Mataupu 8

Lau Vaega i Le Avea ma Matua

1-3. (a) O ā āuga e mafai i le fanau mai o se pepe ona avatu i matua? (e) Ai se ā e tāua ai mo le tamā ma le tinā ona malamalama i a la vaega o ni matua?

I le olaga e tele mea e tutupu e itiiti lava sina afaina ai o i tatou. O isi e i ai ni auga tetele ma le tumau. O le fanau mai o se tama itiiti ua manino lava le auai i le tulaga mulimuli faatoa taʻua nei. Mo se tane ma se avā, o le a le toe tutusa le olaga pe a mavae lea taimi. E ui lava ina laitiiti tele ae o lenei tagata fou i totonu o le aiga o le a faaali mai ia lava i se leo ma lona faatasi mai e le mafai ona faalēamanaiaina.

² O le olaga mo matua ua tatau ona sili atu le lelei ma le fiafia. Peitai ua aumaia ai se luʻitau, ma mo le iʻuga e sili ona lelei, e manaomia le faafetaiaia o lena luʻi e matua uma e toalua. Sa faaaogaina oulua uma ina ia aumaia le tama itiiti, ma o oulua uma o le a faia se vaega tāua i le atiina aʻe o la lua tama mai le fanau mai ma faasolo atu ai. O le manaoga mo le loto naunau atu, le felagolagomai auau faatasi—ma le agamalu—sa lei faapea ona telē muamua.

³ O le malamalama i le vaega a matua taitoatasi lava ia, ma pe e mafai faapefea foi e nei vaega ona solo lelei, o le a tatau ai ona fesoasoani tele i le faafetauia o manaoga o lau pepe, ma maua mai ai iʻuga fiafia. E manaomia le fuafua lelei. E ui lava ina tauivi le mafaufau ia fetuunai tatau, a e masani lava ona uunaieseina e faalogona ootia. E ono mafai ona tatou oo atu i le soona fai, mai le tau leai o se mea i le tele naunau, ma toe foi mai i le tau leai o se mea. E manaomia le  tauaveina e le tamā o lona tulaga ulu, peitai, afai o le a na faia e sili atu i le tulaga e tatau ai, o le a oo la ina pulepuletutu. E lelei mo le tinā ona auai i le aʻoaʻoina ma i le aʻoaʻiina o le fanau, peitai o le tauaveina o nei tiute e aunoa ma le aofia ai o le tamā o lona uiga ua na faavaivaia le fausaga o le aiga. O le lelei e lelei, peitai o se mea lelei e ono mafai ona leaga pe afai o le a tauaveina e sili atu i le tulaga e tatau ai.—Filipi 4:5.

O LE VAEGA TĀUA TELE A LE TINĀ

4. O ā nisi o mea e manaomia e se pepe mai lona tinā?

⁴ O se pepe fou faatoa fanau mai e faalagolago atoatoa i lona tinā mo mea o loo ia manaomia loa lava. Afai na te faataunuuina ma le alofa ia manaoga o le a maua e le pepe le faalogona saogalemu. (Salamo 22:9, 10) E tatau ona fafaga lelei ma tausi mamā ma faamafanafana; peitai o le faataunuuina o manaoga faaletino ua lē lava lea. E tutusa lelei lava lona tāua ma manaoga o faalogona ootia. Afai e lē maua e le pepe le alofa, o le a oo ina le saogalemu. O le a lē pine ona iloa e le tinā pe o le ā le tele o le manaoga o i ai nei pe a valaaulia e le pepe le uaʻi atu i a te ia. Peitai afai o le a lē amanaia pea lava lana tagi e ono mafai ona maʻi. Afai o le a lē maua le faamalieina o ona faalogona ootia mo se vaitaimi, atonu o le a faalavelavea ona faalogona ootia mo aso uma o lona olaga.

5-7. E tusa ai ma suesuega talu ai nei, pe faapefea ona aafia se pepe i le alofa o lona tinā ma lona uaʻi atu i ai?

⁵ O suesuega i nofoaga eseese e tele ua na faamaonia lenei mea moni: E mamaʻi pepe ma oo lava ina feoti pe a lē maua le alofa, e pei ona faaalia e ala i le tautala ma le tagotago i ai, milimili ma opoopo. (Ia faatusatusa Isaia 66:12; 1 Tesalonia 2:7.) E ui lava ina atonu e faia e isi nei mea, o le tinā, e ona le manava na ola mai ai le pepe ma fafagaina i uluai masina o lona olaga, ua matuā lē siligia lava le fetaui lelei ma le faia o nei mea. E i ai ni gaoioiga masani ai i le va o le tinā ma le tama itiiti. O ona faanaunauga e pei ni ufi e tutupu  le fia tago atu e sapai mai le pepe fou, ua fetaui lelei ma le au tago atu o le pepe e saili ona susu.

⁶ Ua faaalia i suesuega o le faiʻai o se pepe meamea e malosi tele ma o le tuputupu aʻe faalemafaufau e siitia lea pe a oo ina faagaeetia ona faalogona, lana faalogo, vaai ma le sogisogi. A fafagaina se pepe na te lagonaina le mafana ma le manogi o le paʻu o le tinā. E toe toe lava i taimi uma e pupula taulaʻi aʻe ai le pepe i foliga o le tinā a o faasusuina. E lē na o le leo o le tinā na te lagonaina a o talanoa atu ma pesepese, peitai e faapea foi i le tātā o lona fatu, le leo lea sa na faalogo ai a o i totonu o le manava. I se lomiga i le atunuu o Nouē, sa matauina ai e se tagata suesue i mafaufau o tamaiti e igoa i a Anne-Marit Duve e faapea:

“Talu ai o gaoioiga o tamaimata o tamaiti ua faaalia manino ai le tele o gaoioiga a le faiʻai, o lea ua maua ai e i matou se mafuaaga e talitonu ai, o se tulaga maualuga o le faagaoioia o le paʻu, se tulaga maualuga o le fepaʻiaʻi—ae maise ai le fepaʻiaʻi e fesootai ma le faasusuina—e mafai ona faaosofia le gaoioiga faalemafaufau, lea o le a oo atu ai i se tulaga e sili atu ai ona iloa faaaogaina o le mafaufau pe a avea ma tagata matua.”

⁷ O lea, a faalogoina soo e le pepe le paʻi atu a le tinā a o tago mai e sii aʻo o ia i luga e opoopo pe faataele ma solo, o le faagaeetia ua na mauaina na te faia se vaega tāua i lona tuputupu aʻe ma le tulaga o le a ia i ai i le olaga mulimuli ane. E ui lava ina o le ala aʻe i po ma faanānā se pepe pe a tagi atonu ua le o se mea e fiafia i ai, ae o le iloa o faamanuiaga mulimuli mai o le a matuā tauia ai le moe sa lē maua.

AʻOAʻOINA O LE ALOFA I LE ALOFAGIA

8-10. (a) O le ā e aʻoaʻoina mai e se pepe mai i le alofa o lona tinā? (e) Ai se ā ua tāua ai lenei tulaga?

⁸ O le alofagia o le pepe e tāua tele foi mo lona tuputupu aʻe i faalogona ootia. Na te aʻoaʻoina le alofa i le alofagia o ia, ma le faaalialia po o le vaaia o faaaʻoaʻoga o le alofa. I le tautala e uiga i le alofa i le Atua, fai mai le 1 Ioane 4:19, “Ua tatou alolofa ia  te ia, auā na ia muai alofa mai ia te i tatou.” O uluai aʻoaʻoga i le alofa e palasi autu lava i le tinā. E punou atu se tinā i le pepe i luga o lona moega, tuu ona lima i lona fatafata ma eneene mālie a o ia faalatalata atu ona foliga i a te ia ma fai atu, ‘E ā! E ā!’ E moni lava e lē iloa e le pepe ia upu (ma e leai lava foi sona tāua). Peitai e migomigoi ma taumusumusu i le fiafia, auā o loo ia iloaina o le lima o loo faataaloina o ia ma le leo o loo tautala atu ua fai atu ma le manino i a te ia, ‘⁠Ou te alofa i a te oe! Ou te alofa i a te oe!’ E faatumauina atili ai lona faalogona saogalemu.

⁹ O pepe ma tamaiti laiti e faaali i ai le alofa latou te talisapaia, ma i le faataʻitaʻia o lea alofa, latou te faaaʻoaʻo i ai, e tuu aʻe nai o latou lima laiti i le ua o le tinā ma sogi atu. E fiafia i latou i le tali mai faamafanafana loto i faalogona latou te maua mai le tinā ona o le faia faapena. Ua amata ona latou iloa le aʻoaʻoga tāua o loo i ai le fiafia i le avatuina o le alofa e pei foi ona i ai i le taliaina, ma i le luluina o le alofa e faapea foi ona latou toe seleseleina mai. (Galuega 20:35; Luka 6:38) Ua iloa i faamaoniga afai e lei faia i le amataga ni fesootaiga vavalalata ma le tinā, i taimi mulimuli ane atonu o le a faafaigata i le tama itiiti ona faia o ni fesootaiga loloto ma gauaʻi atu i isi tagata.

¹⁰ Talu ai ona e amata ona aʻoaʻoina e tamaiti mea i le taimi faatoa uma ona fananau mai, o uluai tausaga lava, e aupito sili ona tāua. I totonu o na tausaga e matuā tāua tele le alofa o le tinā. Afai o le a faamanuiaina o ia i le faaalia ma le aʻoaʻoina o le alofa—e lē gauaʻi atu i le faamalieina o ni tuʻinanauga faapito—o le a na mafaia la ona aumai se lelei tumau; afai o le a lē taulau o le a aumaia e ia se afaina tumau. O le avea ma tinā lelei o se tasi lea o galuega e sili ona tauluʻiluʻi e ono maua e se fafine peitai e tele sona taui. E ui lava i ona tiga ma manaoga, o le ā se tulaga ua oloina mai e le lalolagi na te mafaia ona latalata atu i ai i le tāua ma le faamalieina tumau?

 LE VAEGA TĀUA A LE TAMĀ

11. (a) Pe e mafai faapefea e le tamā ona faamautuina lana vaega i le mafaufau o le tama itiiti? (e) Ai se ā e tāua ai lenei mea?

¹¹ O se tulaga lava faalenatura o le tinā na te faia se vaega e sili ona mataina i le olaga o le tama itiiti a o pepe meamea. Peitai mai le fanau mai o le pepe ma faasolo mai ai e tatau foi i le tamā ona avea ma vaega o le lalolagi o le pepe. E oo lava i le taimi a o pepe meamea le tama itiiti, e mafai e le tamā ma e tatau ona ia aafia ai, ma tausia le pepe i nisi taimi, taalo i ai, faaoleole pe a tagi. I lenei auala o le a pipii ai le tamā i le mafaufau o le tama itiiti. O le vaega a le tamā e tatau lava ona faagasolo malie aʻe seia oo ina mautu a o faagasolo pea le taimi. Afai o le a faatali umi o ia ona faatoa amata lea, e ono mafai ona avea ma amataga o se faafitauli o le a aliali mai ae maise lava pe a oo atu le tama itiiti i le tulaga talavou ma o le a faafaigata ai ona aʻoaʻiina. Atonu o le atalii talavou e sili atu ona ia manaomia le fesoasoani mai a lona tamā. Peitai afai sa lei lelei ona faavaeina se faiā muamua, o se va e tuputupu aʻe i ni tausaga o le a lē mafai ona sosooina i ni nai vaiaso.

12, 13. (a) O le ā le vaega a le tamā i le aiga? (e) Pe e mafai faapefea i le faataunuuina e le tamā o ona tiute tauave i le auala saʻo ona aafia ai le vaaiga a lana fanau agaʻi i le pule?

¹² E tusa lava po o se tama po o se teine le tama itiiti, ae o le taaina a le tamā o loo i ai uiga malolosi faaletamaloa na te mafai ona avatu se fesoasoani tāua tele i le atiina aʻe o se tagata lelei ma le paleni. Ua faaalia i le Afioga a le Atua o le tamā o le ulu ia o le aiga. O ia ua i ai le tiute tauave mo le tausiga o i latou i mea faaletino. (1 Korinito 11:3; 1 Timoteo 5:8) E ui i lea “e le na o mea e ʻai e ola ai tagata, a o mea uma e tulei mai i le fofoga o Ieova e ola ai tagata.” E tusa ai ma lana fanau, ua poloaiina foi le tamā “ia tausi atu i ai i aoaiga ma apoapoaiga a[Ieova].” (Teuteronome 8:3; Efeso 6:4) A o tatau ai i le alofa faanatura mo lana fanau ona uunaia o ia, ae i luga o mea uma o le  lagonaina o lona tiute tauave agaʻi i Le na Foafoaina o ia e tatau ona uunaia ai o ia e faia le mea e sili ia faataunuuina le tofiga tau atua o loo i a te ia.

¹³ Faatasi ma le mafana, faapelepele ma le alofa o loo faaalia e se tinā, e mafai e le tamā ona lagolago atu i se taaina mautu, se taaina malosi ma le taulaʻi atu i se tulaga poto. O le auala na te faafoeina ai lona tofiga mai le Atua e mafai ona i ai ni auga iloga i uiga o lana fanau mulimuli ane agaʻi i le pule, e lē gata i le faaletagata soifua a e faapea foi i le faaleatua, pe faamata o le a latou faaaloalo i ai ma po o le ā foi le lelei e mafai ona latou galulue ai i lalo o le faatonutonuga a le tasi e aunoa ma le ita po o le fouvale.

14. O le ā le aafiaga e mafai e le faaaʻoaʻoga lelei a le tamā ona i ai i lona atalii po o lona afafine?

¹⁴ Afai e i ai sona atalii, o le a mafai la e le faaaʻoaʻoga a le tamā ma lana faafoeina o mea ona faia se vaega tele ia fuafuaina pe o le a tupu aʻe le atalii o sē vaivai, ma lē mautonu, po o sē e malosi, e toa, e faaalia foi le loto tele i mea ua talitonu i ai atoa ma le loto naunau e tauaveina tiute tauave. E mafai ona aafia ai se ituaiga o tane po o le tamā o le a mulimuli ane oo i ai le atalii—po o se tasi o le a loto maaa, lē mafaufau loloto, sauā, po o sē e paleni, vaai totoʻa ma agalelei. Afai e i ai se afafine i le aiga, e mafai e le taaina ma le faiā a lona tamā ona afaina ai lona manatu atoa i le ituaiga tau tane ma e ono mafai ona fesoasoani pe faalavelavea ai foi lona lumanai manuia tau i le faaipoipoga. O auga o lenei taaina faatamā e amata lava mai le pepe meamea.

15, 16. (a) O le ā le tiute tauave o le aʻoaʻo atu ua tuuina e le Tusi Paia i le tamā? (e) Pe e mafai faapefea ona faia lenei mea?

¹⁵ O le telē tele o le tiute tauave o le tamā ia aʻoaʻo, ua faaalia i faatonuga a le Atua i ona tagata i le Teuteronome 6:6, 7: “Ia i ai foi i lou loto o upu nei ou te fai atu ai ia te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.”

 ¹⁶ E lē na o upu o maua i le Afioga a le Atua peitai e faapea foi ma le feau o loo latou avatu e tatau ona faamamafaina i aso taitasi i le mafaufau o le tama itiiti. E i ai pea lava avanoa. O fugalaau i le faatoaga, iniseti i le ʻea, manulele, po o manu vae fa iti i laau, atigi figota i le matafaga, fatu mai laau i mauga, fetu o loo emoemo mai i le lagi i le po—o nei mea ofoofogia uma ua tautala e uiga i Le na Foafoaina mea, ma e tatau ona e faamatalaina i lau fanau le uiga o o latou leo. Ua fai mai le fai salamo: “Ua tala mai e le lagi le mamalu o le Atua; ua faaalia foi e le va nimonimo le galuega a ona aao. O loo taʻu atu le upu e le tasi aso i le tasi aso, o loo faailoa foi le poto e le tasi po i le tasi po.” (Salamo 19:1, 2) I le mataalia e faaaogaina nei mea, ae maise le tagaʻi atu i mataupu o aso taitasi o le olaga i le faataʻitaʻiina ma le faamamafaina o mataupu silisili saʻo atoa ma le faaalia o le poto ma le aogā o le fautuaga a le Atua, o le a mafai ai e le tamā ona ati aʻe i le mafaufau ma le fatu o lana tama itiiti o le faavae e sili ona tāua mo le lumanai; o le talitonuga e lē gata o loo i ai le Atua, peitai ae ‘na te tauia i latou o loo saili atu ma le naunau i a te ia.’—Eperu 11:6.

17, 18. (a) Pe e tatau faapefea i le tamā ona aʻoaʻiina lana fanau? (e) O le ā e sili atu ona aoga na i lo le faia o le tele o tulafono?

¹⁷ O le aʻoaʻi atu o le isi lea mea o le vaega a le tamā. “O ai se atalii ua le aoaiina e lona tamā?” o le fesili lena ua fesiligia i le Eperu 12:7. Peitai o lana matafaioi lena ia faia lenei mea i se auala o le a le matuā mamafa tele, ma e sili atu foi lona faasaʻoga na i lo le tulaga e tatau ai ma iʻu ai i le ita tele po o le faapuapuagatiaina ai. I tamā, ua faapea mai le Afioga a le Atua, “Aua neʻi faaita i a outou fanau, ina neʻi faapalapala i latou.” (Kolose 3:21) E tatau le faasāsāina, peitai e i ai ni taimi e mafai ai ona tatou faateleina tulafono seia oo ina avea ma avega mamafa ma le faavaivai loto.

¹⁸ O le au Faresaio anamua sa naunau tele i tulafono, sa latou faaputuputuina faaputuga o tulafono ma maua  mai ai tagata pepelo e toatele. O se lē taulau lea faaletagata soifua o le manatu e faapea e mafai ona foia faafitauli i le faia o ni tulafono faaopoopo; peitai o mea e tutupu i le olaga ua faamanino mai ai o le paʻi atu i le fatu o le ki moni lea. O lea ia faaleoleo tulafono; ae ia taumafai ina ia faagoto ifo mataupu silisili, taulaʻi atu i le itulagi o loo taulaʻi atu i ai le Atua lava ia: “O te tuuina atu aʻu tulafono i o latou mafaufau, ma ou tusia i o latou loto.”—Eperu 8:10.

O LE TAMĀ MA LE TINĀ O SE ʻAU

19. O le ā e ono faia ina ia mautinoa le i ai o le fesootaiga ma talatalanoaga lelei i le aiga?

¹⁹ O le tamā lava e masani ona galue ina ia tausia le aiga i mea e ola ai, ma a foi mai o ia i le aiga mai lana galuega atonu o le a vaivai, ma atonu foi o i ai isi tiute e faia. Peitai e tatau ona fuafua ma maua taimi mo lana avā ma le fanau. E tatau ona fesootai ma lona aiga, ma faataatia ese taimi latou te talatalanoa ai i mataupu faaleaiga i ni faafiafiaga ma ni a latou tafaoga. I lenei auala o le a atiina aʻe ai le auau faatasi ma le mautu o le aiga. Atonu a o lei maua mai se fanau e tele so la taimi sa faaaluina ma lana avā i fafo atu o le aiga. Peitai afai o le a la faaauau pea ona faia lena auala, i le o atu i o, o ane i ī, ma atonu foi pe leva le po o faia faapea, o le a lē tusa ai lea ma le ola aʻe i le tausia o avega tauave a matua. O le a lē lelei lea mo a la fanau. E tuai, tuai lava a e fai mai, o le a totogia e matua le taui mo lo la lē faia pea lava pea o o la tiute tauave. E pei o tagata matutua, e sili atu ona lelei mo le fanau pe a i ai se faavae mautu ma le faifai pea i o latou olaga; o lenei tulaga o le a fesoasoani tele atu i le malōlōina o le mafaufau, le tino ma faalogona ootia. O galuega uma o aso fai soo i le olaga faaleaiga o le a faalētonu ma faalavelave e aunoa ma le toe faaopoopo atu i ai o matua i nei tulaga.—Ia faatusatusa Mataio 6:34; Kolose 4:5.

20. A oo ina aʻoaʻiina le fanau, o le ā le mea e mafai ona faia e matua ina ia mafai ai ona la auau faatasi i la taumafaiga?

 ²⁰ E tatau i le tamā ma le tinā ona felagolagomai i le faafoeina o le fanau, i le aʻoaʻoina o i latou, le faamutaina o mea latou te oo i ai, le aʻoaʻiga, ma le faaalia o le alofa. “Afai foi e fevaevaeai se aiga, e le mafai ona tumau o lena aiga.” (Mareko 3:25) E lelei tele pe a talanoaina e matua le aʻoaʻiga o le a avatua; o le a mafai ai i lea ona alo ese mai le molimauina e la la fanau o se la feeseeseai e tusa ai ma le aʻoaʻiga. O le lē faia faapea e ono mafai ona avanoa ai le fanau e taumafai ia ‘fevaevaeai ma toilalo.’ E moni, atonu o nisi taimi o le a faataalise ona tali atu se matua ma le ita ma faaoo atu le aʻoaʻiga ua mamafa tele, ae pe a uma ona iloiloina mea moni uma, ua iloa ai sa leai lava se mea na ala ai ona tupu fua sea tulaga. Atonu e mafai e matua ona talanoa e uiga i ai tau lava o i laʻua ma o le tasi la o i laʻua sa gaoioi ma le lē fuafua lelei e ono mafai ona filifilia e ia lava ia toe faaleleia nei mea ma se tasi o le fanau sa aafia ai. Peitai i le tulaga e lē mafai ai lenei talanoaga lē faalauaiteleina, o le tasi o matua ua na lagona faapea o le lagolagoina o lana paaga o lona uiga o le lagolagoina lea o le mea e lē amiotonu, atonu e mafai ona ia tautala atu faapenei, ‘Ua ou malamalama i le mea ua mafua ai ona e ita, ma e faapena foi se lagona e mafai ona oo i a te aʻu. Ae peitai atonu e i ai se mea sa e lei iloaina, ma o lena mea...’ ma mulimuli ane ia faamaninoina se mea atonu sa lei amanaiaina. O lea auala o le a mafai ona maua mai ai se taaina atu ma le filemu e aunoa ma le faaalia ai o se fevaevaeaiga po o se feeseeseai a o faatasi ai le tama itiiti o loo aʻoaʻia. E pei ona fai mai le Faataoto faagaeeina: “Na o le faamaualuga lava e tupu ai le misa; a o e filifili, e popoto i latou.”—Faataoto 13:10; ia tagaʻi foi i le Failauga 7:8.

21. Pe e tatau ea ona tuu atu le aʻoaʻiga i le na o le toatasi o matua? Ai se ā e faia ai faapea, po o le ai se ā foi e lē tatau ai ona faia faapea?

²¹ Ua faaalia i Tusi Paia Eperu o le aʻoaʻiina o se  vaega e fai toalua: “Loʻu atalii e, faalogo mai ia i le aʻoaʻo atu a lou tamā: aua foi e te tuulafoaiina le upu a lou tinā.” Ua faapena foi ona fai mai Tusi Paia Kerisiano Eleni: “O outou le fanau, ia outou faalogo i o outou mātua i le Alii, auā o le mea tonu lava lea.” O nisi taimi e manatu le tamā o le aʻoaʻiina o le fanau o le galuega lea a lana avā. Ia po o le avea foi e le avā o le manatu o le tiute lea mo le tane ma e lē faia ai se mea e sili atu na i lo le faamataʻuina o le tama itiiti fai mea sese i le faapea atu, ‘Faatali la oe sei sau lou tamā!’ Peitai, ina ia maua le fiafiaga faaleaiga ma maua uma e matua le alofa o le fanau ma le faaaloalo, e manaomia la le tofu sao i le tauaveina o le tiute.—Faataoto 1:8; Efeso 6:1.

22. O le ā e tatau ona alo ese mai ai pe a faafoeina ni talosaga a le fanau, ma ai se ā?

²² E manaomia le vaaia e fanau o le felagolagomai auau faatasi o a latou matua i lenei mea atoa ma le naunau o i laʻua taitoatasi e amoina lana lava avega tauave. Afai o le a faalogoina soo e le tama itiiti o loo tauanau atu, le fai atu o lona tamā, ‘Alu e fai i lou tinā,’ ia po o le uunai mai foi e le tinā o le faaiʻuga i le tamā, o le tasi la o i laʻua ua iloa o ia e tatau ona tali atu “E Leai” i se talosaga, ua tuuina ai o ia i le vaega a le tagata tetee leaga. E moni, e i ai tulaga atonu e faapea atu ai le tamā, ‘Ua lelei, e mafai ona e alu mo sina taimi—peitai fesili muamua i lou tinā pe o le ā le taimi e ʻaai ai.’ Ia po o le manatu foi o le tinā i nisi taimi, e ui lava o nisi talosaga e le afaina i a te ia, a e tatau i lana tane ona faaalia sona taofi i lea mataupu. Peitai o i laʻua uma e tatau ona mataalia ia iloa ua leai se auala la te faamalosia ai pe faatagaina le fanau e faia se mea e faavevesi ai matua ina ia maua le mea o ia manao i ai. O le avā poto o le a ia puipui foi faasaga i le faaaogaina o lana vaega o le pule i se auala tauva, i le taumafai e ala i le gauai atu lea ia maua le vaega tele o le alofa o le fanau ae tuua ai le tane i se tulaga faaletonu.

23. I totonu o se aiga, pe e tatau pea lava ona faamuta mai i le tamā le faia o faaiʻuga?

 ²³ O le mea moni, i faaiʻuga faaleaiga o sui taitasi uma e ono i ai ni vaipanoa e tatau ai ona tuuina atu se iloiloga faapitoa i lana faaiʻuga. O le tamā e i ai le tiute tauave o le fai faaiʻuga i mataupu e aafia ai le tulaga aoao mo le solo lelei o le aiga, ma e masani lava ona faia lea ina ua uma ona talanoaina ma isi ma ua mafaufauina foi o latou manaoga ma mea e sili i a i latou. Atonu e faia e le tinā faaiʻuga e uiga i le umukuka ma isi mea e tele tau i le au aiga. (Faataoto 31:11, 27) A o latou tutupu aʻe, atonu o le a faatagaina tamaiti e faia ni faaiʻuga faapitoa e uiga i mea latou te taaalo ai, ni filifiliga o laʻei po o nisi foi mea totino.Peitai e tatau ona lava le pulega faamatua ia iloa ai ua mulimuli i mataupu silisili, ia le tuu i se tulaga mataʻutia le saogalemu o le fanau ma ia lē solia āiā tatau a isi tagata. O lenei tulaga e mafai ona avatu ai i le fanau se faasolosolo malie aʻe i le faia o faaiʻuga.

PE O FAIGOFIE EA LE AVA ATU I A TE OUTOU MATUA?

24. Ona o le mea moni e tatau i fanau ona ava i o latou tamā ma o latou tinā, ua tuuina atu ai le ā le tiute tauave i matua?

²⁴ Ua taʻu atu i fanau, “Ia e ava i lou tamā ma lou tinā.” (Efeso 6:2; Esoto 20:12) O le faia faapea e i latou o le faaalia foi lea o le ava i le poloaiga a le Atua. Pe ua e faafaigofieina ea mo i latou ia faia faapea? O oe le avā, ua poloaiina oe e ava ma faaaloalo i lau tane. Pe e le faigata tele ea i a te oe ona faia faapena, pe afai na te faia na o sina taumafaiga laitiiti po o le leai foi ia ola aʻe i le mea o manaomia ai o ia e le Afioga a le Atua? O oe le tane, e tatau ona e faapelepele ma ava i lau avā o lou fesoasoani pele. Pe o le a le faigata ea, pe afai e le loto fesoasoani le avā? Fai la ia faigofie mo lau fanau ona usiusitai i le poloaiga a le Atua ia latou ava i a te oulua, o o latou matua. Ia maua lo latou faaaloaloga i le saunia o se aiga filemu, se tulaga lelei o gasologa, faaaʻoaʻoga lelei i lau lava amio, lelei  le aʻoaʻoina ma le toleniina, atoa ma le aʻoaʻiga alofa pe a manaomia.

25. O ā faafitauli e mafai ona tutupu mai pe a lē auau faatasi matua e uiga i le auala e toleniina ai le fanau?

²⁵ “E sili ona lelei o le toalua i le toatasi,” sa faapena ona matauina e le Tupu o Solomona, “auā ua ia te i laua le taui lelei i la la galuega.” (Failauga 4:9) A savavali faatasi tagata e toalua ona paʻu lea o le toatasi, o loo i ai le isi e fesoasoani atu e faatu aʻe i luga. E faapena foi i le aiga e mafai e le tane ma le avā ona felagolagomai ma fefaamalosiai i a la matafaioi. I le tele naunau o vaega tau i le avea ma matua o nei vaega e lagolago le tasi i le isi, ma e lelei mo le auau faatasi o le aiga. E ao ona aumaia matua ia vavalalata atili ona o le i ai o le fanau i le aiga, ma faatasia i laʻua i la la galuega faitoalua o le toleniina. Peitai o nisi taimi e i ai fesili e feeseeseai ai e ono mapuna aʻe e uiga i le pe faapefea ona toleniina pe aʻoaʻiina le tama ititi. O nisi taimi o le a tele naunau le taulaʻi atu o le loto o le avā i le tama itiiti ma ua lagona ai e le tamā peiseai ua lē amanaia o ia, pe tupu ai foi se faagaulēmalie. E mafai i lenei tulaga ona afaina ai lona uiga agaʻi i le tama itiiti. Atonu pe e le fiafia o ia i ai, ia pe atonu foi e naunau atu o ia i ai ae ua faaitiiti lona manatu i lana avā. E maualuga tele le tau o le a totogia pe afai o le a lē tulaga saʻo le tane po o le avā.

26. O le ā e ona faia ina ia taofia ai le tama itiiti matua mai le faalogona loto leaga pe a tatau i le tinā ona tuuina atu le tele o ona taimi i le pepe fou?

²⁶ A e i ai foi le tasi faafitauli e ono tupu mai pe a taunuu mai le pepe fou ae ua uma ona i ai se isi tama itiiti matua. E tatau i le tinā ona faaaluina le tele o le taimi ma le pepe fou. Ina ia taofia le tama itiiti matua mai le manatu faapea ua lē amanaia o ia ma oso ai le loto leaga, atonu e tatau i le tamā ona faateleina lona naunau atu i le tama itiiti matua.

27. Afai o le tasi o le ulugalii e lē talitonu, pe e mafai faapefea ona fesoasoani i le fanau i le itu faaleagaga?

²⁷ E moni lava e sili atu ona lelei le toalua i le toa  tasi, peitai e sili atu le toatasi i le leai. Atonu ona o tulaga e i ai ua tatau ai i le tinā ona tausi aʻe le fanau e aunoa ma le fesoasoani a le tamā. Ia po o le tamā foi e fesagai ma lena luʻi e tasi. O le tele o taimi e fevaevaeai ai aiga i le tulaga tau lotu, o lona uiga o le tasi o matua, i le avea ma auauna a Ieova le Atua, e i ai le faatuatuaga atoatoa i le fautuaga a le Tusi Paia, ae o le isi o matua e leai. Afai o le Kerisiano tuuina atu o se tane, o ia la, i le avea o le ulu o le aiga, ua sili atu ona i ai le pulega i le auala e tatau ona mulimuli ai i le toleniina ma le aʻoaʻiina o le fanau. E ui i ia mea, atonu e manaomia lona faaalia o le onosai tele, le lē gaoia ma le tutumau; e tatau lava ona ia mausali pe a i ai se mataupu mamafa e aliali mai, peitai e tatau lava ona faaalia le fuafua tatau ma le agalelei e ui lava o loo i lalo o ni tulaga e lē fiafia ai, ma e tatau foi ona fetuutuunai e tusa ma tulaga e i ai. Afai o lē talitonu o le avā, ma ona o lea e tatau ai ona usiusitai atu i le tane, o le auala o le a na uia e faalagolago tele lava i le manatu o le tane. Pe e na o lona lē fiafia ea i le Tusi Paia, pe e tetee o ia i le faatinoina o talitonuga a lana avā ma lona taumafai e aʻoaʻoina atu i le fanau? Afai e tetee mai le tane i a te ia, e tatau ona ia faalagolago i le auala ua otootoina mai e le aposetolo: I le faaaʻoaʻoga lelei a le avā i le tausia o ona tiute ma uiga faaaloalo, atonu o le a na maua mai ai lana tane ‘e aunoa ma se upu.’ O le a na faaaogaina foi soo se avanoa ua na maua e toleniina ai lana fanau i mataupu silisili a le Tusi Paia.—1 Peteru 3:1-4.

LE TULAGA I TOTONU O LE AIGA

28, 29. O le ā le ituaiga o tulaga i totonu o le aiga e sili ona manaomia, ma ai se ā?

²⁸ O le vaega a matua uma e toalua o le saunia lea o se aiga e i ai le alofa. Afai o le a lagona e le fanau lea tulaga, o lona uiga o le a lē faaputuina i totonu o i latou lava, mea latou te faaletonu ai po o a latou mea sese, talu ai lo latou fefefe e taʻu i matua. Ua latou iloa e mafai ona talanoa atu ma malamalama e uiga  i a i latou, ma o le a faafoeina foi mataupu i le alofa naunau. (Ia faatusatusa le 1 Ioane 4:17-19; Eperu 4:15, 16.) O le aiga o le a lē na o se mea e malu ai, ae o se nofoaga mautū. O le alofa faamatua o le a tutupu olaola ai agaga o le fanau.

²⁹ E te le mafai ona tuu se omomi (sponge) i totonu o le vineta ma faatalitalia ia faatumuina i le suavai. Na te mafai ona mitiia na o mea lava o loo siomia ai o ia. O le a mitiia e le omomi le suavai vagana lava pe afai e magoto i lalo o le suavai. E faapena foi i le fanau ona mitiia na o mea o siosiomia ai i latou. Latou te faalogoina uiga ma matauina mea o loo faia i o latou autafa, ma o ia mea latou te mimitiina e pei o se omomi. E iloa e le fanau ou faalogona, e tusa lava po o le popole vale po o le toalelei ma le filemu. E oo lava i pepe latou te mitiia uiga o loo i totonu o le aiga, ma o le tulaga o le faatuatua, le alofa, le aiga faaleagaga ma le faalagolago i a Ieova le Atua o ni uiga ia e tau tele ma e lē mafai ona fuafuaina.

30. O ā fesili e tatau i matua ona fesili ifo ai i a i latou lava ina ia iloa ai po o latou saunia le taʻiala lelei mo a latou fanau?

³⁰ Ia fesili i a te oe lava: O ā tulaga e te faatalitali o le a oo i ai lau tama? Pe ua ausia uma e oulua matua ia tulaga? O le ā le tulaga o tu ai lou aiga? O le ā le ituaiga o faaaʻoaʻoga mo le fanau ua faia e oulua? Pe e te taumuimui, suesue vale, faitioina isi ma faatumauina ni manatu lē lelei? Pe o le ituaiga o fanau lena e te manao ai? Pe e te manao ia i ai tulaga maualuluga mo lou aiga, ma ola aʻe ai, ma faatalitalia foi lau fanau ia faia faapena? Pe ua latou malamalama ea o le avea ma se tasi o le aiga e i ai ni manaoga iloga e tatau ona maua, e i ai ni amioga iloga e talia, e i ai foi ni gaoioiga iloga ma ni manatu e lē taliaina? E mananao le fanau e i a i latou le faalogona saogalemu o le avea ma se tasi o le aiga, o lea ia tuu atu i a i latou le faalogona o loo e faamaonia ma talia i latou pe a o gatasi i latou ma tulaga o le aiga. Ua i ai i tagata se auala o le ola aʻe i le tulaga ua faatalitalia mai i a i latou. Faatulaga  lau tama e leaga ma e lē taumate o le a na faamaonia e saʻo oe. Faatalitalia le lelei mai i a te ia, ma o le a e faalototeleina ai o ia e ola aʻe e tusa ai ma lena.

31. O le ā e tatau i taimi uma ona lagolagoina ai le taʻitaʻiga faamatua?

³¹ Ua faamasinoina tagata i a latou gaoioiga e sili atu na i lo a latou upu. E faapena foi i tamaiti, atonu latou te le manatu tele atu i ni upu ae o gaoioiga ma ua masani ona latou mataalia e puʻeina se tulaga faaoleole. O le tele naua o upu e ono faaletonu ai tamaiti. Ia faia ma le mautinoa ua lagolagoina au upu i lou faia e tusa ai ma mea ua e tautala ai.—1 Ioane 3:18.

32. O le fautuaga a ai e tatau ona mulimuli ai i taimi uma?

³² E tusa lava pe o oe o se tamā po o se tinā, o lau vaega o se luʻi tele. Peitai e mafai ona faafetaiaia lea luʻi ma ni iʻuga fiafia i le mulimuli atu i le fautuaga a Le Foai ola. Ia faataunuuina lau vaega tofia ma le faamaoni e pei o faia i a te Ia. (Kolose 3:17) Ia taumamao mai le faia e sili aʻe i le tulaga e tatau ona i ai, ia tausia le paleni lelei ma “Ia iloa lo outou agamalu e tagata uma,” e aofia ai ma lau fanau.—Filipi 4:5.

[Fesili mo le Suʻesuʻega]

 [Ata i le itulau 100]

O le pupula a le tinā ma lana paʻi atu ma le uiga o lona leo ua taʻu atu ai i lana pepe, “Ou te alofa i a te oe”

 [Ata i le itulau 104]

Pe tou te fuafuaina a outou mea e fai ma la oulua fanau?