Faamafanafanaga mo Ē Loto Mafatia

“Ua oi faatasi, ma oono faatasi mea uma lava na faia, ua oo mai lava i ona po nei.” (Roma 8:22) Sa tele mafatiaga faaletagata ina ua tusia na upu i le sili atu ma le 1,900 tausaga ua mavae. E toatele sa loto mafatia. O le mea lea, na uunaia ai Kerisiano: “Ia faamafanafana i e loto [mafatia].”​—1 Tesalonia 5:14.

Ua sili foi le tele o puapuaga o tagata i aso nei, ma e leʻi faapea muamua le tele o ē ua loto mafatia. Ae pe tatou te ofo ai ea i lena itu? E leai, auā ua faailogaina ia aso e le Tusi Paia o “aso e gata ai” ma taʻua ai na mea o “aso faigata.” (2 Timoteo 3:1-5) Na valoia e Iesu Keriso faapea i aso e gata ai, o le a iai le “atuatuvale o nuu” ma o le a “oti foi tagata i le matatau ma le faatalitali i mea e oo mai i le lalolagi.”​—Luka 21:​7-11, 25-27; Mataio 24:3-14.

A faaumiumi ona oo i tagata popolega, mataʻu, faanoanoaga, ma isi faalogona ootia faapena, e masani lava ona maua ai i latou i le loto mafatia. Atonu e mafua ona loto mafatia pe matuā faanoanoa foi ona o le maliu o sē pele, se talagā faaipoipoga, tuli ma le galuega, po o se gasegase tugā. E ala foi ona mafatia loto o tagata ona ua latou faatupuina aʻe se lagona ua lē toe aogā, pe ona ua lē taulau i latou atoa ma le faapogaia o faanoanoaga i isi. Atonu tatou te masofasofa i se tulaga e sili ona faigata, peitai, a oo i se tagata le lagona o le leai o se faamoemoe ma ua lē iloa se auala e foia ai se tulaga leaga, e mafai ona matuā mafatia ai le loto.

Na oo foi i tagata anamua faalogona tali faapena. Sa tigaina Iopu i lona maʻi ma ona lava masei. Na faapea a ia ua lafoaia o ia e le Atua, o lea na ia faaleoina ai lona lē fia ola. (Iopu 10:1; 29:2, 4, 5)  Sa mafatia le loto o Iakopo ona sa manatu ua maliu lona atalii, ma musu ai e faamafanafanaina ae manao e oti. (Kenese 37:33-35) Na tagi faanoanoa le Tupu o Tavita, ona ua oia lona loto i le agasala matuiā e faapea: “Ou te fealuai ma le [faanoanoa] i le aso atoa. Ua ou matuā vaivai.”​—Salamo 38:6, 8; 2 Korinito 7:5, 6.

I aso nei, e toatele ua loto mafatia ona o le soona faamamafa fua o i latou, i le taumafai e mulimuli i se faasologa i aso taitasi e lē gafatia e o latou mafaufau, faalogona ootia, ma mea faaletino. E manino, o ootiaga e ō lua ma manatu ma faalogona sesē, e mafai ona āfaina ai le tino ma lē paleni ai le gasologa o le faiai, ma iʻu ai i le loto mafatia.​—Faatusatusa i le Faataoto 14:30.

Le Fesoasoani Latou te Manaomia

Na iai se Kerisiano i le uluai senituri mai Filipi, o Epaferoti, na ʻmafatia lona loto ona sa faalogo ana uo ua maʻi o ia.’ Atonu sa lagona e Epaferoti, o lē na maʻi ina ua uma ona auina atu i Roma e ana uo ma mea e tausia ai le aposetolo o Paulo, faapea ua lē taulau ia te ia faamoemoega o ana uo ma ua latou manatu ai ia te ia o sē e vaivai. (Filipi 2:25-27; 4:18) Sa faapefea ona fesoasoani i ai le aposetolo o Paulo?

Na ia auina atu Epaferoti ma se tusi i ana uo i Filipi e faapea: “Ia outou talia [Epaferoti] i le Alii ma le olioli uma lava, ma ia faapelepeleina e outou o ē ua faapea.” (Filipi 2:28-30) O le mea moni ona sa tautala faaviivii Paulo e uiga ia te ia ma faafeiloaia mafana ma le alofa e tagata Filipi, e mautinoa ai sa faamafanafanaina Epaferoti ma fesoasoani e faatoʻafilemuina lona loto mafatia.

E aunoa ma le masalosalo, o le fautuaga a le Tusi Paia ina ia “faamafanafana i e loto [mafatia],” o se fautuaga e sili ona lelei. Na faapea mai se fafine o lē sa oo i le loto mafatia: “E manaomia ona e iloa e manatu mamafa mai isi tagata ia te oe. E te fia faalogo atu o faapea mai se tasi: ʻOu te iloa; o le a e lē afaina.’”

E masani lava ona manaomia i le tagata loto mafatia ona tausolomua i le sailia o se tagata e  malamalama i faalogona ina ia talanoa i ai. E ao ona avea lenei tagata o sē e faalogologo lelei ma lava onosai. E ao ia te ia lea ona alofia le aʻoaʻia o lē o loo loto mafatia po o le faia o ni faaiʻuga e pei o le, ʻE lē tatau ona e manatu faapena’ pe, ʻE lē saʻo lena manatu.’ O faalogona ootia o le tagata loto mafatia, e maʻaleʻale, ma o na faamatalaga faitio o le a na ona atili ai ona lē lelei ona lagona ia te ia lava.

Atonu e lagona e lē o loo loto mafatia lona lē aogā. (Iona 4:3) E ui i lea, e ao i se tagata ona manatua, o le mea e tāua moni, o le auala o loo faatāuaina i tatou e le Atua. Sa ʻmanatu faatauvaa’ tagata ia Iesu, peitai sa leʻi suia ai lona aogā moni i le Atua. (Isaia 53:3) Ia mautinoa, e pei lava ona alofa le Atua i lona Alo pele, e faapena foi lona alofa mo i tatou.​—Ioane 3:16.

Sa alofa Iesu ia i latou o ē puapuagatia ma taumafai e fesoasoani ia i latou ina ia iloa o latou aogā taitoatasi. (Mataio 9:36; 11:28-30; 14:14) Na ia faamatalaina faapea e oo lava i nai manu iti, e tāua i le Atua. Fai mai a ia: “E leai foi so latou e tasi ua galo i luma o le Atua.” Maeu la le tele o lona faatāuaina o tagata o loo taumafai e faia lona finagalo! Na fetalai Iesu e uiga ia i latou na: “O outou lauulu lava ua faitaulia uma ia.”​—Luka 12:6, 7.

E moni, atonu e faigata ona talitonuina e se tagata ua matuā loto mafatia, po ua oia i ona vaivaiga ma masei, faapea e manatu maualuga le Atua ia te ia. Atonu foi e mautū lona lagona faapea e lē aogā le alofa ma le tausiga a le Atua ia te ia. E pei ona faailoa mai e le Tusi Paia e “mafai ona taʻusalaina i tatou e o tatou loto.” Peitai, po o le auala ea lena e iloa ai? Leai, e lē o lena. Ua silafia lelei e le Atua e mafai e tagata agasala ona manatu sese ma taʻusalaina i latou lava. O lea ua faamafanafanaina ai i latou e lana Afioga e faapea: “Ua sili lava le Atua i o tatou loto, ua silafia foi e ia mea uma.”​—1 Ioane 3:19, 20.

Ioe, e sili atu mea e silafia e lo tatou Tamā alofa faalelagi i lo na o a tatou agasala ma sese. Ua ia silafia o tatou tulaga vaivai, o tatou olaga atoa, ma o tatou uunaiga ma faanaunauga. Ua ia silafia le tuufaasolo mai ia i tatou o le agasala, maʻi, ma le oti ma o le mea lea ua matuā faapalepale ai o ia. O le mea moni ona o lo tatou faavauvau ma lutia ia i tatou lava, o se faamaoniga lea o lo tatou lē mananao e faia le agasala ma lē sopoloa ai i lena. Ua faapea mai le Tusi Paia sa ʻfaatoilaloina i tatou i le iʻuvale’ ae e leʻi tusa ma o tatou loto.  O lea, ua tatou faanoanoa faatasi ai ma le Atua i lo tatou tulaga pagatia, ma ua finagalo alofa mai ai o ia i o tatou vaivaiga.​—Roma 5:12; 8:20.

“E alofa mutimuti vale ma alofa fua mai Ieova,” ua faamautinoa mai ia i tatou. “E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono. Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:8, 12, 14) E moni, o Ieova o “le Atua foi e ana le faamafanafanaga uma; o le na te faamafanafanaina mai ia te i [tatou] i lo [tatou] puapuaga uma lava.”​—2 Korinito 1:3, 4.

O le fesoasoani e sili ona manaomia e ē loto mafatia e maua mai lea i le matuā faalatalata atu i lo latou Atua alofa mutimutivale ma le taliaina o lana valaaulia ʻia tuuina atu o tatou popolega ia te ia.’ Na te mafaia moni lava ona “faamafanafanaina loto o e ua loto momomo.” (Salamo 55:22; Isaia 57:15) O lea, ua faalaeiauina ai e le Afioga a le Atua le tatalo, e faapea: “Ia tuuina atu ia [Ieova] mea uma tou te popole ai, auā o loo manatu mai o ia ia te outou.” (1 Peteru 5:7) Ioe, e ala i tatalo ma olega, e mafai ai e tagata ona matuā faalatalata atu i le Atua ma olioli ai i ʻle filemu o le Atua e silisili i mea uma e manatu i ai.’​—Filipi 4:6, 7; Salamo 16:8, 9.

E mafai foi ona aogā i se tasi ni fetuutuunaiga talafeagai i le olaga ina ia foia ai le loto mafatia. E tāua uma lava itu e pei o le faamalosi tino, taumafaina o meaʻai lelei, mauaina o se ea mālū ma ia lava le malōlō, atoa ma le alofia o le matamata umi i le televise. Na fesoasoani se tasi fafine i ē loto mafatia e ala i le uunaia o i latou ia toʻaaga e savavali. Ina ua faapea atu se fafine loto mafatia: “Ou te lē manao e savali,” sa ia tali filemu atu i ai peitai sa ia maumauai e faapea atu: “Ioe, e te savali lava.” Na lipotia mai e le fafine faapea: ʻE fa maila na ma savavali ai. Ina ua ma toe foi mai, sa vaivai o ia, peitai sa fiafia. E faigata ona e talitonu i le aogā o le toʻaga e faamalosi tino seʻi vagana ua e faataʻitaʻia.’

Peitai, e faigata ona foia atoatoa le loto mafatia i nisi taimi, e tusa lava po ua faia mea uma, e aofia ai togafitiga faafomaʻi. Na faapea mai se fafine e lē matua tele: “Ua ou faia mea uma, ae tumau pea loʻu loto mafatia.” I se uiga tutusa, ua masani foi ona lē mafai i le taimi nei ona faamalōlōina ē tauaso, ē tutuli, po o ē mumutu. E ui i lea, e mafai e ē loto mafatia ona mauaina le faamafanafanaga ma le faamoemoe e ala i le faitauina e lē aunoa o le Afioga a le Atua, lea ua saunia ai le faamoemoe mautinoa mo se mapusaga tumau mai tigā uma faaletagata.​—Roma 12:12; 15:4.

 Le Taimi e lē Toe Loto Mafatia ai se Tasi

Ina ua faamatala e Iesu mea mataʻutia e oo mai i le lalolagi i aso e gata ai, sa ia faaopoopo mai: “A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou.” (Luka 21:28) Sa fetalai Iesu e uiga i le faasaoina atu i le lalolagi fou amiotonu a le Atua, lea o le a “tuusaunoa [ai] ia lava mea na faia ia le faapologaina e le iʻu vale, a e oo i le saolotoga [mamalu] o le fanau a le Atua.”​—Roma 8:21.

Maeu se mapusaga o le a maua e le fanau a tagata, o le faasaolotoina mai lea i mafatiaga ua mavae, ae ala aʻe i aso taitasi ma se mafaufau lelei atoatoa, e naunau e faia galuega o le aso! O le a leai se tasi e toe pagatia i le loto mafatia. Fai mai le folafolaga mautinoa mo le fanau a tagata, “e sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”​—Faaaliga 21:3, 4.

Seʻi vaganā ua faaalia, o mau uma o le Tusi Paia e mai le Tusi Paia Samoa, Lomiga 1884.