Mataupu 3

O Mea e Tusa Ona Vave Oo Mai

1. E mafai faapefea ona e sao mai le sala faafaamasinoga a le Atua i lenei lalolagi?

E TATAU ona e manatunatu loloto i mea o tutupu i le lalolagi i aso nei. Aiseā? Auā e lē mafai e lenei lalolagi ona sao mai i le sala faafaamasinoga a le Atua. Ae mafai ona e sao mai ai. E mafai ona e sao mai, pe a lē avea oe o se vaega o le lalolagi lea ua faamasinoina mo le faaumatiaga. E lē uiga faapea e tatau ona e ola i se olaga faigatā faamonike e faasāsā uma ai mea mananaia. O lona uiga, a o e ola i se olaga mamā ma aogā, ae ia e vavae ese mai faiga piʻopiʻo faapolotiki, mai faiga pisinisi matapeʻapeʻa, ma lotu e lē o faamamaluina ai le Atua, faapea foʻi ma amioga lē mamā ma le sauā. Ae tatau foʻi ona e usitaia tapulaa maualuluga tau amio a le Atua, ma saʻili e faia lona finagalo. (Ioane 17:14-16; Sefanaia 2:2, 3; Faaaliga 21:8) Ua faaalia e le tusi o Faaaliga le tāua o lou faatatauina o nei vala, i le faia o suiga e pei ona manaʻomia i lou olaga.

2. Ua faatomua mai faapefea e le aposetolo o Ioane le valoaga matagofie i le Faaaliga, ma o ai sa tuuina i ai e le Atua lenei feʻau tāua?

² Ua faatomua mai e le aposetolo o Ioane lenei valoaga matagofie i upu nei: “O le faaaliga a Iesu Keriso, na tuuina atu e le Atua iā te ia ina ia faaali mai i ana auauna o mea e tusa ona vave oo mai.” (Faaaliga 1:1a) O lea la, o lē sa mauaina lenei feʻau tāua mai le Atua, o Iesu Keriso lē ua toe faatūina. E lē o ia o se vaega o se Tolutasi po o se Tasitolu lilo e lē mafai ona faamatalaina; o loo faaalia i inei le gauaʻi atu o Iesu i lona Tamā. O le auala lava lenā e tasi, ua gauaʻi atu ai iā Keriso “auauna” ia ua faia aʻe ai le faapotopotoga Kerisiano, ina ia latou ʻmulimuli ai pea iā te ia i mea uma e afio i ai o ia.’ (Faaaliga 14:4; Efeso 5:24) Ae o ai “auauna” moni a le Atua i aso nei, ma e faapefea ona aogā iā i latou le Faaaliga?

3. (a) O ai “auauna” o loo gauaʻi atu iā Iesu Keriso? (e) O le ā le galuega o loo faia e “auauna” faamaoni i le taʻitaʻiga a le ʻauagelu?

³ Ua taʻua e le aposetolo o Ioane, o lē na tusia le Faaaliga, e faapea o ia o se tasi o auauna. O ia le aposetolo na mulimuli maliu ma o se tasi o le vasega o “auauna” ua filifilia ma ua faauuina e le agaga, lea e maua le ola e lē mafai ona oti i le lagi. I aso nei, ua na o ni nai afe o i latou nei o loo totoe i le lalolagi. O loo iai foʻi isi auauna a le Atua, o se motu o tagata e toʻatele o i latou, o tane, fafine, ma tamaiti, ua faitau miliona nei lo latou aofaʻi. Ua auai i latou nei faatasi ma “auauna” faauuina i le faalauiloaina o le tala lelei e faavavau i tagata uma, i le taʻitaʻiga a le ʻauagelu. Maʻeu le faaaogāina e nei “auauna” uma o i latou lava ina ia fesoasoani i ē agamalu o le lalolagi ia maua le faaolataga! (Mataio 24:14; Faaaliga 7:9, 14; 14:6) Ua faasino mai e le Faaaliga le mea e ao ona e faia, ina ia maua ai aogā mai le tala lelei e faafiafiaina ai.

4. (a) Talu ai ua silia i le 1,900 tausaga talu ona tusia e Ioane le Faaaliga, e mafai la faapefea ona ia tautala i “mea e tusa ona vave oo mai”? (e) O le ā ua faaalia e faamaoniga i le taimi nei e uiga i mea na valoia?

⁴ Ae faapefea ona faapea mai Ioane o le a  faaalia i nei “auauna o mea e tusa ona vave oo mai”? Pe lē o upu ea nei na taʻu mai lava i le silia i le 1,900 tausaga ua mavae? Manatua, o le silafaga a Ieova, e tusa le afe o tausaga ma le “aso ananafi.” Lona uiga o le 1,900 tausaga, ua na o se taimi puupuu pe a faatusatusa i le vaitaimi umi sa ia foafoaina ai ma sauniunia le lalolagi mo le ʻaināina e tagata. (Salamo 90:4) Sa taʻua e Paulo lona lava ʻfaanaunau atu ma lona faamoemoe,’ auā e mautinoa sa foliga ua lata ona ia maua lona taui. (Filipi 1:20) Ae peitaʻi i aso nei, e anoanoaʻi faamaoniga e mautinoa ai o le a faataunuuina mea uma na valoia i ona taimi faatulagaina. O le taimi muamua lenei ua matuā lamatia ai le faasaoina o tagata. Na o le Atua o loo iai le vaifofō!​—Isaia 45:21.

Le Auala na Faaoo Mai Ai

5. Sa faapefea ona faaoo mai le Faaaliga i le aposetolo o Ioane, ma faasolo mai ai i faapotopotoga?

⁵ Ua faaauau le Faaaliga 1:1e, 2, e faapea: “Ua auina mai foʻi e ia [Iesu] lana agelu e faailoa mai ai [le Faaaliga e ala i faailoga] i lana auauna o Ioane, o lē na molimau i le afioga a le Atua, ma le mau iā Iesu Keriso, o mea uma foʻi na ia vaaia.” Na faaoo mai iā Ioane faamatalaga mai le Atua e ala i se agelu avefeʻau. Ona ia tusia lea i se tusi tāʻai, ma tuuina atu i faapotopotoga i ona aso. Amuia tatou, auā ua faasaosao mai lava e le Atua nei tala ina ia faalaeiauina ai le toetoe lava 100,000 faapotopotoga o ana auauna autasi i le lalolagi i aso nei.

6. Sa faailoa faapefea e Iesu le auala o le a ia faaaogā e saunia ai taumafa faaleagaga mo ana “auauna” i aso nei?

⁶ Sa iai se auala a le Atua mo le faaoo mai o Faaaliga i aso o Ioane, ma o Ioane o le vaega i le lalolagi o lea auala. Ua faapena foʻi ona iai se auala a le Atua mo le aumaia o taumafa faaleagaga i ana “auauna” i aso nei. I lana valoaga tele e tusa ai ma le vaitaimi faaiʻuiʻu o lenei lalolagi, sa faailoa ai e Iesu le vaega i le lalolagi o lenei auala, o “le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso.” (Mataio 24:3, 45-47) Ua ia faaaogā lenei vasega e pei o Ioane i le tatalaina po o le faamatalaina o le uiga o le valoaga.

7. (a) E faapefea ona tatou aafia i faailoga o i le Faaaliga? (e) O le ā le umi ua faia ai se sao a nisi o le vasega e pei o Ioane, i le faataunuuga o vaaiga o le Faaaliga?

⁷ Sa tusi le aposetolo o Ioane e faapea na tuuina mai e Iesu le Faaaliga i faailoga po o faatusatusaga. E matuā mataʻina ma faamanititino nei mea pe a iloiloina. O loo faaata mai ai gaoioiga malolosi, lea e tatau ona uunaʻia ai i tatou e faia taumafaiga maelega, i le faalauiloaina i isi o le valoaga ma lona uiga.  Ua faailoa mai e le Faaaliga ni vaaiga tatou te matuā faateʻia ai. Ma na faia ai se sao o Ioane i nei vaaiga taʻitasi a lē o le faatino o se gaoioiga pe na ona matamata i ai. O i latou o le vasega e pei o Ioane, o nisi ua faia ni sao mo le tele o tausaga i le faataunuuina o nei vaaiga, ua fiafia auā ua faailoa mai e le agaga o le Atua le uiga o nei vaaiga, lea ua mafai ai ona latou faamatala atu i isi.

8. (a) O le ā se mea maʻoti e uiga i vaaiga taʻitasi o le Faaaliga? (e) Ua faapefea ona fesoasoani le valoaga a Tanielu, tatou te malamalama ai i manu feʻai o le Faaaliga?

⁸ O nei vaaiga i le Faaaliga e lē o tuuina mai i se faasologa tonu o taimi e faataunuu ai. E tofu le vaaiga ma le taimi o lona faataunuuga. O le tele o vaaiga o loo toe taʻua ai upu o ni valoaga na muamua atu, lea e iai ni vaega autū ua faigofie ai ona faamatala na vaaiga. Mo se faaaʻoaʻoga, o loo faamatala i le valoaga a Tanielu ni manu feʻai mataʻutia e fā, ma faamalamalama mai o nei manu feʻai ua faaāta mai ai malo malolosi o loo puleaina le lalolagi. O lenei la ua tatou malamalama ai, o manu feʻai ia o loo taʻua i le Faaaliga, ua fai ma sui o pulega ma malo faapolotiki, e pei o malo o loo pule nei.​—Tanielu 7:1-8, 17; Faaaliga 13:2, 11-13; 17:3.

9. (a) I le faataʻitaʻi iā Ioane, o le ā le uiga ua faaalia e le vasega e pei o Ioane? (e) Ua faaalia faapefea e Ioane le auala tatou te maua ai le fiafia?

⁹ Sa faamaoni Ioane e molimau atu le feʻau lea na tuuina mai e le Atua iā te ia e ala mai iā Iesu. Sa matuā auʻiliʻili lelei lona faamatalaina mai o ʻmea uma na ia vaaia.’ Ua filigā le vasega e pei o Ioane e saʻili le taʻitaʻiga mai le Atua ma Iesu Keriso, ina ia malamalama atoatoa i le valoaga ma faalauiloa atu manatu lelei o iai i tagata o le Atua. Ina ia manuia le faapotopotoga faauuina (faapea le motu o tagata e toʻatele mai atunuu eseese, lea o le a faasaoolaina e le Atua mai le puapuaga tele), ua tusi ai Ioane: “Amuia lē faitau atoa ma ē faalogologo i upu o lenei valoaga ma tausi i mea ua tusia ai; auā ua latalata ona pō.”​—Faaaliga 1:3.

10. O le ā e ao ona tatou faia i le Faaaliga ina ia maua ai le fiafia?

¹⁰ O le a tele manuia e te maua i le faitauina o le Faaaliga, ae sili atu isi manuia pe a tausia mea o tusia ai. Sa faamatala e Ioane i se tasi o ana tusi: “O lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga. Auā o i latou uma o ē fanau mai i le Atua, e manumalo i latou i le lalolagi; o lenei foʻi le manumalo e manumalo ai i le lalolagi, o lo tatou faatuatua lava.” (1 Ioane 5:3, 4) E mafai ona matuā sili lou fiafia e ala i le atiina aʻe o sea faatuatua!

11. (a) Aiseā ua avea ai o se manaʻoga faanatinati lo tatou tausia o upu o le valoaga? (e) O ā ona pō ia ua matuā lalata mai lava?

¹¹ O se manaʻoga faanatinati lo tatou tausia o upu o le valoaga, “auā ua latalata ona pō.” O ona pō mo le ā? Mo le faataunuuina o valoaga o le Faaaliga, e aofia ai faamasinoga a le Atua. Ua latalata le taimi e faaoo mai ai e le Atua ma Keriso le sala faafaamasinoga mulimuli i le lalolagi a Satani. A o i inei Iesu i le lalolagi, sa ia taʻua e na o lona Tamā e silafia “lea aso ma lea itu aso.” A o faasino atu Iesu i faalavelave ia ua faateleina i le lalolagi i o tatou aso, na ia fetalai ai: “E lē mavae lenei tupulaga, seʻia taunuu ia mea uma.” Lona uiga, ua matuā lalata mai ona pō ua atofaina mo le faaoo mai o le faaiʻuga a le Atua. (Mareko 13:8, 30-32) E pei ona taʻua i le Sapakuka 2:3: “O le faaaliga ua tuuina mo ona aso ua tuupōina, a e tautala mai pe a oo i le iʻuga, e lē pepelo lava; e ui lava ina tuai mai, a ia faatalitali pea i ai; auā e oo mai lava, e lē faatuai mai.” E faasaoina i tatou mai le puapuaga tele pe afai tatou te tausia Afioga faavaloaga a le Atua.​—Mataio 24:20-22.

[Fesili mo le Suʻesuʻega]

[Pusa i le itulau 15]

Ina ia malamalama i le tusi o Faaaliga e manaʻomia ona tatou

● Maua le fesoasoani a le agaga o Ieova

● Iloa po o anafea na amata ai le aso o le Alii

● Iloa le auauna faamaoni ma le mafaufau i aso nei