Mataupu 2

Faataatiaina o Se Faavae Lelei mo Lau Faaipoipoga

1-3. E tusa ai ma le Mataio 7:24-27, o le ā e faalagolago i ai le faamanuiaina moni o le olaga?

O se fale, se olaga po o se faaipoipoga o le a faalagolago lava lona lelei i lona faavae o tu ai. I se tasi o ana faataʻitaʻiga sa fetalai ai Iesu e uiga i tagata e toalua—o le tagata poto o lē na fausia lona fale i luga o le papa ma le tagata valea na fausia lona fale i luga o le oneone. Ina ua agi le afā, oo mai lologa ma matagi ma taia ai nei fale, o lē sa tu i luga o le papa sa mausali, peitai o le fale sa fausia i luga o le oneone sa paʻū ma malepe.

² Sa lei aʻoaʻoina e Iesu tagata pe faapefea ona fauina fale. Sa na faamamafaina le manaoga ia fau aʻe o latou olaga i luga o se faavae lelei. Ona o se ave feau a le Atua, na fetalai o ia:“O lenei, ai se faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa.” “Ai se faalogo foi i aʻu upu nei, a e le faia, e faatusaina o ia i le tagata valea, na na faia lona fale i luga o le oneone.”—Mataio 7:24-27.

³ Matau lelei i nei tulaga uma e lua ua faaalia ai e Iesu e lē na o se mataupu o le faalogo i fautuaga poto ma iloa le mea e tatau ona fai. O le mea e maua ai le eseesega i le va o le faamanuiaina ma le lē taulau o le faia lea o le mea ua fai mai ai le fautuaga poto. “Afai ua outou iloa ia mea, amuia outou pe a outou faia.”—Ioane 13:17.

4. O ā ni isi o mea e mafai ona tatou aʻoaʻoina mai le faaipoipoga a le uluai ulugalii? (Kenese 2:22-3:19)

⁴ Ua matuā moni lenei tulaga e tusa ai ma le  faaipoipoga. Afai tatou te fau aʻe a tatou faaipoipoga i luga o se faavae pei o se papa, o le a mafai ona tetee i omiga o le olaga. Peitai pe o fea o le a sau ai lenei faavae lelei? E sau lava mai Lē na Foafoaina le faaipoipoga, o Ieova le Atua. Na amataina e ia faaipoipoga ina ua ia faatasia uluai tagata e toalua o le tane ma le avā. Ona ia avatu ai lea i a i laʻua fautuaga poto mo lo laʻua lelei. O le mulimuli i nei faatonuga poto, o le a faalagolago i ai so la lumanai mamalu e faavavau po o le matuā leai foi o se lumanai. Sa iloa e i laʻua uma  faatonuga a le Atua, peitai, e faanoanoa lava e taʻu atu, sa la faatagaina le loto faapito e taofia ai i laʻua mai le usiusitai atu i nei taʻiala. Sa la filifili e lē amanaia le fautuaga ma o lona iʻuga na oo ina malepe la la faaipoipoga ma o la olaga e pei o se fale tu i le oneone ua masofa e se afā.

5, 6. O le ā le fesoasoani ua saunia e le Atua mo tagata faaipoipo ma i latou o faamoemoe e faaipoipo?

⁵ Na aumaia e Ieova le Atua le uluai ulugalii ia faatasia i le faaipoipoga, peitai ua na le o faia patino fuafuaga mo faaipoipoga a ulugalii i aso nei. E ui i lea o loo mafai pea ona maua ana fautuaga poto mo se faaipoipoga fiafia. E paʻū atu lava i tagata taitoatasi o aso nei o ē faamoemoe e faaipoipo latou te filifili pe faautagia le fautuaga. Ua faaalia foi e le Afioga a le Atua e mafai ona tatou fesili atu i a te ia mo se fesoasoani i le faia o se faaiʻuga poto e uiga i sē o le a faaipoipo i ai.—Iakopo 1:5, 6.

⁶ Ae o le mea moni, e matuā eseese mamao tulaga i itu eseese o le lalolagi. I le tele o atunuu i aso nei e fai ai e tane ma fafine a latou lava filifiliga e tusa ai ma lē o le a faaipoipo i ai. Peitai i le vaega tele o le faitau aofai o le lalolagi ua fuafuaina ai e mātua faaipoipoga, o nisi taimi e auala atu lea i “se tasi na te faafesootaia.” I nisi atunuu e maua e le tane se avā ina ua uma ona totogi atu i mātua o le teine se “tau mo le faatoanofotane’ ma ona o le telē foi o le tau atonu o le a lē mafai ai e le tane ona gafatia le faaipoipo atu. E ui i lea, e tusa lava po o le ā le tulaga ae ua saunia e le Tusi Paia fautuaga e mafai ona fesoasoani agaʻi i le manuia tumau o se faaipoipoga.

IA ILOA MUAMUA OE LAVA

7-10. (a) Afai ua faamoemoe e faaipoipo, o le ā e tatau i se tasi ona iloa e uiga i a te ia lava? Pe e mafai faapefea ona ia iloaina? (e) O le ā ua fai mai ai le Tusi Paia e uiga i mafuaaga tatau e faaipoipo ai?

⁷ O le ā e te manao ai mai le faaipoipoga? O ā ou manaoga—i le faaletino, le lagona ootia ma le faaleagaga? O ā ou tulaga tāua, ou sini ma au auala e te taunuu ai i nei faamoemoe? Ina ia taliina nei fesili e  tatau lava ona e iloa oe lava. E lē faigofie lenei mea e tusa ma le manatu o se tasi. E manaomia ai le matua i faalogona ootia e suesueina ai tatou lava, a e oo foi i lea tulaga ua le mafaia ona iloa atoatoa i tatou i le tulaga moni o tatou i ai i lona auiliiliga. Sa faasino mai e le aposetolo Kerisiano o Paulo lenei tulaga ina ua ia tusia i le 1 Korinito 4:4: “Auā ou te le iloa ifo i loʻu loto soʻu sese, a e le taʻuamiotonuina aʻu i lea mea; a o le na te faamasinoina aʻu o [Ieova] lea.”

⁸ I se tasi taimi sa finagalo Le na Foafoaina mea ia iloa e Iopu nisi o mea moni sa na lei malamalama i ai, sa fetalai atu la le Atua i a te ia: “Ou te fesili atu foi ia te oe, ina e faailoa mai ia ia te au.” (Iopu 38:3) E mafai ona fesoasoani fesili i a i tatou ia iloa i tatou lava ma iloa lelei pogai ua fai ai lea ma lea. O lea la, ia fesili ifo i a te oe lava e uiga i ou faanaunauga tau i le faaipoipoga.

⁹ Pe e te manao e faaipoipo ia faamalieina manaoga faaletino—mea ai, lavalava, fale? O na manaoga e tāua ia i a i tatou uma lava e pei ona fai mai le Tusi Paia: “Afai ua maua e i tatou o mea e aai ai ma mea e oofu ai, ia gata ai o tatou manao.” Ma o le manaoga mo faiga faaulugalii? O se manaoga foi lea ua masani ai. “Auā e lelei ona fai avā, a e leaga ona mu” i le tuinanau mo se toalua. (1 Timoteo 6:8; 1 Korinito 7:9) Pe ina ia toalua ai? O le mafuaaga autu lena na faavaeina ai e le Atua le fuafuaga tau le faaipoipoga. O le isi mafuaaga, ina ia felagolagomai faatasi tagata e toalua i galuega. (Kenese 2:18; 1:26-28) O le faia o se galuega lelei o se puna lea o le loto malie ma e tatau ona i ai lona taui: “I le ma lea, ia taitasi le tagata ma ʻai, ma inu, ma fiafia i mea lelei i ana galuega uma; o le mea foaiina mai lea e le Atua.”—Failauga 3:13.

¹⁰ O tagata ua ulufia i le alofa ua leva ona latou manatu i le fatu po o le loto o se faatusa lea o o latou faalogona. Peitai ua laga e le Tusi Paia se fesili faateʻiteʻi e uiga i le fatu po o le loto: “O ai na te mafaia ona iloa?”(Ieremia 17:9) Pe ua e mautinoa ea ua e iloa lelei le mea o i lou fatu?

11. O ā manaoga autu o faalogona ootia e tatau ona faamalieina i le faaipoipoga?

 ¹¹ Ua masani ona faatauasoina i tatou i faatosinaga faaletino ma lilofia ai isi manaoga o faalogona ootia. I le sailia o se paaga, pe e lava le mamafa ua e tuuina atu i lou manaoga mo le taliaina o le malamalama, agalelei ma le alofa? E i ai manaoga autu mo i tatou uma lava: ia i ai sē e mafuta atu i ai, ia faatuatua i ai, ia faaalia i ai i tatou lava e aunoa ma se fefe neʻi afāina; se tasi o le a lē “punitia lona loto alofa” i a i tatou. (1 Ioane 3:17) Pe e mafai ona e avatu na mea uma i lau paaga, ma pe o le a faapea foi ona ia tali atu ai i a te oe?

12. Ai se ā ua lē lava ai le faamalieina o manaoga faaletino ma faalefaalogona mo se faaipoipoga fiafia?

¹² Na fetalai Iesu: “Amuia ē ua iloa o latou manaoga faaleagaga. (Mataio 5:3, NW) O le ā lou manaoga faaleagaga? Pe e fesootai ea lea ma le sailia o se galuega? Le mauoa? Mea faitino? Ae, pe e aumaia ea e nei sailiga le filemu ma le loto malie i totonu o i tatou? Ua masani lava ona lē faapena. O lea la e manaomia ai ona tatou talisapaia faapea, i totonu o tagata uma o loo i ai se galala o le agaga o le a i ai pea, e tusa lava pe ua faamalieina uma manaoga faaletino. O lo tatou manaoga galala faaleagaga i le faailoaina o i tatou—ia iloa po o ai i tatou, o le ā i tatou, ai Pese ā ua tatou i ai i inei, ma pe o fea foi o tatou agaʻi i ai. Pe o e iloa lelei ea nei manaoga uma faaleagaga, ma le auala e faafetaiaʻia ai i latou?

TUTUSA O UIGA

13. Mo se faaipoipoga fiafia, o le ā e tatau ona e iloa lelei i le faaopoopo atu i ou lava manaoga?

¹³ Afai ua e malamalama i nei manaoga uma o le tino, mafaufau ma le agaga, pe ua e iloaina ea la pe ua faapea foi ona malamalama i ai lē ua e faamoemoe e te faaipoipo i ai? E lē gata ina tatau ona e iloa lelei o ou lava manaoga faapitoa mo se faaipoipoga fiafia, a e tatau foi ona e iloa lelei manaoga o lau paaga. O le mea mautinoa lava lou manao ia fiafia foi lau paaga.  O le lē fiafia o se tasi o i laʻua o le lē fiafia lava lea o i lāua uma.

14. I le tele o faaipoipoga, ai se ā ua maua ai e le tele o paaga e lē tutusa o latou uiga?

¹⁴ E tele faaipoipoga ua iʻu i le lē fiafia ma tatalaina ona o le lē tutusa o uiga. O le lē tutusa o se upu loloto, peitai o lona tāua i faaipoipoga ua sili atili atu ai lona tāua. Afai e lē tutusa lelei le toalua o i laʻua o se au, o lona uiga o le a faigata tele mo i laʻua. O se tulaga faapea ua aumaia ai i le mafaufau le fuafuaga o le tulafono faa-Mose lea sa faasaina ai le faatasia o manu eseese o la ituaiga ma o la malolosi ona o le tulaga faigata e ono mafai ona tupu mai ai. (Teuteronome 22:10) E faapea foi la i se tamaloa ma se fafine e lē tutusa o la uiga ae ua faaipoipo. A eseese mea e naunau i ai, eseese ituaiga o uo e fiafia i ai ma taaloga po o faafiafiaga, a e itiiti ni mea e tutusa ai, o le fusi o le faaipoipoga o le a oo i lalo i se tulaga e matuā faigata.

15, 16. O ā nisi o mataupu e tatau ona talanoaina ma lē o le a faaipoipo i ai, ma e faapefea?

¹⁵ “E faaleaogaina mafaufauga pe a leai se filifiliga,” o le mea lena ua taʻu mai e le Tusi Paia i a i tatou. (Faataoto 15:22) I le fuafuaina o le a faaipoipo, pe ua uma ea ona talanoaina mataupu e mafai ona faatinoina? Pe o le a faapefea ona ofi ane le galuega a le tamaloa i le faaipoipoga? O lena o le a na fuafuaina le mea o le a laʻua mau ai ma o le ā foi le tele o le tupe e maua mai e faafetaiaʻia ai mea o manaomia. O ai o le a na faafoeina le tupe faaalu? Pe e i ai se manaoga ia fai galuega le avā, ma pe o se tulaga ea lea ua tatau ai? Pe faapefea le tulaga fealoaloaʻi i le va feagai ai ma o laʻua aiga, ae maise lava matua o i laʻua uma? Pe faapefea le faalogona o taitoatasi a i laʻua e uiga i le tulaga tau i faiga faaulugalii, le tulaga tau i fanau ma le aʻoaʻoina o i latou? Pe e manao ea le tasi o i laʻua ia pulea le isi, po o le pulea o la la faiā i le agalelei ma le magafagafa?

¹⁶ Pe e mafai ea ona talanoaina nei fesili uma atoa foi ma isi i se tulaga toafilemu ona solo lelei, ma faaleleia ai i se auala o le a mafai ai e oulua uma ona ola  ma le mafana lelei? Pe e mafai ea ona lua faafetaiaʻia faatasi ma foia faafitauli, ma tatalaina pea i taimi uma le auala o fesootaiga? O se auala ola lena mo se faaipoipoga manuia.

17-19. Ai se ā ua i ai ai se vaega o talaaga faaleaiga i le tulaga tutusa o uiga i faaipoipoga?

¹⁷ O le tele o tulaga e tutusa ai ua masani lava ona i ai i tagata e toalua e tali tutusa o la talaaga ma mea na ola aʻe ai. Ua taʻua e le tusi Aid to Bible Understanding, itulau 1114 e uiga i le faaipoipoga i taimi o le Tusi Paia:

“E foliga mai o se aganuu taatele le saili e se tane o sana avā i totonu lava o le liʻo o ona aiga po o lo latou lava ituaiga. O lenei mataupu silisili ua faasinoina mai lea i le faamatalaga a Lapana i a Iakopo: ‘E lelei ona ou avatu ai o ia [loʻu afafine] ia te oe, a e leaga ona ou avatu i se tasi tagata.’ (Kenese 29:19) Ae maise lava le faamamaluina tele o lenei faiga e tagata tapuai a Ieova e pei ona faataʻitaʻia mai e Aperaamo, o lē sa auina atu se auauna i lona lava aiga ma lona atunuu e aumai se avā mo lona atalii o Isaako na i lo le fai avā i se afafine o sā Kananā ia sa latou mau faatasi. (Kenese 24:3, 4)”

¹⁸ E lē faapea o le uiga o lea mea o le a fautuaina ai se tagata i aso nei e faaipoipo ma sona aiga la te felataʻi tele, auā e ono mafai ona aliaʻi mai ai faafitauli tau i ni fanau o le a maua mai ai atonu o le a lē atoatoa ona lelei. Peitai, o talaaga o aiga e telē lava sa latou vaega e tusa ma tulaga ua i ai tagata. I le taimi o le tama-itiiti ma le talavou o se tasi, o se uiga faalenatura lava le faatosina atu o le amio ma faalogona o se tasi i uiga o loo siomia ai le aiga. A foliga tutusa talaaga o vaega e lua, e masani lava ona faigofie ona ‘tutupu aʻe i le eleele e tasi ma lauolaola i le tau e tasi.’ E ui i lea, o tagata e eseese talaaga ma tupuaga e mafai foi ona faia ni fetuutuunaiga i a latou faaipoipoga, ae maise lava pe afai o i laʻua uma o ni tagata ua matutua tau le mafaufau.

¹⁹ Ua manino lava le aogā tele pe afai e mafai ona e iloa se mea e uiga i le aiga o lau paaga o le a e faaipoipo i ai. Peitai ia e tagaʻi foi pe faapefea le  vafeagai ai o ia ma le aiga i matua ma uso ma tuafafine po o tuagane. Pe faapefea ona faia e ia agaʻi i tagata matutua, ma pe faapefea foi lana faiā ma tamaiti laiti?

20, 21. I le filifilia o se paaga, o le ā le manatu e tatau ona uia e uiga i vaivaiga po o masei o se tasi?

²⁰ E ui lava ina uia nei fautuaga uma, a e ao ina e manatua le mea lenei: O le tutusa o ni uiga o ni tagata se toalua e le mafai ona atoatoa lelei. O le a i ai vaivaiga i a i laʻua uma. O nisi o ia vaivaiga atonu la te matauina a o lei faaipoipo, ae o nisi o le a iloa mulimuli ane. O le ā nei la le mea o le a fai?

²¹ Ua lē o vaivaiga ua mafua ai le lē taulau o faaipoipoga, peitai o le tulaga o loo manatu ai se tasi o i laʻua agaʻi i nei vaivaiga. Pe e mafai ona e vaaia le sili atu o uiga lelei na i lo uiga faalēlelei, po o loo e matauina tulaga leaga ma faamanatu pea lava? Pe o lava ea lou fetuutuunai e faagalogalo ai nisi o masei e pei foi o oe ona e manao ia faatuatuanaʻi ni ou sese e isi? Ua faapea mai le aposetolo o Peteru, “o le alofa e ufiufi ai agasala e tele.” (1 Peteru 4:8) Pe ua i a te oe lea ituaiga o alofa mo lē ua e faamoemoe e te faaipoipo i ai? Afai e leai, e sili atu ona lelei la mo oe lou lē faaipoipo i lena tagata.

‘E MAFAI ONA OU SUIA O IA’

22-24. Ai se ā ua lē poto ai le faaipoipo i se tasi e faavae i luga o sana folafolaga o le a suia ona ala po o le faamoemoe foi e taumafai e suia le tagata?

²² Pe e te faapea mai ea ‘e mafai ona ou suia o ia’ e tusa ma le tulaga o manaomia? Peitai o ai o loo e alofa faavalea i ai? O le tagata ea e pei ona i ai o ia, po o lea ina ua mavae au taumafaiga ia toe faaleleia o ia? E faigata ona suia i tatou lava, e sili atu ai ona faigata ona suia o isi. Peitai o upu moni mamana mai le Afioga a le Atua e mafai ona faapogaia le tagata ia suia ia lava. E mafai e se tagata ona “ to ese le tagata tuai,” ae toe fuatai manao o le loto. (Efeso 4:22, 23) Peitai aua neʻi e vave talitonu i se folafolaga a lē o le a e faaipoipo i ai faapea o le a na faia se suiga faafuasei mo oe! E ui lava ina mafai ona faasaʻoina uiga leaga  po o le suia te isi foi, ae atonu e alu ai se vaitaimi po o ni tausaga. E lē mafai foi ona tatou faalēamanaia le mea moni o uiga tuufaasolo ma mea na tatou tutupu aʻe ai ua aumaia i a i tatou ni tu faalēlelei ma tosina mālie atu ai i ni auala ua avea ai i tatou o ni tagata ua ese mamao mai i isi tagata. O le alofa moni e mafai ai ona uunaia i tatou ia fesoasoani le tasi i le isi ia faaleleia ma foia vaivaiga, peitai o le a lē mafai ona uunaia tatou ia taumafai e faamalosi se paaga i se faiga fou ma le lē masani ai o le a fai ma mea e solipalaina ai lona uiga faaletagata.

²³ O nisi ua i ai i o latou mafaufau se faatusa e manatu pea i ai faapea o i latou ua lelei tele, ma ua latou taumafai ai e faaofi atu a latou faiga valea uma i lenei faatusa. O le mea moni e leai se tasi e mafai ona tāea se miti po o se faalepō e uiga i se mea e lē mafai ona faia, peitai o lē o loo pipii atu pea i sea mafaufauga o le a tāupe mau ai pea ma taumafai e faamalosia le isi tagata na te faataunuuina. A lē taulau lenei faiga, o le a lē gata ai ae o le a toe saili atu o ia i se isi mea e faaauau ai le faia pea o lenei mafaufauga valea. Ae o nei tagata latou te lē maua lava lenei faamoemoe valea. Ua latou sailia se ituaiga o tagata e lē o i ai ae o se tasi ua faatupuina i o latou lava mafaufauga. O tagata e mafaufau faapena e le o ni tagata lelei mo le faaipoipo i ai.

²⁴ Atonu pe sa i ai ni au miti faapena. O le toatele o i tatou sa faapena i nisi taimi o tatou olaga; e toatele tagata talavou ua faapena. Peitai i le faateleina o le taʻumatuaina o faalogona ootia ua tatou iloa ai e tatau lava ona tuuesea nei mafaufauga valea e lē mafai ona faatinoina. O le mea e sili ona faitaulia i le faaipoipoga o le mea moni lea, ae lē na o ni mafaufauga fatu.

25. O le ā le eseesega i le va o le alofa moni ma le alofa valea?

²⁵ O le alofa moni ua lē tauaso naua e pei ona manatu ai le toatele. O le a na ufiufia le tele o masei, peitai o le alofa moni o le a na lē tauaso i ia mea. O le alofa valea e tauaso, e lē o le alofa moni. O le alofa valea lea ua musu ai e vaai i faafitauli ua uluai iloa e isi tagata. Ua oo lava foi ina tanumia ona lava popolega ma tulaga  faaletonu; peitai ia mautinoa lelei o le a aliali aʻe lava ia mea i se taimi mulimuli ane. A pupuni ou mata i mea moni faalēlelei i le taimi a o lei faaipoipo oulua, o le a mautinoa lava le fetaiaʻi ma oe pe a uma ona faaipoipo. O lo tatou faanaunauga faanatura o le faia lea ia sili atu ona lelei lo tatou foliga atu i se tasi o loo tatou faamoemoe e faafiafiaina pe faatosina mai, peitai e oo mai le taimi e te vaaia ai le ata atoa ma le moni. Ia tuu atu i a te oe lena taimi manaomia ia iloa lelei ai lau paaga i le tulaga moni o i ai, ma ia e faamaoni e faaali atu ou lava uiga moni e pei ona e i ai. O le apoapoaiga a le aposetolo i le 1 Korinito 14:20 e ono mafai foi ona faatatauina i le sailiga o se paaga: “Aua tou te faatamaiti i le mafaufau;...a ia outou tagata matutua i le mafaufau” ma le malamalama.

MATAFAIOI E FAIA I LE FAAIPOIPOGA

26. E tusa ai ma le Tusi Paia, e faapefea ona saisaitia le noataga o le faaipoipoga? (Roma 7:2, 3)

²⁶ E ao lava i le tagata ona manatunatu lelei i matafaioi e faia i le faaipoipoga. Afai o le a lē malosi ma mautū le matafaioi a se tasi o i laʻua o le a ati aʻe la le faaipoipoga i luga o se faavae maluelue. I le tele o vaega o le lalolagi i aso nei, ua faia ai faaipoipoga ma toe lepetia vave. O le mafuaaga masani lava ona o ē ua ulufale atu i se faaipoipoga ua lē manatu i le matafaioi o se tulaga saisaitia tau le amio, ae ua manatu i ai faapenei ‘⁠afai o le a lē solo lelei, o le a ou faamutaina.’ O se mea ua i ai se manatu faapena, ua toeitiiti lava malaia le faaipoipoga mai le amataga ma na i lo le aumaia ai o le fiafia, ua masani lava ona aumaia ai o le loto mafatia. Ua faaalia e le Tusi Paia le eseesega ma lena i lona fai mai e tatau ona avea le faaipoipoga ma faiā mo le olaga atoa. Na fetalai le Atua e uiga i le uluai ulugalii, e tatau “ona avea ai lea o i laua ma tino e tasi.” (Kenese 2:18, 23, 24) E lē tatau i le tane ona i ai se isi fafine, ma e lē tatau foi i le fafine ona i ai se isi tane. Sa toe faamaonia foi e le Alo o le Atua lenei mea i lona faapea mai: “O lea e le toe toalua ai, a o le tino e tasi i laua; o lenei, o e ua faatasia e le Atua, aua  neʻi faateaeseina e se tagata.” Na o le lē faamaoni lava i le faigā aiga faaulugalii o le a avea ma faavae moni o le lepetia o le fusi o se faaipoipoga.—Mataio 19:3-9.

27-29. (a) Po o ā mea e lelei mo se fafine ona mataʻia i se ua faamoemoe e faaipoipo i ai? (e) Po o ā mea atonu e lelei mo le tane ona mataʻia i lē o le a faaipoipo i ai?

²⁷ I le vaai atu i le mamafatū o le faaipoipoga, o se fafine e manao ia manuia sana faaipoipoga o le a lelei tele mo ia ona faaipoipo atu tau lava o le tagata e mafai ona ia faaaloaloina—lē o loo mauaa ma paleni lelei, lelei lana fuafuaga, e mafai ona faafoeina tiute tauave ma ua lava lona agaga faatagata matua e taliaina ai faitioga aoga. Ia fesili i a te oe lava: Pe o le ā avea o ia ma sē tausi lelei mai, o se tamā lelei i ni fanau atonu o le a faamanuiaina ai lenei mafutuga? Pe e i a te ia ea tulaga maualuluga tau le amio mamā ina ia mafai ai e oulua uma ona faia se faaiʻuga mausali ia tausia le paia ma ia lē leaga le moega o le faaipoipoga? Pe na te faaalia ea le agamalu ma le amio maulalo po o le faamaualuga ma le fia fai manatu, sē ua manatu e saʻo pea lava ia ma e lē loto malie e fuafua tatau le uiga o ni mataupu e aliali mai? O le auau faatasi ma se tamaloa mo sina taimi umi lava a o lei faaipoipo, o le a mafai ai ona matauina nei mea, ae maise lava pe afai e avea mataupu silisili a le Tusi Paia ma tulaga e faamasinoina ai nei itu.

²⁸ E faapea foi i se tamaloa o loo manatu mamafa mo le manuia o lana faaipoipoga ona sailia se avā e mafai ona ia alofa i ai e pei o lona lava tino. E tatau i le avā ona talia fiafia o ia o sana paaga i le faavaeina o le aiga. (Kenese 2:18) O le avea ma se tausi aiga lelei o se galuega moomia e tele ona tiute tauave. E manaomia ai le faatinoina o agavaa pei o se fai kuka, teuteu-fale, faasoasoaina o mea e tausi ai le aiga, le avea ma tinā, faiaʻoga, ma isi mau mea e tele. O lana vaega e mafai ona avea ma foafoaga ma luʻitau, na te ofoina atu le tele o avanoa mo le tuputupu aʻe o le tagata lava ia ma le faataunuuina o faamoemoega. O se avā lelei e pei foi o se tane lelei, o se tagata galue: “Ua vaavaai  o ia i amioga a lona aiga; e le ʻai foi o ia mea e ʻai a le paie.”​—Faataoto 31:27.

²⁹ Ioe, e lelei mo i laʻua uma ona manatunatu lelei i mea la te vaai i ai—i faamaoniga o le tūmamā totino ma le pulea lelei po o le lē i ai foi o ia tulaga; le maelega na i lo le augatā; le fetuutuunai ma le magafagafa i le tuufaafeagai ma le loto maaa ma le manatu faapito; le fuafua tatau po o le faataugā o mea; le atamai e mafaufau ai i talanoaga e fiafia ai ma faatamaoaiga ai faaleagaga i le tuufaafeagai ai ma le paie faalemafaufau ma avea ai le olaga o se faiga ua pasia i le vaaia o manaoga faaletino o aso taitasi ma itiiti ai lava le avanoa e faia ai se isi mea.

30, 31. Ai se ā e mafai ai e amioga lē mamā faaleulugalii i le taimi o faauoga ona faalavelavea ai le fiafiaga o se tasi i se faaipoipoga lelei i le lumanai?

³⁰ O le faaaloalo naunau o le tasi i le isi o le ki autu lea i se faaipoipoga manuia. Ma e faatatau foi lenei lava tulaga i faaupuga ma faaaliga o le alofa i le vaitaimi a o sauniuni e faaipoipo. O uiga faamasani tele e lei tatau ai, po o tuinanauga lē pulea e mafai ona faamaulaloina ai le va fealoaloai a o lei amataina le faaipoipoga. O amioga leaga faaulugalii a o lei amataina le faaipoipoga ua lē o se faavae lelei lea e amata ai ona ati aʻe se faaipoipoga. Ua faaalia ai le manatu faapito i lea ma le lē manatu mo le lumanai fiafia o le isi tagata. O le aasa tū o faalogona peiseai e foliga mai mo se minute ua na uunai mālieina atu se sootaga e lē mafai ona motusia, e vave lava ona toe maalili ma, i totonu o ni nai vaiaso po o ni nai aso foi, e ono mafai ona faaliuefuefuina le faaipoipoga.—Ia faatusatusa le tala e uiga i le alofa o Amanono i a Tamara e pei ona faaalia i 2 Samuelu 13:1-19.

³¹ O le faaalialia o faalogona o le tino i le taimi o faauoga e ono totoina ai fatu o le masalosalo lea e mulimuli ane tupu mai ai se faaletonu e uiga i le pogai moni mo le faaipoipoga. Pe na ona saunia ai ea o se auala e sasaa atu ai faalogona o le tino, pe ina ia au faatasi i se olaga ma se tasi o lē ua e talisapaia moni ma alofa i ai? O le leai o se pulea e le tagata lava ia a  o lumanai ona faaipoipoina, ua faaataina ai foi le leai o se pulea e le tagata lava ia o ia pe a uma le faaipoipoga, ma iʻu ai i le lē talitonu ma le lē fiafia. (Kalatia 5:22, 23) O le toe manatunatu atu i tua i ni uiga leaga talu ai ni amio leaga na faia a o lei faaipoipoina e ono mafai ona faalavelavea ai le sologa lelei o faalogona ootia e uiga i le faaipoipoga i ona laasaga amata.

32. Pe e mafai faapefea e amio lē mamā faaulugalii i le taimi o le faauoga ona aafia ai le va fealoaloai o se tasi ma le Atua?

³² A e sili atu ai ona mataʻutia le faaleagaina ai o le va fealoai o se tasi ma Le na Foafoaina i tatou, o lē e ana le fesoasoani ua tatou manaomia tele, talu ai nei amioga leaga. “O le finagalo foi lenei o le Atua, ia faapaiaina outou, ina ia faamamao outou ma le faitaaga;...Aua neʻi sopo tapulaa se tasi ma agaleaga i lona uso [po o, ma le fuafua saʻo, i le tuafafine o se tasi] i lenei mea;...O lenei, o lē faaleaoga mai, ua ia le faaleaoga i tagata, a o le Atua le ua foai mai lona Agaga Paia ia te [outou].”—1 Tesalonia 4:3-8.

O SE FAAVAE PAPA

33, 34. A filifilia e se tasi se paaga faaipoipo, o ā uiga ua faaalia e le Tusi Paia e sili mamao atu ona tāua na i lo le foliga mai faaletino?

³³ Pe o le a faatietie ea lou au aiga, lou aiga i luga o se faavae papa po o se faavae oneone? O sona vaega e faalagolago lava lea i le tele o le atamai sa faaaogaina ina o filifilia se paaga. O le au lelei ma feusuaiga e lē lava ia. O le a lē mafai ona soloia ai le lē tutusa faalemafaufau ma lea faaleagaga. O le fautuaga i le Afioga a le Atua ua maua mai ai le faavae papa i faaipoipoga.

³⁴ Ua faaalia e le Tusi Paia e sili ona tāua le tagata i totonu o le loto na i lo le foliga mai fafo. “O le matagofie e pepelo lea, o le mea faatauvaa le lalelei,” o le tala lea a le Faataoto faagaeeina, “a o le fafine ua mataʻu ia Ieova, e viia lava o ia.” (Faataoto 31:30) O le aposetolo o Peteru, o se tagata faiavā, sa tautala o ia i le “tagata lilo o le loto” ma le “loto agamalu ma le filemu” faapea “o le mea tautele lava lea i luma o  [Ieova] le Atua.” (1 Peteru 3:4) E ‘lē silasila le Atua i le tino mai fafo o se tasi,’ ma e aogā tele mo i tatou lana faaaʻoaʻoga i lo tatou puipui faasaga i le faatosina o i tatou i foliga mai fafo o se tasi o le a faaipoipo i ai.—1 Samuelu 16:7.

35, 36. (a) Ai se ā e tāua ai le faaipoipo i se tasi e faatuatua i le Atua ma lana Afioga? (e) O le ā le mamao o le a e faatalitalia mai i lē o le a e faaipoipo i ai na te faaalia mai ai lea faatuatua?

³⁵ O le Tupu poto o Solomona sa mafaufau loloto i le olaga ma taunuu i le faaiʻuga lenei: “Ia e mataʻu i le Atua, ma e anaana i ana poloaiga; auā o mea ia e tatau i tagata uma.”(Failauga 12:13) I le feagaiga ia usiusitai i le tulafono a le Atua sa poloaiina ai faapitoa lava tagata Isaraelu ia aua neʻi meane ua taaina ese i latou mai le Atua moni. “Aua le fetaiai gafa ma i latou, aua le avatu lou afafine mā lona atalii, aua foi neʻi e au mai lona afafine mā lou atalii; auā e faaliliueseina e ia lou atalii, ia le mulimuli mai ia te au, a e auauna i atua ese.”—Teuteronome 7:3, 4.

³⁶ Mo mafuaaga faapea sa avatu ai le lapataiga i a i latou ua i ai i le “feagaiga fou,” i latou ia i le faapotopotoga Kerisiano, ia faaipoipo “tau lava i le ua i le Alii.” (Ieremia 31:31-33; 1 Korinito 7:39) Na i lo le faaalia ai o se tau faaese, o lenei tulaga ua faaosofia i le atamai ma le alofa. E leai se mea e sili atu ona avatua le malosi i fusi o le faaipoipoga na i lo le la tuutoina atu uma i Lē na Foafoaina mea. Afai e te faaipoipo i se tagata e faatuatua i le Atua ma lana Afioga, ma malamalama i ai e pei o oe, o le a i a te oulua la le pule e tasi mo fautuaga. Atonu e te manatu faapea e faalētāua lenei tulaga, peitai “Aua neʻi faaseseina outou, O le feoai ma e amio leaga e leaga ai amio lelei.” (1 Korinito 15:33) E oo foi i totonu o le faapotopotoga Kerisiano e tatau lava i se tasi ona mautinoa o lē o le a faaipoipo i ai o se auauna ma le fatu atoa i le Atua, a e lē o se tasi o loo taumafai e ola i le autafa o le Faa-Kerisiano a o faalagolago mamafa atu agaʻi i uiga ma faiga a le  lalolagi. E lē mafai ona oulua savavali ma le Atua ma taufetuli ma le lalolagi.—Iakopo 4:4.

37, 38. (a) Ai se ā e tatau ai se tasi ona taumamao mai le faanatinati atu i le fai uo po o le faaipoipo? (e) O le fautuaga a ai e tatau ona faalogo i ai ē ua mafaufauina le faaipoipoga?

³⁷ Sa fesili Iesu: “O ai foi so outou ua fia fai se ʻolo, e le muai nofo i lalo e faitau tupe e totogi aʻi, po ua lava ana mea e faauma ai?...ina ua tuu le faavae, a e le mafai ona faauma ai.” (Luka 14:28, 29) Ua faatatau foi i le faaipoipoga lea lava mataupu silisili e tasi. Talu ai ona e finagalo le Atua o le faaipoipoga o se mafutaga mo le olaga atoa, ua tatau ai lava ona lē faanatinatia le filifiliga o se paaga. Ma ia mautinoa foi e oe lava ua e sauni e faaumaina le mea na e amataina. E oo lava i le faauoga ua lē o se mea e manatu māmā i ai pei o se taaloga. O le taalo i le alofa o le tasi o se taaloga faalēalofa ma o manuʻa o faalogona ootia ma le loto nutimomoia o le a tutupu mai ai, e mafai ona tumau ai pea mo se taimi umi.—Faataoto 10:23; 13:12.

³⁸ O tagata talavou popoto ē ua mafaufau i le faaipoipoga, e lelei mo i latou le faalogo i le fautuaga a tagata matutua, ae maise lava i latou ua faaalia lo latou naunau moni i le mea e sili mo oe. Ua faamanatu mai e le Iopu 12:12 i a i tatou le tāua o lenei mea i lona faapea mai: “O loo i ai le poto i e ua toeaina.” Ia faalogologo i nei upu po o leo o le poto masani. I luga o mea uma, “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6.

39. Pe e mafai faapefea ona fesoasoani le Tusi Paia i tagata ua uma ona faaipoipoina?

³⁹ O le toatele o tagata o loo faitau i nei upu atonu ua uma ona latou faaipoipo. E ui lava ina ua uma ona faataatia lo lua faavae mo se vaega a e mafai e le Tusi Paia ona fesoasoani i a te oe e faia ni fetuutuunaiga i soo se itu uma e manaomia, faatasi ai ma ni iʻuga lelei. Po o le ā lava le tulaga o la lua faaipoipoga, e mafai lava ona faaleleia i le tagaʻi atili i le fautuaga a Lē na Foafoaina mea e uiga i le fiafiaga faaleaiga.

[Fesili mo le Suʻesuʻega]

[Ata i le itulau 12]

Pe e mafai ona tumau pea lau faaipoipoga i vaitaimi pei o se afā?