Mataupu 17

Ua Tauia ‘Ola na Fasiotia’

1. O le ā le vaitaimi lenei o loo tatou ola ai, ma o le ā le faamaoniga o lenei mea?

O LOO pule le Malo o le Atua! Ua latalata ina faaiʻuina e Lē o Tiʻetiʻe i le solofanua sinasina lona manumalo! O loo tamomoʻe saosaoa atu nei le solofanua mūmū, le solofanua uliuli, ma le solofanua samasama i le lalolagi atoa! E mautinoa lava, ua faataunuuina valoaga a Iesu lava ia e faatatau i lona faatasi mai tautupu. (Mataio, mataupu 24, 25; Mareko, mataupu 13; Luka, mataupu 21) Ioe, ua tatou ola nei i aso mulimuli o lenei faiga o mea. (2 Timoteo 3:1-5) Ona o lea le tulaga, seʻi o tatou uaʻi totoʻa atu nei a o tatalaina e le Tamaʻi Mamoe, o Iesu Keriso, le faamaufaailoga lona lima o le tusi tāʻai. O le ā le isi faaaliga o le a tatou uaʻi atu nei i ai?

2. (a) O le ā na vaaia e Ioane ina ua tatala le faamaufaailoga lona lima? (e) Aiseā e lē tatau ai ona faateʻia i tatou i le faitau atu i le iai o se fata faitaulaga faafaatusa o taulaga i le lagi?

² Ua faamatala mai e Ioane se vaaiga e ootia ai: “Ua tatalaina foʻi e ia o lona lima o faamaufaailoga, ona ou iloa lea o i lalo ifo o le fata faitaulaga o agaga o ē na fasiotia ona o le afioga a le Atua, ma le mau na latou taofi mau ai.” (Faaaliga 6:9) O le ā lenei vaaiga? O se fata faitaulaga o taulaga i le lagi? Ioe! O le uluaʻi taimi lea ua taʻua ai e Ioane se fata faitaulaga. Ae peitaʻi, ua uma ona ia faamatalaina Ieova i Lona nofoālii, o kerupi o loo siʻosiʻoina, le sami tioata, o sulu, ma toeaina e 24 o loo tauaveina mea manogi​—o ia mea uma o vala sa faaataina mai i le fale fetafaʻi i le lalolagi, le malumalu o Ieova i Isaraelu. (Esoto 25:17, 18; 40:24-27, 30-32; 1 Nofoaiga a Tupu 24:4) Pe tatau la ona faateʻia ai i tatou i le iloaina e iai foʻi se fata faitaulaga faafaatusa o taulaga i le lagi?​—Esoto 40:29.

3. (a) Sa iai faapefea agaga “i lalo ifo o le fata e fai ai taulaga mu,” i le fale fetafaʻi Iutaia anamua? (e) Aiseā na vaaia ai e Ioane agaga o molimau ua fasiotia i lalo o se fata faitaulaga faafaatusa i le lagi?

³ I lalo ifo o lenei fata faitaulaga o loo iai “agaga o ē na fasiotia ona o le afioga a le Atua, ma le mau na latou taofi mau ai.” O le ā le uiga o lenei mea? E lē mafai ona faapea atu o nei agaga ua vavae ese mai tino​—e pei ona talitonuina i Eleni faapaupau. (Kenese 2:7; Esekielu 18:4) Na i lo lea, ua iloa e Ioane o le agaga, po o le ola, ua faaataina e le toto, ma pe a fasia e ositaulaga i le fale fetafaʻi Iutaia anamua se manu e osi ai le taulaga, latou te sausau le toto ʻe soo ai luga o le fata faitaulaga’ pe liligiina i “lalo ifo o le fata e fai ai taulaga mū.” (Levitiko 3:2, 8, 13; 4:7; 17:6, 11, 12) O le mea lea, e fesootaʻi vavalalata tele le ola o le manu ma le fata e fai ai taulaga. Ae aiseā ua vaaia faapitoa ai ola po o toto o nei auauna a le Atua i lalo o se fata faitaulaga faafaatusa i le lagi? Auā ua manatu i lo latou maliliu e faataulaga.

4. O le ā le auala ua faataulaga ai le maliliu o Kerisiano ua fanauina e le agaga?

⁴ E moni, e maliliu uma i latou o ē faauuina e avea ma atalii faaleagaga o le Atua i se maliu faataulaga. Ona o la latou matafaioi o le a faatinoina i le Malo faalelagi o Ieova, o le finagalo la o le Atua ia latou lafoaʻi ma faataulagaina so o se faamoemoe o le ola e faavavau i le lalolagi. I lenei itu, latou te gauaʻi atu ai i se maliu faataulaga mo le pule silisili ese a Ieova. (Filipi 3:8-11; faatusatusa i le 2:17.) Ua moni lenei i se uiga e matuā talafeagai e faatatau iā i latou o ē na vaaia e Ioane i lalo o le fata faitaulaga. O i latou o tagata faauuina o ē sa faamaturoina, ona o la latou auaunaga maelega i le lagolagoina o le Afioga ma le pule silisili ese a Ieova. O o latou “agaga . . . ua fasiotia ona o le afioga a  le Atua, ma le mau [mar·ty·riʹan] na latou taofi mau ai.”

5. Ua alalaga atu faapefea agaga o ē faamaoni mo le taui ma sui e ui ua maliliu?

⁵ Ua faaauau ona faamatala mai. “Ua latou alalaga foʻi ma le leo tele, ua faapea atu, ʻLe Alii e, le paia ma le faamaoni, e te lē faamasino ea ma taui i lo matou toto i ē nonofo i le lalolagi seʻia afea?’” (Faaaliga 6:10) E mafai faapefea ona alalaga atu o latou agaga po o toto, mo le taui ma sui, pe afai ua faaalia e le Tusi Paia o ē ua maliliu e lē toe iloa se mea? (Failauga 9:5) Pe leʻi alaga atu ea le toto o Apelu lē na amiotonu ina ua uma ona fasiotia o ia e Kaino? Ona fetalai ane lea o Ieova iā Kaino: “Se ā le mea ua e faia? O loo alaga mai iā te aʻu mai le eleele le leo o le toto o lou uso.” (Kenese 4:10, 11; Eperu 12:24) E lē faapea sa tautala moni le toto o Apelu. Peitaʻi, na maliu Apelu o se tagata lē sala, ma ua tāpā e le faamasinotonu ina ia faasalaina lē na fasiotia o ia. I se tulaga talitutusa, o na maturo Kerisiano e lē sala, ma e tatau ona tauia atu i le faamasinotonu. (Luka 18:7, 8) E leo tele le alaga atu mo le taui ma sui, ona e faitau afe ua maliliu faapea.​—Faatusatusa i le Ieremia 15:15, 16.

6. O le ā le faamaligiina o le toto o ē lē sala na tauia i le 607 T.L.M.?

⁶ E mafai foʻi ona faatusa lenei tulaga i le mea na tupu i sa Iutā o ē fulitua i le Atua ina ua soloaʻi ane le tupu o Manase i le nofoālii i le 716 T.L.M. Sa ia faamasaaina le tele o le toto o ē lē sala, atonu na ʻvaevaeina i ʻili’ le perofeta o Isaia. (Eperu 11:37; 2 Tupu 21:16) E ui sa mulimuli ane salamō ma toe fuataʻiina Manase, ae na tumau pea lenā nofosala i le toto. I le 607 T.L.M., ina ua faatafunaina e Papelonia le malo o Iuta, “o le afioga lava a Ieova na oo ai lea mea iā Iuta, ina ia na ave ese iā te i latou i ona luma ona o agasala a Manase, e tusa ma mea uma na ia faia; auā foʻi le toto o ē lē sala na ia faamaligiina, auā na ia faatumuina Ierusalema i le toto o ē lē sala; na lē mafai e Ieova ona faamagaloina ai.”​—2 Tupu 24:3, 4.

7. O ai o loo sili ona nofosala i le faamasaaina o “le toto o le ʻau paia”?

⁷ E pei ona iai i taimi o le Tusi Paia, e faapena foʻi i aso nei, atonu ua feoti le toʻatele tagata o ē sa fasiotia molimau a le Atua. Ae o loo tumau pea ona olaola ma nofosala i le toto le faalapotopotoga faalelalolagi lea na māfua ai lo latou faamaturoina. O le faalapotopotoga lea i le lalolagi a Satani, o lana fanau i le lalolagi. E aupito i lauiloa ai Papelonia le Aai Sili, le tuufaatasiga o lotu sesē uma i le lalolagi. * Ua faamatalaina o ia o loo “onā i le toto o le ʻau paia ma le toto o ē na molimau iā Iesu.” Ioe, “ua iloa foʻi iā te [ia] le toto o perofeta ma le ʻau paia, ma i latou uma ua fasiotia i le lalolagi.” (Faaaliga 17:5, 6; 18:24; Efeso 4:11; 1 Korinito 12:28) O le matuā maoaʻe lava o lenei nofosala i le toto! O le umi lava ona iai pea Papelonia le Aai Sili, o le tumau foʻi lea ona alalaga mai mo le faamasinogatonu toto o tagata na mafatia iā te ia.​—Faaaliga 19:1, 2.

8. (a) O ā faaaʻoaʻoga o le faamaturoina ua faia i le vaitaimi o le olaga o Ioane? (e) O ā sauāga sa faapogaia e emeperoa a Roma?

⁸ Sa molimauina e Ioane lava ia tagata na feoti faamaturo i le uluaʻi senituri, a o sii tau atu le Gata sauā ma lana fanau i le lalolagi i le faapotopotoga o Kerisiano faauuina. Na vaaia e Ioane lo tatou Alii o faasatauroina, ma na sao mai pea o ia a o fasiotia Setefano, le fasiotiga o lona lava uso o Iakopo, le fasiotiga o Peteru, o Paulo ma isi ana aumea vavalalata. (Ioane 19:26, 27; 21:​15, 18, 19; Galuega 7:59, 60; 8:2; 12:2; 2 Timoteo 1:1; 4:6, 7) I le 64 T.A., sa faasalaina ai fua Kerisiano e le emeperoa Roma o Neru ona o agasala a isi, i le tuuaʻia faapea ua latou susunuina le aai, ina ia ʻalo ai i se tala salatua faapea o ia e tuuaʻia. Ua lipotia mai e le tusitala o talafaasolopito o Taito: “Sa latou [Kerisiano] maliliu ona o ni faiga faatauemu sa faia i ai; o nisi sa ufitia o latou tino i paʻu o manu feʻai, ona tuu mai lea o ulī e saeia, o nisi sa [faasatauroina], sa susunuina nisi e pei o ni molī e faamalamalama ai le pō.” O nisi sauāga mai le emeperoa o Tomatia (81-96 T.A.) na iʻu ai ina faaaunuua Ioane i le motu o Patamo. E pei ona fetalai Iesu: “Afai ua latou faasauā mai iā te aʻu, e faasauā foʻi iā te outou.”​—Ioane 15:20; Mataio 10:22.

9. (a) O le ā le auala sili mo le taufaasesē sa aumaia e Satani i le senituri lona fā T.A., ma o le ā lona vaega autū? (e) Sa feagai faapefea nisi taʻitaʻi o lotu ua vavae ese mai le upu moni ma Molimau a Ieova i vaitaimi o le taua muamua ma le lona lua a le lalolagi?

 ⁹ E oo mai i le senituri lona fā T.A., ua aumaia e le gata tuai, o Satani le Tiapolo, lana auala sili mo le taufaasesē, le lotu ua vavae ese mai le Faa-Kerisiano moni​—o se faiga faalotu a Papelonia ua natia i lalo o se faafoliga o “Kerisiano” faatagāfai. O se vaega autū lea o le fanau a le Gata, ma ua tuputupu aʻe e avea o ni vaega faalotu fevaevaeaʻi se tele. Ua matuā nofosala i le toto nei lotu ua vavae ese mai le upu moni, e pei o le nuu lē faamaoni o Iuta anamua, i le matuā aafia i itu uma e lua i le taua muamua ma le lona lua a le lalolagi. Na oo lava ina faaaogāina e nisi taʻitaʻi faapolotiki i nei lotu vavae ese, taua e avea o se faamolemolega mo le fasiotia o auauna faauuina a le Atua. I le lipotia mai o sauāga a Hitila i Molimau a Ieova, sa taʻua ai i se toe autaluga o le tusi a Friedrich Zipfel o le Kirchenkampf in Deutschland (Fetauaʻiga a Lotu i Siamani) e faapea: “Sa fasiotia le tasi vaetolu o i latou [Molimau a Ieova], a lē i le faasalaina i le oti, o isi gaoioiga sauā, le matelāina, o maʻi po o galuega mamafa sa faapologa ai. E lē mafaatusalia āuga ogaoga o nei faiga, ma na māfua lava ona o le faatuatua lē faagutugutulua, lea sa lē taitai lagolagoina talitonuga, o mafaufauga, po o aʻoaʻoga Faavafealoaʻi Faaleatunuu.” Ua matuā tatau lava ona fai atu e faatatau i nei lotu ua vavae ese mai le Faa-Kerisiano moni, lea e aofia ai ma ana faifeʻau ma patele: “Ua iloa i ou lava pito ofu le toto o le ola o ē matitiva e lē sala.”​—Ieremia 2:34. *

10. O ā sauāga ua pagatia ai tane talavou o le motu o tagata e toʻatele i le tele o atunuu?

¹⁰ Ua amoina e tane talavou faamaoni o le motu o tagata e toʻatele talu mai le 1935, le mamafatū o sauāga i le tele o atunuu. (Faaaliga 7:9) I le taimi lava foʻi ua iʻu ai le Taua Lona Lua a le Lalolagi i Europa, sa faasalaina ai i le oti e ala i le sisiina, ni molimau talavou e 14, i se tasi o aai. O le ā la latou agasala? E mumusu e ʻtoe aʻoaʻo i taua.’ (Isaia 2:4) Ae lata mai nei lava i atunuu i Sasaʻe ma Aferika, na sasaina ai seʻia oo ina feoti ni tama talavou, pe faasala foʻi e ala i le tafana e fitafita, ona o le māfuaaga lava lea e tasi. O le a mautinoa le toe faatutūina mai o nei maturo talavou i le lalolagi fou ua folafolaina mai. O i latou nei o loo lagolagoina moni uso faauuina o Iesu.​—2 Peteru 3:13; faatusatusa i le Salamo 110:3; Mataio 25:34-40; Luka 20:37, 38.

Se Ofu Sinasina

11. I le ā le uiga o le a maua ai e Kerisiano faauuina ua faamaturoina ni “ofu sisina”?

¹¹ Ina ua uma ona tusitusia le faatuatua o ē tausisi i le faamaoni o taimi anamua, na faapea mai Paulo: “O i latou uma ia o ē na taʻuleleia ona o le faatuatua, na lē maua e i latou le mea na folafolaina; ina ua saunia e le Atua se tasi mea e sili ona lelei mo i tatou, ina ia lē faaatoatoaina i latou pe a lē i ai i tatou.” (Eperu 11:39, 40) O le ā lenā “mea e sili ona lelei” lea e aloalo atu nei i ai Paulo ma isi Kerisiano faauuina? O loo iloa atu i inei e Ioane i le vaaiga: “Ua foaʻiina atu iā te i latou taʻitoʻatasi ofu sisina; ua fai atu foʻi iā te i latou ia latou faatalitali lemū seʻia toe itiiti, seʻia atoatoa mai ai o latou uso a auauna atoa ma o latou uso, o le a fasiotia pei o i latou lava.” (Faaaliga 6:11) O lo latou mauaina o ni “ofu sisina” e fesootaʻi  i lo latou toe faatutūina e avea ma foafoaga agaga e lē mafai ona feoti. Latou te lē toe taooto o ni agaga ua fasiotia i lalo ifo o le fata faitaulaga, ae ua faatutūina aʻe e avea o se vaega o le vasega o toeaina e 24 ia e tapuaʻi i luma o le nofoālii i le lagi o le Atua. Ua tuuina atu iā i latou lava i inā ni nofoālii, e faaalia ai ua latou maua faaeaga tautupu. Ma ua latou “oofu i ofu sisina,” e faailoa mai ai ua tauia i latou i le amiotonu, ua tatau i ai se nofoaga ua faamamaluina i luma o Ieova i lenā lotoā faalelagi. Ua faataunuu ai foʻi e lenei mea le folafolaga a Iesu i Kerisiano faauuina faamaoni i le faapotopotoga i Sarataisa: “O lē manumalo, e faaofuina o ia i ofu sisina.”​—Faaaliga 3:5; 4:4; 1 Peteru 1:4.

12. I le ā le auala e “faatalitali lemū” ai ē faauuina ua toe faatutūina, ma seʻia afea?

¹² Ua faasino e faamaoniga uma faapea sa amata lenei toe tutū faalelagi i le 1918, ina ua avea Iesu ma Tupu i le 1914, ma lana tiʻetiʻega e amata lana manumalo faatupu e ala i le faamamāina o le lagi mai iā Satani ma ana temoni. Ae peitaʻi, ua taʻu atu i na tagata ua toe faatutūina, e ao ona latou “faatalitali lemū seʻia toe itiiti, seʻia atoatoa . . . o latou uso a auauna.” E ao iā i latou o le vasega e pei o Ioane o loo totoe pea i le lalolagi, ona faamaonia lo latou faamaoni a o fesagaʻi ma tofotofoga ma sauāga, ma e fasiotia foʻi nisi o i latou. Peitaʻi i le faaiʻuga, o le a tauia toto uma sa faamasaaina e Papelonia le Aai Sili ma ana aumea faapolotiki. Ae i le taimi nei, e mautinoa o loo matuā pisi i latou ua faatutūina i tiute faalelagi. Latou te mālōlō, e lē i le nonofo saʻoloto ma le olioli e leai ni galuega e faia, ae i lona uiga faapea, o loo latou faatalitali ma le onosai i le aso o le taui ma sui a Ieova. (Isaia 34:8; Roma 12:19) O le a uma la latou mālōlōga pe a latou molimauina le faaumatiaga o lotu sesē. Ma i le avea ai ma ē ua “valaauina . . . ma filifilia, ma faamaoni,” latou te auai atu faatasi ma le Alii o Iesu Keriso i le faaooina o le sala faafaamasinoga i isi vaega uma o le fanau amioleaga a Satani i le lalolagi.​—Faaaliga 2:26, 27; 17:14; Roma 16:20.

ʻE Toe Tutū Muamua i Latou ua Maliliu’

13, 14. (a) E amata afea le toetū faalelagi, ma o ai e toe faatutūina, e tusa ai ma le faamatalaga a le aposetolo o Paulo? (e) O afea e toe faatutūina ai i le lagi le ʻaufaauuina o ē ola e oo atu i le aso o le Alii?

¹³ O le malamalamaga lea ua maua ina ua tatalaina le faamaufaailoga lona lima, ua taufai ioe faatasi ma isi mau e faapea, e faasino atu i le toetū faalelagi. Mo se faaaʻoaʻoga, na tusi le aposetolo o Paulo: “Matou te fai atu foʻi lenei mea iā te outou i le afioga a le Alii: o i tatou o ē ola ma totoe seʻia afio mai le Alii, tatou te lē muamua i ē o momoe. Auā e afio ifo mai le lagi le Alii lava, ma le alaga, ma le leo o le agelu sili, ma le pu a le Atua. E muamua foʻi ona toe tutū mai o ē ua oti o iā Keriso; ona faafuaseʻi lea ona aveina aʻe o i tatou o ē ola ma totoe, faatasi ma i latou i ao, ina ia fetaiaʻi ma le Alii i le va nimonimo; ona tatou faatasi pea lava lea ma le Alii.”​—1 Tesalonia 4:15-17.

 ¹⁴ Maʻeu se tala e faagaeeina ai ua taʻuina mai i nei fuaiupu! E muamua ona ō atu i le lagi uso faauuina o Iesu o ē ua uma ona maliliu, na i lo o ona uso faauuina o loo soifua pea i le lalolagi i le vaitaimi o lona faatasi mai. O i latou ia na maliliu o loo iā Keriso, e toe tutū muamua. E afio ifo Iesu, o lona uiga, e uaʻi mai iā i latou, ma toe faatutūina i le ola agaga, i le tuuina atu iā i latou o “ofu sisina.” A mavae lea, ona faaumaina lea e i latou o ē o loo soifua pea o ni tagata lo latou olaga faalelalolagi, o le toʻatele o i latou e maliliu i le sauāina i lima o ē tetee. Ae ui i lea, latou te lē momoe i le oti e pei ona sa faia e ē na muamua atu iā i latou. Na i lo lea, e suia loa lava i latou pe a maliliu​—e pei “o le emo o le mata”​—​ua aveina aʻe i le lagi e faatasi ai ma Iesu ma isi sui o le tino o Keriso. (1 Korinito 15:50-52; faatusatusa i le Faaaliga 14:13.) O lona uiga e amata loa e tagata tiʻetiʻe solofanua e toʻafā o le Faaaliga la latou tiʻetiʻega, ona amata loa foʻi lea ma le toe faatutūina o Kerisiano faauuina.

15. (a) O le ā le tala lelei ua saunia e le tatalaina o le faamaufaailoga lona lima? (e) E faaiʻuina faapefea le tiʻetiʻega a Lē Manumalo i le solofanua sinasina?

¹⁵ Ua saunia e le tatalaina o lenei faamaufaailoga lona lima le tala lelei e faatatau i tagata faauuina o ē tausisi i le faamaoni, o ē ua manumalo, ma faamaoni seʻia oo i le oti. Ae ua lē aumaia ai se tala lelei mo Satani ma lana fanau. Ua faaauau ma le lē mataofiofia le tiʻetiʻega a Lē Manumalo i le solofanua sinasina, ma e faaiʻuina i le taimi e faamasinoina ai le lalolagi lea “o loo nofo toʻilalo i loo leaga.” (1 Ioane 5:19) Ua faamanino lenei mea ina ua tatalaina e le Tamaʻi Mamoe le faamaufaailoga lona ono.

[Faaopoopoga i lalo]

[Fesili mo le Suʻesuʻega]

[Pusa i le itulau 102]

‘Ola na fasiotia’

Ua siiina mai e le Cyclopedia a McClintock ma Strong ni faamatalaga a John Jortin, o se Porotesano Peretania o le senituri lona 18, na fanau mai i ni mātua Falani o le lotu Huguenot, ua faapea mai: “O le mea e amata ai sauāga, e iʻu ai le Faa-Kerisiano . . . Ina ua faavae le Faa-Kerisiano e avea ma lotu o le emepaea [Roma], ma ua tuuina atu i ona faifeʻau le tamaoaiga ma le mamalu, ae faateleina loa le leaga o sauāga, ma faaoo mai ai lana taaʻiga e faaumatia ai i luga o le lotu Evagelia.”

[Ata i le itulau 103]

“Ua foaʻiina atu iā te i latou taʻitoʻatasi ofu sisina”