Mauaina o Le Ki mo Le Fiafiaga Faaleaiga
Mataupu 1
Mauaina o Le Ki mo Le Fiafiaga Faaleaiga
1, 2. O ā mea matagofie e mafai ona maua mai i se olaga lelei faaleaiga? Ma o ā fesili e ono lagaina?
O LE tele lava o manaoga faaletagata mo le fiafiaga e mafai ona faamalieina i totonu o le liʻo faaleaiga. O i ina e ono mafai ona maua ai e i tatou uma mea o loo tatou faanaunau i ai: le faalogona o loo manaomia i tatou e isi, le talisapaia o i tatou, le alofaina. O se va fealoaloai mafana faaleaiga e mafai ona faatumuina nei moomooga i se auala ofoofogia. Na te mafai ona aumaia se agaga o le fefaatuatuaaʻi, le malamalama lelei o le tasi i le isi atoa ma le misialofa. O nei tulaga ua avea ai le aiga ma taulaga moni o malologa mai faalavelave ma faigata eseese i fafo. O le a mafai ai e fanau ona maua le faalogona saogalemu ma o le a mafai ai foi ona tutupu talaulau o latou uiga faaletagata e oo atu i le atoaga o lo latou malosi.
2 O lenei le olaga faaleaiga ua tatou mananao e vaai ua faataunuuina. Peitai e leai se tasi o nei mea e teʻi ua oo mai. Pe e mafai faapefea ona maua? Ai se ā ua oo atu ai le olaga faaleaiga i ni faalavelave e sili ona faigata i nisi itu o le lalolagi? O le ā le ki ua iloa ai le eseesega i le va o se faaipoipoga fiafia ma se faaipoipoga faanoanoa, le va o se aiga o loo mafana ma auau faatasi, ma se aiga o loo lē mafana ma fevaevaeaʻi?
3. O le ā ua faaalia mai i mea moni o tala faasolopito e uiga i le tāua o le aiga?
3 Afai e i a te oe le faalogona naunau loloto mo le sologa lelei ma le manuia o lou aiga, o lona uiga ua i ai faatasi ma se mafuaaga lelei. I le faamatalaina o le tāua o le fuafuaga faaleaiga, fai mai le The World Book Encyclopedia (l973):
“O le aiga o le faalapotopotoga aupito leva lea faaletagata. I le tele o auala o le faalapotopotoga lea e aupito sili ona tāua. O ni faalapotopotoga atoatoa ua faalagolago lava lo latou faatumauina po o lo latou mou ese atu i se olaga faaleaiga i lona malosi po o lona vaivai foi.”
4, 5. O ā uiga lē moomia ua e matauina i totonu o le tele o aiga?
4 Peitai e fia ni aiga i aso nei ua matuā fusia faatasi i le alofa? E toafia nisi ua olioli i le mafana ua aumaia e le fefaaaliaiga o le agalelei, agaga faafetai ma le lima foai? E toafia nisi ua latou aʻoaʻoina le upu moni, “E sili le manuia o le na te foai atu, i le manuia o le na te talia mai”?
5 I aso nei e i ai se agaga e ese ua salalau atu i le lalolagi atoa. E ui ina lau silafia i le lalolagi i Sisifo, ae ua faapea foi ona ati atu i atunuu o Asia ma isi foi nofoaga i mea ua masani lava ona mautū ai le olaga faaleaiga, e pei o uputuu. O manatu i aso nei ua aofia ai faaupuga nei: ‘Fai le mea e te manao ai, ma tuu ai pea isi e faitalia i latou.’ ‘O le aʻoaʻiga o se faiga tuai; tuu ai pea tamaiti e filifili lo latou lava auala.’ ‘Aua neʻi faia ni faamasinoga po o le ā le saʻo po o le sese.’ Ua faateleina pea atunuu ua oso maoae ai i luga le faatupulaia o tatalaga o faaipoipoga, tamaiti solitulafono ma le amioleaga o tagata matutua. Ua aumaia e fomaʻi o le mafaufau,ē togafitia le mafaufau, le au failotu atoa ma isi foi au fautua ni fautuaga. Peitai na i lo le faamalosia ai o le au fautua ua latou faaleamanaiaina le amio leaga po o lo latou fautuaina foi faapea o se auala lea e faateʻa ai le atuatuvale. O le seleselega leaga mai nei mea una ua faamaonia le muagagana: “O le mea e luluina e le tagata, o le mea lava lea e seleseleina mai ai e ia.”
UA SAPASAPAIA E TALA TUUFAASOLO LE FUAFUAGA O LE AIGA
6. Pe faapefea ona faaalia le tāua o le aiga i mea na tutupu i a Eleni ma Roma anamua?
6 O lesona ua aʻoaʻoina mai e tala tuufaasolo e uiga i le tāua o le aiga, ua matuā tatau ai lava le faautagia ma le naunautai. I le Vaega II o le The Story of Civilization o loo faamatalaina ai e le tusitala faasolopito o Will Durant le malepe o le aiga i a Eleni anamua, ona faapea mai lea o ia: “O le mafuaaga faavae mo le faatoilaloina o Eleni e Roma, o le malepeina lea i lalo o le faiga o mea Eleni e aofia ma aiga, mai i totonu.” Na te faaalia atili ai faapea, sa i ai le malosi o Roma i le aiga, peitai ina ua malepe le faatulagana o aiga i Roma ona o le amio leaga i le va o ituaiga, sa paʻū i lalo le emepaea.
7. Ai se ā sa olioli ai nisi tagata i ni olaga fiafia faaleaiga i le Emepaea o Roma ae o isi sa fetaiai ma ni faafitauli tetele?
7 O le mea moni, ua faamaonia e tala tuufaasolo le muagagana anamua, “E le o i le tagata e savali ona faatonuina le mea e ui ai o ia.” Ae peitai ua faasino mai ai foi o loo i ai se puna i tala atu o le atamai mo le taʻiala ma iʻu ai i le manuia mo le aiga. Ua lipotia mai e tusitala faasolopito e faapea, a o faaleagaina le Emepaea Roma, ae “o le olaga faaleaiga o tagata Iutaia sa avea ma faaaʻoaʻoga, ma o nuu Kerisiano laiti sa avea ma faalavelave i le lalolagi faapaupau o ē naunau i faafiafiaga, i lo latou amio atua ma le amio lelei.” (The Story of Civilization, Vaega III, itu. 366) O le ā le mea ua maʻoti ese ai nei aiga? Talu ai e ese lo latou taʻiala, o le Tusi Paia. O le tele lava o lo latou faatatauina o ana fautuaga o le Afioga a le Atua, o le tele foi lea o lo latou olioli i ni aiga mamā ma le filemu. O na iʻuga lelei na avatu ai i a Roma lē taulau ni faalogona agasala.
8. A oo i le tulaga tau i le foia o faafitauli tau le aiga, ai se ā ua tatau ai ona tatou faautagia le Tusi Paia? (Salamo 119:100-105)
8 O muagagana na taʻua i uluai parakarafa e maua mai foi i le Tusi Paia. I lena tusi ua tatou maua ai fetalaiga a Iesu Keriso e sili le manuia o le foai i le na te talia, le faamatalaga a le aposetolo faagaeeina o Paulo tatou te selesele le mea tatou te lulu, ma le faasilasilaga a le perofeta a le Atua o Ieremia ua lē o i le tagata na te faatonu ona ala. (Galuega 20:35; Kalatia 6:7; Ieremia 10:23) O nei mataupu silisili faale-Tusi Paia ua faamaonia e moni. Sa fetalai foi Iesu: “E taʻuamiotonuina le poto e ana[galuega].” (Mataio 11:19) Afai e aogā moni lava le fautuaga a le Tusi Paia i le foia o faafitauli o le aiga, pe ua lē tatau ai ea la ona tatou faautagia ma le faaaloalo?
9, 10. (a) Ai se ā ua lē lava ai faufautuaga lelei ma le alofa faalenatura ina ia mafai ai e se tasi ona olioli i se olaga fiafia faaleaiga? (e) O le ā se isi mea e manaomia? (Faaaliga 4:11)
9 I aso nei, e faitau afe lomiga e faatatau i le faaipoipoga ma le olaga faaleaiga. O le tele lava ua maua ai ni nai faamatalaga aogā. E ui i lea, ua faaauau pea ona faagasolo ina leaga tele le olaga i le aiga. E i ai se isi mea e sili atu ona manaomia, se mea lea e avatu ai le malosi e tetee atu ai i omiga o loo faamataʻu mai i le liʻo o le aiga. Ua aumaia se malosi e le alofa faanatura i le va o le tane ma le avā ma le va o matua ma le fanau. Peitai e oo foi i lena tulaga ua lē faamaonia ua lava e taofia faatasi ai le tele o aiga pe a oo mai taimi o faalavelave. O le ā le isi mea o loo manaomia?
10 E manaomia e lē gata i le lagona lelei o le tiute tauave ma le naunau atu o le tagata i lana paaga po o i le fanau po o i matua. Faatasi ma ia mea e i ai foi se isi tiute tauave e sili atu agaʻi i Lē ua tautala i ai le Tusi Paia faapea ‘o le Tamā ua faaigoaina ai le aiga uma o i le lagi atoa ma le lalolagi.’ O Ia lena o le Amataga o le faaipoipoga ma le olaga o le aiga, o Lē na Foafoaina le fanau a tagata, o Ieova le Atua. —Efeso 3:14, 15.
LE NAUNAU O LE ATUA I LE FUAFUAGA O LE AIGA
11-13. O le ā le fuafuaga a le Atua e uiga i le lalolagi ma le aiga o le tagata?
11 Ua silafia lelei e Ieova le Atua mea e moomia e le fanau a tagata ma e finagalo o ia ia tatou fiafia, ma o lea na ia aumaia ai i a i tatou le fautuaga e uiga i le olaga o le aiga. Peitai o se isi fuafuaga e sili atu lona matagofie na i lo lenei ua atagia mai lea i lona manatu mai i au aiga. Ua faamatalaina e le Tusi Paia pe o le ā lea fuafuaga. Ua na faaalia ai sa lei teʻiteʻi lava ua i ai le lalolagi (laueleele). E leʻi teʻi lava ua i ai i tatou. Na foafoaina e Ieova le Atua le lalolagi ma le faamoemoe ia tumau e faavavau, ma aināina foi seia oo i le faavavau. Ua faamauina e le perofeta o Isaia e faapea: “O le tufuga o le na faia le lalolagi; o ia na faatumauina; na ia le faia fua, na ia faia ina ia āina.”—Isaia 45:18.
12 Ina ia faataunuuina lana fuafuaga, na foafoaina ai e le Atua le ulugā tagata ma taʻu atu i a i laʻua ia maua se la aiga: “Na faia e ia o i laua o le tane ma le fafine. Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi.” (Kenese 1:27, 28) O lana fuafuaga sa manaomia atili ai i laʻua ma la fanau ia usiusitai atu i a te ia ma ia tausi lelei i le lalolagi. Ua faapea mai le Kenese 2:15 “Ua ave foi le tagata, e Ieova le Atua, ma ua tuu ia te ia i le faatoaga i Etena e galue ai ma leoleo ai.” Mulimuli ane o na tulaga pei se faatoaga o le a oo ina faateleina ina ia soo ai le kelope atoa. O le tausia o le lalolagi ma faaaogaina ma le atamai o mea o loo maua mai ai, o le a maua ai e le aiga o le fanau a tagata i le lalolagi lautele avanoa e lē uma e aʻoaʻo ai ma maua le loto malie i le faaaogaina o lo latou tomai.
13 O le taimi nei ua sili atu i le 4,000,000,000 o tagata i le lalolagi, peitai ua lē faataunuuina e lenei motu o tagata le fuafuaga a Ieova mo le lalolagi. O le toatele o i latou e lē usiusitai i a te ia, latou te lē tausia lelei foi le lalolagi. Na i lo lena, ua latou faaleagaina lona ʻea, vai ma lona laueleele. I le talafeagai ma le uluai fuafuaga a le Atua, sa na valoiaina ai e lē gata o le a na taofia nei mea uma, ae o le a na ‘faafanoina i latou na fano ai le lalolagi.’—Faaaliga 11:18.
FESILI E MANAOMIA ONA TATOU FAAFETAIAʻIA
14. Ai se ā tatou te mafai ai ona faatuatua o le a faataunuuina le fuafuaga a le Atua e aunoa ma se faaletonu e uiga i le olaga o le aiga?
14 O le fuafuaga a le Atua e uiga i le lalolagi ma le olaga o le aiga o le a taulau lava e aunoa ma se faaletonu. “E faapea foi laʻu upu e alo atu ai loʻu gutu, e le foi mai fua ia te au; a e peitai e faia le mea ou te loto i ai,” o loo fetalai mai ai Ieova. (Isaia 55:11) Na faavaeina e le Atua le fuafuaga faaleaiga ma avatu le fautuaga mo lona faafoeina. O ana taʻiala ua taliina fesili tāua moni o le olaga o le aiga—o nisi o ia fesili atonu o le a lua fesagaʻi i se taimi.
15-17. (a) O le ā ua e manatu i ai o ā nisi o fesili aupito sili ona tāua i le olaga faaleaiga? (e) Ai se ā ua lelei ai le mauaina o tali faamalie loto i nei fesili?
15 Mo se faaaʻoaʻoga: Pe faapefea ona maua e se tasi sana paaga tutusa ma ia e faaipoipo i ai? I le faaipoipoga pe e ono mafai faapefea ona taunuu i se maliliega e tusa ma ni faafitauli faigata? E sili atu ona lelei faiai e lua i lo le tasi, peitai a uma ona fai le talatalaga, o ai na te faia faaiʻuga? Pe e mafai faapefea ona maua e le tane o le faaaloaloga a lana avā, ma ai se ā e tāua ai lenei mea mo ia? Ai se ā e moomia ai e le avā le alofa o lana tane, ma o le ā le mea na te mafai ona faia ia mautinoa ai o le a ia mauaina lea alofa?
16 Pe faapefea ona e vaai agaʻi i tamaiti? O nisi ua latou manatu i ai o se faatusa o se tulaga, o se puna o se galuega taugofie po o se mautinoa o le manuia mo le olaga matua; o isi ua latou manatu i ai o se avaga mamafa. Peitai ua taʻua i latou e le Tusi Paia o se faamanuiaga. O le ā e iloa ai o le a faamaonia o i latou o se faamanuiaga pe leai? Ma o afea e tatau ai le aʻoaʻoina o i latou? Pe e tatau ea ona i ai se aʻoaʻiga? Afai o lea, o le ā lona tele ma o le ā le ituaiga? Pe e tatau ea ona i ai se va po o se faaeseesega o tupulaga i totonu o le aiga? Pe e mafai ea ona faamuta lea uiga? I le sili atu atili, pe e mafai ea ona puipuia ia aua neʻi toe tupu mai?
17 O le mauaina o tali faamalie loto i nei fesili o le a tele sona sao mo le faamautinoaina o le fiafiaga o lou olaga faaleaiga. E sili atu i lena na te mafai ona avatu i a te oe le faatuatuaga o loo i ai Lē Silisili ese lona malosi, agalelei ma le atamai e mafai ona e liliu atu i ai i soo se taimi e te manaomia ai, ma na te mafai ona taʻitaʻia lou aiga i le fiafiaga e lē gata mai.
[Fesili mo le Suʻesuʻega]
[Ata atoa i le itulau 4]
