Faafiafiaina o Fatu o Ou Matua
Mataupu 12
Faafiafiaina o Fatu o Ou Matua
1. Ai se ā ua saʻo ai le ava o se tasi i ona matua?
E tusa lava pe o tatou laiti pea, laalaa atu i le tagata matua, pe ua avea nei ma ni tane ma ni fafine matutua, o i tatou uma lava o ni fanau a se tasi. E faigata tele ona fuafuaina le tau o le 20 tausaga po o se taimi faapena o le tausia, le galuega, tupe ma taumafaiga ofoina atu ua faaaluina mo le toatele o i tatou mai le taimi o le tama meamea sei oo ina matutua. Ma, o le mea moni lava, sa aumaia e o tatou matua i a i tatou uma taitoatasi se mea e le taitai ona tatou mafaia ona toe faafoi atua. Auā, po o le ā lava se isi mea ua tatou nonofo aitalafu ai i a i laʻua ae ua tatou nonofo aitalafu lava i o tatou ola o i ai nei. A na leai i laʻua, se manū e leai i tatou. O lenei lava mea moni i a te ia lava e tatau ona avea ma mafuaaga e sili atu, ia tatou faautagia ai le poloaiga tau atua: “Ia e ava i lou tamā ma lou tinā; o le uluai tulafono lea ua i ai le mea ua folafolaina; ina ia manuia ai oe, ma ia e nofo tuluʻi ai i luga o le laueleele.”—Efeso 6:2, 3.
2. Ai se ā e tatau ai ona tatou lagona le nonofo aitalafu i o tatou matua?
2 A o muamua ona tatou nonofo aitalafu i Le na Foafoaina i tatou o le Puna moni o le ola uma, e tatau foi ona tatou lagonaina se uiga loloto o le nonofo aitalafu i o tatou matua. O le ā se mea e mafai ona tatou avatu i a i laʻua e fesuiai ma mea ua la aumaia i a te i tatou? Fai mai le Alo o le Atua e lē mafai e mea uma o le lalolagi ona faatauina le ola, auā e lē mafai ona e faapipii atu se tau i le ola. (Mareko 8:36, 37; Salamo 49:6-8) Ua taʻu mai e le Afioga a le Atua i a i tatou: “Aua neʻi ia te outou se mea e tasi a se tasi tagata; a e tau lava o le fealofani.” (Roma 13:8) I se auala faapitoa e tatau lava ona tatou lagona se faagaeetia ia faaauau pea ona avatu le alofa i o tatou matua o se mea ua tatou nonofo aitalafu ai i a i laʻua seia oo i le iʻuga o lo tatou ola po o latou ola foi. A o lē mafai ona tatou avatua i a i laʻua le ola e pei ona latou aumaia i a i tatou, e mafai ona tatou foaia atu i a i latou se mea e avea ai le olaga ma se mea e fiafia i ai. E mafai ona tatou faaopoopo atu i o latou oliolisaga ma o latou faalogona o le loto malie loloto. E mafai ona tatou faia lea mea i se auala faapito atonu e le mafaia e soo se tasi lava tagata, auā o i tatou o a latou fanau.
3. E tusa ai ma le Faataoto 23:24, 25, o ā uiga i se tama itiiti e mafai ona fesoasoani i le fiafia o ona matua?
3 E pei ona fai mai le Faataoto 23:24, 25: “E matua olioli lava le tamā o le ua amiotonu; o le na fanaua le atalii poto e fiafia o ia ia te ia; e fiafia lou tamā ma lou tinā; e olioli lava le na fanau mai oe.” O se faanaunauga masani lava i matua le mitamita i mea e faia e a latou fanau, ma fiafia ai. Pe o lena ea le tulaga o i ai ou matua?
4. O le ā ua faatonuina e le Kolose 3:20 tamaiti latou te faia?
4 I se tulaga tele e faalagolago lava lea i le pe tatou te faaaloalo moni i lo latou tulaga ma faalogo i a latou fautuaga. Mo i latou o loo laiti pea, fai mai le fautuaga a le Atua: “O outou le fanau, ia outou faalogo i o outou mātua i mea uma; auā o le mea mālie lea i le Alii.’ (Kolose 3:20) O “mea uma” ua manino mai lava e lē faapea o lona uiga ua i ai i matua le pule latou te manaomia mea e lē tusa ai ma le Afioga a le Atua, peitai ua faaalia ai, a o iti lava i tatou, ua i a i latou le tiute tauave e taʻitaʻiina i tatou i matata uma o le olaga.—Faataoto 1:8.
5. O le ā atonu e ono fesili ai se tagata talavou i a te ia lava e tusa ma le mea na te faatalitalia mai i sana lava fanau?
5 Pe o e laitiiti nei? Atonu e i ai se aso e avea ai oe ma se matua. Pe e te manao ea i se fanau e faaali atu le faaaloalo i a te oe, po o se fanau e matuā tetee, atonu po o nisi e faatagā faalogo ae le usitai pe a lilo atu ma oe? Na i lo le aumaia ai o se fiafia, fai mai le Faataoto 17:25: “O le atalii valea o le faatiga loto lea i lona tamā; o le faaonoono foi i le na fanau mai o ia.” E pei lava ona i a te oe le tomai faapitoa e faafiafiaina ai ou matua, e faapena foi ona i a te oe, e sili atu na i lo se isi lava tagata le tomai e te mafai ai ona aumai i a i laʻua le faanoanoa loloto ma le lē fiafia. O lau amio o le a fuafuaina ai le tulaga o le a i ai.
MAUAINA O LE ATAMAI E ALU AI SE TAIMI
6. O le ā le faataʻitaʻiga ua faaalia ai e masani lava ona oo mai le atamai faatasi ma le matua?
6 E lelei mo le au talavou le talisapaia, o le matua ua i ai se tasi o se mea tāua moni lea i le mauaina o le atamai. Pe ua 10 tausaga lou matua ua e i ai nei? Ua mafai ona e vaaia ua sili atu mea ua e iloa na i lo le taimi a o lima ou tausaga, a ea? Pe ua e 15? Ua sili atu lou iloa a o e 10, a ea? Pe ua e agaʻi atu ea i le 20? E tatau lava ona e talisapaia ua sili atu atili mea e te iloa na i lo le taimi a o e 15. E faigofie ona e toe tepa i tua ma iloa ai o le faasolo aʻe i le matua ua faasolo aʻe ai foi ma lou atamai, peitai e faigata ona vaai atu agaʻi i luma ma talia lenei mea moni. E tusa lava po o le a le atamai e manatu se tagata talavou o loo i ai, e tatau lava i a te ia ona iloa o le lumanai na te mafaia ma e tatau ona aumaia le atamai e sili atu.
7. O le ā le aʻoaʻoga e uiga i le atamai e mafai ona tatou maua mai le fautuaga na tuuina atu i le Tupu o Reopoamo?
7 O le ā le manatu o i ai i lenei mea? O ou matua, talu ai ona e matutua i a te oe ma e tele atu le poto masani i lo oe, o lea e alagā tatau foi ona atamamai atu i lo oe i le faafetaiaia o faafitauli o le olaga. E faigata ona talia o lenei manatu e le toatele o le au talavou. Atonu latou te faapea mai o tagata matutua o ni “tagata mafaufau i mea faaanamuā.” O nisi atonu e faapena, peitai e lē faapena le toatele, e pei foi o tagata talavou e lē faapea o le lē faatuatuaina o isi o le a afaina ai fua isi, e mafai ona tuuina atu i ai ni avega tauave. E le o se mea fou mo le au talavou le manatu faapea e popoto atu i latou i ē matutua. Sa faia e se tupu o Isaraelu lenei sese mataʻutia ma oo i ni taunuuga e sili ona leaga. Ina ua soloai ane Reopoamo e 41 ona tausaga e suitulaga i lona tamā o Solomona e fai ma tupu, sa talosaga atu tagata ia faamāmā a latou avega. Sa fesiligia e Reopoamo le au matutua, o e sa fautua ane ia faifai malie ma le agalelei. Sa alu atu loa o ia i taulelea talavou ma sa fautua mai i latou ia saua. Sa talia e ia la latou fautuaga. O lona iʻuga? O le sefulu mai i le sefulu ma le lua o ituaiga sa fouvale ma sa tuua ai Reopoamo ma le na o le tusa ma le tasi o vae ono o lona malo. O e ua matutua lava a e lē o le au talavou, na latou avatu le fautuaga poto. “O loo i ai le poto i e ua toeaina; o le faalevaleva foi o aso e i ai le faautauta.” —Iopu 12:12; 1 Tupu 12:1-16; 14:21.
8. O le ā le manatu e faatatau i tagata matutua, e aofia ai matua, ua uunaia e le Tusi Paia?
8 Aua e te manatu ua anamua tele le fautuaga a ou matua ona e faapea ua le o toe talavou i latou. Ae peitai, e pei lava ona fai mai le Afioga a le Atua: “Ia e faalogo i lou tamā, o le na fanaua oe; aua foi e te ʻinoʻino i lou tinā pe a loomatua o ia.” O le matua ua tatau i ai le faaaloalo. “Ia e tulai atu i luma o le ua ulu sinā, ia e ava foi i luma o le toeaina, ma ia e mataʻu i lou Atua; o aʻu o Ieova.” E moni e toatele tagata talavou ua latou le amanaia nei poloaiga. Peitai o le faia faapena ua lē aumaia ai se fiafiaga—mo i latou lava ma faapea foi ma o latou matua.—Faataoto 23:22; Levitiko 19:32.
FAI LAU VAEGA
9. Pe faapefea ona aafia se aiga pe a faitio lē aoga pe fouvale sona tagata?
9 E le mafai ona alo ese mai ai—o le mea e te faia e aafia ai isi tagata. Afai e mafatia se tasi o le aiga o le a popole tagata uma lava. I le ma lea, afai e faitio ma fouvale se tasi o le a oo ina faavevesiina le nonofo filemu o le aiga atoa. Ina ia mafai ona maua se olaga fiafia faaleaiga, e tatau i tagata taitoatasi ona fai lana vaega.—Ia faatusatusa 1 Korinito 12:26.
10. Ai se ā ua aogā tele ai mo fanau le aʻoaʻo ia faia galuega lelei?
10 E i ai ni mea moni ma le mautu e mafai ona e faia. O loo galulue malosi matua ia maua mea e manaomia e le aiga. Afai e te talavou ma o loo e mau i le aiga, e mafai ona e fesoasoani. O le tele o le olaga e faaaluina i le galue. E i ai nisi tagata e faameo ona o lea tulaga. Peitai afai e te aʻoaʻo ia fai galuega lelei, ma faia ma le faamoemoe lelei, o le a na aumaia se loto malie moni. I le isi itu, o se tagata na te le faia lana vaega ae na te faatalitalia isi latou te faia mea uma mo ia, na te lē mafai ona iloa lena loto malie, ma o le a avea pea ia ma faaonoono i isi tagata, e pei ona fai mai le Tusi Paia, ‘e pei lava o le asu i mata o se tasi.’ (Faataoto 10:26; Failauga 3:12, 13) O lea, a tofia oe e fai se galuega i le aiga, ia fai loa lava ma faia ia lelei. Ma afai e te manao moni e aumaia le fiafiaga i ou matua, fai ni galuega faaopoopo e aunoa ma le tuu sei fai atu. E le taumatea o le a e iloa o galuega na e sili atu ona fiafia ai—talu ai sa e faia ona o le naunau o lou fatu ia aumaia ai le fiafia i a i laʻua.
11. Pe e mafai faapefea i upu ma gaoioiga a se tama itiiti ona lafoia mai ai se ata lelei i ona matua?
11 A logo lelei i tagata se mea ua faia e se talavou, e masani lava ona latou fia iloaina po o ai e ana lea tama po o lea teine. Ina ua faataʻitaʻia e Tavita talavou le lototele uiga ese ma le faatuatua, sa fesili loa lava le Tupu o Saulo: “Se atalii o ai lena tama?” (1 Samuelu 17:55-58) O loo e tauaveina le igoa o lou aiga. O mea e te faia ma le ituaiga o tagata e i ai oe o le a aafia ai le auala e manatu ai tagata i lena igoa ma matua na la avatua i a te oe. E tele naunau auala e te mafai ona aumaia ai le viiga i ou matua—i lo outou nuu ma le aʻoga—i le faaalia o le agalelei, le agaga fesoasoani, le faaaloalo ma le faauo i isi. Ma i le taimi lava lea e tasi ua e faaalia ai le ava i Le na Foafoaina oe.—Faataoto 20:11; Eperu 13:16.
12. Ai se ā ua lelei ai i fanau le felagolagomai ma taumafaiga a o latou matua ia aʻoaʻoina i latou?
12 O loo fusia faatasi le fiafiaga o ou matua ma lou fiafiaga. O a la taumafaiga i le aʻoaʻoina o oe ua fuafuaina ia avatu ai i a te oe se amataga lelei i le auala o le ola. Ia felagolagomai ma i laʻua ma i lea avatu i a i laʻua le fiafiaga sili, auā la te mananao i le mea e sili ona lelei mo oe. E pei ona faamatalaina e le tusitala faagaeeina: “Loʻu atalii e, afai e poto lou loto, ona fiafia ai lea o loʻu nei lava loto.”(Faataoto 23:15) Afai e aloaia e ou matua lo la tiute tauave i luma o le Atua ia taʻitaʻia oe i auala o le atamai moni, ia fesoasoani i a i laʻua ia faataunuuina lena tiute tauave ma le faamaoni. “Ia e faalogo i le faatonu mai, ma e talia le aʻoaʻo atu; ina ia e poto ai pe a oo i ou tausaga amuli.” —Faataoto 19:20.
13. O le ā atonu o le a fesoasoani i se tama itiiti ia maua le manatu saʻo e uiga i mea ua faasāsāina ai o ia e ona matua?
13 Atonu e i ai taimi e te lagona ai faapea ua tele naunau mea ua manaomia e ou matua mai i a te oe, pe faapea mai foi ua tele mea e faasāsāina mai ai oe. E le faigofie ona mauaina le paleni lelei i mataupu tau i le aʻoaʻiina. I se aso, pe a i ai sou aiga, atonu o le a e iloa ua e faafesagai foi ma nei lava faafitauli. Afai o le a faasāsāina e ou matua lou auau faatasi atu i nisi talavou, po o le puipuia mai foi o oe faasaga i le faaaogaina o fua laau faasaina, po o le faamutaina mai foi o lou auau faatasi i se mamao e tatau ai ma isi o le isi ituaiga, ia nofo ma mafaufau i le sili mamao atu ona lelei o le i ai o matua o aʻoaʻi mai na i lo le i ai o matua e lē manatu pe le popole! (Faataoto 13:20; 3:31) Ia talia la la aʻoaʻiga. O le a aogā mo oe lava ma faafiafiaina ai o la fatu.—Faataoto 6:23; 13:1; 15:5; Eperu 12:7-11.
14, 15. A tutupu aʻe faafitauli i tagata o le aiga, o le faatatauina o ā mataupu silisili faale-Tusi Paia atonu e fesoasoani i se tama itiiti ina ia tausia le filemu?
14 E moni foi, e tele mea e tutupu mai i le aiga e lē ona o oe na faia. Peitai o le tulaga e te tali atu ai o le a faatosina ai le tulaga o le aiga. Ua fautua mai le Tusi Paia: “Afai e mafaia ia te outou, ia outou nofo lelei ma tagata uma lava.” (Roma 12:18) E lē faigofie pea ona faia o lenei mea. E eseese i tatou uma, e eseese la tatou vaaiga agaʻi i mea ma e eseese foi la tatou tali atu. O le a i ai manatu feteenai ma manaoga. Sei manatu faapea o le feteenaiga e i le va o oe ma lou uso po o lou tuafafine. Atonu e te manatu faapea o le tasi tagata ua manatu faapito. O le ā le mea o le a e faia?
15 O nisi tamaiti o le a feei loa lava ma tautuuai ma manao ia faalava ane loa se tasi o matua. Ia, po o le pule loa lava o i latou ma le mea e fai, uunai atu ma pō ane, ina ia mafai ai ona faia le mea latou te mananao ai. Peitai ua faapea mai se faataoto faagaeeina: “O le māfaufau o le tagata e faagesegese ai lona ita” (Faataoto 19:11) I le ā le auala? I le faapogaia ai ona ia faamāmāina o se tulaga faigata ua aliali mai. (Pe atonu o se gaoioiga sa lei faia ma le loto i ai.) O le a fai ma mea na te manatua ai le tele o taimi sa sese ai foi o ia. (Ma paga lona faafetai i le Atua ona o lona finagalo faamagalo!) Atonu foi o le a na iloaina ai, e tusa lava pe o loo i ai lona uso po o le tuafafine i le sese, ae o le a sese pea i lana itu le faatagaina o lona ita e faavevesia ai le filemu o le aiga atoa. E uiga i se tagata ua i ai lea atamai ua faaauau ona faapea mai le faataoto: “O lona viiga foi lea, ina ua le manatua lona agaleagaina.’—Ia tagai atu foi i le Kolose 3:13, 14.
16. O le ā le auala o amioga i le vaega o a latou fanau ua faafiafiaina ai matua ē matataʻu i le Atua?
16 I lona tulaga faavae, o le mea e faafiafiaina ai matua o ē matataʻu i le Atua e tutusa lava ma le mea e faafiafiaina ai le finagalo o Ieova. O le mea latou te lagona ai le tiga e faapena foi i a te ia ona lagona ai le tiga. (Salamo 78: 36-41) O matua latou te lē iloa le mafaufau o Ieova le Atua e ono olioli pe afai o le a lauiloa a latou fanau i le lalolagi, pe a taʻutaʻua o latou igoa, maua ni tupe se tele ma tulaga faapena. Ae o matua e fai Ieova ma o latou Atua ua latou iloa o le a mavae atu lenei lalolagi ma ona tuinanau “a o lē fai le finagalo o le Atua, e tumau lea e faavavau.” (1 Ioane 2:15-17) O lea, o le mea moni ua latou fiafia i ai o le vaai atu lea i a latou fanau o usiusitai i Lē na Foafoaina i latou, faia lona finagalo ma atagia mai ai ona uiga. E moni lava o matua e matataʻu i le Atua e fiafia pe a lelei a latou fanau i aʻoga. Peitai e sili atu lo latou fiafia pe afai e atagia mai i a latou amio i totonu o le aʻoga ma isi nofoaga lo latou faamaoni atu i tulaga a le Atua ma se faanaunauga ia faafiafia i a te ia. Ma o le a sili atu lava lo latou fiafia pe a faaauau pea e nei fanau ona latou maua o le fiafia i auala o Ieova seia oo lava ina faasolo atu i lo latou olaga matutua.
TIUTE TAUAVE O LE TAUSIA O MATUA
17-19. Pe e ono mafai faapefea e atalii ma afafine matutua ona faaalia latou te talisapaia o latou matua?
17 E lē tatau ona fai ifo lo tatou manatu i o tatou matua pe a tatou tuua o tatou aiga ina ua tatou matutua. Tatou te mananao ia fiafia i latou i o latou olaga atoa. Mo le tele o tausaga sa latou tausia ai i tatou i mea tatou te manaomia, ma i le tele lava o taimi, sa faia ai i ni tulaga faigata mo i latou lava. O le ā se mea tatou te mafaia nei e faaali atu ai lo tatou agaga talisapaia?
18 E mafai ona tatou teuina i o tatou mafaufau le manaoga tau atua: “Ia e ava i lou tamā ma lou tinā.” (Mataio 19:19) Atonu ua pisi tele i tatou. Peitai e manaomia ona tatou iloaina o se mea e uigā tele lenei i o tatou matua lo latou faalogo i a i tatou ma lo tatou asiasi atu i a i latou.
19 A o tuanai tausaga, e ono mafai foi ona faaalia le “ava” i isi auala. Afai e i ai se manaoga mo le fesoasoani faaletino, faaalia le talisapaia mo mea uma na la faia mo oe, atoa foi mo manaoga uma amiotonu a Ieova. Sa tusia e le aposetolo o Paulo e uiga i a i latou ua faamatuā tagata: “Afai foi o i ai i se fafine ua oti lana tane ni ana tama po o fanau a ana tama, ia aʻoaʻoina i latou ia muamua ona agalelei i lo latou lava aiga, ma taui atu i o latou mātua; auā o le mea lelei lea ma le mālie i luma o le Atua.”—1 Timoteo 5:3, 4.
20, 21. (a) E tusa ai ma le Mataio 15:1-6, o le ā e aofia ai i le ava o se tasi i ona matua? (e) Pe e i ai ea se mea o le a faagafuaina ai se tagata mai le faalia o le ava i ona matua i lenei auala?
20 O le mea moni o le “ava” i matua o se tasi e ono aofia ai le lagolagoina i mea faitino ua faaalia manino mai lea i le Tusi Paia. I se tasi taimi sa faafetauia ai e le au Faresaio Iesu ma tuuaia ona soo i lo latou solia o uputuu. Ae sa tali Iesu: “Se a le mea ua soli ai e outou foi le poloaiga a le Atua i a outou uputuu? Auā ua poloai mai le Atua, ua faapea mai, Ia e ava i lou tamā ma lou tinā; i le ma lea, O le upu leaga i le tamā po o le tinā, ia fasiotia lava ia. A ua outou fai mai, Ai se fai ane i le tamā po o le tinā, ai se mea ua ia te au e aoga ia te oe, o le taulaga lea; ona le toe ava lea o ia i lona tamā po o lona tinā. Ua faapea ona outou faaleaogaina le poloaiga a le Atua i a outou uputuu.”—Mataio 15:1-6.
21 I lo latou taʻutino atu o a latou tupe po o mea totino “o le taulaga lea” ua tuuina atu i le Atua, o lona uiga e tusa ai ma uputuu, ua saoloto mai i le tiute tauave ia tausi i o latou matua. Peitai sa lē tutusa ma le finagalo o Iesu. Ma e manaomia e i tatou i aso nei ona aveina i o tatou fatu o lenei mea. E moni lava ona o le “puipuiga mo le manuia a lautele” i le tele o atunuu atonu ua faaleleia ai ni manaoga o matua ua matutua. Peitai pe ua lava moni ea lea fuafuaga? Afai e le lava, pe e matuā leai foi se fuafuaga faapea, o fanau e ava i o latou matua o le a fai le mea latou te mafaia e faatumuina se tulaga ua le o maua. Ioe, o le tausia o matua ua matutua o se tasi o ē o loo manaomia, ua pei lava ona fai mai le aposetolo o Paulo, o se faamaoniga o le “amio Atua,” o le tuutoina atu o se tasi i a Ieova le Atua lava ia, Le na Mafua ai le fuafuaga o aiga.
22. O le ā e tatau ona tatau avatu i o tatou matua e ese mai ai i mea faitino?
22 Peitai, e lē tatau lava ona tatou mafaufau faapea, afai ua maua e matua mea e ʻai e tatau ai i o la tausaga mulimuli ane, lavalava ma fale, o le a lē toe manaomia ai se isi mea. E i ai foi i a i laʻua faalogona ootia ma manaoga faaleagaga. La te manaomia le alofa ma le uai atu i ai o manatu, ma o le tele lava o taimi e matuā naunau atu ai mo nei tulaga. I o tatou olaga atoa e manaomia ona tatou iloa o loo i ai se tasi e ona i tatou, ma e lē o tuua na o i tatou. E lē tatau i le fanau ona liliu ese mai i o latou matua matutua e tusa i o latou manaoga faaletino po o o latou faalogona ootia. “O le ua faamāumau mea a lona tamā, ma tuli ese i lona tinā, o le atalii lea e tupu ai le ma ma le masiasi.”—Faataoto 19:26.
23. Pe e mafai faapefea ona avea se tama itiiti ma fiafiaga i ona matua?
23 Mai le talavou e oo atu i le olaga o le tagata matua, ua i ai i fanau se nofoaga tāua tele i soifuaga a o latou matua. Ua toatele fanau ua avea ma puna o faanoanoaga ma faamoemoega lē taulau. Peitai afai e te faaaloalo i le tulaga o ou matua ma faalogo i la la fautuaga, afai e te faaalia le alofa moni ma le agalelei mo i laʻua, o le a mafai ona avea oe ma puna o le olioli i o la fatu i aso taitasi. Ioe, “avatu i lou tamā ma lou tinā se mafuaaga e fiafia ai, ia olioli le na fanaua oe.”—Faataoto 23:25, New English Bible.
[Fesili mo le Suʻesuʻega]
