Mataupu 11

O Iai ea Lou Suafa i le Tusi o le Ola?

SARATAISA

1. O le ā le tulaga faaleagaga o le faapotopotoga i Sarataisa, ma na faapefea ona amata e Iesu lana feʻau?

PE TUSA ma le 30 maila (48 kilomita) i saute o Akhisar i ona pō nei (Tuatira) o loo iai le faapotopotoga lea na sosoo ai lo latou mauaina o se feʻau mai iā Iesu lē ua faamamaluina: O Sarataisa. I le senituri lona ono T.L.M., sa avea ai le aai lenei ma laumua matagofie o le malo anamua o Litia, ma o le nofoaga o le tupu sili ona mauʻoa o Kose (Croesus). E oo ane i aso o Ioane, ua matuā leaga faia lava le tulaga o mea, ma o lona matagofie lea sa iai i taimi o le pulega a Kose, ua lē toe iai. Ua faapena foʻi ma le faapotopotoga Kerisiano sa iai i inā, ua matuā matitiva lava faaleagaga. O le taimi muamua lea, ua lē amata ai e Iesu sana feʻau i se faamālō. Na i lo lea, ua ia fetalai atu: “Ia e tusi foʻi i le agelu a le ekalesia o i Sarataisa: O mea nei ua fai mai ai lē ua i ai agaga e toʻafitu o le Atua, ma fetu e fitu. ʻUa ou iloa au galuega, ua iā te oe le igoa ua e ola, a ua e oti.’”​—Faaaliga 3:1.

2. (a) O le ā le tāua i Kerisiano i Sarataisa o le iai iā Iesu o “agaga e toʻafitu”? (e) O le ā le talaaga sa iai i le faapotopotoga i Sarataisa, ae o le ā lona tulaga moni?

 ² Aiseā ua faailoa ai e Iesu ia lava o lē “ua i ai agaga e toʻafitu”? Auā o agaga nei e faaataina ai le agaga paia o Ieova o loo tafe mai i lona tulaga atoatoa. Mulimuli ane, na faamatalaina foʻi e Ioane agaga nei o “mata e fitu,” e faaalia ai le silafaga e ati i mea uma, lea ua foaʻiina atu e le agaga paia o le Atua iā Iesu. (Faaaliga 5:6) O lona uiga, e mafai ona ia faaalia ma tauaaoina so o se tulaga e tulaʻi mai. (Mataio 10:26; 1 Korinito 4:5) Sa lauiloa le faapotopotoga i Sarataisa i lona talaaga olaola ma le maelega. Ae na mafai ona silafia mai e Iesu lo latou oti faaleagaga. E foliga mai, o le toʻatele o ona tagata ua aunoa ma ni faalogona alofa e pei lava o lo latou tulaga a o leʻi avea ma Kerisiano.​—Faatusatusa i le Efeso 2:1-3; Eperu 5:11-14.

3. (a) Aiseā e ao ai “i le agelu a le ekalesia o i Sarataisa” ona mātau faapitoa le mea moni o loo iā Iesu “fetu e fitu”? (e) O le ā le aʻoaʻiga malosi na tuuina atu e Iesu i le faapotopotoga i Sarataisa?

³ Na faamanatu foʻi e Iesu i “le agelu a le ekalesia, o i Sarataisa” o Ia o loo iai “fetu e fitu.” Na te umia na toeaina o faapotopotoga i lona aao taumatau, i le iai o le pule e faatonutonu ai i latou i la latou galuega faaleoleo mamoe. E tatau ona latou mafaufau lelei ina ia ʻiloa tino mamoe o le lafu.’ (Faataoto 27:23) Sa tatau lava la ona latou faalogo ma le faaeteete i fetalaiga a Iesu na sosoo ai: “Ia e mataala, ma ia e faatumauina mea ua totoe, o le a mate; auā ou te leʻi iloa au galuega ona atoatoa i luma o le Atua. O lea foʻi ia e manatu ai i mea ua e maua ma ua e faalogo ai, ma ia e taofiina ai, ma ia e salamō. Afai foʻi e te lē mataala, ou te alu atu iā te oe e pei o se gaoi, e te lē iloa foʻi le itu aso ou te alu atu ai iā te oe.”​—Faaaliga 3:2, 3.

4. E faapefea ona fesoasoani i le faapotopotoga i Sarataisa upu a Peteru ina ia “faatumauina mea ua totoe”?

⁴ E ao i le ʻautoeaina i Sarataisa ona manatua le olioli sa latou muaʻi maua ina ua latou aʻoaʻoina le upu moni ma faamanuiaga na latou maua ai. Ae o lenei ua latou feoti e tusa ai o gaoioiga faaleagaga. Ua tau pulapula la latou lamepa o se faapotopotoga ona o le leai o ni galuega o le faatuatua. I tausaga muamua atu, sa tusi ai le aposetolo o Peteru i faapotopotoga i Asia (e foliga mai e aofia ai ma Sarataisa) ina ia ati aʻe le talisapaia mo le tala lelei fiafia lea ua taliaina e Kerisiano ma ua faalauiloaina “ma le Agaga Paia ua auina mai mai le lagi”​—e pei ona faaataina e agaga e fitu o le vaaiga a Ioane. Sa faamanatu atu foʻi e Peteru i na Kerisiano Asia e faapea o latou o ʻle tupulaga ua filifilia, o tupu ma ositaulaga, o le nuu paia, ma le nuu na faatauina mai e le Atua ina ia latou taʻutaʻu atu ana galuega lelei o lē ua valaau iā te i latou nai le pōuliuli ina ia oo i lona lava malamalama e matuā ofo ai.’ (1 Peteru 1:12, 25; 2:9) O le manatunatu loloto i na upu moni faaleagaga o le a fesoasoani i le faapotopotoga i Sarataisa e salamō ai ma “faatumauina mea ua totoe.”​—Faatusatusa i le 2 Peteru 3:9.

5. (a) O le ā na tupu i le loto talisapaia o Kerisiano i Sarataisa? (e) O le ā o le a tupu pe a lē taliaina e Kerisiano i Sarataisa le fautuaga a Iesu?

⁵ I lea taimi, ua pei lo latou loto talisapaia ma le alofa mo le upu moni o se afi ua toetoe a mate. Na o ni nai malala mumū o loo tau pulapula pea. Ua faalaeiau i latou e Iesu ina ia tapili aloiafi, saʻeu le afi, ia salamō i agasala na latou faia ona o lo latou faatalalē, ma toe avea ai o se faapotopotoga e olaola faaleagaga. (Faatusatusa i le 2 Timoteo 1:6, 7.) Pe a lē faia faapea, o le a faateʻia le faapotopotoga i Sarataisa pe a afio faafuaseʻi mai Iesu “e pei o se gaoi,” e faaoo le faamasinoga.​—Mataio 24:43, 44.

E Afio Mai “e Pei o se Gaoi”

6. Na faapefea ona afio mai Iesu “e pei o se gaoi” i le 1918, ma o le ā le tulaga na ia maua mai i ai nisi o ē na faapea mai o ona soo?

⁶ E iai foʻi se uiga mo i tatou i aso nei o le lapataʻiga a Iesu faapea, o le a ia afio mai “e pei o se gaoi.” E iai se faatatauga faapitoa mo Kerisiano o ē o soifua pea e oo mai i le aso o le Alii. Ina ua faatoʻā mavae lava le 1914, sa faataunuuina ai le valoaga a Malaki: “E faafuaseʻi foʻi ona oo mai i lona malumalu o le Alii, o lē ua saunia e outou, o le Agelu [po o le sāvali] lava lea o le feagaiga, o lē ua outou naunau iai; faauta, e afio mai lava o ia, ua fetalai mai ai  Ieova o ʻau.” (Malaki 3:1; Faaaliga 1:10) I le avea o Iesu ma sāvali o le feagaiga, sa afio mai o ia e asiasi ma faamasino i latou o ē na faapea mai o ona soo. (1 Peteru 4:17) Sa aafia Kerisiano o ē na vavae ese mai le Faa-Kerisiano moni i lenā taimi i le 1918, i le faamasaatoto i le Taua Muamua a le Lalolagi, ma i le tulaga faaleagaga lava ia e tusa ua matuā feoti lava. E oo foʻi i Kerisiano moni o ē na matuā maelega e talaʻi a o leʻi oo i le taua, sa latou iai i se vaitaimi ua matamomoe faaleagaga. Sa faafalepuipuiina nisi o o latou toeaina iloga, ma na toetoe lava taofia ai le galuega talaʻi. Ina ua fafaguina e le agaga o Ieova nei Kerisiano i le tausaga na sosoo ai, sa iai nisi e leʻi nofosauni. O nisi sa pei o taupou vālea o le faataoto a Iesu, e leʻi faaauupegaina faaleagaga mo le faaeaga o le auauna iā Ieova. Ae o le itu e fiafia ai, e toʻatele i latou na pei o taupou popoto, na utagia le lapataʻiga a Iesu: “O lea, ia outou mataala ai, auā tou te lē iloa le aso po o le itu aso.”​—Mataio 25:1-13.

7. Aiseā e manaʻomia ai e Kerisiano i aso nei ona mataala pea?

⁷ E leʻi gata ai i le amataga o le aso o le Alii le manaʻomia i se Kerisiano ona mataala. I lana valoaga sili e faatatau i “le faailoga pe a lata ona taunuu o ia mea uma,” sa aumaia ai e Iesu se lapataʻiga malosi: “A o lea aso ma lea itu aso e lē iloa e se tasi, . . . Ia outou, inā mataala ia, auā tou te lē iloa pe oo mai afea ia aso. O le mea ou te fai atu iā te outou, ou te fai atu ai i tagata uma: Inā mataala ia.” (Mareko 13:4, 32, 33, 37) Ioe, e oo mai lava i lenei itula, e manaʻomia e i tatou uma taʻitoʻatasi, pe faauuina pe mo le motu o tagata e toʻatele, ona tumau i le mataala ma tetee malosi i le faasolosolo lemū ona moe faaleagaga. Pe a oo mai le aso o Ieova “e pei o le gaoi i le pō,” tau ina ia maua mai i tatou o tatou mataala pea, ina ia maua ai se faamasinoga lelei.​—1 Tesalonia 5:2, 3; Luka 21:34-36; Faaaliga 7:9.

8. Ua faapefea ona uunaʻia i aso nei e le vasega e pei o Ioane, tagata o le Atua ina ia olaola pea pe ia malolosi faaleagaga?

⁸ O loo mataala le vasega e pei o Ioane i aso nei i le manaʻoga ina ia uunaʻia tagata o le Atua ia olaola pea pe ia malolosi faaleagaga. O le ala lea, ua fuafuaina ai faatasiga faapitoa i le lalolagi atoa i ni taimi o tausaga taʻitasi. I se tausaga talu ai nei, na auai atu ai i ni tauaofiaga itumalo e 2,981, se aofia e tusa ma le 10,953,744, ae toʻa 122,701 soo fou na papatisoina ai. Ua sili atu nei i le selau tausaga, o faaaogā e le vasega e pei o Ioane le mekasini o Le Olomatamata i le faalauiloaina o le suafa o Ieova ma ana fuafuaga. I le tali atu i sauāga ogaoga i le vaitaimi o taua e lua a le lalolagi, sa faagaeeina ai e Le Olomatamata faa-Peretania Molimau a Ieova i se maelega toe faafouina e ala i le lomia o mataupu e pei o le “Amuia Ē e Lē Matataʻu” (1919), “Se Valaau mo Gaoioiga” (1925), ma “Le Toʻilalo o Sauāga” (1942).

9. (a) O le ā e tatau i Kerisiano uma ona fesiligia ai i latou lava? (e) O le ā le faalaeiauga ua aumaia e Le Olomatamata?

⁹ E pei ona sa iai i Sarataisa, e faapena foʻi i faapotopotoga i aso nei, e tāua mo Kerisiano uma ona faaauau le suʻesuʻe ifo o le tagata iā te ia lava. E tatau iā i tatou uma ona fesiligia pea lava pea i tatou lava: Pe o ʻfaia atoatoa ea a tatou galuega’ i luma o lo tatou Atua? E aunoa ma le faamasinoina o isi, pe o tatou taʻitoʻatasi ea ma ati aʻe le agaga faataulagaina o i tatou lava ma tauivi ina ia auauna ma le loto atoa i le Atua? Ona o lea tulaga, ua aumaia ai e Le Olomatamata faalaeiauga e ala i le talanoaina o mataupu e pei o le “Inā Suʻesuʻe Ifo ia iā te Outou” ma le “Ola e Lē mo i Tatou Lava.” * I le mauaina o sea fesoasoani faale-Tusi Paia seʻi o tatou suʻesuʻeina o tatou lava tagata lilo a o tatou taumafai e savavali ma le loto maulalo ma le tatalo i le faamaoni i luma o Ieova.​—Salamo 26:1-3; 139:23, 24.

“Ni Nai Tagata”

10. O le ā le vala faalaeiau sa mātauina e Iesu i le faapotopotoga i Sarataisa, ma e ao faapefea ona aafia ai i tatou?

¹⁰ O fetalaiga a Iesu e sosoo ai i le faapotopotoga i Sarataisa e sili atu ona faalaeiau. Na ia fetalai: “Ua iā te oe ni nai tagata i Sarataisa lava, o ē ua lē faaeleelea o latou ofu; latou te savavali ma aʻu i ofu  sisina, auā ua tatau ai i latou. O lē manumalo, e faaofuina o ia i ofu sisina; ou te lē soloiesea foʻi lona igoa i le tusi o le ola, a e ou te taʻu atu lona igoa i luma o loʻu Tamā, ma luma o ana agelu.” (Faaaliga 3:4, 5) Pe lē faagaeetia ea i tatou e nei fetalaiga ma faamalosia ai lo tatou maumauaʻi ia faamaoni? E mafai ona paʻū atu se faapotopotoga atoa i le moegase faaleagaga, pe a faatalalē le ʻautoeaina. Ae peitaʻi, e ono tauivi ma le loto tele nisi tagata taʻitoʻatasi i le faapotopotoga e tausia pea le mamā ma le lē ponā o la latou faailoga o ni Kerisiano ma faaauau ai ona maua se igoa lelei i le silasila a Ieova.​—Faataoto 22:1.

11, 12. (a) E oo lava i le vaitaimi na matuā iloga ai le liliu ese mai le upu moni, na faapefea i nisi ona pei o “nai tagata” toʻaitiiti faamaoni i Sarataisa? (e) O le ā le mapusaga na oo i Kerisiano na faaata mai i saito i le aso o le Alii?

¹¹ Ioe, e faasino na “ofu” i se faailoga amiotonu a se tagata e avea ai o se Kerisiano. (Faatusatusa i le Faaaliga 16:15; 19:8.) Atonu o se faamāfanafanaloto mo Iesu lona silafia, e ui lava i le leai o ni faalogona alofa o le toʻatele, ae o loo iai “ni nai tagata,” ni Kerisiano faauuina toʻaitiiti i Sarataisa, sa mafai pea ona tausia lenei faailoga. Sa faapena foʻi i le taimi ina ua avea i latou na fai mai o Kerisiano, ma vaega o Papelonia le Aai Sili, le tuufaatasiga o lotu sesē a le lalolagi. A o faagasolo senituri e tele lea na matuā iloga ai le liliu ese mai le upu moni atonu sa iai pea ni tagata taʻitoʻatasi sa taumafai e fai le finagalo o Ieova, e ui i tulaga sili ona faigatā sa iai. O tagata amiotonu nei ua pei o saito o loo fili i totonu o le anoanoaʻi o vaega faalotu e pei o titania.​—Faaaliga 17:3-6; Mataio 13:24-29.

¹² Sa folafola e Iesu o le a ia faatasi atu i nei Kerisiano pei ni saito “i aso uma lava, e oo lava i le gataaga o le lalolagi.” Na te silafia po o ai i latou ma po o ā igoa lelei ua latou faia mo i latou lava. (Mataio 28:20; Failauga 7:1) Seʻi manatu i le olioli o “nai tagata” faamaoni o ē sa ola mai pea i le amataga o le aso o le Alii! Na latou matuā vavae ese mai Kerisiano pepelo lea ua feoti faaleagaga, ae faamaopoopo i totonu o se faapotopotoga amiotonu e pei o le faapotopotoga i Semurana.​—Mataio 13:40-43.

13. O ā faamanuiaga ua saunia mo Kerisiano faauuina o ē ʻua lē faaeleeleaina o latou ofu’?

¹³ O i latou i Sarataisa o ē faamaoni e oo i le iʻuga ma lē o faaleagaina lo latou faailoga o ni Kerisiano, latou te maua le faataunuuga o se faamoemoe matagofie. Ina ua mavae le faavaeina o le Malo Faa-Mesia o Iesu i le 1914, ona toe faatutūina ai lea o i latou i le ola agaga ma ona o i latou o ē manumalo, ua faaofuina ai i ofu sisina, o le faailoga o lo latou lē pona ma  le amiotonu lē pisipisia. Ona sa latou savalia le auala va iti e taʻitaʻiina ai i le ola, o le a latou maua ai se taui e faavavau.​—Mataio 7:14; tagaʻi foʻi i le Faaaliga 6:9-11.

E Faavavau i le Tusi o le Ola!

14. O le ā “le tusi o le ola,” ma o igoa o ai o loo faamauina ai?

¹⁴ O le ā “le tusi o le ola,” ma o igoa o ai o le a tumau ai i totonu? O le tusi, po o le tusi tāʻai o le ola e faasino i tala faamaumauina o auauna a Ieova, o ē o loo faatalitali mo le mauaina o le ola e faavavau. (Malaki 3:16) O loo patino ona faasino atu le Faaaliga i igoa o Kerisiano faauuina. Ae o loo faamauina ai foʻi ma igoa o i latou o loo faatalitali mo le ola e faavavau i luga o le lalolagi. E lē gata i lea, e mafai ona ʻaveesea’ igoa mai lenā tusi. (Esoto 32:32, 33) Ae ui i lea, o i latou o le vasega e pei o Ioane o loo tumau o latou igoa i le tusi o le ola e oo i lo latou oti, latou te mauaina le ola e lē mafai ona oti i le lagi. (Faaaliga 2:10) O igoa ia e patino lava ona faailoa e Iesu i luma o lona Tamā ma luma o Ana agelu. Maʻeu le matagofie o lenā taui!

15. O le a faapefea i le motu o tagata e toʻatele ona tusiaina o latou igoa ma lē toe soloia i le tusi o le ola?

¹⁵ O le motu o tagata e toʻatele, lea foʻi e tusia o latou igoa i le tusi o le ola o le a faasaoolaina mai le puapuaga tele. O le faaalia o le faatuatua a o faagasolo le Pulega i le Meleniuma a Iesu atoa ai ma le tofotofoga e mulimuli mai, o le a tauia ai i latou nei i le ola e faavavau i le Parataiso i le lalolagi. (Tanielu 12:1; Faaaliga 7:9, 14; 20:15; 21:4) Ona tumau ai lea o le tusiaina o o latou igoa ma lē toe mafai ona soloia i le tusi o le ola. I lou iloaina o nei mea ua tuuina mai e ala i le agaga paia, pe e te lē tali atu ea la ma le maelega i le timaʻiga ua taʻua soo e Iesu: “O lē ua i ai taliga, inā faalogo mai ia o ia i le mea ua fetalai mai ai le Agaga i ekalesia”?​—Faaaliga 3:6.

[Faaopoopoga i lalo]

[Fesili mo le Suʻesuʻega]

[Ata i le itulau 57]

Tau ina ia tumau lou igoa i le tusi o le ola