Mataupu 27

Ua Fanau Mai le Malo o le Atua!

Vaaiga 7—Faaaliga 12:1-17

Mataupu: Ua fanau le fafine faalelagi, ua fai le taua a Mikaele ma Satani ma ua lafo ifo Satani i le lalolagi

Taimi o le faataunuuga: E afua mai le nofo tupu o Keriso Iesu i le 1914 e oo atu i le puapuaga tele

1. E faapefea ona fesoasoani iā i tatou le iai o se malamalamaga i faailoga o loo faamatalaina i le Faaaliga mataupu e 12-14?

UA FAAILOA mai le mealilo paia a le Atua. (Faaaliga 10:7) Ua avea nei le Malo o Ieova e ala i lana Mesia o se mea moni e sili ona malosi. Ua pule nei! O lona tulaʻi mai ua manino ai le faaumatiaga mo Satani ma lana fanau ma le manumalo mamalu mo le Fanau a le faalapotopotoga i le lagi a le Atua. Ae peitaʻi, e leʻi uma le iliina e le agelu lona fitu o lana pu, auā e tele atu mea e ao ona ia faaalia mai iā i tatou e faatatau i le auē lona tolu. (Faaaliga 11:14) O faailoga ua faamatalaina i le Faaaliga mataupu e 12-14 o le a fesoasoani iā i tatou ina ia faatele ai lo tatou talisapaia o mea uma ua aafia ai i lenā auē ma le faaiʻuina o le mealilo paia a le Atua.

2. (a) O le ā le faailoga tele ua vaaia e Ioane? (e) O anafea sa faaalia mai ai le uiga o lea faailoga tele?

² Ua vaaia nei e Ioane se faailoga tele​—le faailoga e sili ona naunau i ai tagata o le Atua. O loo faatomua mai ai se vaaiga faavaloaga faamanititino, lea na uluaʻi faasalalauina lona uiga i le lomiga o le Watch Tower o Mati 1, 1925, i se mataupu ua faaulutalaina “Le Fanau Mai o le Nuu,” ma toe aumaia ai i le tusi Deliverance i le 1926. Na avea lenei faaaliga pupula mai o le malamalamaga o le Tusi Paia o se faailoga i talafaasolopito i le faaauilumaina o le galuega a Ieova. O lea seʻi tuu atu iā Ioane e faamatala le mea na tupu a o amata ona faailoa mai: “Ua iloa foʻi le faailoga tele i le lagi, o le fafine ua ofu i le lā, o i lalo o ona vae le masina, o i lona ulu foʻi le palealii fetu e sefulu ma le lua; ua tō foʻi o ia; ua faatigā ma ʻalaga i le tigā a fanau.”​—Faaaliga 12:1, 2.

3. O le ā le faailoaga o le fafine ua vaaia i le lagi?

³ O le uluaʻi taimi lea ua vaaia ai e Ioane se fafine i le lagi. O le mea moni e lē o ia o se fafine tagata. Ae o ia o se faailoga, pe e faafaatusa. (Faaaliga 1:1) O le ā ua ia faaata mai? I valoaga faagaeeina, e faaata ai e fafine i nisi taimi faalapotopotoga “ua faaipoipo” atu i nisi e iloga. I Tusitusiga Eperu, sa tautala ai iā Isaraelu o se avā a Ieova le Atua. (Ieremia 3:14) I Tusitusiga Eleni, ua tautala ai i le faapotopotoga o Kerisiano faauuina, o le faatoʻānofotane a Keriso. (Faaaliga 21:9-14) O le fafine lea ua vaaia e Ioane i inei, e faaipoipo ma ua tāli fanau. O ai lana tane? O loo faapea mai, mulimuli ane ona “segia aʻe lea o lana tama i le Atua i lona nofoālii.” (Faaaliga 12:5) E faaalia ai le talia e le Atua o le tamaitiiti e avea ma ona atalii. E tatau la ona faapea atu, o le fafine ua vaaia e Ioane o le avā faafaatusa lea a Ieova.

4. O ai fanau a le avā faafaatusa a le Atua, ma o le ā le taʻu a le aposetolo o Paulo i le fafine ua vaaia e Ioane?

⁴ Pe ā ma le valu senituri muamua atu, na fetalai ai Ieova i lenei avā faafaatusa, e faapea: “E  aʻoaʻoina lau fanau uma lava e Ieova.” (Isaia 54:5, 13) Sa sii mai e Iesu le valoaga lenei ma faaalia e faapea o nei fanau o ona soo faamaoni ia, o ē na mulimuli ane faavaeina ai le faapotopotoga o Kerisiano faauuina. (Ioane 6:44, 45) O tagata la o lenei faapotopotoga, lea ua tautala i ai o ni fanau a le Atua, o fanau foʻi a le avā faafaatusa a le Atua. (Roma 8:14) Ua faaopoopo mai e le aposetolo o Paulo le vaega faaiʻu o faamatalaga ina ua ia faapea mai: “A o Ierusalema i lugā o le saʻoloto ia, o le tinā o i tatou uma lava ia.” (Kalatia 4:26) O le “fafine” la ua vaaia e Ioane, o le “Ierusalema i lugā.”

5. Talu ai ua faapaleina le avā faafaatusa a Ieova i fetu e 12, o le ā moni lava la le Ierusalema i lugā?

⁵ Peitaʻi, o le ā tonu le Ierusalema i lugā? Talu ai sa tautala Paulo e uiga iā te ia o loo i “lugā,” ma ua vaaia o ia e Ioane i le lagi, ua manino la e lē o ia o se aai faalelalolagi; e lē tutusa foʻi o ia ma le “Ierusalema fou,” talu ai o lenā faalapotopotoga o le faatoʻānofotane a Keriso, ae lē o le avā a Ieova. (Faaaliga 21:2) Mātau o loo faapaleina o ia i fetu e 12. Ua fesootaʻi le numera 12 ma le atoatoa i se faatulagaga o se faalapotopotoga. * O le mea lea, ua foliga mai ai o nei fetu e 12 e faasino mai ai o ia o se faatulagaga o se faalapotopotoga i le lagi, e pei ona sa iai Ierusalema anamua i le lalolagi. O Ierusalema i lugā o le faalapotopotoga i le lagi a Ieova o ana foafoagaola agaga o loo gaoioi e pei o sana avā, i le auauna atu lea iā te ia ma le fanauina mai o ni fanau.

6. (a) O le ā ua faailoa mai i le ofu i le lā o le fafine na vaaia e Ioane, ua iai le masina i lalo o ona vae, ma e iai lona palealii fetu? (e) O le ā ua faaata mai e tigā a fanau o le fafine tō?

⁶ Ua vaaia e Ioane e ofu le fafine lenei i le lā ma ua iai le masina i lalo ifo o ona vae. Pe a tatou faaopoopo atu i ai ma lona palealii fetu, ua siʻosiʻomia atoatoa ai o ia e malamalama faalelagi. E susulu atu le finagalo malie o le Atua i ona luga i le ao ma le pō. Maʻeu se faailoga fetaui o le faalapotopotoga faalelagi matagofie a Ieova! Ua tō foʻi o ia, o loo onosaia tigā a fanau. Ua faaalia e lana ʻalaga atu mo le fesoasoani mai le Atua e faapea ua oo mai lona taimi e fanau ai. I le Tusi Paia, o tigā a fanau e masani ona faaata mai ai galuega mamafa ua manaʻomia ina ia maua mai ai se iʻuga tāua. (Faatusatusa i le Salamo 90:2; Faataoto 25:23; Isaia 66:7, 8.) E leai se masalosalo sa lagonaina e le faalapotopotoga i le lagi a Ieova lenei ituaiga o tigā a fanau a o sauni atu mo lea fanau mai e matuā tāua tele.

Le Tarako Tele e Mūmū

7. O le ā le isi faailoga ua vaaia e Ioane i le lagi?

⁷ O le ā le isi mea ua iloa atu e Ioane? “Ua iloa foʻi le tasi faailoga i le lagi, faauta foʻi, o le tarako tele e mūmū, e fitu ona ulu ma ona nifo e sefulu; ua i ona ulu o palealii e fitu. Ua toso e lona iʻu i lona tolu o vaega o fetu i le lagi, ma lafo ifo iā i latou i le lalolagi. Ua tū foʻi le tarako i luma o le fafine o le a fanau, ina ia ʻai e ia o lana tama pe a fanau.”​—Faaaliga 12:3, 4.

8. (a) O ai le tarako tele e mūmū? (e) O le ā ua faailoa mai e ulu e fitu o le tarako, nifo e sefulu, ma se palealii i ulu taʻitasi?

⁸ O lenei tarako, o Satani “le gata tuai.” (Faaaliga 12:9; Kenese 3:15) O ia o se faaleagamea e sili ona sauā​—o se tarako e fitu ona ulu, pe o sē e lamupalaina, lea e mafai ona ia foloina atoa se mea na puʻea ma maua. Pagā le mataʻutia o ona foliga! O na ulu e fitu ma nifo e sefulu ua faasino mai ai e faapea o ia na fuafuaina le manu feʻai faapolotiki lea ua toeitiiti faamatalaina mai i le Faaaliga mataupu e 13. Ua iai foʻi ulu e fitu ma nifo e sefulu o lenei manu feʻai. Talu ai e iai se palealii a Satani i ulu taʻitasi​—e fitu le aofaʻi​—ua mafai ai ona tatou mautinoa o malo malolosi o le lalolagi o loo faaata mai e lenā manu feʻai e i lalo o lana pulega. (Ioane 16:11) O nifo e sefulu o se faailoga fetaui o le tulaga atoatoa o le malosi lea ua ia faatinoina i lenei lalolagi.

9. O le ā ua faailoa mai e le ʻtoso e le iʻu o le tarako i lona tolu o vaega o fetu i le lagi’ i lalo i le lalolagi?

⁹ Ua iai foʻi i le tarako le pule i le nofoaga o agaga. Ua “toso e lona iʻu i lona tolu o vaega o fetu i le lagi.” E mafai ona faaata mai e fetu agelu. (Iopu 38:7) O le taʻua o “lona tolu o vaega” ua faamamafaina ai e faapea ua taʻitaʻisesēina e Satani se aofaʻiga tele o agelu. E leʻi toe mafai ona latou sosola ese i le taimi lava  na iai i lalo o lana puleaga. Ua lē mafai ona latou toe foʻi atu i le faalapotopotoga paia a le Atua. Na avea i latou ma temoni, ma ua pei ai lava ua toso faatasi atu ai e Satani lo latou tupu, po o lo latou pule. (Mataio 12:24) Ua lafo ifo foʻi i latou e Satani i le lalolagi. E leai se masalosalo e faasino atu lenei mea i aso o Noa a o leʻi oo le Lolo, ina ua faatauanauina e Satani atalii lē usiusitai o le Atua ina ia ō i le lalolagi ma fenofoaʻi ai ma afafine o tagata. I le avea o se faasalaga, ua lafoina ai e le Atua nei “ʻau agelu o ē na agasala” i se tulaga e pei o se falepuipui ua taʻua o Tatara.​—Kenese 6:4; 2 Peteru 2:4; Iuta 6.

10. O ā faalapotopotoga feteenaʻi ua manino mai nei, ma aiseā ua saʻili ai le tarako ina ia ʻaina le tama pe a fanau mai le fafine?

¹⁰ Ua manino mai nei faalapotopotoga feteenaʻi e lua​—le faalapotopotoga i le lagi a Ieova e pei ona sa faaata mai e le fafine, ma le faalapotopotoga faatemoni a Satani o loo luʻia le pule silisili ese a le Atua. E ao ona foʻia le finauga tele o le pule silisili ese. Ae faapefea? O Satani, lē o loo tosoina atu pea temoni faatasi ma ia, o loo pei o se manu feʻai mataʻutia e fasimatea ma ʻaina isi manu, ma o loo ia tulimataʻia atu foʻi isi mea na te fasimatea. O loo ia faatalitali seʻi fanau le fafine. E manaʻo na te ʻaina le tamaitiiti lenei o le a fanau mai ona ua na iloa e aumaia ai se faamataʻuga mataʻutia i lona faaauau pea ona iai, atoa foʻi ma le lalolagi o ia puleaina.​—Ioane 14:30.

Le Atalii, le Tama Tane

11. Ua faamatalaina faapefea e Ioane le fanau mai o le tama a le fafine, ma aiseā ua taʻua ai le tama “o le atalii, o le tama tane”?

¹¹ O le 1914 na iʻu ai le taimi atofaina mo atunuu ina ia pule ai e aunoa ma le faalavelave i ai o le Atua. (Luka 21:24) Na fanau mai la e le fafine lana tamaitiiti i le taimi tonu lava sa tatau ona taunuu ai: “Ua fanau foʻi e ia o le tama tane, o lē na te pule i nuu uma i le tootoo uʻamea; ona segia aʻe lea o lana tama i le Atua i lona nofoālii. Ona sola lea o le fafine i le vao, o i ai le mea ua saunia e le Atua e nofo ai o ia, ina ia fafaga ai o ia i aso e tasi le afe ma le lua o selau ma le onogafulu.” (Faaaliga 12:5, 6) O le tamaitiiti “o le atalii, o le tama tane.” Aiseā ua faaaogā ai e Ioane lenā faaupuga ua taʻua faalua? Ua ia faia faapea ina ia faaalia ai le tulaga talafeagai o le tamaitiiti, ma lona tomai mo le puleaina o atunuu i le mana ua lava lelei mo lea fuafuaga. Ua faamamafaina ai foʻi le tāua ma le olioli o le aso faailogaina o lenei fanau mai! Ua ia faia se matafaioi autū i le faaiʻuina o le mealilo paia a le Atua. Ioe, o le a oo lava ina “pule i nuu uma i le tootoo uʻamea” lenei tama tane!

12. (a) I Salamo, o le ā sa folafola mai faavaloaga e Ieova e faatatau iā Iesu? (e) O le ā ua faaatagia mai e le fanauina e le fafine o se atalii “o lē na te pule i nuu uma i le tootoo uʻamea”?

 ¹² Pe sa e faalogo muamua i lenā faaupuga? Ioe, sa folafola mai faavaloaga Ieova e faatatau iā Iesu: “E te fasi gaugauina i latou i le tootoo uʻamea; e pei o le ipu a le fai ipu omea e te nutililii iā te i latou.” (Salamo 2:9) Sa valoia mai foʻi e faatatau iā te ia: “E auina atu e Ieova lou tootoo malosi mai Siona? ia pule oe i totonu o e ita iā te oe.” (Salamo 110:2) O le mea lea, o le fanau mai lea na vaaia e Ioane e aafia tele ai Iesu Keriso. E lē o faatatau i le fanau mai o Iesu i se taupou i tuā lava a o leʻi oo i le uluaʻi senituri T.A. E lē mafai foʻi ona faasino i le toe faatūina o Iesu i le ola i le agaga i le 33 T.A. Ae lē gata i lea, e lē o le liliuina faavavega foʻi i se isi tino pe a oti. Peitaʻi, e faatatau atu i le faavaeina o le Malo o le Atua i le 1914 e avea o se mea moni, faatasi ai ma Iesu​—ua iai nei i le lagi mo le toeitiiti 20 senituri​—ua tofia nei e avea ma Tupu.​—Faaaliga 12:10.

13. O le ā ua faaalia mai e le ʻsegia aʻe i le Atua ma i lona nofoālii’ o le tama tane?

¹³ E lē tāitai ona faatagaina e Ieova Satani na te faatamaʻia Lona faletua po o Lona atalii fou faatoʻā fanau mai! I le taimi o le fanau mai, e ʻsegia aʻe ai i le Atua ma i lona nofoālii’ le tama tane. Ua iai atoatoa nei o ia i le puipuiga a Ieova, o lē o le a na tausia atoatoa lea Malo fou faatoʻā fanau mai, o Lana meafaigaluega mo le faapaiaina o Lona suafa paia. O le taimi lava lea, e sola ese atu ai le fafine i se nofoaga ua saunia e le Atua mo ia i le vao. E mulimuli mai auʻiliʻiliga atili e faatatau i lea tulaga! Ae mo Satani, ua faatulagaina nei se mea e tupu e sili ona tāua, lea o le a matuā lē tāitai ai lava ona ia toe faamataʻuina le Malo i le lagi. O le ā lenā mea e tupu?

Taua i le Lagi!

14. (a) E pei ona taʻuina mai e Ioane, o le ā le mea na tupu ua lē tāitai ai ona toe mafai e Satani ona faamataʻuina le Malo? (e) O fea le vaipanoa ua taofiofia ai Satani ma ana temoni?

¹⁴ Ua taʻu mai e Ioane iā i tatou: “Ua tau foʻi le taua i le lagi; o Mikaele ma ana agelu ua latou tau ma le tarako, ua ʻau foʻi le tarako ma ana agelu e tau ai le taua, a ua latou lē manumalo, e lē toe maua foʻi i le lagi se mea latou te nonofo ai. Ua lafo foʻi le tarako tele, o le gata tuai lea, ua igoa i le tiapolo, i le ma Satani, o lē faasesē i le lalolagi uma; ua lafo ifo i le lalolagi, ua lafo foʻi ana agelu faatasi ma ia.” (Faaaliga 12:7-9) I le avea la o se taualumaga mataʻina i le faaiʻuina o le mealilo paia a le Atua, ua tuliesea ai Satani, ua lafo ese mai le lagi, ma ua lafo ese mai ana temoni faatasi ma ia i le lalolagi. O lē na faasesēina le lalolagi uma ma iʻu ai ina avea o ia ma ona atua, ua lē toe mafai nei ona alu ese atu mai lenei lalolagi, le mea na uluaʻi amata ai lana fouvalega.​—2 Korinito 4:3, 4.

15, 16. (a) O ai Mikaele, ma tatou te iloaina faapefea? (e) Aiseā ua fetaui ai le lafo ifo e Mikaele o Satani mai le lagi?

¹⁵ O ai ua faataunuuina lenei manumalo tele i le suafa o Ieova? Ua faapea mai le Tusi Paia o Mikaele ma ana agelu. Ae o ai Mikaele? O le uiga o le igoa “Mikaele” o “O Ai Sē e Pei o le Atua?” E ao ai la ona naunau fiafia Mikaele e faamaonia le tonu o le pule silisili ese a Ieova e ala i le faamaonia faapea e leai se tasi e faatusalia iā te Ia. I le Iuta fuaiupu e 9, ua taʻua ai o ia o “Mikaele o le agelu silisili.” O le mea mataʻina, ona i le faaaogāina o le taʻu “agelu silisili” i isi vaega o le Tusi Paia, e na o le toʻatasi  lava o loo faasino atu i ai: iā Iesu Keriso. * Ua faapea mai Paulo e uiga iā te ia: “Auā e afio ifo mai le lagi le Alii lava, ma le alaga, ma le leo o le agelu sili, ma le pu a le Atua.” (1 Tesalonia 4:16) O le uiga o le taʻu “agelu sili” o le “taʻitaʻi o agelu.” E lē se mea la e faateʻia ai le tautala o le Faaaliga e uiga iā “Mikaele ma ana agelu.” O isi mea o loo taʻua ai e le Tusi Paia agelu o loo pulea e se auauna amiotonu a le Atua, o loo fesootaʻi iā Iesu. O lea, ua tautala ai Paulo e uiga i le ʻfaaalia mai o le Alii o Iesu mai le lagi, faatasi ma ana agelu malolosi.’​—2 Tesalonia 1:7; tagaʻi foʻi i le Mataio 24:30, 31; 25:31.

¹⁶ Ua taʻitaʻiina atu e nei mau ma isi foʻi mau i tatou i le faaiʻuga e lē mafaafitia e faapea, o Mikaele e lē o se isi ae o le Alii o Iesu Keriso o loo i lona tofiga faalelagi. O lenei ua iai i le aso o le Alii, ua lē na ona ia fai atu la iā Satani: “Ia aʻoaʻi le Alii iā te oe.” Talu ai o le taimi lenei o le faamasinoga, ua lafoina ifo ai e Iesu, i lona avea ma Mikaele, Satani ma ana agelu temoni mai le lagi. (Iuta 9; Faaaliga 1:10) Ua sili atu ona fetaui le avea o Ia ma Lē e faia lenei gaoioiga, ona o Ia o le Tupu fou faatoʻā faapaleina. O Iesu foʻi o le Fanau na folafolaina i tuā i Etena, o lē o le a matuā nutipalaina le ulu o le Gata, ma aveesea atu ai e lē toe iai lava. (Kenese 3:15) O le lafoeseina o Satani mai le lagi, ua agaʻi atu ai nei Iesu i lenā nutipalaina faaiʻu.

“Ia Outou Olioli ai, le Lagi e”

17, 18. (a) O le ā le tali mai i le lagi ua lipotia mai e Ioane e tusa ai ma le lafo ifo o Satani mai le lagi? (e) O le ā atonu o le māfuaaga o le leotele lea ua faalogoina e Ioane?

¹⁷ Ua lipotia mai e Ioane se tali fiafia mai i le lagi ona o lenei paʻū mataʻina o Satani: “Na ou  faalogo foʻi i le leo tele i le lagi, ua faapea, ʻO ona pō nei ua oo mai ai le faaolataga, ma le mana, ma le malo o lo tatou Atua, ma le pule a lona Keriso; auā ua lafo i lalo lē na molia o tatou uso, o lē na molia i latou i luma o lo tatou Atua i le ao ma le pō. A ua latou manumalo iā te ia ona o le toto o le Tamaʻi Mamoe, ma le upu a la latou mau, ua latou lē faapelepeleina foʻi lo latou ola ua oo i le oti. O le mea lea ia outou olioli ai, le lagi e, atoa ma ē ua nonofo ai!’”​—Faaaliga 12:10-12a.

¹⁸ O le leotele o ai lea ua faalogoina e Ioane? E lē o taʻu maia e le Tusi Paia. Ae e tai pei lava o le ʻalaga lea na lipotia mai i le Faaaliga 11:17, na sau mai toeaina e 24 ua toe tutū ma ua iai i o latou tofiga faalelagi, lea ua fai ai nei i latou ma sui o le ʻaupaia e 144,000. (Faaaliga 11:18) Talu ai o auauna faauuina na sauāina a le Atua lea o loo iai pea i le lalolagi, o loo taʻua e faapea o “o tatou uso,” e mafai foʻi la ona faapea atu e tasi lava le mea e sau ai lenei faamatalaga. E mautinoa e mafai e i latou nei faamaoni ona tuufaatasia o latou leo, talu ai o le taimi lava na uma ai ona lafo ifo Satani ma ana temoni mai le lagi, na sosoo ai loa ma lo latou toe tutū.

19. (a) O le faaiʻuina o le mealilo paia a le Atua ua tatala ai le ala mo Iesu ina ia faia le ā? (e) O le ā ua faaalia mai i le taʻuaina o Satani o “lē na molia o tatou uso”?

¹⁹ O le faaiʻuina o le mealilo paia a le Atua ua valaauina ai Iesu ina ia pule i le Malo o Ieova. Ua faapea ona tatalaina ai le ala mo le Atua ina ia faataunuuina lana fuafuaga sili ia laveaʻiina tagata faamaoni. E aumaia e Iesu le faaolataga e lē gata i soo matataʻu i le Atua o loo iai nei i le lalolagi, ae faapea foʻi i le faitau miliona o ē maliliu o loo manatua pea e le Atua. (Luka 21:27, 28) O le taʻuaina o Satani o “lē na molia o tatou uso” ua faaalia ai e faapea, e ui lava sa faamaonia le sesē o ana moliaga faasaga iā Iopu, ae sa ia faaauau pea ona luʻia le faamaoni o auauna i le lalolagi a le Atua. Ma le mautinoa lava, sa ia faia i le tele o taimi le moliaga faapea, e avatu e le tagata ana mea uma e sui ai lona ola. Ua matuā lē taulau lava Satani!​—Iopu 1:9-11; 2:4, 5.

20. Ua faapefea ona manumalo Kerisiano faamaoni iā Satani?

²⁰ O loo faaauau pea e Kerisiano faauuina o ē ua taʻuamiotonuina “ona o le toto o le Tamaʻi mamoe,” ona latou molimau atu i le Atua ma Iesu Keriso e ui lava i sauāga. Ua silia i le 120 tausaga o faasino atu pea lenei vasega e pei o Ioane i finauga tetele na aafia ai i le iʻuga o Tausaga o Nuu Ese i le 1914. (Luka 21:24) Ma o loo auauna nei ma le faamaoni faatasi ma i latou le motu o tagata e toʻatele. O i latou uma nei latou te lē “matataʻu i ē fasioti le tino, a e latou te lē mafaia ona fasioti le agaga,” e pei ona faataʻitaʻia soo mai i mea na tutupu moni lava i olaga o Molimau a Ieova i o tatou aso. Ua latou manumalo iā Satani e ala i upu e tautatala ai ma e ala i amioga faa-Kerisiano e tatau ai, o loo faamaonia ai pea lava o ia o se pepelo. (Mataio 10:28; Faataoto 27:11; Faaaliga 7:9) Maʻeu le fiafia  e ao ona iai Kerisiano faauuina, i le toe tutū aʻe i le lagi, talu ai ua lē toe iai i inā Satani e moliaina o latou uso! E moni, ua oo i le taimi ina ia tali atu ai ma le olioli le ʻauagelu uma i le valaau: “Ia outou olioli ai, le lagi e, atoa ma ē ua nonofo ai!”

Se Auē Faatavā!

21. Ua aumaia faapefea e Satani le auē i le lalolagi ma le sami?

²¹ Ona o le tigā o le auē lona tolu, ua faufau ai nei Satani e faapuapuagatia tagata i lana lava ituaiga o auē faapitoa. Ua faapea mai: “Oi talofa iā te oulua le fanua ma le sami, auā ua alu ifo iā te oulua le tiapolo ua lotoa tele, auā ua na iloa ua saasaa ona pō.” (Faaaliga 12:12e) O le tuliesea o Satani mai le lagi e uiga moni lava i le auē mo le lalolagi laueleele, lea ua faafanoina e tagata manatu faapito i lalo o lana faatonutonuga. (Teuteronome 32:5) Ae sili atu ai ona leaga, o le fuafuaga a Satani o le ʻpuleaina po o le faafanoina’ ua aumaia ai le auē i le lalolagi faafaatusa, le faatulagaga o mataupufai a tagata, faapea foʻi le sami faafaatusa, le anoanoaʻi o tagata ua fesouaʻiina. I le vaitaimi o taua e lua a le lalolagi, sa atagia mai ai le ita tele o Satani i le uiga lotoa o atunuu o loo gauaʻi atu iā te ia, e faapena foʻi i uiga lotoa faatemoni lea o loo iai i aso nei​—e ui ina e lē o toe umi mou atu! (Mareko 13:7, 8) E ui i le matuā leaga lava o togafiti a le Tiapolo, ae lē taitai ona tutusa ma le iʻuga e sili ona auē ai, lea o le a aumaia e le auē lona tolu​—e faagaoioia e le Malo o le Atua​—i le faalapotopotoga vaaia a Satani!

22, 23. (a) O le ā ua fai mai ai Ioane e tupu pe a mavae le lafo ifo o le tarako i le lalolagi? (e) Ua mafai faapefea ona faasauā le tarako i “le fafine lea na fanaua le tama tane”?

²² Talu mai le tuliesea o Satani, ua fetaiaʻi ai uso o Keriso o loo iai pea i le lalolagi le mamafatū o lona ita. Ua lipotia mai e Ioane: “Ua iloa e le tarako ua lafo ifo o ia i le lalolagi, ona tuliloa [pe faasauā] lea o ia i le fafine na na fanaua le tama tane. Ona foaʻiina atu lea i le fafine apaʻau e lua o le aeto tele, ina ia lele ai o ia ai luma o le gata i le vao i le mea e nofo ai o ia, e fafagaina ai o ia i le tausaga, ma tausaga, ma lona vaeluagalemu o le tausaga.”​—Faaaliga 12:13, 14.

²³ Ua aumaia i inei e le vaaiga le manatu na aumaia i le fuaiupu 6, lea o loo taʻu mai ai e faapea, ina ua mavae le fanau mai o lana tama, ona sola ese lea o le fafine mai le tarako agaʻi atu i le vao. Atonu tatou te tau mānatu pe mafai faapefea ona faasauā le tarako i le fafine, talu ai o loo iai le fafine i le lagi ma ua lafoina ifo nei le tarako i le lalolagi. Ia, manatua o loo iai ni tamaiti a le fafine i inei i le lalolagi, lana fanau. Mulimuli ane ai i lenei vaaiga, ua logoina mai i tatou e faapea ua faaalia e Satani lona ita tele agaʻi i le fafine e ala i le sauāina o lana fanau. (Faaaliga 12:17) O le mea e tupu i le fanau a le fafine i inei i le lalolagi e mafai ona manatu i ai e tusa o loo tupu i le fafine lava ia. (Faatusatusa i le Mataio 25:40.) Ma o le a tofo foʻi aumea ua faatoʻateleina a le fanau o loo i inei i le lalolagi i nei sauāga.

Se Nuu Fou

24. O le ā le mea na tupu i Tagata Aʻoga o le Tusi Paia lea sa talitutusa i le laveaʻiina o tagata Isaraelu mai Aikupito?

²⁴ Sa faaauau pea ma le faamaoni uso o Iesu i la latou molimau atu i le tele e mafai ai, a o tau le uluaʻi taua a le lalolagi. Sa faia lenei mea i le taimi na feagai ai ma le tetele o teteega mai iā Satani ma ana ʻaulagolago sauā. I le iʻuga, na toetoe lava a taofia ai le molimau atu i le lautele a Tagata Aʻoga o le Tusi Paia. (Faaaliga 11:7-10) O le taimi lenā sa iai se mea na tupu iā i latou e talitutusa ma le mea na tupu i Isaraelu i Aikupito, o ē sa tutumau foʻi i lalo o omiga tetele. O le taimi lava lea na aumaia ai loa faanatinati i latou e Ieova, e peiseaʻī i apaʻau o  aeto, ina ia saogalemu i le toafa o Sinai. (Esoto 19:1-4) E faapena foʻi, ina ua mavae sauāga ogaoga i le 1918 e oo i le 1919, sa laveaʻiina ai e Ieova ana molimau, o loo faaataina ai lana fafine, i se tulaga faaleagaga sa sili ona saogalemu mo i latou e pei ona saogalemu o le toafa mo tagata Isaraelu. Na oo mai lenei mea e avea o se tali i a latou tatalo.​—Faatusatusa i le Salamo 55:6-9.

25. (a) O le ā sa aumaia e Ieova i le 1919, e pei lava ona sa ia aumaia tagata Isaraelu o se nuu mai le vao? (e) O ai e faia aʻe ai lea nuu, ma ua aumaia i latou i totonu o le ā?

²⁵ Sa aumaia e Ieova tagata Isaraelu o se nuu mai le vao, i le sauniaina o mea faaleagaga ma mea faaletino mo i latou. I se tulaga talitutusa, na amata mai le 1919 ona aumaia e Ieova le fanau a le fafine e avea o se nuu faaleagaga. E lē tatau ona faafenumiaʻia lenei mea ma le Malo faa-Mesia lea ua pule mai le lagi talu mai le 1914. O le nuu fou lenei e faia aʻe i le vaega totoe o molimau faauuina i le lalolagi, o ē na aumaia i totonu o se tulaga faaleagaga faamamaluina i le 1919. I le sauniaina nei o “mea e ʻai ia te i latou i ona itu aso,” sa faamalosiina ai i latou nei mo le galuega o loo taatia mai i luma.​—Luka 12:42; Isaia 66:8.

26. (a) O le ā le umi o le vaitaimi ua taʻua i le Faaaliga 12:6, 14? (e) O le ā le fuafuaga o le vaitaimi o le tolu ma le ʻafa tausaga, o anafea sa amata ai, ma o anafea sa faaiʻu ai?

²⁶ O le ā le umi na iai lea mapusaga mo le fanau a le fafine a le Atua? Ua faapea mai le Faaaliga 12:6, e 1,260 aso. Ua taʻua e le Faaaliga 12:14 le vaitaimi, o le tausaga, ma tausaga, ma lona vaeluagalemu o le tausaga; i se isi faaupuga, e tolu ma le ʻafa tausaga. O le mea moni, o na faaupuga uma e tusa o le tolu ma le ʻafa tausaga, i le Itu i Mātū o le Lalolagi e amata mai le tau e totogo ai mea i le 1919 e oo i le tau e toʻulu ai lau o laau i le 1922. Sa avea lea vaitaimi o se toe faafouina o le malosi ma le toe faamaopoopoina mo le vasega e pei o Ioane lea ua toe tulaʻi mai.

27. (a) E tusa ai ma le lipoti a Ioane, o le ā sa faia e le tarako ina ua mavae le 1922? (e) O le ā le fuafuaga a Satani i le aumaia o se lolo o sauāga i Molimau a Ieova?

²⁷ E leʻi nofoaʻi le tarako! “Ona luai atu lea e le gata le vai, e pei o se vaitafe nai lona gutu i tua o le fafine, ina ia tafea o ia i le vai.” (Faaaliga 12:15) O le ā le uiga o le “vai, e pei o se vaitafe,” po o “se lolo vai”? (The New English Bible) Sa tautala le tupu anamua o Tavita e uiga i tagata amioleaga o ē na tetee iā te ia o ni “tafega a ē ulavavale” [“tafega a ē leai se aogā,” Young]. (Salamo  18:4, 5, 16, 17) O le mea ua tatalaina nei e Satani, o sauāga faapena a ē leai se aogā po o “ē ulavavale.” Ina ua mavae le 1922, na aumai ai e Satani se lologa o sauāga i Molimau a Ieova. (Mataio 24:9-13) Na oo ina aofia ai i lenei mea faiga sauā, le “faaaogā tulafono e faatigā ai iā i latou,” faafalepuipuiina, ma e oo lava i faasalaga i le oti e ala i le sisiina, fanaina, ma le vavaeesea o ulu. (Salamo 94:20) Ona ua lē mafai ona ia osofaʻia tuusaʻo le fafine i le lagi a le Atua, ua sagaʻi atu ai ma le ita tele Satani, ina ia osofaʻia lana fanau o loo totoe i le lalolagi ma ia faaumatia i latou, a lē tuusaʻo pe faapogaia i latou ina ia lē maua le finagalo malie o le Atua, e ala i le lē tausisia o lo latou faamaoni. Ae sa faamaonia lo latou loto mau e pei o Iopu: “Seʻia oo lava i loʻu oti ou te lē faateʻaina lava laʻu amio saʻo!”​—Iopu 27:5.

28. Na faapefea ona oo atu le lolo o sauāga i se tulaga sili ona mataʻutia i le vaitaimi o le Taua Lona Lua a le Lalolagi?

²⁸ Na oo atu lea lologa o sauāga i se tulaga mataʻutia i le vaitaimi o le Taua Lona Lua a le Lalolagi. E tusa ma le 12,000 Molimau a Ieova i Europa sa faafalepuipuiina i nofoaga o faasalaga ma falepuipui a le ʻau Nasi, ma e tusa ma le 2,000 na maliliu ai. Sa pagatia Molimau a Ieova faamaoni i ni faiga sauā faapena i pulega a taʻitaʻiʻau sili i Iapani, Italia, Taiwan, ma Korea. E oo lava i atunuu ua taʻua o atunuu temokalasi, sa faaoolima ai vaega o Gaoioiga Katoliko i Molimau, na tavali i le tā ma faapipii i ai fulu, ma tutuli ese mai taulaga. O nisi taimi a o fai a latou fonotaga, e osofaʻi ane tagata faatupu vevesi ma taumafai e taofi. Sa faateʻa foʻi fanau a Molimau a Ieova mai aʻoga.

29. (a) Ua faamatalaina faapefea e Ioane se mapusaga ua maua mai se puna e leʻi faatalitalia? (e) Ua faapefea ona “fesoasoani . . . le fanua i le fafine”? (i) O le ā ua faaauau ona faia pea e le tarako?

²⁹ Ua maua se mapusaga mai se puna e leʻi faatalitalia: “Ona fesoasoani ai lea o le fanua i le fafine, ua faamaga aʻe foʻi e le fanua lona gutu, ma ua inu i le vaitafe ua luai atu e le tarako nai lona gutu. Ua ita foʻi le tarako i le fafine, ona alu atu ai lea o ia e tau le taua ma i latou ua totoe o lana fanau, o ē ua tausi i poloaʻiga a le Atua, ma ua taofi le mau iā Iesu.” (Faaaliga 12:16, 17) Na iʻu ina folo e “le fanua”​—o faapotopotoga i totonu lava o le lalolagi a Satani​—le “vaitafe,” po o le “lolo.” Sa maua e Molimau se faasologa o faaiʻuga fiafia i le Faamasinoga Sili i le Iunaite Setete i tausaga amata  mai le 1940 faasolo mai ai, ma mai i faiga malo o loo pule i nisi o atunuu, ia e tausisia ai le saʻolotoga e tapuaʻi ai. I le iʻuga, na foloina ai e atunuu Soofaatasi le faufauga malosi sili a le ʻau Nasi ma le ʻau Fasi, ma na mapu ai Molimau a Ieova o ē sa pagatia i lalo o pulega sauā faatautalatasi. Sa leʻi taofia faatasi uma ai i inā sauāga, auā ua faaauau seʻia oo mai i aso nei le ita o le tarako, ma o loo ia faia pea le taua iā i latou o ē “ua taofi le mau iā Iesu Keriso.” O loo iai pea Molimau a Ieova faamaoni i falepuipui i le tele o atunuu, ma o loo maliliu pea nisi ona o lo latou faamaoni. Ae i nisi o nei atunuu, ua tau faaitiitia ai e ē o loo pule a latou omiga mai lea taimi i lea taimi, ma ua maua ai e Molimau a Ieova sina saʻolotoga e sili atu na i lo le taimi muamua. * O lea, i le faataunuuga o le valoaga, ua faaauau ai ona foloina e le fanua le vaitafe o sauāga.

30. (a) Ua saunia e le fanua le mapusaga ua lava lelei mo le ā le mea o le a tupu? (e) O le ā le iʻuga ua iʻu i ai le faamaoni o tagata o le Atua?

³⁰ I lenei auala, ua saunia ai e le fanua le mapusaga ua lava lelei ina ia faatagaina ai le galuega a le Atua ia salalau atu i atunuu e 235 ma aumaia ai ni tagata talaʻi faamaoni o le tala lelei e sili atu i le ono miliona. O loo tausia e se motu faavaomalo e sili ona tele o tagata talitonu fou, faatasi ai ma ē o totoe o le fanau a le fafine, poloaʻiga a le Atua e tusa ai ma le vavae ese mai le lalolagi, amioga mamā, ma le alofa i le ʻauuso, ma o loo latou molimau i le Malo Faa-Mesia. Ua taliina e lo latou faamaoni le luʻi taufaifai a Satani, ua faapea ona faaleoina ai le lata mai o le iʻuga o Satani ma lana lalolagi.​—Faataoto 27:11.

[Faaopoopoga i lalo]

[Fesili mo le Suʻesuʻega]

[Pusa i le itulau 185]

“Ua Faamaga Aʻe Foʻi e le Fanua Lona Gutu”

Ua tatala mai se lologa o sauāga a Satani i le tele o atunuu faasaga i Kerisiano faauuina ma a latou aumea. Peitaʻi, ua masani lava ona iʻu i le foloina e taualumaga i totonu lava o le lalolagi a Satani na lologa.

Sa matuā foloina le lologa o osofaʻiga ma faafalepuipuiina i le Iunaite Setete e faaiʻuga e Faamasinoga Sili mo le lelei o tagata o le Atua i le vaitausaga na amata i le 1940 ma faasolo mai ai.

1945: O sauāga ogaoga i atunuu na puleaina e Siamani ma Iapani, sa taofia ina ua manumalo atunuu Soofaatasi i le Taua Lona Lua a le Lalolagi.

Ina ua faamalosia se faasasaāga i Molimau a Ieova i le Dominican Republic, sa faafalepuipuiina Molimau, saisaiina i maea, ma sasaina i fana. I le 1960, o le malepe o le faiā lelei i le va o le pule tautalatasi o Rafael Trujillo ma le Lotu Katoliko Roma, sa taʻitaʻia atu ai i le aveeseina o le faasasaāga i Molimau a Ieova.

Sa taofia le susunuina, tatoso faamalosi o fafine, sasaina, faatigāina, ma fasiotiga o Molimau i le vaitaimi o le taua a tagata Nigeria lava latou i le 1970 ina ua faatoʻilalo e vaegaʻau a le malo le itumalo ua vavaeesea, le itumalo na tutupu ai ia mea.

I Sepania sa osofaʻia ai fale ma faasalaina Kerisiano ma faafalepuipuiina ona o le “solitulafono” o le talanoa e uiga i le Atua ma le faia o sauniga faa-Kerisiano. Sa iʻu ina faaumaina lenei sauāga i le 1970, ina ua suia e le malo le tulafono mo lotu e ese mai le Katoliko, ma faataga ai loa Molimau a Ieova e lesitalaina faaletulafono.

I Potukali sa suʻeina ai le faitau selau o fale e aunoa ma ni tusi faataga faalemalo e saʻilia ai. Sa manunuʻa ai Molimau ma lafoina i le falepuipui, ma faoa a latou Tusi Paia. Sa ʻfoloina’ lenei faiga faatupu faalavelave ina ua oo i le 1974, sa avea se fouvalega faafitafita ma iʻuga o se suiga i le faiga malo ma sa pasia ai se tulafono e tuuina atu ai le saʻolotoga e faapotopoto ai.

I Anitenitina, sa faateʻaina ai fanau a Molimau a Ieova mai aʻoga i lalo o se faiga malo faafitafita, ma sa puʻea faapagota Molimau i le atunuu atoa ona o le talaʻia o le tala lelei. Na iʻu ina uma lenei sauāga i le 1984 ina ua aloaʻia faaletulafono e le faiga malo na pule ai i lenā taimi le Faalapotopotoga o Molimau a Ieova.

[Siata i le itulau 183]

(Tagaʻi i le lomiga mo le ata atoa)

1914 Le fanau mai o le Malo

1919 Le fanau mai o le nuu fou

1919-1922 Vaitaimi o le toe faafouina

1922- Lologa o sauāga

[Ata i le itulau 182]

Ua auē le lalolagi