O Se Avā ua Alofagia Faapelepeleina
Mataupu 5
O Se Avā ua Alofagia Faapelepeleina
1-4. O le ā le finauga e faia e fafine i nisi taimi e uiga i le faailoaina atu e tane o lo latou alofa i a i latou?
SA FINAU atu le tasi fafine i le isi, ‘Ua ou iloa e alofa laʻu tane i a te aʻu, peitai na te lei fai mai ai lava. Ioe, e i ai ni nai taimi e fai mai ai, pe a ou tosoina mai i a te ia, peitai e sili atu ona manaia pe a na fai e taʻu mai lava e ia e aunoa ma loʻu tauanauina.
2 Sa tali atu le isi fafine, ‘Ua ou iloa. O le uiga lena o tane. O se tasi taimi sa ou fesili ai i laʻu tane pe alofa i a te aʻu, a e fai mai a ia, “Ua ou faaipoipo i a te oe, a ea? O loo ou tausia oe, o loo ta mau faatasi; ou te lē faia ia mea pe a na ou le alofa i a te oe.”’
3 Sa faatali o ia mo se minute ona faaauau lea: ‘Peitai e i ai se mea uiga ese lava na tupu i se tasi afiafi po. I le ao o lea lava aso sa ou tapenaina ai lona potu, ma i se tasi o pusa toso o lana laulau sa ou vaaia ai se ata. O le ata lea sa ou faaali i a te ia mai se tusi tuu ata tuai a loʻu aiga. O loʻu ata lea i oʻu ofu taele ina faatoa fitu tausaga loʻu matua. Na sasae ese e ia mai le tusi ma teu i lana pusa toso.’
4 Sa ataata o ia a o fai lana tala, ona vaai atu lea i lana uo. ‘Sa ou faaali i a te ia le ata i lena afiafi po ina ua manava mai i lana galuega. Sa tago mai o ia ua uu atu le ata i lona lima ma ataata ma fai mai, “E pele i a te aʻu lenei teine itiiti.” Ona tuu lea e ia i lalo o le ata ae aofai atu oʻu foliga i ona lima e lua ma fai mai, “E pele foi i a te aʻu le tulaga ua ia oo nei i ai.” Ona ia faafeāsogi mai ai lea i a te aʻu ma le alofa tele. Na faatumulia aʻu i loimata.’
5. Ina ia alofa faapelepele i ai lana tane, pe e ao faapefea i le avā ona amioaʻi o ia lava?
5 O se avā ua na iloa e matuā pele o ia i lana tane e i a te ia se faalogona mafana ma le saogalemu i totonu. Ua fautua mai le Afioga a le Atua i tane ia i ai lea alofa mo a latou avā. “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai, . . . ona avea ai lea o i laua o le tino e tasi.” (Efeso 5:28, 29, 31) E pei ona ua uma ona tatou talanoaina, e tatau i le avā ona i ai le faaaloaloga loloto i lana tane, peitai e tatau i le tane ona tauaveina o ia i se auala o le a maua ai e ia sea faaaloaloga. Ua moni foi lea i le tulaga ua fautuaina ai lau tane ia alofa ma faapelepele i a te oe: Ia e amioaʻi i auala o le a faaosofia ai o ia na te faia faapena mai le fatu.
PE E TE AVATU LE LAGOLAGO SUA?
6, 7. (a) I le Kenese 2:18 o le ā le tiute ua tulei mai Ieova na ala ai ona ia faia le fafine? (e) Ina ia mafai e se avā ona avea ma fesoasoani moni i lana tane, o le ā e manaomia mai i a te ia?
6 Mo se avā ia alofagia faapelepeleina, e sili atu mea e manaomia na i lo le na o lona usiusitai i lalo ifo o le tulaga ulu o lana tane. E mafai e ia ona i ai sana solofanua po o se taifau e aʻoaʻoina lelei ma usiusitai atu i a te ia. Sa i a Atamu ni manu faatasi ma ia i le faatoaga o Etena ma sa usiusitai i a te ia. Peitai sa tuua toatasi pea o ia e tusa ma lona ituaiga. Sa manaomia e ia se uo, se tagata ola e i ai le poto o le a faafiafia i a te ia ma avea ma fesoasoani e galulue faatasi ma ia: “E le lelei ina toatasi o le tagata,” sa fetalai mai ai Ieova. “Ou te faia sona fesoasoani e tatau ma ia.”—Kenese 2:18.
7 O le mea e manaomia e se tane o se avā lea e lē gata ina alofa ma faaaloalo i a te ia, ae ia avea foi ma fesoasoani moni, ma lagolago sua i faaiʻuga na te faia. E lē o se mea faigata lenei pe afai ua malilie faatasi i se faaiʻuga ina ua uma ona talanoaina faatasi. Peitai atonu o le a lē faigofie pe afai e lei logoina oe pe ona e te lē malie foi i ai. I se tulaga faapea pe e mafai ea ona e lagolagoina ma le faamaoni lau tane—faia le mea e sili ona e mafaia ia aoga lana faaiʻuga, pe afai ua lē o se mea e le talafeagai ma le tulafono pe e lē faale-Tusi Paia? Pe o e masani ea e taofiofi ma le faaulu malō, faatasi ma lou talotalo ia lē taulau ina ia mafai ai ona e faapea atu, ‘Uā, pe ua le uma ona ou fai atu lea i a te oe’? Afai ua ia vaai atu o e galue malosi mo le manuia o lana taumafaiga e ui lava ina sa lei logoina oe, pe e te lē manatu ea o sea lagolago atu ma le faamaoni i lau vaega o le a faapogaia ai ona faatupu atili lona alofa i a te oe?
8. Pe e mafai faapefea e le avā ona faamalosi i lana tane ia faia ma le tatau lona tulaga ulu?
8 I luga o mea uma aua neʻi e taumafai e te faoa lona tulaga ulu! A e faia, o le a e lē fiafia i a t ia; ma o le a lē fiafia foi o ia i a te oe po o ia lava. Atonu na te lē o taʻimua i le tulaga e pei ona tatau ona i ai. Pe e mafai ea ona e fesoasoani ma apoapoai i a te ia ina ia faia? Pe e te faaalia ea le talisapaia mo soo se taumafaiga na te faia mo le faia o le taʻitaʻiga? Pe e te felagolagomai ma ia ma faalototele i ai pe a na faaalia sina taumafaiga, pe o le mea e te fai i ai ua sese o ia, ma e lē taunuu lana fuafuaga? O nisi taimi e tatau i le avā ona la tauave faatasi le tuuaiga pe afai ua lē faia e lana tane le taʻimua—mo se faaaʻoaʻoga, pe afai na te taʻuleagaina ona manatu pe tetee foi i ana taumafaiga, po o le tali saʻeā atu foi, ia uā na ou faiatu foi o le a lē taulau, pe afai ua lē oo atu sana mea na fuafuaina i le lelei atoatoa. O lenei tulaga o le a mafai ona aumaia ai se tane lē mautonu, ma lē mau mafaufau. I le tasi itu, o lou faamaoni ma lou lagolago sua, o lou faatuatua ma lou talitonu i a te ia, o le a faamalosia ai o ia ma fesoasoani ai i lona tulaga manuia.
“O LE AVĀ AMIO LELEI”
9. O le ā ua fai mai ai le Faataoto 31:10 e uiga i le avā ua agavaa?
9 Ina ia avea o se avā ua alofagia faapelepeleina, ua manaomia ai foi oe ia tausia lelei ou tiute tauave i le aiga. E uiga i se fafine faapena ua faapea mai le Tusi Paia: “E silisili lona tau i penina.” (Faataoto 31:10) Pe o oe o se avā faapena? Pe e te manao e te faapena?
10, 11. Pe e ono faaalia faapefea e se avā ua talafeagai o ia ma le faamatalaga o loo i le Faataoto 31:15?
10 I le talanoaina o galuega a se “avā amio lelei” ua lipotia mai e le tusi o Faataoto: “E tulai foi o ia, a o po lava, ma avatu mea e ʻai i lona aiga.” (Faataoto 31:15) E toatele tamaitai talavou e amata aʻe o latou olaga faaipoipoina i se amataga faalēlelei talu ai e lei aʻoaʻoina i latou e o latou tinā i le faia o se kuka; ae e mafai ona latou aʻoaʻoina. Ma o se fafine atamai o le a aʻoaʻoina ia iloa ona faia lelei! O le kuka o se tomai faapitoa. A lelei ona sauniunia se mea taumafa, o le a lē gata ina faatumuina ai le laualo peitai o le a aumaia ai foi se tali leleia mai le fatu.
11 E tele ni mea e mafai ona aʻoaʻoina e uiga i le sauniunia o mea taumafa. E aogā tele le malamalama i tulaga faavae tau i le faia o mea taumafa ina ia mafai ai ona puipuia le soifua malolo lelei o lou aiga. Peitai na o le aumaia o ni mea taumafa lelei faapena i luma o lau tane e lē lava lea e maua ai le viia o oe e ia. Ua taʻu mai e le Tusi Paia i a i tatou sa iloa e le avā a Isaako o Repeka ona sauniunia mea taumafa matagofie i se uiga “e manogi” pe e “susua” i se auala sa naunau tele i ai lana tane. (Kenese 27:14) E toatele ni avā o le a maua le aogā mai lana faaaʻoaʻoga.
12. O le ā e mafai ona aofia ai i le gaoioiga a se fafine i le talafeagai ma le Faataoto 31:14?
12 I nisi vaega o le lalolagi e usu ai fafine i taeao uma i le maketi e aumai mea latou te manaomia mo le aso. I nisi nofoaga latou te faatau atonu pe faatasi i le vaiaso ma teuina mea e vave faaleagaina i pusa aisa. Po o le ā lava le tulaga e i ai, e matuā talisapaia lava e le tane se avā na te faaaogā tatauina le faaputugātupe mo le tausiga o le aiga. Afai o le a na iloaina matau mea ʻai ma laei lelei, ma iloa lo latou tau, o le a na lē faatauina mai la le mea muamua e vaai i ai. A e pei ona fai mai le Faataoto 31:14: “E tusa o ia ma vaa o le faatauoa; e mamao le mea e au mai ai ana mea e ʻai.”
13. E tusa ai ma le Faataoto 31:27, le ā e ono faatalitalia mai se avā lelei i le fesootaiga ma le tausiga o le aiga?
13 O lenei naunau i lana galuega e manaomia foi le atagia mai i le tulaga o lona aiga. I le taʻua atili o le iloaina o le avā lelei, fai mai le Faataoto 31:27: “Ua vaavaai o ia i amioga a lona aiga; e le ʻai foi o ia mea e ʻai a le paie.” E lē fai ma ana masani le ala umi i le po ma faaaluina se taimi tele i talanoaga lē aogā faatasi ma tuaoi. E ui lava ina o le faamaʻia po o tulaga lē masilafia e ono mafua ai i nisi taimi ona lē maea lelei ana galuega tau fale, ae e mamā lava lona aiga i lona tulaga lautele. Ua faatuatua lava lana tane afai o le a asiasi mai ana uo, o le a lē faamāina o ia i foliga atu o lo latou fale.
14, 15. O le ā le fautuaga a le Tusi Paia i fafine e uiga i lāei ma teuga?
14 O le toatele o fafine latou te lē manaomia le taʻuina atu i ai e tāua foi lo latou manatu mo le vaaia o o latou foliga patino, peitai o nisi latou te manaomia ona faamanatu atu i ai. E lē o se mea faigofie le maua o se faalogona naunau alofa i se tasi e faaalia mai i ana teuga o ia e lē o popole i a te ia lava. Ua fautua mai le Tusi Paia i fafine “ia latou teuteu ia i latou i ofu e onomea.” Peitai ua fautua mai foi faasaga i le faamamafaina o le teuina o lauulu, maa tāua ma ofu taugata o le a tosina atu ai ni mafaufauga e lē tatau ai i lē o ofuina.—1 Timoteo 2:9.
15 O le mea e sili atu ona tāua na i lo ia teuga, o uiga ia o lē na te faaofuina o ia i ia teuga. Ua taʻu mai e le aposetolo o Peteru i avā Kerisiano “o le loto agamalū ma le filemu, o le mea tau tele lava lea i luma o le Atua.” (1 Peteru 3:3,4) Ma ina o tolaulauina e le Faataoto, uiga o le avā lelei, sa faaopoopo mai “ua tuu atu foi ona lima i le ua mativa” ma “ua i lona laulaufaiva le tulafono o le alofa.” E lē manatu faapito pe “faitatala” peitai e lima foai ma agalelei. (Faataoto 31:20, 26) “O le matagofie e pepelo lea,” ua faapena ona faaauau mai o le faamatalaga, ma “o le mea faatauvaa le lalelei; a o le fafine ua mataʻu ia Ieova, e viia lava o ia.”—Faataoto 31:30.
16. Pe faapefea e se tane agaga faafetai ona lagona e uiga i se avā faapena?
16 Ioe, o se fafine faapena o le a matuā alofagia ma le faapelepeleina e soo se tane o lē ua au faatasi ma le finagalo o Lē na Foafoaina mea. E maua e ia le faalogona e uiga i lana avā e pei o lea o loo faaalia e le tusitala o Faataoto: “E toatele fafine e amio lelei i latou; a o oe, ua faasilisili oe ia i latou uma.” (Faataoto 31:28, 29) Ma i le aunoa ma le tele o le faatauanau, o le a uunaia loa o ia e faailoa atu i lana avā o lena lava le faanaunauga o loo i a te ia.
O LOU MANATU E UIGA I FEUSUAIGA FAAULUGALII E AUMAIA AI SE ESEESEGA
17, 18. Pe mafai faapefea i le manatu o le avā e uiga i feusuaiga faaulugalii ona afaina ai le faalogona o lana tane e uiga i a te ia?
17 O le lē faamalieina i feusuaiga faaulugalii ua i ai lea i le aa o le tele o faafitauli tau faaipoipoga. I nisi o tulaga ua mafua mai ona o le leai o se magafagafa ma se malamalama o le tane i manaoga faaletino ma faalogona ootia o lana avā, ma i isi tulaga, ona o le lē taulau i le avā ona auai faatasi i le faaletino po o faalogona ootia i le faataunuuina o lenei tulaga ma lana tane. O gaoioiga o le feusuaiga ua faia ma le naunau ma le mafana e i laʻua uma o le tane ma le avā, e tatau ona avea o se faaaliga patino o le alofa ua i ai o le tasi i le isi.
18 O le lē tali atu o se avā i gaoioiga a se tane e ono mafua mai ona o le lē magafagafa o lana tane, ae o le faatuʻiese o se avā e afaina ai foi le tane, ma o le faaalia o le lē fiafia atu e ono faatamaʻia ai lona naunau fiafia ma le malosi po o le faapogaia ai foi ona lagona e ia le fia alu i se isi e ese mai lana avā. Afai na ona gauai atu le avā ma se uiga faalēnaunau i ai, e ono faaliliuina e le tane lea tulaga o se faamaoniga e lē o alofa naunau lana avā i a te ia. O faalogona ootia latou te pulea le faatupuina o le tali manao tau i feusuaiga faaulugalii, ma afai e lē tali manao se avā, atonu e manaomia le toe fuatai o ona lava manatu agaʻi i tulaga tau feusuaiga.
19. (a) Pe ua faaalia faapefea e le Tusi Paia e sese pe afai e faafitia e se tasi feusuaiga faaulugalii mai lana paaga mo ni vaitaimi uumi? (e) Ai se ā e lē tatau ai ona fesili i tagata i fafo atu o le fusi o le faaipoipoga na te pulea mai le mea e tatau i amioga a se ulugalii i mataupu tau i feusuaiga faaulugalii?
19 Ua fautua mai le Tusi Paia i a i laʻua uma, le tane ma le fafine ia “aua neʻi faafiti le tasi i le tasi.” E leai se faatagana ua aumaia e le Afioga a le Atua e faaaogaina ai faiga faaulugalii e fai ma auala e faasalaina ai le paaga a se tasi po o le faaalia ai o se lē fiafia, e pei o le faafitia e se avā i lana tane mo ni vaiaso po o ni masina. E pei lava ona tatau ona “avatu le tane i le avā le agalelei e tatau ai, ia faapea foi le avā i le tane.” (1 Korinito 7:3-5) E lē o le uiga o lenei mea e faapea o le a faatalitalia mai i se avā ia gauai atu i ni tu e lē masani ai ua na iloa e lē mamā, ma o se tane e alofa ma faaaloalo i lana avā o le a na lē manaomia le faia faapena e lana avā. “O le alofa...e le amio matagā.” (1 Korinito 13:4, 5) E le tau manaomia le fesili atu fua i se tasi i fafo atu o le fusi o le faaipoipoga e faatonu mai po o le ā ua talafeagai po o le lē talafeagai e tusa ai ma amioga a le ulugalii. O le Tusi Paia i le 1 Korinito 6:9-11 ua tolaulau manino mai ai faiga ua faasaina i tagata tapuai a Ieova le Atua: o le faitaaga, le mulilua, le tauatane. (Ia faatusatusa foi Levitiko 18:1-23) O nisi tagata o ona po nei e mananao i ni suiga o loo latou auai i se “amioga fou” —o le mea moni o se amioleaga—o se alaga ua taatele mo le taliaina o nisi o nei faiga faaulugalii e faasaina, a o isi e pipii mau atu i faiga tuai o le a faaopoopo atu i nei faasaaga. Ua aumaia e le Tusi Paia le manatu po o le vaaiga fuafua lelei. I le aotelega, afai e lelei isi faiā uma i le faaipoipoga, afai ua i ai le alofa, le faaaloalo, fesootaiga lelei ma le malamalama o le a seasea lava avea feusuaiga ma faafitauli.
20. Afai e faaaogaina e se avā tulaga tau feusuaiga mo ni fuafuaga fetuutuunai, o le ā o le a iʻu i ai?
20 O se avā ua alofagia faapelepeleina na te lē faaaogaina le tulaga faaituaiga mo ni fuafuaga fetuutuunai. E moni lava e lē o avā uma e faapena, peitai e faia e nisi. I ni auala atonu ua faia ma le poto, ua latou faaaogaina ai tulaga faaituaiga ia maua ai le gauai atu o a latou tane. O le ā lona iʻuga? E te lē lagona se alofa naunau atu i se tagata na te faatau atu se ofu i a te oe, ā ea? E faapena foi i se tane ona lē lagona se alofa naunau i se avā na te faatau atu faiga faaituaiga e maua ai le mea na te manaomia mai i a te ia. O le fafine na te faia faapena atonu o le a maua mea faaletino, peitai o le a le iloa faalogona ootia ma le faaleagaga.
O Ē FETAGISI, O Ē FAAʻONOʻONO
21-23. E pei ona faataʻitaʻia mai i le tulaga o Samasoni, pe e mafai faapefea i le tagi ma le faaitaita po o le faaʻonoʻono o se fafine ona faaumatiaina le fiafia?
21 Sa o se tagata malosi Samasoni, peitai sa lei mafai e ia ona tatali omiga mai fafine sa faaaogaina le fetagisi po o le faaʻonoʻono ia maua ai le mea o latou mananao ai. I se tasi taimi sa fesagai ai o ia ma se osofaiga o le tagisaga mai se fafine o lē o le a avea ma ana avā. E pei ona faamauina i le Faamasino 14:16, 17, “Ona tagi lea o le avā a Samasoni ia te ia, ua faapea atu, Ua na ona e ʻinoʻino ia te au, a e te le alofa mai lava ia te au; ua e fai atu le tupua i tagata o loʻu nuu, a e te lei faaali mai ai ia te au; ua fai mai o ia ia te ia, Faauta, ou te lei faaali atu i loʻu tamā ma loʻu tinā; ou te faaali atu ea ia te oe?” Sa lei manuia le augani atu a Samasoni mo le mea tonu. E seasea lava faamanuiaina pe a oo ina maualuga faalogona ootia. “Ua tagi lava o ia ia te ia i aso e fitu sa fai ai le tausamaaga; ona oo lea i le aso fitu ua ia faaali atu ai ia te ia, auā ua faatauanauina o ia e ia, ona faaali atu lea e ia o le tupua i tagata o lona nuu.”
22 Aua neʻi e manatu faapea ua le alofa lau tane i a te oe talu ai lona le masani ona malolo atu i mea uma e te loto i ai. Na tuuaia Samasoni e lana avā e lē alofa i a te ia, peitai o le mea moni o ia lava sa le alofa i a Samasoni. Sa aumaia e lana avā omiga mamafatū seia oo ina lē toe lavatia e ia ona tatali. Ina ua taʻu atu e Samasoni lana palo po o le tupua i lana avā, sa olegia loa lava e lana avā i lona alu atu ma le atoa e taʻu atu lana mea lilo i ona fili. I le iʻuga na avea o ia ma avā a se isi tamaloa.
23 Mulimuli ane na tosina atu Samasoni i se isi fafine o Talila lona igoa. Atonu pe sa lalelei o ia i le tino, peitai pe sa faamaonia ea o ia o se fafine na te alofagia faapelepeleina? Ina ia mafai ona vavaneina mai i a Samasoni faamatalaga e mafai ona ia faaaogaina mo lona lelei faapito, sa faaaogaina ai e Talila le faaʻonoʻono e fai ma ana auupega. Ua faapea mai le tala: “Ua oo ina faatiga ia te ia lona fai mai i aso uma, ua na faatauanauina o ia; ona faavaivai ai lea o lona loto, a oti.” O iʻuga mulimuli sa matuā mataʻutia.—Faamasino 16:16.
24-27. (a) O le ā ua fai mai ai le tusi o Faataoto e uiga i le mea o le a tupu mai talu ai le faaitaita o le avā? (e) Ai se ā ua taulaʻi atu ai i fafine lenei faatonuga? (i) O le ā atonu o le a sili atu ona faagaeetia ai se tane ia manao e faia mea lelei mo lana avā?
24 O le tagi ma le faaʻonoʻono po o le faaitaita e lē atamai. E faaleagaina ai se faaipoipoga. E alu ese ai se tane. Ua lapatai le Tusi Paia faasaga i nei faiga e pei o mau nei o mulimuli mai ua siiina mai i le The New English Bible: “O lē na te teu loto se mea na te faamalepeina uo.” “O se avā faamisa e tusa ia ma le suavai ua tutulu ifo e lē pe.” “E sili ona ola toatasi i le toafa na i lo le faatasi ma le avā faamisa ma itaita gofie.” “O le tutulu e lē mataofia i aso timuga —e faapena avā faamisa. E lelei le taumafai e pulea le matagi i le pulea o ia! E lelei le taumafai e uu le suāuu i tamatamaʻi lima o se tasi!”—Faataoto 17:9; 19:13; 21:19; 27:15, 16.
25 Ai se ā ua taulaʻi atu ai e le Tusi Paia i le avā lenei faatonuga? Atonu e talu ai ona o fafine e masani lava ona ootia o latou faalogona ma e sili atu ona tuugofie i le faatinoina o latou faalogona, ae maise lava pe a faavevesia i latou i se mea. E le gata i lea atonu latou te manatu ona pau lea o le auupega ua i a i latou. Ona o ia o le ulu o le aiga, atonu o le a fai ai e le tane lava ia le mea e loto i ai, ma atonu o le a faapea se lagona o le avā ua tatau i a te ia ona liliu atu i le aumaia o omiga tau i faalogona ootia. O oe le avā e tatau ona aua neʻi e gauai atu i ni faiga faapena, ma e tatau i lau tane ona aua neʻi faia se tulaga e faamalosia ai oe e te faia faapena.
26 E moni e i ai taimi atonu e te lagona ai ua lē lelei ou faalogona, ma atonu o le a maligi ai ou loimata, e tusa lava pe e te le manao i ai. Peitai e matuā ese mamao lena mai le faia o ni faiga faalēlelei ina ia maua le mea o e loto i ai.
27 Afai latou te alolofa moni i a latou avā, o le toatele o tane o le a sili atu lo latou naunau atu i a latou avā na i lo i latou lava, i mea e aafia ai manaoga faapito. Ia faamalie lau tane, ma o le a lē taumate lona sailia o avanoa e faamalie ai oe.
“O ONA PO E FAALOLOGO AI, MA ONA PO E TAUTALA AI”
28-35. (a) Ia faamatala amioga faatalanoaga e ono faafaigata ai mo se tane ona talanoa ma sana avā. (e) O le ā e mafai ona faia ina ia faaleleia ai talanoaga i le va o le tane ma le avā?
28 E toatele avā ua muimui mai, ‘E lē tautala mai lava laʻu tane ia te aʻu.’ Atonu o le tane ua paʻū i ai le sese. E ui i lea e tele taimi e manao ai se tane e talanoa ma lana avā, peitai ua lē faafaigofieina e le avā mo ia. I le a le auala? E lē tutusa fafine uma. Peitai ia fesili i a te oe lava pe fetaui oe ma se tasi o faamatalaga nei:
29 O le fafine muamua o se fafine e aunoa ma se faalavelave i le talanoa atu i isi fafine tuaoi. Ae o le ā lana auala? A faatali le tasi fafine sei manava mai lana tautala, o le a faalava ane loa lava o ia. Atonu o le a na togi ane ni nai fesili se lua, po o le faamatalaina foi o se isi mea e matuā ese mamao lava. E lē umi a e toe oso atu lē na tautala muamua ma toe tauaveina le talanoaga mo sina taimi. E leai se isi o i laʻua e foliga mai e lē fiafia po o amanaiaina lenei talanoa saoloto o tagata uma.
30 Nei la ua foi mai lana tane i le aiga ma e i ai sana tala fou e fia faamatalaina. A o ulufale atu o ia i le faitotoa, ua amata atu loa lana faamatalaga, ‘E te lē taitai e matea le mea na tupu i le galuega . . . .’ E leai se isi laasaga na ia oo i ai. Na oso atu loa le avā ma faafesalavei ane, ‘Na faapefea ona i ai le pisia le nane e i lou ofu? Ia faaeteete lau savali. Faatoa uma nei lava ona ou salu le fale.’ Atonu o le a faaletonu o ia e toe faaauau lana tala.
31 Pe atonu foi o latou talanoa ma ni uo ma o loo faamatala e le tane se mea na tupu, peitai ua lē taʻua e ia tulaga auiliili po o le lē atoatoa lelei foi o le mea na tupu. O le a faalava ane loa lana avā, muamua ina ia faasaʻoina mea o faalētonu, ona faamaea ai lea o le tala i le mea na tupu. E lē umi a e mapuea le tane ma faapea atu, ‘Ai se ā e te lē faamatalaina ai la?’
32 O le tasi fafine o le ituaiga lea e apoapoai i lana tane ia talanoa. E taumafai ia foliga mai e pei o se mea e lei mafaufauina, peitai o le a oso atu ma le fia iloa ma fesili atu: ‘O fea sa e i ai?’ ‘O ai sa i ai?’ ‘O le ā le mea na tupu?’ E lē o mea taatele o le olaga, peitai o mea peiseai e sili atu ona faalilolilo o mea na e faaosofia i ai lona fia iloa. Na te faapipiia faatasi nai fasi faamatalaga na te aoaoina malie ma faatutumu ni nai avanoa i ona lava mafaufauga. Atonu o nisi o nei mea o ni faamatalaga sa lei tatau ona faaalia e lana tane. O isi mea atonu sa talafeagai lava lo la talanoaina ma lana avā, peitai sa taʻuina ma le agaga mautinoa ia na o i laʻua lava e iloaina. Afai nei la o le a talanoa atu le avā i nisi e uiga i lea mea, ua lepetia la le faatuatuaga. “Aua le faaali atu le upu faalilo a le tasi tagata,” o le lapataiga lena a le Faataoto 25:9. Peitai afai o le a faia e le avā e ono tutupu mai ai ni faafitauli. O le ā le tele o le faalogona saoloto o le tane e uiga i lona talanoa atu i lana avā i le lumanai?
33 Ma o lona tolu o ituaiga o fafine o ia lea e faalētautala. Na te iloa pe faapefea ona fai galuega tatau i le fale, peitai e seasea lava tele ni upu e tautala ai. Soo se tasi e taumafai e talanoa ma ia o le a na faia uma faamatalaga. Atonu pe matamuli pe fefe gofie o ia, pe atonu foi e itiiti se avanoa na aʻoga ai a o laitiiti. E tusa lava po o le ā le mafuaaga a e lē taulau lava taumafaiga uma ia talanoa ma ia.
34 Peitai e mafai ona faia ni suiga. O le matata o le talatalanoa e mafai ona aʻoaʻoina. Afai e faia e se fafine, e lē na o ana galuega tau fale, a e faapea foi ma le faitauina o mea aoga ma galuega lelei mo isi tagata, o le a maua la e ia mea e atiina aʻe ai e tufaina i lana paaga. Ma o se talanoaga manuia e manaomia le i ai o sau vaega. E manaomia foi le faaaloalo—ia lava lelei lea faaaloalo e tuuina atu ai i a te ia e faaumaina le mea o ia tautala ai, ma a tautalagia e ia i lana lava auala, ma ia iloa foi le taimi e taofia ai se mea tāua e lē o manao e faailoa. E pei ona fai mai le Failauga 3:7, e i ai “ona po e faalologo ai, ma ona po e tautala ai.”
35 O le mea lea, na i lo le muimui faapea e seasea talanoa atu lau tane i a te oe, ai se ā e lē taumafai ai ia avea ma fiafiaga i a te ia le faia faapena? Ia naunau i mea na te faia. Faalogologo lelei pe a tautala o ia. Sei faaalia mai i lau tali atu le alofa mafana ma le faaaloalo loloto o loo i a te oe mo ia. Ia mautinoa o le tele o mea o loo oulua talanoa o mea moni ma e atiina aʻe ai. E lē pine a e lua iloa o le talatalanoa o se fiafiaga mo oulua uma.
“IA MAUA I LATOU . . . A E LEAI SE UPU”
36-38. O ā nisi o auala e paʻi atu ai i le fatu o se paaga e lē o se tagata talitonu?
36 I nisi taimi, e leo tele atu gaoioiga i lo upu, ae maise lava le moni i tane e lē ni tagata talitonu i le Afioga a le Atua. E uiga i a i latou fai mai le aposetolo o Peteru: “Ia maua i latou i le amio lelei a le avā, a e leai se upu, pe a latou vaai ane i a outou amio le gaoiā ma le mataʻu.” (1 Peteru 3:1,2) E toatele tane lē talitonu ua finau mai ua masani pea ona “talaʻi” atu avā i a i latou, ma latou teena. I le tuu faafeagai, o isi ua avea ma tagata talitonu i lo latou vaaia o suiga ua faia e le upu moni i a latou avā. Ua masani lava ona maofa tagata i lo latou vaai i se lauga na i lo le faalogo i ai.
37 A e tautala i lau paaga lē talitonu, “ia le aunoa a outou upu ma le alofa,” i le uiga lelei, po o, “ia faamāi i le masima,” e pei ona faaupuina ai e le Tusi Paia. E i ai le taimi e tautala ai. “O le upu ua fai faatatauina, o moli auro ia i ato ario togitogi faamamanuina,” ua fai mai ai le Tusi Paia. Pe ua faalotovaivaia ea o ia i se mea? Atonu e i ai se mea sa faalētonu i le galuega. O ni nai upu itiiti ma le malamalama atonu e talisapaia e ia i le taimi nei. “O upu matagofie, . . . e suamalie i le loto, ma le mea e malolo ai ivi.” (Kolose 4:6; Faataoto 25:11; 16:24) Ia, pe afai ua talafeagai mo le tulaga ua i ai, atonu o le tuu atu o ou lima i ona lima o le a faamatalaina ai mea uma lava faapea: Ua ou malamalama, O loo ou i ai i lau itu, O le a ou fesoasoani i a te oe pe a mafai.
38 E ui lava ina le faatasi o ia ma oe i lou faatuatuaga, ae ua faaalia e le Afioga a le Atua e tatau lava ona e usiusitai atu i a te ia. O lau amio lelei atonu o le a e maua mai ai o ia i le taimi ua tatau ai ma lua faatasi ai i lou faatuatuaga. Maeu se fiafia o le a i ai i lena aso! Ma afai e oo mai lena taimi, o le a na iloaina e tele mafuaaga ua i a te ia e alofa ai i a te oe na i lo le mea sa na iloaina muamua. Ona o lou naunautai, atoa ma lou mausali i le mea ua e talitonu o le mea saʻo, o le a fesoasoani ai i a te ia ia tago atu “i le ola moni.”—1 Korinito 7:13-16; 1 Timoteo 6:19.
39, 40. O ā uiga o loo lisiina mai i le Tito 2:4,5 ua faia ai se avā ma se ua pele e lē gata i lana tane a e faapea foi i a Ieova?
39 Ua apoapoai mai le Tusi Paia i avā Kerisiano, e tusa lava pe talitonu a latou tane pe leai foi, ia “alofa atu i a latou tane, ia alofa atu i a latou fanau, ia faautauta i latou, ia le gaoiā, ia tausi lelei i o latou aiga, ia agalelei, ia usiusitai atu i a latou lava tane, ina neʻi upuleagaina le afioga a le Atua.”—Tito 2:4,5.
40 Afai e faia e oe le avā, lenei mea i le tulaga e gata mai ai lou tomai, o le a alofagia faapelepeleina oe, e lē gata ai mai lau tane, a e faapea foi i a Ieova le Atua.
[Fesili mo le Suʻesuʻega]
[Ata i le itulau 57]
“O le avā amio lelei, . . . e silisili lona tau i penina.”—Faataoto 31:10
[Ata i le itulau 64]
O fafine i le olaga o Samasoni
