O Le Tāua o Le Aʻoaʻiina i Le Alofa
Mataupu 10
O Le Tāua o Le Aʻoaʻiina i Le Alofa
1. O le ā e manaomia pe afai e fia usiusitai se fanau a se tasi?
E le teʻiteʻi lava ua i ai ni fanau usiusitai, alolofa, ma le amio lelei. E faatosina atu ma mauaina mai i latou e auala i faaaʻoaʻoga ma aʻoaʻiga.
2. Pe e faapefea ona feteenai manatu o le toatele o tagata suesue i mafaufau o tamaiti ma fautuaga a le Tusi Paia?
2 E toatele tagata suesue i mafaufau o tamaiti ua latou aumaia se faailoga faapea, ia “tuu ese lima” mai tamaiti, e pei o lea na faapea mai: “Pe e iloa ea e outou tinā o taimi uma lava e te sasaina ai lau tama ua e faaalia ai e te inoino i lau tama?” Peitai i lana Afioga, ua faapea mai le Atua: “O le ua tuuna lana sasa, ua ʻinoʻino o ia i lona atalii; a o le ua alofa ia te ia, ua saili le aoaiga mo ia.” (Faataoto 13:24) I ni nai sefulu tausaga ua mavae, ae maise lava i atunuu i sisifo ua faatumulia fale oloa i tusi mo le aʻoaʻoina o fanau i o latou mafaufauga faasaoloto po o le faataga atu o mea. O aʻoaʻiga o le a taofiofia ai le tama itiiti ma faalavelavea ai lona tuputupu aʻe, ua faapena ona fai mai ai tagata suesue, a e o le sasaina, i le tau lava na ona manatu i ai, e matuā mataʻutia tele i a i latou. Ua matuā feteenai lava o latou mafaufauga ma le fautuaga a Ieova le Atua. Ua faapea mai lana Afioga e te ‘selesele le mea e te luluina.’ (Kalatia 6:7) O le ā le mea ua faamaonia i nai sefulu o tausaga o le luluina o fatu o le tuu faasaoloto?
3, 4. O le ā le iʻuga ua oo i ai ona o le leai o se aʻoaʻiga tatau i le aiga, ma o le ā la ua fautuaina e le toatele?
3 Ua matuā lautele ona iloa le faulai ai o le lē usitai ma le solitulafono. O solitulafono a tamaiti e sili atu i le 50 pasene o soligatulafono mataʻutia i le tele o atunuu e lelei lo latou tamaoaiga. I nisi vaega o le lalolagi ua avea malae o aʻoga ma nofoaga o vevesiga i vasega, o fusuaga, o tauupuga ma upu leaga, o le faaleaga mea, fasi tagata, fao mea, sunui fale, gaoi, toso teine, faaaogaina o fualaau faasaina ma le fasioti tagata. Sa oo atu suesuega a se tasi fofoga fetalai mo se faalapotopotoga a ni faiaʻoga i se tasi atunuu tele i faafitauli tau aʻoaʻiga e faapea, talu ai ona ua le taulau ona paʻi atu le aʻoaʻiga a aʻoga i tamaiti i le tau amataga o o latou tausaga, ma tuuaia ai le leaga o fanau ua i ai nei i le faagasolo ina leaga i aiga atoa ma le lē naunau o matua e faataatia ni tulaga talafeagai ai mo amioga a a latou fanau. I le mafaufauina o le fesili ‘pe ai se a ua avea ai nisi tagata o se aiga ma ē solitulafono a e le faapena isi,’ fai mai le The Encyclopedia Britannica: “O faiga tau aʻoaʻiga faaleaiga atonu ua matuā vaivai, po o le mataʻutia tele, ia po o le lē fetaui lelei foi. Ua manatu se suesuega i Amerika o aʻoaʻiga lē lelei atonu ua fesootai lea ma le tusa ma le 70 pasene o tane solitulafono.”
4 O iʻuga ua oo i ai ua taʻitaʻiina atu ai i le toe suia o manatu o le toatele ma toe foi atu ai i le aʻoaʻiga.
O LE SASA O LE AʻOAʻIGA
5. O le ā le manatu o le Tusi Paia e uiga i le sasaina?
5 O le sasaina e ono avea ma faasao ola i se tama itiiti, auā ua fai mai le Afioga a le Atua: “Aua neʻi taofia le aoaiga i le tama; auā afai e te sasa ia te ia i se laau, e le oti o ia; e te sasa ia te ia i se laau, ona e laveaiina lea o lona agaga ai seoli [le tuugamau].” Ua toe faapea mai foi, “Ua fusifusia le valea i le loto o le tama; a e faateaeseina ai ia te ia i le sasa e aoai aʻi.” (Faataoto 23:13, 14; 22:15) Afai e pele i matua le ola o a latou fanau, o le a lē faavaivai pe faatalale i latou ma faamamulu atu ai le faagaoioia o le aʻoaʻiga mai o latou lima. O le alofa o le a uunaia i latou e faia gaoioiga ma le atamai ma le talafeagai pe a manaomia.
6. O le ā e aofia ai i se aʻoaʻiga?
6 E tusa ai ma le aʻoaʻiga lava ia, ua le faatapulaaina mai i le faasalaina. O le uiga faavae o le aʻoaʻiga, ‘o le faatonuina ma le aʻoaʻoina o loo taofi atu i se faasologa patino.’ O le mafuaaga lena ua fai mai ai le Faataoto 8:33, e lē faapea ‘ia lagona le aʻoaʻiga,’ ae peitai ia “faalogologo i mea e aʻoaʻo atu, ia outou popoto ai.” O le Kerisiano, e tusa ai ma 2 Timoteo 2:24, 25, e manaomia ona “ia agamalu i tagata uma, ia mafaia ona aʻoaʻo atu, ma le onosai, ia aʻoaʻo atu ma le agamalu i e o finau mai.” O le faaupuga “aʻoaʻo atu” i inei ua faaliliuina mai le upu Eleni mo le aʻoaʻiga. O le upu lava lea e tasi ua faaliliuina i le Eperu 12:9: “Sa tatou avatu le faaaloalo e tatau ai i tamā faalelalolagi o ē sa aʻoaʻi mai i a te i tatou; pe e le sili ea ona tatou usiusitai i lo tatou Tamā faaleagaga, ma maua ai le ola?”-New English Bible.
7. O ā aogā ua maua mai i aʻoaʻiga a matua?
7 O se matua e lē taulau ona saunia le aʻoaʻiga o le a na lē maua le faaaloaloga mai se tama itiiti, e pei lava ona lē maua e taʻitaʻi pule le faaaloalo mai tagatānuu pe a latou tuu ai pea le fai mea sesē e lē faasalaina. O le aʻoaʻiga, ua saʻo ona avatu, o le faamaoniga lea i se tama itiiti e popole ona matua i a te ia. E fesoasoani atu mo se aiga filemu, auā “e mulimuli ane e fua mai ai le fua o le amiotonu e manuia ai e ua aʻoaʻoina ai.” (Eperu 12:11) O tamaiti lē usiusitai ma lē pulea e avea ma pogai o le faaonoono i soo se aiga, ma o tamaiti faapena e lē maua lava e i latou le fiafia moni e oo lava i a i latou. “Ia e aoai i lou atalii, ona e maua ai lea se filemu; e tupu ai le fiafia i lou loto.” (Faataoto 29:17) A uma ni faasaʻoga mautu ma ua faia ma le alofa, e mafai ona maua e se tama itiiti se vaaiga fou ma se amataga fou ma e masani lava ona avea ai ma se aumea ua sili atu ona lelei. E moni lava o le aʻoaʻiga e maua mai ai “fua o le amiotonu.”
8. Pe e mafai faapefea e matua ona aʻoaʻi atu i le alofa?
8 “O le ua alofagia e [Ieova], ua aoai atu o ia ia te ia.”(Eperu 12:6) Ua faapena foi i le matua ua i ai moni i lona fatu mea e sili ona lelei mo lana fanau. O le aʻoaʻiga e tatau ona faia i le alofa. O le ita atonu o se mea masani pe a faateʻia se tasi i se mea sese ua faia e se tama itiiti, peitai e pei ona faaalia e le Tusi Paia e tatau i se tasi ona “ia onosai.” (2 Timoteo 2:24) A mavae ona toafilemu se tagata, atonu o le a foliga mai e lē telē naua se agasala faaletamaitiiti. “O le māfaufau o le tagata e faagesegese ai lona ita; o lona viiga foi lea, ina ua le manatua lona agaleagaina.” (Faataoto 19:11; ia tagaʻi foi i le Failauga 7:8, 9.) Atonu e i ai tulaga e le matuā mataʻutia tele: Atonu ua vaivai tele le tama itiiti pe o faamaʻimaʻi foi. Atonu pe ua galo nimo i a te ia se mea na poloaiina ai o ia; e faapena foi tagata matutua, a ea? Ae peitai e tusa lava po o ia mea sese ua faia e tatau ona lē galo, e lē tatau lava ona avea le aʻoaʻiga o se faapasaega lē pulea, po o se osofaiga faafuasei ua na faamatuuina atu ai le omia tau i faalogona ootia o se matua. O le aʻoaʻiga e aafia ai faatonuga, ma i le pasae aʻe o se ita ua aʻoaʻoina ai e se tama itiiti se lesona, e lē i le pulea o ia lava, ae i le leai o se pulea. O le faalogona o le naunau atu ua matauina e le tama itiiti i le aʻoaʻiga ua lelei le tuuina atu ua lē maua lea. O le paleni lelei la, e tāua tele ma e faatupuina ai le filemu.
FAATULAGAINA O TAPULAA MAUSALI
9. I le talafeagai ai ma le Faataoto 6:20-23, o le ā e tatau i matua ona saunia mo a latou fanau?
9 E tatau i matua ona saunia taʻiala mo a latou fanau. “Loʻu atalii e, ia e tausi i poloaiga a lou tamā; aua foi e te tuulafoaiina le upu e aʻoaʻo atu a lou tinā; ia fusi ai e le aunoa i lou loto; ia asoa ai i lou ua. A e savali, e taʻitaʻiina ai oe; a ē moe, e leoleoina ai oe; a ē ala, e tautala ai ma oe. Auā o le poloaiga o le sulu lea; ma le upu e aʻoaʻo atu, o le malamalama lea; o aoaiga foi e aʻoaʻoina ai, o le ala o le ola lea.” O nei poloaiga faamatua o le a taʻitaʻia ai ma puipuia ai le tama itiiti, ma ua atagia ai le naunau o matua mo le olaga solo lelei o le tama itiiti ma lona fiafiaga.—Faataoto 6:20-23.
10. O le ā le mea e ono mafai ona tupu mai pe a le taulau i matua ona aʻoaʻiina a latou fanau?
10 O se tamā e lē taulau i lenei tulaga o le a na amoina le tiute tauave mo iʻuga. Sa faatagaina e Eli o se faitaulaga sili i a Isaraelu anamua, ona atalii e faamalilieina o latou tuinanau i le mata peapea, le lē migao ma le amio leaga po o le faitaaga; sa na faaali atu sina tetee i a i laʻua ona o lenei mea peitai sa lei faia e ia ni gaoioiga moni e taofia ai lo la fai mea sese. Na fetalai le Atua: “Ua ou taʻutino atu ia te ia ou te faasala lona aiga e faavavau, ona o le pagota ua ia iloa; auā o ona atalii ua fai mea e fetuuina ai i laua, a ua ia le taofi ia te i laua.” (1 Samuelu 2:12-17, 22-25; 3:13) E faapena foi i se tinā, afai ua le taulau ona faia lona tiute, ona pagatia ai foi lea o ia i le maasiasi ma le taʻuvalea: “O le sasa ma le aoaiga e tupu ai le poto; a o le tama [po o le teine] ua tuulafoaiina, e tupu ai le mā o lona tinā.”—Faataoto 29:15.
11. Ai se ā e manaomia ai e le fanau le faataatitiaina o tapulaa mo i latou?”
11 E manaomia e fanau le faataatitiaina o ni tapulaa mo i latou. O le a lē toafilemu i latou e aunoa ma ia tapulaa. O le i ai o ia mea ma latou mulimuli ai e maua ai e le fanau le faalogona o i latou o se vaega o se faapotopotoga; e auai i latou i lea faapotopotoga ma e talia foi e lea lava faapotopotoga, auā ua latou faafetauia i latou i ona tulaga moomia. O le tuufauina, o le lafoaiina lea o tamaiti ma tuua ai i latou e tauivi ma tautevateva solo i a i latou lava. O le iʻuga ua faaalia ai e manaomia e tamaiti tagata matutua o ē o loo i ai talitonuga maumaututu e uiga i tapulaa, ma o ē o le a latou tuufaasoloina atu nei tapulaa. E manaomia e fanau ona aloaia o loo i ai tapulaa mo tagata taitoatasi uma i luga o le lalolagi ma o lenei tulaga e iʻu lava i le fiafiaga totino ma le lelei. E faatoa ona olioli lava i le saolotoga pe a aloaia e isi lo tatou tulaga saoloto ma tatou aloaia foi lo latou tulaga saoloto. O le sopo atu i tapulaa tatau o lona uiga moni, o lē ua na faia le sese ua oo atu ‘i le tulaga o lona faaleagaina, ma laasia ai aiā a lona uso.’—1 Tesalonia 4:6.
12. Ai se ā ua tāua ai le aʻoaʻia e le tagata o ia lava, ma pe e ono mafai faapefea ona fesoasoani matua i a latou fanau ia atiina aʻe lea lava tulaga?
12 Afai e iloa e fanau o le faasagatau i tapulaa tatau e aumaia ai se aʻoaʻiga ua fetaui i ai, o le a oo la ina latou aloaia o latou lava tapulaa, ma ala atu i le taʻiala maumaututu faamatua, o le a latou faatupuina aʻe le aʻoaʻiga o i latou lava o loo manaomia mo le olaina aʻe o se olaga faamalie loto. A lē o le aʻoaʻiina o i tatou mai i totonu, o le aʻoaʻiina i tatou e se puna mai fafo. (1 Korinito 9:25, 27) Afai tatou te atiina aʻe le aʻoaʻiga mai i totonu ma fesoasoani ai i a tatou fanau ia fai le mea lava lea e tasi, o le a sili atu la ona fiafia o tatou olaga ma i latou, ma e sili atu ai ona saoloto mai faalavelave ma le faatiga loto.
13. O ā nisi o mea tāua e tatau ona teuina i mafaufau o matua pe a faataatitiaina taʻiala mo a latou fanau?
13 O taʻiala ma tapulaa mo fanau e tatau lava ona manino lelei i a i latou, ia fetaui lelei, ma ia lava foi le faapalepale. Ia aua neʻi faatalitalia ni mea se tele naua po o se laitiiti tele foi. Ia manatua lo latou matutua ua i ai, auā o le a latou gaoioi ia talafeagai ai. Aua neʻi faatalitalia i latou e fai ma tagata matutua laiti. Fai mai le aposetolo a o tama itiiti o ia, sa gaoioi o ia e pei o se tama itiiti. (1 Korinito 13:11) Peitai a faavaeina loa ni tulafono tatau, ma malamalama i ai lau fanau, ia faamalosia loa lava ma ia maumauai: “Ia faapea la outou upu, Ioe, ioe; E leai, e leai.” (Mataio 5:37) E talisapaia moni e fanau, matua o ē taofi mau atu i a latou upu, o ē e maumauai ma matauina mea e ono tutupu mai, auā o le a latou iloa ai le malosi o a latou matua o loo lagolagoina ai i latou ma latou lagona ai e mafai ona latou faalagolago i ai pe a oo mai faalavelave ma latou manaomia le fesoasoani. Afai e fuafua tatau o latou matua ma faamaoni i le faasaʻoina o mea sese ua faia, o le a avatuina ai i le fanau se faalogona o le saogalemu ma le mautu. E fia iloa e fanau po o fea o latou tutū ai, ma o matua faapena, ua latou iloaina foi.
14. Ai se ā e tāua ai le tutumau pe a le talia e tamaiti faatonuga mai i o latou matua?
14 E manaomia se lotomau i le itu a matua ia faaalia ai le tutumau pe afai e tetee se tama itiiti i le usiusitai atu i se faatonuga faamatua. O nisi matua o le a latou liliu atu loa i le tau faafefe i se faasalaga e ono oo i ai, o le a auai i ni finauga lē aogā ma le tama itiiti po o le liliu atu foi i le faaoleoleina o le tama itiiti ia faia le mea na la faatonuina atu e fai. Pau lava le mea e masani ona manaomia o le na o le tu mausali lea ma taʻu atu i le tama itiiti, ma le talitonuga atoa, e tatau ona ia faia le mea na faatonuina ma ia faia loa lava i le taimi nei. Afai o le a toeitiiti laa atu se tama itiiti i luma o se taavale o loo sau, o le a taʻu atu e matua le mea e tatau ona fai i ni faaupuga lē fealofaia. E pei ona faasino mai e nisi tagata latou te suesue i lenei mataupu: “Toeitiiti lava o matua uma ua latou aauina atu a latou fanau i aʻoga, . . . ia fufulu o latou nifo, aua neʻi o i le taualuga o le fale, ia o e taeele ma tulaga uma faapena. E masani ona teena e tamaiti. Peitai latou te faia lava, auā ua latou iloa lelei o loo mananao moni i ai matua.” E mafai ona e faatalitalia lau fanau ia ‘fusia au taʻiala ma au poloaiga i o latou loto’ pe afai o le a e faamalosia ma le maumauai.—Faataoto 6:21.
15. A lē maumauai matua i le faamalosia o taʻiala, pe e ono afaina faapefea le fanau?
15 Afai o le a faamalosia faafuasei ma le ita e matua taʻiala e tusa ai ma le manaoga ua i ai i lea taimi, pe ona ua tuai ona avatuina le aʻoaʻiga mo le lē usiusitai, o le a faamaaaina tamaiti ma solia ni poloaiga sei iloa ai pe o le ā le mamao latou te faia ai ma po o le ā foi le tele o mea latou te faia a e le faasalaina. A foliga mai ua faatuai le faasalaga, o le a pei tamaiti o tagata matutua i le faamalosia e fai mea sese. “Auā ua le vave faaootia le sala i le amio leaga, o le mea lea ua matuā naunau ai loto o tagata e fai me leaga.” (Failauga 8:11) O lea, ia tautala i le mea moni o e manatu ai ma ia manatu moni i le mea o loo e tautala ai. Ona iloa ai lea e lau tama o le tulaga lena e tatau ona i ai ma o le a na matauina e leai se aoga o le faasiasia, le finauvale, po o le gaoioi foi peiseai ua manatu o ia ua e saua tele ma lē alofa.
16. Ina ia alo ese mai le avatuina o poloaiga lē fetaui, o le ā le mea e tatau i matua ona faia?
16 O lenei tulaga e manaomia ai muamua ona mafaufau a o lei tautala. O tulafono po o poloaiga faia faatopetope e masani lava ona lē sologa lelei. “Ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.” (Iakopo 1:19) Afai e le fetaui lelei ma maumauai le aʻoaʻiga, o le a faaleagaina le lagona faalenatura o le faamasino tonu o loo i ai i fanau, ma o le a tuputupu aʻe ai le lē fiafia.
IA PULEA FAAFIAFIAGA
17. O le ā le vaaiga i galuega ma taalogo e tatau i tamaiti ona talisapaia?
17 O le taalo o se vaega masani i le olaga o se tama itiiti. (Sakaria 8:5) E tatau i matua ona aloaia lea tulaga, a o faagasolo ona faauluina atu i le olaga o se tama itiiti se talisapaia o galuega ma le lagona e uiga i tiute tauave. E tusa lava la po o le ā se tiute e ono tuuina atu i le tama itiiti, o le a sili ona faamuamua lea, ae tulaga lua ai le taaloga.
18. O ā auga e mafai i aumea ona aumaia i fanau?
18 O nisi tamaiti ua avea ma “tamaiti o le auala” po o ni tagata ese i le aiga talu ai le sailia o faafiafiaga i nisi mea. A lē lelei mafutaga, o le a lē lelei foi ona auga. (1 Korinito 15:33) O nisi mafutaga i fafo atu o le aiga e moni lava e aogā i le tama itiiti ina ia mafai ai ona atiina aʻe se faalauteleina o lona malamalamaga i tagata. Peitai afai o le a tele naua le mafutaga i fafo atu pe tuua foi e lē pulea, o le a oo la ina faavaivaiina le liʻo faaleaiga po o le matuā malepelepe lava.
19. O ā ni mea atonu e autaluina e matua ia iloa ai pe o latou faia le aiga o se nofoaga fiafia mo a latou fanau?
19 Faatasi ai ma le aʻoaʻiga ua latou avatuina ia faasaʻoina ai lenei mea, e ono mafai foi ona fesili matua i a i latou lava po o le ā le mea atonu e mafai ona latou faia ina ia avea ai le aiga ma nofoaga e sili ona fiafia i ai le fanau; pe o lava le taimi o latou faaaluina ma i latou, e le gata i le na ona aʻoaʻoina po o le aʻoaʻiina, a e faapea foi i le avea ma aumea ma uo moni i a latou fanau. Pe e masani ea ona e “pisi tele” e faaaluina se taimi ma lau fanau, e taaalo ma i latou? A misia nei tulaga, o avanoa mo le faia o mea faatasi ma se tama itiiti o le a lē toe maua mai. O le taimi, e tasi lava lona itulagi, ma e lē tumau le tama itiiti i se mea e tasi a e tuputupu aʻe pea ma fesuisuiai. E tuanai atu tausaga, ma e ui lava ina foliga mai e pei o ananafi sa avea ai lau tama ma pepe ma aʻoaʻo ia savali, e teʻi lava ua e manatu atu ua avea o ia ma taulealea, ma faapea foi i lau teine laitiiti ona faaliliu atu ua avea ma tamaitai talavou. Na o lou faatumauina lava o le paleni lelei ma le aʻoaʻiga e oe lava o lou lava faaaogaina o le taimi, o le a e mafai ai ona alofia le faatosina ese mai avanoa o loo ofoina mai i lenei vaitaimi tāua tele—po o le taofia ai foi o lou vaai atu i lau fanau ua fai atu ma oe a o i ai pea i o latou tausaga amata.
20, 21. Afai e i ai se televise i le aiga, o le ā le tiute tauave e tatau ona tagofia e matua, ma ai se ā?
20 Afai o le televise o le puna taatele lea o faafiafiaga, atonu e manaomia le faatapulaaina o lona faaaogaina. Ua faaaogaina e nisi matua le TV e fai ma tausi tama. Atonu e faigofie lea ma foliga mai e taugofie; peitai e mafai ona faamaonia e taugata tele. O polokalama o televise ua masani lava ona fefiloi ma faiga saua ma gaoioiga lē mamā i le va o tane ma fafine. O le manatu ua aumaia ai o faiga saua o se auala lea ua talia e foia ai faafitauli; o faiga faaituaiga e lē faatagaina ua aliaʻi mai o se vaega ua talia o le olaga i lea aso ma lea aso. Ua faaalia i le tele o suesuega e mafai e lenei mea ona faaitiitia ai faalogona o se tasi i nei faiga, ae maise lava tagata talavou. E te manatu mamafa e uiga i le taumafa o lau fanau i mea ʻai e maua ai le soifua maloloina ma e lē o faaleagaina. E tatau ona sili atu lou naunau e uiga i mea o loo fafagaina ai o latou mafaufau. E pei ona faaalia e Iesu, e le oo mea e ʻai i o tatou fatu, peitai o mea tatou te aveina i o tatou mafaufau e ono ulu atu i o tatou fatu.—Mareko 7:18-23.
21 O le pulea o ituaiga o polokalama e matamata ai ma le tele o le taimi e faaaluina i luma o le TV e mafai ona faia se eseesega tele i le atiina aʻe o se tama itiiti. E mafai ona aumaia e televise ni faafiafiaga matagofie e oo lava i ni aʻoaʻoga, ma faaalu ai se taimi tele. O le taimi, o le ola lea, ma o se vaega o lena taimi e mafai ona faaaluina i isi auala e sili atu ona aogā. Ua ala ona faapea ona ua suia e le televise le faia o mea i le na o le vaai. Ua le gata ina aveesea ai galuega faaletino, a e faapea foi i le faitau tusi ma talanoaga. E manaomia e se aiga fesootaiga ma faatasitasiga, ma o le a lē faamalieina i le na o le nonofo faatasi ma le filemu i le potu e tasi ma matamata i le televise. I le avea o le matamata umi i le TV ma faafitauli, e mafai e matua ona atiina aʻe i a latou fanau se talisapaia o isi gaoioiga e suitulaga i le televise—e i ai taaloga e lelei mo le soifua maloloina, o le faitau tusi, galuega faaleaiga—ae maise lava pe afai o matua lava e taʻimua ma faataatia le faaaʻoaʻoga.
A E AʻOAʻI ATU, IA TALATALANOA!
22. Ai se ā ua tāua ai mo tamaiti le malamalama i upu o loo faaaogaina e o latou matua?
22 Sa faamatalaina e se tasi matua le mea lenei na tupu:
“Ina ua faatoa tolu tausaga le matua o laʻu tama, sa ou avatu i a te ia se aʻoaʻoga tele e uiga i le pepelo, ma le inoino o le Atua i tagata pepelo, sa ou faaaogaina le Faataoto 6:16-19 ma isi mau. Sa faalogologo ma sa foliga mai ua na aumaia tali saʻo. Peitai, sa i a te aʻu se lagona na te lei maua le manatu. O lea sa ou fesili i ai, ‘Atalii, pe e te iloa o le ā le pepelo?’ Fai mai a ia, ‘Leai.’ Ina ua mavae lena taimi sa masani loa ona ou faia ia mautinoa ua iloa lelei e ia le uiga o upu ma le mafuaaga ua aʻoaʻiina ai o ia.”
23. O le ā atonu e aafia ai i le fesoasoani atu i tamaiti ia iloa le saʻo o se gaoioiga faapitoa?
23 A o laiti pea tamaiti, atonu o le a na ona faalala atu lima o matua i fanau e faapea “aua—aua,” e pei o le paʻi atu i se ogaumu aasa. Peitai e oo lava i na uluai lapataiga faigofie, e mafai lava ona avatu mafuaaga. Atonu na ona faapea atu lava e “vevela!” le ogaumu ma a paʻi i ai ua “mu!” E ui i lea, mai le amataga lava ia tuu i luma o le tama itiiti le mataupu silisili o le mea o loo aafia ai e mo lona lava lelei; ona faamamafaina ai lea o le manaomia o uiga e pei o le agalelei, le magafagafa ma le alofa. Fesoasoani i le tama itiiti ia talisapaia o nei uiga ua avea ma faavae ia o manaoga saʻo uma po o mea e faasaina. E le gata i lea, ia faamamafa atu pe ai se ā i isi o amioga ua faatinoina ai, po o le lē faatinoina ai foi o nei uiga moomia. Afai ua faia lenei mea ma le maumauai, atonu o le a mafai ona e oo atu e le gata i le mafaufau o le tama itiiti a e faapea foi ma lona fatu.—Mataio 7:12; Roma 13:10.
24. Ai se ā ua tāua ai mo se tama itiiti ona ava i le pule?
24 I le uiga lava e tasi, o le manaoga mo le usiusitai ma le ava i le pule e tatau ona aʻoaʻoina faasolosolo lelei. I totonu o le tausaga muamua o le olaga, o le a amata ai ona faaalia mai le naunau po o le lē naunau o le tama e tali atu i faatonuga a tagata matutua. A oo loa lava ina mafai e le mafaufau ati aʻe o le tama itiiti ona talia lenei mea, ia faamamafa i a te ia le talisapaia o le avega tauave a matua i le Atua. E mafai e lenei mea ona faia se eseesega tele i le tali atu a le tama itiiti. A e aunoa ma lenei mea, atonu o le a vaai tamaiti i le usiusitai o se mea e pau lava le auala latou te faia ai ona o o latou matua e lapopoa ma malolosi atu i a i latou. Ae afai e fesoasoani i le tama itiiti ia iloa e le o avatua e matua o laʻua lava manatu, ae o loo avatuina i le tama itiiti le mea o fetalai mai ai Le na Foafoaina mea, le mea ua fai mai ai lana Afioga, o lea tulaga o le a avatu ai se malosi i le fautuaga a matua ma lo la faatonutonuga e lē mafaia e se isi lava mea. E mafai ona avea ma puna moni o le malosi moomia pe a amata ona aliali mai ni tulaga lē lelei i le olaga muʻamuʻa o se tama itiiti po o se teine ma ua amata foi e ia ona faalogoa le malosi ma le faigata o le pipii atu i mataupu silisili saʻo i le feagai ai ma faaosoosoga po o omiga.—Salamo 119:109-111; Faataoto 6:20-22.
25. Pe e ono mafai faapefea ona fesoasoani le fautuaga i le Faataoto 17:9 i matua ia aʻoaʻiina a latou fanau i le auala saʻo?
25 “O le ua ufiufi le soliga o le tulafono, na te sailia le alofa; a o le ua toe taʻu le mea, na te faateaeseina uo.” (Faataoto 17:9) Ua moni foi lenei mea i le va feagai ai o matua ma fanau. A faailoa atu loa i se tama itiiti lana mea sese ma malamalama i le mafuaaga ua na manaomia ai le aʻoaʻiga, ma ua avatuina foi le aʻoaʻiga, o le alofa e tatau ona uunaia ai matua ia alo ese ma le saga faamanatuina o le agasala po o le mea sese. Po o le ā lava le mea na faia ia mautinoa ua e faamanino lelei o le mea e te inoino i ai o le sese, a e lē o le tama itiiti ia. (Iuta 23) Atonu e manatu le tama itiiti ua ‘taunuu lona faasalaga’ ma e ono manatu o ia o le taʻua soo o le mea na tupu o se faamaasiasi e lē o toe manaomia mo ia. E mafai ona iʻu ai i sona faatagataesea mai matua po o isi tamaiti o le aiga. Afai ua popole le matua ona ua tuputupu aʻe se ala sese, e tatau la ona taulimaina lenei mataupu i se taimi mulimuli ane i ni talanoaga faaleaiga. Aua le na ona toe taʻua po o le na ona toe autaluina o gaoioiga ua teʻa, ae peitai ia manatunatu i mataupu silisili o aafia ai, pe faapefea ona faatatauina ma pe ai se ā ua tāua tele ai mo le fiafiaga tumau.
AUALA ESEESE E AʻOAʻI AI
26. Ai se ā ua lē tali atu ai tamaiti uma i se auala moomia i le ituaiga o aʻoaʻiga e tasi?
26 “E sili ona ogoogo o le aoaiga i le tagata mafaufau, i ta e selau i le vale.” (Faataoto 17:10) E eseese tamaiti, atonu e manaomia foi le eseese o aʻoaʻiga. E tatau ona mafaufauina uiga faapitoa o tamaiti taitoatasi ma tulaga tau le mafaufau ma le amio a tamaiti taitoatasi. O se tasi tama itiiti atonu e matuā teʻiteʻi gofie tele, ma o le faasalaga faaletino e pei o le sasaina atonu o le a lē tatau ona faia i taimi uma lava. Ae i se isi tama itiiti o le sasaina atonu e aoga tele. Pe atonu foi e pei se tama itiiti o le auauna o loo faamatalaina i le Faataoto 29:19, ia lea, ‘e le mafai ona aʻoaʻiina i upu, auā ua lagona e ia a e le tali atu i ai.’ I se tulaga faapena o le a manaomia ai e se tama itiiti le sasaina o le tino.
27. Pe sa faapefea ona fesoasoani se tasi tamā i lona atalii laitiiti ia taofi le tusitusi i le puipui o le fale?
27 Ua lipotia mai faapenei e se tasi tinā:
“Toeitiiti lava atoa le lua tausaga o laʻu tama ina ua ia tusitusia ni mea i le puipui o le fale—o ni nai togi mumu laiti e le mamao mai le fola. Sa faaali atu e lona tamā i a te ia nei mea ma fesiligia e uiga i ai. Pau le mea na ia mauaina o se faatausisila mai ma mata tetelē, e lē o se Ioe po o se Leai. Mulimuli ane sa faapea atu lona tamā, ‘E te iloa atalii, i le taimi sa pei ai loʻu matua o oe sa ou tusitusi ai i le puipui o le fale. E malie tele le faia faapena, a ea?’ Ia, o le taimi lena ua mou atu ai loa le popole o le tama itiiti, ua ataata mai ona foliga, ma sa ia amataina loa se talanoaga ola ma le mataalia e uiga i le manaia ma lona fiafia na maua mai ai. Sa na iloa ua malamalama lona tamā! E ui i lea sa faamatala atu e ui lava o se mea e fiafia ai, ae o puipui o le fale ua lē o le mea e tusitusi ai. Sa faavaeina loa fesootaiga, ma mo lenei tama itiiti ua na o ni nai faamalamalaga ese laiti o le mea sa manaomia.”
28. Pe e ono mafai faapefea e se matua ona alo ese mai le finau ma se tama itiiti?
28 A o aʻoaʻiina, o le avatua o mafuaaga ina ia aʻoaʻoina ma faatonu ai e lelei, peitai ua le masani ai ona fautuaina le finau ma se tama itiiti. Ina ua finau atu lana tama e tusa ma le faia o se galuega, pau lava le faamatalaga a se tasi tinā: “A uma ona e faia, ona ta o lea i le malae taalo,” ma o se faiga lelei lena mo lea tama itiiti i lena aso. E i ai nisi faafiafiaga po o ni tafaoga e taofia seia oo ina maea le galuega na faatonuina. Afai e alu atu o ia e siaki ma maua atu e lei uma lava le galuega, o le a fai atu o ia, “Oi, e lei uma lava? Ia e alu pe a uma.” E lei finau le tinā, peitai sa maua iʻuga sa manaomia.
29. O le ā e ono mafai ona faia ia lagona ai e se tama itiiti taunuuga le moomia o lana mea sese ua fai?
29 O le lagonaina o taunuuga lē manaomia o gaoioiga sese e mafai ona fesoasoani i fanau ia aʻoaʻina le atamai o mataupu silisili. Pe ua faaotaotā ea se tama itiiti? Atonu o le tuu atu na te faamamāina e ia lava o le a sili atu ona aoga mo ia. Pe ua lē tatau ma lē mafaufau o ia? O le aʻoaʻoina ia faatoese atonu o le a sili ona lelei mo le faasaʻoina o se sese ua tau agaʻi atu i ai. Atonu na te talepeina se mea i le taimi o le ita. Afai ua lava lona matua, atonu o le a manaomia lona galue mo se tupe e toe sui ai se mea na faaleagaina. I nisi tamaiti, o le faafitia mai i a i latou o nisi faaeaga mo sina taimi atonu o le a na moliooina le aʻoaʻoga moomia. I totonu o le faapotopotoga Kerisiano, o le taofia mai o le auau faatasi faaleuo o se auala lea e faaaogaina ia maasiasi ai nisi o e fai mea sese. (2 Tesalonia 3:6, 14, 15) I tagata laiti, o le faasaina mo sina taimi lē tumau mai le fegalegaleaiga faaleaiga e mafai ona aoga tele atu na i lo le sasaina. E ui i lea, o faiga e matuā sili ona mamafa e pei o le taofia o le tama itiiti i fafo o le fale, ua sili mamao atu na i lo le alofa. E tusa lava po o le ā le auala e faaaogaina, e manaomia e tamaiti le faaali atu i ai e tatau lava ona latou tauamoina tulaga o le a oo mai ona o a latou amioga. O lenei tulaga o le a aʻoaʻoina ai i latou e tusa ai ma avega tauave.
AʻOAʻIINA I LE ALOFA
30. Ai se ā e tāua ai le paleni pe a faatulagaina e matua taʻiala mo a latou fanau?
30 “Ina ia masino ia te outou mea uiga eseese (po o mea e sili ona tāua),” ma teuina ai i le mafaufau “o le poto mai lugā e . . . agamalu.” (Filipi 1:10; Iakopo 3:17) Ia manatua o tamaiti laiti o faaputuputuga o malosiaga o loo saili ia matala atu, ma o loo galala i latou i le fia iloa ma mauaina ma faataʻitaʻia foi mea fou. I le faatulagaina atu o tapulaa ma taʻiala, ia faaalia le fuafua lelei ma le iloilo tatau. E i ai se tulaga paleni e tatau ona iloa i le va o le mea ua alagā tatau ma le mea e lē alagā tatau. Ina ua uma ona faailoaina tapulaa, na i lo le taumafai ia pulea gaoioiga ninii uma, tuu atu i le tama itiiti ia olioli i le saolotoga e fealuai ai ma le mautinoa i totonu lava o ia tapulaa. (Faataoto 4:11, 12) A le faia faapena e oo ina matua faaonoono tele ma lotovaivai ai lau tama, ma o le a e iloaina ua faavaivaia foi oe i le manatu mamafa i mea e faaleai so latou tāua;—Kolose 3:21.
31. O le ā le faaaʻoaʻoga ua faataatia e Ieova le Atua i le avatuina o le aʻoaʻiga?
31 O lea, matua e, “Aoai atu i lou atalii [po o lou afafine], manū o fai sou faamoemoe.” Peitai ia faia i le auala a le Atua i le alofa. Ia faaaʻoaʻo i a te Ia: “Auā o le ua alofagia e Ieova, e aoaiina o ia e ia; e pei o le tamā ona aoaiina o lona atalii ua ia fiafia i ai.” Ia faia lau aʻoaʻiga ia aoga ma ia alofa e pei o Le na Foafoaina oe, auā “o aoaiga foi e aʻoaʻoina ai, o le ala o le ola lea.”—Faataoto 19:18; 3:12; 6:23.
[Fesili mo le Suʻesuʻega]
