Mataupu 30

“Ua Paʻū Papelonia o le Aai Sili!”

1. O le ā le mea lea ua faasilasila mai e le agelu lona lua, ma o ai Papelonia le Aai Sili?

UA OO i le itula o le faamasinoga a le Atua! Faafofoga mai i le feʻau mai le Atua: “Ona mulimuli atu ai lea o le tasi agelu, o lona lua, ua faapea atu, ʻUa paʻū, ua paʻū Papelonia o le aai sili, o lē ua faainu i nuu uma i le uaina o le toʻasā i lana faitaaga.’” (Faaaliga 14:8) O le taimi muamua lea, ae e lē o le taimi mulimuli, ua taulaʻi atu ai le Faaaliga iā Papelonia le Aai Sili. Mulimuli ane, o le a faamatalaina o ia e le mataupu e 17 e faapea, o se fafine talitane o fiafiaga faatosina. O ai o ia? E pei ona o le a tatou iloaina, o ia o se faalapotopotoga faavaomalo, e mapo lotu, ma o ia o le faiga taufaasesē a Satani o loo ia faaaogā e faasagatau atu ai i le fanau a le fafine a le Atua. (Faaaliga 12:17) O Papelonia le Aai Sili o le vaega tuufaatasi o lotu sesē i le lalolagi atoa. E aofia ai iā te ia lotu uma e taofi mau i aʻoaʻoga faalotu ma faiga a Papelonia anamua ma o loo faaali maia foʻi lona agaga.

2. (a) Sa faapefea ona faataapeapeina lotu a Papelonia i tuluʻiga uma o le lalolagi? (e) O le ā le vaega e pito sili ona lauiloa o Papelonia le Aai Sili, ma o anafea sa aliaʻe ai lea mea e avea o se faalapotopotoga malosi?

² O Papelonia sa faafenuminumiaʻi ai e Ieova gagana a ē na semanū e fausiaina le Olo o Papelu, i le sili atu i le 4,000 tausaga ua mavae. Sa faataapeapeina vaega ua eseese gagana i tuluʻiga o le lalolagi, ma latou ō ai ma ave talitonuga ma faiga e feteenaʻi ma le tapuaʻiga moni, ua fai nei ma faiga faavae a le tele o lotu e oo mai i aso nei. (Kenese 11:1-9) O Papelonia le Aai Sili o le vaega faalotu lea a  le faalapotopotoga a Satani. (Faatusatusa i le Ioane 8:43-47.) O le vaega e pito sili ona lauiloa o Papelonia le Aai Sili i aso nei o lotu ua liliu ese ma le Faa-Kerisiano moni, lea na tulaʻi mai e avea o se faalapotopotoga malosi ma le solitulafono i le senituri lona fā ina ua mavae atu Keriso, faatasi ai ma talitonuga autū faalotu ma aʻoaʻoga e lē mai i le Tusi Paia, ae tele ina maua mai i lotu a Papelonia.​—2 Tesalonia 2:3-12.

3. E mafai faapefea ona fai atu ua paʻū Papelonia le Aai Sili?

³ Atonu e te fesili, ʻTalu ai o loo telē pea le taaʻiga a lotu i le lalolagi, aiseā ua faasilasilaina ai e le agelu e faapea ua paʻū Papelonia le Aai Sili?’ Manatua le mea na iʻu i ai ina ua mavae le 539 T.L.M. ina ua paʻū Papelonia anamua? Ioe, sa faasaʻolotoina Isaraelu ina ia toe foʻi i ona laufanua moni ma toe atiaʻe le tapuaʻiga moni i inā! O le toe faafoʻisia la o Isaraelu faaleagaga i le 1919 i se tulaga tamaoaiga faaleagaga, lea o loo faaauau ma faalauteleina e oo mai i lenei aso, ua fai ma faamaoniga e faapea na paʻū Papelonia le Aai Sili i lenā tausaga. Ua lē o toe iai sona malosi e taofiofia ai tagata o le Atua. E lē gata i lea, ua matuā lutia i puava lona lava lotoifale ona o ana faiga leaga. Talu mai le 1919, ua matuā faatāsina i ala i ana faiga piʻopiʻo, le lē faamaoni, ma le amioleaga. Ua toʻaitiiti tagata o toe ō atu i lotu i le tele o nuu o Europa, ma i nisi atunuu e pulea e malo faasosalisi (socialistic), ua manatu i lotu o ʻle vailaau oona ua onanā ai tagata.’ I le taʻuleagaina i luma o ē uma e alolofa i le Afioga faamaoni a le Atua, ua faatalitali nei Papelonia le Aai Sili i le faasologa o ē o le a faasala i le oti, mo le faaooina mai i ona luga o le sala o le faamasinoga amiotonu a Ieova.

 Le Paʻū Matagā o Papelonia

4-6. Ua faapefea iā “Papelonia o le aai sili, . . . [ona] ia faainu i nuu uma i le uaina o le toʻasā i lana faitaaga”?

⁴ Seʻi o tatou iloiloina auʻiliʻiliga o tulaga o loo siʻomia ai le paʻū matagā o Papelonia le Aai Sili. Ua taʻu mai e le agelu i inei iā i tatou o “Papelonia o le aai sili, o lē ua faainu i nuu uma i le uaina o le toʻasā i lana faitaaga.” O le ā le uiga o lenei mea? E faauiga atu i ni manumalo. Mo se faaaʻoaʻoga, na taʻu atu e Ieova iā Ieremia: “Ia e ave le ipu uaina o loʻu nei ita ai loʻu lima, ma faainu aʻi atu nuu uma ou te auina atu ai oe iā te i latou. Latou te feinu, ma tautevateva, ma faavālea, ona o le pelu ou te auina atu ai iā te i latou.” (Ieremia 25:15, 16) I senituri lona ono ma le lona fitu T.L.M., sa faaaogāina ai e Ieova Papelonia anamua ina ia liligiina ifo se ipu faafaatusa o puapuaga ina ia feinu ai le tele o nuu, e aofia ai ma Iuta na tetee ma fulitua i le Atua, lea e oo lava i ona tagata na faatafea ai. Ona oo mai lea i lona taimi, na paʻū ai Papelonia ona sa faasilisiliina e lona tupu ia lava e tetee atu iā Ieova, “le Alii o le lagi.”—Tanielu 5:23.

⁵ Ua manumalo foʻi Papelonia le Aai Sili i le tele o taimi, ae o le tele lava o nei manumalo, e fai i ni auala faatogafiti. Ua ia “faainu i nuu uma” e ala i le faaaogāina o togafiti a se fafine talitane, i le faia o le faitaaga faalotu ma i latou. Ua ia maileia taʻitaʻi faapolotiki i ni sootaga ma faauōga ma ia. Ua ia fafauina omiga faapolotiki, faapisinisi, ma tau tamaoaiga, e ala i ana faatosinaga faalotu. Ua ia faatupuina sauāga faalotu ma taua faalotu, faapea foʻi ma taua paia, mo ni māfuaaga e matuā faapolotiki lava ma faapisinisi. Ma ua ia faapaiaina nei taua i le faapea mai o le finagalo lea o le Atua.

⁶ Ua iloa e le lautele le aafia o lotu i taua ma polotiki o le senituri lona 20​—e pei ona iai i Sinitō i Iapani, Hinitū i Initia, Puta i Vietiname, “Kerisiano” i Aialani i Mātū, ma Amerika Latina, faapea foʻi ma isi​—ae e lē faagaloina ai vaega a faifeʻau o vaegaʻau i itu uma e lua a taua e lua a le lalolagi, i le uunaʻia o tane talavou ina ia fefasiaʻi e le tasi le isi. O se faaaʻoaʻoga sili o le faauōga faamanamea a Papelonia le Aai Sili, o lana vaega lea sa faia i le Taua i le va o tagata Sepania lava latou i le 1936 e oo i le 1939, lea sa fasiotia ai e lē itiiti mai le  600,000 tagata. O lenei faamasaatoto sa faatupuina e ē na lagolagoina taʻitaʻi lotu Katoliko ma a latou aumea soofaatasi, ona o se tasi o māfuaaga, sa faamataʻuina le tamaoaiga ma le tulaga o le lotu e le faiga malo a Sepania.

7. O ai ua avea ma taulaʻiga autū o osofaʻiga a Papelonia le Aai Sili, ma o ā auala ua ia faaaogā i lenei osofaʻiga?

⁷ Talu ai o Papelonia le Aai Sili o le vaega faalotu lea o le fanau a Satani, ua avea ai pea le “fafine” a le Atua, “le Ierusalema i lugā,” ma taulaʻiga autū o ana osofaʻiga. I le uluaʻi senituri, sa mātauina manino ai le faapotopotoga o Kerisiano faauuina, o le fanau a le fafine. (Kenese 3:15; Kalatia 3:29; 4:26) Sa taumafai malosi Papelonia le Aai Sili ina ia faatoʻilalo lenā faapotopotoga mamā e ala i le faatosinaina i le faia o le faitaaga faalotu. Sa lapataʻia e aposetolo o Paulo ma Peteru e faapea o le a toʻatele i latou e lolo atu i ai ma o le a iʻu ai i le anoanoaʻi e liliu ese mai le upu moni. (Galuega 20:29, 30; 2 Peteru 2:1-3) Na faaalia i feʻau a Iesu i faapotopotoga e fitu e faapea, a o agaʻi ina pulapula lā goto le soifua o Ioane, o le a amata ona faifai tetele aʻe le leaga o mea o loo faatino e Papelonia le Aai Sili. (Faaaliga 2:6, 14, 15, 20-23) Peitaʻi ua uma ona faaalia mai e Iesu le umi o le a faataga ai faiga nei a Papelonia.

Le Saito ma le Titania

8, 9. (a) O le ā ua faailoa mai e le faataoto a Iesu i le saito ma le titania? (e) O le ā na tupu a o “momoe tagata”?

⁸ I lana faataoto i le saito ma le titania, na fetalai ai Iesu e faatatau i se tagata o lē sa lūlūina le saito lelei i se fanua. A o “momoe tagata,” na sau le fili ma lūlū i ai le titania. O le mea lea, na lilofia atoa ai le saito i le titania. Na faamatalaina e Iesu lana faataoto i upu nei: “O lē lūlū le saito lelei, o le Atalii lea o le tagata; a o le fanua, o le lalolagi lea; o le saito lelei, o tagata ia o le malo; o le titania, o le fanau ia a lē ua leaga; o lē ua ita mai na na lūlūina ia mea, o le tiapolo lea.” Ona ia faaalia lea e faapea o le a tuu pea le saito ma le titania e tutupu aʻe faatasi seʻia oo i “le gataaga lea o le lalolagi [le faiga o mea],” pe a “faapotopotoina” e agelu  le titania faafaatusa.​—Mataio 13:24-30, 36-43.

⁹ Sa taunuu lava le mea na lapataʻia e Iesu ma aposetolo o Paulo ma Peteru. A o “momoe tagata,” a lē ina ua maliliu le ʻauaposetolo pe ina ua lē mataala foʻi ovasia Kerisiano i le leoleoina o le lafu a le Atua, na tupu aʻe loa aʻoaʻoga na māfua mai i Papelonia lea e tetee i le upu moni, i totonu lava o le faapotopotoga. (Galuega 20:31) E leʻi umi lava ae sili atu ona tele titania na i lo saito ma natia ai loa le saito ua lē iloa atu. Mo le tele o senituri, sa foliga mai ai ua matuā lilofia atoa le fanau a le fafine i aafiaga a Papelonia le Aai Sili.

10. O le ā na tupu a o leʻi oo i vaitausaga e amata mai i le 1870, ma na tali atu faapefea i ai Papelonia le Aai Sili i lenei mea?

¹⁰ E oo ane i tausaga e amata mai le 1870, ua amata e Kerisiano faauuina ona faia taumafaiga maumauaʻi ina ia vavae ese i latou mai ala faatalitane a Papelonia le Aai Sili. Na latou lafoaʻia aʻoaʻoga sesē na aumaia e lotu ua liliu ese mai le Faa-Kerisiano moni mai faiga faapaupau ae faaaogā ma le loto tele le Tusi Paia i le talaʻia e faapea, o le a iʻu taimi o Nuu Ese i le 1914. Sa tetee malosi le meafaigaluega sili a Papelonia le Aai Sili, o taʻitaʻi lotu ia a lotu sesē, i nei gaoioiga mataʻina o le toe atinaʻeina o le tapuaʻiga moni. I le vaitaimi o le Taua Muamua a le Lalolagi, na latou faaaogāina ai le taimi o le vevesi o le taua ina ia taumafai ai e aveesea le vaega toʻaitiiti o Kerisiano faamaoni. I le 1918, ina ua toetoe lava taofia atoa la latou galuega, na foliga mai ai ua taulau taumafaiga a Papelonia le Aai Sili. Sa foliga mai ua ia manumalo iā i latou.

11. O le ā na iʻu i ai le paʻū o Papelonia anamua?

¹¹ E pei ona sa tatou mātauina muamua, na paʻū ma lē toe avea ma pule le aai faamaualuga o Papelonia i le 539 T.L.M. Ona lagonaina lea o le ʻalaga: “Ua paʻū, ua paʻū Papelonia!” Na paʻū le malo na pulea le lalolagi i vaegaʻau a Metai ma Peresia i le pulega a Kuresa le Sili. E ui lava sa sao le aai lava ia mai le fetauaʻiga, ae ua lē toe avea Papelonia ma pule, ma na iʻu ai i le toe faasaʻolotoina o tagata Iutaia sa ia faatagataotauaina. Sa latou toe foʻi atu i Ierusalema ina ia toe atiaʻe ai i inā le tapuaʻiga mamā.​—Isaia 21:9; 2 Nofoaiga a Tupu 36:22, 23; Ieremia 51:7, 8.

12. (a) I o tatou aso, e mafai faapefea ona fai atu ua paʻū Papelonia le Aai Sili? (e) O le ā ua faamaonia ai ua matuā teena atoatoa e Ieova lotu sesē?

¹² O loo lagona foʻi i o tatou aso le ʻalaga ua paʻū Papelonia le Aai Sili! O le tulaga taulau sa iai lotu sesē a Papelonia mo sina taimi lē tumau i le 1918, sa matuā suia lava ina ua toe faatulaʻi mai e ala i se toetū faaleagaga le vaega totoe o ē faauuina, le vasega e pei o Ioane, i le 1919. Ua paʻū Papelonia le Aai Sili ua lē toe mafai ona ia taofia faatagataotauaina tagata o le Atua. Na lolofi atu uso faauuina o Keriso e pei o sē akerise mai le to e lē gata, ma ua latou sauni mo gaoioiga. (Faaaliga 9:1-3; 11:11, 12) Sa avea i latou o le “auauna faamaoni ma le mafaufau” i aso nei, ma ua tofia i latou e le Matai e tausi i ana mea uma i le lalolagi. (Mataio 24:45-47) O le faaaogāina o i latou i lenei auala ua faamaonia ai ua matuā teena atoatoa e Ieova lotu ua liliu ese mai le Faa-Kerisiano moni e ui i lona faapea mai o ia o lona sui i le lalolagi. Sa toe atiaʻe le tapuaʻiga mamā, ma na avanoa ai le auala ina ia faamāeʻaina le galuega o le faamaufaailogaina o le vaega totoe o le 144,000​—o ē o totoe o le fanau a le fafine, le fili ua leva ona iai o Papelonia le Aai Sili. O nei mea uma ua faailo mai ai se toʻilalopopo mo lenā faalapotopotoga faalotu a Satani.

Onosai mo le ʻAupaia

13. (a) O le ā ua faasilasila mai e le agelu lona tolu? (e) O le ā le faamasinoga ua faia e Ieova mo i latou o ē ua iai le faailoga o le manu feʻai?

¹³ Ua tautala nei le agelu lona tolu. Faafofoga! “Ona mulimuli atu ai lea iā te i laʻua o lona toʻatolu o agelu, ua faapea atu ma le leo tele, ʻAi se tasi e ifo i le manu feʻai ma lona faatagata, ma talia le faailoga i lona muāulu po o lona lima, e inu lava ia i le uaina o le toʻasā o le Atua, ua liligiina atu e lē suia i le ipu o lona toʻasā.’” (Faaaliga 14:9, 10a) I le Faaaliga 13:16, 17, sa faaalia ai e faapea, i le vaitaimi o le aso o le Alii, o le a pagatia ai i latou o ē e lē mananaʻo e tapuaʻi i le faatagata o le manu feʻai​—e oo lava ina fasiotia ai. O lea la ua tatou iloa, ua uma ona fuafuaina e Ieova ina ia faamasinoina i latou “ua i ai le faailoga, po o  le igoa o le manu feʻai, po o le faitau aofaʻi [po o le numera] o lona igoa.” O le a faamalosia i latou ina ia feinu i se ʻipu o le toʻasā’ e oona, o le toʻatamaʻi o Ieova. O le ā o le a uiga i ai lenei mea mo i latou? I le 607 T.L.M., ina ua faamalosia e Ieova Ierusalema ina ia feinu i le “ipu o lona ita,” na oo ai i le aai le “faatafunaina ma le lepetia, o le oge ma le pelu” i lima o ʻautau a Papelonia. (Isaia 51:17, 19) I se uiga talitutusa, pe a oo ina faainuina i le ipu o le toʻasā o Ieova i latou ua tapuaʻi i malo malolosi faapolotiki o le lalolagi ma lona faatagata, o Malo Aufaatasi, o le a avea o se mala mo i latou. (Ieremia 25:17, 32, 33) O le a soloa i le fuefue i latou.

14. O le ā e ao i ē tapuaʻi i le manu feʻai ma lona faatagata ona uia a o leʻi oo i le faaumatiaga, ma ua faamatalaina mai faapefea e Ioane lenei mea?

¹⁴ Ae peitaʻi, a o leʻi tupu lenā mea, e ao iā i latou o iai le faailoga o le manu feʻai ona mafatia i iʻuga puapuagatia o le lē maua o le finagalo malie o Ieova. I le taʻua o ē tapuaʻi i le manu feʻai ma lona faatagata, ua logo atu ai e le agelu iā Ioane e faapea: “E puapuagatia foʻi ia i le afi ma le teio i luma o le ʻau agelu paia ma luma o le Tamaʻi Mamoe. O le asu foʻi o lo latou puapuaga e alu aʻe e faavavau faavavau lava; latou te lē maua foʻi se filemu i le ao ma le pō o ē ua ifo i le manu feʻai ma lona faatagata, ma sē na te talia le faailoga o lona igoa.”​—Faaaliga 14:10e, 11.

15, 16. O le ā le uiga o upu “afi ma le teio” o loo i le Faaaliga 14:10?

¹⁵ Ua manatu nisi i le taʻua i inei o le afi ma le teio o se faamaoniga o le iai o se afi i seoli. Ae afai e tagaʻi atu i se valoaga talitutusa e faaalia ai le uiga moni o nei upu i nei faamatalaga o loo siʻomia ai. I tuā lava i aso o Isaia, sa lapataʻia ai e Ieova le nuu o Etoma o le a faasalaina i latou ona o lo latou ʻinoʻino iā Isaraelu. Na fetalai o ia: “E liu pulu safeta ona vaitafe, e liu teio foʻi ona efuefu, e avea foʻi lona laueleele ma pulu safeta o mū. E lē tineia lava ia i le pō, po o le ao; e pusa aʻe pea lava lona asu; e tuufua ia i lea tupulaga ma lea tupulaga, e lē uia e faavavau faavavau lava.”​—Isaia 34:9, 10.

¹⁶ Pe sa lafoina ea Etoma i se afi i seoli e pei o manatu lē faavaea ina ia susunuina ai e faavavau? E leai. Na i lo lea, sa mou atoatoa atu le nuu mai le vaaiga a le lalolagi e peiseaʻī na susunuina atoa i le afi ma le teio. O le faasalaga la o Etoma, e lē o le faapuapuagatiaina e faavavau le iʻuga mulimuli o le faasalaga, ae o le “faagaogaoina . . . e faatuufuaina . . . e lē toe ai lava so latou.” (Isaia 34:11, 12) Ua faataʻitaʻia mai ma le manino lenei mea e le asu ʻe alu aʻe e faavavau faavavau lava.’ Pe a mū se fale, e alu aʻe pea le asu mai le efuefu mo sina taimi pe a mate ifo le mumū o le afi, ua faamautinoa ai i ē o matamata ane e faapea sa iai se afi tele na faaumatiaina ai lea fale. E oo lava i aso nei o loo manatuaina e tagata o le Atua le lesona e ao ona aʻoaʻoina mai le faaumatiaga o Etoma. I lea auala, e alu aʻe ai pea lava ʻle asu o lona susunuina’ i se auala faafaatusa.

17, 18. (a) O le ā le taunuuga o i latou o ē iai le faailoga o le manu feʻai? (e) I le ā le auala ua faapuapuagatia ai le ʻautapuaʻi a le manu feʻai? (i) Ua faapefea e le ʻasu o lo latou puapuaga ona alu aʻe e faavavau faavavau lava’?

¹⁷ O le a faaumatia atoatoa foʻi i latou o iai le faailoga o le manu feʻai, e peiseaʻī e susunuina i le afi. O le a tuua o latou tino oti e lē tanumia ina ia aai ai manu vaefā ma manu felelei, e pei ona o le a faaalia mulimuli mai e le valoaga. (Faaaliga 19:17, 18) Ma le manino lava la, e lē o faapuapuagatiaina faaletino i latou e faavavau! E faapefea la ona latou “puapuagatia . . . i le afi ma le teio”? I le uiga e faapea, o le faalauiloaina o le upu moni e faaalialia ma lapataʻia ai i latou e faatatau i le faaumatiaga faafaamasinoga a le Atua o loo sau. O le mea lea, latou te upuleagaina ai tagata o le Atua ma pe a mafai, latou te faatauanauina ma le agapiʻopiʻo le manu feʻai faapolotiki, ina ia sauāina ma fasiotia Molimau a Ieova. I le taimi mulimuli, o le a faaumatiaina nei tagata tetee e peiseaʻī e faaumatia i le afi ma le teio. O le mea lea “o le asu foʻi o lo latou puapuaga e alu aʻe e faavavau faavavau lava” i le uiga e faapea, o le faasalaina faamasinoga o i latou e le Atua, o le a avea o se pine mausalī mo soo se tasi lava e toe fia luʻia le tonu o le pule silisili ese a Ieova. O le a foʻia ai lenā finauga e oo i le faavavau.

¹⁸ O ai e faalauiloaina le feʻau e faapuapuagatiaina  ai i aso nei? Manatua, ua iai i sē akerise faafaatusa le pule ina ia faapuapuagatia ai tagata o ē e lē o iai le faamaufaailoga a le Atua i o latou muaulu. (Faaaliga 9:5) Ma le mautinoa lava o i latou nei, i lalo o le faatonutonuga a le ʻauagelu, ua avea ma ē e faia le faapuapuagatiaina. O uiga maumauaʻi na o sē akerise faafaatusa ua māfua ai ona “lē maua foʻi se filemu i le ao ma le pō o ē ua ifo i le manu feʻai ma lona faatagata, ma sē na te talia le faailoga o lona igoa.” Ma i le iʻuga, pe a mavae lo latou faaumatiaga, o le a ʻalu aʻe ai le asu o lo latou puapuaga’ e faavavau, faavavau lava e fai ma pine mataʻina o le faamaoniaina o le tonu o le pule silisili ese a Ieova. Tau ina ia tutumau le vasega e pei o Ioane seʻia oo ina faamāeʻaina lenā faasilisiliina! E pei ona faaiʻu mai e le agelu: “O le mea lenei ua fia maua ai le onosai o le ʻau paia; o ē ua tausi i poloaʻiga a le Atua ma le faatuatua iā Iesu.”​—Faaaliga 14:12.

19. Aiseā ua manaʻomia ai le onosai i le vaega a le ʻaupaia, ma o le ā ua lipotia mai e Ioane ua faamalosia ai i latou?

¹⁹ Ioe, o “le onosai o le ʻau paia,” o lona uiga, o le tapuaʻi iā Ieova i le tuutoina atu atoatoa e auala iā Iesu Keriso. E lē tausaafia la latou feʻau. E taʻitaʻiina atu ai i teteega, sauāga, e oo lava i le faamaturoina ai. Ae ua faamalosia i latou e ala i le lipoti e sosoo mai ai a Ioane: “Na ou faalogo foʻi i le leo mai le lagi, ua faapea mai iā te aʻu, ʻIa e tusi: Amuia ē ua oti, o ē ua oti o i le Alii e amata i nei ona pō.’ ʻO lea lava,’ ua fetalai mai ai le Agaga, ʻina ia latou mālōlō i a latou galuega tigā; auā foʻi o a latou galuega e mulimuli iā te i latou.’”​—Faaaliga 14:13.

20. (a) Ua ōgatasi faapefea le folafolaga na lipotia mai e Ioane ma le valoaga a Paulo e faatatau i le faatasi mai o Iesu? (e) O le ā le faaeaga faapitoa ua folafolaina atu i le ʻaufaauuina o ē maliliu ina ua uma ona tuliesea Satani mai le lagi?

²⁰ Ua ōgatasi lelei lenei folafolaga ma le valoaga a Paulo e faatatau i le faatasi mai o Iesu: “E muamua foʻi ona toe tutū mai o ē ua oti o iā Keriso; ona faafuaseʻi lea ona aveina aʻe o i tatou o ē ola ma totoe [o i latou o le ʻau faauuina o ē soifua e oo atu i le aso o le Alii], faatasi ma i latou i ao, ina ia fetaiaʻi ma le Alii i le va nimonimo.” (1 Tesalonia 4:15-17) Ina ua uma le tuliesea o Satani mai le lagi, sa muamua ona tutū i latou o ē sa maliliu o iā Keriso. (Faatusatusa i le Faaaliga 6:9-11.) Ina ua mavae lenā, o i latou uma o le ʻaufaauuina e maliliu i le aso o le Alii ua folafola i ai se faaeaga faapitoa. O lo latou toe tutū i le ola agaga i le lagi e faatino ai lava i le taimi latou te maliliu ai, e pei “o le emo o le mata.” (1 Korinito 15:52) Maʻeu le ofoofogia o lenei mea! Ma e faaauau pea a latou galuega o le amiotonu e oo atu lava i le lagi.

Le Seleseleina o le Lalolagi

21. O le ā ua taʻu mai e Ioane iā i tatou e faatatau i le seleseleina o “le saito o le lalolagi”?

²¹ E maua foʻi e isi aogā i lenei aso o le faamasinoga, e pei ona faaauau ona taʻu mai e Ioane iā i tatou: “Na aʻu iloa, faauta foʻi, o le ao sinasina, ua tiʻetiʻe foʻi i le ao le tasi ua pei o le atalii o le tagata, ua i lona ao le palealii auro, ua i lona aao foʻi le selesaito maai. Ua alu atu foʻi le tasi agelu [lona fā] nai le malumalu, ua ʻalaga ma le leo tele i lē ua tiʻetiʻe i le ao, ʻInā faaoo atu ia lau selesaito, inā sele, auā ua oo i ona pō e te selesele ai, auā ua afu le saito o le lalolagi.’ Ona faaoo mai lea e lē ua tiʻetiʻe i le ao lana selesaito i le lalolagi, ua seleseleina ai le lalolagi.”​—Faaaliga 14:14-16.

22. (a) O ai lē o loo paleina se palealii auro ma o loo tiʻetiʻe i le ao sinasina? (e) O afea le tumutumuga o le seleselega, ma e faapefea?

²² E lē o faalētonu le mātauina o lē o loo tiʻetiʻe i le ao sinasina. O lē o loo tiʻetiʻe i le ao sinasina, e pei o le atalii o le tagata ma ua iai se palealii auro, ua manino mai ai o ia o Iesu, le Tupu faa-Mesia lea na iloa foʻi i le vaaiga a Tanielu. (Tanielu 7:13, 14; Mareko 14:61, 62) Ae o le ā le seleselega ua valoiaina i inei? A o iai Iesu i le lalolagi, sa ia faatusaina ai le galuega o le faia ma soo i le seleselega o le fanua o le lalolagi o tagata. (Mataio 9:37, 38; Ioane 4:35, 36) E oo mai le tumutumuga o lenei seleselega i le aso o le Alii, pe a faapaleina Iesu e avea o se Tupu ma faaooina mai sala faafaamasinoga i le avea ai ma sui o lona Tamā. O lea, o lana taimi o le pulega, talu mai le 1914, o se taimi foʻi o le olioli mo le aumaia o mea ua seleseleina.​—Faatusatusa i le Teuteronome 16:13-15.

23. (a) O ai e maua mai ai le tuleiga ina ia amata le seleselega? (e) O le ā le seleselega ua faia talu mai le 1919 e oo mai i le taimi nei?

 ²³ E ui lava o ia o le Tupu ma o le Faamasino, ae e faatalitali Iesu i tuleiga mai iā Ieova lona Atua a o leʻi amata ona faia le seleselega. E sau lenā tuleiga mai “le malumalu” e ala i se agelu. Na vave lava ona uaʻi atu Iesu i le tuleiga. Muamua lava, amata mai i le 1919 ma faasolo mai ai, ua faamāeʻaina ai e ana agelu le seleseleina o le 144,000. (Mataio 13:39, 43; Ioane 15:1, 5, 16) Ona sosoo ai lea ma le seleselega o le aoaoina o le motu o tagata e toʻatele o isi mamoe. (Ioane 10:16; Faaaliga 7:9) Ua faaalia mai e talafaasolopito e faapea i le va o le 1931 ma le 1935, na amata ai ona aliali mai se aofaʻiga tele o isi mamoe. I le 1935, na faamalamalama atu ai e Ieova i le vasega e pei o Ioane po o ai moni lava le motu o tagata e toʻatele o le Faaaliga 7:9-17. Na amata mai ai i inā ona tuu atu le faamamafaga tele i le aoaoina mai o lenei motu o tagata. E oo mai i le tausaga 2005, ua sili atu lona aofaʻi i le ono miliona, ma o loo faatoʻateleina pea. E moni lava, ua seleseleina e lē e pei o le atalii o le tagata se seleselega tele ma le olioli ai i lenei vaitaimi o le iʻuga.​—Faatusatusa i le Esoto 23:16; 34:22.

Soliga o le Vine o le Lalolagi

24. O le ā o loo i aao o le agelu lona lima, ma o le ā ua alagaina e le agelu lona ono?

²⁴ Ona ua māeʻa le seleselega o le faaolataga, ua oo ai i le taimi mo le isi seleselega. Ua lipotia mai e Ioane e faapea: “Ua alu atu foʻi le tasi agelu [lona lima] nai le malumalu o i le lagi, ua iā te ia foʻi le selesaito maai. O le tasi agelu [lona ono] foʻi ua alu atu nai le fata faitaulaga, ua iā te ia le pule i le afi, ua alaga foʻi ia ma le leo tele i lē ua i ai le selesaito maai, ua faapea atu, ʻInā faaoo atu ia lau selesaito maai, inā sala ia i fuifui vine o le vine o le lalolagi, auā ua otatā [ua pula] ona fuifui vine.’” (Faaaliga 14:17, 18) Ua faatuatuaina atu i ʻauagelu ina ia latou faia le tele o le seleselega i le vaitaimi o le aso o le Alii, i le tuueseeseina o le lelei mai le leaga!

25. (a) O le ā ua faailoa mai e le mea moni faapea e alu atu le agelu lona lima nai le malumalu? (e) Aiseā ua talafeagai ai le sau o le poloaʻiga ina ia amata le seleselega mai se agelu o lē ua “alu atu nai le fata faitaulaga”?

²⁵ Ua alu atu le agelu lona lima nai le mea e afio ai Ieova i le malumalu; o lona uiga la, e faia le seleselega faaiʻu e tusa ai ma le finagalo o Ieova. Ua poloaʻiina le agelu ina ia amata lana galuega e ala i se feʻau na logoina mai e auala i se isi agelu na “alu atu nai le fata faitaulaga.” E pito sili ona mataʻina lenei mea moni, talu ai na fesili agaga faamaoni o loo i lalo o le fata faitaulaga e faapea: “Le Alii e, le paia ma le faamaoni e te lē faamasino ea ma taui i lo matou toto i ē nonofo i le lalolagi seʻia afea?” (Faaaliga 6:9, 10) O le a faamalieina lenei ʻalaga mo le taui ma sui i le taimi o le seleselega o le vine o le lalolagi.

26. O le ā le “vine o le lalolagi”?

²⁶ Ae o le ā “le vine o le lalolagi”? I Tusitusiga Eperu, sa taʻua ai e faatatau i le nuu o Iutaia, o le vine a Ieova. (Isaia 5:7; Ieremia 2:21) I se tulaga talitutusa, ua tautala e faatatau iā Iesu Keriso ma i latou o ē o le a auauna faatasi ma ia i le Malo o le Atua, o se vine. (Ioane 15:1-8) I lenei faatulagaga, o le mea mataʻina e iloa ai se vine o lona fuaina mai lea o fua, ma ua fuaina mai e le vine moni faa-Kerisiano le anoanoaʻi o fua ina ia viia ai Ieova. (Mataio 21:43) O le mea lea, “o le vine o le lalolagi,” e lē o le vine moni lea, ae o le vine a Satani e faafoliga e pei o le vine moni, o ana faiga faapiʻopiʻo o faiga malo i tagata, faatasi ai ma ana “fuifui vine” eseese o fua faatemoni ua fuaina mai i senituri ua mavae. O Papelonia le Aai Sili, lea o loo avea ma ona vaega autū lotu ua liliu ese mai le Faa-Kerisiano moni, ua faatinoina ana taaʻiga e tele i luga o lenei vine oona.​—Faatusatusa i le Teuteronome 32:32-35.

27. (a) O le ā e tupu pe a aoaoina e le agelu o loo iai le selesaito le vine o le lalolagi? (e) O ā valoaga i Tusitusiga Eperu ua faailoa mai ai le lautele o le seleselega?

²⁷ E ao ona faaooina mai le sala faafaamasinoga! “Ona faaoo mai ai lea e le agelu o lana selesaito i le lalolagi, ua sala foʻi e ia le vine o le lalolagi, ua ia lafo atu foʻi i totonu o le soligavine tele o le toʻasā o le Atua. Ua solia foʻi le soligavine i tua o le aai, ua alu atu foʻi le toto nai le soligavine e oo i faagutu o solofanua, e tasi le afe ma le ono o selau o setatio ua pau mai ai.” (Faaaliga 14:19, 20) Ua leva ona faasilasila mai le lē fiafia o le finagalo o Ieova i lenei vine. (Sefanaia 3:8) O se valoaga o loo i le tusi o Isaia  ua mautinoa ai o le a faaumatia atunuu uma pe a solia le soligavine. (Isaia 63:3-6) Sa valoia mai foʻi e Ioelu o le a solia “tagata” e sili ona toʻatele, o atunuu atoa lava, ina ia faaumatia i “le mea e soli ai vine,” i “le vanu e faasalaina ai.” (Ioelu 3:12-14) E moni, o se seleselega e matuā tele naʻuā, o le ituaiga o seleselega o le a lē toe faaluaina! E tusa ai ma le vaaiga a Ioane, e lē gata ina seleseleina vine, ae e salaina  i lalo le vine atoa faafaatusa ma lafoina i le soligavine ina ia solia. O le a aveesea la le vine o le lalolagi ma o le a lē tāitai ona mafai ona toe tupu lea vine.

28. O ai e faia le soliga o le vine o le lalolagi, ma o le ā le uiga e faapea ai o le soligavine “ua solia . . . i tua o le aai”?

²⁸ O solofanua latou te faatinoina lea soliga o loo taʻua i le vaaiga, auā o le toto ua soliina mai le vine ua oo atu “i faagutu o solofanua.” Talu ai e masani ona faasino le faaupuga “solofanua” i gaoioiga o taua, atonu ai la o se taimi lea o le taua. Ua taʻua e faapea o vaegaʻau o le lagi ia o loo mulimuli atu iā Iesu i le taua faaiʻu faasaga i le lalolagi a Satani, latou te solia “le soligavine o le toʻasā mamafa o le Atua e ona le malosi uma lava.” (Faaaliga 19:11-16) E manino mai o i latou nei o loo solia le vine o le lalolagi. O le soligavine “ua solia . . . i tua o le aai,” o lona uiga, i fafo o Siona faalelagi. Ua fetaui lelei le solia o le vine o le lalolagi i luga lava o le lalolagi. Ae o le a “solia . . . i tua o le aai” i le uiga e faapea, o le a lē oo se leaga i ē o totoe o le fanau a le fafine, o ē ua faaata mai ai le Siona faalelagi i luga o le lalolagi. O le a faalalafi ma le saogalemu i latou nei faapea ma le motu o tagata e toʻatele i totonu o le faatulagaga faalefaalapotopotoga i le lalolagi a Ieova.​—Isaia 26:20, 21.

29. O le ā le loloto o le toto mai le soligavine, o le ā le mamao e faalautele atu i ai, ma o le ā ua faailoaina mai e nei mea uma?

²⁹ Ua tutusa lenei vaaiga manino ma le nutimomomoina o malo o le lalolagi e le maa na faaata mai ai le Malo na faamatalaina mai i le Tanielu 2:34, 44. O le a faia se faaumatiaga atoatoa. E matuā loloto lava le vaitafe o le toto mai le soligavine, e oo atu i faagutu o solofanua, ma e faalautele atu i se mamao e 1,600 setatio po o felelogi. * O lenei fuainumera tele e maua, pe a faatele faatasi le tali o le fā faatele i le fā, ma le tali o le sefulu faatele i le sefulu (4 x 4 x 10 x 10), ua faamamafaina ai le faaalia mai o le feʻau e faapea o faamaoniga o le faaumatiaga o le a aofia uma ai le lalolagi atoa. (Isaia 66:15, 16) O le a atoatoa le faaumatiaga ma e lē toe suia. O le a lē tāitai, e lē tāitai lava ona toe tutupu aa o le vine o le lalolagi a Satani!​—Salamo 83:17, 18.

30. O ā fua o le vine a Satani, ma o le ā la tatou filifiliga e tatau ona iai?

 ³⁰ A o tatou ola ai nei i siʻui o le taimi o le iʻuga, ua matuā uigā tele ai le vaaiga e uiga i nei seleselega e lua. Ua manino la tatou vaaia i fua o le vine a Satani i lo tatou siʻomaga. O le faapaʻū tama ma isi ituaiga o fasioti tagata; le tauātane ma le tauāfafine, le mulilua, ma isi faiga o amioga leaga; le lē faamaoni ma le leai o se alofa māfana​—o mea uma faapena ua avea ai lenei lalolagi o se mea leaga i fofoga o Ieova. Ua fua mai e le vine a Satani “mea oona ma laena.” O lona ala e faafanoina ai ma le ifo i tupua ua lē faamamaluina ai Lē Sili na Foafoaina tagata. (Teuteronome 29:18; 32:5; Isaia 42:5, 8) Maʻeu se faaeaga o le auaufaatasi ma le mataalia ma le vasega e pei o Ioane i le seleseleina o fua mamā o loo aumaia e Iesu ina ia viia ai Ieova! (Luka 10:2) Tau ina ia tatou filifili e faapea o le a lē tāitai ona faapisipisiaina i tatou i le vine o lenei lalolagi, ma tau ina ia tatou faapea ona ʻalo ese ai mai le solia faatasi ma le vine o le lalolagi pe a faaooina mai le sala faafaamasinoga lē masuia a Ieova.

[Faaopoopoga i lalo]

[Fesili mo le Suʻesuʻega]

[Pusa i le itulau 208]

‘Le Uaina o Lana Faitaaga’

O se vaega sili ona lauiloa a Papelonia le Aai Sili o le Lotu Katoliko Roma. O loo pulea le lotu e le pope i Roma ma ua faapea mai, o pope taʻitasi o ni sui o le aposetolo o Peteru. O nisi nei o mea moni o loo mulimuli mai ua faasalalauina e faatatau i nei sui e pei ona taʻua:

Formosus (891-896): “I le iva masina talu ona mavae lona maliu, sa toe avaʻe ai le tino oti o Formosus mai le potu e tuu ai tino oti o pope ma valaauina ai mo le faamasinoga i luma o se ʻaufono ʻe saʻiliʻilia tino oti,’ lea sa taʻitaʻia e Setefano [le pope fou]. Sa molia le pope ua maliu i ni faanaunauga lē pulea mo le tofiga o le pope ma sa faailoaina faapea o ana gaoioiga uma ua lē aogā. . . . Sa talai ese laʻei talaloa faaepikopō; sa tatipi ese tamatamaʻi lima o lona lima taumatau.”​—New Catholic Encyclopedia.

Setefano VI (896-897): “I totonu o ni nai masina [talu ona uma le faamasinoga o le tino oti o Formosus], sa faaiʻuina ai i se gaoioiga sauā na tetee mai, ia le tulaga faaepikopō o le Pope o Setefano; sa aveesea mai iā te ia le faailoga faaepikopō, faafalepuipui, ma titina.”​—New Catholic Encyclopedia.

Sekio III (904-911): “O nisi e toʻalua e muamua atu iā te ia . . . sa titina i totonu o le falepuipui. . . . I Roma, sa lagolagoina ai o ia e le aiga o Teofileto, auā e faapea o se tasi o tama teine a lea aiga, o Marozia lona igoa, sa fanau mai ai sona atalii (lea na mulimuli ane avea o Pope Ioane XI).”​—New Catholic Encyclopedia.

Setefano VII (928-931): “I tausaga mulimuli o lona tulaga faaepikopō, na oo atu ia iā Pope Ioane X . . . le ita o Marozia, le Donna Senatrix o Roma, ma sa faafalepuipui ai ma tagatavaleina. Ona tuuina atu lea e Marozia le tulaga pope iā Pope Leo VI, o lē na maliu ina ua mavae le 6 1/2 masina o lona tofiga. Na soloaʻi ane Setefano VII iā te ia, atonu ona o uunaʻiga a Marozia. . . . I le vaitaimi o lona 2 tausaga na avea ai ma Pope, sa leai sona malosi ona o puleaga a Marozia.”​—New Catholic Encyclopedia.

Ioane XI (931-935): “I le maliu o Setefano VII . . . , na maua ai e Marozia, o le Aiga o Teofileto, le tulaga pope mo lana tama o Ioane, o lē sa avea o se talavou ua i tausaga amata o lona 20 tausaga. . . . A o avea Ioane ma pope, sa pulea o ia e lona tinā.”​—New Catholic Encyclopedia.

Ioane XII (955-964): “E leʻi atoa lona 18 tausaga, ma e ioeina e lipoti i na ona pō le leai o sona naunau i mea faaleagaga, sa pulea lona olaga e fiafiaga tufanua, ma se olaga matagā lē taofiofia.”​—The Oxford Dictionary of Popes.

Penetito IX (1032-1044; 1045; 1047-1048): “Sa taʻutaʻua o ia i le faatauina atu o le tulaga pope i lona tamātausi ma ia toe maua ai faalua le tofiga mulimuli ane.”​—The New Encyclopædia Britannica.

O lea la, na i lo le mulimuli i le faaaʻoaʻoga a Peteru faamaoni, sa avea i latou nei ma isi pope o ni taaʻiga leaga. Sa latou faatagaina le faamasaatoto ma le faitaaga faaleagaga ma le faaletino, faapea foʻi ma taaʻiga faa-Iesepela, e faaleagaina ai le lotu sa latou puleaina. (Iakopo 4:4) I le 1917 na aumaia ai e le tusi a Tagata Aʻoga o le Tusi Paia o le Finished Mystery le tele o nei mea moni i ni auʻiliʻiliga malolosi. O se tasi lea o auala sa ʻtaiaina ai le lalolagi i ituaiga uma o mala,’ e Tagata Aʻoga o le Tusi Paia.​—Faaaliga 11:6; 14:8; 17:1, 2, 5.

[Ata i le itulau 206]

E faataunuuina e le Keriso ua avea ma tupu ia sala faafaamasinoga faatasi ai ma le lagolagosua a agelu

[Ata i le itulau 207]

Ina ua mavae le paʻū o Papelonia i le 539 T.L.M., sa faasaʻoloto tagata na ia faapagotaina