Mataupu 14

Atiinia aʻe O Se Aiga mo Se Lumanai e Faavavau

1. I le siitiaina aʻe o le fiafiaga faaleaiga, ai se ā e lelei ai ona mafaufau e uiga i le lumanai?

O loo faagasolo pea le taimi. Atonu ua taofia e le taimi ua tuanai ni toe manatunatuga matagofie mo i tatou, peitai e le mafai ona tatou ola i le taimi ua tuanai. E mafai ona aʻoaʻoina i tatou mai le taimi ua tuanai, e aofia ai mea sese ua tuanai, peitai e na o le taimi nei lava e mafai ona tatou ola ai. Ae peitai ane, e ui lava ina atonu pe o loo solo lelei se aiga i le taimi nei, a e tatau lava ona faafesagaia le mea moni o le taimi nei ua na o mo sina taimi puupuu lava; o le asō e lē umi ae avea ma ananafi, ma o le taimi nei e lē umi lava ae avea ma taimi ua tuanai. O lea la e tāua tele ai mo le fiafiaga o le aiga le faaauau pea o lo tatou vaavaai atu i le lumanai, ia sauniuni i ai, ma fuafua agaʻi i ai. Po o le ā lava le tulaga o le a i ai mo i tatou ma ē mafuta tele ma i tatou, e faalagolago tele lava lea i faaiʻuga tatou te faia nei.

2.(a) Ai se ā ua lē mananao ai le toatele o tagata e mafaufau e uiga i le lumanai? (e) Afai tatou te naunau mo se lumanai fiafia, o ai e tatau ona tatou faalogologo i ai?

² O ā ni faamoemoega agaʻi i luma? Mo le vaega aupito toatele o le fanau a tagata, o ni manatu ua i a i latou mo le lumanai ua masani ona faaumiumi atu mo na o ni nai tausaga puupuu. Ua sili i le toatele ona aua neʻi tagaʻi mamao atu i le lumanai talu ai e pau lava le mea ua latou uluai iloa o se taunuuga lē manuia, ma le motusia o le liʻo faaleaiga i le oti. Mo le toatele, o a latou taimi o fiafiaga o le a vave lava ona ufitia  i popolega o le olaga. Ae peitai i le faalogologo atu i Le “ua faaigoaina ai le aiga uma o i le lagi atoa ma le lalolagi,” o le a mafai lava ona tele naua nisi mea o le olaga. —Efeso 3:14, 15.

3. (a) O ā faamoemoega sa tuu e le Atua i luma o uluai tagata ola? (e) Ai se ā sa ese ai le tulaga na liliu i ai le gasologa o mea?

³ Ina ua foafoaina le uluai ulugalii, sa lē o se fuafuaga a le Atua e faapea, o i laʻua po o a la fanau i le lumanai, o le a ola mo ni nai tausaga e tumu i faalavelave ona feoti ai lea. Sa na avatu i a i laʻua se aiga parataiso ma tuuina i o la luma se faamoemoe mo se ola e lē uma. (Kenese 2:7-9, 15-17) Peitai sa la melea lena faamoemoega lelei mo i laʻua lava ma a la fanau i lo la solia ma le loto i ai o le tulafono a le Atua, Lē sa faalagolago i ai lo la ola. Ua faamatalaina e le Tusi Paia lenei mea i le auala lenei: “O lenei, faapei ona oo mai o le agasala i le lalolagi i le tagata e toatasi [o Atamu], o le oti foi ona o le agasala, ona oo mai ai lea o le oti i tagata uma lava auā ua agasala uma lava.”—Roma 5:12.

4. O le ā le fuafuaga ua faia e Ieova le Atua ina ia mafai ai ona faataunuuina lana uluai fuafuaga e uiga i le tagata?

⁴ E ui i lea sa faia ma le alofa e le Atua sauniuniga ia togiolaina le aiga o le tagata. O lona lava Alo o Iesu Keriso na tuuina i lalo lona ola faaletagata lelei atoatoa e fai ma sui o ē uma na tupuga mai i a Atamu. (1 Timoteo 2:5, 6) I lea tulaga na toe faatauina mai ai pe toe totogiina le mea na le iloa i a Atamu mo i tatou, ma sa tatalaina ai le auala mo i latou o le a faagaoioia le faatuatua i lenei sauniuniga ina ia i ai le avanoa lava lea e tasi mo le ola ua faataatia e le Atua i luma o le uluai ulugalii. I aso nei, afai o le a le afaina i ni maʻi mataʻutia po o se faalavelave faafuasei i se vaitaimi atu i tua i le olaga, e ono mafai e se tasi ona ola mo le 70 po o le 80 tausaga, ma e i ai foi se vaega toaitiiti e ola e sili itiiti atu teisi. “A o le ola e faavavau, o le mea foaifuaina mai lea e le Atua, i lo tatou Alii o Keriso Iesu.”—Roma 6:23.

5-7. (a) Afai tatou te faia nei le finagalo o le Atua, o le ā e mafai ona tatou vaavaai atu i ai ma le naunau i le lumanai? (e) O le ā le fesili atonu o le a e lāgā e uiga i le fesoasoani i lou aiga?

 ⁵ O le ā le uiga o lenei mea mo lou aiga? Mo tagata e faalogo ma usiusitai i poloaiga a le Atua e mafai ona uiga i se lumanai e faavavau. (Ioane 3:36) I lana Afioga e lē mafai ona lē taulau, ua folafola mai ai e le Atua, o le a na aveeseina faiga mamafa ma le lē faamasino tonu o mea o i ai nei, ma faia mataupu uma a le fanau a tagata ia pulea e se malo lelei atoatoa ma amiotonu ua na saunia e ia lava. (Tanielu 2:44) I le faaalia o lenei mea, ua taʻu mai e lana Afioga i a i tatou ua na fuafuaina ia “faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi.” (Efeso 1:10) Ioe, i lea taimi o le a i ai le sololelei o mea uma i le vateatea ma o le a au faatasi le aiga o le tagata i le lalolagi lautele e saoloto mai i tauaimisaga ona o va i lanu, fevaevaeaiga tau upu fai o malo, solitulafono ma le lē popoi ma tulaga saua o taua. O le a mau aiga i le saogalemu ma “e leai foi se na te faamatau mai.” (Salamo 37:29, 34; Mika 4:3, 4) O le a faapena lenei tulaga auā o i latou uma o le a ola i lea taimi o le a avea ma tagata o ē ua “faaaʻoaʻo . . . i le Atua, faapei o le fanau pele” ma o le a latou “savavali i le alofa.”—Efeso 5:1, 2.

⁶ I lalo o le faatonutonuga o le pulega a le Malo o le Atua, o le a galulue au faatasi ai le aiga faaletagata i le galuega fiafia o le aumaia o le lalolagi i le tulaga faaleparataiso na fuafuaina e Le na Foafoaina mea, o se aiga faafaatoaga ua saunia ai le anoano o mea taumafa mo le fanau uma a tagata. O manu felelei eseese uma o le lalolagi, iʻa ma manu tataa uma o le a i ai i lalo ifo o le pulega agalelei a tagata soifua ma avea ma o latou fiafiaga, auā o le fuafuaga faaalia lenei a le Atua. (Kenese 2:9; 1:26-28) O le a lē toe faaleagaina e faamaʻi, le tiga, āuga o le tino vaivai ona ua afu le soifua, po o le mataʻu ona o le oti, le fiafiaga o le aiga faaletagata  i le olaga. E oo lava i ē o loo “i tuugamau” o le a toe foi mai ia auai i avanoa ofoofogia o le a aumaia e le olaga i lena vaitaimi.—Ioane 5:28, 29; Faaaliga 21:1-5.

⁷ O le ā e mafai ona e faia e fesoasoani ai i lou aiga ia manino lelei le faataunuuga o nei faamoemoega lelei?

O LE Ā E MANAOMIA ONA TATOU FAIA?

8. Ina ia maua le faamaoniga a le Atua, o le ā o manaomia mai i a i tatou?

⁸ E le tatau ona faia se faaiʻuga sese e se tasi e faapea ua lava le ola aʻe i le mea ua taʻua o se “olaga lelei” o le a avea ai i tatou o nisi o ē maua le ola i le faiga fou o mea a le Atua. E lē o i tatou e filifilia po o ā mea e manaomia; o le Atua ua i ai le aiā tatau na te faia ai. I se tasi aso ina o aʻoaʻo atu Iesu i Iutaia, sa fesili ai se tagata: “Se a se mea ou te faia ina ia ou maua ai le ola e faavavau?” O le tali: “E te alofa atu i [a Ieova] lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i lē lua te tuaoi, ia pei o oe lava ia te oe.” (Luka 10:25-28) Ua manino lava, e tele ni mea o aafia ai na i lo le na ona tatou faapea atu tatou te talitonu i le Atua, pe o le alu vāvā foi i sauniga o loo talanoaina ai le Tusi Paia, po o le faia foi o ni faiga agalelei mai i lea taimi i lea taimi mo nisi tagata. Ae, o le faatuatua ua tatou faapea atu o loo i a i tatou e tatau ona taaina malosi ai o tatou manatu ma o tatou faanaunauga ma gaoioiga i aso uma lava, i le aso atoa.

9. O ā mataupu silisili faale-Tusi Paia e mafai ona fesoasoani i a i tatou ia paleni lelei i la tatou vaaiga i mataupu taatele o le olaga?

⁹ O le teuina i o tatou mafaufau ma le tāua i a i tatou o la tatou faiā ma le Atua o le a fesoasoani lea tatou te gaoioi ai ma le atamai ma o le a mautinoa ai lana faamaoniga ma lana fesoasoani. (Faataoto 4:10) I le matauina o mea uma o le olaga e pei ona tau atu i a te ia ma ana fuafuaga, o le a mafai ai ona tatou tausia se paleni lelei i le auala ua tatou faaogaina ai o tatou olaga. E tatau lava ona tatou galulue mo le  tausia o o tatou manaoga faaletino. Peitai ua faamanatu mai e le Alo o le Atua i a i tatou o le manatu popole ma le sailia ma le naunau o mea faitino o le a lē faaumiumiina ai o tatou olaga mo sina vaitaimi; o le sailia muamua o le malo o le Atua ma lana amiotonu o le a faaumiumiina ai e leai se iʻuga. (Mataio 6:25-33; 1 Timoteo 6:7-12; Eperu 13:5) Ua fuafuaina e le Atua ia tatou olioli atoatoa i o tatou olaga faaleaiga. Ae o le matuā saisaitia naua i mea faaleaiga ma le lē taulau ai ona tatou faalia o le alofa moni mo i latou i fafo atu o le liʻo o le aiga, o se toilalo lea mo i tatou lava, e avatu ai i lo tatou aiga se vaaiga pumoomoo o le olaga ma lē maua ai e i tatou faamanuiaga a le Atua. O faafiafiaga ma evaevaga faaleaiga e aumaia ai le olioli sili pe a tausia i lo latou tulaga e tatau ai, ia aua lava neʻi faatagaina e uunaia ai i tua le alofa mo le Atua. (1 Korinito 7:29-31; 2 Timoteo 3:4, 5) I le faia o mea uma o se aiga po o le taitoatasi, i le talafeagai ma mataupu silisili aogā o le Afioga a le Atua, o le a matuā faamalieina lava o tatou olaga faatasi ma se lagona moni ua i ai se mea ua faataunuuina, ma o le a tatou faataatia ai foi se faavae mautu mo se lumanai e faavavau. O lea, “O mea uma lava tou te faia, ia faia ma le loto, peiseai ua faia i a Ieova ... auā ua outou iloa, e maua e outou mai i a Ieova le taui, o le tofi lea.”—Kolose 3:18-24, NW.

ATIINA AʻE O SE AIGA

10. O le ā le tāua o le faifai pea o talanoaga faale-Tusi Paia i le aiga?

¹⁰ Afai e faaauau ona galulue tagata o se aiga agaʻi atu i sini e tutusa, e matuā tāua tele la talanoaga mafana o le Afioga a le Atua i le aiga, e matuā tatau lava. Ua ofoina mai i aso taitasi avanoa e tele mo tagata taitoatasi e tala atu ai i fuafuaga a Lē na Foafoaina mea, i mea o loo vaaia ma faia. (Teuteronome 6:4-9) E lelei pe a faataatia ese taimi faipea mo tagata uma ia auai i le faitauina ma le talanoaina faatasi o le Tusi Paia, atonu pe faatasi ai ma se fesoasoani a ni lomiga o  loo faamatalaina ai le Tusi Paia. O le faia o lenei mea e i ai sona aogā autasi mo le aiga. Ona mafai ai lea e tagata o le aiga ona faaaoga le Afioga a le Atua e fesoasoani ai le tasi i le isi ia faafetaiaia faafitauli atonu e oo mai. A faataatia e matua se faaaʻoaʻoga lelei, ia lē faatagaina nei vaitaimi o talanoaga faale-Tusi Paia a le aiga ia faigofie ona solia e isi mea, o le a faamamafaina la i le fanau le taʻua moni o le faaaloalo loloto ma le talisapaia o le Afioga a le Atua. Na fetalai lona Alo: “E le na o mea e ʻai e ola ai le tagata, a o afioga uma e tulei mai i le fofoga o Ieova.”—Mataio 4:4, NW.

11. E uiga i le agaʻigaʻi i luma faaleagaga, o le ā le vaivaiga e tatau ona alo ese ai i le aiga?

¹¹ I se tino, “e le tatau ona i ai se fevaevaeaiga” peitai “e tatau ona felagolagomai ona itutino uma.’ (1 Korinito 12:25, NW) E tatau ona moni lena i se tino faaleaiga. E lē tatau i le tasi paaga ona faatumulia o ia lava i lona agaʻi i luma faaleagaga i le poto ma le malamalama e oo ai ina lē taulau ona ia faaalia le manatu naunau mo lana paaga faaipoipo. Afai, mo se faaaʻoaʻoga, e lē lava le taimi ua tuuina atu e le tane mo manaoga faaleagaga o lana avā, e oo mai le taimi atonu o le a lē toe pele ai i le avā sini e tutusa o loo i a te ia. Afai e le lava le faanaunauga totino ua tuuina atu e matua i le tuputupu aʻe faaleagaga o a latou fanau, i le fesoasoani i a i latou ia iloa pe faapefea ona faatatauina mataupu silisili o le Afioga a le Atua ma e mafai ai ona aumaia le fiafiaga sili i le olaga, atonu o le a la iloaina ua tosina ese atu fatu ma mafaufau o a la fanau i le agaga manao mea faitino o le lalolagi o loo siomia ai i latou. Mo le lelei e faavavau o lou aiga atoa, ia faaauau pea le aveina i totonu o le poto mai le Afioga a le Atua o se vaega faifai pea ma le tāua o lou olaga faaleaiga.

12. O ai i latou e lē tatau ona lafoaiina lo tatou auau faatasi atu i ai?

¹² Afai e moni ‘e amata le alofa i le aiga,’ e lē tatau ona gata ai i ina. Ua valoia e le Afioga a le Atua o  ana auauna moni o le a avea, e oo lava i totonu o lenei faiga o mea, o se aiga faalekelope o uso ma tuafafine. Ua ia taʻu mai i a i tatou e faapea ia tatou agalelei, “ia faatatau i mea e tutupu i lea aso ma lea aso, i tagata uma lava, a e faasili i le aiga o le faatuatua,” o ē i le faalapotopotoga atoa o “lo [tatou] au uso i le lalolagi.” (Kalatia 6:10; 1 Peteru 5:9) O se aiga, o le auau faatasi pea lava pea ma i latou o lena “aiga” e toatele, e tatau ona avea o se fiafiaga, le fiafiaga lea e le faigofie ona faaleagaina ona o isi faanaunauga.—Eperu 10:23-25; Luka 21:34-36.

13. O le ā le tiute tauave ua i ai i a i tatou agaʻi i tagata i fafo atu o le faapotopotoga Kerisiano?

¹³ Peitai e lē tatau ona faamuta mai lo tatou alofa i a i latou ua i totonu o le “fale o le Atua,” o lona aiga ma lana faapotopotoga. (1 Timoteo 3:15) E pei ona fetalai le Alo o le Atua, afai tatou te alolofa tau lava o ē alolofa mai i a i tatou, o tatou uso ia, ‘o le ā ea le uiga ese o lenei mea ua tatou faia?’ Ina ia pei o lo tatou Tamā faalelagi e tatau lava ona tatou aapa atu ma le loto atoa i tagata uma ma faaalia le agalelei ma le fia fesoasoani i soo se tasi ma tagata uma lava, ma tausolomua i le sailia pea lava ia tufaina atu le tala lelei o le malo o le Atua i a i latou. A tatou faaalia le alofa faale-Atua i lenei auala o se aiga, o le a uia e o tatou olaga se uiga moni ma se fuafuaga. O i tatou uma lava, matua faapea foi ma fanau, ua tatou iloa uma lava le uiga o le faaalia o le alofa i lona tulaga atoa, i le auala ua faaalia ai e le Atua. (Mataio 5:43-48; 24:14) Ua tatou auai foi i le fiafiaga atoatoa ua na o lea lava le foai atu ma le loto atoa na te mafaia ona aumai.—Galuega 20:35.

14. O le faatatauina o le ā le fautuaga ua siitia ai le olaga fiafia faaleaiga?

¹⁴ Maeu ni faamoemoega matagofie o loo i luma nei o aiga o loo faaalia sea alofa! Ua latou iloaina o le auala e faafiafiaina ai le olaga faaleaiga o le faaaogaina lea o le fautuaga o le Afioga a le Atua. E ui lava i faafitauli  ma omiga o le olaga o loo afaina ai tagata uma, ae ua iloa lelei e ia aiga i le taimi nei le tele o iʻuga lelei ua maua mai i lo latou faia faapena. Peitai o loo vaavaai atu i latou i tala atu o le taimi nei, ma latou te lē o mafaufau i se tulaga faapea na o ni nai tausaga laitiiti o le olaga a o lei faaiʻuina mea uma e le oti. Faatasi ma le mautinoa i le mau faatuatuaina o folafolaga a le Atua, o le a ati aʻe ai ma le fiafia tagata taitoatasi uma o le aiga mo se lumanai e faavavau.

15. O ā fesili e te ono fesili ai i a te oe lava e uiga i aogā o taʻiala faale-Tusi Paia ua faataatitiaina mai i lenei tusi?

¹⁵ Ua faaalia e lenei tusi mai le Tusi Paia o le fuafuaga a le Atua i le foafoaina o le lalolagi na faia ina ia aināina. Na faavaeina e ia le aiga e faataunuuina ai lenei tulaga. Sa tuuina mai foi e le Atua taʻiala mo tamā, ma tinā ma fanau, ma ua uma ona iloiloina nei tulaga. Pe ua e mafaia ea ona faatatauina nisi o nei mataupu silisili i lou aiga? Pe ua fesoasoani ea i a te oe ia faafiafiaina atili ai lou olaga faaleaiga? Ua matou faamoemoe lava o lena le tulaga. Peitai o le ā ua taofia e le lumanai mo oe ma lou aiga?

16-18. O ā tulaga matagofie ua fuafuaina e Ieova mo lenei lalolagi?

¹⁶ Pe e te manao ea e fesoasoani i le tausia o le lalolagi, i le faia o ona fanua e feomaʻi i fuata ma ona toafa ia fua tele mai? Pe e te fia vaai ea i laau tuitui ma talatala ua suia i lotoā o togālaau aina ma vaomatua matagofie? Pe e te fiafia ea ma lou aiga ia faataunuuina le pulea o manu, e lē ma le faaaogaina o fana ma sasa uamea ae e auala i le alofa ma le fetalitonuai?

¹⁷ Afai o loo moomoo lou fatu i le taimi o le a tuʻi ai pelu e fai ma uamea o suotosina, ma tao e fai ma polo teu vine, pe a lē toe i ai tagata latou te gaosia pulu fana po o tagata faatupu taua, o lona uiga la o le a e olioli i le faiga fou a Ieova. O taʻitaʻi saua tau upu fai o malo, o faigā pisinisi matapeapea ma le tala pepelo faalotu o le a avea ia ma mea o aso ua tuanai. O le a ola aiga uma i le filemu i lalo o lo latou lava vine ma lo latou  mati. O le a lagona i le lalolagi le tagitagi mai o le alaga fiafia o fanau ua toe tutu mai faatasi ma pesega malie a manu felelei e tele. Ma o le a faamatagofieina le ʻea i le nanamu suamalie o fugālaau na i lo le omia i tulaga o loo faaleagaina ai pe faaoonaina ai le lalolagi i fale faigaluega ma gaosi mea.-Mika 4:1-4.

¹⁸ Afai o lou faamoemoe logo i tino o le fia vaai atu lea i le pipili ua osooso e pei o le aila, le fia faalogo atu o pese mai le laulau faiva o le gūgū, le matamata atu ua pupula mai mata o le tauaso, le iloa ua faalogoa taliga o le tutuli, le molimauina o le oi ma le tagi ua suia i le laufofoga fiafia, faapea ma le suia o loimata ma le faavauvau i le featai, ma le suia o le tiga ma le oti e le soifua lelei ma le ola e faavavau, fai la le mea e aupito sili ona e mafaia e fesoasoani ai i a te oe lava ma lou aiga ia tagofia le gaoioiga e manaomia mo le ola ai e faavavau i le faiga fou a Ieova, le mea o le a faatumauina ai nei tulaga uma e oo i le faavavau.—Faaaliga 21:1-4.

19. Pe e ono mafai faapefea e oe ma lou aiga ona avea o ni isi o le motu o tagata o le a olioli i faamanuiaga o le faiga fou o mea a le Atua?

¹⁹ Pe o le a avea ea lou aiga o se tasi o le motu o tagata o le a faatumuina le lalolagi i lena taimi? O oe lava e palasi i ai le filifiliga lea. Ia mulimuli nei i faatonuga a Ieova mo le olaga faaleaiga. Ia galulue o se aiga ia faamaonia nei o le a fetaui lelei outou ma auala o le olaga i lena faiga fou o mea. Suesue le Afioga a le Atua, faatatau i lou olaga, taʻu atu i isi e uiga i le faamoemoe o i luma. I le faia faapena o le a faia ai outou o se aiga “se igoa lelei” po o le taʻuleleia ma le Atua. “Ia sili le manao ina ia taʻuleleia i le manao i le oloa tele; ma le agalelei, ia sili le manao i lea i le ario ma le auro.” O se taʻuleleia po o se igoa faapena o le a lē faagaloina e Ieova: “O le faamanatuina o lē amiotonu, e viia lava lea.” (Faataoto 22:1; 10:7) I le alofa tunoa ma le agalelei o Ieova atonu o le a faamanuiaina ai oe ma lou aiga i se lumanai e faavavau o le fiafiaga silisili.

[Fesili mo le Suʻesuʻega]

 [Ata atoa i le itulau 189]