieova, o “le Tamā o malamalama”! (Iakopo 1:17) Ina ua faatoʻā uma ona tusia le Faaaliga, na taʻua ai e Ioane lava ia: “O le malamalama lava le Atua, a e leai lava se pōuliuli o iā te ia.” (1 Ioane 1:5) Maʻeu le pupula ma le mamalu lē mafaatusalia o Ieova lava ia!

7. O le ā e mafai ona tatou aʻoaʻoina mai le mea moni faapea e iai se nuanua faataamilo i le nofoālii o Ieova?

⁷ Mātau mai na vaaia e Ioane se nuanua faataamilo i le nofoālii, e pei o le samaraki lanu meamata lona lanu. O le upu Eleni ua faaliliuina i inei o nuanua (irʹis) e uiga atu i le lapotopoto atoa. Na uluaʻi taʻua le nuanua i le Tusi Paia i aso o Noa. Ina ua maui vai o le Lolo, na faapogaia e Ieova se nuanua e aliali ane i ao, ma sa ia faamalamalama mai le mea ua faaata e le nuanua i upu nei: “Ua ou tuuina laʻu nuanua i le ao, e fai ma faailoga o le feagaiga a le lalolagi ma aʻu. Ona ou manatua lea o laʻu feagaiga ua ou osia ma outou, ma mea ola eseese uma lava; e lē toe avea le vai ma lolo e faaumatia ai mea ola uma.” (Kenese 9:13, 15) O le ā la, na aumaia e le vaaiga faalelagi i le mafaufau o Ioane? Atonu sa faamanatu atu iā te ia e le nuanua le manaʻomia o se faiā filemu ma Ieova, e pei o lea o loo iai i aso nei i le vasega e pei o Ioane. O le a ia maofa ai foʻi i le malamalama ma le filemu o le afioaga o Ieova, o se malamalama o le a faalauteleina atu i tagata usiusitai uma pe a faalautele e Ieova lona fale fetafaʻi i luga o tagata i le lalolagi fou.​—Salamo 119:165; Filipi 4:7; Faaaliga 21:1-4.

Mātauliaina o Toeaina e Toʻa 24

8. O ai ua vaaia e Ioane o loo siʻosiʻoina le nofoālii, ma o ai ua faaata mai e i latou nei?

⁸ Sa iloa e Ioane na tofia faitaulaga e auauna i le fale fetafaʻi anamua. Atonu la na faateʻia o ia i le vaai atu i le mea lea ua sosoo mai nei lona faamatalaina: “Ua siʻosiʻoina foʻi le nofoālii e nofoālii e luafulu ma le fā; na ou iloa foʻi  o toeaina e toʻaluafulu ma le toʻafā o tiʻetiʻe i ia nofoālii, ua oofu i ofu sisina; ua i o latou ulu foʻi o pale auro.” (Faaaliga 4:4) Ioe, na i lo faitaulaga, ua iai toeaina e 24, ua nofoia nofoālii ma faapaleina e pei o ni tupu. O ai nei toeaina? O le ʻaufaauuina o le faapotopotoga Kerisiano, ua toe faatutūina ma maua le tofiga faalelagi na folafola atu e Ieova iā i latou. E faapefea ona tatou iloa lenā mea?

9, 10. Tatou te iloa faapefea ua faaata mai e toeaina e 24 le faapotopotoga o Kerisiano faauuina i o latou tulaga mamalu faalelagi?

⁹ Muamua lava, o loo latou paleina ni palealii. O loo tautala le Tusi Paia i Kerisiano faauuina, latou te mauaina ʻpale e lē pala’ ma maua se ola e lē gata mai​—e lē mafai ona oti. (1 Korinito 9:25; 15:53, 54) Ae talu ai o loo tiʻetiʻe nei toeaina e 24 i nofoālii, ua faaata mai la e palealii auro i lenei uiga le pule tautupu. (Faatusatusa i le Faaaliga 6:2; 14:14.) Ua lagolagoina ai e lenei manatu le faaiʻuga faapea, o toeaina e 24 ua faaata mai ai soo faauuina o ē mulimulituʻi i tulagāaao o Iesu ua i o latou tulaga faalelagi, auā sa faia e Iesu se feagaiga ma i latou e tiʻetiʻe i nofoālii i lona Malo. (Luka 22:28-30) Ua na o Iesu ma nei toeaina e 24​—e lē aofia ai agelu​—ua faamatalaina o loo pule i le lagi i le mea o afio ai Ieova.

¹⁰ Ua ōgatasi lenei ma le folafolaga na faia e Iesu i le faapotopotoga i Laotikaia: “O lē manumalo ou te avatua iā te ia ma te nonofo faatasi ma aʻu i loʻu nofoālii.” (Faaaliga 3:21) Ae lē o faatapulaaina le tofiga o toeaina e 24 i le pule faalemalo. I le faatomuaga i le tusi o le Faaaliga, na faapea mai ai Ioane e uiga iā Iesu: “Na ia faia foʻi i tatou faatupu, o ositaulaga i lona Atua ma lona Tamā.” (Faaaliga 1:5, 6) O i latou ia e lē gata o tupu ae ositaulaga uma foʻi. “E avea i latou ma ositaulaga a le Atua ma Keriso, latou te fai ma tupu foʻi faatasi ma ia i tausaga e afe.”​—Faaaliga 20:6.

11. Aiseā ua fetaui ai le aofaʻi e 24 o toeaina, ma o le ā ua faaata mai e lenā numera?

¹¹ O le ā se mea iloga i le numera 24, e pei ona iloa atu e Ioane toeaina e 24 o loo siʻosiʻoina le nofoālii? I le tele o itu, sa faaataina mai i latou nei e faitaulaga faamaoni o Isaraelu anamua. Na tusi le aposetolo o Peteru i Kerisiano faauuina: “A o outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai.” (1 Peteru 2:9) O le mea mataʻina, ona na vaevaeina le faiva faaositaulaga a Iutaia anamua i vaega e 24. Sa tofia atu i vaega taʻitasi a latou vaiaso i le tausaga e auauna ai i luma o Ieova, ina ia faaauau le auaunaga paia e aunoa ma le motusia. (1 Nofoaiga a Tupu 24:5-19) Ua fetaui ai la le faapea atu, e 24 toeaina o loo faaata mai ai i le vaaiga na iloa e Ioane, le faiva faaositaulaga i le lagi, auā o lenei faiva e faaauau pea lava pea ona auauna atu iā Ieova, e lē motusia. Pe a oo ina atoa, o le a iai vaega e 24, e tofu le vaega ma le ʻaumanumalo e 6,000, auā ua taʻu mai e le Faaaliga 14:1-4 iā i tatou, “ua faatauina nai tagata” le 144,000 (24 x 6,000) e tutū i le Mauga o Siona faalelagi e faatasi ma le Tamaʻi Mamoe, o Iesu Keriso. Talu ai e faaata mai e le numera 12 se faamaopoopoga lelei o mea a le Atua, o le numera 24 la e faaluaina​—pe faamalosiina ai—se faatulagaga faapena.

Uila, Leo, ma Faititili

12. O le ā le mea na sosoo ai ona vaaia ma faalogoina e Ioane, ma o le ā ua faamanatu mai e “uila, ma faititili, ma leo”?

¹² O le ā le mea ua sosoo ona vaaia ma faalogoina e Ioane? “Ua oo mai foʻi uila, ma faititili, ma leo mai le nofoālii.” (Faaaliga 4:5a) E mautinoa lava le faamanatu mai ai o isi faailoaga e mataʻu ai o le mana faalelagi o Ieova! Mo se faaaʻoaʻoga, ina ua “afio ifo” Ieova i le Mauga o Sinai, na lipotia mai e Mose: “Ona oo lea i le aso tolu i le taeao, ua i luga o le mauga o faititili, ma uila, ma le ao uliuli, o le leo foʻi o le pu . . . O le leo o le pu ua alualu ona tele lava; ua tautala atu Mose, ona talia mai lea e le Atua iā te ia i le siʻufofoga.”​—Esoto 19:16-19.

13. O le ā ua faaata mai e uila mai le nofoālii o Ieova?

¹³ A o faagasolo le aso o le Alii, o le a faailoa  ai e Ieova lona mana ma lona faatasi mai i se auala e silisili ese. E lē auala mai i uila moni lava, auā o loo vaaia e Ioane ni faailoilo. O le ā la, o faaata mai e uila? O le feemoaʻi mai o uila e mafai ona faamalamalamaina ai, ae mafai foʻi ona taia ai se tasi ia oti. O le mea lea, o nei uila mai le nofoālii o Ieova ua fetaui ona faaata mai ai le susulu o le malamalama lea ua faaauau pea ona ia tuuina mai i ona tagata, ae sili atu ai ona mataʻina, o ana feʻau aasa faafaamasinoga.​—Faatusatusa i le Salamo 18:14; 144:5, 6; Mataio 4:14-17; 24:27.

14. Ua faapefea ona logoina atu leo i aso nei?

¹⁴ Ae faapefea leo? I le taimi o le afio ifo o Ieova i le Mauga o Sinai, sa fetalai ane se leo iā Mose. (Esoto 19:19) Na aumaia e leo mai le lagi le tele o poloaʻiga ma faalauiloaga o loo i le tusi o Faaaliga. (Faaaliga 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) I aso nei, ua logoina atu foʻi e Ieova poloaʻiga ma faalauiloaga i ona tagata, e faamanino ai lo latou malamalamaga i valoaga ma mataupu silisili o le Tusi Paia. Ua masani ona faailoa mai i tauaofiaga faavaomalo faamatalaga e malamalama ai, ma ua faapea ai ona folafola atu i le lalolagi atoa nei upu moni o le Tusi Paia. Na faapea mai le aposetolo o Paulo e faatatau i ē talaʻi faamaoni o le tala lelei: “E moni, ua oo lo latou leo i le lalolagi uma lava, o a latou upu foʻi i tuluʻiga o le atu laulau.”​—Roma 10:18.

15. O ā faititili ua faasolo mai le nofoālii i lenei vaitaimi o le aso o le Alii?

¹⁵ E masani ona mulimuli mai le faititili i le uila. Sa faasino e Tavita i le faititili moni o “le siʻufofoga o Ieova.” (Salamo 29:3, 4) Sa taʻua faapea na sau le faititili mai iā Ieova ina ua tau o Ia mo Tavita faasaga i ona fili. (2 Samuelu 22:14; Salamo 18:13) Sa taʻu atu e Eliu iā Iopu o le siʻufofoga o Ieova e pei o le faititili, a o Ia faia “mea tetele e lē mailoa e i tatou.” (Iopu 37:4, 5) I lenei vaitaimi o le aso o le Alii, ua ʻfaafaititili’ mai ai e Ieova le lapataʻiga o mea tetele o le a ia gaoioi ai i ona fili. O nei taalili faafaatusa o faititili ua laulogo ma toe laulogo i le lalolagi atoa. Amuia oe pe afai ua e uaʻi atu i nei faalauiloaga pei o faititili, ma o loo faaaogā ma le atamai lou laulaufaiva e te faaopoopo atu ai i o latou leotetele!​—Isaia 50:4, 5; 61:1, 2.

Sulu Mumū ma le Sami Tioata

16. O le ā ua faauiga i ai ʻsulu e fitu o mumū’?

¹⁶ O le ā ua vaaia atili e Ioane? O lenei: “O sulu foʻi e fitu o mumū faamalamalama i luma o le nofoālii, o agaga ia e toʻafitu o le Atua. Ua i luma foʻi o le nofoālii le sami tioata, e pei o le maa tioata.” (Faaaliga 4:5e, 6a) Ua taʻu mai e Ioane lava ia le uiga o sulu po o lamepa e fitu: “O Agaga ia e toʻafitu o le Atua.” Ua faaatagia mai e le numera fitu le atoatoa i mea a le Atua; o lea la e ao i sulu e fitu ona faaata mai ai le atoatoa o le malosi o le agaga paia e faamalamalama aʻi. Maʻeu le loto faafetai o le vasega e pei o Ioane i aso nei ona ua tuuina atu lenei faamalamalamaga, ma le tiute tauave e tufaina atu i tagata o le lalolagi o ē o loo fia taumamafa faaleagaga! Maʻeu lo tatou fiafia ona o tausaga taʻitasi e silia i le faitau selau miliona kopi o le mekasini o Le Olomatamata o loo faaauau pea ona faasusuluina atu lenei malamalama i le pe tusa ma le 150 gagana!​—Salamo 43:3.

17. O le ā ua faaata mai e le “sami tioata, e pei o le maa tioata”?

¹⁷ Ua vaaia foʻi e Ioane se “sami tioata, e pei o le maa tioata.” O le ā ua faaata mai e lenei mea e tusa ai ma i latou ua valaaulia i totonu o le lotoā faalelagi a Ieova? Sa tautala Paulo i le auala na faapaia ai e Iesu le faapotopotoga, i le “faamamāina i le faataeleina i le vai atoa ma le upu.” (Efeso 5:26) A o leʻi maliu Iesu, sa fetalai atu i ona soo: “Ua uma ona faamamāina o outou i le upu na ou tautala atu ai iā te outou.” (Ioane 15:3) O le mea lea, ua ao i lenei sami tioata e pei o le maa tioata ona faaata mai ai le Afioga faamaumauina a le Atua e mafai ona faamamāina ai. O i latou na ua iai i le tulaga o ositaulaga ma tupu, o ē ulu atu i le afioaga o Ieova, ua tatau ona faamamāina māeʻaeʻa i lana Afioga.

 Faauta​—O “Mea Ola e Fā”!

18. O le ā ua vaaia e Ioane i totonu ma ua liʻoliʻoina ai le nofoālii?

¹⁸ Ua mātauina nei e Ioane se isi vala. Ua ia tusi mai: “Ua i totonu o le nofoālii ma ua liʻoliʻoina le nofoālii e mea ola e fā, ua tutumu i mata i luma atoa ma tua.”​—Faaaliga 4:6e.

19. O le ā ua faaata mai e meaola e fā, ma tatou te iloa faapefea lenei mea?

¹⁹ O le ā ua faaata mai e nei meaola? Tatou te ono maua le tali, i se vaaiga na lipotia mai e le perofeta o Esekielu. Sa vaaia e Esekielu Ieova o loo afio i se kariota faalelagi, lea o loo iai faatasi ma meaola o lo latou tino mai e tutusa ma foliga ia na faamatalaina e Ioane. (Esekielu 1:5-11, 22-28) Mulimuli ane, na toe vaaia e Esekielu lenā nofoālii kariota o loo iai faatasi ma meaola. Peitaʻi i lea taimi, o meaola ia o loo ia taʻua, o kerupi. (Esekielu 10:9-15) O meaola e fā na vaaia e Ioane e ao ona faaata mai ai kerupi e toʻatele a le Atua​—o meaola e maualuluga tulaga i totonu o Lana faalapotopotoga agaga. E leʻi manatu Ioane o se mea e lē masani ai le vaaia o kerupi o tutū latalata tele iā Ieova, talu ai i le faatulagaga o le fale fetafaʻi anamua, sa iai kerupi auro e lua i luga o le ufi o le atolaau o le feagaiga, lea sa fai ma sui o le nofoālii o Ieova. Mai le va o nei kerupi, sa fofoga mai ai e le siʻufofoga o Ieova poloaʻiga i le nuu.​—Esoto 25:22; Salamo 80:1.

20. I le ā le auala e mafai ai ona faapea atu o loo iai meaola e fā “i totonu o le nofoālii ma ua liʻoliʻoina le nofoālii”?

²⁰ O nei meaola e fā o loo “i totonu o le nofoālii ma ua liʻoliʻoina le nofoālii.” O le ā tonu lava le uiga o lenei mea? E mafai ona faailoa mai ai o loo faatulaga i latou i se auala e tū le tasi i le ogatotonu o itu taʻitasi o le nofoālii. O le ala lea, ua toe faaupu ai e le ʻaufaaliliu o le Today’s English Version le uluaʻi faaupuga Eleni i le auala lenei: “liʻoliʻoina le nofoālii i ona itu taʻitasi.” I se isi itu, e mafai ona uiga le faaupuga faapea o loo iai meaola e fā i se tulaga ogatotonu i le lagi, le mea o iai le nofoālii. E foliga mai o le pogai lea ua faaaogā ai e le Jerusalem Bible le faaupuga: “i le ogatotonu, faaputuputu faataamilo i le nofoālii lava ia.” O le mea tāua o le latalata o kerupi i le nofoālii o Ieova, e faatusalia lea i kerupi ia na vaaia e Esekielu i tulimanu taʻitasi o le faalapotopotoga a Ieova pei se kariota. (Esekielu 1:15-22) E ōgatasi nei mea uma ma upu o le Salamo 99:1: “Ua fai Ieova ma tupu . . . o loo tiʻetiʻe o ia i le va o kerupi.”

21, 22. (a) Ua faapefea ona faamatalaina e Ioane meaola e fā? (e) O le ā ua faaata mai e le foliga mai o meaola taʻitasi e fā?

²¹ Ua faaauau le faamatalaga a Ioane: “O le mea ola muamua e pei o le leona, o lona lua o mea ola e pei o se povi taanoa, o lona tolu o mea ola e pei o le tagata ona mata, o lona fā foʻi o mea ola e pei o le aeto ua lele.” (Faaaliga 4:7) Aiseā e matuā eseese uma ai foliga o nei meaola e fā? O nei meaola e matuā eseese e manino le faamatilatila mai ai o uiga patino o le Atua. Muamua, o le leona. Ua faaaogā i le Tusi Paia le leona o se faailoga o le lototele, aemaise i le saʻiliga o le faamasinoga tonu ma le amiotonu. (2 Samuelu 17:10; Faataoto 28:1) Ua talafeagai ai la ona faaata mai e le leona le uiga o le Atua o le faamasino tonu ma le lototele. (Teuteronome 32:4; Salamo 89:14) Ua pei le meaola lona lua o se tamaʻi povi taanoa. O le ā le uiga e aumaia e le povi taanoa i lou mafaufau? O le povi taanoa sa fai ma mea tāua i tagata Isaraelu ona o lona malosi. (Faataoto 14:4; tagaʻi foʻi i le Iopu 39:9-11.) O le tamaʻi povi taanoa la, e faaata mai ai le mana, le malosi tele e pei ona saunia mai e Ieova.​—Salamo 62:11; Isaia 40:26.

²² O le meaola lona tolu e iai foliga e pei o se tagata. E ao ona faaata mai ai le alofa o le Atua, talu ai sa na o le tagata lava i le lalolagi na foafoaina i le faatusa o le Atua, e aofia ai le uiga silisili ona maualuga o le alofa. (Kenese 1:26-28; Mataio 22:36-40; 1 Ioane 4:8, 16) E mautinoa ua faaalia e kerupi lenei uiga a o latou liʻoliʻo ma auauna i le nofoālii o Ieova. Ae ā la le meaola lona fā? O lenei meaola i ona foliga mai e pei o se aeto o loo lele. Ua  faauaʻi atu e Ieova manatu i le malosi o le vaai a le aeto: “Ua vaai mamao atu ai ona mata.” (Iopu 39:29) Ua fetaui ai la le avea o le aeto ma faailoga o le poto ma le tofā mamao. O Ieova o le Puna o le poto. Ua faaaogā e ana kerupi le poto mai le Atua, a o latou usitaia ana poloaʻiga.​—Faataoto 2:6; Iakopo 3:17.

Ofoina Atu o Viiga o Ieova

23. O le ā ua faaata e le mea moni faapea o meaola e fā ua ʻtutumu i mata,’ ma o le ā ua faamamafa mai e le iai o o latou apaʻau taʻilua e tolu?

²³ Ua faaauau e Ioane lana faamatalaga: “O mea ola foʻi e fā e taʻitasi ma ona apaʻau e ono, ua mata atoa i latou i fafo ma totonu; latou te lē mapu lava i le ao ma le pō i le fai atu, ʻE paia, e paia, e paia le Alii le Atua e ona le malosi uma lava, o lē na soifua, o loo soifua foʻi, o le a afio mai!’” (Faaaliga 4:8) O lenei faatumulia i mata ua taʻu mai ai le atoatoa ma le mamao o le tofā. E faaauau pea ona fai e meaola e fā lenei mea, auā e lē manaʻomia fua ona momoe. Ua latou faataʻitaʻi i Lē ua tusia e uiga i ai: “Auā o fofoga o Ieova e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.” (2 Nofoaiga a Tupu 16:9) Ona ua iai i kerupi mata e sili ona tele, ua latou mafai ai ona iloa so o se mea. E leai se mea e misi i la latou vaai. O lona uiga ua faaauupegaina lelei i latou e auauna i le Atua i lana galuega o le faamasinoga. Ua faapea mai e uiga iā te ia: “O loo i mea uma lava fofoga o Ieova; o loo matuā silasila i ē amio leaga ma ē amio lelei.” (Faataoto 15:3) Ma faatasi ai ma apaʻau taʻilua e tolu​—o le numera tolu ua faaaogā i le Tusi Paia mo le faamamafaga​—ua mafai ai ona gaoioi kerupi e pei o le emo o le uila i le faasilasilaina ma le faaooina atu o faamasinoga a Ieova.

24. O faapefea ona viiviia Ieova e kerupi, ma faatasi ai ma le ā le uiga?

²⁴ Faalogo! O fātiga mālie, e faagaee loto, o le pese lea o viiga ua avatu e kerupi iā Ieova: “E paia, e paia, e paia le Alii le Atua e ona le malosi uma lava, o lē na soifua, o loo soifua foʻi, o le a afio mai.” Ua toe faasino mai foʻi e le faatoluina, le loloto po o le mamafa. E ioeina malosi e kerupi le paia o Ieova le Atua. O ia o le Puna ma le Ausiaga silisili o le paia. O ia foʻi o “le Tupu o le vavau,” e avea pea ma “Alefa ma le Omeka, o le amataga ma le gataaga, o le muamua ma le mulimuli.” (1 Timoteo 1:17; Faaaliga 22:13) E leai ni vaitaimi mālōlō o kerupi a o latou faalauiloa atu uiga lē mafaatusalia o Ieova i foafoaga uma.

25. Ua autasi faapefea meaola ma toeaina e 24 i le faamamaluina o Ieova?

²⁵ Ua faaleoina e le lagi o lagi viiga iā Ieova! Ua faaauau le faamatalaga a Ioane: “A vivii foʻi, ma faaneenee, ma faafetai atu mea ola i lē o tiʻetiʻe i le nofoālii, o lē soifua e faavavau e faavavau lava, ona faapaʻū ai lea o toeaina e toʻaluafulu ma le toʻafā i luma o lē tiʻetiʻe i le nofoālii, ma ifo atu i lē soifua e faavavau e faavavau lava, ma lafo o latou pale i luma o le nofoālii, o loo faapea atu, ʻLo matou Alii e, ma lo matou Atua, e tatau lava oe ina ia tuu atu iā te oe le viiga, ma le faaneeneega, ma le mana; auā na e faia mea uma lava, ona o lou finagalo foʻi e i ai i latou ma ua faia.’” (Faaaliga 4:9-11) I le Tusi Paia atoa, o se tasi lenei o faalauiloaga sili ona matagofie o faaaloaloga iā Ieova, lo tatou Atua ma le Alii Pule Silisili Ese!

26. Aiseā e lafo atu ai e toeaina e 24 o latou palealii i luma o Ieova?

²⁶ Ua i toeaina e 24 le uiga faalemafaufau lava lea e tasi e faaalia e Iesu, e oo lava i le lafo atu o o latou palealii i luma o Ieova. E matuā mamao mai o latou mafaufau le faasilisilia o i latou lava i le faatasi ai ma le Atua. Latou te amanaʻia ma le loto maulalo le fuafuaga autū o lo latou tulaga tautupu, o le aumaia ai lea o le mamalu ma le viiga iā Ieova, e pei ona fai e lē aunoa e Iesu. (Filipi 2:5, 6, 9-11) Ma le gauaʻi lava, latou te faailoaina ai lo latou lava tulaga maulalo ma taʻutino atu, e faalagolago la latou pulega, i le pule silisili ese a Ieova. O lea, ua latou autasi ai ma kerupi faapea ma isi foafoaga faamaoni uma, i le avatuina o le viiga ma le mamalu i le Atua o lē na foafoaina mea uma.​—Salamo 150:1-6.

27, 28. (a) E ao faapefea ona aafia i tatou i le faamatalaina e Ioane o lenei vaaiga? (e) O ā fesili ua mapuna aʻe e tusa ai ma le mea na sosoo ai ona vaaia ma faalogoina e Ioane?

 ²⁷ O ai sē o le a lē faagaeetia a o faitauina le faamatalaga a Ioane i lenei vaaiga? E matuā matagofie, e ofoofogia! Ae faapeʻī pe ana faapea sa vaai moni lava i ai? E ao i le mamalu o Ieova ona faagaoioia ai so o se tasi ma se loto talisapaia, e auai ma meaola e fā ma toeaina e 24 i le viiaina o Ia, i le tatalo ma faalauiloa faalauaʻitele Lona suafa. O le Atua lenei ua faaeaina ai Kerisiano e fai ma ana molimau i aso nei. (Isaia 43:10) Manatua e faatatauina le vaaiga a Ioane i le aso o le Alii, lea o loo tatou iai nei. Ua nofo sauni ʻagaga e toʻafitu’ e taʻitaʻia ma faamalosia i tatou. (Kalatia 5:16-18) Ua mafai ona maua le Afioga a le Atua i aso nei e fesoasoani iā i tatou ina ia tatou paia a o auauna atu i le Atua paia. (1 Peteru 1:14-16) E mautinoa lava, tatou te fiafia e faitau leotele upu o lenei valoaga. (Faaaliga 1:3) Maʻeu se faalaeiauga ua saunia mai ai, ina ia faamaoni iā Ieova ma ia aua neʻi faatagaina le lalolagi e faatosina ese i tatou mai le usuina ma le tiotio o ona viiga!​—1 Ioane 2:15-17.

²⁸ E oo mai i le taimi nei, ua faamatalaina e Ioane le mea ua ia vaaia, ina ua valaaulia o ia e ulu atu i lenā faitotoʻa ua avanoa i le lagi. O le mea e sili ona mataʻina, ua ia lipotia mai faapea o loo afio Ieova, i le matagofie uma o Lona mamalu ma le malualii, i Lona nofoālii faalelagi. Ua siʻosiʻomia o ia e le faalapotopotoga silisili ona malosi​—ua pupula i lona matagofie ma le faamaoni. Ua faagasolo le Faamasinoga a le Atua. (Tanielu 7:9, 10, 18) Ua iai nei se faatulagaga mo se mea ese o le a tupu. O le ā lea mea, ma e faapefea ona aafia ai i tatou i aso nei? Seʻi tatou matamata a o amata ona faamatala mai!

[Fesili mo le Suʻesuʻega]

 [Ata i le itulau 75]

 [Ata i le itulau 78]