Mataupu 7

O Le i Ai o Se Fanau—O Se Avega Tauave ma Se Taui

1-4. (a) O ā nisi o mea ofoofogia e uiga i le faatupuina aʻe o se pepe i le manava? (e) Pe faapefea e le poto e uiga i nei mea ona fesoasoani i a te oe e talisapaia le Salamo 127:3?

O le aumaia o fanau o se faamoemoega e le gata ina matagofie a e tāua ma mamalu. E moni lava, o se mea ua tupu pea i aso uma i le fanau a tagata. Peitai o fanauga taitasi uma o le iʻuga lea o ni taualumaga felavelaveaʻi ofoofogia. A tatou malamalama i sina mea e uiga i nei mea o le a sili atu la ona tatou talisapaia o le mafuaaga na uunaia ai le fai salamo faagaeeina e fai mai faapea: “Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia.” (Salamo 127:3) Ia mafaufau i le mea e tupu.

² E soofaatasia le sela faafanau tama mai le tane ma le fua sela i se fafine. Ona avea ai lea o nei sela e lua ma sela e tasi, ma amata loa i le tasi ona vaevaeina. O le a oo ina lua, ona oo lea ina avea le lua ma fa, avea le fa ma valu, ma faasolosolo ai lava seia oo ina avea nei sela ma tagata, ua tupu aʻe ma matua e tusa ma le 60,000,000,000,000 sela! I le taimi amata sa tutusa uma lava sela fou, ona sosoo ai lea ma lo latou suia i ituaiga eseese—o sela ponaivi, sela maso, sela o neura, sela o le ate, sela o mata, sela o le paʻu, ma faapena ai lava.

³ O nisi o tulaga faalilolilo o le toe faia aʻe i latou lava o i latou ma le eseesega ua mauaina o latou mafuaaga, peitai o le tele e lei iloa lava. O le ā ua na faia le uluai sela ia vaevaeina? A o faaauau le vaevaeina, o le ā ua faia sela ia suia i ituaiga eseese? O le ā ua faia nei  ituaiga eseese e faaputuputu faatasi i foliga faapitoa, lapopoa ma a latou galuega, ma ia avea ai ma ate, ma isu, ma tamatamaʻi vae? O nei suiga e amata ona uia i taimi ua atofaina. O le ā na te pulea le faagasologa? E le gata i lea o lenei afuafua tuputupu aʻe i le manava o le tinā o se tino o loo i ai lona foliga ma lona amataga e ese mai lava i le tinā. O le uiga masani o le tino o le tinā, o le teena lea o le faapulupuluina e se mea ese e pei o se paʻu o se isi tagata po o se totoga ua siitia mai i isi tagata. Ai se ā na te lē teena ai lenei afuafua o loo amata ai ona tuputupu aʻe o ia, na i lona fafagaina o ia mo le vaitaimi e tusa ma le 280 aso?

⁴ O nei galuega ofoofogia uma e faagasolo lelei ona faia auā ua faapolokalamaina e Ieova le Atua i latou i le sela e tasi ua fausia aʻe e le sela faafanau tama ma le fua. Ua faasino mai e le fai salamo lenei mea ina o fai atu i Le na Foafoaina mea: “Na silasila mai ou fofoga i oʻu tino uma ina o afuafua; ua tusia foi uma lava i lau tusi, o ona aso foi na faia ai, a o leai ni oʻu tino.”—Salamo 139:16.

O LE TUPUTUPU AʻE MA LE FANAUGA

5-8. I le va o lona fa o vaiaso o le maʻitaga ma le fanau mai o le pepe, o ā nisi o mea e tutupu i totonu o le manava?

⁵ E vave tele le tuputupu aʻe o le tino afuafua. E oo ane i lona fa o vaiaso ua i ai se faiʻai, se faiga e pulea ai neura, atoa ma se tulaga e faafetafeaʻi ai le toto i se pamu i le fatu e auala atu i alātoto ua uma foi ona faataootoina. E fausia mai le toto mai se mea faasuāvaia i totonu o se mea e pei o se taga mo le ono vaiaso; ona faaauauina ai lea e le ate o lenei galuega, lea e mulimuli ane ona tauaveina e aano o ivi. I lona lima o vaiaso e amata ai ona faatutupuina lima ma vae; i le isi tolu vaiaso e aliali mai ai tamatamaʻi lima ma tamatamaʻi vae. E oo ane i le fitu vaiaso ua tulaga mai vaega tetele o maso, faatasi ai ma mata, taliga, isu ma le gutu.

⁶ I le faaauauina o le tautala a le fai salamo i a Ieova  le Atua, fai mai a ia: “E lei lilo loʻu tino (po o ivi) ia te oe, ina ua faia aʻu i le mea lilo.” (Salamo 139:15) I lona iva o vaiaso e liua ai e avea ma ponaivi se afuafua e pei e memeʻi a o fau aʻe le auivi, ma ua oo nai ina taʻua le pepe o tuputupu aʻe, o se pepe meamea e lei fanau mai, a ua lē toe o se afuafua. “Auā sa faia e oe lava oʻu fatu gaʻo.” (Salamo 139:13, NW) O taualumaga tau atua o loo pulea ai lenei mea e tupu mai lea i lona fa o masina ma ua avea nei fatu gaʻo ma mea e auala atu ai ma faamamā ai le toto.

⁷ E oo ane i lea taimi ua gaoioi ma femilosaʻi le pepe, ua faamimini ona tamatamaʻi lima ma ona tamatamaʻi vae pe a faalogoina le matenatena manaia o ona alofilima po o alofivae. Na te uuina mea i lona tamaʻilima ma le lima matua, ma e susuina foi lona lima matua, ma i lea tulaga o le a faamasani ai ona maso e mulimuli ane faaaogaina i le fafagaina o ia mai susu o lona tinā. Na te toomaunu ma e faalogoina e le tinā le gaoioi. E oo atu i le ono masina ua toeitiiti lava maʻea le tele o totoga. Ua matala pu isu, ua aliali mai ona fulufulu mata, ma ua le o toe umi a e pupula mata, ma o le a galulue foi taliga, e tusa lava la pe o i totonu o le manava, e mafai ona teʻi le pepe i ni paʻō tetele.

⁸ I le 40 o vaiaso, o le a amata loa ona faatigā. Ua faamimini nei maso o le faaautagata o le tinā ma ua i ai nei le pepe i lona auala atu i fafo i le lalolagi. A o i ai i lenei gasologa, e masani lava ona omia lona ulu ma sapasapa ai, peitai, talu ai ona e lei pipii faatasi ponaivi o lona ulupoo, o lea o le a toe memei atu ai le ulu i lona tulaga e masani ai pe a uma ona fanau mai. Seia oo mai i le taimi nei, ua faia e le tinā mea uma mo le pepe: ua saunia le okesene, mea ʻai, le puipuiga, le faamafanafanaina atoa foi ma le aumaia i fafo o le otaota vale. Ua tatau nei la i le pepe ona galue faavave mo ia lava, a leai o le a oti.

9. Ina ia mafai e se pepe ona ola i fafo o le manava, o ā suiga e tatau ona vave ona faia?

⁹ E tatau loa lava ona amata ona manava ina ia  mafai ai e māmā ona tuuina atu le okesene i le toto. Peitai ina ia faia lenei mea, e i ai se isi faaliliuga faigata tele e tatau ona faia loa lava: e tatau ona suia le auala o le toto fetafeaʻi! A o i ai pea le pepe meamea i le manava, e i ai se pu sa i le puipui o lona fatu. O lea puipui e vavaeeseina ai le itu taumatau ma le itu tauagavale ma taofia ai le tele o le toto o le pepe mai lona alu atu i māmā. Ae o le toto o loo mafai ona alu atu, e i ai se avanoa telē ua tafe ese ai le toto mai le agaʻi atu i māmā. I le manava na o le tusa ma le 10 pasene o le toto e ui atu i māmā; ae a uma ona fanau mai e tatau la i le toto uma ona ui i māmā, ma ia faia loa lava! Ina ia mafaia lea mea, i le na o ni nai sekone talu le fanauga, o le avanoa tele lea sa tafe ese atu ai le toto ma lē oo ai i māmā, ua pipii faatasi nei ma o le toto la sa tafe atu i ai ua alu atu nei i māmā. A o le taimi foi lea ua mapuni ai le pu sa i le puipui o le fatu, ma o le toto uma ua pamuina mai i le itu taumatau o le fatu ua alu atu nei i māmā ina ia fafagaina i le okesene. E manava le pepe, ona faaokeseneina lea o le toto, e ofoofogia fesuiaiga na faia ma ua ola le pepe! E pei lava ona aoteleina ma le matagofie e le fai salamo faagaeeina: “Na e ufiufi ia te au i le manava o loʻu tinā. Ou te vivii atu ia te oe, auā na faia aʻu e ala ai ona matautia ma ofo tele ai.”—Salamo 139:13, 14.

10. I le mafaufau atu i le tuputupu aʻe ma le ofoofogia o se pepe i le manava, pe faapefea le faalogona e tatau ona i ai i matua e uiga i a la fanau?

¹⁰ Maeu se agaga ootia e tatau ona manatu ai ulugalii faaipoipoina i lenei mea alofa mai i a Ieova! O le mana ua aumaia ai lenei tagata ola, se tama itiiti o se vaega o i laʻua uma, ae e ese mai i a i laʻua uma! E moni lava, “o le tofi lea mai ia Ieova”!

TAUSIA O LE “TOFI”

11. O ā fesili e tatau i ē ua mafaufau e amataina se aiga ona fesili ai i a i latou lava, ma ai se ā?

¹¹ E sili atu i le tulaga tau amio na mafua ai ona faavaeina e Ieova le Atua le tulafono e faamutaina  ai feusuaiga faaulugalii i paaga faaipoipoina. Sa i ai foi i lona finagalo e uiga i le aumaia o ni fanau. E manaomia uma e se tama itiiti se tamā ma se tinā e fealofani ma o ē o le a alolofa ma faapelepele i la la tama. E manaomia e se tama itiiti fou faatoa fanau mai le mafana ma le saogalemu o se aiga, faatasi ma se tamā ma se tinā e mananao i a te ia ma saunia mea e manaomia mo lona tuputupu aʻe ma lona atiina aʻe faaletagata. O se tane ma se avā o loo mafaufau e maua se la pepe, e tatau ona fesili i a i laʻua lava: Pe ta te mananao ea i se pepe? Pe ta te maua ea mea na te manaomia—e le gata i le faaletino a e faapea foi i manaoga mo faalogona ootia ma le faaleagaga? Pe o le a ta aʻoaʻoina lelei o ia, ma faataatia se faaaʻoaʻoga saʻo mo ia e mulimuli ai? Pe ua ta malilie ea e talia avega tauave ua aumaia i le avea ma matua, ma talia taulaga e aafia ai? I le avea o ni tamaiti atonu e foliga mai i a i tatou sa saisaitia tele tatou e tatou matua, peitai ina ua avea tatou ma matua ua tatou iloa ai le tele naunau o le taimi e faaalu ai i le tausia aʻe o fanau. Peitai faatasi ma le avega tauave o le avea ma matua, e mafai foi ona aumaia ai le olioli tele.

12-14. A maua loa lava se fafine i le maʻitaga, pe e mafai faapefea ona fesoasoani atu o ia agaʻi i le atiina aʻe o se pepe soifua maloloina lelei i (a) ana mea ʻai? (e) le mea na te faia e uiga i le ava malosi, tapaa, vailaau? (i) le pulea o ona faalogona ootia?

¹² Ua uma ona faia le faaiʻuga—e tusa lava pe o matua po o tulaga tau uluai amataga o le ola. O oe le avā, ua e maʻitō. Ua amata nei lau tausiga i lenei “tofi mai ia Ieova.” E i ai ni mea e tatau ona e ʻaiina, ae o isi foi mea e tatau ona e taumamao ai pe faaitiitia. O mea ʻai e tele ai le uamea” * e tāua, auā a o i le manava, o loo teuina e le pepe le uamea ia lava mo ia mo le ono masina pe a mavae lona fanau mai. E te manaomia tele le suāsusu (e lelei foi le sisi) ina ia aumaia ai le mea o loo manaomia e lau pepe mo le fausia o ponaivi.  Ma o le paleni lelei o mea ʻai masoā ma le suka o le a fesoasoani ia lē sili atu i le mamafa e tatau ai. E moni atonu e te ʻai mo le toalua o oulua, peitai o le tasi o oulua, e laitiiti tele!

¹³ O isi mea atonu e manaomia pe lē manaomia foi ona mafaufauina, e faalagolago lava lea i le auala o e ola ai. O mea inu malolosi e avatu ai le suā ava malosi i le pepe meamea, ma e manaomia la le faaeteete, auā o le sili atu e ono faagesegeseina ai le agaʻi i luma faalemafaufau ma faaletino. O nisi pepe e fananau mai e onanā talu ai sa malosi tele le inu ava a o latou tinā. O le ulaula tapaa e tuuina ai le vaioona i alātoto o le pepe meamea ma faapogai ai foi ona suia e le kasa oona o le okesene o i lona toto. Ona o lenei tulaga o le faamoemoe o lenei pepe mo se olaga maloloina lelei e ono mafai ona faaleagaina ma e lē mafai ona aveesea a o lei fanau mai. O le fanau lē au ma le fananau mai o pepe ua feoti ua sili atu ona taatele i fafine e ulaula. O vailaau oona e inuina e le tinā e ono mafai ona faapogai ai le fanau mai o le pepe ua avea ma se e pulea e vailaau, ma o nisi foi vailaau ua inuina o ni vailaau mo maʻi ua faamaonia foi le mataʻutia, e ono pipili ai le pepe. E oo foi i le inu tele i le kofe ua masalomia le mafua ai o ni leaga.

¹⁴ E le gata i lea, o le mafatiaga o faalogona ootia o le fafine e mafai ona suia le tele o le vaega o loo faagaoioia totoga ma e sili atu ai le mataalia o le pepe meamea na i lo le tulaga e i ai, ma mafua ai le lē toafilemu o le pepe fou ma le faiaso. Atonu o loo ‘ufiufia le pepe tuputupu aʻe i le manava o lona tinā,’ peitai ane o se mea sese le manatu faapea ua vavaeeseina atoatoa o ia mai le lalolagi o loo siomia ai o ia. E mafai ona afaina o ia e auala atu i le tinā; na o le tinā lava lona fesootaiga ma le lalolagi i fafo ma o lena o le a tuuina ai o ia i se ‘nofoaga pule’ pe o le a lelei ai pe leaga ai le afaina o lana pepe. O le auala o loo ia tausia ai ia lava ma le auala na te tali atu ai i tulaga e aliaʻi mai o le a aumaia ai le eseesega. E lē tau taʻuina atu  i lenei tulaga lona manaomia tele o le lagolago atu a i latou o loo faatasi ma ia, ae maise ai lava le alofa ma le tausiga a lana tane.—Ia faatusatusa 1 Samuelu 4:19.

FAAIʻUGA E TATAU ONA OULUA FAIA

15, 16. O ā faaiʻuga e ono manaomia le faia e uiga i le nofoaga ma le auala o le a faia ai le fanauga?

¹⁵ Pe o le a fanau mai ea lau pepe i se falemaʻi po o i lou aiga? I nisi tulaga e itiiti lava sau filifiliga. I le tele o nuu atonu e leai ni falemaʻi. I nisi foi nuu o le faafanauina o se pepe i se aiga atonu o se mea e seasea ona tupu ma atonu e i ai ni tulaga faigata ona o le leai o se fesoasoani tatau, e i ai se poto masani e pei ona i ai i se fafine faatosaga. I soo se mea e faigofie ai, e lelei tele ona suesue e se fomaʻi i le taimi o le maʻitaga, ina ia iloa ai pe o le a e faatalitalia se fanauga e masani ai po o se fanauga foi e i ai faatasi ma ni faafitauli.

¹⁶ Pe o le a e faafanauina mai ea lau pepe i lalo o togafitiga e taofia ai le lagona o le tiga po o lou uia o auala e masani ai? E tatau i a te oulua uma ma lau tane ona faia le faaiʻuga ina ua uma ona fuaina tulaga lelei ma tulaga faalelelei. O le fanau mai o le tama itiiti i le auala masani e ono mafai ona aafia ai le tane i lona taualumaga tāua. E tuuina atu loa lava le pepe i lona tinā. Ua talitonu nisi o tulaga lelei nei e tatau ona mafaufau mamafa i ai, pe afai ua faaali mai i suesuega o le fanauga o le a aunoa ma ni tulaga faigata. O nisi o tagata suesue ua ioe o pepe e fananau mai i lalo o tulaga e sili atu ona filemu, o le fanau mai i tulaga e masani ai e itiiti ni faafitauli tau faalogona ootia ma maʻi o le tino.

17-19. O le ā ua faaalia e tagata suesue e uiga i le lelei o le fautuaga o le faatasi o le pepe ma le tinā i le vave e mafai ai pe a mavae le fanau mai?

¹⁷ Ua taʻua e le mekesini Psychology Today, o Tesema 1977:

“Ua iloa e tagata e suesue i le mafaufau o le tagata ma ona natura mo le faitau sefulu o tausaga e faapea o le uluai tausaga o le olaga o se pepe e mafai ona i ai  se uiga tumau i lona tuputupu aʻe faalemafaufau ma le tino i tausaga mulimuli ane. Ua foliga mai nei o le aso muamua o le pepe—atonu pe oo lava foi i lona uluai 60 minute—ua faapena foi lona tua tele. O le sootaga tau i faalogona ootia ua fausia aʻe e le tinā agaʻi i le tama itiiti, ma o le ituaiga o tausiga ua amata ona ia avatu i le pepe, e matuā tāua tele ae maise lava pe a mavae le fanau mai. Ua faataʻitaʻia mai foi i ni suesuega talu ai nei e faapea o uluai itula e ono tele naunau sona sao i le fauina aʻe o manatu o le tinā agaʻi i le tama itiiti, i le malosi o lona uaʻi atu i a te ia, atoa ma lona tomai e tausia ai o ia.”

¹⁸ Afai e lē faaaogaina e le tinā tui faagase i le taimi o le fanauga, o lona uiga o le a mataalia le pepe, o le a pupula ona mata, tilotilo solo, tulimataʻi gaoioiga, liliu faasaga atu i le mea o sau mai ai leo o tagata, ma e sili atu ona ia matauina le leo iʻī o le fafine. O le fesootaiga o le faataupupula i le va o le tinā ma le tama itiiti e vave lava ona faamautuina. Ua foliga mai e tāua le tulaga lenei, ma i nisi o suesuega ua lipotia mai e tinā e vaavaai atu loa latou pepe i a i latou e lagona loa lava e i latou le faalogona e sili atu ona latalata i ai. O le fepaʻiaʻi o tino, paʻu i le paʻu o le tinā ma le pepe mai lava ina ua faatoa uma ona fanau mai ua talitonuina lona aogā tele mo i laʻua uma.

¹⁹ Ua manatu tagata suesue faapea o faafitauli o pepe ua tausia i falemaʻi e mafai i nisi taimi ona sueina atu i uluai itula o lona ola. O faatusatusaga ua faia i le va o tamaiti na tausia i le falemaʻi i le fanau mai ma isi na tuuina atu loa lava i o latou tinā, ina ua uma ona fanau mai, ua faasino mai ai e faapea ina ua uma le masina e tasi e sili atu ona lelei le tulaga e i ai le pepe na fanau mai i auala masani. “Ua sili atu atili lona uiga ese,” ua fai mai Psychology Today, “i le lima o tausaga o le matua, o fanau a tinā e uumi atu a latou fesootaiga e sili atu o latou IQ’s [faamaoniga o le atamai] ma e sili atu ona tele o latou togi i suega tau gagana na i lo tamaiti sa tausia e tusa ai ma tulaga faafalemaʻi.”

20. Ina ia faia se faaiʻuga poto i nei mataupu, o le ā le isi mea e ao ina teuina i le mafaufau?

 ²⁰ E ui i lea, i nei mea uma lava e tatau ona matuā fuafuaina ma le faaeteete tulaga uma. E tatau ona tatou aua neʻi galo le mea moni na tuua mo i tatou e o tatou uluai matua faaletagata se tofi tuufaasolo o le lē lelei atoatoa. O lenei tulaga ua aveesea ai ma le lē alofia mai le “fanauga i auala e masani ai” i aso nei, nisi o ona tulaga e masani ai, ma o tatou leaga tuufaasolo na te mafai ona faapogaia tulaga lavelave ma le faaletonu. (Kenese 3:16; 35:16-19; 38:27-29) Ia pulea au faaiʻuga i ou lava tulaga totino ma le mea ua e talitonu i ai o le mea e sili ona atamai i lou lava tulaga o i ai, e tusa lava pe o lea tulaga o talafeagai ma fanauga “lelei” o taulaʻi i ai isi pe leai foi.

21, 22. O ā ni aogā o le fafagaina o pepe i suāsusu o tinā?

²¹ Pe o le a e faasusuina ea i a te oe lava lau pepe? E tele ni lelei mo oe faapea foi ma lau pepe i le faia faapea. O le suāsusu o le tinā o le mea ʻai lelei atoatoa lea mo tama meamea. E faigofie ona faamalūina, ma ua puipuia faasaga i le faaleagaina, i ni faafitauli tau pito gaau ma le manava. I ni nai uluai aso amata e faasau ai e susu o le tinā le suāsusu faalanu samasama e aogā tele mo tamaiti auā (1) e laitiiti le gaʻo ma faigofie ai ona faamalūina, (2) e sili atu ona lelei le malu puipuia mai faamaʻi na i lo le suāsusu o le tinā lea o le a oo mai i ni nai aso mulimuli ane, ma (3) e lelei mo le fesoasoani i le faamamāina o sela, le piapia ma le suāvai faalanulauʻava ma samasama o loo faaputuputu i le gaau o le tama meamea a o lei fanau mai.

²² E aogā tele le faasusuina o le pepe i le suāsusu o le tinā mo le tinā lava ia. E faaitiitia ai le palapala i le tinā auā o le mimiti a le pepe e faaosofia ai le vaega o loo i ai le fua ia pipii faatasi. E faaosofia foi e le mimiti a le pepe susu o le tinā ia maua tele mai ai le suāsusu, ma o tinā ua i ai le popolega neʻi meane ua lē lava le suāsusu latou te aumaia ua latou iloaina e leai se lē lava e oo i le suāsusu. O le fafagaina pea i susu  o le tinā o le a tolopoina i nisi tulaga le faaauauina o le faatupuina o le fua ma le taamilosaga a le gasegase e masani ai fafine i masina taitasi (maʻi masina), ma i lena tulaga ua avea ai ma auala masani e taofia ai le maʻitaga. Ua faapea mai The American Cancer Society “o tinā e fafagaina a latou pepe i o latou suāsusu ua faaalia le itiiti o le tulaga tau kanesa o o latou susu.” Ua fesoasoani foi le fafagaina o le pepe i suāsusu o le tinā i le fasi tupe faasoasoa a le aiga!

ATIINA AʻE O LE TAMA ITIITI—PE FAAPEFEA ONA E FAĀTAINA LE Ū?

23. O ā mataupu silisili e uiga i le aʻoaʻoina o se tama itiiti ua faasino mai i le Salamo 127:4, 5?

²³ “E pei o u fanafana i le lima o se toa, e faapea lava fanau a taulelea. Amuia le tagata ua tumu ai lana utu!” (Salamo 127:4,5, An American Translation) O le lelei po o le aogā o le ū fanafana e fuafuaina lea i le lelei ua faātaina ai a o tuua le aufana. E tatau ona faātaina se ū ma le faaeteete lava ma le poto ina ia mafai ona lavea le faailoga. I se tulaga faapea, e matuā tāua lava, i le avea ma matua, e tatau lava ona oulua punonou ai ma le atamai i le tatalo ma mafaufau loloto i le ituaiga o amataga o le olaga o le a oulua tuuina atu i la oulua tama. Pe o le a avea ea o ia ma tagata matuā taʻumatuaina ma paleni lelei pe a oo ina tuua e ia la oulua tausiga, pe faaaloalogia e isi ma viia ai le Atua?

24. (a) O le ā le ituaiga o liʻo faaleaiga e tatau i matua ona toaaga ia faia mo a latou fanau? (e) Ai se ā ua tāua ai lenei tulaga?

²⁴ E tatau ona faia faaiʻuga a o lei oo mai le tama itiiti e tusa i lona tausiga ma lona aʻoaʻoina. O mātua, o le lalolagi atoa lea o le pepe fou ua fanau mai. O le ā le foliga o le a i ai lena lalolagi? Pe o le a faaalia ai ea ua aveina e matua i o la fatu lenei fautuaga mai le Afioga a le Atua: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava. A ia outou feagaleleiai, ia femutimutivaleai lo outou alofa,  ia fefaamagaloai outou, faapei ona faamagaloina outou e le Atua ia Keriso.” (Efeso 4:31, 32) Po o le ā lava le olaga faaleaiga o le a i ai, o le a atagia lea mai le tama itiiti. Ia toaaga ia avea le lalolagi o la oulua pepe o se lalolagi filemu ma saogalemu ia mafana ma ia i ai le alofa. O le pepe e faapelepeleina o le a na puʻeina nei uiga ma o le a faapea lava ona faatatauina atu i ai ona faalogona ootia. O le a na matauina o oulua faalogona ma o le a mulimuli i a oulua faaaʻoaʻoga. O tulafono tau le amataga a Le na Foafoaina i tatou ua faia ni sauniuniga ofoofogia mo le tuputupu aʻe o le pepe i le manava; pe o le a faapefea ona oulua tausia i fafo atu o le manava? O le tele e faalagolago i le tulaga o le aiga o le a oulua saunia. O lenei tulaga, e pei lava o uiga tuufaasolo, o le a iloa ai le ituaiga o tagata matua o le a i ai le pepe. “Aʻoaʻo ia i le tama e tusa ma lona ala; a oo ina toeaina lava o ia, e le teʻa ese ai.”—Faataoto 22:6.

25, 26. Ai se ā ua alaga tatau ai i matua le tuuina atu o se taimi tele ma se tausiga i la la fanau?

²⁵ E lē mafaia e le tamaloa po o le fafine ona faia sina lauvao se tasi, peitai o i laʻua uma faatasi e mafai ona la aumaia se isi tagata ola, e uiga ese ma e matuā ese lava mai soo se isi lava tagata i le lalolagi! O se faiga ofoofogia tele lenei, o lona ofoofogia tele ua faigata ai ona talitonu, i le toatele naunau o tagata i aso nei ua le taulau ona latou talisapaia le paia o le tiute tauave o loo aumaia ai! E totoina e tagata fugalaau, e faasusūina, lūlūina i ai le faalelei eleele, e vele mamā—e fai nei mea uma ia maua se togālaau matagofie. Pe e le tatau ea ona tatou faaaluina le sili atu o le taimi ma taumafaiga ia faia fanau ia matagofie?

²⁶ Ua i ai i se ulugalii faaipoipo le āiā e aumaia ai ni fanau. Ua faapena foi i a la fanau le i ai o āiā tatau o le i ai o matua, e lē gata i le na o le taʻu a e faapea foi i le uiga moni. Atonu e faaaluina e se Kerisiano tuuina atu se taimi tele ma le malosi i le tufaina atu o le poto faale-Tusi Paia ma le faamoemoe ia maua se  soo e toatasi, peitai e le faamanuiaina ia taumafaiga uma lava. Pe e le tatau ea i matua Kerisiano ona faaaluina se taimi e sili ona tele i le taumafai e ‘tausia ai a latou fanau i aʻoaʻiga ma apoapoaiga a Ieova? (Efeso 6:4) Afai la te tausia aʻe se tama itiiti e tasi ia avea ma auauna lelei a le Foai ola, o Ieova le Atua, pe ua le avea ea lena ma mafuaaga e olioli tele ai? Ma o lo la fanauina mai la o sea atalii po o se afafine o le a faamaonia le tauia tele.—Faataoto 23:24, 25.

27. I le faatonutonuina o le tuputupu aʻe o se tama itiiti, ai se ā e tatau ai ona mafaufauina uiga faaletagata o le tama itiiti lava ia?

²⁷ Ua faatusaina e le Salamo 128:3 fanau i tamai laau olive: “E avea lau avā pei o le vine fua tele mai i totonu o lou fale; o lau fanau e pei o tamai olive e vagavagai lau laoai.” O nei laau e eseese lo latou tutupu aʻe e tusa ma le totoina ma le aʻoaʻoina o i latou. O nisi o le a tutupu aʻe e mafolafola i le pipii i le puipui po o le pa. O isi e tutupu salalau atu i luga o le laueleele. O isi foi o le a faalaitia ma faapupuu i le tatipiina o o latou aa. E i ai se muagagana faaanamua ua faamamafaina ai e faapefea foi ona faafoliga mai se tama itiiti e le aʻoaʻoina i le amataga o lona olaga: “O le auala ua piʻo i ai le lala, o le auala lena o le a tupu aʻe ai le laau.” E manaomia i inei le lagona o le paleni lelei. I le tasi itu e manaomia e le tama itiiti le taʻitaʻiina ina ia faaliliu atu i tulaga amiotonu. I le taimi lava lea e tasi e lē tatau ona faatalitalia mai i a te ia le faaliliu atu i se tulaga atoatoa ua uluai taofia e matua e tusa ma le uiga moni faaletagata e tatau ona ia faaalia mai. E te le mafai ona faia le laau olive ia fua mai i mati. Ia aʻoaʻi lau tama i auala saʻo ae aua neʻi faamalosia o ia i se tulaga ua uluai fuafuaina o le a le mafai ai ona faatagaina ona lava uiga maʻoti faaletagata ma mea alofa na tutupu aʻe ma ia e faaalia mai i latou lava i auala e masani ai. Ia lava se taimi e te tuu atu i a te oe lava ia e iloa lelei ai lenei tama itiiti ua e aumaia. Ma i le pei lava o se tamaʻi laau muʻa, ia avatu i lau  tama le taʻitaʻiga ua lava lona malosi e puipuia ai ma lagolagoina ai o ia i le auala saʻo, a e lava foi lona malu ia lē omia ai le tuputupu aʻe a le tama itiiti i lona tulaga atoa mo le lelei.

SE TAUI MAI I A IEOVA

28. Pe e mafai faapefea ona aogā i a i tatou le mea ua fai mai ai le Kenese 33:5, 13, 14 e uiga i le manatu naunau o Iakopo i lana fanau?

²⁸ Sa faaalia e Iakopo o anamuā lona manatu naunau mo le tausia o lana fanau. Ina ua fuafuaina se faigā malaga, o le auala o le a uia atonu sa faigata tele mo i latou, sa fai atu Iakopo i lē na fuafuaina: “Ua silafia e loʻu alii ua faalelavā le fanau, o lafu mamoe foi ma lafu povi ma a latou tama, ua ia te au ia; afai foi e tulituliteleina i latou i le aso e tasi, ona mamate ai le o le lafu uma. Ia maliu atu lava loʻu alii e muamua i lana auauna; a o aʻu ou te savali lemu e faatatau i manu e muamua ia te au, atoa ma le fanau.” Muamua atu, ina ua la fetaiaʻi ma lona uso o Esau, sa fesiligia o ia: “ O ai ea i latou na ua ia te oe?” Sa tali atu Iakopo, “O aʻu fanau ua foaiina mai e le Atua i lona alofa i lau auauna.” (Kenese 33:5, 13, 14) O matua i aso nei, e lē gata ina tatau ona faaalia o le alofa mutimutivale i a latou fanau e pei ona sa faia e Iakopo, a e tatau foi ona manatu i a i latou e pei ona sa faia e Iakopo—o fanau mai le alofa o Ieova. O le mea moni a o lei faaipoipo e tatau i se tane ona mafaufau mamafa pe faamata na te mafaia ona tausia se avā ma se fanau. Ua fautua mai le Tusi Paia: “Ia muamua ona sauniuni i fafo o lau galuega, ma saunia mea uma i luga o le fanua; ona e fai ai lea o lou fale ma lou aiga.” (Faataoto 24:27, New English Bible) I le talafeagai ma lenei fautuaga aogā e tatau i se tane ona faia sauniuniga mo le faaipoipoga ma le olaga faaleaiga a o lei oo mai le taimi. Ma e oo lava i se maʻitaga e lei fuafuaina, o le a faafeiloaʻia lava ma le fiafia ae o le a le fefe i ai faapea o se avega mamafa tau tupe.

29. Ai se ā ua tatau ai i le mataupu o le aumaia o ni fanau ona uluai mafaufau mamafa i ai?

 ²⁹ O le mataupu o le mauaina o se fanau ua manino lava le tatau ona mafaufauina ma le faaeteete tele, e lē gata i le tuu i le ulumatua a e faapea foi ma nisi mulimuli ane. Pe ua manatu ea matua ua faigata ona fafagaina, tausia ma aʻoaʻoina a latou fanau ua i ai nei? E tatau la i a i latou, i lo latou ava i Le na Foafoaina i latou faapea foi ma le tulaga o le alofa, ona uunaia i latou ina ia pulea i latou lava ma faagesegese ai le faatoateleina atili o le aiga.

30. (a) Ai se ā e mafai ai ona tatou fai atu o le Atua e ana moni lava se tama itiiti? (e) Pe e tatau faapefea i lenei tulaga ona afaina ai manatu o matua?

³⁰ O ai moni lava, e ana le tama? O lau tama, i le tasi uiga. Peitai i le isi uiga, o le tama itiiti e a Le na Foafoaina mea. Ua faatuatuaina atu i a te oe lona tausiga, e pei lava foi ona sa faatuatuaina atu i ou matua le tausiga o oe a o tama itiiti. Peitai e le o oe o se mea totino moni a ou matua ma fai ai i a te oe i soo se mea ua la loto malilie i ai; ua faapena foi la i lau tama i le uiga lena. E lē mafai e matua ona faatonutonuina pe pulea le minute na amata ai ona afuafua ma tuputupu aʻe le tama itiiti i le manava. E lē mafai foi ona la vaaia pe malamalama atoatoa i taualumaga ofoofogia o loo aafia ai. (Salamo 139:13, 15; Failauga 11:5) Afai e i ai se faaletonu faaletino ua mafua ai ona i ai se fanauga lē au po o le fanau mai foi ua oti se pepe, la te le mafaia ona toe faaola le pepe ua oti. Ona o lea tulaga ua tatau ai lava ona tatou aloaia ma le loto maulalo o le Atua o lo tatou Foaʻi-Ola, ma o i tatou uma lava e ā ia: “O le lalolagi ma mea ua tumu ai o a Ieova ia; o le atu laulau ma e o nonofo ai.”—Salamo 24:1.

31, 32. (a) O le ā le tiute tauave i luma o le Atua o loo i ai i matua? (e) O le ā le iʻuga e maua mai i le tausia lelei o lena tiute tauave?

³¹ Ua i a te oe le tiute tauave e uiga i tamaiti ua e aumaia i le lalolagi ma e te tali atu foi i Le na  Foafoaina mea e uiga i le tulaga ua e tausia aʻe ai i latou. O Ia na foafoaina le lalolagi, ma le faamoemoe ia aināina, ma faaauupegaina o tatou uluai matua faaletagata soifua ma le malosi po o le mana e foafoaina ai ina ia faataunuuina ai lenei fuafuaga. O lo la paʻū ese mai i a te ia ua tuua ai i laʻua i le itu a Le Tetee o lē na luʻia le āiā a le Atua e faataunuuina ai lana pule aoao i luga aʻe o lona aiga o ē i le lagi ma ē i luga o le lalolagi. I le aʻoaʻoina o lau fanau ia tutupu aʻe o ni tagata faamaoni i Le na Foafoaina i latou, o le a mafai ai e oi ma lou aiga ona faamaonia lena Tetee o le pepelo a e moni Ieova le Atua. E pei ona taʻua mai e le Faataoto 27:11: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”

³² O le faataunuuina o lou tiute tauave i lau fanau ma lau matafaioi i le Atua, e mafai ona aumaia ai i a te oe se uiga moni o le faataunuuina o se mea i le olaga. O le a mafai ai foi ona outou auai i le talisapaia ma le loto atoa o le tautalaga a le Salamo 127:3: “O e ua fanau mai o le taui lea.”

[Faaopoopoga i lalo]

[Fesili mo le Suʻesuʻega]

 [Ata i le itulau 93]

O le vavalalata nei e alofia ai le vavamamao mulimuli ane