Ua Faatafunaina le Aai Sili
Mataupu 36
Ua Faatafunaina le Aai Sili
Vaaiga 12—Faaaliga 18:1–19:10
Mataupu: O le paʻū ma le faaumatiaga o Papelonia le Aai Sili; ua faasilasilaina mai le faaipoipoga a le Tamaʻi Mamoe
Taimi o le faataunuuga: Mai le 1919 seʻia oo i le mavae o le puapuaga tele
1. O le ā e faailogaina ai le amataga o le puapuaga tele?
E FAAFUASEʻI, e faateʻia ai, e matuā mataʻutia—o le a faapena le faaumatiaga faaiʻu o Papelonia le Aai Sili! O le a avea o se tasi o mea pito sili ona mataʻutia e tupu i le talafaasolopito uma, e faailogaina ai le amataga o le “puapuaga tele, e leai sona tusa talu le amataga o le lalolagi, ua oo lava i ona pō nei; e lē toe faapea foʻi amulī.”—Mataio 24:21.
2. O le ā le ituaiga o pulega ua tumau pea, e ui i le tulaʻi mai ma toe paʻuʻū atu o faiga malo faapolotiki?
2 Ua loa ona iai lotu sesē. Na iai e aunoa ma le motusia talu mai aso o Nimarota, o lē sa fia faamasaa toto, o lē sa tetee iā Ieova ma faatonuina tagata ina ia fausia le Olo o Papelu. Ina ua faafenuminumiaʻi e Ieova gagana a na tagata fouvale, ma faataapeape i latou i luga o le lalolagi, sa latou ave faatasi atu ai ma lotu sesē a Papelonia. (Kenese 10:8-10; 11:4-9) Talu mai lenā taimi, ua tulaʻi mai ai pulega a malo ma toe paʻuʻū atu, ae o loo tumau pea lotu faa-Papelonia. E tele mea eseese ua ia faia, i le avea ai ma vaega tuufaatasi o lotu sesē i le lalolagi, o Papelonia le Aai Sili lea na valoia. O lona vaega pito sili ona lauiloa, o lotu ua liliu ese mai le upu moni, lea na tupu aʻe mai le tuufaatasia o aʻoaʻoga faa-Papelonia anamua ma aʻoaʻoga e tetee i le Faa-Kerisiano moni. Ona ua autausagā le talaaga umi o Papelonia le Aai Sili, ua faigatā ai mo le tele o tagata ona talitonu faapea o le a faaumatia o ia.
3. Ua faamautinoa mai faapefea e le Faaaliga le faasalaina o lotu sesē?
3 O le mea lea ua talafeagai ai ona faamautinoa mai e le Faaaliga le iʻuga malaia o lotu sesē e ala i le aumaia iā i tatou o faamatalaga auʻiliʻili e lua, o lona paʻū ma mea tutupu na taʻitaʻiina atu ai i lona faatafunaga atoatoa. Ua uma ona tatou vaaia o ia o se “fafine talitane e sili” lea ua iʻu ina faatamaʻia e ana manamea sa iai muamua i le siʻomaga faapolotiki. (Faaaliga 17:1, 15, 16) Nei la i se isi vaaiga, tatou te vaaia ai o ia o se aai, le faatusa faalotu o Papelonia anamua.
Ua Solofa i Lalo Papelonia le Aai Sili
4. (a) O le ā le vaaiga e sosoo ai ua vaaia e Ioane? (e) E mafai faapefea ona tatou mātauliaina le agelu, ma aiseā ua fetaui ai mo ia ona ia faasilasilaina le paʻū o Papelonia le Aai Sili?
4 Ua faaauau ona taʻuina mai e Ioane iā i tatou le mea ua tupu: “Ua mavae ia mea, ona ou iloa atu lea o le agelu o loo alu ifo i le lagi, ua iā te ia le pule sili; ua malamalama foʻi le lalolagi i lona pupula. Ua matuā ʻalaga foʻi o ia ma le leo tele, ua faapea ane, ʻUa paʻū, ua paʻū Papelonia le aai tele!’” (Faaaliga 18:1, 2a) O le faalua ai lea ona faalogoina e Ioane le faasilasilaga lenei a le agelu. (Tagaʻi i le Faaaliga 14:8.) Ae peitaʻi, o le taimi lenei, o loo faamamafaina mai lona tulaga tāua e ala i le pupula o le agelu faalelagi, ona ua faamalamalamaina le lalolagi atoa i lona mamalu! Faamata o ai le agelu lenei? I senituri muamua atu, sa taʻua ai e le perofeta o Esekielu i le lipotiaina mai o se vaaiga faalelagi, e faapea “ua malamalama foʻi le lalolagi i lona pupula [o le pupula o Ieova].” (Esekielu 43:2) Na o le pau le agelu e pupula i le mamalu e faatusalia i le mamalu o Ieova, o le Alii lea o Iesu, o lē na te faaatagiaina mai “le pupula o lona mamalu [le Atua] ma ua matuā tusa lava ma [le Atua] ia.” (Eperu 1:3) I le 1914, na avea ai le Atalii o le tagata ma Tupu i le lagi, ma talu mai lenā taimi, ua faatino ai e Iesu le pule i le lalolagi atoa e avea ai o se Tupu lagolago ma o le Faamasino a Ieova. Ua fetaui lelei lava la, ona ia faasilasilaina le paʻū o Papelonia le Aai Sili.
5. (a) O ai ua faaaogā e le agelu ina ia faalauiloaina le paʻū o Papelonia le Aai Sili? (e) O le ā le tulaga na oo i lotu ua liliu ese mai le Faa-Kerisiano moni ina ua amata le faamasinoga iā i latou na loo faapea mai o loo i le “aiga o le Atua?”
5 O ai ua faaaogā e lenei agelu ua iai le pule tele ina ia faalauiloaina sea tala ofoofogia i luma o tagata? Ioe, o tagata tonu lava ia ua saʻoloto mai ona o lenā paʻū, o le vaega totoe faauuina o loo i le lalolagi, le vasega e pei o Ioane. Sa pagatia tele i latou nei i lima o Papelonia le Aai Sili e afua mai i le 1914 e oo i le 1918, ae i le 1918 na amata ai le faamasinoga a le Alii o Ieova ma lana “Agelu lava lea o le feagaiga [faa-Aperaamo],” o Iesu Keriso, i le “aiga o le Atua,” i latou ua fai mai o Kerisiano. Ona faamasinoina ai lea o Kerisiano faatagāfai. (Malaki 3:1; 1 Peteru 4:17) O le tele o lona nofosala i le toto i le vaitaimi o le Taua Muamua a le Lalolagi, lona sao i le sauāina o molimau faamaoni a Ieova, ma ana talitonuga faa-Papelonia, sa leʻi fesoasoani lea iā te ia i le taimi o le faamasinoga; sa leʻi mauaina foʻi e se isi lava vaega o Papelonia le Aai Sili le finagalo malie o le Atua.—Faatusatusa i le Isaia 13:1-9.
6. Aiseā e mafai ai ona faapea atu e oo ane i le 1919, ua paʻū Papelonia le Aai Sili?
6 E oo ane la i le 1919 ua paʻū Papelonia le Aai Sili, ua tatala atu ai le ala mo tagata o le Atua e faasaʻoloto ma toe faafoʻisia ai, i lo latou nuu tamaoaiga faaleagaga, e peiseaʻī i se aso e tasi. (Isaia 66:8) E oo ane i lenā tausaga, ua faatautaia e Ieova le Atua ma Iesu Keriso, le Tariu Sili ma le Kuresa Sili mataupu, ina ia lē toe mafai ai e lotu sesē ona taofia tagata o Ieova. Ua lē toe mafai ona ia taofia i latou mai le auauna atu iā Ieova ma faalauiloa i tagata uma o ē atonu e fia faalogo e faapea ua faasalaina Papelonia le Aai Sili pei se fafine talitane ma ua latalata mai le faamaoniaina o le tonu o le pule silisili ese a Ieova!—Isaia 45:1-4; Tanielu 5:30, 31.
7. (a) E ui e leʻi faaumatiaina Papelonia le Aai Sili i le 1919, ae o le ā le silafaga a Ieova iā te ia? (e) O le ā na iʻu i ai tagata o Ieova ina ua paʻū Papelonia le Aai Sili i le 1919?
7 E moni, e leʻi faaumatiaina Papelonia le Aai Sili i le 1919—e pei o le aai anamua o Papelonia e leʻi faaumatiaina i le 539 T.L.M. ina ua paʻū i vaegaʻau a Kuresa le Peresia. Ae i le silafaga a Ieova, ua paʻū lea faalapotopotoga. Sa taʻusalaina faalefaamasinoga o ia, o loo faatalitali mo le faasalaga oti; o le mea lea, ua lē toe mafai ai e lotu sesē ona taofia faatagataotauaina tagata o Ieova. (Faatusatusa i le Luka 9:59, 60.) Sa faasaʻolotoina i latou nei ina ia galulue e pei o le auauna faautauta ma le mafaufau a le Matai, i le sauniaina o taumafa faaleagaga i le taimi e tatau ai. Ua latou mauaina se faaiʻuga faafaamasinoga ua faaleoina atu “O loo lelei ona outou faia mea uma,” ma sa poloaʻia ina ia toe faateleina pea mea latou te faia i le galuega a Ieova.—Mataio 24:45-47; 25:21, 23; Galuega 1:8.
8. O le ā le mea ua tupu ua faalauiloaina atu e le tagata vaai o le Isaia 21:8, 9, ma o ai i aso nei ua faaataina mai e lenā tagata vāai?
8 Sa faaaogā e Ieova isi perofeta i le faitau meleniuma ua mavae ina ia valoia mai lenei vaitaimi faailogaina o mea tutupu. Sa tautala Isaia e uiga i se tagata vāai o lē “[na] ʻalaga . . . e pei o le leona, Le alii e, ou te tū aʻu nei i le ʻolo e leoleo ai e lē aunoa i le ao; ou te tū foʻi aʻu i le mea ou te matamoe [leoleo] ai i pō uma lava.” Ma o le ā le mea ua tupu na iloa e lenā tagata vaai ma ia faalauiloaina atu ma le toa e pei o se leona? O mea lenei: “Ua paʻū, ua paʻū Papelonia; o tupua uma foʻi a ona atua ua ia [o Ieova] tuʻipalaina i le eleele.” (Isaia 21:8, 9) Ua faaataina lelei mai e lenei tagata vāai le vasega e pei o Ioane i aso nei, o loo matuā mataala i le faaaogāina o le mekasini o Le Olomatamata ma isi lomiga faatiokarate ina ia faaleo atu ai i le atulaulau le tala e faapea ua paʻū Papelonia.
Ua Fāi Ifo Papelonia le Aai Sili
9, 10. (a) O le ā le fāi ifo ua pagatia ai le taaʻiga a lotu faa-Papelonia talu mai le Taua Muamua a le Lalolagi? (e) Ua faamatalaina faapefea e le agelu malosi le paʻū o Papelonia le Aai Sili?
9 O le paʻū o Papelonia anamua i le 539 T.L.M. o le amataga o se fāi ifo umi lea na faaiʻuina i lona faaumatiaga. I se tulaga talitutusa, talu mai le Taua Muamua a le Lalolagi, ua fāi ifo ai ma le iloga le taaʻiga a lotu faa-Papelonia i le lalolagi aoao. I Iapani, na mulimuli mai i le Taua Lona Lua a le Lalolagi le faasāina o le tapuaʻiga i le emeperoa a le lotu Sinitō. I Saina, ua puleaina ai e le faiga malo Komunisi tofiga ma gaoioiga uma faalotu. I atunuu Porotesano i Europa i mātū, ua lē fiafia ai le toʻatele o tagata i lotu. Ma e lata mai nei lava ua faavaivaia ai le Lotu Katoliko Roma ona o fevaevaeaʻiga ma feteenaʻiga i totonu o lona lava lotoifale i le lalolagi atoa.—Faatusatusa i le Mareko 3:24-26.
10 O nei mea tutupu uma lava e lē masalomia o se vaega o le ʻmate ifo o le vaitafe o Eufirate’ e sauniuni ai mo le osofaʻiga faavaegāʻau lea o loo agaʻi mai iā Papelonia le Aai Sili. Ua faaatagia mai foʻi lenei ʻmate’ i le faasilasilaga lea na faia a le pope iā Oketopa 1986 e faapea, e tatau i le lotu ona “toe ola mativa”—ona o le tetele o aitalafu. (Faaaliga 16:12) Aemaise lava ina ua faaalialiaina i lumāmea Papelonia le Aai Sili i le vaai a le lautele i le 1919 e faapea ua avea o se nuu ua faataumaoia faaleagaga, e pei lava ona faasilasila mai e le agelu malosi i inei: “Ua avea foʻi o ia ma mea e nofo ai temoni, ma mea e puipui ai agaga leaga uma, o le mea foʻi e puipui ai manu felelei uma e leaga ma le inosia.” (Faaaliga 18:2e) Ua lē o toe mamao ona avea moni loa lea o ia ma nuu valevalenoa, o se nofoaga tuufua e pei ona iai faatafunaga o Papelonia i Irake i ona pō nei.—Tagaʻi foʻi i le Ieremia 50:25-28.
11. I le ā le uiga e avea ai Papelonia le Aai Sili “ma mea e nofo ai temoni” ma ʻo se mea foʻi e puipui ai agaga leaga uma ma manu felelei lē mamā’?
11 O le upu “temoni” i inei e foliga mai o se faaataga o le upu ʻo temoni e foliga o ni ʻoti’ (seʻi·rimʹ) o loo maua i le faamatalaga a Isaia e uiga i le paʻū o Papelonia: “A e taooto ai manu feʻai o le vao, e tutumu foʻi o latou fale i lulu, e mau ai foʻi iaena, e taaalo ai foʻi [temoni e foliga i] ʻoti o le vao.” (Isaia 13:21) Atonu e lē o faasino i temoni moni, ae o loo faasino i manu vaefā taufulufulua matagā e nonofo i le toafa, o o latou foliga mai ua manatu ai tagata matamata e faapea o ni temoni. I faatafunaga o Papelonia le Aai Sili, o le iai faafaatusa o ia manu, faatasi ai ma le ʻea namu leaga ma oona (“e lē mamā i le mānava”) ma manu felelei lē mamā, ua faaataina ai lona tulaga oti faaleagaga. E leai se faamoemoe faapea na te aumaia le ola po o se isi lava mea aogā mo tagata.—Faatusatusa i le Efeso 2:1, 2.
12. Ua faapefea ona fetaui le tulaga o Papelonia le Aai Sili ma le valoaga a Ieremia i le mataupu e 50?
12 Ua fetaui foʻi lona tulaga ma le valoaga a Ieremia: “Ua fetalai mai Ieova, E oo le pelu iā Kaletaia, ma ē nonofo i Papelonia, ma ona alii, ma ona tagata popoto. . . . E oo le vevela i lona vai, ona mate ai lea; auā o le nuu lava lea o tupua ua ta, ua latou mitamita vale foʻi i mea mataʻutia. O le mea lea e nonofo ai manu feʻai o le vao, faatasi ma aie, e mau ai foʻi iaena; e lē toe ʻainā e faavavau; e lē mau ai lava se tasi i lea tupulaga ma lea tupulaga.” E lē mafaia e le ifo i tupua ma le lagiina faapese o tatalo ona laveaʻiina Papelonia le Aai Sili mai se faasalaga e pei o le lafotuina e le Atua o Sotoma ma Komoro.—Ieremia 50:35-40.
Uaina e Faagaee ai Faalogona
13. (a) Ua faauaʻi atu faapefea e le agelu malosi manatu i le tele o le salalau o faiga faatalitane a Papelonia le Aai Sili? (e) O le ā le amio lē tatau sa taatele i Papelonia anamua o loo maua foʻi i Papelonia le Aai Sili?
13 Ona sosoo ai lea ma le faauaʻi atu e le agelu malosi manatu i le tele o le salalau o faiga faatalitane a Papelonia le Aai Sili, i le faalauiloaina mai: “Auā ua feinu nuu uma i le uaina [e faagaee ai faalogona o lana faitaaga *], ua faitaaga foʻi ma ia tupu o le lalolagi, o le faulaʻiga o ana mea faafiafia ua tamaoaiga ai ē ua faatau ʻoa o i le lalolagi.” (Faaaliga 18:3) Ua ia aʻoaʻoina tagata uma i ana auala lē mamā faalotu. I Papelonia anamua, e tusa ai ma le tusitala Eleni o talafaasolopito o Herotota, sa manaʻomia i tamaʻitaʻi taʻitoʻatasi ona ia faia e faatasi lava i lona olaga le talitane i tapuaʻiga i le malumalu. Ua faaatagia mai i aso nei faiga taufeusuaʻiga matagā ma le leaga e faatagata i Angkor Wat, ia na faaleagaina i taua i Kamupesia ma i totonu o malumalu i Khajuraho i Initia, o loo faaalia mai ai le atua Hinitū o Vishnu o loo siʻosiʻomia e vaaiga o feusuaʻiga faaleituaiga inosia. I le Iunaite Setete, o le faaaliaina o amioga lē mamā faaleituaiga a le ʻaufaievagelia i le Televise na faateʻia ai i le 1987, ma i le 1988, faapea ma le faaalialia o le salalau lautele o faiga faa tauātane a faifeʻau o lotu, ua faaalia ai faapea e oo lava i lotu a atunuu Kerisiano o loo latou faatagaina pea faiga matagā ma le lē faatuaoia o le faitaaga. Peitaʻi, ua paʻuʻū atu atunuu uma i se ituaiga o faitaaga e sili atu ona mataʻutia.
14-16. (a) O le ā le faiā faaleagaga e lē tatau a lotu ma le faapolotiki lea sa tuputupu aʻe i le vaitaimi o le ʻau Fasi i Italia? (e) Ina ua osofaʻia Abyssinia e Italia, o ā faamatalaga sa faia e epikopo a le Lotu Katoliko Roma?
14 Ua uma ona tatou toe iloiloina le faiā e lē tatau a lotu ma le faapolotiki lea na vave maua ai e Hitila le pule i le malo faa-Nasi o Siamani. Sa pagatia ai foʻi isi atunuu ona o le aiā fua o lotu i upufai faalemalo. Mo se faaaʻoaʻoga: I Italia i le vaitaimi o le ʻau Fasi, iā Fepuari 11, 1929, sa sainia ai e Musolini ma Katinale Gasparri le Maliega na osia i Lateran, e avea ai le Aai Vatikana o se isi foʻi malo tutoʻatasi. Na faapea mai Pope Pio XI ua ia “toe faafoʻi atu Italia i le Atua, ma toe faafoʻi atu le Atua iā Italia.” Pe o le mea moni ea lea? Seʻi manatu i le mea na tupu i tausaga e ono mulimuli ane ai. Iā Oketopa 3, 1935, sa osofaʻia ai Abyssinia e Italia, i le faapea mai “o se nuu faanuupō o loo faia pea le tulaga e faapologa ai isi.” O ai moni lava sa faanuupō? Pe sa taʻusalaina e le Lotu Katoliko le faanuupō o Musolini? A o avatu e le pope faamatalaga uigalua, ae sa autasi ana epikopo i le faamanuiaina o vaegaʻau a lo latou “atunuu autū” o Italia. I le tusi The Vatican in the Age of the Dictators, ua lipotia mai ai e Anthony Rhodes:
15 “Sa tusi le epikopo o Udine [Italia], i lana Tusi Faafaifeʻau iā Oketopa 19 [1935], ʻE lē talafeagai ma e lē fetaui foʻi ona tatou faaleoina ni manatu i saʻo ma sesē o le mataupu. O lo tatou tiute o ni tagata Italia, ma le sili atu ona faapea ona o i tatou o ni Kerisiano, o le saosaolaumea lea i le manuia o a tatou auupega.’ Sa tusi le epikopo o Padua iā Oketopa 21, ʻI itula faigatā o loo tatou uia, matou te talosagaina ai outou ina ia tuu atu le faatuatua i o tatou tagata faalemalo ma malosi faavaegāʻau.’ Ia Oketopa 24, sa faapaiaina ai e le epikopo o Cremona ni fuʻa faavaegāʻau ma faapea mai: ʻIa faamanuia le Atua i nei fitafita, o ē i luga o eleele Aferika, o le a latou manumalo ai i laufanua fou ma le lafulemu mo le agaifanua faa-Italia, e faapea ona aumaia ai iā i latou le aganuu faa-Roma ma le faa-Kerisiano. Tau ina ia toe tulaʻi tasi mai Italia e avea o le faufautua Faa-Kerisiano i le lalolagi atoa.’”
16 Sa puʻea faamalosi Abyssinia, faatasi ai ma le faamanuiaga a le taʻitaʻi lotu Katoliko Roma. Pe mafai e so o se tasi o i latou nei ona faapea mai, po o le ā lava le tulaga, sa pei i latou o le aposetolo o Paulo i le “mamā . . . i le toto o tagata uma”?—Galuega 20:26.
17. Sa pagatia faapefea Sepania ona o le lē taulau i ona taʻitaʻi lotu ona “tuʻi . . . i a latou pelu e fai ma uʻamea o suōtosina”?
17 E lē gata iā Siamani, Italia, ma Abyssinia, ae ua paʻū atu foʻi i le faitaaga a Papelonia le Aai Sili se isi atunuu—o Sepania. Sa amataina le taua a tagata lava o lenā atunuu i le 1936-1939, o se tasi o māfuaaga, ua uia e le faiga malo faatemokalasi laasaga e faaitiitia ai le pule malosi a le Lotu Katoliko Roma. A o faagasolo le taua, sa faamatala ai e le taʻitaʻi Katoliko o vaegaʻau fouvale a le Fasi (Fascist) o Franco ia lava e faapea o “le Taʻitaʻiʻau Sili Kerisiano o le Taua Paia,” o se taʻu lea na ia mulimuli ane toe aveesea. E faitau selau afe tagata Sepania na maliliu i le fetauaʻiga. E ese mai i lea, e tusa ai ma se faatatau na faia ma le faaeteete, sa fasiotia e le vaega Faalotonuu a Franco tagata e 40,000 o le Vaega Lauiloa (Popular Front), ae fasiotia e sui o le Vaega Lauiloa taʻitaʻi lotu e 8,000—o monike, patele, taupousa, ma tagata fou faatoʻā amata i le tofi. O le mataʻutia lenā ma le matuā malaia e maua i taua a tagata o atunuu lava latou, o loo faataʻitaʻia ai le atamai o le utagiaina o fetalaiga a Iesu: “Inā toe sulu ia o lau pelu i lona faamoega; auā o i latou uma o ē tago i le pelu, e oti i latou i le pelu.” (Mataio 26:52) Pagā le inosia o le aafia o lotu i ia faamasaatoto matuā tele! Ua lē taulau aʻiaʻi moni lava i ona taʻitaʻi lotu ona ʻtuʻi i a latou pelu e fai ma uʻamea o suōtosina’!—Isaia 2:4.
Le ʻAufaatauʻoa Femalagaaʻi
18. O ai “faatau ʻoa o i le lalolagi” o loo femalagaaʻi?
18 O ai “faatau ʻoa o i le lalolagi” o loo femalagaaʻi? E mautinoa o loo tatou taʻua i latou i aso nei o ē fefaatauaʻi, le ʻaufaipisinisi popoto, o ē atamamai i faiga faapisinisi o pisinisi tetele. E lē o faapea atu ai nei e sesē ona auai i ni faiga faapisinisi e talafeagai ma le tulafono. Ua saunia mai e le Tusi Paia fautuaga poto mo tagata faipisinisi, o loo lapataʻia ai i le lē faamaoni, le matapeʻapeʻa, ma mea faapena. (Faataoto 11:1; Sakaria 7:9, 10; Iakopo 5:1-5) O le mea e sili ona tauia o le ʻamio Atua po o le tuutoina i le Atua ma le loto malie.’ (1 Timoteo 6:6, 17-19) Ae peitaʻi, e lē o mulimuli le lalolagi a Satani i mataupu silisili amiotonu. Ua anoanoaʻi faiga faapiʻopiʻo. O loo maua i lotu, i polotiki—ma i pisinisi tetele. Ua faaalialia mai lea taimi i lea taimi e tala i mea tutupu faiga lē saʻo e pei o le aveina ma faaaogāina o tupe i ni auala sesē e tagata maualuluga o faiga malo ma le fefaatauaʻi lē faatulafonoina o auupega.
19. O le ā le mea moni e faatatau i le tamaoaiga o le lalolagi ua fesoasoani e faamatala ai le pogai ua lē tulaga lelei mai ai le taʻuaina o tagata faatauʻoa a le lalolagi i le Faaaliga?
19 Ua oso maualuga fefaatauaʻiga faavaomalo o auupega e sili atu ma le $1,000,000, 000,000 i tausaga taʻitasi, ma ua faapogaia ai le lē maua e le faitau selau miliona o tagata o ni mea e manaʻomia moni o le olaga. Ua matuā leaga tele lenā mea. Ae ua foliga ua avea auupega ma mea o loo sili ona lagolagoina le tamaoaiga a le lalolagi. Iā Aperila 11, 1987, na lipotia mai ai e se tala i le nusipepa o le Spectator a Lonetona faapea: “Pe a faitauina na o falegaosimea o loo patino tonu i le gaosiaina o nei mea, e 400,000 tagata faigaluega o loo aafia ai i le Iunaite Setete ma le 750,000 i Europa. Ae o le mea tatou te tomānatu i ai, a o tuputupu aʻe le matafaioi tau vafealoaʻi ma tau tamaoaiga o le gaosiaina o auupega, ae o loo see ese atu ai i tua le fesili moni, pe o malupuipuia lelei i latou o gaosia ia mea.” Ua tele tupe faasili e maua mai a o fefaatauaʻi pomu ma isi auupega i le lalolagi atoa, e oo lava i nisi o atunuu e manino le ono toe avea ma fili mulimuli ane. E sau se aso atonu e toe foʻi mai ai na pomu i se mala aasa ina ia faaumatia ai i latou o loo faatauina atu ia mea. Pagā se mea ina a valea! E faaopoopo atu i lenei mea le gaoioiga lē faamaoni o loo siʻomia ai falegaosi auupega. I le Iunaite Setete lava ia, e tusa ai ma le faamatalaga a le Spectator, “i tausaga taʻitasi, e matuā paso le Ofisa Ulu o le Matagaluega o le Puipuiga (Pentagon) e tau faavasega pe faapefea ona leiloa auupega e tusa ma le $900 miliona se tupe e faaaluina ai.” E lētioa ona lē tulaga lelei mai le taʻuaina o tagata faatauʻoa a le lalolagi i le Faaaliga!
20. O le ā se faaaʻoaʻoga ua faaalia ai le aafia o lotu i faiga faapisinisi faapiʻopiʻo?
20 E pei ona valoia mai e le agelu mamalu, ua matuā aafia lotu i ia faiga faapisinisi faapiʻopiʻo. Mo se faaaʻoaʻoga, e iai le aafiaga a le Vatikana i le solofa i lalo o le Banco Ambrosiano a Italia i le 1982. Sa umi o toso faapaʻu tolo lenei mataupu i tausaga e amata mai le 1980 faasolo mai ai, ma o le fesili e leʻi taliina lava e faapea: O fea na ave i ai tupe? Iā Fepuari i le 1987, na avatu ai e faamasino i Milan tusi saisai mo taʻitaʻi lotu e toʻatolu o le Vatikana, o loo aofia ai ma se akiepikopo Amerika, i luga o moliaga faapea sa avea i latou ma mea faigaluega ina ia faia faagaoi le gau o le kamupani, ae sa teena e le Vatikana le talosaga mo le tuuina ane o i latou ia ina ia faamasinoina. Iā Iulai i le 1987, i le vaitaimi o se vavaō o le faaalia o le lē malilie, sa faalēaogāina ai tusi saisai e le Faamasinoga o Tagi pito maualuga a Italia e faavae i se maliega ua leva ona iai i le va o le Vatikana ma le faiga malo a Italia.
21. Tatou te iloa faapefea sa leai ni sootaga a Iesu ma faiga faapisinisi lē saʻosaʻo i ona aso, ae o le ā o loo tatou vaaia i aso nei i lotu faa-Papelonia?
21 Pe sa iai ea se sootaga i le va o Iesu ma faiga faapisinisi lē saʻosaʻo i ona aso? E leai. E leʻi iai foʻi ni ana mea totino, auā sa “leai se mea e moe ai o ia.” Sa fautuaina e Iesu se pule talavou mauʻoa e faapea: “Ia e faatau atu i au mea uma, ma ia e tufatufaina i ē matitiva, ona iā te oe lea o le faulaʻigāoloa i le lagi; i le e sau, ma mulimuli mai iā te aʻu.” Sa matuā lelei tele lenā timaʻiga, auā sa mafai ona iʻu ai i le aveesea o popolega uma i mea tau pisinisi. (Luka 9:58; 18:22) I le faaeseesega, e masani ona iai sootaga lē tonu a lotu faa-Papelonia ma faiga pisinisi tetele. Mo se faaaʻoaʻoga, i le 1987 na lipotia mai ai e le Albany Times Union e faapea sa ioeina e le pule tautupe o lālā eseese a le Lotu Katoliko i Miami, Florida, i le Iunaite Setete o Amerika, e faapea o loo iai ni sea a le lotu i kamupani ia latou te faia auupega faaniukilia, ni ata tifaga leaga, faapea ma sikareti.
“Loʻu Nuu e, ia Outou Ō Ese iā te Ia”
22. (a) O le ā ua fai mai ai se leo mai le lagi? (e) O le ā na taʻitaʻiina atu ai i le olioli o tagata o le Atua i le 537 T.L.M. ma i le 1919 T.A.?
22 Ua faasino upu e sosoo ai a Ioane i se isi faataunuuga o le ata faavaloaga: “Ua ou faalogo foʻi i le tasi leo mai le lagi, ua faapea mai, ʻLoʻu nuu e, ia outou ō ese iā te ia, ina neʻi faatasia outou i ana agasala, ina neʻi tofusia foʻi outou i ona mala.’” (Faaaliga 18:4) O loo aofia ai foʻi i valoaga e uiga i le paʻū o Papelonia anamua i totonu o Tusitusiga Eperu, le poloaʻiga a Ieova i ona tagata: “Inā sosola ia ai totonu o Papelonia.” (Ieremia 50:8, 13) I le manatu atu i le faatafunaga ua lata mai o Papelonia le Aai Sili, ua uunaʻia ai nei foʻi tagata o le Atua ina ia sosola ese. I le 537 T.L.M. sa avea le avanoa ina ia sosola ese ai mai Papelonia ma māfuaaga o le olioli tele o tagata faamaoni o Isaraelu. I le auala lava lea e tasi, sa avea ai le faasaʻolotoina mai o tagata o le Atua mai le faatagataotauaina i Papelonia i le 1919 na taʻitaʻia atu ai i lo latou olioli. (Faaaliga 11:11, 12) Ma talu mai lenā taimi e faitau miliona isi ua usiusitai i le faatonuga ina ia sosola ese mai.
23. Ua faamamafa mai faapefea e le leo mai le lagi le faanatinati o le sosola ese mai iā Papelonia le Aai Sili?
23 E matuā faanatinati moni ea la le sosola ese mai iā Papelonia le Aai Sili, ia lē toe avea ma sui auai i lotu o le lalolagi ma ia matuā vavae ese atoatoa? O lea lava, auā e manaʻomia ona tatou maua le silafaga a le Atua e faatatau i lenei faiga matuā matagā tele ua leva ona iai, o Papelonia le Aai Sili. E leʻi faafeʻalofaʻia e le Atua ana afioga i le taʻuina o lotu o le fafine talitane sili. Ua logoina atili atu nei la e le leo mai le lagi iā Ioane e faatatau i lenei fafine talitane: “Auā ua paʻi atu ana agasala i le lagi, ua manatua foʻi e le Atua ana amioleaga. Ia outou taui atu iā te ia ia pei ona taui mai e ia iā te outou, ia outou taui faalua iā te ia e tusa ma ana galuega; o le ipu foʻi na liligi mai ai e ia, ia outou liligi faaluaina atu ai iā te ia. E pei ona mitamita o ia iā te ia, mona ua faafiafia o ia iā te ia, ia faapea ona outou tuuina atu iā te ia o le puapuaga ma le faanoanoa. Auā ua faapea ifo ia i lona loto, Ou te nofo nei o le tupu fafine, ou te lē se fafine ua oti lana tane, ou te lē iloa lava se faanoanoa; o le mea lea e oo mai ai i le aso e tasi ona mala, o le faamaʻi, ma le faanoanoa, ma le oge; e susunuina foʻi o ia i le afi; auā e mamana lava le Alii le Atua o lē faamasino iā te ia.”—Faaaliga 18:5-8.
24. (a) E ao i tagata o le Atua ona sosola ese mai iā Papelonia le Aai Sili ina ia ʻalofia ai le ā? (e) O i latou o ē e lē taulau ona sosola ese mai iā Papelonia le Aai Sili ua auai ma ia i ā agasala?
24 O ni upu malolosi na upu! Ua manaʻomia ai la ni gaoioiga. Sa uunaʻia e Ieremia tagata Isaraelu i ona aso ina ia gaoioi, i le faapea atu: “Inā sosola ia outou ai totonu o Papelonia, . . . auā o le tausaga lenei o le taui ma sui a Ieova; na te taui atu ai iā te ia lona taui. Loʻu nuu e, inā ō ese atu ia i totonu iā te ia, ma ia taʻitasi ma faasaoina lona ola ai le toʻasā tele o Ieova.” (Ieremia 51:6, 45) I se auala talitutusa, ua lapataʻia ai e le leo mai le lagi tagata o le Atua i aso nei ina ia sosola ese mai iā Papelonia le Aai Sili ina ia lē maua ai i se vaega o ona mala. Ua faalauiloaina atu nei faamasinoga a Ieova e pei ni mala i lenei lalolagi, o loo aofia ai ma Papelonia le Aai Sili. (Faaaliga 8:1–9:21; 16:1-21) Ua manaʻomia i tagata o le Atua ona vavae ese i latou lava mai lotu sesē pe afai latou te lē mananaʻo e pagatia ai i nei mala ma iʻu ai ina feoti faatasi ma ia. E lē gata i lenā, o le tutumau i totonu o lenā faalapotopotoga o le a latou saosaolaumea ai i ana agasala. O le a latou matuā nofosala ai e pei o ia i le mulilua faaleagaga ma le faamasaaina o le toto o “i latou uma ua fasiotia i le lalolagi.”—Faaaliga 18:24; faatusatusa i le Efeso 5:11; 1 Timoteo 5:22.
25. I ā auala sa ō ese ai tagata o le Atua mai Papelonia anamua?
25 Peitaʻi, e faapefea ona ō ese tagata o le Atua mai Papelonia le Aai Sili? I le tulaga o Papelonia anamua, sa ao i tagata Iutaia ona malaga mai le aai o Papelonia ma toe foʻi atu agaʻi i le Nuu Folafolaina. Ae tele nisi mea na aofia ai na i lo le faia faapea. Sa taʻu atu faavaloaga e Isaia i tagata Isaraelu: “Ō ese ia, inā ō ese outou, ia outou ō atu nai lea mea; aua neʻi paʻi atu i se mea leaga; ō atu ia outou nai totonu iā te ia; ia mamā outou o ē tauave ipu a Ieova.” (Isaia 52:11) Ioe, sa tatau ona latou lafoaʻi faiga lē mamā uma a lotu faa-Papelonia na sa ono mafai ona pisipisia ai la latou tapuaʻiga iā Ieova.
26. Sa faapefea ona usitaia e Kerisiano i Korinito upu, ʻŌ ese mai iā i latou ma aua neʻi paʻi atu i se mea leaga’?
26 Sa sii mai e le aposetolo o Paulo upu a Isaia i lana tusi i tagata Korinito, i le faapea mai: “Aua tou te amo faalēgatasi ma ē lē talitonu; auā pe faapefea ona faatasi o le amiotonu ma le amio leaga? Pe faapefea foʻi ona mafuta o le malamalama ma le pōuliuli? . . . O lea ia ō mai ai outou nai totonu iā te i latou, ma ia outou vavae mai, ua fetalai mai ai le Alii [o Ieova], aua foʻi tou te papaʻi atu i se mea leaga.” Sa lē manaʻomia ona tuua Korinito e Kerisiano sa iai i inā ina ia usitai ai i lenā poloaʻiga. Ae peitaʻi, sa ao ona latou fai se gaoioiga e ʻaloese ai mai i malumalu lē mamā a lotu sesē, faapea foʻi ona vavae ese faaleagaga i latou lava mai gaoioiga lē mamā a na tagata tapuaʻi i tupua. O le auala lea na amata sosola ese ai tagata o le Atua mai Papelonia le Aai Sili i le 1919, i le faamamāina o i latou lava mai so o se tōega o aʻoaʻoga ma faiga lē mamā. Ua faapea ona latou mafai ai ona auauna iā te ia e avea o ni ona tagata ua faamamāina.—2 Korinito 6:14-17; 1 Ioane 3:3.
27. O ā mea e tutusa ai le faasalaga faafaamasinoga o Papelonia anamua ma Papelonia le Aai Sili?
27 O le paʻū o Papelonia anamua ma le faatafunaga na iʻu i ai o se faasalaga ona o ana agasala. “Auā o lana sala ua paʻi atu i le lagi.” (Ieremia 51:9) I se tulaga talitutusa, ua ʻpaʻi atu i le lagi,’ agasala a Papelonia le Aai Sili ua oo atu ai i le silafaga a Ieova lava ia. Ua nofosala o ia i le lē faamasinotonu, le ifo i tupua, o amioga lē mamā faaleituaiga, le faapologa tagata, le faomea, ma le fasioti tagata. O se tasi o māfuaaga o le paʻū o Papelonia anamua, o le taui ma sui atu lea i ai ona o le mea sa ia faia i le malumalu o Ieova ma ona tagata tapuaʻi moni. (Ieremia 50:8, 14; 51:11, 35, 36) O le paʻū o Papelonia le Aai Sili ma iʻu atu ai i lona faaumatiaga ua faapena foʻi ona avea o ni faailoaga o le taui ma sui ona o mea ua ia faia i tagata tapuaʻi moni i le tele o senituri ua mavae. Ua avea la lona faaumatiaga atoatoa o le amataga lea o “le aso e taui ai ma sui e lo tatou Atua.”—Isaia 34:8-10; 61:2; Ieremia 50:28.
28. O le ā le tulaga tau faamasinotonu ua faatatauina e Ieova iā Papelonia le Aai Sili, ma aiseā?
28 I lalo o le Tulafono faa-Mose, afai na gaoi e se tagata Isaraelu se mea a le isi ona uso a tagata, sa tatau ona ia toe totogi atu e lē itiiti mai i le faaluaina le taui. (Esoto 22:1, 4, 7, 9) I le faaumatiaga o Papelonia le Aai Sili o loo sau, o le a faatatauina ai e Ieova se faatulagaga tutusa o le faamasinotonu. E ao ona faaluaina mea e oo iā te ia e tusa ai ma mea na ia faia. O le a lē faaalia iā te ia se alofa mutimutivale auā sa lē faaalia foʻi e Papelonia le Aai Sili se alofa mutimutivale i tagata na āfaina iā te ia. Sa faalagolago lona iai ona o tagata o le lalolagi i lona ʻmaua mai ai o mea e tele ma le lē mā.’ O le a oo nei iā te ia le pagatia ma le mapuitigā. Sa manatu Papelonia anamua faapea sa iai o ia i se tulaga e matuā saogalemu, i le gugutu mai faapea: “Ou te lē nofo o le fafine ua oti lana tane, ou te lē iloa ona āufanaua.” (Isaia 47:8, 9, 11) O loo lagona foʻi e Papelonia le Aai Sili le saogalemu. Ae o le a tupu faafuaseʻi lona faaumatiaga na poloaʻiina mai e Ieova, o lē e “malosi lava,” e peiseaʻī “i le aso e tasi”!
[Faaopoopoga i lalo]
^ pala. 13 New World Translation Reference Bible, faamatalaga i le pito i lalo.
[Fesili mo le Suʻesuʻega]
[Pusa i le itulau 263]
“Ua Faitaaga ma Ia o Tupu”
I tausaga amata mai le 1800 ma faasolo mai, sa ave faananā ai e faatauʻoa Europa ni aofaʻiga tetele o vailaau oona (opium) i totonu i Saina. Iā Mati i le 1839, sa taumafai ai ofisa faalemalo o Saina e taofia le fefaatauaʻiga lē faatulafonoina i le fāoa lea o pusa e 20,000 o le vailaau oona mai faatauʻoa Peretania. Sa taʻitaʻia atu lenei mea i ni feitagaʻiga i le va o Peretania ma Saina. A o faasolo pea ina leaga faiā i le va o atunuu e lua, sa uunaʻia Peretania e nisi misionare Porotesano ina ia faia se taua, i faaupuga e pei o ia o loo mulimuli mai:
“Maʻeu le faafiafiaina o loʻu loto i nei faafitauli auā ou te manatu e mafai ona matuā faaita ai le faiga malo Peretania, ma e mafai e le Atua, i Lona mana ona gausia i lalo pa puipui o loo taofia ai le evagelia a Keriso mai le ulu atu i Saina.”—Henrietta Shuck, misionare a le Lotu Papatiso i le itu i Saute.
Na iʻu ina pā le taua—lea ua lauiloa i aso nei o le Taua o Vailaau Oona (Opium War). Sa faalaeiauina ma le loto atoa Peretania e misionare i ni faaupuga e pei o nei:
“Ua faatauanauina aʻu e toe tagaʻi i tua i le tulaga o mea o loo iai nei, e lē mātele atu i le tulaga o vailaau oona po o se mataupu a Peretania, ae o le avea o le fuafuaga sili a le Fesoasoani Tauatua ia gauaʻi atu le amioleaga o le tagata i Ana fuafuaga o le alofa mutimutivale iā Saina ma talepeina ai lona pā puipui o le faaesea mai.”—Peter Parker, misionare a le Lotu Faapotopotoga.
Sa faaopoopo mai se tasi misionare a le Lotu Faapotopotoga, o Samuel W. Williams: “Ua manino le aao o le Atua i mea uma ua tutupu i se auala iloga, ma ia tatou lē masalomia o Ia lē na fetalai mai e faapea na Ia sau e aumai le pelu i le lalolagi, ua sau nei o ia i inei mo le aumaia o le faaumatiaga vave o Ona fili ma le faatūina o Lona lava malo. O le a ia fulisia ma fulisia seʻia oo ina Ia faatūina le Perenise o le Filemu.”
E tusa ai ma le fasiotiga tele o tagatanuu Saina, na tusi ai le misionare o J. Lewis Shuck e faapea: “Ou te manatu i ia vaaiga . . . o ni meafaigaluega tuusaʻo ia a le Alii i le faamamāeseina o le lapisi o loo faafaigatā ai le auiluma o le Upu Moni Tauatua.”
Sa faaopoopo mai le misionare a le Lotu Faapotopotoga o Elijah C. Bridgman e faapea: “Ua masani ona faaaogā e le Atua le tulaga malosi o le malosi sivili ina ia saunia ai le ala mo Lona malo . . . O le sui i nei taimi sili o le tagata lea; o le malosi tauatua o loo faatonutonuina. Ua faafaigaluegaina Egelani e le kovana sili o atunuu uma ina ia faasalaina mamafa ma faamaualaloina Saina.”—Ua aumaia upu sii mai le tala ua faaulutalaina “Ends and Means” (Iʻuga ma Auala), 1974, na tusia e Stuart Creighton Miller na faasalalauina i le The Missionary Enterprise in China and America (o se Suʻesuʻega i Harvard na faatonutonuina e John K. Fairbank).
[Pusa i le itulau 264]
‘Ua Tamaoaiga le ʻAufaatauʻoa’
“I le va o le 1929 ma le pā aʻe o le Taua Lona Lua a le Lalolagi, sa tofia ai e [Bernadino] Nogara [o lē na pulea mea tau tupe a le Vatikana], le laumua o le Vatikana ma sui o le Vatikana ina ia latou galulue i vaipanoa eseese o le tamaoaiga o Italia—aemaise lava i le malosi faaeletise, o fesootaʻiga i telefoni, o aitalafu ma teuga tupe, o ala laiti o nofoaafi, ma le gaosiga o meafaigaluega tau i faatoʻaga, simā, ma ie e lalaga i fau e lē ni fau maoʻi. O le tele o nei taumafaiga na lelei lava ona totogiina.
“Sa vave ona fao e Nogara nisi o kamupanī e aofia ai le La Società Italiana della Viscosa, La Supertessile, La Società Meridionale Industrie Tessili, ma La Cisaraion. I le tuufaatasia uma o nei kamupanī ina ia avea ma kamupanī e tasi, lea sa ia faaigoaina o le CISA-Viscosa ma tuuina i le pulega a Baron Francesco Maria Oddasso, o se tasi o fesoasoani e pito sili ona maufaatuatuaina a le Vatikana, ona fafauina ai lea e Nogara le puleaina o le kamupanī fou e le kamupanī lea o loo ia gaosiaina ie e lalaga i fau e sili atu ona telē i Italia, o le SNIA-Viscosa. Na iʻu lava ina faateteleina le naunau o le Vatikana i le SNIA-Viscosa, ma na iai le taimi na puleaina ai loa e le Vatikana—a o molimauina le mea moni e faapea na soloaʻi ane Baron Oddasso ina ia avea ma sui peresitene.
“Sa faapea ona ulu atu ai Nogara i le falegaosi ie e lalagaina i fau. Sa ia ulu atu ai foʻi i isi falegaosimea i le faaaogāina o isi auala, auā sa tele togafiti a Nogara. Atonu sa tele mea na faia e lenei tagata, o lē e lē manatu faapito iā te ia lava . . . ina ia faaola aʻe ai le tamaoaiga o Italia na i lo so o se isi lava tagata faipisinisi taʻitoʻatasi i talafaasolopito o Italia . . . sa leʻi matuā mafai e Benito Mussolini ona mauaina le emepaea sa ia moemiti i ai, ae sa ia mafaia ona faia le Vatikana ma Bernadino Nogara ina ia faatūina ai le pule o se isi ituaiga.”—The Vatican Empire, a Nino Lo Bello, itulau 71-73.
Ua na o se tasi lea o faaaʻoaʻoga o le galulue felagolagomaʻi i le va o le ʻaufaatauʻoa o le lalolagi ma Papelonia le Aai Sili. E lētioa lava la, o le a taufaitagituʻi nei tagata faatauʻoa pe afai e lē toe iai la latou paaga faipisinisi!
[Ata i le itulau 259]
A o salalau atu tagata i le lalolagi uma, sa latou ō ma ave faatasi ai lotu faa-Papelonia
[Ata i le itulau 261]
Ua faapei le vasega e pei o Ioane, o se tagata vāai, i lona faalauiloa atu faapea ua paʻū Papelonia
[Ata i le itulau 266]
Ua faaataina mai e faatafunaga o Papelonia anamua le faatafunaga o loo sau o Papelonia le Aai Sili
